kunder

auto_12rada1505213493.jpg
Sej rie09:45 | 15/05/2019

Politikania serbe e Kosovës Radia Trajkoviç ka bërë kallëzim penal për presidentin e Serbisë Aleksandër Vuçiç si dhe për Gjuriç. Ajo e akuzon kreun e shtetit serb se po pengon hetimet për vrasjen e Oliver Ivanoviç.

Mediat kosovare raportojnë se kryetarja e Lëvizjes Evropiane për Kosovën, Rada Trajkoviç, ka bërë kallëzim penal ndaj presidentit të Serbisë, Aleksandar Vuçiç dhe drejtorit të ashtuquajturës Zyrë në Qeverinë e Serbisë për Kosovën, Marko Gjuriç.

Sipas FoNet, në kallëzimin penal thuhet se Vuçiç dhe Gjuriç po pengojnë hetimet për vrasjen e politikanit serb në Kosovë Oliver Ivanoviç; duke rrezikuar në këtë mënyrë sigurinë në vend.

Ndër të tjera thuhet se Vuçiç, ka deklaruar se “historia e bashkimit të veriut dhe jugut të Mitrovicës është edhe një përpjekje e shqiptarëve për të hyrë në veri të “krahinës” dhe të sundojnë me veriun e Kosovës, për çfarë po i ndihmon edhe Rada Trajkoviç me dëshminë e saj për vrasjen e Oliver Ivanoviç.

Trajkoviç, disa herë është shprehu se ishte pikërisht Vuçiç ai i cili po pengon hetimin për vrasjen e Ivanoviç, shkruan Koha.net.

Ndërkaq, në kallëzimin penal, gjithashtu, thuhet se Gjuriç “më 22 Prill, mes tjerash, theksoi se Rada Trajkoviç është vetëm njëra nga pjesëmarrësit e një fushatë të organizuar për rrënimin e reputacionit të shtetit (Serbisë) dhe institucioneve tjera”.

Në kallëzimin penal, gjithashtu, thuhet se Vuçiç e Gjuriç Trajkoviç se është tradhtare e popullit serb, bashkëpunëtore e armiqve të shtetit dhe popullit dhe se punon për shërbimet e huaja të inteligjencës./ABC News 24/7

suedia-1280x840.jpg
Sej rie14:37 | 13/05/2019

Prokuroria e Suedisë rihap hetimet ndaj themeluesit të Wikileaks Julian Asanzh. Ai akuzohet për përdhunim dhe krime të tjera seksuale ndaj dy grave. Stokholmi, shumë shpejt mund të kërkojë ekstradimin e tij.

Telashe të reja për Julian Asanzh. Prokuroria suedeze ka hapur sot hetimet për akuzat për përdhunim kundër themeluesit të Wikileaks. Asanzh ndodhet në gjendje arresti në Mbretërinë e Bashkuar që nga 11 Prilli pas dëbimit nga ambasada e Ekuadorit në Londër, e cila i anuloi të drejtën për azil politik. Asanzh qëndron në burg pasi ka shkelur rregullat e lirisë me kusht duke u strehuar 7 vjet më parë në selinë diplomatike ekuadoriane.

Ai është dënuar me 50 javë burg. Asanzh është akuzuar për përdhunim dhe krime të tjera seksuale nga dy gra pas një konferencë për Wikileaks në Stokolm në vitin 2010. Themeluesi i Wikileaks ka mohuar gjithnjë akuzat, duke thënë se marrëdhënie seksuale me të dyja gratë, kishte ndodhur me pëlqimin e të dyja palëve. Deri tani ai ka shmangur ekstradimin në Suedi pasi u strehua në ambasadën e Ekuadorit në Londër në vitin 2012.

Çështja kundër tij në Suedi ishte mbyllur pasi ishte e pamundur që të merrej në pyetje, ndërsa ndodhej në ambasadën e Ekuadorit në kryeqytetin britanik. Tashmë Suedia mund t’i bashkohet Shteteve të Bashkuara të Amerikës për ekstradimin e tij. SHBA ka që në vitin 2010 që kërkon arrestimin e Asanzh, pasi Wikileaks publikoi një sërë dokumentesh sekrete të Pentagonit dhe institucioneve të tjera amerikane. Autoritetet amerikane e akuzojnë për bashkëpunim në pirateri informatike së bashku me Çelsi Mening./ABC News Albania 24/7

bukepjekesii-1280x698.jpg
Sej rie16:55 | 05/05/2019

Vijojnë në Beograd protestat kundër bukëpjekësit nga Prizreni. Ata i kërkojnë të largohet nga Serbia dhe të mbyllë biznesin e tij. Por, në mbështetje të tij ka pasur dhe banorë të zonës në periferi të kryeqytetit serb.

Të gjitha rrugët të çojnë në Romë. Historia e bukëpjekësit nga Kosova në periferi të Beogradit ka vazhduar. Tani pa koka derri, por me parulla për Kosovën dhe mbishkrimin pa respekt nuk ka biznes. Të indinjuar me shqiponjën dykrenare që vëllai I pronarit e ka nxjerr në rrjetet sociale në një çast diku në qendër të qytetit ka nxitur reagime. Ata u sugjerojnë që ta mbyll dyqanin dhe të ik vet nga ky vend pasi aty nuk është i mirëpritur.

Organizata dhe parti politike kanë apeluar tek pushteti ta ndaloj këtë tubim, por kjo nuk ka ndodhur.

Millosh Simovic nga Këshilli Organizativ i Protestave: “Motoja jonë është që ne nuk urrejmë askënd. Këtu jetojnë shumë pakica e kombe, por kurrë nuk ka pasur problem deri më tani. Ne kemi të drejtë që të mos përdorim më produktet e tij dhe nuk do të blejmë aty. Ky është mesazhi që duam të japim”.

Kjo grua është e vetmja në mbështetje të pronarit Mon Gjuraj. Ajo thotë se bukëpjekësi nga Prizereni e ndihmon për sëmundjen e të bijës pasi trajtimi është I shtrenjtë dhe e ka mbështetur me organizimin e donacioneve. Gjura, siç i thonë, nuk duhet të ikë.

Ljiljana Dragojllovic, qytetare: “E njoh bukëpjekësin tonë Gjurën, dhe na ka ndihmuar shumë kur kemi pasur njerëz të sëmurë. Por dhe për nevojat e tona të përditshme, për gjëra që është dashur t’i bëjë shteti. Një gjë e tillë nuk duhet të ndodhte”.

Mbështetja e qytetarëve dy ditë më parë për të ngrënë byrek nuk i ka ndaluar të thonë mendimin e tyre. Bukëpjekësi, siç thonë, i ka ofenduar.

Gjuraj ka edhe një dyqan tjetër në një pjesë të kësaj lagjeje. Për tek dyqani I dytë janë nisur protestuesit për ta parë nëse atje punon. Thonë se serbët janë mikpritës për ata që kanë respekt andaj me vetë kanë marrë bukë e kripë e zemër, por shqiponja nuk tolerohet. Në masë ka edhe të tillë.

Arrijnë tek dyqani i dytë dhe thonë se më nuk do të merren me këtë çështje nëse nuk ka provokime të reja. E shpallin të mbyllur protestën e tyre. Për Gjurajnë ka ngelur ta shoh si rrjedh situata dhe ka refuzuar mediat./ABC News Albania 24/7

PARASHUTISTE-1280x649.jpg
Sej rie20:55 | 27/04/2019

Katër kadetë parashutistë rusë, janë përjashtuar nga radhët e ushtrisë pasi protestuan kundër ndryshimit të ngjyrës së uniformës nga bojë-qielli në jeshile. Ngjarja ndodhi në shkollën prestigjioze të luftës në Riazan.

Rreth 40 kadetë parashutistë të shkollës prestigjioze të luftës në Riazan, e cila përgatit zyrtarë të trupave të parashutistëve, protestuan kundër ndryshimeve që i janë bërë uniformave të tyre. Ata sfiduan para monumentit të themeluesit të ushtrisë së parashutistëve, gjenerali Margelov, duke hequr gradat nga supet dhe duke i hedhur në këmbët e monumentit. Në disa nga gradat shkruheshin kritika ndaj komandos së ushtrisë, por kërkohej dhe falje pasi nuk arritën të mbronin ngjyrën bojë-qielli të uniformës.

Protesta u nis pas vendimit për të zëvendësuar ngjyrën bojë-qielli me jeshilen e errët. Gjenerali Margelov është miti i të gjithë para ushtarakëve rusë, themelues i ushtrisë së parashutistëve dhe krijues i uniformës klasike në ngjyrë bojë-qielli. Shkolla e luftës Riazan është më antikja në Rusinë modern. U krijua në vitin 1918 si shkollë për komandantët e Rojeve të Kuqe, më pas e transformuar në shkollë lufte për parashutistët. Një vit më parë ajo festoi 100 vjetorin e krijimit. Komandanti aktual i ushtrisë së parashutistëve, gjenerali Shamanov, deklaroi se kishte përjashtuar katër kadetë për mosbindje dhe shkelje të disiplinës./abcnews.al

meta-rama-1280x636.jpg
Sej rie13:15 | 27/04/2019

Opozita zyrtarizoi vendimin për të mos hyrë në zgjedhjet e 30 Qershorit, teksa një parti e re u krijua nga të larguarit prej Partisë Demokratike. Këto zhvillime tërhoqën debatin publik, por më në hije, nisi një lëvizje e partive aleate të Lulzim Bashës për të aktivizuar presidentin e Republikës me konsensus të ndërkombëtarëve në Tiranë. Mimoza Koçiu na sjell këtë dinamikë me Politika në ABC News./abcnews.al

haradinaj-3-1280x723.jpg
Sej rie19:00 | 19/04/2019

Institucionet në Prishtinë kanë ndërmarrë një seri iniciativash për të reaguar ndaj mohimit që Serbia u bën krimeve të luftës në Kosovë. Parlamenti i Kosovës u ka kërkuar Parlamenteve të vendeve mike që të hartojnë rezoluta në mënyrë që të njohin genocidin e shtetit serb ndaj popullsisë shqiptare.

Mohimi i krimeve të luftës nga Serbia ka shtyrë institucionet e Kosovës që të ndërmarrin një sërë iniciativash. Kryetari i Parlamentit të Kosovës Kadri Veseli u ka dërguar letër parlamenteve të vendeve mike, për të kërkuar prej tyre hartimin e rezolutave që në mënyrë zyrtare njohin rolin e shtetit serb si shkaktar i krimeve kundër njerëzimit në Kosovë. Veseli gjithashtu do të kërkojë nga vendet mike të dënojnë çdo përpjekje për ta mohuar apo ndryshuar atë pjesë të errët dhe të dhimbshme të historisë bashkëkohore evropiane. Iniciativën e Veselit e ka mirëpritur edhe kryeministri i Kosovës Ramush Haradinaj. Ai ka thënë se në këso raste duhet të jemi unik dhe se në Kosovë kanë ndodhur krime makabre.

Ramush Haradinaj, kryeministër i Kosovës:  “Për këtë është e rëndësishme të jemi unikë sepse kjo është një temë që buron nga e drejta e viktimave, e drejta humane. Duhet të mbrohet e drejta e asaj që ka ndodhur pasi janë krime makabre”.

Ndërsa zv.kryeministri Enver Hoxhaj dhe ministri i Drejtësisë Abelard Tahiri kanë njoftuar për hapat që kanë ndërmarrë për hartimin e një projektligji për parandalimin e mohimit të krimeve të luftës.

Enver Hoxhaj, zv.kryeministër i Kosovës: “Në draftimin e këtij ligji ne do marrim për bazë përvojat më të mira evropiane, se si në kulturën evropiane ligjore e politike janë parandaluar raste të tilla të mohimit të krimeve”.

Abelard Tahiri, ministër i Drejtësisë:Përgjatë këtyre viteve ne nuk e kemi parë drejtësinë të shkojë në vend për krimet që janë bërë ndaj popullsisë shqiptare në vitet 98-99”.

Krerët e shtetit serb dhe ish ministri serb në qeverinë e Kosovës kanë mohuar masakrat në Kosovë. Lidhur me këtë janë deklaruar edhe miqtë ndërkombëtarë, përfshirë Ambasadën e Amerikës dhe atë të Britanisë së Madhe të cilët kanë thënë se mohimi i mizorive të luftës në Kosovë ofendon kujtimet për viktimat dhe minon përparimin në ndërtimin e një shteti demokratik dhe shumetnik./abcnews.al

ramush-haradinaj.jpg
nev ila16:40 | 16/04/2019

Kryeministri i Kosovës, Ramush Haradinaj ka përsëritur qëndrimin e tij kundër ndryshimit të kufijve. Me një ton të ashpërsuar, Haradinaj ka deklaruar se kush punon kundër interesave të Kosovës herët a vonë do të “skuqet”, qofshin vendas apo ndërkombëtarë.

Kryeministri i Kosovës Ramush Haradinaj ka përsëritur qëndrimin e tij se nuk do të lejojë të ndryshohen kufijtë e Kosovës.

Në vendin e tij të lindjes, Haradinaj ka thënë se asnjëherë nuk ka bërë veprime kundër interesave të atdheut. Ai ka thënë se një ditë do të skuqen ata që po bëjnë veprime të padrejta kur Kosova po përballet me Serbinë.

Kush shkon në atë rrugë e ka gabim, qoftë vëlla i yni qoftë tjetër. Do të vijë dita kur shumica prej tyre do të skuqen për ato që po i bëjnë Kosovës. Janë gjëra të padrejta në kohën kur jemi duke u përballur me Serbinë, me axhendat e Vuçiçit dhe me planet e tij për ta ndarë Kosovën. Me planet e ndërkombëtarëve për të na ul kokën, goditjet nën brez të vëllezërve e motrave tona s’janë në rregull. Le të korrigjojnë veten ata që e dinë se si kemi ardhur deri këtu, se sa vështirë ka qenë e çfarë na pret”, ka thënë Haradinaj.

Ndërsa nga Kaçaniku kryetari i Kuvendit të Kosovës, Kadri Veseli ka kërkuar që të lihen anash inatet dhe të jenë të gjithë bashkë në dialogun me Serbinë, ndërsa ka shtuar se nuk do të ketë ndarje të Kosovës.

“Unë besoj se do të bëhemi bashkërisht, pozitë dhe opozitë, duke i lënë inatet më vete dhe të orientohemi drejtpërdrejt e të përfundojmë çështjen përfundimtare me Serbinë. Kosova është shtet i pavarur dhe sovran, nuk ka asnjë dilemë”, theksoi ai.

Dialogu Kosovë-Serbi aktualisht është pezulluar nga Beogradi për shkak të  taksës 100% të vënë ndaj produkteve serbe nga qeveria e Kosovës. Ndërsa ka qëndrime të ndryshme të krerëve të shtetit të Kosovës rreth çështjes së korrigjimit eventual të kufijve, ndërmjet Kosovës dhe Serbisë./abcnews.al

auto-grabitja-rinas-0-620x3401481461911-c1200x600.jpg
nev ila18:21 | 10/04/2019

Deklaratave të ministrit Sandër Lleshaj u është përgjigjur Aeroporti Ndërkombëtar i Rinasit.

Nëpërmjet një deklarate, zyra e shtypit e këtij aeroporti thotë se ka vënë në dispozicion të organeve kompetente, të gjitha materialet dhe regjistrimet e kamerave të sigurisë që hedhin dritë mbi grabitjen e djeshme.

Në deklaratë thuhet se autoriteteve të hetimit u janë dorëzuar të gjitha dokumentet që provojnë, se njoftimi për grabitjen është kryer në kohë kundrejt sallës operative të policisë në Rinas.

Më tej, në reagim thuhet se gjatë këtyre 3 viteve që nga ngjarja e ngjashme në aeroport në 2016, aeroporti ka marrë masa shtesë dhe ka ngritur në një nivel më lart sistemin e kamerave dhe gardhin rrethues.

“Forcat e policisë janë të pranishme në çdo cep të aeroportit si objekt i rëndësisë së veçantë, si zonë kufitare dhe policia e ka detyrë ligjore, për të ruajtur rendin dhe jetën e qytetarëve në rast incidenti të armatosur”, thuhet në deklaratën e Aeroportit Ndërkombëtar “Nënë Tereza”.

Deklarata e plotë e TIA:

“Tirana International Airport (TIA) shpreh keqardhjen e thellë për ngjarjen e djeshme të 9 Prillit 2019, me pasojë vjedhjen e një sasie të vlerave monetare në pistën e aeroportit.

TIA kishte vendosur të respektonte hetimet nga autoritetet përkatëse dhe në respekt të këtyre hetimeve, nuk u prononcua deri më tani, duke patur parasysh ndjeshmërinë e ngjarjes dhe çështjen e sigurisë së jetës të pasagjerëve, stafit dhe të gjithë punonjësve të shtetit shqiptar që operojnë në aeroport.

Por, pasi ndoqëm me shqetësim deklaratën zyrtare të Ministrisë së Brendshme, duket se etika e TIA-s ka shërbyer për herë të dytë për një keqinformim të publikut dhe fajësimin – si skenar i përsëritur – për një akuzë të rëndë që nuk qëndron në shpatullat e një koncesionari të huaj, pa mënjanuar kërkesat e Kontratës së Koncesionit që TIA përmbush çdo ditë në lidhje me sigurinë aeroportuale.

Tirana International Airport duke vlerësuar transparencën e informacionit për publikun dëshiron të informojë se ka vënë në dispozicion të organeve kompetente, të gjitha materialet dhe regjistrimet e kamerave të sigurisë që hedhin dritë mbi ngjarjen e 9 Prillit 2019.

TIA ka qenë korrekte në përmbushjen e detyrave të saj në lidhje me ngjarjen sipas të gjitha rregullave dhe procedurave. Autoriteteve të hetimit u janë dorëzuar të gjitha dokumentet që provojnë, se ky njoftim është kryer në kohë kundrejt sallës operative të policisë në Rinas.

TIA në bashkëpunim me Autoritetin e Aviacionit Civil Shqiptar, gjatë këtyre tre viteve nga ngjarja e ngjashme në aeroport në 2016, ka marrë masa shtesë dhe ka ngritur në një nivel më lart sistemin e kamerave dhe gardhin rrethues.

TIA është pjesë e auditimeve periodike qoftë nga Autoriteti i Aviacionit Civil, qoftë nga palët e treta. Bëjmë thirrje dhe lutemi për vëmendje të kuptojmë të gjithë, se forcat e policisë janë të pranishme në çdo cep të aeroportit si objekt i rëndësisë së veçantë, si zonë kufitare dhe policia e ka detyrë ligjore, për të ruajtur rendin dhe jetën e qytetarëve në rast incidenti të armatosur.

Bashkohemi tërësisht me meritat që kanë forcat e Ndërhyrjes së Shpejtë në operacionin e djeshëm, zanafilla e të cilit ishte njoftimi i TIA-s.

TIA bën thirrje për trajtimin e kujdesshëm të informacioneve që jepen për publikim kur lidhen me çështje të sigurisë, sepse do përbëhej një rrezik shtesë për çdo rrethanë.

TIA vlerëson me respekt hetimet, çdo qytetar, çdo punonjës policie dhe dëshiron të theksojë, se kur cënohet siguria dhe jeta e një qytetari, jemi të gjithë në të njëjtin krah.

Aeroporti nuk është i kinezëve, është i gjithë shqiptarëve. Eshtë pjesë e territorit të Shqipërisë dhe mbrohet me ligj nga Policia e Shtetit si çdo metër i këtij vendi. Ndaj deklaratën zyrtare të Ministrisë së Brendshme e vlerësojmë si të pasaktë.

Rikthesojmë se në zbatim të përgjegjësive dhe detyrimeve të Kontratës së Koncesionit, dhe në bazë të Programit Kombëtar të Sigurisë të Aviacionit Civil, TIA ka zbatuar me korrektësi të plotë procedurën e njoftimit në kohë të policisë.

Tirana International Airport mbetet në dispozicion të pasagjerëve dhe opinionit publik për informacione të mëtejshme”./abcnews.al

shba-1-1280x730.jpg
ent ela22:46 | 27/03/2019

Sekretari amerikan i Shtetit, Majk Pompeo ka deklaruar të mërkurën se shpreson që së bashku me vendet aleate të NATO-s të ndërmarrin hapa shtesë kundër pranisë ruse në Ukrainë. “Shpresoj se javën e ardhshme do të mund të njoftoj një tjetër seri veprimesh që ne do të ndërmarrim së bashku me aleatët tanë”, ka deklaruar Pompeo gjatë një raportimi në Kongres. Hapat e mëtejshëm do të bëhen të ditur gjatë vizitës që do të bëjnë përfaqësues të vendeve anëtare të NATO-s në Uashington. Pompeo tha se më parë. Uashingtoni mund të kishte bërë më shumë për t’iu përgjigjur aktiviteteve të Moskës në Ukrainë.

 

bullgari-1280x672.jpg
ent ela09:45 | 20/03/2019

Në kryeqytetin bullgar në Sofje, agjentët e policisë po përpiqeshin të shpërndanin një turmë njerëzish që protestonin para Parlamentit. Agjentët përdorën “spraj djegës, por mbetën vetë viktima të këtij gjesti. Agjentët e policisë nuk morën në konsideratë drejtimin nga frynte era, kështu që spraj ka përfunduar i gjithi në fytyrat e tyre. Sipas mediave, policia nuk është aspak eksperte për shkak të mungesës së trajnimit dhe ushtrimeve, pasi zakonisht protestat janë paqësore dhe policia nuk përdor masa të tilla./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono