kukesi

kukesi-sherebela.jpg
G. P.15:23 | 08/09/2019

Në Shtiqën të Kukësit fermerët ndihen të falimentuar. Shumë prej tyre kanë hequr dorë nga sherbela, por edhe bizneset e tjera nuk u kanë funksionuar.

Sapo e pyet Nebiun, për programin e 100 fshatrave, pjesë e të cilit është edhe Shtiqni, ngre super dhe thotë vetëm atë se çfarë është përfolur në media.

“Kemi dëgjuar, por jemi të pamundur. Nuk ka gjë që nuk bëhet, problemi është se nuk janë mundësitë”, tha ai.

Nebiu ishte kultivuesi dhe prodhuesi më i madh fidanëve të sherebelës në Kukës e më gjerë, por hoqi dorë nga mungesa e tregut, mungesa e mbështetjes dhe subvencioneve dhe pamundësisë për shlyerje të kredisë ndaj ka vendosur të merret me bimë të tjera me më pak kosto.

“Sherebelja u eliminua për arsye të tregut se nuk ka. I kam heq sherbelën, kam fut haronjat. E kam ngritur zërin te Ministria e Bujqësisë, por nuk kam pasur përkrahje dhe nuk është në skemën e subvencioneve”, u shpreh ai.

E në fakt Nehbiu nuk është i vetmi fermer në këtë gjendje. Prag falimentimi është dhe Muhamet Muja që mbarshtron blegtori. I zhytur në kredi dhe pa mbështetje ka arritur deri këtu duke ndërtuar stallën, mjetet e mekanikës bujqësore, por pa mundur ta zhvillojë më tej.

“Në teori e dimë që është tek 100 fshatrat. Kemi një eksperiencë jo të mirë këto vite. Gjithçka kemi bërë e kemi bërë nëpërmjet kredive, të cilat i kemi marrë nëpërmjet interesave shumë të larta”, tha ai.

Për Muhametin, programi i 100 fshatrave mbetet një utopi e pa implementuar.

“Asnjë gjë vetëm llafe. Nuk ka asnjë zhvillim nga bujqësia, shumë pak. Nuk ka shteti dorë të na ndihmojë”, tha ai.

Sa më shumë banorë në Shtiqen pyet aq më pak dinë për këtë program. Shtiqni, një fshat ngjitur me qytetin e Kukësit, nuk u përzgjodh rastësisht në këtë program. I ka të gjitha resurset, fushën më të madhe në rajon, ujë të bollshëm, pemëtari e blegtori.

Autostrada e përshkon mes për mes. Ka aeroportin e plot mundësi të tjera. Ndaj u pa si mundësi për zhvillimin e agroturizmit përmes programit të qeverisë për 100 fshatrat.

Mirëpo që nga 2017 kur nisi ky program, asgjë konkrete nuk është ndërmarrë. Bashkia e Kukësit u tregua korrekte në studimin dhe hartimin e projekteve zhvillimore të Shtiqnit, që nuk janë pak, por plot 72 të tilla.

Por nga ana e qeverisë edhe pse u krijua bërthama brenda Këshillit të Ministrave me një koordinator kombëtar, duket se nuk është zbritur akoma në terren, të paktën në Kukës. Banorët e Shtiqnit janë skeptik. Pak nga pak po largohen edhe të rinjtë nga fshati, e duke lënë të moshuarit pa fuqi punëtore.

Gjithsesi Shtiqnin mbase do e zhvillojë vetë koha për shkak të pozitës gjeografike që ka. Emigrantët sjellin remitancat dhe pamja e tij ka ndryshuar me shtëpi e vila bashkëkohore, rrugë e ndriçim, ujë e sistem ujitje, kopshte e shkolla, por ende pa mundur të krijojnë atë për të cilin duhet të vijnë turistët.

Bujtinat, minirestorantet e vogla të traditës apo dhe mini-bizneset e agrokulturës dhe përpunimit. Kjo i takon politikave qeverisëse të përfshira në program e që deri më sot mbeti vetëm në letër.

Gazetar: Bujar Muçmata

ABC News Abania 

NDRYSHIMET-TE-VLLAZNIA-DHE-KUKSI_ABC-M2-T1.mpg_snapshot_00.35-1280x720.jpg
ent ela14:32 | 02/09/2019

Skuadra e Vllaznisë bën një tjetër ndërhyrje në merkato, kësaj radhe në repartin mbrojtës. Mbrojtesi Godfrij Ualasambi ka firmosur për një sezon me shkodranët dhe do të jetë nën urdhrat e trajnerit Mirsad Jonuz në fundjavë.

Ashtu siç ishte premtuar nga pjestarët e stafit teknik, KF Vllaznia ka bërë realitet edhe marrjen e një tjetër lojtari. Bëhet fjalë për mbrojtësin e majtë Ualusimbi Godfrey. Me këtë futbollist është firmosur një kontratë njëvjeçare dhe ai pritet të mbërrijë në Shkodër brenda kësaj jave, sapo të paiset me vizën hyrëse në Shqipëri. Ndërkohë, Godfrey është federuar brenda afateve të mbylljes së merkatos dhe tashmë edhe zyrtarisht është pjesë e Vllaznisë. 30 vjeçari ka një karrierë të gjatë e të suksesshme dhe prej 10 vitesh është pjesë e kombëtares së Ugandës me të cilën ka luajtur 93 ndeshje dhe ka shënuar 3 gola. Me përvojën e tij, Godfrey pritet të jetë një element i rëndësishëm për ekipin e Vllaznisë në repartin e mbrojtjes, njofton skuadra e Vllaznisë.

Skuadra e Kukësit ka njoftuar ndërprerjen e bashkëpunimit me futbollistin Faton Xhemaili. 20 vjeçari u transferua te Kukësi në merkaton e janarit por nuk e fitoi vendin e titullarit. /ABC News Albania 24/7

kukesi-laci.jpg
G. P.20:11 | 01/09/2019

Kukësi u ndal nga Laçi në javën e tretë të Superligës, duke mos arritur më shumë se një barazim 1-1. Në “Loro Boriçi” të Shkodrës, skuadra e trajnerit Duro shpëtoi nga humbja vetëm në minutat e fundit.

Kush mund të thotë se pretendentët fitojnë gjithnjë?

Partizani mezi fitoi në Gjirokastër në mesjavë, ndërsa Kukësi nuk e bëri dot as këtë, pasi u ndal nga Laçi.

Skuadra me pretendime, e trajnerit Duro dhe presidentit Gjici, ishte kryesuese deri para duelit të Superligës dhe luante ndaj njërit prej ekipeve të fundit të renditjes, por përfundimi nuk ishte i lumtur.

Barazim 1-1 në stadiumin “Loro Boriçi” në Shkodër, impiant që luajti ndeshjen e dytë në dy ditë, kjo për shkak të konservimit të “Elbasan Arenës” për përballjen e kombëtares ndaj Islandës në 10 shtator për Euro 2020.

Kuksianët u përpoqën më shumë sesa kurbinasit, por nuk ia dolën, madje edhe humbjen e shmangën fare në fund.

Padyshim që ata vazhdojnë të vuajnë faktin se ndeshjet shtëpiake po i luajnë në fusha asnjanëse, dhe ky është një justifikim i fortë, ndonëse nuk i pëlqen aspak presidentit Gjici.

Kukësit nuk i bën punë as emrat e rëndësishëm në formacion si Teqja, Kitanovski, Rroca, Ethemi, Gavazaj apo Shkurtaj, madje as Abazaj që hyri pas pushimit.

Skuadra mike, e drejtuar nga Sulejman Starova, kaloi në epërsi në nisje të pjesës së dytë me anë të sulmuesit Nuabueze, dhe kishte fitoren në dorë deri tri minuta para fundit.

Nënkampionët u shpëtuan nga Musta që shënoi një gol shumë të bukur nga jashtë zonës. Kjo ishte pika e parë e Laçit në këtë sezon të Superligës, ndërsa Kukësi është me pikë të barabarta me Tiranën e Teutën, nga 7 pas tri ndeshjesh./ABC News Albania 24/7

erenst-gjoka-1280x665.jpg
nev ila16:30 | 30/08/2019

Kukësi, Partizani dhe Tirana do të jenë pretendentë për titullin kampion. Kjo është analiza e trajnerit Ernest Gjoka për sezonin e Superligës, ndërsa vlerëson edhe Skënderbeun.

 

Kanë kaluar vetëm dy javë, tepër pak.

Gjithsesi, tifozët e Superligës do të donin të kishin një parashikim specialisti se cilët mund të jenë pretendentët për titull dhe për Europën këtë sezon.

Një analizë të tillë e bën trajneri me përvojë, Ernest Gjoka, së fundmi në stolin e Kukësit, në intervistën për Abc News-in.

Ai nuk e mendon Skënderbeun si kampion, por e vlerëson lart.

A e shikon Gjoka Tiranën për titull?

Partizani nuk ka bërë nisjen më të mirë, ndërsa ka trajner të ri, italianin Lerda./ABC News Albania 24/7

ndeshja.jpg
G. P.16:55 | 28/08/2019

Kukësi shkon për fitore në fushën e Flamurtarit, në ndeshjen e sotme të Superligës, në orën 19:00. Pas fitores me Partizanin, trajneri Duro kërkon vazhdimësi, por edhe vlonjatët nuk duan që të dorëzohen.

Padyshim që emocion ka, pasi kthehet shpejt aty. Shpëtim Duro do të vihet sot përballë Flamurtarit, madje brenda në Vlorë, ndërsa dy sezone më parë ishte trajner i kuqezinjve.

Pas një përvoje në Kosovë, ja ku vjen si kundërshtar në stolin e Kukësit për ndeshjen e Superligës që luhet në 19:00. Duke folur për mediat, tekniku tiranas theksoi se po kthehej me nostalgji në Vlorë, ku është vlerësuar dhe respektuar për sa kohë punoi aty.

Gjithsesi, Duro pohon se ashtu si në çdo ndeshje tjetër, do të kërkohet tripikëshi. Trajneri vlerësoi lart paraqitjet e bëra ndaj Partizanit, në Superkupë dhe në kampionat, si dhe fitoren e fundit, duke kërkuar vazhdimësi.

Kukësi tashmë do të ketë edhe një lojtar të ri, Kristal Abazajn, që u prezantua nga drejtori sportiv, Nexhipi, ndërsa pritet që të luajë direkt në formacion, ose të paktën të jetë i gatshëm për ndeshjen.

Kukësi është më i plotësuar me ardhjen e Abazajt, Kotobellit dhe afrikanit Obanor, pavarësisht largimeve në mbrojtje dhe dëmtimit të kapitenit Musolli.

Flamurtari, ndërkaq, e pret ndeshjen në pozita të vështira. Skuadra dihet që është krijuar vonë, dhe gjithashtu vonë ka nisur punën përgatitore, duke mos qenë gati për nisjen e kampionatit. Gjithsesi, trajneri Sadedini, kërkon sukses pas humbjes në Korçë.

Sadedini shqetësohet se, me gjendjen që ka skuadra, tri ndeshje në gati një javë janë shumë dhe mund të ndikojnë për keq./ABC News Albania 24/7

kukesi-i-nendheshem-1280x706.jpg
nev ila12:28 | 25/08/2019

Ekipi i ABC News sjell për herë të parë pamje ekskluzive dhe historinë për atë që sot quhet Kukësi i nëndheshëm. Gazetari Bujar Muçmata dhe operatori Fatjon Rexha sjellin një histori që kurrë më parë nuk është bërë e njohur për publikun.

Në kthinën e këtij lokali në Kukës ndodhen një palë shkallë. Në pamje duken pa funksion dhe ashtu të harruara.

Askush nuk e di se aty është  njëra prej pesë hyrjeve më të rëndësishme të qytetit nëntokësor.

Njërit prej vendstrehimeve më të mëdha në rajon e i fortifikuar për tu bërë ballë shpërthimeve atomike.

Me inxhinier Feti Gjicin edhe grupi i ABC News  për herë të parë zbriti në Kukësin e nëndheshëm.

Jo pak por më shumë se 30 metra nën atë ekzistues. Shkallët në formë rrethore s’kanë të sosur në zbritje.  Kryqëzime e tunele si një labirint pa fund.

Duhet të kesh frikë nga keq orientimi e mos dish të kthehesh në dalje, ndaj nuk largohesh dot më shumë.

Inxhinier Fetiu e njeh mirë sepse ka qenë projektues edhe ndjekës i punimeve.

Të habit fakti kur mëson se për Kukësin  nëntokësor është punuar gati 20 vite e shpenzuar miliarda.

Ndërtime të pabesueshme. Një spital për 300 shtretër, fabrika e prodhimit të bukës, hapësirat e tjera për vendkomanda e shumë zyra për administratën.

Pra e përllogaritur për 20 apo 30 mijë banorë në një periudhë kohore për të paktën 4 deri gjashtë muaj.

Tunelet në trajtë labirinti lidhin çdo hapësirë e përshtatur për funksione të ndryshme. Kurse hyrja realizohej në pesë vende të ndryshme të qytetit.

Një pjesë ë pallateve e ndërtuar në atë periudhë, i kanë në çdo shkallë portat e blinduara dhe tunelet hyrëse për në qytetin e nëndheshëm.

Porta ka edhe për konviktet e institucionet arsimore.

Pa hezitim  Kukësi është një ndër qytetet më të fortifikuara.  Ndaj nuk është habi kur pak kohë më parë mediat ndërkombëtare e renditën Shqipërinë  pas SHBA dhe Zvicrës si vendi me sigurinë më të madhe për sulmet bërthamore dhe atomike, për shkak të vendstrehimeve të shumta të ndërtuara gjatë luftës së ftohtë.

Por ky aset i rëndësishëm pak njihet publikisht. Është punuar dhe mbajtur nën monitorim të rreptë gjatë ndërtimit. Këtu mund të jetë një muze madhështor. Çka do të shuante kureshtjen të jo vetëm çdo shqiptari./ABC News Albania 24/7

 

KUKESI-PARTIZANI-FITORJA.mpg_snapshot_00.06-1280x720.jpg
ent ela15:00 | 24/08/2019

Kukësi bindi trajnerin e tij Shpëtim Duro, duke mundur Partizanin në startin e Superligës. Trajneri i kryeqytetasve, Franko Lerda, pranoi gabimet e ekipit të tij.

Superkupa iku e shkoi dhe hareja duhej të kishte zgjatur diçka më pak tek fituesit.

Partizani doli për herë të dytë në pak ditë në fushën e “Elbasan Arenës”, duke pasur përballë sërish Kukësin, tashmë në ndeshjen e parë të kampionatit, dhe kuptoi se nuk do ta ketë të lehtë për të mbrojtur titullin.

U mund nga nënkampionët dhe nga ata që shihen si rivalët kryesorë të kampionëve (të shohim si do të jetë Tirana), të cilët bënë gjoja sikur luajtën në fushën e tyre, për t’u gjendur përsëri në Elbasan.

Kur një ekip mund kundërshtarin kryesor duke luajtur në fushë asnjanëse, kjo është shenjë se ai e ka seriozisht me pretendimet për trofeun.

Kjo duhet thënë për kuksianët, që u drejtuan nga Shpëtim Duro, partizanas 24-karatësh, por që profesioni “me valixhe” në dorë, e ka bërë që të falë besnikërinë aty ku punon.

Ndryshe nga Superkupa, Kukësi e nisi ndeshjen mirë, duke përballuar Partizanin në fushë të hapur e duke e mbyllur në avantazh pjesën e parë.

E pati më të vështirë pas pushimit, duke u ndërruar rolet në krahasim me finalen, por ia doli ndihmuar edhe nga shtylla.

Vendosi goli i Shkurtajt, ndërsa të kuqtë e patën në tribunë një nga lojtarët kryesorë, Jasir Asanin, që duket se do të transferohet jashtë vendit.

Trajneri i kryeqytetasve, Franko Lerda, pranoi gabimet e ekipit të tij.

Për Duron, Kukësi ka nevojë ende për përforcime, por presidenti Gjici mendon se ekipi i ka të gjitha për të dalë kampion, edhe pse nuk luan ende në fushën e tij. /ABC News Albania 24/7

KUKESI-FLET-TRAJNERI-DURO.mpg_snapshot_00.47-1280x720.jpg
ent ela16:17 | 22/08/2019

Kukësi nuk do ta ketë të lehtë ndaj Partizanit, por do të luftojë për pikët e para. Trajneri Shpëtim Duro thekson se skuadra kuksiane ka një dizavantazh momental ndaj kampionëve.

Dy ndeshje në vetëm pak ditë.

Pas Superkupës, Kukësi do të ndeshet me Partizanin kampion edhe në Superligë, që në javën e parë, madje në ndeshjen e hapjes së kampionatit.

Një detyrë e vështirë për trajnerin e veriorëve, Shpëtim Duro, I cili thekson se skuadra e tij ka një dizavantazh.

Ky mendim mos do të thotë se Kukësi nuk do të jetë në gjendje të luftojë për trofe këtë sezon?

Menjëherë pas humbjes në Superkupë, pati polemika në distancë të ish-mbrojtësit Shameti ndaj trajnerit Duro.

Kukësi-Partizani luhet këtë të premte në “Elbasan Arena” në orën 19:00. /ABC News Albania 24/7

abazaj.jpg
G. P.15:47 | 21/08/2019

Kristal Abazaj pritet të nënshkruajë për Kukësin në orët në vijim. Sulmuesi i huazuar nga Anderlehti ka akord me presidentin Gjici, ndërsa kuksianët pritet t’i japin 8 000 euro në muaj.

Një tjetër prezantim e pret shumë shpejt. Kristal Abazaj do të ndërpresë të paktën përkohësisht aventurën jashtë vendit, për të luajtur në Shqipëri, tashmë në radhët e Kukësit.

Sulmuesi që ishte i huazuar tek Osijeku në Kroaci gjysmën e dytë të sezonit të kaluar, ka arritur dakordësi me klubin verior dhe zyrtarizimi pritet të bëhet shumë shpejt, maksimumi deri nesër.

Burime pranë tij bëjnë me dijë se Kukësi do t’i japë 8.000 euro në sezon, ndërsa sulmuesi tropojan do të jetë i huazuar nga Anderlehti. Kartoni i 23-vjeçarit vazhdon të jetë në zotërim të klubit belg, i cili ende ka besim se ai mund të jetë futbollist i vlefshëm sezonet e ardhshme.

Abazaj spikati në Superligë kur luajti për Luftëtarin e Gjirokastrës në sezonet 2016-2018, duke shënuar shumë gola e duke u shpallur talenti i sezonit në kampionat në 2017. Kjo formë me gjirokastritët I siguroi kalimin në Belgjikë tek Anderlehti.

Përpara akordit me Kukësin, për të pati interesim nga Tirana apo Partizani, por veriorët u treguan më bindës. Sulmuesi ka luajtur edhe për Shqipërinë U21 duke shënuar 3 gola në 10 ndeshje, si dhe ka debutuar edhe për ekipin kombëtar./ABC News Albania 24/7

STADIUMI-I-KUKESIT.mpg_snapshot_00.06-1280x720.jpg
ent ela13:18 | 21/08/2019

Kolektorët e ujërave të zeza vonojnë punimet në stadiumin e Kukësit. Gjithsesi, Federata Shqiptare e Futbollit beson se impianti do të përfundojë brenda vitit.

Punohet prej vetëm pak ditësh. Stadiumi i Kukësit është një kantier ndërtimi, ndërsa premtimi është që viti 2020 t’i gjejë tifozët dhe skuadrën duke luajtur aty.

Anëtari i Komitetit Ekzekutiv në Federatën Shqiptare të Futbollit, Arben Dervishaj, ishte për inspektim në impiant, duke treguar për gjendjen në të cilën janë punimet, dhe duke theksuar një problem.

Premtimi ishte për të nisur punë që në fund të vitit të kaluar, por vonesat nuk munguan.

Tashmë, që stadiumi po ndërtohet, kur pritet të jetë gati?

Në fazën e tanishme, përveç zhvendosjes së kolektorëve, do të bëhet zmadhimi i fushës hapja e kanalizimeve të reja, dhe heqja e drenazhimeve të vjetra.

Stadiumi është një investim prej afro 5 milionë eurosh dhënë nga qeveria shqiptare dhe Federata, do ketë një kapacitet prej 8 mijë shikuesish dhe në të do të luhen edhe ndeshjet e Kupave të Europës. /ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono