kufij

ilir-meta-1.jpg
G. P.11:27 | 22/05/2019

Teza e korrigjimit të kufijve në Ballkan cilësohet e rrezikshme nga Presidenti shqiptar Ilir Meta dhe ish-presidentja e Kosovës, Atifete Jahjaga. Për Metën, kjo tezë vjen nga politikanë që duan të shmangin llogaridhëniet e brendshme. Ndërsa Jahjaga u shpreh se bëhet fjalë për një skenar me qëllim destabilizues.

Diskutimet mbi temën e sfidave të sigurisë në Ballkan dhe rolit të aktorëve të jashtëm në kohën e tranzicionit euroatlantik, në panelin e organizuar në nivel presidentësh, ajo e Kosovës dhe kreu i shtetit shqiptar, ndanë të njëjtin mendim mbi atë që quajnë tezën më të rrezikshme të aktualitetit në rajon.

“Dëgjojmë shpesh ore pse të mos bashkohen të gjithë shqiptarët? Por natyrshëm, pse të mos bashkohen të gjithë serbët, pse të mos bashkohet të gjithë kroatët, të gjithë boshnjakët”, tha Meta.

Ky diskutim nënkupton kthimin në të kaluarën e dhunës, vuajtjes dhe të përçarjes”, tha Jahjaga.

Për Metën këto përpjekje vijnë nga politikanë autoritarë me axhenda personale.

Janë një përpjekje e politikanëve autoritarë për tu shmangur nga llogaridhëniet e brendshme dhe për të provokuar tema të cilat postojnë vëmendjen e opinionit dhe shpesh e bëjnë këtë në mënyrë të koordinuar”, tha Presidenti.

Ndërsa për ish-presidenten e Kosovës Jahjaga, në nivel ndërkombëtar, kjo nxitet nga një lojë e dyfishtë e fqinjit serb.

“Për ne është shqetësuese fakti që Serbia luan lojë të dyfishte me BE dhe Rusisë. Që kur ka filluar dialogu janë firmosur 100 marrëveshje dhe nuk janë zbatuar as 10% e tyre”, tha ajo.

Njëra prej tyre është edhe tregues i absurditetit të pretendimit për ri-vizatim kufijsh thekson Meta.

“Nuk rivizatohen kufijtë aq kollaj. Ne e dimë sa marrëdhënie të mira janë mes Malit të Zi dhe Kosovës, por për një marrëveshje demarkacioni e dimë mirë se çfarë ndodhi. Një pakicë e vogël e bllokoi dhe bëhet fjalë për disa pyje që as qentë nuk jetojnë në dimër”, tha ai.

Ndaj në vend të mbështetjes së kësaj teze, Bashkimi Europian duhet të fokusohet tek shfaqja e interesit real për integrimin e Ballkanit Perëndimor, deklaron Jahjaga. Ndërhyrja e Shqipërisë në dialogun mes Serbisë dhe Kosovës do ishte një cënim i institucioneve të kësaj të fundit, sipas presidentit Meta ndaj kjo nuk mund të ndodhë./ABC News Albania 24/7

frontex.jpg
G. P.12:32 | 21/05/2019

Sot në Pallatin e Kongreseve u zhvillua ceremonia e nisjes së operacionit të misionit Frontex në Shqipëri. Gjatë një konference për shtyp, ku të pranishëm ishin edhe kryeministri Edi Rama dhe komisionari Avramopulos, drejtori i Frontex, Fabrice Leggere e konsideroi këtë marrëveshje si gur kilometrik në bashkëpunimin mes BE-së dhe Shqipërisë.

Anëtarët e Frontex janë të pranishëm në kufijtë tokësor, bregdetar dhe aeroporte në të gjithë BE-në. Leggere tregoi se si mund t’i dallojmë agjentët e Frontex, të cilët vishen me uniformat kombëtare dhe një shirit blu në krah.

“Ky është një gur kilometrik jo vetëm për Agjencinë evropiane të Kufirit dhe Rojes Bregdetare, Frontexit, por edhe bashkëpunimit më të gjërë mes BE dhe Shqipërisë. Avionët tanë gjenden në shumë vende të tjera të BE-së. Ne jemi në kufijtë bregdetar, në kufijtë tokësorë, në aeroporte dhe tani kemi 1200 Roje Bregdetare në të gjithë BE-në. Kemi më shumë se 25 mjete lundruese dhe një duzinë avionësh dhe helikopterësh. Sot është hera e parë që po caktojmë roje kufitare në një vend jashtë BE-së. Këta punonjës do të veshin uniformat e tyre kombëtare bashkë me një bandë në krah, blu, që do të tregojë se janë anëtarë të agjencisë evropiane të Mbrojtjes së Kufirit dhe Rojes Bregdetare. Nuk është hera e parë që bashkëpunojmë me Shqipërinë”, tha drejtori i Frontex.

Shqipëria është vendi i parë jashtë BE-së në të cilin, Frontex vendos roje kufitare./abcnews.al

avramopulos-1280x717.jpg
G. P.12:17 | 21/05/2019

Komisioneri për migracionin në Bashkimin Europian, Dimitris Avramopolus, gjatë një konference për mediat bashkë me kryeministrin Edi Rama dhe drejtorin e Frontex Fabrice Leggere theksoi se falë bashkëpunimit kjo agjenci ofron mbështetje edhe për vendet fqinje.

Ai e konsideroi nisjen e punës së Frontex në Shqipëri si një hap historik. Komisioneri deklaroi se Shqipëria do të mbetet përgjegjëse për mbrojtjen e kufijve të saj.

“Sot jemi duke parë një shembull konkret të mënyrës se si kemi një bashkëpunim të përkryer mes Frontex dhe sesi kjo agjenci mund të ofrojë mbështetje në rritje, për vende fqinje. Nesër do kemi skuadrat e para të Kufirit dhe Rojeve Bregdetare evropiane që do të vendosen në Shqipëri. Ato do të mbështesin Rojen Bregdetare me pajisje dhe staf në pikat kyçe të kufirit me Greqinë. Ky është një hap historik. Është hera e parë që Frontex vendoset në një vend joevropian. Kur flitet për menaxhimin e mbrojtjen e kufijve tanë, sfidat janë të përbashkëta. Përgjigja duhet të jetë e përbashkët. Kjo është arsyeja pse po punojmë bashkë.

Shqipëria mbetet përgjegjëse për mbrojtjen e kufijve të saj, dhe të gjitha aktivitetet që regjistrohen nga Agjencia e Kufirit dhe Rojes Bregdetare evropiane do realizohen në bashkëpunim me autoritet shqiptare, por edhe në bashkëpunim me shtetin anëtar të BE. Ajo që do ofrojë agjencia është ndihma dhe mbështetja e plotë në frymën e besimit dhe bashkëpunimit të ndërsjelljtë. Kjo është në interesin tuaj, por njëkohësisht edhe për rajonin. Hap pas hapi rajonin e Ballkanit Perëndimor po e çojmë më pranë BE-së aty ku ky rajone ka vendin. Po hapim rrugën për një mjedis stabël gjeopolitik”, tha Avramopulos.

Ndërsa kryeministri Rama e cilësoi bashkëpunimin me Frontex si mundësi të artë kundër luftës së krimit të organizuar.

“Na jep një mundësi të artë për të forcuar bashkëpunimit me Frontexin edhe në funksion të luftës kundër krimit të organizuar, duke qenë të vetëdijshëm për domosdoshmërinë e suksesit në këtë nismë që në vijim do të pasohet nga të tjera në të tjera vende të rajonit tonë. Është një moment i thellimit të sigurisë mes BE dhe Ballkanit Perëndimor dhe përbën një nga gjashtë vektorët e strategjisë së BE-së për Ballkanin Perëndimor. Dua ta falënderoj komisionerin për angazhimin e tij të posaçëm në këtë projekt strategjik për Ballkanin Perëndimor”, tha Kryeministri./abcnews.al

hashim-thaci.jpg
G. P.13:17 | 01/03/2019

Presidenti i Kosovës Hashim Thaçi deklaroi se kurrë nuk do ketë shkëmbim territoresh mes Kosovës dhe Serbisë. Sipas Thaçit, shkëmbimi i territoreve është pazar dhe se do të ndodhë vetëm po të kalojnë mbi trupin e tij. Presidenti i Kosovës u shpreh se është për korrigjim kufijsh, por pa cënuar territorin e Kosovës. Deklaratat u bënë gjatë Samitit për Diasporën të mbajtur në Tiranë.

“Për shkëmbim territoresh kam folur edhe më herët, në anën tjetër ajo që dua të theksoj është kjo, që shkëmbimi i territoreve është pazar dhe askush nuk do të lejojmë që të bëjë pazar me kauzën kombëtare. Ndarja e Kosovës? Pa shkelur mbi trupin tim nuk do të mund ta cenojë kush 1 milimetër të territorit të Republikës së Kosovës. Askush nuk do të mund ta cenojë as Trepçën, as Mitrovicën, as Ujmanin dhe asnjë pjesë të territorit të Republikës së Kosovës.

Për ndarje të Kosovës dhe ekzagjerime të temave të tilla dhe ata që flasin sot janë ata që kanë ndihmuar Sllobodan Millosheviçin, janë miqtë e Radonçiçit të cilët i kam dëbuar nga Kosova. Korrigjimi i kufijve? Po, sepse nuk ka njeri në botë që ma mohon angazhimin tim për realizimin e aspiratës së të drejtave legjitime të Preshevës, Medvegjës dhe Bujanovcit për bashkëngjitje me territorin e Republikës së Kosovës pa cenuar territorin e saj”, tha Thaçi./abcnews.al

sali-berisha-1.jpg
G. P.12:09 | 07/02/2019

Ish–kryeministri Sali Berisha ka ripërsëritur qëndrimin e tij se është pro një marrëveshjeje midis Kosovës e Serbisë me kushtin e vetëm që mos ketë copëtim territoresh. Lideri historik i Partisë Demokratike ka akuzuar kryeministrin Edi Rama se po ndërhyn në këtë çështje në favor të presidentit serb, Aleksandër Vuçiç.

Shqipëria rrezikon të shndrrohet në sherrin e Ballkanit dhe shkaku ka një emër tha ish kryeministri Sali Berisha nga foltorja e parlamentit.

Sali Berisha: “Rama po bëhet sherri i Ballkanit dhe faturën e paguajnë shqiptarët. Po bëhet sherri i Ballkanit sepse është i lidhur me vjedhjet dhe krimet”. 

Të njëjtin qëndrim ka për marrëveshjen Kosovë- Serbi. Pa copëtim territoresh.

Sali Berisha: “Copëtimi i territoreve hap Kutinë e Pandorës  sjell bllokim automatik të integrimit”. 

Duke sjellë si shembull një bisedë të tijën me ish-presidentin e Shteteve të Bashkuara të Amerikës, George Bush, ish-kryeministri Berisha sqaroi se gjithmonë ka kërkuar që problemet që ndajnë Kosova e Serbia të zgjidhen me mirëkuptim e në kohën e duhur.

Sali Berisha: “Gjatë vizitës së presidentit Bush në Shqipëri më drejtohet duke më thënë se cili është mendimi juaj për Kosovën dhe unë thashë se ne duam që të jetë e  Pavarur. Më tha kur mendon ti se duhet të shpallet pavarësia? I them se meqë ju e keni ndarë mendjen dhe ne do ju jemi mirënjohës, i thashë merrni kohën tuaj sepse nuk duhet të bëhemi mollë sherri mes jush dhe BE”.

Ndërsa Edi Rama po bën të kundërtën sipas Sali Berishës. Këtë e tregon dhe zhvlerësimi që i ka bërë kancelarja gjermane tha ai duke refuzuar ta takojë.

Sali Berisha: “Kur ishte atje iu serviles me siperlativa, por Merkel refuzoi pritjen. Nuk e priti dhe refuzoi pritjen. Kosova dhe Serbia të zgjidhin problemet si dy shtete të pavarura dhe jo mbi bazën e argatëve që s’kanë atdhe. Ata janë armiqtë të shqiptarëve dhe paqes në rajon”./abcnews.al

spiropali-1280x720.jpg
G. P.20:02 | 05/12/2018

Qëndrimi i Partisë Socialiste për idenë e korrigjimit të kufijve mes Serbisë dhe Kosovës është që të gjithë shqiptarët të ulen sëbashku që të bëhet e mundur një plan i qartë për Kosovën. Elisa Spiropali tha në “Mbrëmje Ide” se faktori shqiptar nuk duhet të përçahet në një rast të tillë.

“Nuk na takon ne të marrim vendim për Kosovën. Ajo që ne duam është që të gjithë faktorët shqiptarë të ulen që të bëjnë të mundur që Kosova të ketë një plan të qartë. Sa më të përçarë aq më shumë fiton Serbia. Opozita dhe pozita në Serbi zihen e grihen për situata të brendshme, por kur vjen puna të Kosova ata bëhen bllok. Këtë nuk kemi kuptuar ne dhe kjo është ideja e bashkimi”, tha ajo./abcnews.al

MBULIM-AUSTRIA-SCHENGEN_ABC-M2-T1.mpg_snapshot_00.11-1280x827.jpg
G. P.17:56 | 11/10/2018

Komisioni Europian bëri të ditur se ka marrë një lajmërim nga Austria, sipas të cilit vendi do të mbajë ende në fuqi kontrollet e përkohshme në kufijtë e brendshëm me Slloveninë dhe Hungarinë. Ky vendim do të zgjasë dhe për gjashtë muaj të tjerë deri në maj të vitit 2019. Vendimi është i bazuar në marrëveshjen për Shengen-in. deklarata u bë për mediat nga Natasha Bertod, zëdhënëse e Komisionit të Bashkimit Europian për emigracionin. Brukseli nga ana e tij do të monitorojë deri në fund mënyrën se si do të zbatohen këto kontrolle./abcnews.al

ramush-haradinaj_1499679648-5275555.jpg
G. P.14:01 | 31/08/2018

Kryeministri i Kosovës, Ramush Haradinaj edhe njëherë ka saktësuar se nuk do të diskutojë lidhur me temën e rishikimit të kufijve. Nga ana tjetër, presidenti Thaçi vijon të mbështesë idenë e tij duke thënë se thirrjet për luftë i takojnë shekullit të kaluar.

Vijojnë në Kosovë përplasjet e ashpra mes kryeministrit Ramush Haradinaj dhe presidentit Hashim Thaçi lidhur me fazën finale të dialogut me Beogradin. Shefi i qeverisë kosovare ka bërë me dije se do të largohet nga çdo tavolinë që do të flitet për kufijtË e vendit.

“Unë ju siguroj që pozicioni im është i qartë në atë moment që hapet kjo temë, nuk jam më në atë tavolinë”, u shpreh Haradinaj.

Pavarësisht se ai thotë se nuk ka pasur përplasje në takimet mes liderëve, deklaratat e Haradinaj dhe Thaçit tregojnë të kundërtën. Presidenti kosovar vijon të mbështesë idenë e tij për korrigjim të kufijve dhe nënvizon në një mesazh në Facebook se të gjithë aleatët perëndimor janë angazhuar në arritjen e një marrëveshjeje mes Kosovës dhe Serbisë.

“Kjo marrëveshje nënkupton njohje reciproke dhe perspektivë të sigurt të anëtarësimit të Kosovës në BE, NATO dhe OKB. Por, fatkeqësisht, individë të caktuar në vendin tonë, me veprimet e tyre po tentojnë të krijojnë panik dhe konfuzion”, shkruan Thaçi.

Ndërsa më tej nënvizon se “thirrjet për luftë dhe tragjedi të reja në Ballkan i takojnë mentalitetit të shekullit të kaluar dhe si të tilla, meritojnë vetëm të hidhen në shportë”.

Ndërkohë, reagimi i presidentit Thaçi erdhi pas atij të kryeministrit, Ramush Haradinaj i cili tha se diskutimi mbi kufijtë është “ftesë për tragjedi të reja në Ballkan”./abcnews.al

nikos-kotzias12.jpg
G. P.18:03 | 03/07/2018

Ministri i jashtëm i Greqisë, Kotzias njoftoi se Turqia dëshironte të ndërtonte bazë detare në Durrës. Duke iu përgjigjur opozitës helene, ai thotë se rishikimi i kufijve është temë serioze dhe jo lojë politike.

Ministri i Jashtëm i Greqisë, Nikos Kotzias, gjatë një interviste në një radio vendase i është përgjigjur pretendimeve të opozitës, që pretendon se shefi i diplomacisë ka bërë lëshime të shumta në negociatat me Shkupin dhe Tiranën. Duke u shprehur me shumë mllef, ai ripërsërit se çështja e Çamërisë nuk ka qenë kurrë në tavolinën e bisedimeve me Shqipërinë. Madje akuzon qeverinë e Demokracisë së Re të 1990-s që ka negociuar për këtë temë.

Duke iu referuar jugut të Shqipërisë si “Epiri i Veriut”, Kotzias nënvizoi se është qesharake të pretendohet se ai i përket Greqisë. Ministri i Jashtëm tha më tej se kërkesat e opozitës i kujtojnë ato të qeverisë turke, që kërkon rishikimin e kufijve.

“Këto nuk janë lojëra. Disa e bëjnë lojëra të vogla dhe në Perëndim. Përsa i përket Vorio Epirit, nuk i përket Greqisë dhe nuk ka çështje të tillë. Pranojmë kufijtë e aktit të Helsinkit, të traktatit së Parisit 1926, të drejtën ndërkombëtare, pasojat e dy luftërave botërore. Nuk bëjmë pazare të Çamërisë me Vorio Epirin. Akuzat mediatike dhe mikropolitike janë serioze. Doni luftë? Nuk luhet me këto tema”, u shpreh Kotzias duke nënvizuar edhe njëherë që “Vorio Epiri” tashmë i përket një shtetit sovran dhe të pavarur.

Ndërkohë, sa i përket heqjes së ligjit të luftës, ministri i Jashtëm thotë se kjo do lejojë rikthimin e pronave tek shtetasit shqiptarë, pronarë para lufte por jo tek çamët. Ndërkohë, zyrtari i qeverisë greke ka folur edhe për ndikimin e Turqisë në Ballkan. Sipas Kotzias, qeveria e Ankarasë dëshironte të ndërtonte baza detare në Durrës të Shqipërisë dhe bazë në Maqedoninë Veriore. Lidhur me marrëveshjen për emrin me Shkupin, Kotzias njofton se qeveria e Athinës i ka votat për ratifikimin e saj. Ai shton se anëtarësimi i Maqedonisë në BE dhe NATO është i dobishëm edhe për Greqinë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono