Kritika

AMBASADA-BROVINA-MBULIM.mpg_snapshot_00.05-1280x720.jpg
ent ela14:02 | 19/05/2019

Ambasada e Mbretërisë së Bashkuar në Prishtinë ka kritikuar veprimin e deputetes Flora Brovina, e cila me një foto të rreme u përpoq të tregonte dhunën e trupave serbe në Kosovë gjatë luftës së viteve ‘98-‘99. Në një reagim për shtyp, selia diplomatike britanike ka deklaruar se krimet e luftës duhet të hetohen nga institucionet dhe jo të përdoren për qëllime politike.

“Është e rëndësishme që pohimet për krime të rënda gjatë konfliktit të hetohen nga institucionet e duhura, mbi të gjitha duke i dhënë përparësi drejtësisë dhe mbështetjes për të mbijetuarit, viktimat dhe familjet, sipas sundimit të ligjit dhe jo oportunizmit politik”, ka deklaruar ambasada e Britanisë. /ABC News Albania 24/7

panuci-2-1280x853.jpg
G. P.20:26 | 06/04/2019

Kristian Panuçi ka bërë kritika nga Italia për kombëtaren shqiptare. Ish-trajneri ka deklaruar në “La Gazeta dello Sport” se nuk gjeti ide të përbashkëta dhe profesionalizëm

Largimin e pati të hidhur, dhe besoi të pamerituar.

Kristian Panuçi nuk është më trajner i kombëtares shqiptare, dhe gjeti rastin për të bërë sërish kritika, i intervistuar nga “La Gazetta dello Sport”. Ish-tekniku deklaroi se e pati të vështirë të gjente ide të përbashkëta dhe profesionalizëm në ekip, gjë që, sipas tij, e pengoi të bënte punën e tij.

“M’u bë e vështirë të përcillja dhe praktikoja futbollin që kisha në kokë”, ishin fjalët e tij.

Panuçi përsëriti ato që tha më parë në konferencat për shtyp në Shqipëri, se shumë lojtarë të ekipit përfaqësues luanin pak, duke qenë gjithashtu një faktor negativ i rëndësishëm. Gjithsesi, në analizë të fundit, Panuçi deklaroi se nuk kishte asnjë peng nga aventura te kuqezinjtë, dhe shtoi se Shqipërisë do t’i thotë gjithnjë faleminderit për të gjitha.

Kjo ishte analiza e Panuçit, por vetëm pak ditë pas largimit të tij, trajneri kujdestar Ervin Bulku, dhe kapiteni Elseid Hysaj I kujtuan se rreth 70 për qind e lojtarëve të ekipit, ishin ata që u kualifikuan në Euro 2016 nën drejtimin e paraardhësit të tij, Giani De Biasi.

Përsa i përket disiplinës së theksuar fort nga Panuçi, vlen të kujtohen fjalët e kandidatit për stolin e Shqipërisë, Edi Reja, të thëna për mediat italiane, që theksoi se “dënimi i Strakoshës m’u duk i ekzagjeruar, sepse një mungesë mund të ndodhë”. Duket se kombëtarja ka nevojë pikërisht për një trajner që e njeh mentalitetin e shqiptarëve./abcnews.al

GORO-VIZITA-KOMENTET-1280x720.jpg
ent ela20:30 | 03/04/2019

Vizita e kryeministrit Aleksis Tsipras në Shkup është pritur me tone kritike në Athinë. Si opozita ashtu edhe shtypi grek janë shprehur se vizita dhe marrëveshjet e nënshkruara gjatë saj ishin një përpjekje për të zbukuruar Marrëveshjen e Prespës, e cila kurrsesi nuk duhet të përsëritet në rastin e Shqipërisë.

Një ditë pas vizitës së kryeministrit Tsipras në Shkup, opozita dhe media greke kanë kritika të ashpra, duke i ndërlidhur zhvillimet dypalëshe edhe me Shqipërinë. Greqia dhe Maqedonia e Veriut kanë hedhur hapin e parë për inaugurimin e një bashkëpunimi strategjik. Ky është konkluzioni i përftuar në Athinë, pas vizitës së kryeministrit Tsipras në Shkup, me ç’rast u zhvillua dhe mbledhja e parë e përbashkët e dy qeverive. Ose, siç emërtohet, Këshilli Suprem i bashkëpunimit. Por ndryshe nga qeveria, partitë opozitare dhe shumica dërrmuese e analistëve kanë shprehur kritika të ashpra, duke nënvizuar se shkuarja e zotit Tsipras në Shkup ishte thjesht një përpjekje për të retushuar imazhin negativ që krijoi në opinionin grek marrëveshja e Prespës. Athina zyrtare ka promovuar si një nga rrjedhojat pozitive të marrëveshjes së Prespës faktin se avionë luftarakë do të monitorojnë hapësirën ajrore të Maqedonisë së Veriut.

Por kritikët thonë se kjo është një procedurë që bëhet në kuadër të NATO-s, dhe që emërtohet si Air Policing. Analistët shtojnë me nënkuptim se Greqia asiston me Air Policing edhe hapësirën ajrore të Shqipërisë, por nuk ka pasur kurrfarë influence pozitive në marrëdhëniet Athinë-Tiranë, të cilat që prej disa muajsh mbeten krejt të ngrira.

“Marrëveshja e Prespës është cilësuar nga shumëkush si një model që duhet ndjekur edhe për problemet e tjera dypalëshe mes vendeve të rajonit. Athina e kishte dhënë e para këtë shembull, por nuk duket e prirur që ta zbatojë këtë model edhe me Shqipërinë. Të paktën jo tani afër. Jo para se të përfundojnë tre ballafaqimet elektorale të këtij viti: zgjedhjet europiane dhe ato lokale në maj, si dhe zgjedhjet e përgjithshme që duket se do të mbahen në vjeshtë”.

Gazetar i ABC News në Greqi: Robert Goro

edi-rama-1.jpg
G. P.14:39 | 01/04/2019

Kryeministri Edi Rama ka kritikuar ashpër Rektorin e Universitetit të Tiranës, Mynyr Koni, i cili sipas shefit të qeverisë po pengon plotësimin e kërkesave të studentëve. Nëse universitetet nuk marrin masa për të rishikuar titujt akademik kryeministri paralajmëroi se qeveria do t’u marrë kompetencat.

Nëse universitetet nuk nisin vlerësimin e titujve akademik, qeveria do të ndërhyjë në ligj dhe do të marrë kompetencat që iu takojnë Institucioneve të Arsimit të Lartë. Paralajmërimi vjen nga kryeministri Edi Rama, i cili tha se e ka gati planin B, por para se ta verë në zbatim do t’i japë dhe një tjetër mundësi universiteteve.

“Do detyrohemi t’i bëjmë vetë duke ndërhyrë në legjislacion, duke marrë kompetenca që sot i ka universiteti. Por kjo nuk është më e mira për t’u bërë”.

Gjatë prezantimit të bibliotekës digjitale, e cila vetëm në Instituconin e Arsimit të Lartë më të madh ne vend nuk do të funksionojë për shkak të problemeve në rrjetin teknologjik, shefi i qeverisë kritikoi ashpër Rektorin e Universitetit të Tiranës, Mynyr Koni.

“Ne kemi rezerve të konsiderueshme lidhur me drejtimin e Universitetit të Tiranës dhe besoj që nuk them diçka të parakohshme sepse është koha për të adresuar inkompetencën e plotë dhe mungesën e vullnetit alarmante të konstatuar në raport edhe me çfarë gjithë ne jemi përpjekur të bëjmë për të adresuar të gjitha kërkesat e studentëve nga ana e rektorit të Universitetit të Tiranës”.

Rektori Koni, sipas kryeministrit, po pengon realizimin e kërkesave që studentët shprehen në protestën e Dhjetorit te vitit të shkuar. Shefi i qeverisë u ndal gjatë në tre prej tyre; transparencën e titujve akademik, vlerësimin e pedagogëve nga ana e studentëve dhe tregtimi i teksteve në këmbim të notës. Këtu nuk kurseu akuzat as ndaj pedagogëve.

“Duke mos ndarë pedagogët që meritojnë të gjithe respektin dhe vendin që kanë e jo për të bërë politikë e për të qenë diplomatiksht në rregull nga sharlatanë që paraqiten si doktorë shkencash e paguhen nga taksat tona e marrin në qafë studentë, ne nuk vendosim Universitetit në bazat e duhura”.

Kush kujton se qeveria do të tërhiqet nga këto çështje paralajmëroi kryeministri e ka gabim.

“Kush kujton se do kërcënojë qeverinë me inskenime protestash apo krijme situatash që turbullojnë gjendjen e brendshme për tju shmangur kësaj e ka gabim”.

Ndërkohë kryeministri përsëriti se Ligji i Arsimit të Lartë nuk do të ndryshojë deri sa nga pedagogët nuk kanë argumente bindës kundër tij.

“Nëse na vjen një argument, që ky ligj pengon këtë gjë ne jemi gatshëm që të hyjmë që neser. Deri tani s’ka asnjë argument, vetëm fantazira”.

Kryeministri gjithashtu paralajmëroi rishikim të kuotave të miratuara nga universitetet për programe të caktuara studimi, rritje të mestares për ata që dëshirojnë të ndjekin studimet e larta dhe rishikim të qendrave që certifikojnë njohuritë në gjuhën angleze./abcnews.al

KRONIKE-ERISA-PE-HIDROCENTRALET.mpg_snapshot_00.47-1280x720.jpg
ent ela18:04 | 08/03/2019

Në një intervistë për ABC News eurodeputeti Thomas Waitz ka kritikuar ashpër qeveritë e Ballkanit, por edhe Bankat Europiane që mbështesin ndërtimin e hidrocentraleve, me pasoja shkatërruese për natyrën dhe biodiversitetin.

Mbrojtja e Vjosës dhe e Valbonës  ishin në qendër të konferencës së organizuar në Parlamentin Europian me titull “Të mbrohen lumenjtë e Ballkanit”. Kritika të ashpra u janë drejtuar qeverive të Ballkanit dhe bankave europiane që mbështesin ndërtimin e hidrocentraleve, që sjellin vdekjen e lumenjve të fundit të egër në Europë dhe shkaktojnë dëme shumë të mëdha për biodiversitetin, ekologjinë dhe popullsinê lokale. Sipas eurodeputetit të gjelbër, Thomas Waitz, Shqipëria dhe vendet e tjera të Ballkanit në një periudhë afatgjatë do të kishin përfitime shumë më të mëdha nga turizmi natyror dhe i komuniteteve lokale sesa përfitimet që sjellin hidrocentralet që synohen ndërtohen në këto zona.

Thomas Waitz, eurodeputet: “Si ka mundësi që qeveritë e Shqipërisë, Maqedonisë së Veriut, Kosovës, Bosnjës apo Serbisë janë tê gatshme që të shkatërrojnë trashëgiminë e tyre kombëtare natyrore ? Kjo vjen pêr shkak të korrupsionit. Cili nga ju e di se ç’pjesë e asaj që planifikohet për ndërtimin e hidrocentraleve shkon konkretisht aty? Eshtë pikërisht kjo industria konkrete që lobon jo vetëm përmes fjalëve, por edhe përmes çeqeve dhe shet shumë më tepër zyrtarisht sesa përdoret konkretisht. Dhe ja si vijnë të ardhurat dhe ja si paguhen politikanët”.

Masterplani ekologjik i prezantuar nga Cornelia Wieser i organizatës “River Watch” dhe Theresa Schiller  i “EcoNatur”, evidenton se edhe me ndërtimin e hidrocentraleve të planifikuara, nuk përmbushen nevojat për energji të popullatës në Ballkan. Sipas studimeve, energjia e erës dhe diellore mund të përmbushin objektivat për energji të rinovueshme, duke zëvendësuar atë të hidrocentralave Ndërkohë, eurodeputeti austriak Ëaitz ka fshikulluar edhe bankat europiane për mbështetjen e disa  projekteve të hidrocentraleve.

Thomas Waitz, eurodeputet:Pjesë e këtyre zhvillimeve janë edhe bankat europiane dhe investimet europiane.Eshtë banka europiane e zhvillimit dhe ajo e ndërtimit dhe rikonstruksionit që japin hua për këto projekte. Bzuar në këtë, banka të tjera, si banka botërore u bashkohen këtyre projekteve. Dhe duhet t’i bëjmë pyetjen vetes: Çfarë bën BE-ja për këtë ? Ne flasim kaq shumë për mbrojtjen e mjedisit dhe shpenzojmë me miliarda për këtë dhe pastaj u japim hua projekteve për të shkatërruar atë që duam të ruajmë, vetëm sepse këto vende nuk janë ende anëtare të BE-së.”

Sasia e peshqve të ujit të pastër të lumenjve të Ballkanit përbëjnë 28% të peshqve të rrezikuar Europës, dhe moluskët përbëjnë 40% të moluskëve të rrezikuar të Europës. Pjesëmarrësit janë njohur me karakterin unik të Vjosës dhe Valbonës, si edhe aksioneve që janë bërë për të mbrojtur lumenjtë e Ballkanit përmes dokumentarëve të Elton Baxhakut dhe Artan Ramës.Konferanca u organizuar nga grupimit i të majtës së bashkuar europiane dhe të majtës së gjelbër nordike GUE/NGL të Parlamentit Europian. Morën pjesë gazetarë investigativë nga Shqipëria dhe rajoni, si edhe aktivistë të komuniteteteve lokale për mbrojtjen e lumenjve./abcnews.al

bbb-1.jpg
ent ela12:27 | 28/02/2019

Kritika për lojën e Barcelonës edhe pas fitores 3-0 ndaj Realit brenda në Madrid, dhe kualifikimit për në finalen e Kupës së Mbretit. Katalanasit patën fat.

E dinim prej kohësh se nuk ishte dhe nuk është Barcelona e tiki-takës.

Ditët e futbollit të spektakolar janë sot në Mançester, dhe në kombëtaren e Spanjës, me Guardiolën e Luis Enriken, por gjithsesi kjo Barçë e Valverdes vazhdon ta ketë hijen të rëndë.

Jo me dominim të lojës, por me yjet dhe përvojën që e ndihmuan të fitonte 3-0 në “Santiago Bernabeu” dhe të kualifikohej për finalen e Kupës së Mbretit, në dëm të Realit.

Ishin madrilenët e Solarit që bënë lojën dhe humbën raste, me të riun Vinisius hero dhe fajtor, pasi krijoi shumë dhe humbi po shumë.

Tek Barça ishte Ter Shtegen, si gjithnjë “engjëlli mbrojtës” në portë, si dhe Luis Suarez, “djalli” në sulm.

Katalanasit praktikisht shkuan vetëm 3-4 herë në portën e vendasve, dhe shënuan 3 gola.

Luis Suarez në 50’, autogol i Varanit në 69’ dhe penallti e Suarezit me stilin “Panenka” në 73’.

Kuptimplota fotot dhe titulli i gazetës “Marka”: Diferenca mes gabimit dhe mosgabimit, duke paraqitur Vinisiusin të dëshpëruar dhe Suarezin duke festuar.

“AS”: Vinisius luan, Suarezi shënon! Barcelona goditi vetëm dy herë në portë dhe realizoi 3 gola!

“El Mundo Deportivo”: Finale vdekjeprurëse! Barça në finalen e gjashtë radhazi të Kupës pas fitores në “Bernabeu”, pa luajtur mirë!

“Sport”: Zotërit e “Bernabeut”! Tjetër turpërim i Madridit, Barça për herë të gjashtë radhazi në finalen e Kupës!

“Nuk luajtëm një ndeshje të mirë, – pranoi trajneri i katalanasve, Valverde, – në pjesën e parë nuk ditëm të sulmonim, dhe bëmë gabime duke humbur topin në zona të rrezikshme. Sot shënuam 3 gola, pa pasur shumë raste, ndryshe nga çfarë ka ndodhur më parë”.

Trajneri i Realit, Solari, ishte shumë i dëshpëruar.

“Është e vështirë të flasësh për drejtësi dhe ndershmëri në futboll, – tha ai, – në këtë lojë fiton ai që shënon, jo ai që luan mirë. Ne bëmë një paraqitje të madhe në sulm, por nuk I shfrytëzuam rastet. Barcelona bëri më pak, por fitoi. Humbëm me nder, por kjo nuk mjafton”.

Barcelona arrin në finalen e Kupës për herë të gjashtë radhazi, ndërsa do të synojë trofeun e 31-të, në rritje të rekordit.

Reali humbi një tjetër objektiv, pasi La Ligën vështirë se mund ta pretendojë, ndërsa Championsi nuk duket e lehtë që të fitohet me formën e tanishme.

Ndaj Barçës nuk humbi fytyrën, pasi luajti shumë mirë, por tregoi se nuk është një skuadër e madhe, prandaj humbi 0-3./abcnews.al

50563417_2309903809042539_2209394884312301568_n.jpg
ent ela15:57 | 22/01/2019

Kritika vlerëson maksimalisht sopranën e famshme shqiptare Ermonela Jaho për rolin e   Violetës në Operan Mbretërore të Londrës. Traviatën  e ngjiste për herë të 255 në skena të ndryshme të botës ylli i muzikës operistike. Ndërkohë që shfaqja e fundit do të mbahet më 30 Janar dhe do të jetë live në gjithë kinematë e botës, nga Opera Mbretërore e  Londrës.

Sopranoja shqiptare me famë boterore Ermonela Jaho sezonin artistik e nis më 14 Janarë në Operan Mbretërore  të Londrës nën petkat e Violetës,  rol të cilën e jetëson  në skenë për  255 herë. Traviata mbetet stol mjaft i dashur për soparnon e famshme sghqiptare, sepse ëndërrat dhe famën në skenat botërore e nisi me Traviatën. Për tre shfaqjet atë datët 14, 17 dhe 21  Ermonela Jaho  është vlerësuar maksimalisht nga kritika.

Sunday Times: Një yll i vërtetë, e pakrahasueshme si këngëtare-aktore lirike aktualisht. Ajo e ngre mbrëmjen nga rutina në diçka me të vërtetë shumë speciale. Jaho është në kulmin profesional të saj…..

Sopranoja me famë botërore Ermonela Jaho ka marrë një tjetër vlerësim nga pristigjozja britanike “Financial Times”. Sopranoja e cila ndodhet në Londër, ku ngjiti në skenë operetën e famshme “La Traviata”, konsiderohet ylli i operistikës ndërkombëtare.

Financial Times:  Ermonela Jaho është thellësisht prekëse me La Traviatën në Operan Mbretërore.
Soprano shqipetare shkëlqen në Londër në ringjalljen e regjisë së operas së Verdit nga Richard E.

Debutimi i parë në Shtëpinë Mbretërore të Operës ishte më vitin 2008, megjithatë lidhja e saj me audiencën e Londrës vazhdon që të jetë shumë e rëndësishme për të. Kujtojmë që në 2017 nga kjo opera u relaizia një dokumentar për jetën dhe arritjet e këngëtares shqiptare. Ndërkohë që shfaqja e fundit e  Traviatës  do të ndiqet live në të gjitha kinematë botërore mbrëmjen e 30 Janarit./abcnews.al

mogherini-dhe-haradinaj.jpg
G. P.12:59 | 29/12/2018

Edhe njëherë më shumë kryeministri i Kosovës, Ramush Haradinaj, ka kritikuar rolin e shefes së diplomacisë europiane, Federica Mogherini, në dialogun me Serbinë. Sipas Haradinajt, po të jetë në dorë të saj, dialogu do të qëndrojë në pikën ku është edhe për 3 mijë vjet të tjera.

Kryeministri i Kosovës, Ramush Haradinaj, ka kërkuar sërish që në procesin e dialogut me Serbinë të marrin pjesë edhe Shtetet e Bashkuara të Amerikës. Në një intervistë për televizionin kosovar “RTV 21”, Haradinaj iu përgjigj pyetjeve në lidhje me letrën e presidentit amerikan Trump. Kryeministri i Kosovës foli edhe për rolin e BE-së dhe SHBA-së në lidhje me marrëdhënien Kosovë-Serbi.

Haradinaj përsëri kritikoi Shefen e Politikës së Jashtme të BE-së, Federica Mogherini. Ai tha se Mogherini nuk ka bërë asgjë në lidhje me problemin mes Kosovës dhe Serbisë. Ai shtoi se problemi mes Kosovës dhe Serbisë mund të zgjidhet vetëm me përfshirjen e SHBA-së në dialog. Kreu i qeverisë tha se po të jetë në dorë të saj, situata do të jetë e tillë dhe për tre mijë vjet të tjera

Haradinaj u shpreh se lufta në Bosnje dhe Kosovë ka përfunduar vetëm me ndërhyrjen e SHBA-së, dhe problemi mes Kosovës dhe Serbisë mund të zgjidhet vetëm me përfshirjen e tyre./abcnews.al

blair-1280x720.jpg
G. P.22:40 | 16/12/2018

Kryeministrja britanike Theresa May kritikoi ashpër fushatën e Tony Blair për mbajtjen e një referendumi për qëndrimin në BE. Sipas saj, ish kryeministri po përpiqet të sabotojë punën e bërë për marrëveshjen e arritur për Brexit.

Kryeministrja e Britanisë së Madhe, Theresa May, ka kritikuar ashpër ish-kryeministrin britanik, Tony Blair, për fushatën që po udhëheq lidhur me mbajtjen e një referendumi të ri për mbetjen e vendit në Bashkimin Evropian. Shefja e qeverisë së Londrës argumenton se punon në interes të vendit. May nënvizoi në një kundërpërgjigje se luftoi ashpër për arritjen e marrëveshjes për largimin nga BE-ja.

“Megjithatë, shumë njerëz duan ta sabotojnë këtë proces për shkak të interesave të tyre politike. Udhëtimi i Tony Blair në Bruksel dhe thirrjet për një referendum të dytë janë sabotim të bisedimeve tona dhe fyerje për popullin britanik dhe funksionin që dikur ushtronte Blair”, u shpreh shefja e ekzekutivit.

Megjithëse, kryeministrja May kategorikisht kundërshton idenë e mbajtjes së një referendumi të ri në Britani, mediat raportojnë se ndihmësi i saj David Lidington ka mbajtur një sërë takimesh me grupe që mbështesin rimbajtjen e referendumit për Brexit-in. Ish-kryeministri britanik Blair të premten deklaroi se askush nuk është i kënaqur me marrëveshjen që ka arritur kryeministrja May me krerët e BE-së. “Mendoj se është logjike që njerëzit të pyeten përsëri dhe të përcaktojnë drejtimin e lëvizjes për të ardhmen”, tha Blair./abcnews.al

elseid-hysaj.jpg
G. P.14:21 | 02/11/2018

Elseid Hysaj nuk po kalon një moment të mirë tek Napoli. Ka kritika për mbrojtësin e kombëtares shqiptare, që duket se ka mbetur i pakënaqur nga dështimi i transferimit tek Çelsi në Angli.

Ka qenë ndër më të rëndësishmit në skuadër. Elseid Hysaj tek Napoli cilësohet një histori suksesi për 3 vite me radhë, por duket se diçka ka ndryshuar. Mbrojtësi i kombëtares shqiptare është në vështirësi këtë sezon me skemat e trajnerit të ri, Karlo Ançeloti, ndërsa po merr kritika. Mediat në Itali madje bëjnë pyetjen nëse “Milik dhe Hysaj janë pengesë për këtë Napoli?” Kritikat duken të ekzagjeruara, ndonëse e vërteta është që shqiptari nuk është ai i viteve të kaluara. Për këtë duket se një arsye të fortë.

“Napoli Sport” shkruan: “Ndërlikohet rinovimi i Hysajt, shkak është Çelsi, pasi futbollisti është i zhgënjyer që nuk u transferua tek Sarri! Futbollisti ishte pranë kalimit në Angli, dhe sipas mediave iu ofruan 4 milionë euro rrogë në sezon, por Napoli nuk e lejoi këtë gjë. Tashmë, bisedimet kanë ngecur dhe presidenti De Laurentis nuk dëshiron t’i japë Hysajt kontratë të re me rrogë 2.5 milionë euro, aq sa kërkohet prej tij.

Napoli pranon deri në 2 milionë euro. Kjo situatë, natyrisht nuk e ndihmon aspak mbrojtësin e majtë, dhe po ashtu ndikon për keq në rendimentin e tij në kombëtaren shqiptare./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono