kristian panuci

panuci-2-1280x853.jpg
G. P.20:26 | 06/04/2019

Kristian Panuçi ka bërë kritika nga Italia për kombëtaren shqiptare. Ish-trajneri ka deklaruar në “La Gazeta dello Sport” se nuk gjeti ide të përbashkëta dhe profesionalizëm

Largimin e pati të hidhur, dhe besoi të pamerituar.

Kristian Panuçi nuk është më trajner i kombëtares shqiptare, dhe gjeti rastin për të bërë sërish kritika, i intervistuar nga “La Gazetta dello Sport”. Ish-tekniku deklaroi se e pati të vështirë të gjente ide të përbashkëta dhe profesionalizëm në ekip, gjë që, sipas tij, e pengoi të bënte punën e tij.

“M’u bë e vështirë të përcillja dhe praktikoja futbollin që kisha në kokë”, ishin fjalët e tij.

Panuçi përsëriti ato që tha më parë në konferencat për shtyp në Shqipëri, se shumë lojtarë të ekipit përfaqësues luanin pak, duke qenë gjithashtu një faktor negativ i rëndësishëm. Gjithsesi, në analizë të fundit, Panuçi deklaroi se nuk kishte asnjë peng nga aventura te kuqezinjtë, dhe shtoi se Shqipërisë do t’i thotë gjithnjë faleminderit për të gjitha.

Kjo ishte analiza e Panuçit, por vetëm pak ditë pas largimit të tij, trajneri kujdestar Ervin Bulku, dhe kapiteni Elseid Hysaj I kujtuan se rreth 70 për qind e lojtarëve të ekipit, ishin ata që u kualifikuan në Euro 2016 nën drejtimin e paraardhësit të tij, Giani De Biasi.

Përsa i përket disiplinës së theksuar fort nga Panuçi, vlen të kujtohen fjalët e kandidatit për stolin e Shqipërisë, Edi Reja, të thëna për mediat italiane, që theksoi se “dënimi i Strakoshës m’u duk i ekzagjeruar, sepse një mungesë mund të ndodhë”. Duket se kombëtarja ka nevojë pikërisht për një trajner që e njeh mentalitetin e shqiptarëve./abcnews.al

panuci-2-1280x853.jpg
G. P.16:30 | 23/03/2019

Largimi i Kristian Panuçit nga stoli i Shqipërisë mund të quhet një ikje e paralajmëruar. Presidenti Duka kërkoi informacion për fjalët e trajnerit në konferencën për shtyp, përpara se të merrte vendimin.

Ishte ora 09.00 e mëngjesit të kësaj të shtune, kur Armand Duka vendosi të tregonte vendimin e tij. Një telefonatë e presidentit në Federatë njoftoi se Kristian Panuçi nuk do të jetë më trajner i kombëtares shqiptare.

Kishin kaluar vetëm 10 orë nga disfata e hidhur me Turqinë dhe Dukës i ishte mundur mendja plotësisht se nuk mund të vazhdohej me italianin. Ai u mendua në stadiumin “Loro Boriçi” të Shkodrës, ku qëndroi deri në orën 01:30 të natës, në shoqëri të Sekretarit të Përgjithshëm të FSHF-së, Shulku.

Në impiantin shkodran, ai dha edhe porosinë që t’i përgatitej një përmbledhje e fjalëve të Panuçit në konferencën për shtyp pas Turqisë. Padyshim, që mësoi se trajneri lëshoi shprehjen e rëndë për shqiptarët si “popull cirku”.

Kjo duket, ishte pika që derdhi gotën. Edhe në të kaluarën, Panuçi kishte lëshuar shprehje të shumta “me spec”, si ndaj lojtarëve, ashtu edhe ndaj paraardhësit të tij, Xhani De Biazi.

Gjithsesi, pyetja më normale mbetet, përse Duka nuk e shkarkoi trajnerin pas katastrofës me Skocinë?

Ndoshta, kishte ende besim se ai mund ta ndryshonte situatën, nëse nuk do të kishte dëmtime, ose ndoshta sepse nuk mundi të gjente në atë kohë një alternativë të besueshme. ABC News njoftoi nëntorin e kaluar, se presidenti kishte pasur kontakte me trajnerë italianë e kroatë, po ashtu se një trajner shqiptar mund të kishte qenë zgjidhje e përkohshme.

Federata doli me përgënjeshtrim në atë kohë, ndërsa tani pritet emri i trajnerit të ri.Vetë Duka, i pyetur në linjë telefonike, nëse tekniku i ardhshëm do të jetë i huaj apo shqiptar, u përgjigj shkurt: Do të jetë trajner!

Prania e teknikut italian, Edoardo Reja, në stadium, nuk mund të ishte një tregues, pasi ai ishte në rolin e vëzhguesit të lojtarëve, jo kandidaturë për stolin kuqezi.

Sa për Panuçin, ai mbylli ndoshta etapën më të vështirë të karrierës së tij në futboll, si lojtar apo në stol. I ardhur me shpresa të mëdha për të vazhduar aty ku e la De Biazi, nuk mundi të kishte rezultatet me vete.

Në 2018 e 2019, pësoi 7 humbje e arriti dy fitore në 9 ndeshje, me golaverazhin 3 gola të shënuar e 18 të pësuar. Rezultatet duket se ishin thjesht tregues i asaj që ndodhte në skuadër, pasi burime pranë kombëtares tregojnë për nerva dhe ofendime të lojtarëve nga ana e trajnerit, diçka që mund të ketë prishur përfundimisht harmoninë në ekip.

De Biazi u largua i ngritur në qiell nga Federata, qeveria shqiptare, por edhe Ambasada e Italisë në Tiranë. Panuçi, në të kundërt, iku me nerva të shkatërruara duke u grindur me gazetarët në korridorin e “Loro Boriçit”./abcnews.al

shqiperia-1.jpg
G. P.22:57 | 22/03/2019

Shqipëria e nisi me humbje fushatën kualifikuese të Euro 2020 edhe pse u përpoq të krijonte raste shënimi me Turqinë të premten në Shkodër.

Kombëtarja u mund me rezultatin 2 – 0 në përballjen në “Loro Boriçi” pas pakujdesive në mbrojtje. Loja e dobët solli edhe irritimin e tifozëve ndaj Christian Panuccit. Trajneri surprizoi me formacionin ku preferoi në sulm Bekim Balajn dhe nga minuta e parë u aktivizua edhe Ivan Balliu.

Kuqezinjtë e kërkuan golin që në fillim, por pa e arritur. Balaj dhe Balliu rrezikuan portën turke. Në momentin më të mirë të kuqezinjve Turqia realizoi gol. Gabimi i Gjimshitit në mesin e pjesës së parë u shfrytëzua nga Burak Yılmaz, i cili kaloi miqtë në avantazh.

Përpjekjet e Shqipërisë për të shënuar nuk u ndalën, por pa sukses. Kuqezinjtë e nisën sërish në sulm pjesën e dytë, por sërish duke harruar mbrojtjen. Goditja e Calhanoglu nuk u ndal dot nga Berisha. Portieri u fajësua nga tifozët për këtë gol. Panucci tentoi të ndryshonte situatën, duke aktivizuar Sadikun dhe Grezdën në vend të Balajt dhe Balliut. Pavarësisht kësaj nuk solli ndryshim të rezultatit. Shqipëria do të luajë të hënën në transfertë me Andorrën që u mund 2 – 0 nga Islanda. Grupi H kryesohet nga Franca që fitoi 4 – 1 Moldavinë.

Tv Klan

panuci-1-1280x734.jpg
ent ela15:24 | 21/03/2019

Kombëtarja ka lajme të mira në prag të ndeshjes ndaj Turqisë. Trajneri Panuçi përcakton formacionin, ndërsa Armando Sadiku nuk ka dëmtim

Për fat të mirë, alarmi u shua shpejt. Armando Sadiku nuk pati probleme të rëndësishme dëmtimi, dhe pasi mungoi në njërën nga seancat stërvitore, u bashkua normalisht me ekipin, në tjetrën.

Një lehtësim i madh për tifozët dhe trajneri Panuçi, për të cilin lojtari i Luganos është zgjedhja kryesore e sulmit. Askush nuk mund të harrojë se Sadiku është golshënuesi më I mirë aktiv në ekipin përfaqësues, mungesa e të cilit duhet fajësuar jo pak për rezultatet negative të vitit 2018.

Me elbasanasin gati, trajneri italian mundi të përgatiste normalisht formacionin. Zgjedhja në portë është thuajse e detyruar, pra Etrit Berisha.

Në mbrojtje, të preferuar janë Gjimshiti-Veseli në qendër, me Hysajn e Alijin në krahë, ndërsa Xhaka-Abrashi e Memushaj plotësojnë mesin e fushës, me Uzunin e Grezdën si ndihmës të Sadikut.

Panuçi, në të vërtetë, provoi edhe alternativa të ndryshme në çdo repart, me Ajetin dhe Ismailin në qendër të mbrojtjes, e duke kombinuar Bashën, Kaçen apo Abrashin në mesfushë dhe nga krahët.

Burime në kombëtare bëjnë me dijë se, eksperimentet e dyta, mund të vlejnë më shumë për ndeshjen ndaj Andorrës. Ekipit i mungojnë kapiteni Mavraj i pezulluar, portieri Strakosha i lënë jashtë për shkak vonese, Odise Roshi ende jo i riaftësuar 100 për qind, si dhe të dëmtuarit Lila e Binaku.

Shqipëria luan këtë të premte ndaj Turqisë, në orën 20:45, në “Loro Boriçi” të Shkodrës, ndërsa të martën do të jetë në fushën e Andorrës, me të dyja ndeshjet për eliminatoret e Evropianit./abcnews.al

lenjani.jpg
G. P.19:25 | 18/03/2019

Nuk ka nisur në mënyrën më të mirë grumbullimi i ekipit kombëtar në prag të dy ndeshjeve eliminatore të Euro 2020. Pas largimit nga skuadra të Egzon Binakut dhe Andi Lilës, trajneri Panuçi ka ftuar disa lojtare të tjerë për të plotësuar numrin e duhur të lojtareve.

Një prej tyre ishte dhe mbrojtësi Ermir Lenjani, i cili nuk e ka pritur mirë mos thirrjen në ftesën e parë duke refuzuar ftesën e sotme të Panuçit. Madje lojtari në fjalë ka theksuar se nuk do të kthehet më në kombëtare për sa kohë të jetë në krye trajneri Panuçi.

Që nga viti 2013 jam pjesë e Kombëtares shqiptare dhe ndihem krenar për këtë gjë. Kur lëndohen 4-5 lojtarë trajnerit i bie në mend që luan diku Ermir Lenjani dhe më dërgon ftesë. Faleminderit, por JO.  Me lot në sy e them se nuk do të grumbullohem më me Kombëtaren sa të jesh ti aty. Kam kontribuar shumë dhe meritoj respekt.  Dashuria ime për Shqipërinë është më e madhe se urrejtja jote për mua. Unë kam qenë, jam dhe gjithmonë do të jem djalë i Shqipërisë, ndërsa ti je vetëm kalimtar”, është një pjesë nga reagimi i Ermir Lenjanit./abcnews.al

panuci-1280x718.jpg
ent ela14:51 | 05/03/2019

Kristian Panuçi mund të mos jetë më, trajner i Kombëtares shqiptare. Lajmet nga Italia janë që ai është kandidat serioz për stolin e Romës.

Detyrimin e ka të madh për të mos ikur, por zgjedhja mund të jetë pikërisht e tillë. Kristian Panuçi mund të largohet nga kombëtarja shqiptare për t’u ulur në stolin e Romës në Serinë A.

Informacionet vijnë nga Italia dhe theksojnë se emri i trajnerit të kombëtares shqiptare është ndër më të lakuarit në klubin me bazë në Trigoria.

Disfata e rëndë, 0-3 në derbi, duket se i ka prerë shpresat që Di Françesko të vazhdojë në detyrë, dhe mundësia e vetme që ai të shpëtojë postin është suksesi në Ligën e Kampionëve.

Vetëm nëse Roma eleminon Porton dhe kualifikohet për në çerekfinale, trajneri nuk do të shkarkohej, por kjo thjesht për momentin.

Klubi kryeqytetas, sipas lajmeve nga Italia, e mendon Panuçin si zgjedhje emergjente, për të ndihmuar një skuadër që, sipas tyre, është në prag të shkatërrimit, dhe në rrezik për të mos u kualifikuar për në Champions.

Tekniku i Shqipërisë shihet si njeri që e njeh ambientin, dhe që ka kosto relativisht të ulët. Nga Roma pritet të largohet edhe njëri nga drejtuesit, spanjolli Monçi, njeriu që e ka mbështetur deri në fund trajnerin e tanishëm, të cilin më pas nuk do të ketë kush ta mbështesë.

Lajmet për interesimin e verdhekuqve për ish-lojtarin e tyre dolën në publik dhjetorin e kaluar, kur Roma pati problemet e para me Di Françeskon.

Gjithsesi, nuk dihet nëse Panuçi do të pranonte një detyrë që pritet të jetë e përkohëshme, të paktën sipas planeve të klubit, pasi romanët shpresojnë të marrin në verë trajnerin e Çelsit, Mauricio Sarri.

Një pengesë tjetër do të ishte kontrata me Federatën Shqiptare të Futbollit, që përfundon në nëntor, por edhe detyrimi moral pas mbështetjes së plotë që pati nga presidenti i saj, Armand Duka. Panuçi u konfirmua në stol edhe pas paraqitjes së dobët në Ligën e Kombeve, dhe zërave se nuk shkon mirë me lojtarët./abcnews.al

PANUCI-PAS-NDESHJES.mpg_snapshot_00.37-1280x720.jpg
G. P.18:18 | 06/02/2019

Trajneri i kombëtares, Kristian Panuçi, është i shqetësuar për formën e sulmuesve, ndërsa afrojnë ndeshjet eleminatore të Europianit. Italiani ka udhëtuar duke takuar disa prej futbollistëve.

Shqetësimi është i madh se mund të përsëritet e njëjta situatë. Kombëtarja shqiptare i mbylli në mënyrë negative ndeshjet e Ligës së Kombeve, dhe trajneri Kristian Panuçi, po përpiqet që të mos jetë në po këtë gjendje kur të nisin eleminatoret e Europianit në Mars.

Italiani, gjatë gjithë Janarit, ka qenë në lëvizje nëpër Europë, duke takuar futbollistët për të mësuar gjendjen e tyre të vërtetë, dhe shqetësimi kryesor ka qenë për sulmuesit. Burime në Federatën Shqiptare të Futbollit bëjnë me dijë se Panuçi ka takuar me radhë, Armando Sadikun, Sokol Cikalleshin dhe Odise Roshin, që kanë qenë të dëmtuar gjatë vjeshtës së kaluar.

Trajneri është takuar me Sadikun e rikthyer tek Lugano në Zvicër, pas dëmtimit që pati në Spanjë tek Levante. Sulmuesi 27-vjeçar duket i riaftësuar, ndonëse ende jo në formë të plotë. Gazeta “Blick” ka ende dyshime për të.

“Sa e ka kaluar me të vërtetë Sadiku dëmtimin e rëndë në gju, që pësoi në Spanjë”, bën pyetjen ajo, ndërsa thekson se lojtari mungoi për 5 muaj.

Sulmuesi shqiptar thotë se shpreson të nisë të aktivizohet për disa minuta në ndeshjet e kampionatit. Trajneri ka takuar Cikalleshin në Turqi, pas ndryshimit të skuadrës.Ai është përpjekur të kuptojë sesa shanse ka sulmuesi për të pasur minutazh, në mënyrë që të jetë gati për kombëtaren. Panuçi ka udhëtuar gjithashtu për të biseduar me Odise Roshin, që gjithashtu është në fazë rikuperimi me skuadrën Ahmat Grozni të Premier Ligës së Rusisë.

Një tjetër preokupim për teknikun kuqezi ishte ai lidhur me Amir Abrashin. Mesfushori ka qenë plotësisht i pafat këto kohë, pasi është dëmtuar tri herë. Tashmë, ai është plotësisht i gatshëm për të luajtur, dhe ka qenë pjesë e 18-es së Frajburgut në Gjermani, por ende nuk është aktivizuar.

E gjithë kjo situatë është shqetësuese për Panuçin, që e ka theksuar disa herë se nëse nuk do të ketë lojtarët në dispozicion apo në formën e duhur, do ta ketë të vështirë të marrë rezultate në eleminatoret e Europianit, ku kombëtarja ndeshet me Francën, Islandën, Turqinë, Moldavinë dhe Andorrën, me ndeshjet që nisin në 22 Mars me ndeshjen ndaj Turqisë./abcnews.al

panuci-dhe-duka.jpg
G. P.16:24 | 27/11/2018

Kristian Panuçi nuk e ka aspak të sigurt postin e trajnerit të kombëtares. ABC News mëson se presidenti Duka po kërkon një pasardhës në Itali dhe Kroacia.

Fitoi ndaj Uellsit dhe u duk se e keqja kaloi. Kristian Panuçi u mendua se e siguroi stolin e kombëtares të paktën deri në verë, pasi presidenti Duka deklaroi publikisht mendimin e tij.

“Kjo nuk do të thotë që ne në këtë kohë të marrim vendime të nxituara. Trajneri ka të mirat dhe këqijat e veta këto ndeshje. Ne do vazhdojmë të mbështesim trajnerin dhe stafin në eliminatoret e Europianit”, tha Duka.

Gjithsesi, të mos nxitohemi, pasi kërkimi për një trajner të ri po vazhdon me këmbëngulje. Burime tepër të besueshme në Federatën Shqiptare të Futbollit pohojnë për ABC News se Duka dëshiron ndryshim, dhe se trajneri i ardhshëm do të jetë përsëri i huaj.

Numri 1 i Federatës është në bisedime në Itali dhe në Kroaci, e ndonëse nuk jepen emra konkretë, burimet e mësipërme theksojnë se preferenca është sërish për një italian. Pas De Biazit dhe Panuçit, Duka mesa duket dëshiron të ketë vazhdimësi, për të mos krijuar konfuzion tek futbollistët. Në mediat italiane është përmendur emri i Alberto Malezanit, veçse ai është 64 vjeç dhe presidenti i Federatës dëshiron trajner me moshë më të re.

Gjithsesi, ekziston mundësia që kombëtarja të mund të drejtohet përkohësisht nga një trajner shqiptar, deri në gjetjen e një të huaji. Disa javë më parë, ABC News informoi se Duka ishte kthyer tek pista shqiptare, dhe më pas doli emri i Bledar Kolës, i cili e refuzoi detyrën. Burimet në Federatë bëjnë me dijë se presidenti ka humbur besimin tek Panuçi, dhe arsyet kryesore janë mungesa e një formacioni stabël dhe e mënyrës së duhur të lojës./abcnews.al

uzuni.jpg
G. P.18:01 | 26/11/2018

Myrto Uzuni vazhdon me formën e tij të madhe në Ligën e Parë të Kroacisë. Futbollisti beratas shënoi një tjetër gol, ndërsa po ndihmon Lokomotivën e Zagrebit që të kualifikohet për në Europë.

Nëse ka të ardhme kombëtarja e Shqipërisë, ai është një nga arsyet që të bindin. Myrto Uzuni, 23-vjeçari nga Berati, e tregoi edhe një herë vlerën e tij, në Ligën e Parë të Kroacisë, duke shënuar një tjetër gol. Lojtari ofensiv realizoi golin e barazimit 1-1, në ndeshjen e skuadrës së tij, Lokomotiva e Zagrebit, ndaj Osijekut, dhe festoi duke bërë shenjën e shqiponjës. Edhe pse Lokomotiva nuk arriti të fitonte, por barazoi 2-2 në fushën e saj, sëfrish kjo nuk e zbeh aspak paraqitjen e shqiptarit.

Uzuni ka shënuar 3 gola deri tani në kampionatin kroat, duke qenë një nga më të mirët për skuadrën e Zagrebit që mban vendin e dytë në renditje, duke pasur pretendime për t’u kualifikuar të paktën për në Ligën e Europës. Po ashtu, ai ka dhënë pasime goli, nga të cilët ka përfituar edhe shqiptari i Kosovës, Lirim Kastrati, që ka realizuar deri tani 7 rrjeta. Uzuni cilësohet si tepër i rëndësishëm për kombëtaren shqiptare, me trajnerin Panuçi që e vlerëson shumë, ashtu si edhe Eros Grezdën. Pasi luajti 7 herë për ekipin Shpresa, beratasi tani është bërë pjesë e ekipit përfaqësues, për të cilin pritet të japë kontribut të madh./abcnews.al

kristian-panuci.jpg
G. P.12:13 | 21/11/2018

Kristian Panuçi nuk dorëzohet dhe ndihet më I fortë pas fitores me Uellsin. Trajneri italian as nuk dëshiron të dëgjojë për dorëheqje, ndërsa shpreson ta ndryshojë kombëtaren.

Një fitore e vogël, por edhe kaq mjafton për të qenë më i qetë. I tillë u ndje trajneri i Shqipërisë, Kristian Panuçi, pas suksesit të diskutueshëm ndaj Uellsit, dhe kjo u duk në analizën që bëri. Një gol i vetëm dhe shumë vështirësi për të fituar një miqësore, që vlen shumë më pak se një duel zyrtar.

“Ishte fitore e rëndësishme sepse dhamë një sinjal pas një Lige të shëmtuar të Kombeve që zhvilluam. Ndryshova diçka me lojtarët, duke i dhënë ekipit më shumë ekuilibër. Jam i lumtur për lojtarët dhe për federatën, sepse që të gjithë vuajmë kur humbasim. Kjo nuk duhet të na bëjë të mendojmë se nuk kemi probleme, sepse kemi ende shumë probleme”, u shpreh trajneri i kombëtares.

Panuçi konfirmoi ndryshimin taktik dhe vlerësoi skuadrën, sidomos në pjesën e dytë.

“Kur ju thashë përpara ndeshjes se ishte faji im, kjo do të thotë se duhej të ndryshoja diçka. Mendoj se pas këtij ndryshimi, djemtë u ndjenë më mirë, ndonëse ishte thjesht një miqësore. Në pjesën e dytë ishte më e vështirë sepse hynë në fushë Bejl apo Ramsej, dhe atyre nuk u pëlqen të humbasin. Ne u treguam të zotët për t’i përballuar, duke qenë kompaktë, e duke dalë tri-katër herë në kundërsulm për të bërë golin e dytë”, tha Panuçi.

Trajneri këmbënguli fort në një fakt të rëndësishëm.

“E ardhmja ime? Është e vërtetë që fitoret krijojnë atmosferë të mirë, dhe është normale që pozicioni im vihet në diskutim. Lojtarët kanë punuar gjithnjë mirë. Nëse do të kisha menduar se lojtarët nuk ishin me mua, do të kisha shkuar tek presidenti për t’i kërkuar dorëheqjen”, tha ai.

Ja dhe një pyetje e drejtpërdrejtë, a do ta japë dorëheqjen pas dështimit në Ligën e Kombeve?

“Unë nuk jap kurrë dorëheqje, sepse më pëlqen të luftoj, nuk dorëzohem. Nuk e braktis varkën kur ajo është në vështirësi”, u përgjigj Panuçi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono