kremlini

PUTIN-NATO-SERBI-ABC-M5T1.mpg_snapshot_00.01-1280x720.jpg
G. P.14:40 | 20/08/2019

Rusia do të vendosë në gatishmëri raketa me rreze të shkurtër dhe të mesme, që ndalohen nga marrëveshja e shkelur tashmë me Shtetet e Bashkuara të Amerikës – në ato rajone në botë ku do të ketë armë amerikane të ngjashme.

Deklarata është bërë nga presidenti rus Vladimir Putin. Kreu i Kremlinit theksoi se nëse sisteme të tilla sulmi do të vendosen nga Shtetet e Bashkuara të Amerikës, të njëjtën gjë do të bëjë dhe Rusia. Ai shtoi se nuk do të vendoset asnjë deri sa pala amerikane të bëjë lëvizjen e parë./ABC News Albania 24/7

108080669_p07hycqy.jpg
ent ela12:30 | 28/07/2019

Në pyjet e Siberisë si dhe në disa zona të veriut, zjarret kanë shkaktuar përveç dëmeve edhe re të mëdha tymi, duke alarmuar banorët. Ata denoncojnë ndotjen atmosferike, por Kremlini zyrtar e mohon.

Zjarri që ka përfshirë pyjet në Rusi po shkatërron 11 nga 46 rajonet ruse. Zjarret më të shtrira në sipërfaqe, të cilat mendohen të jenë të qëllimshme – kanë prekur rajonet e Irkutsk, Krasnoiarsk e Buriatia.

Një re e madhe tymi ka mbuluar qytetet ku dhe zjarret janë më të dhunshme. Banorët të alarmuar kanë kërkuar ndihmën e autoriteteve duke denoncuar faktin se ajo që po ndodh është ndotje atmosferike. I dërguari i presidentit rus Putin në Siberi e mohoi emergjencën e ambientit pasi përqendrimi i monoksidit të karbonit sipas tij nuk i kalon kufijtë e lejuar.

Ndërkohë reja e tymit ka mbërritur në rajonin rust ë Tiumen, në Siberinë perëndimore, që ndodhet shumë larg vatrave të zjarrit. Nga rrjetet sociale me qindra persona u kërkojnë autoriteteve që të shuajnë zjarret sa më shpejt. /ABC News Albania 24/7

trump-putin.jpg
nev ila23:45 | 11/06/2019

Moska ka zbehur shpresat për një takim mes presidentëve Trump dhe Putin në Osaka të Japonisë. Kremlini ka deklaruar se propozimi i Shtëpisë së Bardhë nuk është pasuar nga asgjë konkrete, ndaj dhe ideja “vazhdon të vërtitet në ajër”.

Zyra e shtypit në Kremlin deklaroi të martën se ideja amerikane për një takim mes presidentëve Trump dhe Putin në kuadër të samitit G20 që zhvillohet më vonë gjatë muajit në Japoni ka mbetur pezull dhe me detajet të pacaktuara.

Trump e kapi në befasi Kremlinin muajin e kaluar kur tha se kishte në plan të takohej me Putin në samitin e Osakës, por pavarësisht befasisë Moska u shpreh e hapur për një takim të tillë dhe shpresoi se do të ndodhte.

Rusia prej kohësh ka shprehur gatishmërinë e saj për të riparuar marrëdhëniet me Shtetet e Bashkuara, që mbeten të vështira për shkak të një sërë çështjesh, përfshirë këtu Sirinë, Ukrainën dhe ndërhyrjen e përfolur ruse në politikën amerikane. Por Kremlini e ka bërë gjithashtu të qartë se pret të marrë një propozim zyrtar për këtë takim dhe u ka kujtuar mediave se, takimi i fundit i planifikuar mes Putin dhe Trump u anulua me nismë të palës amerikane.

Zyrtari i Kremlinit, Juri Ushakov u tha gazetarëve ditën e martë se detajet e një takimi mes dy liderëve jo vetëm që nuk janë caktuar, por as janë diskutuar.

“Ideja për një takim Putin-Trump në Osaka, në kuadër të samitit G20, vërtitet në ajër. Pala amerikane, që e ka hedhur atë, nuk ka sjellë asgjë të përgatitur dhe ne nuk kemi diskutuar as elementët bazë, që janë vendi, koha dhe axhenda”, deklaroi Ushakov./ABC News Albania 24/7

putin-ne-rusi.jpg
G. P.09:15 | 02/05/2019

Presidenti rus, Vladimir Putin ka kthyer në ligj një masë të re që synon të zgjerojë kontrollin qeveritar në internet. Kritikët kanë paralajmëruar se ligji i ri, i nënshkruar nga Putini më 1 Maj dhe i publikuar në faqen e Kremlinit, do të mundësojë censurën në disa pjesë të internetit.

Përveç gjërave të tjera, masa e re u kërkon ofruesve të shërbimeve të internetit që të instalojnë pajisje për të drejtuar trafikun rus përmes serverëve të këtij shteti.

Mbrojtësit e internetit kanë thënë se një gjë e tillë do t’iu mundësojë agjencive ruse të inteligjencës që të vëzhgojnë më shumë  dhe autoritetet shtetërore do të kenë më shumë hapësirë për të kontrolluar informacionin.

Megjithatë, Kremlini dhe aleatët e tij në parlament kanë mbrojtur këtë legjislacion si masë nëse SHBA dëshirojnë t’i pamundësojnë Rusisë qasjen në internet./ABC News Albania 24/7

download-4.jpg
ent ela13:45 | 23/04/2019

Presidenti i Rusisë Vladimir Putin nuk do të urojë ende Zelenskij për fitoren e tij në zgjedhjet presidenciale të së dielës në Ukrainë. Sipas zëdhënësit të Kremlinit, është ende herët për një hap të tillë.

Është ende herët për të folur për urime nga ana e Presidentit Vladimir Putin për Zelenskij, përveç mundësisë për bashkëpunim. Kështu u shpreh zëdhënësi i Kremlinit Dimitri Peskov i cituar nga agjencia ruse e lajmeve “Tass”.

Ai shtoi se gjykimi bëhet në baza konkrete dhe pas hapave specifikë. Ndër të tjera nuk ka ende një rezultat zyrtar të këtyre zgjedhjeve, theksoi Peskov.

Ky i fundit tha se Rusia respekton zgjedhjen e bërë nga qytetarët e Ukrainës dhe pse dyshon për legjitimitetin e procesit. Moska e respekton zgjedhjen e popullit ukrainas, sidomos se pse kjo zgjedhje ishte shumë e qartë u shpreh Peskov. Por sipas tij legjitimiteti i këtyre zgjedhjeve është vënë në diskutim për faktin se tre milionë qytetarëve nuk iu lejua të votojnë.

Sipas rezultatit të numërimit të 99 për qind të fletëve të votimit, Vladimir Zelenskij është dukshëm në avantazh në krahasim me rivalin, kreun aktual të shtetit Petro Poroshenko – 73,21% kundrejt 24,46%.

Kryeministri rus Dimitri Medvedev në një postim në profilin e tij në Facebook shkruante se për Moskën ka ende një mundësi për të përmirësuar bashkëpunimin me Ukrainën. Por gjithësesi ai shtoi se nuk duhet të ketë iluzione.

Presidenti i sapozgjedhur do të ulet në postin e tij në 31 maj. /abcnews.al

russia-seizes-three-ukrainian-naval-ships-off-crimea-2018-11-26.jpg
G. P.23:25 | 27/11/2018

Rusia ka publikuar deklarata me video të 3 marinarëve ushtarakë të Ukrainës, të cilët u përfshinë në incidentin me ushtrinë ruse në afërsi të Krimesë. Ata pranojnë se vepruan për të provokuar Kremlinin. Ndërsa Kievi shprehet se ata kanë dhënë këtë deklaratë nën presion.

Shërbimi i brendshëm i sigurisë në Rusi ka publikuar deklarata nga 3 marinarët ukrainas të kapur pasi anijet e kremlinit hapën zjarr dhe sekuestruan 3 anije të Ukrainës në afërsi të Krimesë. Njëri prej tyre, Vladimir Lesovoy, tha se është i vetëdijshëm i natyrës provocative të veprimeve të Ukrainës. Ndërsa dy të tjerët pranuan se kanë neglizhuar thirrjet e shërbimit kufitar rus se po shkelin në ujërat e tyre territorial. Drejtuesi i marinës ushtarake të Kievit thotë se ata janë detyruar të thonë gënjeshtra gjatë rrëfimeve. Shtetet perëndimore kanë dënuar përdorimin e forcës nga Rusia, 4 vite pasi aneksoi gadishullin e Krimesë.

Incidenti i fundit është përplasja e parë mes Ukrainës dhe forcave Ruse për vite, megjithatë separatistët pro-rusë dhe “vullnetarët rusë” kanë luftuar kundër ushtrisë ukrainase në dy rajone lindore. Tensionet u përshkallëzuan kur forcat e Kremlinit hapën një urë këtë vit mes Rusisë dhe Krimesë në ngushticën Kërç, që të çon në detin Azov. Ukraina ka dy porte të mëdha në brigjet veriore të detit Azov dhe në bazë të traktatit të vitit 2003, të dy vendet kanë të drejtë qasjeje në këto ujra.

Rusia akuzon dy lufanijet dhe një remorkiator ukrainas se kanë shkelur në ujërat territorial të saj ndërsa po lundronin në ngushticën Kërç. Por Kievi thotë se incidenti ndodhi në një zonë që është e lirë për lundrim. Ndërkohë, mbrëmjen e së hënës parlamenti i Ukrainës aprovoi vendimin e presidentit Petro Poroshenko për të aktivizuar ligjin e ushtrisë për 30 ditë në 10 rajonet kufitare. Kreu i shtetit tha se kërcënimi për një pushtim të mundshëm nga Rusia është shumë serioz. Ligji i ushtrisë është i paprecedentë në Ukrainë dhe i jep ushtrisë autoritet për të ndaluar protestat dhe grevat. Mobilizimi i civilëve për shërbimin ushtarak është i mundur por jo i pashmangshëm./abcnews.al

SPECIALE-VUCIC-–-PUTIN-1280x610.jpg
ent ela14:24 | 06/10/2018

Në vizitën e tij të fundit në Moskë, presidenti serb Vuçiç, i ka kërkuar ndihmë liderit të Kremlinit Vladimir Putin për Kosovën. Dhe pse deklaratat për media ishin të kufizuara, Vuçiç u shpreh se Serbia kishte marrë çdo gjë që kishte kërkuar nga takimi.

“Morëm çdo gjë që kërkonim”. Me këtë fjali presidenti serb Aleksandër Vuçiç përmblodhi takimin e tij me liderin rus Vladimir Putin në Moskë. Kreu i shtetit serb theksoi se ata kishin rënë dakord për çdo temë të rëndësishme që u diskutua, për gjithçka. Por dhe pse i pyetur vazhdimisht nga gazetarët serbë dhe ata rusë, Vuçiç nuk dha asnjë detaj.

Por mediat ruse raportuan se Vuçiç kishte falenderuar presidentin rus për mbështetjen që i jep integritetit territorial dhe sovranitetit të Serbisë.

Vuçiç u shpreh se e vetmja gjë që priste nga ky takim ishte mbështetja e Rusisë, pasi kjo ka një rëndësi jetike për popullin e tij, e një mbështetje të tillë ai e mori.

Një nga pikat e tjera të rëndësishme ishte dhe marrëveshja për përforcimin e bashkëpunimit në fushën ekonomike.

Por sigurisht që tema kryesore ka qenë pikërisht Kosovë për të cilën të dy presidentët kanë folur për 50 minuta. Vuçiç tha se i kishte bërë të qartë Putin se si ishte situatë aktuale në Kosovë, duke i dhënë dhe detajet më të vogla. Përfshirë këtu dhe atë që fuqitë e mëdha presin nga Beogradi, rolin e Rusisë dhe llojin e mbështetjes që pret Serbia.

I pyetur nëse kishte folur me presidentin rus dhe për idenë e korrigjimit të kufijve mes Kosovës dhe Serbisë, Vuçiç u shpreh se nuk mund të thoshte asgjë për këtë plan, përveçse që ishte refuzuar nga Shtetet e Bashkimit Europian, shqiptarët dhe serbët.

Kreu i shtetit rus shtoi se nuk mund të jepte më shumë informacione rreth bisedës me homologun rus, pasi nuk do të ishte e drejtë për presidentin Putin, por të dy kishin folur mjaftueshëm për të gjithë situatën në rajon.

“Nuk ka asnjë çështje të rëndësishme rajonale për të cilën nuk është folur, dhe jo vetëm kaq, por e analizuam në detaje. Tashmë unë pres që Putin të vizitojë Beogradin deri në fund të vitit, dhe që të ketë një rritje të menjëhershme të tregtisë mes dy vendeve tona”, theksoi Vuçiç.

Por presidenti serb tha se priste që Rusia të jepte një mbështetje dhe më të fortë për vendin e tij në forumet ndërkombëtare, për integritetin territorial të Serbisë dhe të drejtës së saj për të vendosur në mënyrë të pavarur. Të drejta këto që bëjnë që Serbia të vlerësohet dhe të respektohet.

Ndërkohë që duket se tensioni mes Beogradit dhe Prishtinës është përshkallëzuar.

Vuçiç dhe Thaçi duhej të ishin takuar në Bruksel për të diskutuar rreth idesë të korrigjimit të kufijve, por takimi dështoi.

Të premten e 7 shtatorit presidentët e Serbisë dhe Kosovës refuzuan të takoheshin në Bruksel në atë që pritej të ishte një bisedë e ndërmjetësuar nga Federika Mogerini, përfaqësuesja e lartë për politika të jashtme në Bashkimin Europian – me qëllimin për të afruar të dy vendet dhe për të ngritur bazat për një anëtarësim të shpejtë të tyre në BE. Në këtë takim presidenti serb Vuçiç dhe ai kosovar Hashim Thaçi – duhej të kishin folur për një shkëmbim territoresh, temë e diskutuar disa ditë para këtij takimi në Austri, ku të dy ishin takuar e kishin biseduar për disa moment.

Vuçiç e Thaçi ndodheshin të dy në Bruksel por në fund vendosën të takonin ndarazi Mogerinin, duke evituar të takoheshin me njëri tjetrin. Agjencia e lajmeve Reuters raportoi se refuzimi erdhi pak para takimit tri palësh, dhe ishin të dy presidentët që nuk dëshironin të takoheshin. Ndërsa agjencia Politiko, gjithnjë e mirëinformuar për çështje europiane, raportoi se kishte qenë Vuçiç i pari që s’kishte pranuar një takim me Thaçin.

Kjo sepse Kosova nuk kishte pranuar që në vizitën e presidentit serb atje, Vuçiç të vizitonte disa nga zonat e vendit. Por presidenti i Kosovës tha se nuk ishte në dijeni të kësaj situate.

Vendosja për diskutim e temës për shkëmbim territoresh mes Kosovës dhe Serbisë, ndodh sepse pas luftës, kufijtë mes dy vendeve nuk pasqyrojnë më së mirë mazhorancat etnike të dy vendeve. Në territorin kosovar ka zona me mazhorancë etnike serbe dhe në atë serb ka mazhorancë etnike shqiptare. Sipas disa analistëve ndërkombëtarë, është një fakt pozitiv, që dy vendet – formalisht në luftë deri dhjetë vjet më parë – kanë nisur bisedimet mes tyre. Të dy vendet gjithashtu synojnë anëtarësimin në Bashkimin Europian, dhe për të arritur këtë duhet që arrijnë një marrëveshje paqësore dhe të presin në kufijtë e tyre komunitetet etnike respektive. Një sinjal pjekurie ky që Bashkimi Europian ka kohë që e pret sidomos nga Serbia

Por analistë të tjerë mendojnë se negociatat e në mënyrë të vecantë dështimi i tyre – mund të kenë një efekt domino dhe të shkaktojnë një fazë të re paqëndrueshmërie në të gjithë rajonin, duke vënë në diskutim ekuilibrat e rigjetur vitet e fundit. “Reuters” shkruan se një shkëmbim i mundshëm territoresh u prit keq dhe një nga kundërshtarët ndërkombëtare më të fortë i këtij plani është Gjermania.

Ka arsye të forta historike për të cilat në Ballkan do të ketë gjithnjë njerëz që do të gjenden në anën e gabuar të kufirit. Përfundimi ideal i negociatave mes Beogradit dhe Prishtinës duhet të sjellë dhe njohjen e Kosovës nga Serbia, por nga ajo që ndodhi herën e fundit në Bruksel, ky objektiv është ende shumë larg.

Pasi është takuar me Vuçiç e Thaçin, Mogerini dha një deklaratë të shkurtër për shtyp ku shpjegonte se vijon të ketë vështirësi por ajo ka besim në impenjimin e të dy presidentëve se do të arrijnë një marrëveshje muajt në vijim. Një marrëveshje ligjore për një normalizim të përgjithshëm të marrëdhënieve në harmoni me ligjet ndërkombëtare. Për sa i përket takimit të dështuar. Presidenti i Kosovës Thaçi u shpreh se ka shumë qëndrime të ndryshme, ndaj u vendos që ishte më mirë të mos takohej me Vuçiç. Kjo për të mos prishur atë që ishte arritur deri tani.

Uinston Çërçill shprehej se në Ballkan njerëzit prodhojnë më shumë histori nga sa mund të tresin. E në fakt vendet ballkanike që synojnë anëtarësimin në Bashkimin Europian kohët e fundit shohin perspektivën e tyre në një kënd shumë të vështirë.

Është në këtë atmosferë që Serbia dhe Kosova po negociojnë për shkëmbim territoresh në një marrëveshje që mund të ishte historike. E destinuar për të vendosur një paqe mes dy vendeve në konflikt prej kohësh.

Serbët do të jepnin një pjesë të territorit në jug të Serbisë që përfshin Luginën e Preshevës, Medvegjën dhe Bujanovcin, ndërsa Kosova do të hiqte dorë nga veriu i Mitrovicës.

Ndërkaq presidenti rus Vladimir Putin pritet të vizitojë Serbinë në fund të muajit tetor, ose në fillim të nëntorit.

Një delegacion i madh rus do mbërrijë në Beograd para Putin, i përbërë nga qindra zyrtarë të qeverisë dhe biznesmenë rusë. Lajmi u konfirmua nga amabasadori rus në Serbi Aleksandër Çepurin. Ky i fundit tha se mes dy vendeve ka marrëdhënie shumë të mira por që duhen përmirësuar dhe më tej.

Kremlini nuk ka konfirmuar ende datën e saktë të vizitës, por Putin në vizitën e tij të katërt në Serbi mund të jetë në Beograd për  paradën ushtarake që shënon 100 vjetorin e fitores në Luftën e parë Botërore. Parada do të zhvillohet në 1 nëntor.

Serbia planifikon që të tregojë armët e reja të prodhimit vendas dhe të huaj si dhe avionët MIG-29 që mori një vit më parë në formë dhurate nga Rusia. Parade do të përfshijë qindra tanke dhe automjete lufte e hedhëse raketash. Por dhe sisteme mbrojtëse tokë – ajër të marra nga Biellorusia do tëjenë pjesë e paradës. Përvec bashkëpunimit ushtarak – teknik, dy liderët do të flasin dhe për marrëveshje në fushën e energjisë dhe ekonomisë.

Për herë të parë Putin vizitoi Serbinë në vitin 2001 kur u takua me ish presidentin Vojislav Koshtunica. Më pas një dekadë më vonë ai u ndodh në Beograd ku u takua me presidentin e atëhershëm Boris Tadic. Presidenti rus mbajti një fjalim para deputetëve në parlamentin serb, dhe vizitoi stadiumin “Ylli i Kuq”. Në vitin 2014 lideri i Kremlinit ishte i ftuar në paradën ushtarake “Hapi i Fitimtarit” në nder të clirimit të Beogradit në Luftën e dytë botërore.

Presidenti serb, Aleksandar Vuçiç, u duk i habitur kur priti në aeroport një dhuratë të sapoardhur nga Kremlini: avionë luftarakë të epokës sovjetike, sipas standardeve ruse, por që për aleatin ballkanik me vetëm pak aeroplanë, janë një thesar.

“Pothuajse më dolën lotët kur i pashë”, tha Vuçiç në gusht.

Këto dhurata erdhën më një çmim: 209 milionë dollarë për riparimet, por që sërish do të paguhen nga vetë Rusia.

Dhurimi i avionëve është pjesë e strategjisë ruse në Serbi dhe në pjesën më të madhe të botës. Kremlini ka ndërtuar një fushatë metodike, por me kosto të ulët, e cila synon të marrë përfitimet.

Rusia dhe Perëndimi janë të angazhuar në një betejë të ashpër për aleancën e Serbisë, një komb i rëndësishëm ballkanik që ka deklaruar dëshirën për t’u bashkuar me Bashkimin Evropian, por gjithashtu e konsideron Rusinë si vend aleat.

Ndërsa Perëndimi po shpenzon më shumë para kesh – në rastin e Evropës rreth 11.8 miliardë dollarë në vitin 2016 – prania e Rusisë në Serbi është shumë më e thellë. Ndër vite, Kremlini është shfaqur ekspert në gjetjen e mënyrave për të tërhequr miq dhe publicitet të mirë me çmime të volitshme. Dhe duke u bërë thirrje serbëve të zakonshëm, Rusia ka fituar më shumë mbështetje sesa do të kishte arritur thjesht duke përdorur udhëheqësit serbë.

Rusia ka ndërtuar një qendër ndihme urgjente, që i gjendet Serbisë sa herë ka zjarre dhe përmbytje, por zyrtarët perëndimorë dyshojnë se në të vërtetë ajo është një qendër spiunazhi. Kjo qendër ka aleatë në radhët e një grupi serb, që është i lidhur ngushtë me Putin dhe që ndihmoi Rusinë t’i merrte Krimenë Ukrainës në vitin 2014. Mediat shtetërore ruse transmetuan raporte në gjuhën serbe, siç është ajo që sugjeron se NATO dhe Shteti Islamik po komplotonin së bashku për të përhapur kaos në Kupën e Botës.

Megjithëse Rusia e vë theksin te lidhjet e saj të forta me Serbinë, të çimentuara nga trashëgimia e përbashkët ortodokse dhe sllave, kjo “lustër” dominon vetëm pjesën më të madhe të shekullit të XX. Marrëdhëniet e dy vendeve u ftohën pasi udhëheqësi i epokës komuniste të Jugosllavisë, Josip Broz Tito, u prish me Bashkimin Sovjetik më 1948. Gjatë përplasjeve etnike dhe bombardimeve të NATO-s në Ballkan në vitet fund të viteve ‘90, Rusia u tërhoq mënjanë kryesisht për shkak të trazirave të saj të brendshme. Vetëm në fillim të mijëvjeçarit, kur Rusia e mbështeti Serbinë duke kundërshtuar me përpjekjet e Kosovës për pavarësi, marrëdhëniet filluan të ngroheshin përsëri.

Pasqyrimi plot shkëlqim i Rusisë gjen vend në tabloidët e Serbisë, falë buletineve në gjuhën serbe, por edhe nga agjencia e lajmeve ruse e Sputnik, e cila u hap në Beograd në 2015-n.

Vetë serbët nuk e shohin këtë si ndërhyrje e huaj.

Flamuri rus shihet gjithandej në autostradat serbe, në tabelat e sponsorizuara nga kompania energjetike e Rusisë, “Gazprom”. Shumë prej këtyre rrugëve janë paguar me fondet e BE-së, por flamuri i saj blu zbret poshtë dhe ia lë vendin atij rus, sapo rrugët përfundojnë së ndërtuari.

Rusia dominon tregun e naftës dhe të gazit natyror të Serbisë, një pjesë e ekonomisë së përgjithshme, por një aspekt kyç për sigurinë e vendit. Serbia importon 75 për qind të gazit natyror nga Rusia. Që nga viti 2008, Moska ka kontrolluar prodhimin vendas, gjithashtu, pasi kompania energjetike e Serbisë u shit te “Gazprom” për një çmim të volitshëm. Fitimet shkojnë në favor të ndikimit të Rusisë.

Rusia gjithashtu ka një prani të fortë në kishë. Shumë priftërinj ortodoksë serbë shpesh takohen me udhëheqës të lartë politikë rusë. Në predikimet e tyre, ata e vënë theksin te trashëgimia e përbashkët fetare dhe falënderojnë Kremlinin për përpjekjen për të penguar njohjen e pavarësisë së Kosovës, të cilën kisha serbe e konsideron shtëpinë e saj prej brezash. Ndërtimi i një kishe ortodokse në një stil rus në veriperëndim të Beogradit mblodhi dhjetëra mijëra dollarë në donacione pasi u quajt “kisha e Putinit”.

Shenjat e para të suksesit të strategjisë ruse janë dhënë: Shumë serbë gabimisht besojnë se Rusia është partneri i tyre më i madh për tregti dhe një ndihmë e madhe në ushtri, sipas sondazheve të kryera në vend.

Në fakt, 65 për qind e tregtisë së vendit është me BE-në, ndërsa vetëm 6.7 përqind bëhet me Rusinë. Ushtarët serbë janë trajnuar më shumë se 20 herë vitin e kaluar me anëtarët e NATO-s, krahasuar me dy herë me homologët rusë. BE dhe shtetet anëtare ofruan më shumë se 600 milionë dollarë ndihma për Serbinë në vitin 2016, 50 herë më shumë se Kremlini. /abcnews.al

Gazetare: Dorina Kurtaj

livitenko.jpg
G. P.09:41 | 21/09/2018

E veja e një ish agjenti të KGB-së, që u helmua me lëndë radioaktive në vitin 2006, thotë se përgjigja e menjëhershme mjekësore dhe diplomatike e Britanisë ndaj sulmit me agjent nervor ndaj ish spiunit rus Sergei Skripal dhe vajzës së tij, tregon për përmirësim në trajtimin e situatave të ngjashme nga zyrtarët britanikë.

Rasti i Skripalëve shpesh është krahasuar me atë të Alexander Litvinenkos, ish oficerit të KGB-së të shndërruar në agjent britanik dhe kritik të hapur të presidentit rus Vladimir Putin.

Litvinenko u nda nga jeta më tepër se një dekadë më parë, me një vdekje të mundimshme, disa ditë pasi kishte pirë çaj, ku i kishin hedhur lëndën radioaktive helmuese polonium-210, në një hotel të Londrës. Mjekëve britanikë iu desh kohë e gjatë ta identifikonin substancën që shkaktoi vdekjen e tij.

Në një intervistë për shërbimin rus të Zërit të Amerikës, Marina Litvinenko, e veja e Aleksandrit, u pyet nëse zyrtarët britanikë të sigurisë kishin bërë sa duhet për të parandaluar, ose të paktën për t’u përgatitur për një sulm të ngjashëm.

Ajo tha se kur mësoi, që një tjetër ish spiun rus, ishte sëmurur rëndë në mënyrë misterioze në Britani – Skripali dhe vajza e tij u gjetën pa ndjenja në një stol në qytetin Salisbury të Anglisë marsin e kaluar – ishte ndjerë e shokuar dhe “tepër e dëshpëruar”.

“Por në këtë rast, gjithshka ishte ndryshe, nuk kishte nevojë të shpjegoje se ç’po ndodhte” – tha ajo.

Kur bashkëshortin e saj e patën shtruar në spital, në nëntor të vitit 2006, mjekët fillimisht patën thënë se helmimi kishte ndodhur për shkak të një viroze të rëndë në stomak, ose ngaqë mund kishte gëlltitur një kimikat. Marina tha se përpjekjet e saj të vazhdueshme, për të shpjeguar mundësinë e një tentative të maskuar për vrasje, kishin shkuar në vesh të shurdhët.

“Mjekët nuk kishin fare idenë përse flisnim ne. Kur u përpoqëm të shpjegonim se ne nuk ishim thjesht refugjatë politikë, por se Aleksandri kishte patur një konflikt serioz me një agjenci speciale të zbulimit rus, reagimi i tyre ishte sikur ne jetonim në një planet tjetër. Jo se nuk na besonin – ata thjesht nuk ishin në gjendje të kuptonin se përse bëhej fjalë,”- tha Marina.

Në rastin e Skripalit, megjithatë, “nuk ishte e nevojshem të shpjegohej se ç’po ndodhte”, pjesërisht për shkak të statusit të tij zyrtar në raport me autoritetet britanike. Zonja Litvinenko tha se ndryshe nga rasti i saj, që e kishte informuar zbulimin britanik në kapacitet jo-zyrtar, Skripali, kishte marrë azil në kuadrin e shkëmbimit të spiunëve, që do të thotë se zyrtarët e sigurisë dhe analistët mjeko-ligjorë ishin shumë më mirë të përgatitur për të kuptuar skenën e krimit dhe për të përcaktuar skenarin që mund të kishte ndodhur.

Konfirmimi i menjëhershëm i të kaluarës së Skripalit, thotë ajo, po ashtu i përgatiti specialistët e mjekësisë të shqyrtonin mundësinë e përdorimit të ndonjë substancë jashtëzakonisht të rrallë.

“Nuk kishte nevojë të provohej se kush donte ta helmonte Skripalin, apo arsyeja përse.” – tha ajo, duke shtuar se: “Megjithëse nuk ishte e informuar për ndonjë mekanizëm zyrtar për mbrotjen e spiunëve të arratisur nga përpjekje për t’u helmuar në të ardhmen, Britania e Madhe ka treguar se ka nxjerrë mësime nga ky rast.”

Përgjigja diplomatike

“Vetëm një javë pas helmimit të Skripalëve, pati një reagim tërësisht të ndryshëm nga ai në rastin tonë” – tha në intervistën për Zërin e Amerikës zonja Litvinenko. “Kryeministrja Theresa May bëri një deklaratë publike mjaft të ashpër, por do të ishte gabim të thuhej se ajo e akuzoi menjëherë Rusinë. Nuk ndodhi kështu. Ajo tha thjesht se kishte dyshime dhe se ishte e rëndësishme që Rusia të sillte menjëherë fakte se nuk e kishte kryer ajo helmimin. Dhe çfarë pamë? Përgjigje të zemëruara nga zyrtarët rusë, që thonin se rusët nuk kishin të bënin aspak me këtë rast”.

Ndërsa Britania filloi një hetim zyrtar për sulmin kimik të Salisbury-it, për të cilin ekspertët zbuluan se ishte kryer me një agjent nervor të periudhës sovjetike, të quajtur “Novichok”, Rusia, tha zonja Litvinenko, nuk pranoi të diskutonte mundësinë e ndarjes së informacioneve, që mund të kërkonte që ekspertët e huaj të kërkonin në laboratoret e armëve kimike të Rusisë.

“Pastaj erdhi një reagim ndërkombëtar”, – tha Litvinenko. “Mënyra se si Britania pati menjëherë mbështetjen e BE-së dhe SHBA-së; dëbimi masiv i diplomatëve ishte mbresëlënës. Asgjë e ngjashme nuk ndodhi pas helmimit të burrit tim. Po ashtu, mënyra se si Britania filloi të trajtojë paratë e investitorëve rusë: invesimet e mëdha ruse tani verifikohen dhe trajtohen me seriozitet të madh. Kjo është e rëndësishme të kuptohet…që njerëzit që përfitojnë nga regjimi rus nuk duhen prauar në vendet e civilizuara, thjesht si njerëz që kanë para.

Nuk dua aspak të them që të gjithë nejrëzit me para janë hajdutë. Por kur themi se ky regjim përbën kërcënim dhe këta njerëz bëjnë shumë para, thjesht ngaqë kanë lidhje me regjimin dhe jo ngaqë janë të talentuar, jo ngaqë kanë krijuar bizneset e veta…këta njerëz duhet ta kuptojnë se nuk mund t’i shpenzojnë paratë e tyre – para të vjedhura, në se më pyesni mua, në Amerikë, apo në Europë.”- tha Marina Litvinenko.

Tregjet e pasurisë së patundshme në Londër, Nju Jork dhe Miami, janë që të gjitha, edhe pse në nivele të ndryshme shqyrtimi, të njohura për transaksione në shuma të pazakonta parash, që hyjnë në mënyrë anonime përmes kompanive-fantazmë, që realizojnë pastrim parash; ato shpesh zbulohen se i përkasin investitorëve të pasur nga Rusia, ose nga ish republikat sovjetike.

Rusia ka mohuar me forcë të ketë patur rol në sulmet në tokën britanike, një mohim që ka patur edhe familjarë të të dy viktimave që ta kenë mbështetur.

Për shembull, në vitin 2012, Walter Litvinenko, babai i spiunit të helmuar rus, u shfaq në televizionin rus RT, në krah të Andrei Lugovoit, personi që Britania e akuzoi se i kishte helmuar të birin, për të mohuar idenë e shprehur më parë, se djalin ia kishte vrarë zbulimi rus, me urdhër të drejtpërdrejtë të Vladimir Putinit.

“Unë mendoj se Walterin e përdorën,” i tha Marina Zërit të Amerikës. “Ai sapo kishte humbur të shoqen. Ndodhej në një situatë financiare të vështirë, në mërgim, në Itali. Unë mendoj se zyrtarët rusë të zbulimit i kishin thënë se Aleksandri kishte bashkëpunuar me agjentët britanikë, duke i dhënë atij kështu një justifikim për t’u kthyer në Rusi dhe t’i lutej presidentit që ta falte.”

Gjatë të njëjtit emision televiziv, që u transmetua edhe nga televizioni shtetëror rus “Channel One”, babai i Litvinenkos, i cili kishte qenë mjek në një nga gulagët e periudhës sovjetike dhe tani banonte në një pallat për të moshuarit në Moskë, i cilësoi të arratisurit rusë në Britani, “pengje” të agjencive perëndimore të spiunazhit.

Lugovoi, të cilin Rusia ka refuzuar për një kohë të gjatë që ta ekstradojë, fajësoi për vrasjen e Litvinenkos në vitin 2006 Alexander Goldfarin, mik i afërt i Litvinenkos, për të cilin ai tha se ishte oficer kundërzbulimi i CIA-s i ngarkuar me detyrën për të punuar me operativët rusë.

Rreth një vit para intervistës në televizionin RT, Lugovoi u bë anëtar I parlamentit rus, Dumës, duke përfaqësuar Partinë Liberal-Demokrate, aleate e Kremlinit, duke siguruar kështu imunitet për jetë nga ndjekja ligjore në vendin e tij.

Goldfar kohët e fundit ngriti padi për shpifje në një gjykatë federale në Shtetet e Bashkuara, ku akuzonte të dyja rrjetet ruse, RT dhe Channel One, se kishin transmetuar qëllimisht raporte çorjentuese lidhur me rrethanat e vdekjes së Litvinenkos. Në aktakuzë thuhet se mbulimi nga televizioni RT i rastit të Skripalit, që vazhdimisht prek vrasjen e Litvinenkos, është pjesë e një fushate të motivuar politikisht nga Kremlini, për të shmangur përgjegjësinë e autorëve të vërtetë të të dy sulmeve.

Padi për shpifje

Përfaqësues të televizionit RT bënë një deklaratë publike, ku thuhej se janë në procesin e rishikimit të ankesës.

Në fillim të vitit, Viktoria Skripal, mbesa e spiunit të helmuar në Salisbury, foli disa herë në radiot ruse, duke shprehur skepticizëm lidhur me mënyrën se si Britania e trajtoi hetimin e xhaxhait të saj, duke lënë të kuptohet se agjencia britanike e zbulimit, MI5, e kishte manipuluar kushërirën e saj, Yulia-n, e cila kishte refuzuar ofertën për ndihmë nga ambasada ruse në Londër, pasi ishte helmuar së bashku me të atin.

Më 3 korrik, mbesa e Skripalit, u shfaq në televizionin rus, për të njoftuar se kandidatura e saj për zgjedhjet e Dumës në rajonin Yaroslavl, ishte mbështettur nga partia pro-Kremlinit “Just Russia”.

“Këto veprime vazhdojnë të bëjnë agjencitë ruse të zbulimit”, – i tha Zërit të Amerikës zonja Litvinenko. Ajo shpjegoi se në komunitetin rus të spiunazhit, ka qenë një metodë e zakonshme kundërvënia e anëtarëve të së njëjtës familje ndaj njeri tjetrit.

“Ata gjejnë një person që mund të ndikohet me lehtësi, që i kupton përfitimet e pozicionit të vet.” – tha ajo. “Si Viktoria, edhe Walter Alexandrovich, ndodheshin në situatë të vështirë, kështuqë atyre ju dha mundësia për ta përmirësuar atë. Tani të dy ata kanë rroga dhe

Walter Alexandrovich ka edhe një apartament në Moskë. Ndërsa Victoria Skripal do të kandidojë për Dumën e Yaroslavlit.” Marina Litvinenko shtoi me një ton sarkastik. “Ky është një fillim i shkëlqyer për karrierën e saj.”/Zëri i Amerikës

trumpi.jpg
G. P.22:57 | 25/05/2018

Stafi i Donald Trump ka patur kontakte me rusët dhe gjatë takimeve mes tyre është diskutuar mbi marrëdhëniet mes Uashingtonit dhe Moskës. Pohimi është bërë nga një konsulent amerikan, që ka deklaruar se ka qenë i pranishëm në takimin e zhvilluar në Trump Tower.

Një oligark rus i lidhur me Kremlinin u takua me avokatin e Donald Trump, Michael Cohen në kullën e presidentit në Nju Jork, dy javë përpara se ai të merrte detyrën. Lajmin e bëjnë të ditur mediat amerikane, të cilat citojnë një burim në dijeni të takimit.

Gjatë bisedimeve të zhvilluara në zyrën e Cohen, në katin e 26-të të Kullës Trump, avokati dhe biznesmeni Viktor Vekselberg folën për të përmirësuar marrëdhëniet mes Moskës dhe Uashingtonit dhe ranë dakord që të takoheshin sërish ditën e përurimit të kreut të shtetit.

“New York Times” citon Andreë Intrejtër, një shtetas amerikan që mori pjesë në takim dhe menaxhon financat për hesap të Vekselberg. Gazeta prestigjoze raporton se disa ditë pas përurimit të presidencës Trump, në Janar 2017, kompania e INTREJTËR, “Columbus Nova” i dha zotit Cohen një kontratë konsulence 1 milion dollarëshe, që tani po hetohet nga autoritetet federale amerikane.

Prokurori i posaçëm Robert Mueller vazhdon hetimet mbi kontaktet e dyshuara të stafit të Trump dhe Rusisë, përpara dhe pas zgjedhjeve të vitit 2016. Ndërkohë, prokurorët e rajonit të Manhatanit po kryejnë një hetim më vete mbi gjendjen financiare dhe kontratat e Cohen./abcnews.al

skripal.jpg
G. P.22:21 | 24/05/2018

Yulia Skripal, vajza e ish-spiunit rus që bashkë me të atin u helmuan me armë kimike, ka deklaruar në intervistën e parë pas rekuperimit shëndetësor se dëshiron të kthehet në Rusi. Por në një reagim zyrtar, Kremlini ka bërë te ditur se nuk i beson fjalëve të saj.

Yulia Skripal, vajza e ish-spiunit rus që i mbijetoi sulmit me armë kimike, ka deklaruar se dëshiron të kthehet në vendlindje pavarësisht akuzave se mbrapa tentativës për vrasje qëndron Rusia.

Në një intervistë për agjencinë e lajmeve “Reuters”, e para pas rekuperimit shëndetësor, Yulia ka deklaruar se ka përjetuar një eksperiencë shumë të vështirë.

“Fakti që ndaj meje u përdor një agjent kimik është tronditës. Jeta ime është kthyer përmbys”, ka thënë zonjusha Skripal.

33-vjeçarja dhe i ati Sergei Skripal, ish-kolonel i shërbimit sekret ushtarak që u dorëzoi britanikëve agjentët rusë në Angli, u gjetën pa ndjenja në një stol në parkun e qytetit Salisburi më 4 Mars. Ajo qëndroi në koma për 20 ditë.

“U zgjova me lajmin se të dy ne ishim helmuar. Jemi me fat që i kemi mbijetuar këtij sulmi. Rekuperimi ynë ka qenë i ngadaltë dhe i dhimbshëm”, ka treguar Yulia.

Vajza e ish-spiunit i është përgjigjur pyetjeve të “Reuters” me shkrim dhe ia ka dorëzuar letrën agjencisë përmes policisë britanike. Aktualisht ajo ndodhet në një lokalitet sekret në Londër, nën mbrojtjen e shtetit anglez.

Duke reaguar ndaj intervistës së saj, Kremlini e ka cilësuar të dyshimtë dëshirën e 33-vjeçares për t’u kthyer në vendlindje. Autoritetet në Moskë, që mohojnë përfshirjen në helmimmin me agjent kimik, ngrenë dyshime nëse vajza e spiunit ka folur me dëshirën e saj.

“Nuk kemi asnjë bazë për ta marrë të mirëqënë këtë deklaratë dhe për t’i besuar”, ka deklaruar zëdhënësi Dmitry Peskov./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono