Kotzias

kotzias.jpg
ent ela13:30 | 29/01/2019

Faktori shqiptar ka luajtur një rol shumë të rëndësishëm në përfundimin e marrëveshjes së Prespës. Ka qenë kjo deklarata e ish ministrit të jashtëm grek Kotzias në një intervistë për mediat greke

Ish ministri i jashtëm grek, Nikos Kotzias, ka veçuar rolin përcaktues të faktorit shqiptar në finalizimin e Marrëveshjes së Prepës.

Në një intervistë të gjatë në televizionin publik ERT, Kotzias ka zbardhur disa prej “prapaskenave” të negociatave për zgjidhjen e kontestit për emrin kushtetues të maqedonisë.

Ai tha se përpjekjet e qeverisë Tsipras filluan në verën e 2015-2, kur në pushtet ishte Nikolas Gruevski. Kotzias shënoi se këto përpjekje nuk dhanë rezultat.

Në të njëjtën kohë, Kotzias nisi bisedimet edhe me kreun e opozitës së atëhershme, Zoran Zaev, si dhe me Ali Ahmetin, të cilin gjatë intervistës e cilësoi si “liderin natyral të shqiptarëve në Maqedoninë e Veriut”.

Kotzias tregoi se atëherë i kishte telefonuar sekretarja amerikane e shtetit, Hillary Clinton.

“Më tha ‘nuk bën mirë që takohesh me opozitën dhe me shqiptarët, pse Gruevski ndihet se ndodhet nën presion’. I thashë të mos më telefonojë më dhe të mos përzihet në negociatat që po bën Greqia me FYROM për zgjidhjen e një problemi të rëndësishëm midis tyre. Dhe nuk telefonoi më”, tha ish ministri i jashtëm grek.

Duke iu referua kontakteve me palën shqiptare, Kotzias vuri në dukje se “Faktori shqiptar donte zgjidhje. Dhe përbënte një element që ndihmonte avancimin e zgjidhjes, madje edhe kundër dëshirës së Gruevskit”.

“Ahmeti dhe Osmani, nënkryetari i qeverisë, ishin aleatët tanë në negociatat. Ky bashkëpunim me shqiptarët dha fryte deri edhe në fazën përfundimtare të negociatave”, shtoi Kotzias.

Kotzias shtoi se roli i faktorit shqiptar ishte vendimtar gjatë procesit të ndryshimeve kushtetuese, në përcaktimin e çështjeve të gjuhës dhe shtetësisë.

Ish ministri i jashtëm grek nuk pranoi të përgjigjej nëse fonde sekrete të shtetit grek janë disbursuar për media në Shkup.

“Kjo është një çështje me të cilën po merret drejtësia dhe unë nuk dua të bëj asnjë koment”, tha Nikos Kotzias./abcnews.al

KOTZIAS-SHQIPERIA.mpg_snapshot_00.02-1280x720.jpg
ent ela12:58 | 06/01/2019

Ish-ministri i jashtëm grek, Nikos Kotzias, ka shprehur konsiderata të larta për ministrin e jashtëm shqiptar në largim Ditmir Bushati duke identifikuar çështjet me të cilat Shqipëria përballet në arenën ndërkombëtare, si arsye e shkarkimit të tij nga posti i ministrit.

 Në një intervistë për portalin News 24/7, ish ministri i jashtëm Nikos Kotzias arsyen e largimit të Bushatit nga qeveria nuk e lidh me vitet e mbajtjes së postit të ministrit, por me çështjet me të cilat përballet momentalisht diplomacia Shqiptare.

“Më racionali, më luftëtari për pikëpamjet e tij, i ri në moshë, por një njeri shumë i pjekur, ministri i jashtëm më serioz që kishte Shqipëria për të negociuar, zoti Bushati, u largua nga detyra. Për mendimin tim u largua jo sepse kishte shumë vjet ministër siç thuhet në Shqipëri. Por sepse kishte një pikëpamje të ndryshme për çështjen e Kosovës, domethënë nuk pajtohej me ndryshimin e kufijve.

 Problemi i dytë për të cilin ministri Bushati u propozua të largohet nga karrigja e ministrit, për Kotzias është pikërisht marrëveshja për detin.

Dhe duhet t’ju them se ajo paketë kishte përfunduar. Por kishim dy probleme. Njeri nga pala shqiptare pasi nuk ekzistonte gjykata kushtetuese që të çertifikonte ndryshimet që do të bënim në një sërë çështjesh.

Dhe e dyta, ka edhe në Greqi sa i përket Shqipërisë një segment fondamentalist për të cilin nuk ka vendosur ende që të flas, por e kam informuar me detaje kryeministrin para se të largohem.

Është ky segment, thekson Kotzias, ai i cili nuk pranon kufijtë ekzistues si dhe nuk është i gatshëm të pranojë me mjete juridike fundin e luftës mes Greqisë dhe Shqipërisë. Në të njëjtën kohë ish ministri i jashtëm e ka konsideruar si hipokrit qëndrimin e “Demokracisë së Re” pas deklaratës së liderit të konservatorëve se nuk do të lejojë që Shqipëria të antarësohet në BE.

T’i kujtoj Demokracisë së re se e bënë Shqipërinë anëtare të NATO-s pa asnjë kusht. Nuk mundet që Mitsotakis të flasë sikur nuk qeverisën kurrë. Kjo është hipokrizi”.

Deklarata e ish-ministrit të jashtëm grek Kotzias vjen pas ndryshimeve në kabinetin qeveritar të njoftuara nga kryeministri Rama, mes të cilave edhe shkarkimi i minsitrit Ditmir Bushati dhe emërimi i zëvendësit të tij Genti Caka në postin e shefit të Ministrisë për Europën dhe punët e jashtme, ndryshime të cilat ende presin dekretin presidencial për t’u konfirmuar. /abcnews.al

Gazetar i ABC News Greqi: Robert Goro

 

 

 

TSIPRAS-1280x720.jpg
ent ela10:10 | 20/10/2018

Kryeministri grek Aleksis Tsipras ka përjashtuar mundësinë e mbajtjes së zgjedhjeve të parakohshme pas dorëheqjes së ministrit të Jashtëm, Nikos Kocias. Nga Brukseli, Tsipras ka deklaruar se qeveria e tij gëzon ende mbështetje absolute për të ruajtur mazhorancën në Parlament. Ai ka konfirmuar se do të marrë vetë nën kontroll drejtimin e Ministrisë së Jashtme dhe se do të punojë për ta çuar deri në fund marrëveshjen me Maqedoninë. Administrata e Tsipras kontrollon 153 nga 300 vende të Parlamentit grek, përfshirë këtu partinë e vogël të së djathtës të udhëhequr nga ministri i Mbrojtjes Panos Kamenos, i cili thuhet se u bë shkas për largimin e Kocias. Kamenos e sheh marrëveshjen e emrit me Shkupin si një shitje të interesit kombëtar. Ndërkaq, Syriza po përpiqet të fitojë terren kur po afrojnë zgjedhjet politike të vitit të ardhshëm. /abcnews.al

nikos-kotzias12.jpg
ent ela15:00 | 02/10/2018

Ministri i Jashtëm i Greqisë, duke komentuar rezultatin e referendumit për emrin e Maqedonisë thotë se votimi nuk është kusht, dhe as kërkesë juridike për implementimin e Marrëveshjes së Prespës. Nikos Kotzias theksoi se presidenti Ivanov dhe kryeministri Zaev janë zgjedhur me numër më të vogël të votave se ato që fitoi opsioni “PRO” në referendum. Shefi i diplomacisë së jashtëme në një intervistë për televizionin shtetëror grek ERT shpjegoi se nuk janë pastruar listat zgjedhore, ndaj dhe rezulton pjesëmarrje e ulët. Sipas tij, deri në 1.2 milionë banorë kanë realisht të drejtë vote dhe jo 1.8 milionë. /abcnews.al

nikos-kotzias12.jpg
ent ela18:04 | 20/09/2018

Ministri i Jashtëm grek Nikos Kotzias ka bërë përgjegjëse Shqipërinë për bllokimin e negociatave për kufijtë detarë. Në një konferencë për shtyp me homologun gjerman, Kotzias ka deklaruar se shkak për këtë ngërç janë bërë përplasjet politike të presidentit me qeverinë dhe Gjykata Kushtetuese.

Marrëveshja për kufijtë detarë mes Shqipërisë dhe Greqisë është bllokuar për shkak të politikave të Tiranës zyrtare. Kështu ka deklaruar ministri i Jashtëm grek Nikos Kotzias, i cili ka pritur të enjten në Athinë homologun gjerman Hajko Mas.

“Negociatat janë të bllokuara, por jo për fajin tonë, jo për faj të Ministrisë sonë të Jashtme, por për shkak të problemeve administrative dhe mosmarrëveshjeve që presidenti i këtij vendi ka me qeverinë”, ka deklaruar Kotzias.

Në konferencën e përbashkët për shtyp, shefi i diplomacisë greke e ka vënë theksin edhe tek situata në të cilën ndodhet Gjykata Kushtetuese e Shqipërisë, që siç ka thënë ai, për momentin është jashtë funksionit. Ndër të tjera, Kotzias ka ritheksuar mbështetjen për marrëveshjen e emrit me Maqedoninë, e njohur ndryshe si marrëveshja e Prespës.

“Historia duhet të shërbejë si shkollë dhe jo si burg. Marrëveshja na nxorri nga burgu, disa duan të rikthehen, por ne nuk do t’i ndjekim”, ka vijuar Kotzias.

Në të njëjtën linjë, ministri gjerman ka vlerësuar kontributin e Athinës në arritjen e marrëveshjes, duke e cilësuar qasjen e saj si “shenjë të një politike të përgjegjshme” që i kontribuon edhe sigurisë në rajon e Europë.

“Është një mundësi historike dhe më duhet të them se pa angazhimin dhe durimin e të dyja palëve nuk do të ishim këtu. Kjo marrëveshje mund të mos i kënaqë të gjithë, por është shenjë e politikës së përgjegjshme”, ka thënë Mas. Ai ka shprehur shpresën e tij që pakti i arritur të miratohet edhe në referendumin që do të mbahet në Maqedoni, pasi ndihmon në pajtimin mes popujve. /abcnews.al

nd708_115.jpg
ent ela23:44 | 13/07/2018

Partia kryesore opozitare në Greqi, Demokracia e Re, i kërkon sërish qeverisë së Kryeministrit Tsipras që të bëjë publike marrëveshjen që po diskutohet me Shqipërinë.

Në një deklaratë për mediat, “Demokracia e Re” e quan “diplomaci sekrete” atë të Kryeministrit Tsipras dhe të ministrit të Jashtëm Kotzias për bisedimet që po bëhen me Tiranën zyrtare.

Në këtë aspekt, opozita greke ka kërkuar nga qeveria që në Parlament të informojnë për marrëveshjen mes dy vendeve.

“Diplomacia sekrete e Tsipras dhe Kotzias ka rezultuar në dëm kombëtar me marrëveshjen e Shkupit. Tani, njerëzit mësojnë të habitur për një marrëveshje të ngjashme që po diskutohet me Shqipërinë. Ne i kërkojmë Kryeministrit dhe ministrit të Jashtëm të informojnë menjëherë Parlamentin për çfarë negociojnë në fshehtësi me Tiranën”, thuhet në njoftimin e “Demokracisë së Re”.

Gjatë dy ditëve të fundit është ngritur nga mediat greke tymnaja e ndryshimit të kufijve mes dy vendeve për shkak të keqinterpretimit të deklaratës së eurokomisionerit Hahn. /tvklan.al

BUSHATI-KOTZIAS-1280x720.jpg
ent ela22:06 | 11/07/2018

Ministri për Evropën dhe Punët e Jashtme Ditmir Bushati është takuar me homologun grek, Nikos Kotzias gjatë samitit të NATO-s në Bruksel. Të dy ministrat biseduan për ecurinë e dialogut mes Shqipërisë dhe Greqisë deri tani si dhe vijimin e diskutimeve për arritjen e një marrëveshje mes dy vendeve.Ministri Bushati ka publikuar më rrjetet sociale edhe një foto nga takimit Takimi Bushati-Kotzias vjen një ditë pas atij mes dy kryeministrave, Edi Rama dhe Aleksis Tsipras. Biseda mes Bushatit dhe Kotzias vijoi në vazhdën e këtij takimi ku u fol rreth negociatave mbi një numër të madh çështjesh dhe vlerësimi i arritjeve të deritanishme. /abcnews.al

BUSHATI-KOTZIAS-1280x720.jpg
ent ela11:28 | 21/06/2018

Sot Ministri për Evropën dhe punët e jashtme Ditmir Bushati do të takohet në Rodos të Greqisë me homologun grek Nikos Kotzias.  Të dy ministrat do të ulen për të gjetur zgjidhjet për delimitimin e zonave detare, ndërkohë që paralelisht do të zhvillohet dhe raundi i tretë mes ekipeve të negociatorëve të të dy vendeve. Bushati e Kocias do të jenë në Rodos ku marrin pjesë në konferencën e sigurisë në kuadër të së cilës do të zhvillojnë edhe takimin  që vetë ministri Ditmir Bushati e bëri publik tre ditë më parë. Bisedimet zyrtare mes palëve nisën në fund të muajit prill, pas një procesi të gjatë mes Presidencës së Republikës dhe Ministrisë së Jashtme, për marrjen e autorizimit nga kreu i Shtetit. /abcnews.al

kotzias.jpg
ad min14:29 | 12/06/2018

Ministri i Jashtëm grek, Nikos Kotzias, u shpreh se Greqia mbështet plotësisht hapjen e negociatave të Shqipërisë me Bashkimin Europian.

Në një intervistë për televizionin grek Kontra, ai shtoi se në samitin e Qershorit, Athina do të të japë miratimin për rrugën europiane të Shqipërisë.

Ai theksoi se mes dy vendeve janë zgjidhur tashmë të gjitha problemet, Shqipëria do ndihmuar në rrugën e saj europiane.

”E para sepse jemi miq dhe nuk duam t’ua vështirësojmë gjërat dhe e dyta sepse ne duhet të formojmë një rrugë të përbashkët në mënyrë që vendet e Ballkanit të jenë në Bashkimin Europian”, përfundoi Kotzias./abcnews.al

kotzias-dimitrov.jpg
ent ela12:07 | 05/06/2018

Ministri i Jashtëm i Greqisë, Nikos Kotzias, thotë se ka ardhur koha që Shkupi të marrë një vendim përfundimtar sa i përket çështjes së emrit. Ndërsa kryeministri maqedonas thotë se zgjidhja do të vijë shumë shpejt.

Kryediplomati grek, Nikos Kotzias, mendon se është koha për të marrë një vendim përfundimtar, për çështjen e emrit të Maqedonisë. Ai ka thënë se me ministrin e Jashtëm, Nikolla Dimitrov, kanë pasur takime në Nju Jork dhe Bruksel, ndërsa tashmë ka ardhur koha për të thënë “po” ose “jo”. Kotzias mendon se qeveria në Shkup po përballet me disa presione dhe probleme.

“Në Shkup nuk po pranohet emri Maqedonia e Vardarit, pasi mendohet, se bëhet fjalë për erën e fashizmit dhe okupimit”, është shprehur ministri i Jashtëm në intervistën për televizionit shtetëror grek ERT.

Ai nuk ka pranuar të konfirmojë, nëse për palën greke është i pranueshëm propozimi: Maqedonia Veriore. Kurse nga ana tjetër, kryeministri maqedonas Zoran Zaev është pyetur nëse është çështje ditësh zgjidhja e problemit të emrit. Ai nuk ka dashur të japë përgjigje për këtë, por ka deklaruar se kjo është çështje e ndjeshme prandaj pret mirëkuptim nga qytetarët.

“Nuk dua të komentoj shumë, por besoj se për disa ditë do të kemi zgjidhje të suksesshme të këtij procesi”, u shpreh shefi i qeverisë.

Ndërkohë, Zaev nuk ka treguar kohën e saktë se kur do të realizohet telefonata e shumëpritur me kryeministrin grek Aleksis Tsipras. Në atë bisedë do të vendoset për emrin e ri zyrtar të Maqedonisë. Aktualisht përflitet për propozimin “Maqedonia e Veriut”.

Ndërsa më herët, Athina refuzoi emrin “Republika e Maqedonisë së Ilindenit”. Mediat e Shkupit raportojnë se për këtë çështje ka ndërhyrë edhe administrata e Shteteve të Bashkuara. Uashingtoni bën thirrje që brenda 9 Qershorit, Zaev të japë një përgjigje.  /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono