kosove

vendet-e-kuintit-1280x713.jpg
nev ila16:00 | 13/08/2019

Vendet e Kuintit, ku bëjnë pjesë Shtetet e Bashkuara, Britania, Franca, Gjermania dhe Italia i kanë bërë thirrje Kosovës dhe Serbisë që të rinisin procesin e dialogut.

Përmes një deklarate të përbashkët, vendet në fjalë kanë kërkuar nga Prishtina që të heqë taksën për produktet serbe dhe nga Beogradi që të ndalojë lobimin kundër pavarësisë së Kosovës.

Ambasadat e vendeve anëtare të QUINT-it i kanë bërë thirrje Kosovës dhe Serbisë të rinisin bisedimet. Ato kanë kërkuar nga të dy palët të shmangin veprime që do të pengonin një marrëveshje përfundimtare.

Aty shtohet se vendet janë gatshme të forcojnë rolin e tyre në këtë proces në përkrahje të Përfaqësuesit të Lartë të BE-së, por kjo mund të bëhet vetëm kur jepen shenja të gatishmërisë për kompromis.

“Për Kosovën, kjo nënkupton heqjen e taksave të vendosura ndaj Serbisë. Për Serbinë, kjo nënkupton ndërprerjen e fushatës për heqjen e njohjeve kundër Kosovës”, thuhet në deklaratën e përbashkët.

Kryeministri ne dorëheqje Ramush Haradinaj nëpërmjet një statusi në Facebook ka thënë se nënshtrimi për interesa personale dhe grupore, kompromiset dhe politikat e paqëndrueshme, që bien ndesh me interesat nacionale dhe shtetërore, sjellin pasoja tragjike për vendin dhe të ardhmen.

Pa praninë e mediave janë takuar sot në një nga restoranet e Prishtinës, kryetari i LDK-së Isa Mustafa dhe ai i Vetëvendosjes Albin Kurti. Në një status në Facebook, kreu i VV-së Albin Kurti ka shkruar se në takim është biseduar për seancën e 22 gushtit.

“Me 22 gusht dy grupet tona parlamentare do të jenë në përbërje të plotë për ta shpërndarë Kuvendin e për t’i hapur rrugë zgjedhjeve të reja demokratike. Konstatuam që tashmë shpresa po rikthehet te qytetarët” ka shkruar Kurti në Facebook. Edhe Partia Demokratike e Kosovës këmbëgul se mbajtja e zgjedhjeve të parakohshme është e pashmangshme.

Jemi në fazën e përgatitjeve, zgjedhjet janë të pashmangshme. Më 22 gusht do t’i hapet rrugë mbajtjes së zgjedhjeve”, tha Veseli.

Për datën 22 gusht është caktuar seancë për shpërbërjen e parlamentit pas dorëheqjes së Ramush Haradinajt nga posti i kryeministrit./ABC News Albania 24/7

filigrani-1280x721.jpg
nev ila19:30 | 12/08/2019

Prizreni, përveç se historik është edhe një qytet ku arti i filigranit me fije ari dhe argjendi mbijeton ende. Atje, një grup i vogël artizanësh punon me përkushtim për të mbajtur gjallë traditën.

Prizreni është një prej qyteteve më të vjetra, ndërsa quhet edhe “qytet muze” i Kosovës.

Prej shekujsh qyteti i Prizrenit njihet për traditën e stolive të filigranit të punuara prej ari dhe argjendi.

Një grup i vogël artizanësh po përpiqen të mbajnë gjallë një traditë shekullore të bizhuterive të filigranit.

Periudha me shitjet më të mëdha është pragu i verës kur sezoni i dasmave arrin kulmin.

Për këtë zanat duhet durim dhe përkushtim i madh.

Lushaj dhe të gjithë filigranistët e Prizrenit dikur janë shkolluar për këtë zanat, ndërsa tash po mundohen të mbajnë kurse për të rinjtë për të mos u shuar kjo traditë.

Nuk mungon interesimi i të huajve që vizitojnë këtë qytet./ABC News Albania 24/7

ushtria-1280x709.jpg
Sej rie16:30 | 09/08/2019

Në Kosovë janë certifikuar të premten rekrutët e rinj të ushtrisë. I pranishëm në këtë ceremoni, kryetari i Kuvendit Kadri Veseli ka deklaruar se ushtria kosovare nuk kërcënon askënd, por as do të lejojë askënd që ta cenojë. Ndërkohë, ai ka përsëritur se kufijtë e Kosovës mbeten të paprekshëm.

Kryetari i Kuvendit të Kosovës, Kadri Veseli, ka zgjedhur ceremoninë e certifikimit të rekrutëve të rinj të Ushtrisë së Kosovës, për t’iu kundërpërgjigjur Serbisë.

Ditë më parë shefi të Shtabit të Ushtrisë serbe, Millan Mojsilloviç, ka thënë se Serbia ka përkrahjen e ushtrisë ruse se si të veprojnë në situatën e Kosovës.

Por Veseli ka thënë se Kosova, nuk e kërcënon askënd por as nuk do të lejojë askënd të cenojë atë. Sipas tij, Ushtria e Kosovës është element i domosdoshëm i stabilitetit dhe paqes në rajon.

Kadri Veseli, kryetar i Kuvendit të Kosovës: “Ushtria e Kosovës është element kyc i stabilitetit dhe paqes në rajon. Ne nuk kërcënojmë askënd, por as nuk do të lejojmë askënd të cenojë lirinë dhe shtetin tonë”.

Ndërsa tha se kufijtë e shtetit të Kosovës janë  të paprekshëm.

Kadri Veseli, kryetar i Kuvendit të Kosovës: “Integriteti territorial dhe kufijtë e shtetit tonë janë të shenjtë dhe të paprekshëm”.

Kryeministri në dorëheqje Ramush Haradinaj nëpërmjet një statusi në Facebook ka shkruar se transformimi i FSK-së ushtri po merr krah.

Ndryshe, 337 pjesëtarë, 22 prej komuniteteve pakicë e kanë përfunduar me sukses trajnimin bazik 9 javor, dhe i janë bashkuar Forcës së Sigurisë së Kosovës. Kjo është gjenerata e parë e rekrutëve që i bashkohen FSK-së pas mandatimit me misionin e ri./ABC News Albania 24/7

kosove-2-1280x707.jpg
Sej rie17:45 | 08/08/2019

Partitë politike në Kosovë vazhdojnë të dorëzojnë firmat e deputetëve të tyre për shkrirjen e parlamentit, me qëllim mbajtjen e zgjedhjeve të parakohshme. Ndërkohë, Komisioni Qendror i Zgjedhjeve ka deklaruar se është gati në çdo moment për zhvillimin e procesit elektoral.

Partitë politike janë duke dorëzuar nënshkrimet për seancën e thirrur për shpërbërjen e parlamentit. Partia Socialdemokrate sot dorëzoi nënshkrimet e 12 deputetëve të saj për seancën e 22 Gushtit.

Shefi i Grupit Parlamentar të PSD-së, Dardan Sejdiu, deklaroi se zgjedhjet janë rruga përpara dhe në zgjedhje zgjidhja që duhet ofruar është programore. Ndërsa para dy ditësh edhe Lëvizja Vetëvendosje ka dorëzuar nënshkrimet e 19 deputetëve të saj.

Ndërsa Këshilli Drejtues i LDK-së ka diskutuar për përgatitjet për zgjedhje të jashtëzakonshme.

Derisa kryetarja e Komisionit Qendror të Zgjedhjeve ka thënë se janë të përgatitur dhe të gatshëm për zgjedhje të jashtëzakonshme kurdo që vendoset të mbahen ato.

Valdete Daka, kryetare e KQZ-së: “Ne jemi të gatshëm që kurdoqoftë ato të shpallen, t’i organizojmë”.

Në mbledhjen e sotme KQZ-ja ka marrë vendim në mbledhjen e radhës që të miratojë kërkesën e tri partive politike për regjistrim./ABC News Albania 24/7

KOSOVE-PARLAMENTI-1280x720.jpg
Sej rie13:15 | 05/08/2019

Parlamenti i Kosovës do të shpërndahet më 22 Gusht. Vendimi është marrë në një mbledhje të Kryesisë së Kuvendit, të mbajtur ditën e hënë, ku të pranishëm kanë qenë krerët e të gjitha grupeve parlamentare. Kryeministri në ikje Ramush Haradinaj e ka cilësuar caktimin e datës një vendim të marrë konform ligjeve.

Më 22 gusht do të mbahet séance e Kuvendit të Kosovës për shpërbërjen e saj dhe vendi përfundimisht do të shkojë në zgjedhje të parakohshme.

Kadri Veseli, kryetar i Parlamentit të Kosovës: “E vetmja zgjidhje kur ka dilemma apo situata çfarëdo qofshin ato janë qytetarët e Kosovës janë zgjedhjet”.

Por para këtij vendimi që partitë politike janë pajtuar që të votojnë marrëveshjen ndërkombëtare IPA.

Avdullah Hoti, shef i grupit parlamentar të LDK-së:  “Gjithashtu u dakorduam që para kësaj të votohet marrëveshja ndërkombëtare IPA që i sjell Kosovës 100 milion euro”.

Ndërsa zvarritja e seancës për datën 22 Gusht është arsyetuar me kërkesën që e ka bërë BE-ja për më shumë kohë për përgatitjen e misionit vëzhgues.

Sinkron Bilall Sherifi, Nisma për Kosovën: “Kemi nevojë që këto zgjedhje të vëzhgohen nga misioni ndërkombëtar prandaj vendosëm për këtë datë të shpërndarjes”.

Vendimin e kryesisë e ka përshëndetur edhe kryeministri në dorëheqje Ramush Haradinaj. Kosova shkon në zgjedhje të parakohshme pas dorëheqjes së Ramush Haradinajt nga posti i Kryeministrit, ndërsa presidenti pas datës 22 gusht ka afat që të caktojë datën e zgjedhjeve prej 30-45 ditësh./ABC News Albania 24/7

aksidente-1280x697.jpg
Sej rie15:15 | 03/08/2019

Që nga fillimi i vitit në Kosovë është regjistruar një rënie e ndjeshme e aksidenteve rrugore. Krahasuar me të njëjtën periudhë të vitit të kaluar rezultojnë rreth 50 viktima më pak. Autoritetet deklarojnë se aktivitetet sensibilizuese po japin rezultatet e tyre.

Për shtatë muaj në Kosovë kanë vdekur 54 persona në aksidente trafiku. Krahasuar me të njëjtën periudhë kohore të vitit të kaluar ka rënie të numrit të aksidenteve derisa edhe numri i të vdekurve është 13 më pak.

Jeton Rexhepi, drejtor i Divizionit të Komunikacionit Rrugor“Të gjitha llojet e aksidenteve kanë shënuar rënie. Sa i përket aksidenteve me lëndime kemi 350 raste më pak apo 900 persona të lënduar më pak. Kemi 107 raste më pak të aksidenteve me dëme dhe rreth 450 raste në përgjegjësi më pak sa i përket numrit të aksidenteve”.

Sipas policisë, faktor kontribues te aksidentet e trafikut në shumicën e rasteve është shpejtësia, derisa mospërdorimi i rripit të sigurisë ndikon që aksidentet të përfundojnë me fatalitet.

 

Ismajl Fejzullahu, shef i Njësisë për Kontroll të Autostradave: “Edhe pse shpejtësia këtu lejohet deri 130 km në orë, këtu shpesh herë ngasësit dinë të dyfishojnë shpejtësinë, gjë që është me shumë rrezik”.

“Sipas statistikave të policisë së Kosovës krahasuar me vitin e kaluar në shtatë muajt e parë të këtij viti policia e Kosovës ka shqiptuar rreth 12 mijë gjoba më shumë në trafik. Për të ulur numrin e aksidenteve policia e Kosovës pos detyrave të përditshme ka realizuar shumë aktivitete të tjera për sensibilizimin e qytetarëve për respektimin e rregullave të trafikut rrugor”./ABC News Albania 24/7

isa-mustafa.jpg
Sej rie13:00 | 03/08/2019

Isa Mustafa është rizgjedhur kryetar i Lidhjes Demokratike të Kosovës në një garë pa rivalë. Procesi i votimit është kritikuar ashpër nga anëtarët e partisë, Fatmir Sejdiu dhe Melihate Tërmkolli, ndërkohë që vetë Mustafa ka deklaruar se prioriteti i tij janë zgjedhjet e jashtëzakonshme, ku partitë duhet të garojnë të vetme.

Isa Mustafa është rizgjedhur në krye të LDK-së për herë të tretë radhazi në Kuvendin e nëntë zgjedhor të kësaj partie. Me të rimarrë pozitën, Mustafa tha se procesi zgjedhor ishte demokratik, edhe pse në të nuk kishte asnjë kandidat rival. Ai u bëri thirrje të gjitha partive politike që në zgjedhjet e jashtëzakonshme të garojnë të vetme, ndërsa ftoi për unitet partinë që udhëheq.

Sinkron Isa Mustafa, kryetar i LDK-së: “Hyjmë në zgjedhje, të garojmë. U kam bërë ftesë partive politike që të hyjmë një nga një që të matemi përpara opinionit. Pastaj është faza e dytë që mund të na bashkojë përmes programit ekonomik, të shëndetësisë dhe ai i integrimit euro-atlantik”.

Më të pakënaqurit për rizgjedhjen e Mustafës ishin Fatmir Sejdiu e Melihate Tërmkolli.

FatmirSejdiu, LDK:  “Në një mënyrë kaq të egër, djallëzore dhe perfide organizohet një kuvend nga i cili pritej të reflektonte për kohën kur jemi përpara sfidave të mëdha, që cënojnë integritetin e vendit, është një luks i madh. Me këtë bëhet një sulm i madh në shpresën e një subjekti politik që synon të fitojë elektoratin”.

Ndërsa Melihate Tërmkolli e ka quajtur Mustafën njeri të Rrahman Morinës.

Melihate Tërmkolli, LDK: “As në komunizëm nuk ka ndodhur kështu. Por në krye të LDK-së kemi një njeri të Rrahman Morinës ndaj kjo nuk është shumë e çuditshme”.

Ndërkohë, pas rizgjedhjes së Mustafës ka dhënë dorëheqjen nga të gjitha strukturat e LDK-së anëtari i saj Shpejtim Bulliqi. Kuvendi zgjedhor i Lidhjes Demokratike të Kosovës u mbajt me dyer të mbyllura./ABC News Albania 24/7

kukes-1-1280x726.jpg
Sej rie09:00 | 03/08/2019

Edhe kjo fundjavë ka nisur me fluks të lartë mjetesh në Morinë. Policia kufitare që në orët e para ka aplikuar procedurën e thjeshtëzuar për të shmangur radhët dhe qëndrimet në doganë. Por, në fundjavë problem mbeten mjetet e transportit të mallrave. Ata që nuk arrijnë të kalojnë kufirin deri në orën 16.00 të pasdites së të premtes u duhet të qëndrojnë në kufi, duke krijuar radhë kilometrike.

Dogana e Kosovës nuk punon në fundjavë dhe ky është problemi më shqetësues për drejtuesit e këtyre mjeteve dhe biznesmenët, të cilave u shtohet jo pak kostoja e shpenzimeve për ditë qëndrimi dhe mungesën e qarkullimit të mallrave.

Unifikimi i sistemit doganor mbetet ende një tentative për t’u aplikuar nga qeveritë e dy vendeve, gjë e cila pritej të përfundonte brenda gjashtëmujorit të parë të këtij viti. Por, mesa duket precedentë të tillë do vijojnë deri në fund të këtij viti si pikë e parealizuar e marrëveshjes ndërqeveritare ashtu sikundër nuk u realizua edhe heqja e tarifave roaming./ABC News Albania 24/7

aksident-4.jpg
ent ela10:30 | 27/07/2019

Instituti Kombëtar i Shëndetësisë Publike të Kosovës (IKSHP) ka shprehur shqetësimin lidhur me numrin e lartë të aksidenteve që po ndodhin në Kosovë.

Mbi 40 persona kanë gjetur vdekjen në rrugët e Kosovës për vetëm gjashtë muaj të vitit 2019 dhe kjo është shqetësuese sipas IKSHP.

Ata gjithashtu janë shprehur se shkaku më i shpeshtë i aksidenteve është faktori njeri, duke dhënë kështu disa rekomandime për kujdesin në komunikacion.

Lexoni më poshtë reagimin e IKSHP-së:

Instituti Kombëtar i Shëndetësisë Publike të Kosovës (IKSHP) shpreh shqetësimin e thellë lidhur me numrin e lartë të aksidenteve të trafikut me fatalitet ku vetëm gjatë gjashtë muajve të parë të këtij viti kanë humbur jetën mbi 40 persona.

Shkaqet janë të ndryshme, por sigurisht se faktori njeri është më i shpeshtë pasi që nuk janë duke u respektuar rregullat e përgjithshme në trafik, por duke mos munguar as faktori rrugë dhe automjet pasi në shumë vende mungojnë shenjat e komunikacionit dhe veturat e vjetra me mangësi të shumta teknike, thuhet në reagim.

Me këtë rast Instituti Kombëtar i Shëndetësisë Publike të Kosovës jep rekomandimet me qëllim të parandalimit të numrit të aksidenteve në trafik:

Përpilimi i një plani të veprimit për parandalimin e aksidenteve dhe aprovimi me procedura urgjente nga Parlamenti i Kosovës.
Zbatimi me rigorozitet i Ligjit për komunikacionin deri në ndalesën e vozitjes për shkelje të rënda të përsëritura.

Me programe të ndryshme edukativo–informative të vetëdijësohen njerëzit e posaçërisht vozitësit për rolin e tyre në parandalimin e aksidenteve të cilat ndodhin si pasojë e gabimeve të tyre si dhe aftësimi për të ofruar ndihmën e parë.

Angazhimi i mas-mediave në kampanja të ndryshme që kanë për qëllim parandalimin e aksidenteve.

Me fillimin e vitit të ri shkollor të sensibilizohet çështja e sigurisë së fëmijëve në komunikacion duke organizuar orë edukativo – arsimore për sjelljen e këmbësorëve në komunikacion, mësimi sistematik i rregullave të komunikacionit.

Largimi i menjëhershëm i automjeteve të vjetra nga qarkullimi, kontrolli teknik rigoroz i të gjitha automjeteve.

Kontrollimet mjekësore të rregullta, periodike dhe plotësuese me vlerësim rigoroz të shëndetit mendor të vozitësve që kanë bërë shkelje të rënda të njëpasnjëshme.
Të rregullohet infrastruktura rrugore, të bëhet mirëmbajtja e rrugëve, të kompletohet sinjalizimi dhe respektimi rigoroz i rregullave të parkimit të veturave.

Drejtuesit e automjeteve t’i përmbahen me përpikëri shenjave të komunikacionit dhe kodit të mirësjelljes qytetare.
Inspektimi rigoroz i autoshkollave dhe kritereve për marrjen e patentë-shoferëve.

Këmbësorët të respektojnë shenjat e komunikacionit.

Ekspertët e Institutit Kombëtar alarmojnë dhe paralajmërojnë se nëse nuk merren masa urgjente, humbja e pritshme e jetëgjatësisë së banorëve do të jetë enorme, andaj apelon te të gjithë qytetarët të kenë shumë kujdes gjatë drejtimit të automjeteve, pasi automjeti është armë vrasëse që merr viktima të pafajshme. /klankosova


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono