kosove

kosove-1.jpg
in a07:22 | 21/01/2020

Serbia dhe Kosova pritet të jenë të lidhura me linjë avioni pas më shumë se dy dekadash. Ky lajm u njoftua nga Berlini, pas ndërmjetësimit të ambasadorit amerikan në Gjermani, Richard Grenel, është pritur mirë edhe në Serbi.

Kompania operuese do të jetë Lufthansa gjermane dhe jo AirSerbia. Një marrëveshje mbi qëllimet është konfirmuar edhe nga ministria e ekonomisë, e cila ka firmosur marrëveshjen. Këtë hap e kanë përshëndetuyr zyrtarët amerikan, shumë ambassador dhe sekretari i përgjithshëm i NATO-së.

Ministrja e transportit në qeverinë serbe, Zorana Mihajllovic, ka thënë se rivendosja e linjës është një gjë pozitive.
Ndërkohë presidenti amerikan, Donald Trump ka reaguar në “Twitter” pas arritjes së marrëveshjes për kthimin e linjës së fluturimeve mes Kosovës dhe Serbisë.

“Të gjithë thanë se nuk mund të bëhet. Por, për herë të parë në një gjeneratë, do të ketë fluturime direkte mes Serbisë dhe Kosovës. Një tjetër fitore. Duke iu falënderuar Ambasadorit Robert O’Brien dhe Ambasadorit Richard Grenell”, ka shkruar Trump në Twitter.

/abcnews.al

Capture-43-1.jpg
So Nila09:38 | 20/01/2020

Kryetari i Kuvendit të Kosovës, Glauk Konjufca, ka thirrur për sot mbledhjen e parë të Kryesisë së legjislaturës së shtatë të Kuvendit.

Në kohën kur dy partitë kryesore Lëvizja Vetëvendosje dhe Lidhja Demokratike e Kosovës ende nuk kanë mundur të arrijnë një marrëveshje finale për formimin e qeverisë së re të vendit.

Sipas mediave kosovare pjesë e rendit të ditës janë tre pika kryesore shqyrtimi i kërkesës për caktimin e delegacionit të Kuvendit të Kosovës për përfaqësim në Asamblenë Parlamentare të Procesit të Bashkëpunimit të Evropës Juglindore-SEECP, shqyrtimi i kërkesës për caktimin e delegacionit të Kuvendit të Kosovës për përfaqësim në Asamblenë Parlamentare të Këshillit të Evropës, si dhe shqyrtimi i propozimeve dhe kërkesave.

Gjithahstu këtë të hënë lëvizja Vetëvendosja përmes një letre drejtuar presidentit Thaçi i  ka propozuar Albin Kurtin si mandatar për kryeministër./abcnews.al

linda-1-1280x720.jpg
Autor E15:48 | 18/01/2020

Nga Shtiqni i Kukësit në Krushë të Vogël të Kosovës, familjet shqiptare kanë probleme të ngjashme, pavarësisht se e kaluara e tyre ka armiq të ndryshëm, në Shtiqën orteku ndërsa në Krushë, forcat serbe.

E përbashkëta është varfëria, kushtet shumë të vështira të jetesës, por edhe fëmijët që japin shpresë dhe optimizëm për të ardhmen.

Gazetarja e Abc News Linda Karadaku ishte në dy familje, në Shtiqën dhe Krushë të Vogël dhe sjell specialen në vijim:

Familjet shqiptare, pavarësisht se ku jetojnë kanë halle të ngjashme, pikë së pari ekonomike, varfëri dhe standard shumë të ulët jetese.

Por ka dicka që nuk mungon kurrë, shpresa dhe lufta për të ardhmen, për fëmijët që rriten duke ëndërruar të bëhen dikushi për vete dhe familjet e tyre.

Rruga nga Kukësi deri në Shtiqën, në lagjen Muje, është e ngushtë, e shtruar me gurë të vegjël dhe të con deri në këmbët e malit Gjallicë, që nuk është gjithmonë kaq paqësor.

Fshati ka qenë dikur i madh, por orteku i 1985 dhe tranzicioni i pas 90-tës e kanë katandisur në pak familje që mund të numërohen me gishtat e duarve.=

Në shtëpitë e fshatit nuk ka ujë brenda, funksionon vetëm një cezmë në rrugë ku mbushin ujë dhe dëbora nuk ka filluar ende. Pothuaj të gjitha familjet jetojnë me ndihma ekonomike dhe në atë ndihmë ekonomike duhet të nxirren te gjitha, buka, ushqimet, ilacet, rritja e fëmijëve.

Naze Muja, 69 vjec, është kryefamiljare dhe jeton me dy djemtë, nusen e njërit djalë, vajzën dhe dy fëmijët e djalit në këtë shtëpi, që nuk është e saj. Orteku i 1985 e kishte dëmtuar shtëpinë e saj dhe ata zbritën poshtë në këtë shtëpi.

Bashkëshorti I ndjerë punonte dikur në uzinën e pasurimit të bakrit. Tani ajo është edhe burrë edhe grua për familjen e saj, që e mban të bashkuar dhe me optimizëm, pavarësisht nga kushtet shumë të vështira ekonomike.

Kemi frikë, kur bie dëborë se na bllokon. Ujin e marrim tek çezmja aty sipër. Ndodh që nuk ka ujë deri sa të ngrijë kur të bjerë bora“, tregon Naze Muja, 69 vjeçe.

Nusja e shtëpisë po bën byrekun me qepë dhe Nazes i vjen keq që nuk mund të rrimë për ta provuar.

Vajza e saj donte të vazhdonte shkollën në Tiranë për anglisht, por mundësitë financiare nuk e lejuan.

Doja të shkoja në shkollë për anglisht, por nuk kishim mundësi ekonomike“, shprehet vajza e shtëpisë.

Erlis Shehu është nga Shtiqni dhe merret me ndihmën ekonomike për këta banorë. Ajri I mrekullueshëm dhe pamja hijerëndë e Gjallicës nuk mjaftojnë për të jetuar në Shtiqën.

Fqinja e familjes Muja, plaka Naze e mban mend ortekun e vitit 1985 dhe ende tmerrohet kur e kujton.

Shtiqni nuk është e vetmja zonë me halle. Ecim drejt kufirit, kalojmë Prizrenin, drejt fshatit Krushë e Vogël. Këtu nuk ka vrarë orteku, por njeriu.

103 burra të fshatit Krushë u masakruan nga forcat serbe dhe serbët lokalë gjatë luftës.

Vezire Batusha humbi dy djem dhe burrin. Mbeti e vetme me një djalë me probleme shëndetsore dhe me dhembjen pa ngushëllim.

U bënë 20 vjet që nuk kam as burrin dhe as djemtë dhe nuk na i kanë gjetur. Të kisha një vend që kur të mërzitesha t’i çoja lule e të shkoja“, tregon Vezirja.

Ti kishim gjetur sa jam gjallë, ta dija se ku e kanë varrin. Po qaj, por s’di as ku të shkoj“, vijon ajo.

Por shtëpia është mbushur plot. E ka martuar djalin dhe tani ka dy nipër dhe një mbesë.

Në pranverë dhe verë punon në këtë serë bashkë me djalin për të rritur perime që nuk janë vetëm për verë, por edhe për zahiretë e dimrit.

Dy nipat dëshirojnë të bëhen futbollistë ndërsa vajza piktore.

Pak metra larg shtëpisë Batusha është vendi ku janë vrarë 103 burrat e fshatit, mes tyre edhe dy djemtë dhe burri i Vezires. Nipat e saj mbajnë emrat e tyre, duke përjetësuar jo vdekjen, por vazhdimin e jetës.  /abcnews.al

51a4c368-a6fc-4476-89fe-0f98e16b044e.jpg
So Nila12:15 | 18/01/2020

Presidenti Ilir Meta këtë të shtunë ka marrë pjesë në Akademinë Solemne “Faleminderit Shqipëri”, të organizuar nga Ipeshkëvia e Dioqezës Prizren-Prishtinë.

Ky është një aktivitet që zhvillohet në shenjë falënderimi ndaj shqiptarëve dhe Shqipërisë, për solidaritetin, mikpritjen dhe dashurinë vëllazërore të ofruar ndaj shqiptarëve të Kosovës të shpërngulur forcërisht nga trojet e tyre nga regjimi i Millosheviçit gjatë Luftës së Kosovës

Kreu i Shtetit solli eksperiencën e tij dhe kujtoi eksodin masiv dhe solidaritetin e shqiptarëve. Në fjalën e tij presidenti Meta është shprehur se viti 1999 ishte një vit i jashtëzakonshëm në historinë e Ballkanit por sidomos të vendit tonë.

“Jemi të lumtur që të krijojmë vitin 1999, një vit i jashtëzakonshëm në historinë e Ballkanit por sidomos të vendit tonë. Një vit prove, një test afirmues apo shkatërrues për një vend dhe një komb. Duke i uruar ditëlindjen imzot Dodë Gjergji, për ne 24 marsi është një ditë e veçantë. Kisha 30-vjetorin atë ditë por nuk pata mundësi ta festoja për shkak të një lajmi akoma më të mirë për mua e çdo e shqiptar atë të nisjes së ndërhyrjes së NATO-s për t’i dhënë fund gjenocidit dhe barbarisë në Kosovë”, tha Meta.

LIVE – Fjala përshëndetëse në Akademinë Solemne “Faleminderit Shqipëri”, të organizuar nga Ipeshkvia e Dioqezës Prizren-Prishtinë

Gepostet von Ilir Meta am Samstag, 18. Januar 2020

Ndër të tjera në fjalën e tij presidenti Ilir Meta deklaroi se populli i kosovës ka kaluar momente të vështira,  ku vetëm një komb i rrezikuar në ekzistencën e tij mund të reagojë në atë mënyrë të jashtëzakonshme dhe të triumfojë.

“20 vite kanë kaluar dhe jemi vërtet shumë më mirë se 20 vite më parë. Por nuk jemi aq të lumtur sa do të donim. Duhet të jemi më të vëmendshëm për të ardhmen që të shohim çfarë duhet të bëjmë më mirë. E mbani mend se si ishte rruga nga Kukësi në Tiranë. Ata që e bënin atë rrugë e kanë të qartë se çfarë ka ndodhur falë ‘Rrugës së kombit’, që ka krijuar një afërsi të pabesueshme, të cilën duhet ta shfrytëzojmë akoma më mirë për të ardhmen. Shqetësimi ynë është të punojmë për të mbajtur të rinjtë. Kjo është sfida jonë më e madhe”, deklaroi Meta.

Gjithashtu ai ka falenderuar presidentin Thaçi, për institucionet, për FSK-në, qytetarët për atë reagim të jashtëzakonshëm pas tërmetit, pasi Kosova ishte e para që u gjend kudo në Thumanë në Durrës atje ku tërmeti i 26 nëntorit bëri dëmet më të mëdha./abcnews.al

bytyci-i-ftuar.png
R D17:28 | 17/01/2020

Analisti i njohur, Enver Bytyçi tha se Albin Kurti mund të dalë jashtë loje edhe pse LVV ka dalë parti e parë nga zgjedhjet e 6 tetorit 2019. Negociatat e tij me Isa Mustafën duket se janë në ngërç përsa kohë nuk kanë arritur dakordësinë për formimin e qeverisë.

I ftuar në studion e Abc News, nga gazetari Endri Xhafo, pedagogu dhe analisti i çështjeve të rajonit, Enver Bytyçi tha se zgjedhjet e parakohshme janë opsionit i fundit për Kosovën. Sipas tij, nëse nuk gjendet zgjdhja mes LVV-LDK, mund të provohet koalicioni mes LDK dhe PDK, që drejtohet nga Kadri Veseli, por që qytetarët e njohin si “partia e Thaçit”.

“Nëse nuk arrin partia e parë të formojë koalicionin dhe të çojë emrin e mandatarit për Kryeministër në Presidencë, atëherë partia e dytë mund të nominojë kandidatin për Kryeministër. Është e përcaktuar në Kushtetutën e Kosovës”, tha Bytyçi.

“LDK-ja e Isa Mustafës po shkon drejt një koalicioni me partinë e Hashim Thaçit, kjo përshtypje më krijohet mua, duke parë refuzimin e vazhdueshëm që i bën LDK-ja ofertës së Albin Kurtit. Intrigat e Isa Mustafës janë të dukshme në raport me Albin Kurtin”, shpjegoi më tej argumentat e tij Enver Bytyçi.

Më tej ai tha se LVV ka vetëm një gabim taktik, pasi ekspontentë të kësaj partie kanë folur në mënyrë të tepruar në media, ndërsa LDK-ja ka qenë më e kujdesshme së paku në publik. /abcnews.al

isa-mustafa-1280x704.jpg
nev ila14:16 | 17/01/2020

Deputetja e Vetëvendosjes Arbërie Nagavci paralajmëroi të premten se në Kosovë mund të ketë zgjedhje të reja. Nagavci tha për mediat në Kosovë se nëse nuk arrihet zbatimi i vullnetit të qytetarëve, atëherë prapë do të kthehen te qytetarët.

“Nëse për arsye që nuk varen prej nesh nuk arrihet implementimi i vullnetit të qytetarëve duhet të kthehemi të qytetarët”, tha ajo.

Vetëvendosje refuzoi të enjten përmes një letre ofertën e LDK-së. Kryetari i kësaj partie Albin Kurti tha se kërkesa për largimin e kryetarit të Kuvendit, Glauk Konjufca është qasje jodemokratike.

Kryetari i LDK-së, Isa Mustafa tha se nuk e konsideron letrën përgjigje zyrtare.

Mustafa tha të enjten në mbrëmje në një intervistë për mediat në Kosovë se posti i kryetarit të Kuvendit t’i takojë partisë së tij ndërsa presidenti nuk do të jetë i LDK-së, por i Kosovës.

Mustafa tha në intervistën dhënë për RTK se nëse Vetëvendosje ka kryeministrin dhe ministrat, atëherë LDK duhet të ketë kryeparlamentin ndërsa për presidentin tha se nuk do të jetë president i LDK-së, por president i Kosovës.

“Unë vetë e kam ditur që më ka rrëzuar vetëvendosje. Nuk do kishte mundur kurrë Vetëvendosje ta fitonte Prishtinën po të mos kishte pasur mbështetjen e PDK-së. Unë personalisht e kam vullnetin që të bëhet marrëveshja. Nëqoftëse nuk mundemi ta bëjmë, do të thotë duhet të lëshojmë rrugë, të lëshojmë hapësirë,” tha ai.

Vetëvendosje dhe LDK nuk janë takuar më dhe tashmë edhe ofertat po bëhen me letra dhe zarfa, të cilat po refuzohen nga palët./abcnews.al

thaci-1280x853.jpg
So Nila08:53 | 17/01/2020

Presidenti i Republikës së Kosovës, Hashim Thaçi ka mirëpritur marrëveshjen e liderve të partive politike në Luginën e Preshevës, për të marrë pjesë në zgjedhjet parlamentare në serbë, në një listë të përbashkët.

Në reagimin e tij në lidhje me këtë vendim kreu i shtetit e ka konsideruar këtë marrëveshje një mjet i rëndësishëm për fuqizimin politik dhe mbrojtjen e interesave kombëtare.

Përmes një postimi në Twitter Thaçi ka përgëzuar ministrin e Jashtëm në detyrë të Shqipërisë, Gent Cakajn i cili mbështeti një iniciativë të tillë.

“Unë e mirëpres marrëveshjen për krijimin e listës zgjedhore të përbashkët e partivë shqiptare në Luginën e Preshevës. Ky është një mjet i rëndësishëm i fuqizimit politik dhe mbrojtjes së interesave kombëtare. Gjithashtu përgëzoj ministrin e Jashtëm në detyrë të Shqipërisë, Gent Cakajn për mbështetjen e këtij procesi”, shkruan Thaçi./abcnews.al

vrasje-2.jpg
in a16:41 | 16/01/2020

Në Serbi është përkujtuar përvjetori i vrasjes së liderit të serbëve të Kosovës, Oliver Ivanovic. Ende nuk ka një autor për vrasjen e tij, por kryeministrja Brabic tha se Serbia nuk do ndalet deri sa të gjejë vrasësit e vërtetë.

Rreth orës 08:15, në këtë kohë në Mitrovicë ishte ekzekutuar lideri i serbëve të Kosovës, Olliver Ivanovic. Nderimet për të u bënë nga familja dhe zyrtarë të lartë shtetërorë. Serbia është duke bërë hetim të pavarur për vrasjen e tij, por nuk ka dhënë ndonjë rezultat.

Kryeministrja serbe, Ana Brnabic, tha se Serbia nuk do të ndalet derisa të gjej vrasësit e vërtetë. Ky mort ka ndarë shumë në Serbi, pasi vet Ivanovic kishte paralajmëruar rrezik dhe kishte qenë kritik ndaj grupeve kriminale dhe bënte politikë të pavarur. Serbia akuzon Kosovën për ngecjen e hetimeve.

“Vrasja e Oliver Ivanovic ngelet një plagë e hapur për popullin serb në Kosovë dhe Metohi dhe më gjërë. Një tragjedi edhe për familjen. Këtë duhet ta kenë në ndërgjegje ata, që këtë rast tentojnë ta keqpërdorin për arsye politike. E theksoj se Prishtina nuk ka kthyer përgjigje në 3 prej 4 kërkesave të organeve tona dhe atë që kanë kthyer ka qenë pas gjashtë muajsh”, deklaroi Marko Gjuric.

Kosova ka shpallur në kërkim personin që u shënjua si kryesori në vrasjen e Ivanovic, Millan Radojcic, i cili pasi Policia e Kosovës nuk e arrestoj dot, është parë në Serbi. Shteti serb e kishte future ish-zëvendës kryetarin e Listës Serbe dhe biznismenin në një test poligrafi. Në pafajsinë e tij besojnë.
Vrasja e Ivanovic ka shkaktuar akuza në mesin e serbëve pasi një pjesë dëshmuan tek organet e Kosovës për vrasjen e tij. Opozita do ta shënoj atentatin me protesta dy ditë më vonë. Zyrtarët serb thanë se kanë indicie për autorin, por nuk është koha.

“Shumë premtime janë bërë për zbardhjen e vrasjes, por dy hetime të ndara një në Kosovë e një në Serbi ende nuk kanë sjellë autorët para drejtësisë. Në një moment Serbia kishte përfshirë edhe Tiranën”, raporton për “ABC News” gazetari, Idro Seferi./abcnews.al

meta-ilir.jpg
So Nila11:06 | 16/01/2020

Presidenti i Shqipërisë Ilir Meta të mërkurën ka vizituar Kosovën, ku ka qenë pjesë në përkujtimin e Masakrës së Reçakut.

Gjatë qëndrimit të tij në Kosovë ai është takuar me ish-ambasadorin i OSBE-së, William Walker, personin që denoncoi për botën atë që ndodhi në Reçak.

Përmes një postimi në rrjetin social Facebook, kreu i shtetit bën me dije se e ka ftuar me shumë kënaqësi për të vizituar Shqipërinë.

Postimi i Metës:

I lumtur të ritakohesha në Kosovë me Ambasadorin William Walker. Shqiptarët kudo në botë do t’i jenë përherë mirënjohës për denoncimin historik që i bëri Masakrës së Reçakut vetëm me tre fjalë: Krim kundër njerëzimit. Integriteti i tij i lartë ndihmoi botën të zbulonte genocidin që ndodhte çdo ditë, dhe vuri diplomacinë në veprim përmes Konferencës së Rambujesë, dhe më pas ndërhyrjes historike të NATO-s, për t’i dhënë fund përgjithmonë spastrimit etnik në zemër të Europës. E ftova me shumë kënaqësi për të vizituar Shqipërinë, dhe sigurisht Sarandën që ai e do aq shumë./abcnews.al

404994-CrxHCBo8cK.jpg
R D23:05 | 15/01/2020

Kryeministri Edi Rama ka paditur në Gjykatën Themelore të Prishtinës, Kryeministrin në detyrë të Kosovës Ramush Haradinaj. Rama pretendon se Haradinaj ka shpifur ndaj tij sa i përket tezës së shkëmbimit të territoreve. Në këtë padi, që është publikuar nga media në Kosovë, Rama kërkon konpensim të dëmit moral si dhe detyrimin e Haradinajt të përgënjeshtrojë deklaratat në lidhje me shkëmbimin e territoreve. (Reagon Haradinaj: Kombi ynë dhe Kosova ka njerëz që i dalin zot)

Në këtë padi, përmenden dy emisione të transmetuara gjatë muajit tetor të vitit të kaluar, në të cilat Haradinaj ka folur për këtë temë, e ku e ka akuzuar Ramën, që së bashku me Hashim Thaçin dhe Aleksandër Vuciçin, kanë nisur idenë e shkëmbimit të territoreve ndërmjet Kosovës dhe Serbisë.

“Në datën 17.10.2019 e 29.10.2019, i Padituri Ramush Haradinaj, në kohën e kryerjes së deklaratës Kryeministër në detyrë i Republikës së Kosovës (më poshtë referuar edhe si “i Padituri”gjatë një interviste të dhënë gazetarit Artur Zheji e të publikuar në emisionin 360.gradë në datën 17.10.2019 si dhe gjatë intervistës së kryer në datën 29.10.2019 në emisionin televiziv Pressing/Zona Pressing të publikuar në televizionin “T7” të Republikës së Kosovës, ka kryer deklarim publik të fakteve shpifëse e mashtruese në adresë të Paditësit me pasojë cenimin e nderit, personalitetit, reputacionit dhe dinjitetit të Paditësit me pasojat e parashikuara në legjislacionin e zbatueshëm”, thuhet në padi.

Në padi thuhet se deklaratat shpifëse shkak padie kanë pasur për kontekst përgatitjet për procesin e dialogut mes Republikës së Kosovës dhe Republikës së Serbisë e që, në parim, sic thuhet në padi, do të duhet të rezultojë në një marrëveshje reciprokisht të detyrueshme për të dyja palët dhe njohje reciproke në mes këtyre dy shteteve.

“Kjo çështje ka dominuar debatin publik që nga fundi i vitit 2018 dhe përgjatë vitit 2019, duke rezultuar në akuza deri për “tradhëti”, çdo herë e përkundrejt personave të pretenduar se gjatë këtij procesi dialogu kanë mbështetur idenë e të ashtuquajturit “shkëmbim të territoreve në mes Kosovës dhe Serbisë””, thuhet tutje në këtë padi, të cilën e ka siguruar “Betimi për Drejtësi”.

Sipas padisë, kryeministri i Kosovës, është autori e përhapësi në publik i akuzave për fakte konkrete të cilat në mënyrë të përsëritur e në mënyrë direkte e indirekte, kanë krijuar në publik idenë e rreme sipas së cilës “Kryeministri i Republikës së Shqipërisë në personin e Paditësit është në shërbim të një ideje në dëm të interesit të kombit shqiptar në përgjithësi dhe të interesit të Republikës së Kosovës në veçanti”.

Aty përmenden një numër i madh të deklaratave që Haradinaj vazhdimisht i ka dhënë, e në të cilat e ka apostrofuar kryeministrin shqiptar, Edi Rama.
Pjesë e këtyre deklaratave është edhe ajo ku Haradinaj, sipas padisë, i referohet edhe aferave korruptive, për ta jetësuar idenë e shkëmbimit të territoreve.

Në padi thuhet se ky qëndrim në vazhdimësi i Haradinajt është mbajtur përkundër fakteve që sipas padisë, Rama asnjëherë nuk ka diskutuar për tema të tilla.

“Kryeministri i Republikës së Shqipërisë nuk ka asnjë rol formal e juridiko-politik në marrëveshjen eventuale në mes Republikës së Kosovës dhe Serbisë. E kjo për faktin se kjo lloj marrëveshje bazuar në Kushtetutën e Republikës së Kosovës, përbën një akt që mund të miratohet vetëm dhe ekskluzivisht nga Kuvendi i Republikës së Kosovës e, për më tepër, kërkon ekskluzivisht miratimin e 2/3 të të gjithë deputetëve të Kuvendit të Kosovës[1], dhe rrjedhimisht 80 vota pro, përfshirë deputetët e koalicionit qeverisës dhe të opozitës, në secilën rrethanë. Kryeministri i Republikës së Shqipërisë asnjëherë nuk ka mbështetur dhe nuk është deklaruar në mbështetje të një ideje të tillë. Qëndrimi i Paditësit në Qeverisë së Republikës së Shqipërisë ka qenë një dhe i vetëm: ai i mbështetjes së pozicionit të qëndrimeve të Republikës së Kosovës drejt një marrëveshje ndërkombëtarisht të detyrueshme për Republikën e Kosovës dhe Serbisë dhe e cila do të rezultonte në njohje reciproke në mes dy vendeve dhe do të hapte rrugëtimin efektiv drejt integrimeve euro-atlantike”, thuhet ndër të tjerash në këtë padi.

Në këtë padi, Rama nuk e ka cekur shumën e dëmit që pretendon se i është shkaktuar.

Por, me padi, ai ka kërkuar që përveç kompensimit të dëmit, të detyrohet Haradinaj që t’i dal deklaratat që sipas padisë, janë shpifje, si dhe t’i përgënjeshtroje ato.


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono