kosove

dialoguuu.jpg
gra moz21:25 | 19/06/2018

Presidentët e Kosovës dhe Serbisë do të takohen të dielën në Bruksel në vijim të dialogut të nivelit të larte mes dy vendeve. Hashim Thaçi në një deklaratë për mediat, konfirmoi këtë takim që do të ndërmjetësohet si edhe më herët nga përfaqësuesja e BE-së për politikën e jashtme, Federica Mogherini.

Shefja e politikës së jashtme të Bashkimit Evropian, Federica Mogherini, ka ftuar Presidentin e Kosovës, Hashim Thaçi dhe atë të Serbisë, Aleksandër Vuçiç, që të takohen të dielën më 24 Qershor në Bruksel, në vijim të dialogut mes dy vendeve.

Në një njoftim të zyrës së zonjës Mogherini thuhet se “ata do të vazhdojnë punën e tyre në fazën e bisedimeve për normalizimin e plotë të marrëdhënieve, do të diskutojnë për marrëveshjet ekzistuese, të informojnë për arritjet e deritashme dhe të diskutojnë hapat e ardhshëm duke pasur parasysh një periudhë intensive bisedimesh që priten në të ardhmen”.

Takimi i së dielës u konfirmua edhe nga presidenti i Kosovës gjatë një deklarate për media.

“Ekipet tona do të takohen në javët e ardhshme, ndërsa takimi në nivel të presidentëve do të ndodhë të dielën. Gjatë orëve dhe ditëve të ardhshme do të kemi kontakte të vazhdueshme me gjithë miqtë dhe partnerët tanë në mënyrë që të kemi një koordinim sa më të mirë dhe gjithashtu dhe me spektrin politik kosovar”.

Takimi i së dielës shihet si një përpjekje për t’i hapur rrugë arritjes së një marrëveshjeje detyruese ligjore për normalizimin e marrëdhënieve mes Prishtinës dhe Beogradit.

Një marrëveshje gjithëpërfshirëse për normalizimi i marrëdhënieve është kusht për të dyja vendet për integrim në Bashkimin Evropian./abcnews.al

ilir-meta.jpg
gra moz12:34 | 10/06/2018

Lidhja Shqiptare e Prizrenit nuk është një relike historike por një vepër frymëzuese veçanërisht për rininë shqiptare. Mesazhin e tij, Presidenti i Republikës, Ilir Meta, e përcolli në 140-vjetorin e Lidhjes Shqiptare të Prizrenit, në ceremoninë e organizuar nga kryeministri i Kosovës.

“Lidhja Shqiptare e Prizrenit qëndron edhe sot e gjithë ditën në përpjekje të mëdha të mbarëshqiptarëve për të zgjeruar hapësirat e tyre të lirisë, demokracisë dhe integrimit europian dhe euroatlantik. Si e tillë, ajo nuk është një relike historike, por është edhe sot një vepër e gjallë frymëzyese për të gjithë ne dhe për  të gjitha kohërat”, tha Meta./abcnews.al

GYLENISTET-FAMILJARET-1280x720.jpg
ent ela11:51 | 08/06/2018

Familjarët e Mustafa Erdemit, një nga shtetasit turq të ekstraduar në Turqi nga autoritetet Kosovare, janë larguar nga Kosova dhe kanë kërkuar azil në Gjermani. Por ambasada gjermane në Kosovë nuk ka pranuar të mohojë apo pohojë këtë informacion.

Mediat kosovare raportojnë se bashkëshortja dhe dy djemtë e Mustafa Erdemit, drejtor i kolegjit “Mehmet Akif”, i arrestuar dhe i dëbuar muaj më parë për në Turqi, janë larguar nga Kosova dhe kanë kërkuar azil në Gjermani.

Largimin e tyre nga vendi e ka konfirmuar koordinatori i Kolegjit, si dhe avokati mbrojtës. Ambasada Gjermane nga ana e saj deklaroi se nuk mund t’i konfirmojë këto informacione.

Arrestimi dhe dëbimi për në Turqi i Mustafa Erdemit, drejtor i kolegjit “Mehmet Akif”, ka bërë që familjarët e tyre të mos ndihen të sigurt në Kosovë pavarësisht premtimit të kryeministrit Ramush Haradinaj se qeveria të cilën ai e drejton do të kujdeset për ta. Pikërisht për shkak të frikës se mund të ekstradohen për në Turqi në të njëjtën mënyrë si kryefamiljari i tyre, bashkëshortja dhe dy djemtë e tij janë larguar nga Kosova. /abcnews.al

KOSOVARET-MORINE-1280x720.jpg
ent ela12:48 | 02/06/2018

Edhe pse është muaji i Ramazanit, qytetarët kosovarë nuk janë ndalur për të shijuar motin me diell të fundjaves.

Në orët e para të ditës së sotme ne piken kufitare te Morinës ka patur një dyndje të shtetasve nga Kosova që i drejtohen Shqipërisë. Mësohet se gjatë orëve të fundit në vendin tonë kanë hyrë rreth 4000 qytetarë me 800 automjete.

Policia kufitare vijon punën me procedurë të përshpejtuar për të shmangur radhët e gjata.

Destinacionet e tyre janë qytetet bregdetare por edhe Tirana. /abcnews.al

INTERVIST-ERVIN-SALIANJI-1280x720.jpg
ent ela23:40 | 31/05/2018

Deputeti demokrat Ervin Salianji i ftuar në Mbrëmje në ABC News ka folur në lidhje me ndalimin e Albert Veliut në Kosovë. Ai mohoi faktin që Veliu të jetë arrestuar për ndalim të paligjshëm, por me kërkesë të palës shqiptare.

“E gjitha është bërë për të mbajtur nën kontroll se nëse nuk bashkëpunon me ne atëherë do t’i ndodhë ajo që do t’i ndodhë”- shprehet Salianji. /abcnews.al

albert-Veliu-1.jpg
gra moz15:27 | 31/05/2018

Autoritetet kosovare nuk kanë paraqitur ende asnjë kërkesë apo dokument për të vënë në dijeni homologët shqiptarë, mbi kërkesën e shtetasit Albert Veliu për të marrë azil në Kosovë. 51-vjeçari u ndalua disa ditë më parë bashkë me djalin e tij dhe kërkoi të mos të kthehet në Shqipëri pasi i rrezikohet jeta.

Autoritetet Shqiptare nuk kanë marrë asnjë kërkesë nga homologët e tyre në Kosovë për procedurat e azilit të kërkuara nga Albert Veliu, i njohur ndryshe si “Dëshmitari X” .

ABC News u interesua pranë Ministrisë së Brendshme, Prokurorisë së Përgjithshme dhe në Ministrinë e Drejtësisë, ku pohojnë se organet ligjzbatuese të Kosovës deri tani nuk kanë paraqitur asnjë kërkesë në vendin tonë Albert Veliun.

51-vjeçari u ndalua bashkë me të birin pak ditë më parë nga autoritetet policore në Kosovë, nën dyshimet se kishte hyrë ilegalisht në territorin e saj. Ministria e Brendshme e Kosovës konfirmon se, Veliu ka kërkuar azil me motivin se në Shqipëri i kërcënohet jeta.

Prokuroria e Krimeve të Rënda edhe më herët, ishte shprehur se ndaj Veliut nuk ka urdhër-ndalimi lidhur me procedimin penal të nisur nga organi i akuzës për veprën penale të “Trafikimit të narkotikëve”. Për  këtë çështje, Albert Veliu është pyetur në prokurori dhe më pas është lënë i lirë.

Për kërkesën për azil, të bërë nga shtetasi Albert Veliu, autoritetet e Kosovës kanë pohuar se do të konsultohen edhe me homologët e tyre shqiptarë. Veliu, një ish-i dënuar për trafik droge, pranoi publikisht se zëri në audiopërgjimin e bërë publik nga Partia Demokratike ishte i tij./abcnews.al

shqiperia.jpg
gra moz13:52 | 30/05/2018

Polemika të ashpra në përfundim të miqësores mes Kosovës dhe Shqipërisë. Atmosferë e acaruar pas deklaratave të ndonjë lojtari të Kosovës apo ndonjë tifozi.

Vëllazërore ishte fjala që dëgjohej më shpejt përpara fillimit.

Për fat të keq nuk ishte 100 për qind e tillë miqësorja Kosovë-Shqipëri, të paktën për disa nga polemikat që e pasuan.

Reagimet në të nxehtë të disa prej protagonistëve, apo të ndonjë tifozi e prishën jo pak atmosferën, a thua se nuk mjaftonin debatet lidhur me fatin e talenteve me origjinë nga Kosova, që i synon edhe Shqipëria.

Herolind Shala, mesfushor i Kosovës që luajti disa kohë edhe për Shqipërinë, shfreu pa masë, ndërsa ende nuk i ishte tharë djersa në trup.

“Na nënçmuat? Në rregull, ne flasim vetëm në fushë, ne jemi Kosova dhe pritni gjëra të mëdha në të ardhmen … Të dua vendlindja ime”.

Disa orë më vonë, duke kuptuar gabimin, postoi një tjetër mesazh në rrjetet sociale, më pajtues, dhe më konkret, por që nuk largoi shijen e keqe.

“Fjala që na nënçmuat ka qenë vetëm për disa gazetarë e analistë, por dhe për trajnerin italian që na nënçmoi para ndeshjes, jo për tifozët apo për Federatën”.

Edon Zhegrova, ndërkaq u vu nën akuzë për veprimin e minutës së 74-t, kur rezultati ishte 3-0, duke xhongluar topin.

Aksioni i tij u vlerësua si ofendues për Shqipërinë, diçka që e kuptoi edhe vetë Zhegrova, autor i golit të tretë.

Shqiptari i Kosovës reagoi menjëherë, duke kërkuar falje nëse kishte ofenduar kënd me veprimin e tij.

Po ashtu, ai u tregua i përmbajtur në deklaratën pas ndeshjes për “Supersportin”.

Tepër negativ postimi i një tifozi të Kosovës, i cili shkruajti se “kurrë nuk i kam dashtë, e kurr s’kam me i dashtë këta “vllaznit tonë” se kta kurrë nuk na kanë dashtë, e kurr s’kanë me na dashtë”.

Reagimet nuk munguan, dhe pati nga ata që i kujtuan strehimin në Shqipëri në kohën e spastrimit etnik të Millosheviçit.

Një tifoz i quajtur Enver Idrizi, me stemën e UÇK-së, krijoi menjëherë ekuilibër: “Mos u përçani, futbolli është vetëm një lojë, një ditë do të jemi bashkë”.

Vetë Zhegrova e kuptoi momentin e keq dhe krijoi atmosferë të bukur me foton e postuar së fund, me tekstin “foto sa 1 000 fjalë”.

Aty ai po dilte në fotografi me tifozë me fanela kuqezi, dhe me flamurin shqiptar.

Më pozitiv një tjetër ish-lojtar i Shqipërisë, Milot Rashica.

Talenti që luan në Gjermani dhe që ka për menaxher ish-kapitenin e Shqipërisë Altin Lala, postoi foton me simbolet e të dy ekipeve, Kosovës dhe Shqipërisë.

“Çfarë ndeshjeje, çfarë lufte. Kosova-Shqipëria, jemi një”!

Rashica e Shala ishin dy prej lojtarëve që ish-trajneri Xhani De Biazi i la jashtë kombëtares që shkoi në Euro 2016, dhe fill pas atij momenti, ata u larguan nga Shqipëria./abcnews.al

dash.jpg
ent ela17:52 | 29/05/2018

Në raportin vjetor për liritë fetare, Departamenti amerikan i Shtetit ka kritikuar Shqipërinë, për progres të mangët në procesin e kthimit të pronave të komuniteteve fetare dhe për bllokim të programeve të parandalimit të radikalizimit.

Raporti vjetor i Departamentit të Shtetit për liritë fetare ka patur mes të tjerash, dy pika kritike për Shqipërinë. Edhe pse vlerëson tolerancën dhe bashkjetesën fetare në vendin tonë, dokumenti kritikon shtetin shqiptar se nuk ka bërë sa duhet për kthimin dhe kompensimin e pronave të komuniteteve fetare. Raporti nënvizon se Agjencia për Kthimin dhe Kompensimin ka ecur me ritme të ngadalta në këtë proces, edhe pse pretendon se së fundmi ka zgjidhur 423 raste të tilla. Raporti kritikon gjithashtu përpjekjet e vakëta të qeverisë shqiptare për parandalimin e fenomenit të radikalizmit fetar. Edhe pse u përgatitën 29 mësues në 15 shkolla për promovimin e tolerancës, vijon raporti, implementimi i programit arsimor u bllokua në maj dhe e ardhmja e tij nuk është e sigurtë. Megjithatë raporti ka edhe konstatime pozitive për vendin tonë. Në veçanti ai vlerëson faktin që Kushtetuta shqiptare garanton lirinë e besimit dhe përcakton se në vend nuk ka një fe zyrtare. Gjithashtu, merret në konsideratë marrëveshja që qeveria ka me komunitetet fetare, përfshirë këtu myslimanët sunitë, bektashinjtë, katolikët, ortodoksët dhe Vllazërinë Ungjillore, që përfaqëson fenë protestante. Nuk anashkalohet as ligji që detyron qeverinë t’u japë komuniteteve në fjalë mbështetje financiare, me përjashtim të Vllazërisë Ungjillore, e cila nuk përcaktohet për përfitimin e fondeve. Një tjetër vlerësim për vendin tonë është edhe ekzistenca e Këshillit Ndërfetar, një forum ku liderët fetarë të vendit diskutojnë probleme të përbashkëta. Gjatë vitit të kaluar këshilli në fjalë u takua tre herë, ndryshe nga viti parardhës kur nuk zhvilloi asnjë tryezë. /abcnews.al

shtime.jpg
gra moz14:52 | 28/05/2018

Është arrestuar të dielën nga Policia e Kosovës shtetasi Albert Veliu dhe djali i tij. Të dy u ndaluan në Shtime, ndërsa policia e Kosovës konfirmoi lajmin duke theksuar se ka vepruar në bazë të kërkesës së palës shqiptare.

Policia e Kosovës konfirmoi arrestimin e shtetasit shqiptar Albert Veliu dhe djalit të tij, në Shtime. Zëdhënësi i Policisë së Kosovës, Baki Kelani, tha se bazuar në autorizimet ligjore, të dielën janë ndaluar ndaluar dy shtetas të Republikës së Shqipërisë, të cilët janë trajtuar sipas procedurave të parashikuara me ligj.

Veliu njihet dhe si “Dëshmitari X” në çështjen e Agron Xhafajt, vëllait të ministrit të Punëve të Brendshme në Shqipëri, Fatmir Xhafaj. Albert Veliu është personi, i cili në audiopërgjimin e publikuar nga Partia Demokratike e Shqipërisë flet me Agron Xhafajn për pazare droge. Mediat kosovare shkruajnë se “Dëshmitari X” po qëndronte në Shtime kur iu vunë prangat së bashku me djalin e tij. Për këtë arrestim autoritetet kosovare kanë njoftuar palën shqiptare.

Ai është arrestuar me urdhër të Prokurorisë së Krimeve të Rënda të Shqipërisë dhe pritet t’i dorëzohet autoriteteve në Shqipëri. Veliu ditë më parë bëri përpjekjen e parë për t’u larguar në Kosovë, por u ndalua në Kukës. Pas marrjes në pyetje, në Shqipëri, atij nuk iu bllokua pasaporta dhe nuk kishte asnjë urdhër ndalimi, por ishte në ruajtje nga policia./abcnews.al

talat-xhaferri.jpg
gra moz21:20 | 24/05/2018

Kryetari i parlamentit të Maqedonisë, Talat Xhaferri, në përfundim të vizitës në Serbi u ndal edhe në Preshevë, ku premtoi angazhim për çeljen e një pike të re kufitare.

Shqiptarët e Serbisë dhe ata të Maqedonisë i lidh dhe ndanë një kufi. Prej kohësh janë duke u munduar të hapin një pikë kufitare për të lidhur familjet, por edhe dy shtete.

Kreu i parlamentit maqedonas, Talat Xhaferri, në kthim nga kryeqyteti serb ka ndaluar në Preshevë për të diskutuar dhe mbështetur shqiptarët.

Shqiprim Arifi, Kryetar i Preshevës: “Ne jemi shumë të nderuar sepse nuk është vetëm kryetari i parlamentit, por është edhe miku jonë, është vëllau jonë”.

Preshevarët u ndanë me shpresë se progresi i shqiptarëve të Maqedonisë është një shembull edhe për ta.

Xhaferri u ka premtuar angazhim në takimet shtetërore për hapjen e një pike të re kufitare.

Talat Xhaferi, kryetar i Kuvendit të Maqedonisë: “Pozita jonë këtu nuk është pozitë sikundër dikush tjetër ka në atë kuptim, për faktin që janë trojet tona dhe në të cilën gjithnjë i kemi jetuar dhe ato të drejta që janë të garantuara natyrshëm janë çështje tpër të cilat përpjekjet duhet të vazhdojnë që të realizohen deri në fund”.

Kreu i parlamentit në Shkup tha se bashkëpunimi rajonal mund të zgjidh shumë probleme të hapura në Ballkan.

Gazetar: Idro Seferi

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono