kosova

rusia-1.png
G. P.19:24 | 11/11/2018

Associated Press i ka kushtuar një artikull stërvitjeve ushtarake të Serbisë, duke shkruar se këto manovra vijnë në një kohë tensioni mes Prishtinës dhe Beogradit. Presidenti serb thotë se askush në rajon nuk krahasohet me Serbinë sa i përket forcës ushtarake.

Agjencia e njohur e lajmeve, Associated Press (AP), ka shkruar për marrëdhëniet e tensionuara midis Kosovës dhe Serbisë, me ç’rast ka theksuar se kjo e fundit ka zhvilluar një stërvitje të madhe ushtarake për të shënuar njëqindvjetorin e përfundimit të Luftës së Parë Botërore. Kjo agjenci ka raportuar se në këtë stërvitje ushtarake të Serbisë, të quajtur “Shekulli i Fituesve”, kanë qenë të përfshirë 8,000 ushtarë, 100 tanke dhe avionë luftarakë MiG-29, të sjellë nga Rusia.

“Zyrtarët serbë janë të shqetësuar për planet e udhëheqësve të Kosovës që t’i transformojnë forcat e sigurisë në ushtri të rregullt. Si rezultat, serbët kanë paralajmëruar se do të ndërmarrin masa për të parandaluar një gjë të tillë, në mënyrë që të ‘mbrohet’ minoriteti serb në Kosovë”.

“Duke u mbështetur në aleatët rus, Serbia ka ngritur gatishmërinë luftarake të forcave të saj”, shkruan agjencia ndërkombëtare e lajmeve.

Ndërsa ndërhyrja e trupave serbe në Kosovë do të nënkuptonte një konflikt të drejtpërdrejtë me paqeruajtësit e NATO-s që janë të vendosur në Kosovë që nga viti 1999.

“Ne po e zhvillojmë në mënyrë të fuqishme ushtrinë tonë. Askush në rajon, përveç ndoshta Rumanisë, nuk mund të krahasohet me ne”, ka thënë presidenti i Serbisë, Aleksandar Vuçiç, për televizionin shtetëror RTS./abcnews.al

OPOZITA-KOSOVE-2-1280x852.jpg
ent ela12:24 | 10/11/2018

Opozita në Kosovë ka sulmuar sërish presidentin e vendit Hashim Thaci duke thënë se ai nuk kishte mandate që i lejonte të vazhdonte dialogun me homologun serb Vuçiç në Bruksel. Ish-kryetari i Kuvendit të Kosovës Jakup Krasniqi tha se Kosova nuk duhet të nënshtrohet në bisedimet me Serbinë.

Opozita në Kosovë e konsideron takimin e së enjtes mes presidentit Hashim Thaçi dhe homologut të tij serb, Aleksandër Vuçiç, një takim të pamandatuar dhe jolegjitim.

Kreu i Lëvizjes Vetëvendosje, Albin Kurti, akuzoi presidentin Thaçi dhe kryetarin e Kuvendit, Kadri Veseli, si kolaboracionistë dhe vegla të Serbisë, që me veprimet e tyre vetëm po ndihmojnë planet për marrjen e veriut të Kosovës.

Edhe për shefin e grupit parlamentar të LDK-së, Avdullah Hoti, zhvillimi i dialogut mes dy palëve pa një platformë të dakordësuar, e ka bërë procesin të pabesueshëm.

Ai kërkoi mbështetje politike për rezolutën që i heq Kreut të Shtetit të drejtën për të diskutuar ndarjen e territorreve, përndryshe përballja me qytetarët do të jetë e pashmangshme.

Ndërkohë, për ish-kryeparlamentarin Jakup Krasniqi, Kosova nuk duhet të tregohet e nënshtruar në bisedimet me Serbinë, pasi fqinji i tyre verior njeh vetëm gjuhën e forcës.

Vetë palët e përfshira në dialog, Thaçi dhe Vuçiç, u shprehën pas takimit se ekziston ende një mundësi e vogël që dy vendet të arrijnë një marrëveshje. Por, ideja e realizimit të një marrëveshjeje brenda majit të vitit tjetër, kur përfaqësueses së lartë për politikën e jashtme në BE, Frederica Mogherini, do t’i skadojë mandati, duket ende larg. /abcnews.al

lavrov.png
G. P.18:07 | 09/11/2018

Ministri i Jashtëm rus Sergei Lavrov deklaroi se përpjekjet e Bashkimi Europian për të ndërmjetësuar një marrëveshje mes Prishtinës dhe Beogradit, kanë dështuar. Lavrov theksoi se janë Shtetet e Bashkuara të Amerikës që po përpiqen të krijojnë ushtrinë e Kosovës.

Përpjekjet e Bashkimit Europian për të ndërmjetësuar një marrëveshje përfundimtare mes Kosovës dhe Serbisë, kanë dështuar. Është kjo deklarata e ministrit të Jashtëm rus Sergei Lavrov, i cili theksoi se Shtetet e Bashkuara të Amerikës po bëjnë presion për krijimin e ushtrisë së Kosovës. Shefi i diplomacisë ruse u shpreh se është e qartë se përpjekjet kanë dështuar pasi Prishtina refuzon të implementojë të gjitha marrëveshjet që janë arritur deri tani. Ministri i Jashtëm rus i referohet vecanërisht marrëveshjes për krijimin e asocaconit të komunave serbe në veri të Kosovës.

Lavrov tha se përpjekjet e Prishtinës për krijimin e ushtrisë përbën shkeljen më të rëndë të rezolutës 1244 të këshillit të sigurisë së OKB-së. Ministri i Jashtëm rus deklaroi se Rusia ka mirëpritur vendimet e disa vendeve të cilat kohët e fundit kanë tërhequr njohjen e pavarësisë së Kosovës. Sipas tij Rusia do të vazhdojë të mbështesë vendimet që do të merren nga këshilli i sigurisë së OKB-së në të ardhmen, duke iu referuar sidomos respektimit të Rezolutës 1244, sipas së cilës Kosova është pjesë e Serbisë: Të gjitha hapat duhet të hidhen në përputhje me këtë rezolutë, përfundoi Lavrov./abcnews.al

KE-SQARIME-NGA-KOSOVA-_ABC-M1-T1.mpg_snapshot_00.44-1280x720.jpg
G. P.19:15 | 07/11/2018

Komisioni Evropian i ka kërkuar Kosovës sqarime urgjente për vendosjen e tarifave për importin e mallrave nga Serbia dhe Bosnja. Sipas Brukselit, kjo vendoje taksash shkel marrëveshjen e tregtisë së lirë për Evropën Qëndrore.

Masat e anonçuara nga qeveria e Kosovës për rritjen me 10 % të takasave për importin e mallrave nga Serbia dhe Bosnja-Hercegovina janë dhunim i marrëveshjes së tregtisë së lirë për Europën Qëndrore, CEFTA » Ky është qëndrim i Komisioni Europian, i cili i kërkon qeverisë së Kosovës të tërhiqet nga ky hap i papritur, siç e ka artikuluar në konferencën e mesidtës së ekzekutivit europian, Maja Koçijançiç.

Maja Kocijançiç, zëdhënëse e KE-së: «Ne presim sqarime urgjente nga qeveria e Kosovës në përgjigje të anonçimit të papritur për rritje me 10% të taksave për importin e mallrave nga Serbia dhe Bosnja-Hercegovina. Këto masa janë dhunim i qartë i detyrimeve që Kosova ka në kuadrin e CEFTEs, presidencën e të cilës mban aktualisht. Ne presim që Kosova të përmbushë detyrimet që rrjedhin nga marrëveshja e CEFTË-s dhe dhe i kërkojmë autoriteteve të Kosovës të tërhiqen nga ky hap. Ne besojmë, që ky vendim cënon bashkëpunimin rajonal, përfshirë këtu edhe zonën ekonomike rajonale dhe nuk është në përputhje me parimet që përmban marrëveshja e asocim-stabilizimit midfis BE-së dhe Kosovës »

Por pyetja nëse patur reagime të tilla nga Komisioni Europian kur hapa të ngjashëm janë anonçuar nga Serbia apo vende të tjera të rajonit, nuk ka gjetur përgjigje. Komisioni Europian ka lënë në pikëpyetje trajtimin e njëjtë të vendeve që kanë nënshkruar marrëveshje të CEFTW-s. /abcnews.al

G. P.20:26 | 03/11/2018

Në një intervistë për agjencinë serbe të lajmeve “Danas”, eurodeputetja Tania Fajon u shpreh kundër idesë së korrigjimit të kufijve mes Kosovës dhe Serbisë. Ajo shtoi se aktualisht përfaqësuesja e lartë e Bashkimit Europian është nën presion nga liderë të ndryshëm europianë për këtë çështje.

Eurodeputetja Tanja Fajon, njëkohësisht dhe raportuesja për liberalizimin e vizave për Kosovën, në një intervistë për agjencinë e lajmeve serbe “Danas”, ka shprehur qëndrimin e saj rreth idesë për korrigjim kufijsh mes Kosovës dhe Serbisë. Fajon theksoi se ishte kundër kësaj ideje, duke shtuar se përfaqësuesja e lartë për politika të jashtme në Bashkimin Europian, Federica Mogherini, ndodhej në qendër të kritikave dhe në presion të madh nga liderët e BE-së.

Sipas Fajon çështja e kufijve është shumë e ndjeshme dhe në rast se një korrigjim apo ndryshim do të ndodhte, atëherë do të kishte një efekt negative dhe destabilizues në rajon. Eurodeputetja këmbënguli se ky nuk ishte një shqetësim vetëm i saj, por dhe i shumë vendeve anëtare të Bashkimit Europian. Ajo konfirmoi se çdo ditë e më shumë liderët e BE-së kritikojnë qëndrimin aktual të Mogherini-t pasi ka dhe liderë të tjerë në Ballkan që janë gati të mbështesin ide të tilla për ndryshim kufijsh në rajon./abcnews.al

KOSOVA-U17-SUKSESI_ABC-1280x720.jpg
ent ela16:44 | 02/11/2018

Kosova arriti një rezultat historik në eleminatoret e Europianit U17. Pavarësisht mungesës së përvojës, ajo u kualifikua për në raundin tjetër.

Një sukses vërtet i madh. Ekipi përfaqësues i Kosovës U17 arriti një kualifikim historik për në turin e dytë të kampionatit europian të moshave, në raundin elitë.

Skuadra e drejtuar nga trajneri Besnik Kollari, doli më e forta në ndeshjet e luajtura në formë grumbullimi në Qipro, duke dalë e vetme në vendin e parë.

Fitorja vendimtare ishte ndaj Qipros vendase, me golin e shënuar nga Milot Avdyli në minutën e 63-të.

Shqiptarët e Kosovës e nisën me rezultat negativ konkurrimin në grupn, duke humbur 1-2 me Skocinë në 26 tetor, por fituan takimin e dytë kundër Zvicrës, sukses i vendosur nga goli i Zumberit në pjesën e dytë.

Kualifikimi vërtet duhet quajtur i rëndësishëm, pasi kjo ishte vetëm pjesëmarrja e dytë e Kosovës në eleminatoret e Europianit, pra duke pasur mungesë të theksuar përvoje.

Kosova U17 ka në përbërje lojtarë 15 dhe 16-vjeçarë, me një përzierje të atyre që luajnë brenda vendit dhe në Europë.

Tashmë, djemtë e trajnerit Kollari presin shortin për raundin elitë, që do të hidhet në 6 dhjetor në Nion të Zvicrës, ndërsa do të jenë të vendosur në vazon e tretë. /abcnews.al

dogaana.png
G. P.14:31 | 02/11/2018

Gjatë qëndrimit dy ditor të qeverisë në qarkun e Kukësit,kryeministri Edi Rama vizitoi ndërtesën e rikonstruktuar, në pikën e kalimit doganor të Morinës. Nga Janari deri në shtator janë përpunuar hyrje dhe dalje të 4 milionë e gjysëm shtetasve dhe automjete 1 milion e 470 mijë.

Qeveria shqiptare dhe Bashkimi Evropian kanë investuar në infrastrukturë dhe teknologji duke i paraprirë pikës së përbashkët kufitare dhe doganore mes Shqipërisë dhe Kosovës. Operimi në një Pikë të Përbashkët do të  lehtësojë së tepërmi lëvizjen, pasi mjetet do të procesohen në një pikë të vetme, që do të thotë, me thjesht një ndalesë, një kontroll./abcnews.al

ohhh.png
G. P.12:22 | 02/11/2018

Në mbledhjen e Këshillit të Sigurisë së OKB-së në 14 Nëntor do të diskutohet për situatën në veri të Mitrovicës. Futja e Kosovës në axhendën e diskutimeve të OKB-së, sipas Beogradit zyrtar, është bërë e mundur nga Kina që ka presidencën e radhës këtë muaj.

Çështja e Kosovës është përfshirë sërish më axhendën e Këshillit të Sigurisë së Kombeve të Bashkuara. Në mbledhjen e radhës, të caktuar për në 14 Nëntor do të diskutohet rreth situatës në veri të Mitrovicës. Lajmi është konfirmuar për agjencinë serbe të lajmeve Tanjug nga ministri i Jashtëm i Serbisë, Ivica Daçiç.

Ky i fundit shpjegoi se disa vende vazhdojnë të kërkojnë që Kosova të jetë jashtë axhendës së Këshillit  të Sigurisë së OKB-së, pa e nxjerrë në votim këtë çështje, por duke ia lënë vendimin në dorë presidencës së radhës. Këtë muaj presidenca e Këshillit të Sigurisë është e Kinës.

Daçiç falenderoi Kinën për mbështetjen që sipas tij i jep Serbisë në lidhje me Kosovën. Agjencia tjetër serbe e lajmeve, Beta, konfirmoi se Sekretari i Përgjithshëm i OKB-së Guterres ka përgatitur një raport të ri për misionin e UNMIK në Kosovë.

Një nga çështjet që Guterres trajton në raportin e tij është dhe shqetësimi për faktin se dhe pse kanë kaluar muaj nga vrasja e politikanit serb Oliver Ivanoviç, në veri të Kosovës, ende nuk ka asnjë fajtor para drejtësisë./abcnews.al

merkel.jpg
G. P.11:50 | 02/11/2018

Kancelarja gjermane, Angela Merkel i ka dërguar letër kryetarit të LDK-së, Isa Mustafa në të cilën ka shfaqur shqtësimin për debatin rreth ndryshimit të kufijve. Kështu bën të ditur Lidhja Demokratike e Kosovës në një njoftim për media.

Sipas LDK-së, në letër Merkel  e falënderon kryetarin e LDK-së, për shkresën e 28 Shtatorit me të cilën e kishte njoftuar lidhur me qëndrimet e tij rreth dialogut në mes të Serbisë dhe Kosovës, thuhet në komunikatën e LDK-së.

Kancelarja Merkel thekson se “edhe nga këndvështrimi im është shumë me rëndësi që Kosova të vazhdojë dialogun me Serbinë me ndërmjetësim të Bashkimit Evropian dhe të shtyjë përpara normalizimin e marrëdhënieve. Debatin rreth ndryshimit të kufijve edhe unë, sikurse ju po e përcjell me brengosje të madhe”, porosit Kancelarja Merkel, transmeton Klan Kosova.

Sa i përket çështjes së liberalizimit të vizave të adresuar nga shkresa e kreut të LDK-së ajo shkruan: “Unë jam e vetëdijshme sa e rëndësishme është arritja e udhëtimeve pa viza për qëllime turizmi për vendin tuaj. Thelbësore për Gjermaninë në këtë rast është plotësimi pa përjashtim i të gjitha kritereve, para se mund të jepet liberalizimi i vizave. Konsultimet e shteteve anëtare të BE-së rreth kësaj çështjeje janë duke vazhduar”.

Bëhet e ditur se Mustafa e kishte njoftuar kancelaren gjermane si dhe Ministrat e Punëve të Jashtme të të gjitha vendeve të BE-së lidhur me qëndrimet e LDK-së për dialogun ndërmjet Kosovës dhe Serbisë.

Një reflektim në këtë letër Kryetari Mustafa e pranoi para disa ditësh edhe nga Ministri për Punë të jashtme dhe tregti të Hungarisë, z. Peter Szijarto./klankosova.tv/.

VUCIC-PER-SHQIPTARET.mpg_snapshot_00.04-1280x720.jpg
G. P.08:09 | 02/11/2018

Presidenti serb Vuçiç ka reaguar ndaj deklaratës së djeshme të kryetarit të parlamentit të Kosovës Kadri Veseli, sipas të cilit Kosova ka vetëm një armik: Serbinë dhe Vuçiç. Kreu i shtetit serb theksoi se nuk ishte armik i shqiptarëve, por e kuptonte deklaratën e Veselit.

Presidenti i serbisë Aleksandër Vuçiç u shpreh se nuk është armik i shqiptarëve dhe se i kuptonte deklaratat e kryetarit të parlamentit të Kosovës Kadri Veseli. Ky i fundit u shpreh një ditë më parë se Kosova ka vetëm një armik: Serbinë dhe Vuçiç. Gjatë një interviste në televisionin serb, Vuçiç tha se është në të mirën e shqiptarëve që të kutpjnë se ai nuk është armik i tyre. Por përkundrazi ai është armik i secilit që dëshiron të vrasë dhe persekutojë serbët. Për këtë arsye kreu i shtetit serb tha se i kupton deklaratat e Veselit.

Ai madje premtoi se do të monitorojë dhe jashtë Serbisë të gjithë shqiptarët që kërcënojnë sigurinë e dikujt, pasi prioriteti i tij ishte mbrojtja e serbisë dhe popullit të saj. Sipas Vuçiç, disave do u pëlqente të kishin kundërshtarë që munden lehtësisht dhe për këtë arsye ai ndihej i nderuar nga deklarata e Veselit./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono