kosova

70314741_2495614457168949_2078568518323798016_n.jpg
ent ela11:45 | 15/09/2019

Baristi nga Kosova, Jetmir Maliqi, krijon vepra të mirëfillta arti në filxhanët e kafesë, të cilat i shërben për klientët e tij prej 22 vitesh. Vepra e tij më e fundit janë portrete me kokrrat e kafesë. 

Ka 22 vjet që merret më këtë zanat. Kafja e përgatitur nga baristi Jetmir  Maliqi është një art në vete.

Ai njihet ndryshe edhe si “piktori i kafes”, pasi që me shumë mjeshtri përgatit kafe me figura të ndryshme.

Ndonëse konsiderohet si më i miri në Ballkan, Maliqi e ka të pamundur t’i ndjekë të gjitha festivalet e artit të kafesë.

Thotë se nuk ka përkrahje nga sponsorët e kafesë siç ndodh në gjithë botën, dhe për më tepër shpesh ka munguar në këto festivale edhe për shkak të pamundësisë për t’u pajisur me vizë.

Konsideron se profesioni i tij nuk vlerësohet shumë në Kosovë, andaj është edhe duke shqyrtuar ofertat e fundit që i kanë ardhur nga vende të ndryshme të botës.

Së fundmi Maliqi ka kaluar në një tjetër nivel. Ai ka filluar të bëjë portrete me kokrra kafeje.

Maliqi e ka mahnitur edhe futbollistin shqiptar nga Gjilani, Xherdan Shaqiri i cili portretin e tij të punuar nga Maliqi e ka postuar në instagram. /ABC News Albania 24/7

papa-1.jpg
ent ela10:23 | 15/09/2019

Serbia është e lumtur për faktin që Vatikani nuk e njeh pavarësinë e Kosovës. Por analistët serbë shprehen se qëndrimet kanë ndryshuar vitet e fundit. Ekspertët thonë se ndikimi i Papës për Serbinë mund të shtrihet në dy fusha: Kosovë dhe marrëdhëniet me Kroacinë.

Selia e Shenjtë. Ky solemnitet është organizuar për të pritur presidentin serb, Aleksandër Vuçiç, në një takim me Papën. Kur është nisur ka thënë se do ta lusë të mos njohë pavarësinë e Kosovës.

Këtë premtim edhe e ka marrë në takim me krerët e kishës. Mos njohja e Kosovës nga Vatikani është një gjë reputacioni. Por, për presidentin Vuçiç do të ishte shumë e rëndësishme që Papa Françesku ta vizitojë Serbinë.

Stefan Surliç, ligjërues në shkenca politike, thotë se Vatikani nuk e njeh Kosovën, por qëndrimet kanë ndryshuar.

“Vatikani ka ndryshuar politikën ndaj Kosovës bazuar në njerëzit që emëron dhe ata që janë përgjegjës për Kosovën. Por, porositë e Papës kanë qenë për paqe ndërsa njohja nuk ndodh, pasi Vatikani nuk dëshiron të përfshihet pa një marrëveshje mes të Kosovës dhe Serbisë”, tha ai.

Një vizitë është përmendur ndër vite për Papën në Serbi. Por, kisha ortodokse nuk ka qenë shumë e hapur për një gjë të tillë pavarësisht përshëndetjeve që Vuçiç i transmetoi nga patriarku serb Irinej, shkruan tvklan.

Surliç, thotë se ndikimi i Vatikanit është i madh dhe shumë çështje me fqinjët mund të zgjidheshin nëse një dialog do të ndodhte.

“Papa mund të ndihmojë me Kosovën dhe marrëdhëniet me Kroacinë. Por, është edhe një moment politik pasi vizitat e tilla ndiqen nga i gjithë globi dhe kjo është e rëndësishme për Serbinë”, tha ai.

Presidenti Vuçiç ka qenë falënderues për pritjen në selinë e shenjtë, por ka thënë se Vatikani kërkon bisedime mes shqiptarëve dhe serbëve. /klankosova

mogherini.jpg
G. P.10:08 | 14/09/2019

Bashkimi Evropian do të vëzhgojë zgjedhjet e parakohshme parlamentare në Kosovë që mbahen më 6 tetor, duke e cilësuar këtë veprim dëshmi të përkushtimit ndaj proceseve demokratike në Kosovë.

Shefja e politikës së Jashtme të BE-së në largim, Federica Mogherini ka emëruar anëtaren e Parlamentit Evropian, Viola von Cramon-Taubadel, shefe të Misionit Vëzhgues.

Në një njoftim të zyrës së zonjës Mogherini thuhet se “Kosova mbetet përparësi politike për BE-në dhe vendosja e Misionit Vëzhgues të Zgjedhjeve konfirmon angazhimin dhe përkushtimin tonë të vazhdueshëm për të mbështetur procest demokratike në Kosovë”.

Ajo është shprehur e bindur se misioni do të ndihmojë mbajtjen e zgjedhjeve gjithëpërfshirëse, të besueshme dhe transparente.

“Këto zgjedhje zhvillohen në një periudhë të rëndësishme për Kosovën, e cila duhet të lëvizë vendosmërisht për të përparuar në rrugën evropiane, në reforma dhe në normalizimin e marrëdhënieve me Serbinë”, citohet të ketë thënë zonja Mogherini.

Zgjedhjet e reja në Kosovë pasuan dorëheqjen e kryeministrit Ramush Haradinaj më 19 korrik pasi u thirr për t’u marrë në pyetje në Prokurorinë e Posaçme në Hagë e cila trajton pretendimet për krime lufte dhe të pasluftës në Kosovë.

Diplomatët perëndimorë po u bëjnë thirrje partive politike që të krijojnë një mjedis të qetë e të sigurt për zgjedhjet e 6 tetorit dhe të shmangen keqpërdorimet e votës dhe frikësimet e kandidatëve dhe votuesve serbë të Kosovës që nuk ishin të rreshtuar me Listën Serbe në zgjedhjet e kaluara.

Diplomatët po ashtu presin formimin e shpejtë të një qeverie të re që do të ishte e gatshme të mënjanojë pengesat për vazhdimin e shpejtë të bisedimeve për normalizimin e marrëdhënieve me Serbinë./VOA

kos.jpg
G. P.14:49 | 13/09/2019

Dhe në këto zgjedhje të parakohshme, partitë politike në Kosovë kanë vetëm 30% të kandidateve femra në listat e tyre. Një gjë e tillë është kritikuar nga shoqëria civile e cila i akuzon për mosrespektim të kuotave.

Ndonëse shoqëria civile kishte bërë thirrje për përfaqësim të barabartë të grave në listat zgjedhore për zgjedhjet e 6 Tetorit në Kosovë kjo nuk është marrë parasysh nga partitë politike.

Në listat zgjedhore, partitë politike kanë futur vetëm 30% të grave sa për të përmbushur kuotën ligjore. Blerta Aliu nga koalicioni i organizatave jo qeveritare “Demokracia në Veprim”, thotë se kufizimi prej 30 për qind është rrjedhojë e mos harmonizimit të ligjeve.

Sipas Luljeta Demollit nga Qendra Kosovare për Studime Gjinore, në Kosovë mungon vullneti i partive politike për të përfshirë më shumë gra në lista zgjedhore. Ajo gjithashtu ka kritikuar partitë politike që në fushata nuk u japin hapësirë grave që të shpalosin programin e tyre.

Numri i kandidatëve të certifikuar nga ana e Komisionit Qendror të Zgjedhjeve për pjesëmarrje në këto zgjedhje është 1070, prej tyre 343 janë kandidate femra ndërsa 727 meshkuj.

E vetmja femër që i prin listave zgjedhore të një partie është Vjosa Osmani nga LDK-ja e cila është edhe kandidate për kryeministre, por që edhe kjo parti ka vetëm 30% të femrave në listën e saj zgjedhore./ABC News Albania 24/7

RINGJALLJA-E-ZANATEVE-TE-HARRUARA-ABC-M1-T1.mpg_snapshot_00.12-1280x720.jpg
G. P.17:30 | 12/09/2019

Nëntë artizane nga Shqipëria dhe Prizreni janë bërë bashkë në Kalanë e Tiranës, për të promovuar traditën e punimeve me dorë. Iniciativa synon ringjalljen e zanateve të harruara, duke i përshtatur me kohët moderne, si në materiale ashtu edhe në modele.

Kalaja e Tiranës ka mbledhur në një çati mjeshtritë e harruara me qëllim promovimin e traditës.

Artizane nga Shqipëria dhe Prizreni synojnë që të ringjallin traditën në përshtatje me kohët modern. Venera Rada motivet e kostumeve tradicionale i ka shndërruar në aksesorë të ndryshme , si çanta, shalla apo varëse.

Zejxhan Celina prej 30 vitesh merret me punimin e filigramit, pranon se modifikime ka, për t’iu përshtat tregut dhe kohëve moderne, punimet e filigramit tashmë ia aplikon edhe në çelik të modifikuar, për t’iu përshtatur kërkesave.

Punimet e kashtës duket se e kanë ruajtur më mirë traditën, vështirësia qëndron tek sigurimi i materialit. Mallrat kineze dhe turke, sipas artizanes e kanë dëmtuar shumë këta zanat.

Prodhimtaria e hershme e qelesheve, llullave, punimeve në gur-alabastër e materialeve të çmuar, argjent si dhe në bakër,  tashmë  realizohen duke u bazuar në traditë për sa i përket stileve dhe dekorimeve, ndërsa materialet përshtaten me kohën./ABC News Albania 24/7

haradinaj.jpg
G. P.15:18 | 12/09/2019

Kosova ka anuluar pjesëmarrjen e planifikuar në Samitin i Pragës, mes katër shteteve të Vishegradit dhe shteteve të Ballkanit Perëndimor. Shkak për këtë u bënë deklaratat e presidentit çek Zeman kundër njohjes së pavarësisë së vendit.

Kryeministri në detyrë Ramush Haradinaj nuk do të marrë pjesë në samitin e Pragës. Në këtë samit marrin pjesë katër shtete të Vishengradit dhe shtete e Ballkanit Perëndimor. Haradinaj anulimin për pjesëmarrje në këtë samit e ka arsyetuar me procesin zgjedhor në Kosovë.

“Kosova ka hyrë në një cikël të zgjedhjeve të parakohshme dhe angazhimet në këtë kohë të rëndësishme për vendin, kanë pamundësuar pjesëmarrjen time në punimet e Samitit. Përmes kësaj letre i kam shprehur falenderimet e sinqerta Kryeministrit të Çekisë,  Andrej Babis, për ftesën për të marrë pjesë në Samit, dhe çmojmë lart përkushtimin e Çekisë ndaj Ballkanit Perëndimor dhe perspektivës evropiane të rajonit. Si Kosovë do të vazhdojmë të jemi kontribues serioz për paqe dhe stabilitet në rajon dhe ndaj dialogut me Serbinë, i cili do të përfundoj me njohje reciproke, në kufijtë ekzistues”, ka shkruar Haradinaj.

Dje Agjencia Çeke e Lajmeve, duke iu referuar burimeve të saj diplomatike, ka shkruar se refuzimi i Kosovës për të marrë pjesë në takimin e së enjtes, vjen si kundërpërgjigje ndaj deklaratave të presidentit çek, Milosh Zeman.

Zeman javën e kaluar ka deklaruar se dëshiron t’i diskutojë mundësitë kushtetuese që Republika Çeke të tërheqë njohjen e pavarësisë së Kosovës.

Të njëjtën deklaratë Zeman e ka përsëritur edhe dje gjatë qëndrimit në Beograd ku tha se brenda një muaji do ta rishikojnë mundësinë e tërheqjes së njohjes së Pavarësisë së Kosovës./ABC News Albania 24/7

Vucic-serv.jpg
G. P.12:03 | 12/09/2019

Presidenti i Serbisë Aleksandër Vuçiç ka bërë të qartë se në takimin e të shtunës me Papa Françeskun në Vatikan do i kërkojë atij që të mos e njohë pavarësinë e Kosovës.

Aleksandër Vuçiç, kreu i shtetit serb, ndodhet në Romë ku të shtunën do të nisë një vizitë zyrtare në Selinë e Shenjtë, e do të takohet me Papa Françeskun dhe Kardinalin Pietro Parolino. Pak para nisjes duke iu drejtuar gazetarëve ai u shpreh se do i lutej Papa Françeskut që të mos e njohë pavarësinë e Kosovës.

Kohët e fundit Beogradi është kritikuar për fushatën që po ndjek për tërheqjen e njohjeve që i janë bërë shtetit të Kosovës, si dhe presioneve që të mos ketë njohje të tjera. Këto përpjekje nuk kanë ndalur, por madje është bërë dhe kërkesë e vazhdueshme që Kosova të mos pranohet në Interpol./ABC News Albania 24/7

ZEMAN-VUCIC-TAKIMI.mpg_snapshot_00.30-1280x720.jpg
ent ela17:30 | 11/09/2019

Çekia do shqyrtojë brenda një muaji, tërheqjen e njohjes për pavarësinë e Kosovës. Paralajmërimi është bërë në Beograd nga presidenti çek Millosh Zeman, pas takimin me homologun serb Aleksandër Vuçiç.

Avioni i presidentit të Çekisë, Millosh Zeman, arrinë në kryeqytetin serb. Pritje e veçantë i është rezervuar mikut nga Praga. Ende pa zbritur mirë ka konfirmuar dyshimet e një pjesë të politikës çeke për pavarësinë e Kosovës. Fjalët e tij të para në aeroport e tregojnë këtë.

“Është kënaqësi të jem këtu pasi e dua popullin serb dhe Serbinë, nuk më pëlqen Kosova”.

Presidenti çek, ndonëse nuk ka shumë rol ekzekutiv, kur ka arritur në pallatin e Serbisë ka thënë se brenda një muaji do ta shtrojë çështjen nëse mund të tërhiqet njohja e pavarësisë së Kosovës. Pas takimeve me homologun e tij, Aleksandër Vuçiç, Zeman ka hedhur kritika të ashpra në drejtim të Prishtinës.

“Unë nuk jam diktator, por do të nxjerrë para këshillit dhe do të pyesë nëse është e mundur që të tërhiqet njohja. Ministri i Mbrojtjes Metnar ka deklaruar se njohja e Kosovës ka qenë gabim. Besoj se ai do më mbështesë”.

Ai është shprehur kundër integrimit të Kosovës dhe ka etiketuar liderët e saj si kriminel.

 “Gjykata e Hagës para ca kohësh ka publikuar lajmin ku ka tërhequr vërjetjen lidhur me krimet e luftës të përfaqësuesve të Kosovës. Për këtë ka dhënë dorëheqje edhe Kryeministri. Mendim personal, por shteti të cilin e udhëheqin kriminelët e luftës nuk do të duhej të ishte në familjen e shteteve evropiane”.

Presidenti serb Vuçiç e ka falëndëruar për qëndrimin e tij ndaj Kosovës.

Zeman është i njohur në Çeki si politikan që ka qenë kundër komunizmit, por edhe si autor të ndasisë në shoqëri dhe si islamofob. /ABC News Albania 24/7

 

 

kosova-ndeshje-1280x720.jpg
G. P.17:10 | 11/09/2019

Kosova mbrëmë ka pësuar humbje 5:3 në ndeshjen ndaj Anglisë. Megjithatë kjo ndeshje është cilësuar historike dhe lojtarët e Kosovës kanë marrë lëvdata për paraqitjen e mirë kundër Anglisë.

Djemtë e Kosovës e nisën furishëm ndeshjen e mbrëmshme ndaj Anglisë. Që në sekondën e 34-t Valon Berisha shënoi gol, mirëpo Anglia u rikthye furishëm shënuar 4 gola që në pjesën e parë si dhe një autogol për të përfunduar pjesa e parë me rezultat 5 me 1.

Në pjesën e dytë Kosova shënoi dy gola ndaj Anglisë ndërsa nuk e pranoi asnjë. 5 me 3 për Anglinë ishte rezultati i ndeshjes. Trajneri kosovar i futbollit Bylbyl Sokoli thotë se Kosova është prezantuar denjësisht në ndeshjen e mbrëmshme.

“Një lojë pa respekt të madh ndaj kundërshtarit. Një presing të madh të cilët e kanë prit anglezët, përkundër asaj që të gjithë ekipet e tjera kanë bërë ndaj Anglisë. Janë mbrojtur dhe të gjithë ekipet kanë pësuar 4 ose 5 gola. Kosova ka vendosur të mbrohet larg portës”, tha ai.

Me tre golat e shënuar ndaj anglezëve si mysafirë, sipas gazetarit të sportit Florim Maliqaj, “Dardanët” hynë në listën e pak ekipeve që kanë arritur të shënojnë më shumë se tri gola ndaj kësaj kombëtareje.

“E kam pritur një humbje, por nuk kam pritur një paraqitje kaq sulmuese, kaq agresive të Kosovës. Në vitin 2007 ka qenë Kroacia që i ka shënuar 3 gola skuadrës angleze”, tha ai.

Sot nuk ka munguar as urimi i ambasadës amerikane të Kosovës rreth kësaj ndeshje sipas së cilës Kosova ka dëshmuar se është e gatshme për liga të mëdha. Humbja nga Anglia e ka zbritur Kosovën në pozitën e tretë të grupit, pasi që Çekia ka fituar ndaj Malit të Zi. Megjithatë gjasat e Kosovës për t’u kualifikuar në Euro 2020 janë të mëdha.

Kosova deri kishte 15 ndeshje pa asnjë humbje. Ndeshjen e radhës “Dardanët” do ta ketë me Malin e Zi më 14 tetor këtu në Prishtinë, një muaj më pas me Çekinë në Pragë dhe menjëherë pas tri ditësh me Anglinë në Prishtinë./ABC News Albania 24/7

czezh.jpg
G. P.14:58 | 11/09/2019

Presidenti i Republikës së Çekisë, Zeman, ndodhet për një vizitë në Beograd ku është pritur nga presidenti i Serbisë, Aleksandër Vuçiç. Një ditë më parë ai u shpreh se nuk i pëlqente Kosova dhe sipas mediave serbe, ai ka shtuar se njerëzit e luftës nuk duhet të kenë vend në institucionet demokratike.

Në një deklaratë të përbashkët për shtyp me homologun serb Vuçiç, Zeman paralajmëroi se shteti i tij do të shqyrtojë tërheqjen e njohjes për pavarësinë e Republikës së Kosovës brenda një muaji.

Presidenti Zeman, roli i të cilit në Çeki është vetëm ceremonial, e ka pranuar se për një gjë të tillë duhet të vendosin institucionet tjera të shtetit, duke shtuar se nuk mund të imponojë qëndrimin e tij.

Zeman tha se shpreson që të marrë përkrahjen e Ministrit të Mbrojtjes, Lubomir Mentar, i cili kishte deklaruar se ishte një gabim diplomatik, vendimi për njohjen e pavarësisë së Kosovës./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono