korrupsion

taksa.jpg
G. P.11:55 | 19/10/2019

Libani është përfshirë nga protestat pas lajmit për vendosjen e një takse për përdorimin e WhatsAap. Me mijëra protestues qëndrojnë 24 orë në shesh duke bllokuar rrugët kryesore dhe duke i vënë flakën automjeteve.

Ishte pika që derdhi gotën, ideja për vendosjen e një takse për WhatsAap. Mijëra persona u mblodhën në rrugët e Libanit për të kërkuar rrëzimin e regjimit. Në shumë qytete të vendit manifestuesit kanë shkaktuar dhe dëme materiale, përfshirë kryeqytetin Bejrut.

Kryeministri Sad Hariri gjatë një deklarate drejtuar popullit nëpërmjet televizionit kërkoi tri ditë kohë për të kuptuar se çfarë duhej të bënte me kolegët e tij, ministrat e një qeverie të unitetit kombëtar.

Protestat në qytetet e ndryshme të vendit u zhvilluan njëkohësisht për të kërkuar fundin e sistemit aktual politik. Shkaku i parë ishte publikimi i lajmit për një taksë së re, këtë herë për përdorimin e WhatsAap. Me mijëra persona kryesisht nga zonat e varfra të Bejrutit u mblodhën në qendër të kryeqytetit me parullën: Populli kërkon rrëzimin e regjimit.

Qeveria aktuale përfshin pothuajse të gjitha partitë në vend, por manifestuesit janë treguar të prerë duke kërkuar dorëheqjen e të gjithëve në mënyrë absolute. Ata premtojnë se do të ketë protesta deri sa një gjë e tillë të ndodhë.

Në Bejrut protestuesit qëndrojnë 24 orë në rrugë duke bllokuar një pjesë të madhe të hyrje daljeve të qytetit, si dhe duke i vënë flakën automjeteve dhe kazanëve të mbeturinave./ABC News Albania

1547116411_rolandhysi.jpg
G. P.14:27 | 26/09/2019

Prokuroria kërkon dënimin me 4 vite burg për Gjyqtarin e Fierit, Roland Hysi, i cili u denoncua në emisionin “Stop”, duke i kërkuar favore seksuale dhe rryshfet një nëne në këmbim të marrjes së kujdestarisë së fëmijës.

Prokuroria për Krime të Rënda kërkoi 4 vite burg për gjyqtarin e Fierit, Roland Hysin I cili akuzohet për korrupion pasiv. Hysi u denoncua nga emisioni inestigativ “Stop” për marrje rryshfeti dhe favore seksuale ndaj një nëne në këmbim të dhënies së kujdestarisë së vajzës. Prokurori Klodian Brahoi kërkoi gjithashtu dënim plotësues për moslejim të ushtrimit të funksioneve publike 3 vite për gjyqtarin. Roland Hysi do të përfitojë 1/3 ulje të dënimit për shkak të gjykimit të shkurtuar. Gjhyqtari mungonte në seancë dhe u përfaqësua nga avokati i tij Ardi Leka.

Bashkë me gjyqtarin Hysi është procedim edhe psikologia Elona Mëcani, e akuzuar për ushtrim ndikimi të paligjshëm. Cështja për psikologen është veccuar dhe hetimet po kryhen nga Prokuroria e Fierit, për hetime. Gjykata e krimeve të rënda i ka caktuar Hysit masën e sigurisë arrest me burg, ndërsa Psikologia Meçani është në masën arrest shtëpie. Gjatë seancës paraprake, Gjyqtari Hysi ka pretenduar se video e përgjimit të transmetuar në emisonin “Stop” nuk mund të shërbejë si provë për akuzat e ngritura ndaj tij. Në video, gjyqtari Hysi kërkonte favore seksuale ndaj nënës që kërkonte kujdestarinë e vajzës së saj. Në seancën e radhës pritet që të jepet dhe vendimi për Gjyqtarin e Fierit Roland Hysi. /abcnews.al

us.jpg
G. P.15:30 | 24/09/2019

Ambasada e Shteteve të Bashkuara të Amerikës paralajmëron se shumë shpejt aktivitetet korruptive të zyrtarëve do të ndalen. Kjo do të ndodhë nëpërmjet disa ndryshimeve, thotë zëvendës shefi i misionit në detyrë pranë kësaj ambasade, pa zbuluar detaje se për çfarë bëhet fjalë konkretisht.

Ditë të zeza do të vijnë për zyrtarët e koruptuar. Mesazhin ua dërgon ambasada e Shteteve të Bashkuara të Amerikës nëpërmjet zëvendës shefit të misionit në detyrë Dan Koski.

“…jo të gjithë ndajnë qëllimet tona për të përmirësuar zbatimin e ligjit dhe qeverisjen e mirë në Shqipëri. Për zyrtarët e korruptuar, ndryshimi që ne po sjellim është një lajm i keq. Është si rëra në ingranazhe, e cila shumë shpejt do bëjë që aktivitetet e tyre korruptive të ndalen. Ne e dimë se ata do të luftojnë dhe do të përpiqen në çdo moment të bllokojnë përpjekjet tuaja për të çuar përpara këto qëllime të rëndësishme. Mos u stepni. Mos u shkurajoni. Vazhdoni të qëndroni në këmbë dhe të luftoni për reformat që do të forcojnë shoqërinë shqiptare për ju dhe brezat e ardhshëm. Ju besoni që në horizont është një e ardhme më e ndritur për Shqipërinë. Të njëjtën gjë mendojmë edhe ne, dhe do ta vijojmë këtë rrugëtim së bashku me ju.”

Nga pas i shkon edhe numri dy i qeverisë Erjon Braçe i cili gjatë aktivitetit mbi Projektin për Planifikimin dhe Qeverinë Vendore të USAID/Albania shpreh bindjen se çdo reformë pa Drejtësinë e pavarur, të barabartë, funksionale është e cungët, vë në rrezik rezultatet e saj.

“Presionet, sulmet e politikanëve të përjetshëm e me pushtet po të tillë, të paprekshëm, biznesmenëve me ta, të fuqizuar prej tyre, bërë edhe këta të paprekshëm, kriminelëve të rëndësishëm për shkak të organizatave të tyre e për shkak të fuqisë ekonomike, lidhjeve me politikën, nuk duhet të ndryshojnë reformën, nuk duhet të ndalin vetingun, nuk duhet të pengojnë ndërtimin e institucioneve të drejtësisë së re, profesionale, të pavarura, të pastra, si një garanci për qytetarët, organizatat politike, organizatat e biznesit, si garanci që institucionet do udhëhiqen veç nga ligji, nderi e dinjiteti”.

Të gjitha këto duhet të përmbushen konkretisht dhe me shembuj të qartë nga politika e pistë, biznesi klientelist e krimi i organizuar, thotë Erion Braçe, sipas të cilit pritshmëritë e shqiptarëve të zakonshëm të dhunuar prej tyre kërkojnë drejtësi të barabartë për të pushtetshmit./ABC News Albania 24/7

KRONIKE-GJOKA-KONSTRUKSION-ABC-M4-T2.mpg_snapshot_00.29-1280x720.jpg
ent ela16:34 | 17/09/2019

Drejtoresha e Autoritetit Rrugore shqiptare Sonila Qato është paditur në prokurori nga Kompania “Gjoka Konstruksion”. Kjo firme ndërtimi pretendon se është përjashtuar nga tenderimi i tunelit të rrugës Kardhiq-Delvinë, në mënyrë të padrejtë.

Kompania “Gjoka Konstruksion” ka dorëzuar në Prokurorinë për Krime të Rënda një kallëzim penal kundër drejtoreshës së Autoritetit Rrugor Shqiptarë Sonila Qato. Padia u dorëzua nga Avokati i firmës Marash Ibraj, i cili pretendon se ARRSH-ja e ka pezulluar “Gjoka Konstruksion”nga gara për ndërtimin e tunelit të rrugës Kardhiq-Delvinë, në mënyrë të padrejtë.

“ARRSH ka favorizuar një kompani që ka ofruar 4.2 milionë më tepër”.

Kompania e ndërtimit pretendon se pasi ka marrë dijeni për skualifikimin nga kjo garë e ka ankimuar vendimin në  Komisionin e Prokurimit Publik. Sipas Avokatit të “Gjoka Konstraksion” komisioni ka marrë një vendim në favore të tyre.

Rreth 5 ditë më parë Autoriteti Rrugorë Shqiptar vendosi ta pezullonte “Gjoka Konstruksion” nga ky tenderim, pasi sipas tyre “Dokumentacioni i paraqitur nga operatori Gjoka Konstruksion sha për punë të ngjashme paraqet të dhëna të rreme e të pasakta, që nuk përputhen me realitetin e punëve të kryera në objekt”. /ABC News Albania 24/7

 

kosovaaa.jpg
G. P.15:59 | 09/09/2019

Në prag të zgjedhjeve të parakohshme në Kosovë, jo të gjitha partitë i kanë shkuar deri në fund premtimit se nuk do të fusin në lista për deputetë kandidatët, të cilët kanë probleme me ligjin.

Përkundër thirrjeve që u janë bërë partive politike që në zgjedhjet e 6 Tetorit të mos kandidojnë individë me aktakuza, kjo nuk është respektuar nga disa parti politike. Sipas Institutit të Kosovës për Drejtësi koalicioni AAK-PSD i prin listës me 13 kandidat me aktakuza, prej tyre pesë të dyshuar për vepra korruptive.

Me aktakuza apo dënime, por jo për vepra korruptive LVV- ja ka 6 kandidatë në listën e saj zgjedhore, PDK-ja 4 dhe koalicioni Nisma-AKR-PD, 2.  Ndërsa Lidhja Demokratike e Kosovës kishte futur një kandidat me aktakuzë për vepra korruptive, por që ka thënë se do ta heqë menjëherë pas raportimit në media.

Ndërkohë Instituti Demokratik i Kosovës ka lançuar fushatën ku kërkohet nga qytetarët që të mos i votojnë kandidatët me aktakuza. Instituti i Kosovës për Drejtësi ka prezantuar një raport krahasues me kandidatët me aktakuza në tri palë zgjedhjet e fundit nacionale.

Sipas raportit, në listat e kandidatëve për deputetë, në zgjedhjet e vitit 2014 ka pasur 15 persona me aktakuza, 12 prej të cilëve ishin zgjedhur deputetë. Ndërsa në zgjedhjet e 2017-s, në listat e partive kanë qenë 27 kandidatë me aktakuza, prej të cilëve 21 ishin bërë deputetë.

Edhe shtetet anëtare të Quint-it ditë më parë u kanë bërë thirrje qytetarëve të Kosovës që të mos i votojnë personat e lidhur me krimin dhe për të cilët ka dyshime për afera korrupsioni.

Lista e PDK-se me asnjë kandidat me aktakuzë apo të dënuar për korrupsion.

Përjashtimisht, lista ka një të dënuar për krime lufte, një të dënuar për vepra penale kundër sigurisë në trafik dhe dy të akuzuar për vepra penale që nuk hyjnë në kuadër të veprave penale korruptive./ABC News Albania 24/7

ambasada-amerikane-1280x702.jpg
G. P.10:08 | 27/08/2019

Byroja Kombëtare e Hetimit që do të ngrihet së shpejti në Shqipëri është e ngjashme me FBI-në amerikane e cila heton krime të nivelit të lartë në Shtetet e Bashkuara. Shpjegimin ambasada amerikane në Tiranë e dha në rrjetet sociale nëpërmjet një videoje informuese.

Deri sa të ngrihen institucionet e pavarura të drejtësisë, ambasada e Shteteve të Bashkuara të Amerikës ka marrë përsipër të sqarojë rolin e tyre kur të bëhen funksionale. Videoja informuese e radhës është Byroja Kombëtare e Hetimit.

Byroja Kombëtare e Hetimit është njësia hetimore e SPAK. SPAK-u është institucion i ri, i pavarur dhe i pa politizuar kushtetues, detyra e të cilit është të ndjek penalisht korrupsionin, krimin e organizuar dhe krimet e kryera nga zyrtarë të lartë.

“Në shumë mënyra, BKH është e ngjashme me FBI-në Amerikanë e cila heton krimet të nivelit të lartë në Shtetet e Bashkuara. Në fakt, hetuesit e BKH-së do të trajnohen në akademinë e FBI-së në Virxhinia. Ligji mbi SPAK-un po ashtu kërkon që një komision ndërkombëtar të mbikëqyr trajnimin dhe përgatitjet e hetuesve të BKH”.

BKH përbëhet nga një drejtor dhe një ekip hetuesish të cilët duhet të përmbushin standarde të forta të ngjashme me ato të FBI-së. Kryeprokurori i Posaçëm i SPAK dhe dy prokurorë të posaçme  tjerë do zgjedhin drejtorin e BKH-së.

Ky drejtor do drejtojë ekipet e hetuesve pasi të jenë përzgjedhur për këtë organ të rëndësishëm kombëtar, drejtorit dhe drejtuesve të BKH-së do t’u monitorohen llogaritë bankare dhe për tu siguruar që kryejnë detyrën me integritet dhe paanshmëri.

“Pse është e rëndësishme BKH? Në të kaluarën, cilido me para apo me pushtet mund të ndikonte sistemin e gjykatave në favor të tyre. Tani kushtetuta i jep SPAK-ut fuqinë dhe pavarësinë për të goditur korrupsionin e niveleve të larta. Me t’u ngritur SPAK dhe BKH do të jenë në gjendje të hetojnë korrupsioni në nivele të larta dhe Prokurorët e Posaçëm mund t’i çojnë këto çështje të rëndësishme në gjykatë”.

Për ambasadën e Shteteve të Bashkuara të Amerikës zyrtarët e korruptuar dhe bosët e krimit të organizuar do të japin llogari dhe do të përballen me drejtësinë. Prokurorët e Posaçëm dhe BKH, janë këtu për tú siguruar që askush të mos jetë mbi ligjin.

/ABC News Albania 24/7

lulzim-basha.jpg
G. P.11:34 | 18/08/2019

Kryetari i Partisë Demokratike, Lulzim Basha ka akuzuar Edi Ramën si kryeministrin më të korruptuar në Ballkan. Përmes një postimi në rrjetet sociale, Basha iu referua raporteve të ndërkombëtare kur akuzoi kreun e qeverisë për vjedhje me ata që kryedemokrati i cilësoi si një bandë oligarkësh.

“Raportet ndërkombëtare tregojnë me gisht Edi Ramën si kryeministrin më të korruptuar të Ballkanit. Ai vjedh Shqipërinë me një bandë oligarkësh grabitqarë dhe pastron paratë e drogës dhe krimit. Për të mbrojtur bandën e tij, Edi Rama përzuri investitorët e huaj dhe i zëvendësoi me klientët e tij”, shprehet Basha duke shtuar se të gjitha investimet perëndimore po largohen nga Shqipëria.

Kreu i opozitës kujton se pa investime të huaja nuk ka zhvillim ekonomik, nuk ka vende të reja pune, nuk ka mirëqenie./ABC News Albania 24/7

vangjush-dako123.jpg
G. P.14:02 | 30/07/2019

Dyshohet se është i përfshirë në afera të mëdha korruptive. Vangjush Dakon dhe familjen e tij, Departamenti i Shtetit në Amerikë i ka shpallur ata persona të padëshiruar. Lajmi bëhet i ditur nga “Zëri i Amerikës” sipas të cilit, vendimi është marrë nga Sekretari i Shtetit. Dako është zyrtari i tretë që është shpallur “non grata” së bashku me Adriatik Llallën dhe Tom Doshin.

Departamenti i Shtetit ndalon hyrjen në Shtetet e Bashkuara të ish-Kryetarit të Bashkisë së Durrësit Vangjush Dako dhe anëtarëve të familjes së tij. Lajmi bëhet i ditur nga “Zëri i Amerikës”, sipas të cilit, Vendimi, i marrë nga Sekretari i Shtetit, ku thekson se ish-kryetari Dako është përfshirë në raste madhore korrupsioni.

Në bazë të ligjeve amerikane, kur Sekretari i Shtetit, ka informacione të besueshme se një zyrtar i huaj është përfshirë në raste madhore korrupsioni, ose shkelje të të drejtave të njeriut, atij dhe familjes së tij i ndalohet hyrja në Amerikë. Ligji po ashtu i jep të drejtë Sekretarit të Shtetit që vendimin ta bëjë publik, ose t’ia bëjë atë privatisht zyrtarit në fjalë.

Ky ligj i ka fillesat e tij në 2008 kur Kongresi Amerikan, synoi të identifikojë dhe të shpallë të papërshtatshëm për të hyrë në Amerikë zyrtarë të huaj të përfshirë në afera korruptive për të shfrytëzuar burimet natyrore të vendeve të tyre. Në bazë të njoftimit të kësja të Marte, raporton “Zëri i Amerikës”, Vangjush Dakos, bashkëshortes së tij Alba Dako, djalit Xhulio Dako dhe vajzës Kejsi Dako, nuk lejohen të hyjnë në Amerikë. “Vendimi i 30 korrikut, – thuhet në njoftimin e Departamentit të Shtetit, – është një sinjal i fortë se Shtetet e Bashkuara janë të angazhuara për të luftuar korrupsionin në vende të tjera të botës”.

Dako, bëhet kështu zyrtari i tretë nga Shqipëria së bashku me Adriatik Llallën dhe Tom Doshin që ndalohen të hyjnë në Shtetet e Bashkuara. Ndërkohë që nga 2017 deri më sot janë rreth 170 zyrtarë dhe ish zyrtarë shqiptarë të cilëve ambasada e SHBA-së në Tiranë u ka refuzuar vizat. Emrat e këtyre personave nuk  janë bërë publikë.

/ABC News Albania 24/7

fatos-klosii.jpg
G. P.21:19 | 09/07/2019

Ish-kreu i SHIK-ut, Fatos Klosi, ishte i ftuar këtë të martë në emisionin “Provokacija”. Ai u pyet se çfarë ndodh kur drejtuesi i shërbimit informativ ka në dorë informacione për afera të kryeministrit, duke qenë se jep llogari tek ky i fundit. Klosi tha se ka pasur informacione të tilla dhe kjo është një situatë e paparashikuar nga ligjet e vendit.

Mustafa Nano: Çfarë ndodh nëse strukturave të SHIK-ut i bie në dorë një informacion shumë i rëndësishëm, i cili flet për afera korruptive të kryeministrit. Çfarë ndodh?

Fatos Klosi: Po. Më kanë rënë mua. Ça do ndodhë? Kam ngelur unë në këtë rrethanë.

Mustafa Nano: Ti në këtë rrethanë si kryetar i SHIK-ut nuk e informon kryeministrin?

Fatos Klosi: Jo, unë nuk e kam informuar. Por i kam pyetur ata që e sollën informacionin, kanë qenë amerikanët.

Mustafa Nano: Fjala ishte për kë kryeministër?

Fatos Klosi: Për një kryeministër.

Mustafa Nano: Po ju një kryeministër keni pasur.

Fatos Klosi: Tre, kështu që e kam më kollaj për t’u fshehur. Ia çova presidentit. Dhe presidenti tha “po unë ça ta bëj këtë”, fjalë për fjalë. Është një rast që nuk është parashikuar gjëkundi në ligjet tona. Në qoftë se mendohet se është i korruptuar kryeministri është skandal, nuk shtrohet problemi ça bën SHIK-u. Kemi ardhur në një vend ku shteti nuk i ka parashikuar këto gjëra./abcnews.al

1547116411_rolandhysi.jpg
G. P.15:30 | 04/07/2019

Roland Hysi, gjyqtari i Fierit i akuzuar për korrupsion do të vijojë të qëndrojë në paraburgim. Gjykata për Krimet e Rënda refuzoi kërkesën e tij për ndryshim të masës së sigurisë “arrest në burg” në një masë më të butë.

Hysi qëndron në qeli prej janarit të këtij viti sepse u arrestuar pas publikimit të një video-përgjimi në një nga programet investigative ku shfaqej duke i kërkuar favore seksuale një vajze në këmbim do t’i jepte kujdestarinë e fëmijës.

Së bashku me gjyqtarin Hysi u ndalua edhe psikologia Elona Meçani, e cila po ashtu ishte e përfshirë nbë afera korruptive. Sipas Prokurorisë për Krime të Rënda Meçani dyshohet se bënte rolin e sekseres, ndërsa në videon e bërë publike, gjyqtari Hysi, shfaqet duket marrë 500 euro.

Gjyqtari dhe psikologia akuzohen për “Korrupsion pasiv i gjyqtarëve dhe prokurorëve”, si dhe për “Ushtrim i ndikimit të paligjshëm të funksionarëve”./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono