Koreja e Veriut

TRUMP-KTHIMI-1280x720.jpg
ent ela17:50 | 13/06/2018

I sapokthyer në Shtetet e Bashkuara pas samitit të Singaporit, presidenti amerikan Donald Trump ka nxituar të qetësojë qytetarët amerikanë, duke deklaruar se Korea e Veriut nuk është më një kërcënim bërthamor.

Korea e Veriut nuk përbën më një kërcënim bërthamor dhe nuk është më problemi më i madh e më i rrezikshëm për Shtetet e Bashkuara. Kështu ka deklaruar të mërkurën presidenti amerikan Donald Trump, i sapokthyer në Uashington nga Singapori, ku u takua me liderin koreano-verior Kim Jong Un. “Të gjithë tani mund të ndihen më të sigurtë se në ditën kur unë mora detyrën. Nuk ka më kërcënim bërthamor nga Korea e Veriut”, ka thënë Trump. Ai ka theksuar se, takimi me Kim ishte një eksperiencë pozitive dhe interesante dhe ka shtuar se Korea ka një potencial të madh përpara saj. Takimi i së martës ishte i pari mes një presidenti amerikan në detyrë dhe një lideri koreano-verior. Ai erdhi pas një seri testesh bërthamore të kryera nga regjimi i Penianit dhe një seri fyerjesh e ofendimesh mes Trump dhe Kim, që rritën frikën për luftë. Pas takimit, në një konferencë shtypi Trump tha se do të lehtësojë sanksionet ndaj Veriut, por kjo sipas tij nuk do të ndodhë menjëherë. Mediat koreane ndërkohë e promovuan samitin si një event të suksesshëm, duke nënvizuar se presidenti amerikan ka në plan të ndërpresë stërvitjet ushtarake me Jugun fqinj. Gjithashtu, Kim dhe Trump ftuan njëri-tjetrin për vizitë në vendet përkatëse, ftesa që u pranuan me kënaqësi, shkruan agjencia koreano-veriore e lajmeve KCNA. /abcnewsw.al

trump-dhe-kim.jpg
gra moz13:10 | 12/06/2018

Takimi historik mes Donald Trump dhe Kim Jong-un vjen pas një marrëdhënieje mjaft të tensionuar dhe kërcënimesh të dyanshme mes dy vendeve dhe konkretisht mes dy liderëve.

Me të drejtë mund të konsiderohet si zhvillimi më i rëndësishëm i këtij shekulli, pasi aty u hodhën hapat e para të vendosjes së paqes në gadishullin korean dhe në botë. Por si arritën deri këtu presidenti amerikan Donald Trump dhe lideri i Koresë së Veriut Kim Jong-un? Asnjë president në detyrë i Shteteve të Bashkuara nuk ishte takuar ndonjëherë më një lider koreanoverior. Ata që shkruan historinë quhen Donald Trump dhe Kim Jong-un.

Më herët vetëm Jimmy Carter, vite pas largimit nga Shtëpia e Bardhë udhëtoi për në Phenian: ishte viti 1994 dhe Carter shkoi për të diskutuar me Kim Il Sung organizimin e një takimi me Bill Clinton edhe pse administrata e këtij të fundit ishte kundër. Pas largimit nga Shtëpia e Bardhë edhe Clinton udhëtoi për në Phenian si qytetar amerikan dhe u takua me Kim Jong-il, ku kërkoi lirimin e amerikanëve në burgjet e Koresë komuniste.

Ka pasur shumë tentativa zyrtare dhe të fshehta të amerikanëve për të angazhuar koreanoveriorët, të frymëzuar nga “durimi strategjik” dhe nga objektivi për të frenuar dinastinë Kim në rrugën drejt armëve bërthamore. Kim Jong-un ka treguar se posedon si armën nukleare ashtu edhe reaketat ndërkontinentale të afta për të goditur në distanca të largëta. Për këtë, Trump e ka cilësuar të padobishëm “durimin strategjik” të paraardhësve të tij dhe ka kërcënuar më përpara me “zjarr dhe tërbim”.

Deklaratave të tilla, Kim iu është përgjigjur duke treguar forcën ose me testime raketore, ose me kërcënime të drejtëpërdrejta për ndonjë sulm të mundshëm ndaj territoreve të SHBA-së. Për analistët është akoma e paqartë se çfarë ka ndikuar në kthesën e menjëhershme të regjimit të Phenianit. Megjithatë disa mendojnë se takimi në Singapor i shërben më shumë propagandës së Koresë Komuniste se sa administratës Trump.

Përveç kërcënimeve për luftë, shpeshherë, dy liderët kanë shkëmbyer fyerje të rënda për njëri-tjetrin. Megjithatë, sipas asaj që tha vetë lideri i Koresë së Veriut, kjo tashmë është e shkuar e harruar./abcnews.al

trumpi-dhe-kim.jpg
gra moz12:24 | 12/06/2018

Në këtë takim historik, Donald Trump dhe Kim Jong-un nënshkruan edhe një dokument të përbashkët. Në të përcaktohet angazhimi i dy vendeve për marrëdhënie të reja paqësore si dhe çarmatosja bërthamore e Phenianit.

Presidenti i Shteteve të Bashkuara, Donald Trump, dhe udhëheqësi i Republikës Demokratike Popullore të Koresë Kim Jong-un në saj të samitit historik firmosën një dokument të përbashkët. E gjithë vëmendja botërore u fokusua pikërisht tek marrëveshjet e dakordësuara. Menjëherë nisi gara për të zbuluar atë çfarë nënshkruan dy liderët. Tashmë është publikuar edhe gjithë deklarata.

Në të thuhet se Trump dhe Kim Jong-un u dakordësuan që të nisin një epokë të re të marrëdhënieve mes dy vendeve të bazuara në paqe. Presidenti amerikan angazhohet për të ofruar garanci të sigurisë në Korenë e Veriut dhe udhëheqësi Kim Jong-un riafirmoi angazhimin e tij të palëkundur për të përfunduar denuclearizimin e gadishullit Korean. Të bindur se krijimi i marrëdhënieve të reja SHBA-Kore e Veriut do të kontribuojë për paqen dhe prosperitetin e Gadishullit Korean dhe të botës dhe duke pranuar se ndërtimi i besimit të ndërsjellë promovon denuklearizimin e gadishullit Korean, Presidenti Trump dhe udhëheqësi Kim Jong-un deklarojnë si në vijim:

  1. Shtetet e Bashkuara dhe Koreja e Veriut përkushtohen të vendosin marrëdhënie të re SHBA-Kore e Veriut në dakordësi me dëshirën e popujve të dy vendeve për paqe dhe prosperitet.
  2. Shetet e Bashkuara dhe Koreja e Veriut do t’i bashkohen përpjekjeve të tyre për të ndërtuar një regjim të jetëgjatë dhe të qëndrueshëm të paqes në Gadishullin Korean.
  3. Duke riafirmuar deklaratën e Panmunxhom të 27 Prillit të 2018-ës, Koreja e Veriut përkushtohet të punojë drejt çarmatosjes bërthamore të plotë të Gadishullit Korean.
  4. Shtetet e Bashkuara dhe Koreja e Veriut përkushtohen në transferimin e eshtrave të ushtarëve të rënë në luftën e Vietnamit, përfshirë riatdhesimin e menjëhershëm të atyre që janë identifikuar.

Ndërkohë, më tej nënvizohet se samiti, i pari në histori i këtij lloji, është një event epokal që ka një domethënie të madhe në kalimin e tensioneve që ka zgjatur me dekada mes dy vendeve. Gjithashtu nënvizohet përkushtimi për të vijuar negociatat mes Koresë së Veriut dhe Shteteve të Bashkuara./abcnews.al

kimi-dhe-trumpi.jpg
gra moz11:07 | 12/06/2018

Në konferencën e parë për shtyp në një vit, Trump njoftoi se SHBA do të tërhiqet nga stërvitjet e përbashkëta me Korenë e Jugut pasi sipas tij tashmë provokojnë Phenianin. Gjithashtu bëri të ditur se I beson liderit Kim Jong-un.

“Unë i besoj udhëheqësit të Koresë së Veriut, Kim Jong-un”.

Me këto fjalë, presidenti amerikan, Donald Trump, doli në një konferencë për shtyp për të sqaruar rezultatin e këtij takimi historik. Lideri i Shteteve të Bashkuara tha se biseda me udhëheqësin e Koresë së Veriut ishte e sinqertë, e drejtëpërdrejtë dhe produktive. Kreu i Shtëpisë së Bardhë nënvizoi se do t’i japë fund stërvitjeve ushtarake të përbashkëta me Korenë e Jugut, te cilat provokojnë Veriun. Sipas tij, kjo do të shkurtojë ndjeshëm shpenzimet në buxhetin amerikan.

“Unë dëshiroj që t’i largoj ushtarët tanë, dua t’i sjell ata në shtëpi”, nënvizoi Trump. Më tej presidenti amerikan u shpreh i bindur që Kim Jong-un do të përmbushë premtimet e dhëna dhe theksoi se SHBA nuk do të paguajë për shpenzimet e çarmatosjes bërthamore. Ai bëri të ditur se nuk ka bërë asnjë lëshim në bisedimet me udhëheqësin e Koresë së Veriut.

Trump njoftoi më tej se ka biseduar me Kim edhe rreth të drejtave të njeriut. Gjithashtu presidenti amerikan tha se sanksionet ndaj regjimit të Phenianit do të hiqen vetëm pas çarmatosjes së plotë bërthamore të Koresë së Veriut. Një tjetër detaj i rëndësishëm i njoftuar në konferencë ishte ftesa e Trump ndaj Kim për vizitë zyrtare në SHBA. Sipas raportimeve, udhëheqësi i Koresë Komuniste ka pranuar ftesën. Gjithashtu presidenti amerikan bëri të ditur se i ka thënë liderit Kim Jong-un që Koreja mund të ketë hotelet më të mira në botë. Ndoshta kjo është një e dhënë që Trump mund të investojë në vendin komunist./abcnews.al

donald-trump.jpg
gra moz11:52 | 29/05/2018

Vijojnë përgatitjet e samitit të Singaporit. Ish-kreu i shërbimeve sekrete të Koresë së Veriut do të jetë të mërkurën në SHBA për të biseduar lidhur me detajet e fundit të takimit mes Trump dhe Kim Jong-un.

Vijojnë përgatitjet për samitin mes Presidentit të Shteteve të Bashkuara, Donald Trump dhe liderit të Koresë së Veriut, Kim Jong-un. Një nga funksionarët më të lartë të regjimit komunist, Kim Jong-chol është drejtuar për në SHBA për të përmbyllur detajet e takimit të shumëpritur. Sipas burimeve që kanë folur për agjencinë e lajmeve koreanojugore, Jonhap, zyrtari ka mbërritur në aeroportin e Pekinit dhe ka prenotuar një fluturim për në Amerikë, ku mund të takohet me sekretarin e shtetit, Mike Pompeo. Në javët e kaluara dy zyrtarët kanë biseduar në Phenian, gjatë vizitës së dytë të Pompeos në Korenë Komuniste.

Kim Jong-chol ka qenë për shumë vite shef i shërbimeve sekrete ushtarake të Koresë së Veriut dhe është një nga personat më kontraversë të regjimit, i akuzuar se qëndron prapa fundosjes së një anije të Seulit, ku humbën jetën 46 marinarë në 2010-n. Prania e tij në ceremoninë e mbylljes së Lojërave Olimpike Dimërore në Pejongçan me 23 Shkurt, ngjalli shumë polemika. I njohur për sarkazmën e tij, gjenerali është sanksionuar më herët nga Uashingtoni dhe Koreja e Jugut.

Ndërkohë, në Singapor, ku samiti duhet të mbahet me 12 Qershor, ka mbërritur një tjetër funksionar i Phenianit, i cili do të merret me garantimin e detajeve të sigurisë. Ai do të takohet për të biseduar për këtë çështje me përfaqësues të delegacionit amerikan. Qëllimi i takimit mes Trump dhe Kim Jong-un është i qartë: çarmatosja bërthamore e gadishullit Korean. Megjithatë lideri i regjimit komunist nuk pranon që të heqë dorë pa iu garantuar qëndrimi në pushtet dhe largimi i rrezikut të pushtimit./abcnews.al

kimi-1.jpg
gra moz10:20 | 28/05/2018

Rikthehen bisedimet për një samit mes liderëve të Shteteve të Bashkuara të Amerikës dhe Koresë së Veriut. Delegacionet e të dy vendeve kanë zhvilluar sërish bisedime për të përgatitur një takim të mundshëm.

Një ekip i SHBA-ve po zhvillon bisedime me zyrtarët e Koresë së Veriut për të përgatitur një takim të mundshëm midis Presidentit Donald Trump dhe udhëheqësit të Koresë së Veriut, Kim Jong-un.

Bisedimet në fshatin Panmunjom, në zonën e çmilitarizuar midis dy Koreve, janë shenjat e fundit që samiti mund të ndodhë. Të enjten, Presidenti Trump bëri thirrje për anullimin e takimit që do të zhvillohej në Singapor muajin e ardhshëm pas deklaratave të Veriut, që siç i quajti Trump ishin një gjuhë armiqësore. Por të dyja palët që nga ajo kohë po punojnë për ta rikthyer dialogun në rrugë të mbarë.

Të shtunën, Kim Jong-un foli për “vullnetin e tij të fiksuar” që samiti duhet të vazhdojë, ndërsa Trump tha se gjërat ishin “duke ecur shumë mirë”.

Vizita e delegacionit amerikan u raportua për herë të parë nga Washington Post. Ekipi udhëhiqej nga Sung Kim, një ish-ambasador në Korenë e Jugut, i cili do të zhvillonte bisedime me zëvendësministrin e Jashtëm të Koresë së Veriut, tha gazeta. Departamenti i shtetit konfirmoi se të dy palët u takuan në kufi.

Zëdhënësja e departamentit të Shtetit, Hether Noert, tha se po vazhdojnë të përgatiten për një takim midis Presidentit dhe udhëheqësit të Koresë së Veriut, Kim Jong-un.

CNN tha se diskutimet ishin të përqendruara në thelbin e takimit, ndërkohë që një ekip i veçantë i SHBA në Singapor merrej me logjistikën.

Takimi do të ishte kulmi i përpjekjeve diplomatike që filluan këtë vit për të zbutur atë që kishte kërcënuar të bëhet një konfrontim ushtarak midis Veriut dhe Jugut të armatosur bërthamor komunist.

569E21C9-E90B-4836-B60C-D98D003D6277_w1023_r1_s.jpg
ent ela08:45 | 25/05/2018

Koreja e Veriut është shprehur e gatshme që të bisedojë në çdo kohë me Shtetet e Bashkuara. Qëndrimi i tyre i zbutur erdhi pavarësisht faktit se presidenti Donald Trump anuloi takimin me udhëheqësin Kim Jong-un.

Regjimi i udhëheqësit Kim Jong-un u shpreh me tone pozitive pasi presidenti amerikan Donald Trump anuloi samitin e shumëpritur mes dy vendeve që ishte planifikuar të zhvillohej në Singapor me 12 qershor. Koreja e Veriut njofton se dëshiron akoma që të bisedojë “në çdo kohë dhe në çdo formë” me kreun e Shtëpisë së Bardhë. Zëvendës ministri i jashtëm Kim Kye-gwan tha se vendimi i Trump është “shumë për të ardhur keq”.

Kreu i Shtëpisë së Bardhë fajësoi Korenë e Veriut për “armiqësi të hapur” lidhur me arsyen e anulimit të samitit. Nëse do të zhvillohej do të ishte takimi i parë në histori mes një presidenti amerikan në detyrë dhe një lideri të Koresë Komuniste. Detajet e samitit të Singaporti ishin të paqarta. Por bisedimet duhej të ishin fokusuar në mënyrat e denuklarizimit të gadishullit Korean dhe në uljen e tensioneve.

Vetëm disa orë përpara njoftimit të Trump, Pheniani përmbushi premtimin duke shkatërruar zonën e testeve bërthamore. Anulimi i samitit u bë me anë të një letre nga presidenti amerikan drejtuar liderit të Koresë së Veriut, Kim Jong-un. Më pas, një zyrtar i administratës së SHBA-ve dha detaje të tjera duke thënë se Pheniani ka treguar mungesë të thellë mirëbesimi. Ai tregoi se Koreja e Veriut ka thyer shumë premtime duke nisur që nga mungesa e korrektesës e deri tek retorika kërcënuese.

Ndërkohë, tensionet mes dy vendeve nisën për shkak të raportimeve se administrata amerikane do të ndiqte shembullin e Libisë për çarmatosjen bërthamore të regjimit komunist. Por edhe pse ky opsion u përjashtu nga Trump, Koreja e Veriut duket se nuk ka pasur siguri të plotë se Kim Jong-un nuk do të rrëzohej nga pushteti dhe se nuk do të pushtoheshin. /abcnews.al

koreja.jpg
gra moz19:41 | 24/05/2018

Koreja e Veriut ka shkatërruar plotësisht zonën, ku kryente testet bërthamore. Shkatërrimi u bë me anë të shpërthimeve me dinamit. Ky zhvillim është ndjekur nga shumë gazetarë ndërkombëtarë.

Koreja e Veriut ka shkatërruar plotësisht sajtin Punggye-ri, të vetmen zonë zyrtare të njohur deri më tani, në të cilën Pheniani kryente testet bërthamore. Në këtë mënyrë është bërë hapi i parë konkret drejt çarmatosjes nukleare. Ceremonia e mbylljes ka ndodhur në prezencën e një grupi gazetarësh ndërkombëtarë. Ata kanë marrë pjesë në mbikëqyrjen e shpërthimeve, me të cilët janë shkatërruar tunelet e impiantit.

Disa ekspertë mendojnë se kjo bën pjesë në strategjinë e Koresë së Veriut për të manipuluar opinionin ndërkombëtar. Në këtë mënyrë regjimi komunist dëshiron të tregojë për botën se është e hapur për negociata për paqen dhe po bën lëshime, në mënyrë që SHBA të mendojë lidhur me heqjen e sanksioneve ekonomike.

Rreth paradites së të mërkurës është regjistruar detonimi i parë me dinamit të vendosur në tunelin verior. Ndërsa gjatë pasdites ndodhi dhe shembja e dy tuneleve të tjerë. Gjithashtu me shpërthime të fuqishme janë shkatërruar dhe strukturat mbështetëse sipërfaqësore, duke përfshirë ndërtesa dhe magazina të ndryshme.

Pavarësisht se lideri Kim Jong-un tha fillimisht se do të ftojë inspektorët ndërkombëtarë për të marrë pjesë në shkatërrimin e zonë bërthamore, një gjë e tillë nuk ndodhi./abcnews.al

koreja-e-veriut-pence.jpg
ent ela11:52 | 24/05/2018

Rriten përsëri tensionet mes Koresë së Veriut dhe Shteteve të Bashkuara. Një zyrtare e Phenianit ka ofenduar nënpresidentin amerikan Majk Pens. Kjo është një tjetër shenjë që samiti mes Trump dhe Kim Jong-un mund të mos ndodhë.

Një zyrtare e lartë i Koresë së Veriut i ka cilësuar komentet e nënpresidentit amerikan Mike Pence si “idjote”, duke rritur paqartësitë lidhur me takimin e planifikuar mes lidërve të dy vendeve. Choe Son-hui tha se Pheniani nuk do të lutet për dialog dhe paralajmëroi për një tregim force bërthamore nëse diplomacia dështon. Kohëve të fundit, të dy palët kanë thënë se samiti ndërmjet Donald Trump dhe Kim Jong-un, i planifikuar të mbahet në Singapor me 12 qershor, mund të shtyhet apo të anulohet.

“Si një person i përfshirë në mardhëniet me Shtetet e Bashkuara, nuk mund ta asgjësoj habinë time me vërejtjet e tilla injorante dhe idjote që dalin nga goja e nënpresidentit amerikan. Nëse Uashingtoni do të na takojë ose do të na ndeshë në përplasje bërthamore është tërësisht e varur nga vendimi dhe sjellja e Shteteve të Bashkuara”, u shpreh Choe në një artikull të publikuar nga agjencia shtetërore e lajmeve KCNA.

Koreja komuniste ka insistuar se nuk do të heqë dorë nga arsenali i saj nuklear në mënyrë të njëanshme. Presidenti amerikan nënvizoi këtë javë se Veriu duhet të përmbushë kushtet në mënyrë që bisedimet të fillojnë. Zyrtarja Choe Son-hui është përfshirë në ndërveprime të ndryshme diplomatike me Shtetet e Bashkuara në dekadën e kaluar.

Komentet e saj të fundit vijnë disa ditë pasi Pence paralajmëroi Korenë e Veriut se “mund të përfundojë si Libia”, ku lideri Muammar Gaddafi u vra nga rebelët në 2011 pasi hoqi dorë nga armët bërthamore 8 vite më herët. Ndërkohë, Pheniani dhe vetë lideri Kim Jong-un kanë kërkuar nga SHBA dhe aleatët e saj siguri se nuk do të rrëzohet pushteti dhe se vendi komunist nuk do të pushtohet. /abcnews.al

PARALAJMERIMI-I-PENCE-1280x720.jpg
ent ela11:05 | 22/05/2018

 “Mos u tall me presidentin Trump”. Ky është paralajmërimi i bërë nga nënpresidenti amerikan Majk Pens, drejtuar liderit të Koresë së Veriut Kim Jong-un. Numri dy i Shtëpisë së Bardhë i referohej samitit mes dy vendeve që do të zhvillohet në Singapor me 12 qershor.

Nënpresidenti amerikan, Mike Pence ka paralajmëruar liderin e Koresë së Veriut, Kim Jong-un që të mos tallet me presidentin Donald Trump nëse ata do të takohen muajin e ardhshëm. Në një intervistë për Foks Njuz, ai nënvizon se një lëvizje e tillë do të ishte “një gabim i madh nga lideri i Phenianit. Oence gjithashtu tha se nuk ka asnjë çështje që mund të ndikojë tek kreu i Shtëpisë së Bardhë për të braktisur samitin e 12 qershorit.

Ndërkohë, Koreja e Veriut ka kërcënuar më herët se do të bojokotojë takimin pas komenteve nga Këshilltari për Sigurinë KOmbëtare në SHBA, John Bolton. Pheniani reagoi ashpër kur zyrtari i administratës Trump sugjeroi se në këto bisedime do të ndiqej “Modeli i Libisë” për çarmatosjen bërthamore. Ish lideri i Libisë, Muammar Gaddafi u dakordësua me fuqitë perëndimore në vitin 2003 për të hequr dorë nga program nuklearë në këmbim të heqjes së sanksioneve. Por disa vite më pas, ai u vra nga duart e rebelëve që mbështeteshin nga perëndimi.

Gjithashtu, Koreja e Veriut është e zemëruar edhe për stërvitjet ushtarake mes SHBA-ve dhe Koresë së Jugut. Për këtë, Kim Jong-un ka ngrirë bisedimet me Seulin. Ndërkohë, gjatë të martës, presidenti i Jugut, Moon Jae-in do të takohet me Trump në Uashington për të diskutuar rreth planeve të samitit. Pavarësisht se Administrata amerikane shprehet e bindur për të vijuar me takimin, mediat hedhin dyshime. Nju Jork Tajms raportoi se kreu i Shtëpisë së Bardhë po pyet këshilltarët dhe ndihmësit nëse duhet të vazhdojë me mbajtjen e samitit, që pritet të zhvillohet në Singapor me 12 qershor. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono