komisioni venecias
Postimi i Dostit në "Facebook"

mustafa-nano-1280x720.jpg
ad min20:06 | 01/10/2019

Gazetari Mustafa Nano në monologun e kësaj puntate të emisionit “Provokacija” u ndal tek raporti paraprak i Komisionit të Venecias në lidhje me çëshjtjen e shkarkimit të Presidentit Ilir Meta.

Nano citon një fragment, ku thuhet se, “anulimi i zgjedhjeve, e shtyrja e tyre, kanë qenë veprime antikushtetuese; me këtë është cënuar e drejta e të zgjedhurve për të zgjedhur: bojkoti elektoral i partive, edhe nëse janë parti të mëdha, nuk mund të ndalojë zhvillimin e zgjedhjeve të rregullta; përndryshe, këto parti do të ishin në gjendje të pengonin, sa herë që ua jepte në kokë, çdo proces zgjedhor”.

Për gazetarin kot janë gjëra të thëna më parë nga aktorët lokalë që kur PD vendosi të bojkotonte zgjedhjet. Sipas Nanos, zgjedhjet u bënë si u bënë jo për faj të socialistëve, por për shkat të opozitës, e cila nuk u fut.

“Janë gjëra që po i dëgjoni për herë të parë? Jo, i keni dëgjuar me qindra herë, të thënë e stërthëna nga aktorë lokalë, para se të niste fushata elektorale e zgjedhjeve lokale, më saktë, që kur Partia Demokratike mori vendimin për të bojkotuar këto zgjedhje. Ashtu siç keni dëgjuar zëra të tjerë që thoshin se “zgjedhjet mund të bojkotohen në mënyrë që t’i tregohet botës se në Shqipëri është vendosur një diktaturë”, apo se “nevoja për të rrëzuar diktaturën putative është më e madhe se shqetësimi prej luftës civile që mund të plasë”, apo se “zgjedhjet pa opozitën janë një poshtërsi e madhe e socialistëve”, etj, etj. Mbetemi te fraza e fundit: Zgjedhjet pa opozitën ishin një poshtërsi e madhe e socialistëve. Kjo është një nonsens. Duhet ta themi copë: ato zgjedhje u bënë ashtu si u bënë, të shëmtuara, jo për faj të socialistëve. Socialistët kanë shumë mëkate në këtë vend, por faji për ato zgjedhje bie mbi opozitën. Faji nuk ishte i mazhorancës që këmbënguli që zgjedhjet të bëheshin. Ishte i opozitës, që në zgjedhje nuk u fut. Ta shohësh ndryshe këtë gjë, është si t’i shohësh gjërat me kokëposhtë”, tha Nano.

Më tej, Nano rendit arsyet pse mendon se zgjedhjet nuk mund të shtyheshin. Sipas tij, opinioni i Komisionit të Venecias i vuri vulën mendimit se zgjedhjet e 30 Qershorit ishin legjitime.

“Një, sepse nuk të lejon kushtetuta. Dhe kjo do të ishte mjaft si arsye. Dy, sepse opozita nuk kërkonte shtyrje zgjedhjesh. Ata kërkonin rënien e qeverisë. Tre, sepse nuk kish asnjë arsye madhore që zgjedhjet të shtyheshin. Çdo gjë ishte një kapriço. Katër, sepse nuk është ndonjë hatá nëse një parti nuk merr pjesë në zgjedhje. Në demokraci, pjesëmarrja në zgjedhje është një e drejtë, jo një detyrë. Është një mundësi, jo detyrim.

Dhe zgjedhjet, siç pritej, u bënë. Ishin, siç thashë, zgjedhje të shëmtuara. Por ishin legjitime. Dhe Opinioni i Komisionit të Venecias i ka vënë vulën këtij mendimi. Dhe unë shpresoj më në fund që ata që bënin thirrje të mos shkohej në zgjedhje, të jenë ndier keq më pas, sidomos tani, pas qëndrimit të Komisionit të Venecias. Nëse edhe Komisionin e Venecias nuk na i nxjerrin të korruptuar”, tha Nano.

Votimin më 30 Qershor, Mustafa Nano e konsideron si një nga veprimet më të mira publike që ka bërë ndonjëherë.

“Unë vetë shkova në zgjedhje. Votova. Nuk jam ndier mirë atë ditë. Kisha një lloj sikleti. Ishte si një ditë e shkretë. Ishte një festë e prishur. Ishte si një funeral. Kjo ishte ideja që më shoqëroi atë ditë të 30 Qershorit 2019. E megjithatë, mua më vjen mirë që shkova të votoja. Është një nga veprimet publike më të mira që kam bërë ndonjëherë. Ka shumë njerëz që nuk e kuptojnë, por nuk bëhem merak. Nuk bëhem merak, sepse e di se kush janë këta njerëz. Janë njerëz që në të vërtetë nuk kanë gjë kundër korrupsionit, apo kundër vjedhjes së votave, apo kundër sundimit të njëshit. Thjesht do donin që njëshi të mos quhej Rama, por të quhej Berisha, e që paratë publike e votat t’i vidhnin jo socialistët, por ata vetë”, tha moderatori i emisionit “Provokacija”./abcnews.al

kaarlo-tuori.jpg
ad min11:06 | 11/09/2019

Komisioni i Venecias do të dalë më 11 Tetor me një opinion nëse Presidenti i Republikës, Ilir Meta, ka shkelur ose jo Kushtetutën me vendimin për të çdekretuar 30 qershorin si datë për zgjedhjet lokale. Pas takimeve që zhvilluan përgjatë dy ditëve kreu delegacionit të Komisionit të Venecias deklaroi se e kanë një ide mbi ligjshmërinë apo jot ë vendimit të kryetarit të shtetit.

Nuk mbyllën vetëm takimet e fundit por edhe gojën duke mos pranuar të nxitohen të dalin në përfundime.

“Jemi të kënaqur me takimet e zhvilluara në Tiranë. Kemi marrë informacione të mjaftueshme lidhur me atë që kërkonim. Konkluzionet tona do t’i dorëzohet Komisionit Hetimor të ngritur për këtë çështje më 11 Tetor”.

Nuk kanë qëndruar kaq gojëmbyllur deputetët Ulsi Manja e Rudina Hajdari. Veçanërisht përfaqësuesja e opozitës parlamentare që tregohet e drejtpërdrejtë mbi çka i është kërkuar në takim.

Një informacion mbi takimin që kanë zhvilluar këtë të mërkurë ka shpërndarë në rrjetet sociale edhe kryetari i Komisionit Hetimor për shkarkimin e Presidentit.

“Ndamë pikëpamjen që Komisioni Hetimor dhe Komisioni i Venecias do ta trajtojnë këtë rast në aspektin ligjor duke u nisur nga parimet dhe standardet më të larta profesionale dhe kushtetuese dhe me objektivitet maksimal , me qëllim vendosjen e një tradite juridike parlamentare të parin në llojin vet për Shqipërinë”.

Gjatë qëndrimit në Tiranë, delegacioni i Komisionit të Venecias zhvilloi takime edhe me Presidentin e Republikës, kryetarin e Kuvendit, kryeministrin Rama, përfaqësues të mazhorancës dhe opozitës brenda e jashtë Parlamentit. Mendimin e fundit ia morën anëtarëve të Shoqërisë civile.

Konkluzionet e Komisionit të Venecias do të qartësojnë edhe idetë e Komisionit Hetimor për Kontrollin e Ligjshmërisë së Veprimtarisë së Kreut të Shtetit. Opinioni i ekspertëve të huaj do t’i bashkangjitet dhe raportit final që do të votohet nga parlamenti./ABC News Albania 24/7

komisioni-venecias.jpg
ad min15:36 | 10/09/2019

Një delegacion i Komisionit të Venecias ka takuar të gjitha palët politike sot në Tiranë, në një vizitë për të mbledhur qëndrime mbi kërkesën e socialistëve për të shkarkuar Ilir Metën. Ekspertët nuk kanë dhënë deklarata, por kanë mbajtur shënime dhe do të shprehen me një opinion zyrtar në Tetor.

Komisioni i Venecias ka dërguar në Tiranë një  grup ekspertësh, përpara se të japë në Tetor opinionin e tij nëse Ilir Meta duhet shkarkuar si President Republike.

Delegacioni i nisi takimet me opozitën jo parlamentare, e cila mbrojti qëndrimet e presidentit, duke thënë se anulimi i 30 qershorit ishte një përpjekje pozitive e Ilir Metës. Më pas, ekspertët dëgjuan këndvështrimet e deputetëve të mazhorancës dhe më pas të opozitës parlamentare.

Rreth 50 minuta takim patën edhe me kreun e Kuvendit, Gramoz Ruçi. Sipas zyrës së shtypit të Kuvendit, Ruçi i ka falënderuar ekspertët për kontributin dhe përgjigjen me shpejtësi ndaj interesimit të Kuvendit të Shqipërisë.

Delegacioni i Venecias u takua edhe me Presidentin e Republikës, Ilir Meta, i cili është person nën hetim parlamentar. Mësohet se kreu i shtetit, përveç shpjegimeve në tavolinë, ju ka dhënë  ekspertëve edhe një relacion shpjegues me shkrim me arsyet që e detyruan të çdekretojë 30 Qershorin.

Në Tëiter, presidenti shkroi shkurtimisht se ishte i kënaqur që kishte pritur një përfaqësi të Komisionit të Venecias dhe se nëse do ishin respektuar rekomandimet e tyre në të kaluarën, Shqipëria kurrë nuk do të ishte në këtë situatë.

Komisionerët kanë takime edhe me ministrin e Brendshëm, kryeministrin, Komisionin Qendror të Zgjedhjeve, dhe anëtarë të komisionit hetimor./ABC News Albania 24/7

gramoz-ruci.png
ad min21:53 | 03/10/2018

Kreu i Kuvendit, Gramoz Ruçi, i ka drejtuar 8 pyetje komisionit të Venecias lidhur me propozimin e demokratëve për ndryshimet kushtetuese të cilat do të mundësonin rivlerësimin kalimtar të politikanëve, i njohur ndryshe si Vetting.

Në letrën e zbardhur nga ABC News, kreu i Kuvendit mes të tjerash kërkon të dijë nga Venecia nëse këto ndryshime ndërhyjnë apo mbivendosnin punën e Byrosë Kombëtare të Hetimit dhe Njësisë Speciale Antikorrupsion, organe këto të parashikuara nga reforma në drejtësi e vitit 2016, që ende nuk janë ngritur, apo edhe vetë ligjin e dekriminalizimit.

Njëkohësisht kreu i Kuvendit i ka kërkuar Komisionit të Venecias informacion mbi standardet dhe praktikat ndërkombëtare të procesit të rivlerësimit të politikanëve.

Pasi e pyet komisionin lidhur me qëllimin e projektligjit të hartuar nga demokratët dhe nëse ky qëllim është legjitim, Gramoz Ruçi, në cilësinë e kreut të Kuvendit kërkon të dijë gjithashtu nga ky komision nëse kjo ndërhyrje në të drejtën për t’u zgjedhur është e balancuar dhe në përputhje me standardet e Konventës si dhe Gjykatës Europiane për të Drejtat e Njeriut, bazuar në parimin e propocionalitetit dhe parashikimit në ligj.

Kreu i Kuvendit kërkon gjithashtu të njihet me dallimin, nëse ka të tillë, mes standardeve të kontrollit të figurës së gjyqtarëve dhe prokurorëve dhe atyre për kontrollin e deputetëve dhe kryebashkiakëve.

Dy prej pyetjeve drejtuar Komisionit të Venecias nga kreu i ligjvënësit shqiptar kërkojnë gjithashtu të dijnë nëse ndryshimet kushtetuese të paraqitura nga demokratët bien ndesh me nenin 6 dhe atë 8 të Konventës Europiane për të Drejtat e Njeriut. Përkatësisht nëse ky proces rivlerësimi kalimtar i politikanëve do të ndërhynte me të drejtën e tyre për mbrojtjen e reputacionit apo atë për një procesi të rregullt ligjor.

Konventa Europiane e të Drejtave të Njeriut në nenin 6 të saj parashikon se çdo person i akuzuar prezumohet i pafajshëm, derisa fajësia e tij të provohet ligjërisht, si dhe i njeh çdokujt një gjykim të drejtë, publik dhe të arsyeshëm nga një gjykatë e pavarur dhe e paanshme.

E ndërsa neni 8 i saj njeh të drejtën e respektimit të jetës private, familjare, banesës dhe korrespondencës së çdokujt, pika dy e të cilit thekson se autoriteti publik nuk mund të ndërhyjë në këto të drejta, përveçse në shkallën e parashikuar nga ligji apo kur është e nevojshme në një shoqëri demokratike, në interes të sigurisë publike, mbrojtjes së rendit publik, shëndetit, moralit apo të drejtave dhe lirive të të tjerëve./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono