komisioni europian

europa.jpg
G. P.17:20 | 19/03/2019

Përfaqësues të Parlamentit Europian deklarojnë se midis BE dhe Ballkanit po rritet hendeku dhe se sidomos në Shqipëri, Kosovë dhe Serbi po bëhen hapa prapa.

Komisioni i punëve të jashtme të Parlamentit Europian dhe ai i lirive civile, drejtësisë dhe punëve të brendshme të Parlamentit Europian janë përshirë në një debat të detajuar mbi reformat e shtetit ligjor dhe të drejtave themelore në Ballkan. Drejtori për zgjerimin, Christian Danielsson, ka pranuar se ka hapa prapa në reformat e shtetit ligjor dhe të drejtave themelore në disa vende të Ballkanit.

Përfaqësuesit e botës akademike dhe shoqërisë civile kanë deklaruar, se liderët e Ballkanit kanë mësuar t’ia hedhin Bashkimit Europian me zbatimin e reformave në letër dhe mesazhet e mjegullta të Brukselit merren si inkurajim për mënyrën autokratike të qeverisjes në Ballkan.

Christian Danielsson, drejtor i përgjithshëm për zgjerimin, KE: “Ka një dëshirë nga qytetarët e Ballkanit, që duan të jetojnë në vende me prosperitet dhe me barazi, ku shteti ligjor është i fortë, ku korrupsioni të luftohet, ku sistemi i drejtësisë të jetë i pavarur dhe ku ndryshimi demokratik të vijë përmes zgjedhjeve të lira dhe të ndershme. Dhe le të jemi të ndershëm. Është arritur një progres domethënës në reforma, por dhe në kapërcimin e trashëgimisë shkatërruese të luftës dhe konflikteve në Ballkan. Por asnjë nga vendet e Ballkanit nuk përmbush kriteret e anëtarësimit dhe në disa vende ne kemi parë fatkeqësisht stanjacion, apo siç u artikulua hapa prapa”.

Marko Kmezi, Qendra për studimet mbi Europën Juglindore, Graz: “Për disa vende të Ballkanit Perëndimor, këto hapa prapa kanë filluar menjëherë pas hapjes së negociatave të anëtarësimit. Rekomandimet për të ndryshuar situatën  kanë të bëjnë së pari me monitorimin e plotësimit të kritereve dhe raportimin e tyre. Së dyti, përfshirjen të nxitjes dhe sanksioneve në kuadrin e financimit për vendet e Ballkanit kur bëhet fjalë për performancën lidhur me shtetin ligjor dhe së fundmi jo të kryhet një ushtrim teknokratik, por më shumë shoqëror të fokusuar në potencialin e vetë shoqërisë”.

Naim Rashiti, Qendra hulumtuese për politikat e Ballkanit: “Ka një rritje të hendekut midis Bashkimit Europian dhe vendeve të Ballkanit në kuptimin dhe pranimin e reformave të integrimit. Ky është një shqetësim serioz dhe kjo diferencë duket në Serbi, Kosovë dhe Shqipëri. Në disa raste, zbatimi i reformave në letër vetëm i përkeqëson gjërat. Liderët e Ballkanit Perëndimor kanë mësuar se si t’ia hedhin Bashkimit Europian dhe në disa raste zyrtarët e BE-së e dinë që ua hedhin dhe përballen me vështirësi të axhendave politike që ndryshojnë prioritetet kundër standardeve të shtetit ligjor”.

Marko Kmezi, Qëndra për studimet mbi Europën Juglindore Graz: “Problemi i monitorimit nuk trajton shkaqet e deficencave  të shtetit ligjor në Ballkan dhe mbi të gjitha mënyrën autokratike me të cilën qeverisen këto vende. “Burrat e fortë” të Ballkanit nuk kanë arsye pse të kryejnë reformat, por të ruajnë status-quo. Nga ana tjetër, mesazhet që vijnë nga Brukseli janë shpesh të mjegullta dhe mund të merren si inkurajim për “burrat e fortë ” të Ballkanit. Dhe në emër të stabilitetit, BE-ja po neglizhon devijimet në shtetin ligjor. Duhet merret si model raporti “Priebe” që u bë për problemet e shtetit ligjor në Maqedoni.

Christian Danielsson ka deklaruar, se mënyra e kryerjes së negociatave nuk mund të ndryshojnë çdo vit.  Ai pranuar së mund të bëhet më shumë nga Komisioni Europian lidhur me diplomacinë publike dhe të qenurit më aktivë në terren për rrjedhojat  e mosveprimit dhe të qënurit shumë të qartë kur ka devijim të shtetit ligjor./abcnews.al

May-and-Junker-to-discuss-Brexit-talks-in-December-1280x800.jpg
ent ela11:23 | 31/12/2018

Pas përfundimit të mandatit të tij si president i Komisionit Europian në nëntor të 2019-ës, Zhan Klod Junker premtoi se do i përkushtohet jetës private. Në një intervistë për mediat gjermane ai foli për shumë tema të rëndësishme madje dhe për pasardhësin e tij.

Bashkimi europian nuk do të rrëzohet në përfundim të mandatit tim. Është i bindur për këtë Zhan KLod Junker Presidenti i Komisionit Europian i cili që nga 1 nëntori 2019 nuk do të mbajë këtë post. Ai theksoi se nuk duhet të ketë dëshpërim dhe pse shqetësimi është më se me vend. Ndërsa për zgjedhjet europiane ai u shpreh se partitë tradicionale nuk duhet të bëhen hije e populistëve.

Në një intervistë për gjermanen “Velt am Sontag” Junker bëri apel që të munden populistët pasi ata nuk kanë asnjë zgjidhje reale për problemet kombëtare.

Numri një i ekzekutivit europian ndër të tjera tha se ishte i shqetësuar për përpjekjet e paligjishme për të ndikuar në zgjedhjet europianee. Ai u bëri apel të gjitha vendeve të Bashkimit Europian që të jenë të bashkuar në një front dhe të përballen me hakerat e Rusisë dhe Kinës.

Duke e cilësuar si të parakohshëm një bilanc të presidencës së tij, Junker nuk përmendi asnjë emër për atë që mund të jetë pasardhësi i tij dhe as nuk pranoi se mbështeste kandidatin e partisë popullore europiane, gjermanin Manfred Ueber. Junker u shpreh se në përfundim të manatit do i përkushtohej jetës private.

Ai theksoi se do të ishte shumë e pavend nëse çështja e emigrantëve do të kthehej në një temë kryesore për fushatën elektorale në zgjedhjet europiane. Kjo sepse sipas tij, ky problem është i rëndësishëm, por shumë larg të qënit problem më i madh i Bashkimit Europian.

Junker foli dhe për Brexit duke thënë se do të ndodhë pasi populli britanik vendosi kështu. Ai i bëri apel Londrës që të gjejë një marrëveshje dhe të tregohen të qartë për atë që duan në të ardhmen. Kjo sepse marrëdhëniet me Mbretërinë e Bashkuar duhet të jenë të qarta dhe në respekt të rezultatit të referendumit popullor. /abcnews.al

KE-PER-KOSOVEN-DHE-SERBINE-ABC-M2-T1.mpg_snapshot_00.36-1280x720.jpg
G. P.18:40 | 22/11/2018

Komisioni Europian thotë se Mogherini nuk është e njëanshme pasi kritikon dy palët, Serbinë dhe Kosovën. Brukseli kërkon nga të dy shtetet që t’i japin fund provokimeve dhe të vazhdojnë dialogun.

Komisioni Europian nuk pranon që shefja e diplomacisë europiane, Federica Mogherini është e njëanëshme në kuadrin e lehtësimit të dialogut midisi Prishtinës dhe Beogradit. Ky është qëndrimi që zëdhënësja e Mogherinit ka shprehur ndaj pyetjes së ABC News lidhur me reagimet e ashpra që ka nxitur në skenën politike të Kosovës deklarata e fundit e Mogherinit për njëanshmëri në dialogun midis Prishtinës dhe Beogradit, ku nënvizohet se kritikohet vetëm Kosova dhe jo Serbia.

Maja Koçijaniç, zëdhënëse e KE-së: “Nuk besoj se kjo është korrekte. Duke ditur qe ju i keni ndjekur zhvillimet nga afër, nuk kam dyshim që ju jeni në dijeni të kësaj. Ne e kemi bërë të qartë në deklaratën e djeshme, që qeveria e Kosovës duhet të heqë dorë nga masa që ka anonçuar. Kjo nuk është diçka e re, pasi kemi reaguar në të njëjtën mënyrë kur u anonçua masa prej rritjes së 10% javën e kaluar. Ky është dhunim i marrëveshjes së CEFTAs dhe nuk është në frymën e marrëveshjes së stabilizim-asocimit”.

Komisioni Europian i bën thirrje lidershipit të Kosovës dhe Serbisë t’u japin fund provokimeve dhe të fokusohen në normalizimin e marrëdhënieve.

Maja Koçijaniç, zëdhënësja e KE-së: “Ne kemi thënë gjithashtu që aktet nga Kosova dhe Serbia që perceptohen nga ana tjetër si provokative dhe sharëse, janë shqetësuese dhe nuk çojnë në dialog dhe në normalizimin e marrëdhënieve. Ne i bëjmë thirrje të dy lidershipeve që t’u japin fund këtyre provokimeve dhe të fokusohen në normalizimin e marrëdhënenieve midis të dy palëve përmes dialogut. BE-ja monitoron përmbushjen e të gjitha detyrrimet rajonale që palët kanë ndërmarrë në rajonin e Ballkanit Perëndimor. CEFTA është një gur themeli kyç në kuadrin e bashkëupunimit rajonal, është një çështje kyçe e zonës ekonomike rajonale dhe mbulohet gjithashtu nga disa marrëveshje të stabilizim-asocimit. Ne e kemi bërë marrëveshjen tonë të qartë dhe presim që sekretariati i CEFTës do të ndërrmarrë masat e duhura për të siguruar respektimin e plotë të marrëveshjes. Ne e pranojmë që ka probleme, por reagimi i qeverisë së Kosovës në këtë rast nuk është qasja e duhuri. Ka mënyrë se si duhet të zgjidhen këto çështje, por mënyrë me të cilën u soll qeveri e Kosovës nuk është ajo e duhura”.

Shefja e diplomacisë europiane, Federica Mogherini nuk ka ende një datë për raundin e ardhshëm të dialogut midis Prishtinës dhe Beogradit./abcnews.al

70853Bashkimi.jpg
G. P.11:44 | 22/11/2018

Komisioneri europian për çështje ekonomike, Pier Moskoviç, deklaroi se Roma duhet të trajtojë me më respekt çështjen e ligjit për buxhetin dhe jo me ironi, duke iu referuar batutës së zv/kryeministrit Italian Salvini. Por ky i fundit deklaroi se nuk ka ndërmend të tërhiqet.

Procedura për shkelje të rregullores për Italinë nga ana e Bashkimit Europian është ende në fuqi. Në një intervistë për mediat italiane, komisioneri europian për çështjet ekonomike, Pier Moskoviç, u shpreh se qëndrimi i Komisionit Europian mbështetet në procedurën që parashikohet nga traktatet. Ndërsa në reagim ndaj batutës së zv/kryeministrit italian Salvini, i cili tha se priste letër nga babagjyshi i Vitit të Ri, Moskoviç u shpreh se ai nuk është babagjyshi i Vitit të Ri. Ai theksoi se këto janë çështje që duhen trajtuar me seriozitet dhe respekt reciprok, e jo me ironi. Moskoviç tha se në këtë moment dialogu është më i domosdoshëm se asnjëherë tjetër.

Ndërsa një ditë më parë para parlamentit francez, Moskoviç komentoi ligjin për buxhetin të miratuar nga qeveria italiane duke thënë se ai nuk ëshët një buxhet për popullin, në momentin që shton dhe më shumë borxhin e vendit. Sipas tij, manovra e miratuar në Itali është e pambështetshme dhe do të peshojë tek të varfërit.

Por nga ana e tij zv/kryeministri italian Salvini deklaroi se nuk do të bëhet asnjë hap prapa. Gjatë një interviste televizive ai kërkoi Moskoviç respekt për popullin italian, meqënëse italianët paguajnë. Sipas Salvinit në letrën e dërguar nga Brukseli ku kundërshtohet ligji për buxhetin, shkruhet se nuk mund të ndryshohet ligji i mëparshëm. Por Salvini theksoi se nuk ka ndërment të tërhiqet dhe as të bëjë debat, por nëse do i duhej të zgjidhte mes brukselit dhe italianëve, atëherë zgjedhja do të ishte shumë e lehtë./abcnews.al

70853Bashkimi.jpg
G. P.13:25 | 21/11/2018

Komisioni Europian ka rrëzuar projektin e ri të buxhetit të Italisë sipas të cilit deficiti në vend duhet të mbetet në pragun e 2.4 për qind. Sipas Brukselit, Italia nuk po respekton kriteret e borxhit duke u bërë një rrezik për Europën.

Komisioni Europian ka rrëzuar manovrën e prezantuar nga qeveria italiane. Tashmë ka nisur procedura e shkeljes së rregullave për shkak të defiçitit të tepruar. Sipas Brukselit, vendi nuk ka respektuar kriterin e borxhit. Por pavarësisht kësaj, mediat italiane shjkruajnë se kryeministri Xhuzepe Konte nuk ka ndërmend të modifikojë ligjin për buxhetin, por është i gatshëm t’i japë një shpjegim të detajuar për objektivat dhe parametrat, Zhan Klod Junker.

Sipas Brukselit, shkelja e rregullave të buxhetit nga ana e Italisë është shumë e rëndë sidomos përsa i përket rekomandimit të Ekofin në 13 korrik. Qeveria italiane në 13 Nëntor paralajmëroi miratimin e një plani të ri për buxhetin, duke konfirmuar se do të mbante defiçitin në kuotën 2.4%. Sipas burimeve në kryeministrinë italiane, ekonomistët janë të bindur se ky projekt është i përshtatshëm. Por një qëndrim i ashpër është dhe ai i OSBE-së, sipas së cilës në Europë ka shumë rreziqe dhe një prej tyre është pikërisht Italia./abcnews.al

ora.jpg
G. P.12:47 | 27/10/2018

Akrepat kthehen 60 minuta prapa natën mes 27 dhe 28 Tetorit. Por kjo mund të jetë hera e fundit pas propozimit të Komisionit Europian, sipas të cilit çdo shtet mund të zgjedhë orën që dëshiron, brenda Prillit të 2019-s

Natën mes të shtunës 27 Tetor dhe të dielës 28 Tetor do të kalohet nga ora ligjore në atë diellore. Në orën 03:00 akrepat do të shkojnë 60 minuta prapa duke na lejuar të flemë një orë më shumë. Por kjo mund të jetë hera e fundit. Në fund të muajit Gusht presidenti i Komisionit Europian, Jean Claude Juncker, deklaroi se dëshironte të anulonte këtë ndryshim. Propozimi do të diskutohet fillimisht nga organizmat e tjerë komunitarë dhe më pas nga çdo shtet.

Në një sondazh të kryer mes Korrikut dhe Gushtit, 84 për qind të të intervistuarve, në total 4.6 milionë banorë në Bashkimin Europian, u shprehën pro heqjes së ndryshimit të orës. Propozimi i Komisionit Europian parashikon që çdo shtet mund të vendosin orën që i pëlqen brenda Prillit të 2019-s. Ata që kanë ndërmend të aplikojnë orën ligjore mund të bëjnë ndryshimin e fundit në Mars të 2019-s, ndërsa ata që do të zgjedhin orën diellore, ky do të jetë ndryshimi i fundit./abcnews.al

KE-KUFINJTE.mpg_snapshot_00.16-1280x720.jpg
ent ela21:14 | 10/08/2018

Brukseli nuk e ka kundërshtuar idenë e ndryshimit të kufijve mes Kosovës dhe Serbisë, por ka deklaruar se marrëveshja që do të arrihet mes palëve duhet të jetë realiste dhe afatgjatë.

Komisioni Europian ka deklaruar të premten se zgjidhja që mund të arrijnë Beogradi dhe Prishtina duhet të jetë realiste, e qëndrueshme dhe në përputhje me të drejtën ndërkombëtare. Ka qenë zëdhënësi Carlos Martin që u është përgjigjur interesit të mediave, nëse Brukseli e mbështet idenë për një ndryshim kufijsh mes Kosovës dhe Serbisë. “Në takimet e nivelit të lartë, presidentët Vuçiç dhe Thaçi kanë patur bisedime intensive dhe konstruktive sa i takon procesit të normalizimit të marrëdhënieve dhe kanë rënë dakord për intensifikimin e tyre”, ka deklaruar Martin. Zëdhënësi ka saktësuar se në takimin e 18 korrikut, krerët e shteteve kanë shqyrtuar progresin e arritur deri më tani dhe kanë caktuar fillimin e shtatorit për të mbajtur takimin e ardhshëm.

“Dialogu i ndërmjetësuar nga BE synon nxitjen e bashkëpunimit të përhershëm mes dy palëve dhe avancimin e tyre në rrugën drejt anëtarësimit në BE”, ka deklaruar Martin. Ideja e ndryshimit të kufijve mes Kosovës dhe Serbisë po përflitet gjithnjë e më shumë në Prishtinë e Beograd dhe nuk po kundërshtohet nga qarqet politike në Bruksel dhe Uashington. Ndërkohë, Rusia, aleate historike e Serbisë, ka deklaruar se çdo gjë që është e pranueshme për Beogradin është e pranueshme edhe për të. Një ndryshim i mundshëm do t’i jepte Serbisë veriun e Kosovës të banuar nga serbë dhe Kosovës jugun e Serbisë të banuar nga shqiptarët e Luginës së Preshevës./abcnews.al

ke.jpg
G. P.13:29 | 25/07/2018

Në profilin zyrtar në Twitter, Komisioni Europian shpreh ngushëllimet dhe solidaritetin me popullin grek, në situatën e vështirë pas zjarreve që shkaktuan me dhjetra viktima.

Në postimin e shoqëruar me fotografinë e flamujve të Bashkimit Europian në gjysmë shtizë, shkruhej ndër të tjera:

“Ngushëllimet tona për familjarët dhe miqtë e viktimave të zjarreve që kanë shkaktuar kaq shumë vuajtje.”/abcnews.al

juncker.jpg
G. P.14:52 | 13/07/2018

Numri një i Komisionit Europian ecën me shumë vështirësi dhe i ndihmuar nga dy persona të tjerë teksa ngjitet në podium për fotografinë e grupit në samitin e NATO-s e ndërsa shumë u shprehën se ai ka qenë i dehur, kolegët e mbrojnë duke thnë se vuan nga nervi shiatik.

Është kthyer në një fenomen, videoja në të cilën Jean-Claude Juncker ecën me vështirësi dhe i mbajtur nga dy persona të tjerë në samitin e NATO-s.

Presidenti i Komisionit Europian është prezantuar në Bruksel në një gjendje shumë të keqe, duke u lëkundur teksa zbret skallë. Aq sa kanë qenë të shumtë ata që u shprehën se ka qenë i dehur.

Kështu video ku Juncker, 63 vjeç, mezi mbahet në këmbë dhe pse i ndihmuar nga të tjerë, ka bërë xhiron e botës së bashku me akuza shumë të rënda. Por në Belgjikë ka dalë një e vërtetë ndryshe për presidentin e Komisionit Europian, i cili ka marrë pjesë në samit dhe pse i sëmurë.

Juncker vuan nga nervi shiatik, sipas asaj, që thonë kolegët e tij, të cilët ishin të pranishim në takim. Euronews ka kërkuar një koment nga Komisioni Europian, i cili u përgjigj se nuk dëshironte të komentonte për problemet shëndetësore të presidentit të tij./abcnews.al

damian-gjiknuri-ke.jpg
G. P.15:59 | 20/06/2018

Shqipërisë i nevojitet mbështetja financiare e Komisionit Evropian që të realizojë objektivat në fushën e transportit. Të vetëm nuk mund t’ia dalim deklaroi ministri i Infrastrukturës dhe Energjisë, Damian Gjiknuri.

24 milionë euro do të shkojnë në fushën e transportit. Kjo shifër u bë publike në prezantimin e implementimit të Strategjisë Sektoriale të Transportit dhe Planin e saj të Veprimit 2016-2020.

Damian Gjiknuri: “Që ne të realizojmë të gjitha objektivat dhe standardet aty ku e kërkojmë duhet një mbështetje financiare nga Komisioni Europian. Dhe prandaj dhe unë e them kudo që integrimi në Bashkimin Europian dhe progresi në këtë drejtim nuk është vetëm forcimi i institucioneve, nuk është vetëm një demokraci më e mirë dhe funksionale por mbi të gjitha krijon dhe një akses  për vende si Shqipëria që të kenë mundësi të adresojnë fondet e konsoliduara të BE që janë gjithmonë mënyra më e lirë për të financuar shumë nga objektet tona”.

Ministri Gjiknuri tha se janë aktualisht disa projekte të financuar me mbështetjen e Bashkimit Evropian si ai i hekurudhës Tiranë-Durrës-Rinas që ka hyrë në një fazë të përzgjedhjes së kontraktorit. Gjithashtu edhe ndërtimi i dy bypass-eve të Fierit dhe Vlorës pas ngërçit ka kaluar në fazën e rizhvillimit të garës, e cila ndodhet në hapat e fundit për të rinisur punën.

Damian Gjiknuri: “Ne kemi marrë një mbështetje financiare nga Komisioni Europian siç është ndërlidhja me Greqinë dhe me Maqedoninë si dhe rehabilitimi i gjithë hekurudhës në drejtim të Hanit të Hotit, pra kjo bën që Shqipëria të bëhet pjesë e rrjetit hekurudhor ndërkombëtar. Mbështetje do të kemi edhe me investimet që do të ndodhin shumë shpejt në portin e Durrësit, përfshirë edhe thellimin, por edhe investimet e BERZH-it për zgjerimin e kalatave aty do të bëjë të mundur që të rriten kapacitetet përpunuese”.

Një nga përfitimet e mbështetjes buxhetore nga programet IPA është ai i asistencës teknike për rritjen e kapaciteve të Autoritetit Rrugor Shqiptar dhe Ministrisë së Infrastrukturës dhe Energjisë përsa i takon çështjeve të Partneritetit Publik-Privat./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono