komision

be.jpg
ent ela16:26 | 05/12/2018

I ka lënë një derë hapur Komisioni i Venecias propozimit të Partisë Demokratike për Vettingun në politikë. Në Opinionin e përgatitur nga ky Komision dhe që do të miratohet në mbledhjen e datës 14-15 Dhjetor 2018, ekspertët theksojnë se: “Nga takimet (shkëmbimet e mendimeve) e ndryshme që patën Raportuesit gjatë vizitës në Shqipëri, duket qartë se ekziston vërtet një problem i kontakteve të papërshtatshme midis politikanëve dhe elemente kriminale”.

Kështu për shkak të rrethanave specifike aktualisht në Shqipëri, futja e një mekanizimi special verifikimi për zyrtarët publik duket si një qëllim legjitim”.

Tashmë kjo përgjigje është edhe në duart e anëtarëve të Këshillit për Legjislacionin, komisionit të çështjeve ligjore e ekspertëve përkatës. Në raportin prej 20 faqesh, Komisioni i Venecias shpreh edhe paqartësitë që kanë të bëjnë kryesisht me procedurën që do të aplikohet, dhe mekanizmat e zbatimit.

“Për më tepër, duke pasur parasysh dispozitat ekzistuese të neneve 6/1, 45 (3) dhe 179 / a të Kushtetutës së Shqiptarësi dhe legjislacionit përkatës zbatues (në veçanti Ligjin e Dekriminalizimit), si dhe mekanizmave të tjerë demokratikë në dispozicion, vlera e amendamenteve të propozuara kushtetuese mund të vihet në pikëpyetje”.

Në të njëjtën linjë janë edhe shqetësimet e ngritura eksperti i Partisë Socialiste Artur Metani, të cilave i përgjigjet Gazment Bardhi eksperti ligjor i Partisë Demokratike.

“Cila do jetë struktura përgjegjëse që do ta zbatojë këtë proces? Kush do ta drejtojë atë? A do jetë e njëjtë si për zyrtarët e zgjedhur dhe ata të emëruar apo e ndryshme? Drafti i përgjithshëm duhet të jepte një orientim të përgjithshëm të paktën në nivel kushtetues se cilët do të jenë organet kompetente të hetimit apo konstatimit për të mos u zgjedhur apo mbarimit të mandatit”, tha Metani.

“Amandamenti nuk parashikon një organ të ri kushtetues që i ngarkon detyrën e kryerjes së kntrollit të figurës për këto zyrtarë në vlerësimin tim, nënkupton që do jetë një organ ekzistues kushtetues”, u shpreh Bardhi.

Në opinionin e hartuar nga Komisioni i Venecias”skualifikimi i heqjes së mandatit zgjedhor nuk duhet të konsiderohet si kufizim i demokracisë, por si një mjet për ta ruajtur atë. Në fund të opinionit të tij, Komisioni i Venecias i kërkon parlamentit të thotë fjalën e fundit.

“Parlamenti shqiptar të vendosë mbi hapat e ardhshëm lidhur me ndryshimet kushtetuese të propozuara, nëpërmjet dialogut konstruktiv midis të gjitha forcave politike dhe shoqërisë në përgjithësi, në interes të demokracisë shqiptare”.

Për të marrë përgjigjet e munguara Komisioni i Veneciasi i ka bërë një ftesë Kuvendit. Kryeparlamentari Gramoz Ruçi bëri të ditur, se gjashtë deputetë të Kuvendit të Shqipërisë, tre nga mazhoranca e tre nga opozita do shkojnë në Komisionin e Venecias, për të mbrojtur pikëpamjet e tyre për propozimin e opozitës për Vettingun në politikë. Mazhoranca do përfaqësohet nga Ulsi Manja, Vasilika Hysi dhe Klotilda Bushka, ndërsa nga opozita do jenë Oerd Bylykbashi, Gazment Bardhi dhe Silva Caka./abcnews.al

uai1ddlo_donald-trump_625x300_06_August_18.jpg
G. P.22:39 | 10/11/2018

Demokratët në Shtetet e Bashkuara kanë paralajmëruar se mund të padisin presidentin Donald Trump, pasi ka shkelur Kushtetutën me emërimin e prokurorit të ri të përgjithshëm, një kritik i zëshëm i hetimeve mbi ndërhyrjen ruse.

Senatorët demokratë në Shtetet e Bashkuara po shqyrtojnë ndërmarrjen e një aksioni ligjor kundër vendimit të presidentit Donald Trump për vendosjen në krye të Departamentit të Drejtësisë një kryeprokuror në detyrë. Ditën e enjte Trump emëroi Methju Uajtejkër si zëvendës së ish-prokurorit të përgjithshëm Xhef Sesshëns, i cili u tërhoq me kërkesë të kreut të shtetit, pas përplasjeve të shumta lidhur me hetimet mbi ndërhyrjen ruse.

Lëvizja e Trump e bën Uajtejkër mbikëqyrës të hetimit të udhëhequr nga Robert Myler, që në muajt e fundit ka përfshirë ish-bashkëpunëtorë të afërt të presidentit. Tani, senatorët demokratë po mendojnë të padisin Trump me argumentin se me emërimin e Uajtejkër injoroi linjën statutore të pasimit të një posti dhe u mohoi senatorëve rolin e tyre kushtetues të këshillimit dhe konsensusit për figurat e propozuara nga presidenti.

“Mënyrat e vetme për të përcaktuar pasardhësin në atë post janë: kalimi i rregullt dhe këshillimi dhe konsensusi me senatorët”, ka deklaruar një anëtar i komisionit gjyqësor të Senatit amerikan për agjencinë e lajmeve “Reuters”.

Klauzola e emërimit në Kushtetutën e Shteteve të Bashkuara thotë se, figura të caktuara të qeverisë, të njohur si “oficerët kryesorë”, duhet të konfirmohen nga Senati. Por për senatorin republikan Çak Grejslli, Trump e kishte autoritetin për të bërë një emërim të tillë, edhe duke anashkaluar Senatin./abcnews.al

gjykata.jpg
G. P.21:39 | 03/10/2018

Darian Pavli është përzgjedhur si kandidat për anëtar i Gjykatës Europiane për të Drejtat e Njeriut.

Komisioni përzgjedhës i kandidatëve për anëtarë të kësaj gjykate e ka përzgjedhur Pavlin, si kandidatin më të kualifikuar mes emrave të propozuar nga Shqipëria. Dy emrat e tjerë të propozuar ishin Sokol Berberi dhe Marjana Semini.

Kandidatë për anëtarë të Gjykatës Europiane për të Drejtat e Njeriut kishin propozuar edhe Turqia e Norvegjia. Komisioni përzgjedhës ka intervistuar të gjithë kandidatët më 28 Shtator. Përvec kandidatit të Shqipërisë, komisioni ka pranuar edhe një prej kandidatëve të propozuar nga Norvegjia, ndërsa ka rrëzuar listën e Turqisë, pasi nuk kishte kandidatë mjaftueshëm të kualifikuar.

Votimi në Asamblenë Parlamentare të Këshillit të Europës do bëhet më 9 Tetor, por sipas procedurës, pavarësisht pëlqimit për kandidatin Darian Pavli, në votim do përfshihen edhe dy kandidatët e tjerë Sokol Berberi e Marjana Semini, ndërsa rezultati do varet edhe nga lobimi, për secilin kandidat.

Kjo është hera e tretë që Shqipëria paraqet listën e kandidatëve për anëtarë të Gjykatës Europiane për të Drejtat e Njeriut. Lista e parë u rrëzua për mosrespektim procedurash, ndërsa e dyta për për mosplotësim kriteresh nga kandidatët./abcnews.al

ruciiiiii.jpg
G. P.14:40 | 26/09/2018

Miratohet mes debateve dhe vetëm me votat e mazhorancës kalendari i punimeve të Kuvendit mbi propozimet e opozitës për ndryshimet kushtetuese që do të mundësonin Vettingun në politikë, si dhe propozimi për marrjen e një mendimi nga Komisioni i Venecias për këtë draft.

Në mbledhjen e përbashkët të Këshillit të Legjislacionit dhe Komisionit të ligjeve, nën drejtimin e kreut të Kuvendit, Gramoz Ruçi, debati ishte i parashikueshëm.

Mazhoranca kërkon një opinion të Venecias, pasi prentendon se ndryshimet ndërhyjnë me ligjet e reformës në drejtësi. Për opozitën, kërkesa e këtij opinion, artificial si e quajti, por edhe vetë kalendari i punimeve ndërtuar nga mazhoranca, kanë për qëllim vetëm vonesën e procedurës, urgjente për vendin, sipas tyre.

“Deri ditën e fundit që duhet të mbarojë kjo procedurë, kam përshtypjen që kjo zgjatje nuk është gjë tjetër veç një strategji për ta shtyrë duke u fshehur pas procedurës”, tha Alibeaj.

“Ne si deputetë të shumicës e konsiderojmë si thelbësor edhe marrjen e një mendimi nga Komisioni i Venecias”, u shpreh Manja.

“Keni qenë ju një vit më parë që bërtitë me forcë që Vettingun për gjyqtarë e prokurorë ta bënit dhe për policë e gardistë. S’kishit nevojë dhe atëheërë për Komisionin e Venecias. Ndryshimi i vetëm para një viti ishte që ata që do ta mbanin mbi kurriz ishin policët, sot do duhet ta mbajmë ne”, u shpreh Alibeaj.

“Nuk e kuptoj këtë merakun e madh të opozitës për të mos e çuar këtë projekt kushtetues në Venecia, por e konsideroj një veprim me dy standarde të opozitës. Për dekriminalizimin Oerd Bylykbashi thoshte që nuk ka asnjë projekt kushtetues që të mos shkojë në Venecia”, tha Manja.

Mbledhja përcaktoi edhe relatorët Oerd Bylykbashi për opozitën dhe Vasilika Hysi për mazhorancën, si dhe ekspertët e fushës, Gazmend Bardhi nga demokratët dhe Artur Metani dhe Gledion Llanaj për socialistët./abcnews.al

bushattt.jpg
G. P.15:22 | 18/07/2018

Një ditë pas vizitës së komisionerit Hahn në Tiranë, ministri i Jashtëm, Ditmir Bushati, ishte në një seancë dëgjimore në komisionin e jashtëm për punën që do kryhet gjatë 12 muajve të ardhshëm me procesin e monitorimit të ecurisë së Shqipërisë, bazuar në 35 kapitujt që parashikon procesi i antarësimit të Shqipërisë në BE.

Bushati që është edhe drejtuesi politik i këtij procesi që do kryhet në bashkëpunim të ngushtë me Komisionin Europian, iu përgjigj interesit të deputetëve socialistë e atyre të LSI në komision.

Ministri i Jashtëm tha se puna nis pa humbur kohë e në këtë proces duhet bashkëpunimi i të gjithë aktorëve politikë./abcnews.al

dwftesa.jpg
G. P.13:52 | 17/07/2018

Mazhoranca dhe opozita u përfshinë në debate në komisionin parlamentar të edukimit dhe mjeteve të informimit publik. Shkak u bë shperndarja e dëftesave për nxënësit e arsimit parauniversitar.

Një pyetje provokuese që deputetja demokrate Albana Vokshi i drejtoi ministres së Arsimit, Lindita Nikolla, për shpërndarjen e dëftesave për nxënësit në arsimin parauniversitar nxiti debat në komsionin parlametar për edukimin dhe mjetet e informimit publik.

“Ndiheni e turpëruar për deklaratën tuaj publike të fundit, ku keni mashtruar publikisht në lidhje me lëshimin e dëftesave? Këni gënjyer për dëftesat dhe ja ku e keni dëftesën, e cila është e gabuar dhe ju e keni mohuar këtë fakt. Këtu keni mashtruar kur keni thënë që dëftesat janë shpërndarë, ndërkohë mijëra mesazhe na kanë ardhur që njoftojnë se dëftesat do të shpërndahen në Shtator”, tha Vokshi.

Akuzat, ministrja Lindita Nikolla, i cilësoi shpifje, ndërsa u shpreh se për to i është drejtuar Prokurorisë.

“Padyshim do t’i shkoj deri në fund në organet e drejtësisë të gjitha akuzat që janë bërë publike karshi personit tim. Shpif, shpif se diçka mbetet nuk mund të jetë një vijë sjelljeje që na kalon duke mbyllur sytë edhe veshët. Sigurisht ka mbetur sjellja e një partie që ka humbur çdo kauzë, por për ne që punojmë me mish e me shpirt, me ndershëri për të  ndryshuar shumë nga zullumet e bëra qoftë edhe në sistemin arsimor, sigurisht kërkohet një sjellje tjetër. Ju sapo gënjyet, ku thatë që dëftesat do të shpërndahen në Shtator sepse është një proces që po vazhdon në të gjitha shkollat e Shqipërisë”, tha ministrja Nikolla.

Demokrati Luçiano Boçi sfidoi ministren e Arsimit me një email që Drejtoria Arsimore e Durrësit gjashtë ditë më parë i kishte dërguar drejtorive të shkollave në këtë zonë.

“Nëse jeni në procesin e dorëzimit të dëftesave në klasën së 9 të ndërpritet puna deri në një njoftim të dytë pasi do të riprintohen dhe njëherë dëftesat e tërhequra nga ju. Nëse keni shpërndarë dëftesa, se thatë nuk janë shpërndarë dëftesa ju lutem të gjeni mundësinë t’i mblidhni në shkollë”, tha deputeti Luçiano Boçi.

Ministrja Nikolla pranoi se ka pasur një gabim rendor nga 9 tek 11 vetëm tek dëftesat e klasës se nëntë, të cilat tha se pas publikimit të deputetit në rrjetet sociale dëftesat janë tërhequr. Në komisionin parlamentar të medias dhe mjeteve të informimit publik, ministrja e Arsimit ishte thirrur në një seancë dëgjimore për projektligjin për arsimin parauniversitar, por pjesën më të madhe të diskutimit e zuri çështja e dëftesave./abcnews.al

ekonomia.jpg
G. P.16:35 | 16/07/2018

Në bazë të një auditi të bërë nga Kontrolli i Lartë i Shtetit, Komisioni Parlamentar i Ekonomisë  kërkon thellim të hetimit për çështjen e blerjes nga ana e Bankës së Shqipërisë së Hotel Dajtit. Dyshimet janë se banka qendrore ka emetuar para enkas për blerjen e godinës, ku shitësi ishte qeveria shqiptare.

Komisioni i Ekonomisë dhe Financave i kërkon Kontrollit të Lartë të Shtetit që të thellojë auditimin dhe hetimin e çështjes së blerjes së Hotel Dajtit në kushtet e emetimit të monedhës. Kërkesa është bërë në rezolutën që ky komision miratoi për veprimtarinë e KLSH-së, bazuar në një audit të mëparshëm që organi më i lartë i kontrollit të institucioneve publike ka bërë në Bankën e Shqipërisë.

“Komisioni i Ekonomisë dhe Financave nxit KLSH të thellojë më tej hetimin e blerjes së Hotel Dajtit në kushtet e financimit me emetim të monedhës pavarësisht faktit se të ardhurat mund të ishin për të bërë një blerrje të tillë”, tha Blerina Gjylameti.

Auditi i KLSH-së nuk është bërë ende publik, por në bazë të rezolutës së miratuar në këtë seancë bëhet fjalë për blerjen e godinës nga ana e bankës qëndrore në vitin 2010 me një vlerë prej 30 milion eurosh. KLSH dyshon se janë emetuar para enkas për blerjen, duke shkelur rregullat. Përveç kësaj Komsioni i Ekonomisë kërkoi rihapjen e një auditi të plotë të ndërtimit të rrugës Durrës-Kukës./abcnews.al

debatt.jpg
G. P.15:28 | 16/07/2018

Në komisonin e medias ishte thirrur për dëgjesë drejtori i Përgjithshëm i Hipotekave, Valdrin Dalipi. Por opozita e ka mbyllur mledhjen me pretendimin se kryeregjistruesi nuk pranon të përgjigjet se sa metra katror truall publike dhe private do t’i jepen kompanisë që do të ndërtojë Teatrin e ri Kombëtar.

Prej kohësh Komisionin e Medias dhe Edukimit e karakterizon zhurma dhe debatet me zë të lartë.

Deputetë të majtë e të djathtë janë mbledhur të dëgjojnë drejtorin e Përgjithshëm të Hipotekave, Valdrin Pjetri, i cili duhet t’i informojë mbi truallin, ku do të ndërtohet Teatri i ri Kombëtar.

“Kërkesa juaj që keni firmosur ishte vetëm për kartelë”, tha Pjetri.

“E ke kërkesën në hartë”, u shpreh deputeti i PD-së, Luçiano Boçi.

Por kryeregjistruesi nuk është përgatitur t’i japë përgjigje pyetjeve të opozitës.

“Por refuzoni të përgjigjeni sa ka kompania “Fusha” dhe sa kanë privatët. Harta duhet të vinte bashkangjitur”, tha Vokshi.

“Zona kadastrale nuk është hartë. Duhet ta kuptoni mirë këtë. Zona kadastrale përbëhet nga 14 mijë e 700 e 50 pasuri. Këtyre pyetjeve nuk kam çfarë t’ju shtoj asnjë presje më”, u përgjigj Pjetri.

Përballë akuzave të opozitës, drejtori i Përgjithshëm i Hipotekave nuk u ndje i vetmuar, në krah i dolën deputetët e majtë.

“Këtu krijohet iluzioni sikur harta është sekret. Absolutisht jo. Nëqoftëse ne nuk e kemi specifikuar këtu që jemi të interesuar për filan pronar, por kemi thënë për pronat në tërësi, zotëria duke iu referuar zonave kadastrale e dha përgjigjen”, shtoi Besnik Bare.

Dhe siç ndodh rëndomë në Komisionin e Medias dhe Edukimit mbledhja mbaron ashtu siç fillon, me pyetje pa përgjigje. Teatri vazhdon të ketë role pro dhe kundër shembjes së tij./abcnews.al

albana-vokshi.jpg
G. P.11:07 | 12/07/2018

Komisioni i Medias shtyn sërish mbledhjen e parashikuar për sot me kryeregjistruesin e Hipotekës, Valdrin Pjetri, lidhur me pronën e Teatrit Kombëtar. Mbledhja  u shty pasi kreu i Hipotekës nuk mundi të paraqitej për shkak të angazhimeve në aktivitete të tjera.

Pas shtyrjes së seancës dëgjimore dje në komisionin e medias me një ditë, Valdrin Pjetri mësohet të ketë kërkuar më shumë kohë për të përgatitur informacionin e këkuar nga komisioni.

Për këtë arsye mbledhja do të zhvillohet ditën e hënë më 16 Korrik. Pjetri pritet të japë në komision informacione dhe shpjegime lidhur me sipërfaqen aktuale të pronës, ku sot ndodhet Teatri Kombëtar, ndryshimet që ka pësuar në vite si dhe mënyrën e tjetërsimit të pronave rreth saj./abcnews.al

komision.jpg
G. P.11:21 | 11/07/2018

PD dhe LSI kanë kërkuar shtyrjen e mbledhjes së komisionit të ligjeve, të parashikuar për orën 11:00, ku është planifikuar shqyrtimi i raporteve te Ministrisë së Drejtësisë për kriminalitetin si dhe ai i Prokurorisë së Përgjithshme për veprimtarinë e vitit 2017.

Kërkesën zyrtare drejtuar kreut të Kuvendit, Gramoz Ruçi, për shtyrjen e kësaj mbledhje krerët e grupeve parlamentare opozitare Edmond Spaho dhe Petrit Vasili e argumentojnë shkeljen e rregullores së Kuvendit. Sipas tyre, raportet janë futur në rend dite të komisionit të ligjeve pa qenë më parë në kalendarin e punimeve të Kuvendit si dhe pa u këshilluar me nënkryetarin e këtij komisioni, demokratin Enkelejd Alibeaj.

Ky i fundit njëkohësisht ndodhet jashtë vendit me detyrë nga Kuvendi, gjë që pamundëson pjesëmarrjen e tij në seancë. Në kërkesë theksohet gjithashtu se raportet janë voluminoze dhe kërkojnë kohë për një shqyrtim serioz./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono