kina

Hiddink-1280x640.jpg
Igli Nikolli12:16 | 20/09/2019

Kina po hedh miliona pafund në futboll, por nevojitet kohë, durim dhe një brez i talentuar për të tentuar rezultate pozitive. Kampionati po rritet dhe emra të rëndësishëm zgjedhin ofertat e “parefuzueshme” të vendit aziatik.

Ndryshe është situata në kombëtare, aty ku problemet janë të mëdha. Federata Kineze e Futbollit ka vendosur të shkarkojë trajnerin Guus Hiddink nga drejtimi i kombëtares olimpike. 72-vjeçari holandez, i cili ka një eksperiencë të jashtëzakonshme, u ul në këtë post shtatorin e kaluar.

Ecuria aspak pozitive dhe humbja 2-0 në miqësoren përballë Vietnamit bindën drejtuesit që të bënin këtë ndryshim. Në vend të Hiddink do të ulet Hao Wei, i cili ka drejtuar më parë kombëtaren e femrave kineze. /abcnews.al

173F5C0C-369C-4F27-BD84-E97E555163BF_w1023_r1_s.jpg
ent ela09:30 | 20/09/2019

Rusia dhe Kina vendosën veton ndaj një rezolute të mbështetur nga shumica e anëtarëve të Këshillit të Sigurimit të Kombeve të Bashkuara, që kërkuan armëpushim në provincën veri-perëndimore Idlib të Sirisë.

Rezoluta kërkonte që aktivitetet kundër-terrorizmit të përputheshin me ligjin ndërkombëtar humanitar.

Ambasadori i Rusisë në Kombet e Bashkuara, Vassily Nebenzia, tha se qëllimi i rezolutës – të hartuar nga Gjermania, Belgjika dhe Kuvajti – ishte “të shpëtonte nga humbja e tyre e fundit, terroristët ndërkombëtarë që janë futur në Idlib”.

Ambasadori i Gjermanisë, Christoph Heusgen, tha se përkrahësit e rezolutës humanitare “qëndrojnë të vendosur për të luftuar terrorizmin” – por insistojnë që operacionet duhet të sigurojnë mbrojtje të civilëve, siç kërkohet nga ligji ndërkombëtar.

Më parë, një zyrtare e lartë e Kombeve të Bashkuara i tha Këshillit të Sigurimit se situata humanitare në Idlib ishte “alarmante”.

Rreth 400.000 njerëz kanë ikur nga shtëpitë e tyre në veriperëndim të vendit vetëm në katër muajt e fundit, dhe rreth 600.000 janë duke jetuar në tenda, kampe ose në mjedis të hapur.

Idlibi, provincë në veriperëndim të Sirisë, është zona e fundit që drejtohet nga grupet rebele, të cilat kanë tentuar të rrëzojnë nga pushteti presidentin, Bashar al-Assad, prej kur ka nisur lufta civile më 2011.

Nga ajo kohë, kjo provincë është kontrolluar nga një numër i fraksioneve rivale. /REL

daxing.jpg
ent ela09:00 | 20/09/2019

Kina është gati të përurojë aeroportin më të ri ndërkombëtar. “ Daxing Pekin” është konsideruar si një mega-aeroport dhe do të jetë një ndër më të mëdhenjtë në botë. Ndërsa ajo që ka tërhequr më shumë vëmendjen është forma e veçantë e tij. Nga lart ai duket si yll deti.

Pekini mban vendin e dytë në botë për aeroportin më të frekuentuar, që është ai i kryeqytetit, Pekinit. Duke qenë se ai po mbingarkohet dhe nuk mund të shtohen fluturime, apo avionë të rinj, është konsideruar si domosdoshmëri krijimi i një hapësire tjetër me një kapacitet më të madh.

Së bashku me të do të përurohet dhe Airbus A380, avioni më i madh në botë, që konsiderohet si pjesë e epokës së re të transportit ajror.  Gjë që lë të kuptohet që synimet e tyre janë akoma dhe më të mëdha.

Për këtë projekt kanë nisur punimet që në vitin 2014 dhe vlera e tij mendohet të ketë arritur deri në 11.5 miliardë dollarë, ndërkohë që fluturimi i parë do të kryhet nesër më 20 Shtator.

Klan Plus

190912233528-04-hong-kong-protest-0912-restricted-1280x720.jpg
G. P.14:30 | 14/09/2019

Protesta dhe dhunë mëngjesin e të shtunës në Hong Kong. Qindra mbështetës të Pekinit u mblodhën për të manifestuar në një qendër tregtare, duke mbajtur në duar flamuj kinezë dhe parulla pro Policisë së Kinës.

Mbështetës të reformave pro demokracisë organizuan një kundër protestë. Mes tyre fillimisht kishte ofendime e më pas situata degjeneroi në sulme fizike. Situata u qetësua vetëm pas ndërhyrjes së policisë e cila arrestoi një numër të madh personash./ABC News Albania 24/7

190911091156-01-us-china-trade-file-exlarge-169.jpg
ent ela22:15 | 11/09/2019

Kina ka përjashtuar disa kategori produktesh amerikane nga tarifat, një lëvizje kjo që është mirëpritur nga presidenti Donald Trump. Por analistët janë skeptikë se ky gjest i afron palët drejt një marrëveshjeje për t’i dhënë fund luftës tregtare.

Presidenti amerikan Donald Trump mirëpriti të mërkurën vendimin e Kinës për të përjashtuar nga tarifat disa produkte amerikane, mes të cilave ilaçet kundër kancerit. Lëvizja vjen disa ditë përpara një takimi të planifikuar mes delegacioneve të dy vendeve për të ulur tensionet e luftës tregtare.

“Ishte një lëvizje e madhe nga Kina dhe njëkohësisht një gjest pozitiv përpara takimit të negociatorëve tanë në Uashington”, tha Trump për gazetarët në Shtëpinë e Bardhë. Pekini zyrtar njoftoi të mërkurën heqjen e tarifave për 16 produkte amerikane, ku veç ilaçeve për kancerin bëjnë pjesë edhe ingredientët e ushqimeve për kafshët dhe ushqimi me bazë peshku.

“Ata bënë një lëvizje dhe bënë mirë. Mendoj se nuk ishte vetëm një gjest, por një lëvizje e madhe”, vijoi më tej Trump.

Ai tha se shpreson të arrijë një marrëveshje me Kinën pas më shumë se një vit përplasjesh për tarifat, përplasje që kanë tronditur edhe tregjet financiare globale.

“Unë negocioj me ta, i njoh mirë dhe më pëlqejnë. Shpresoj që së bashku të bëjmë diçka”, shtoi Trump. Negociatorët e dy vendeve do të takohen në Uashington në mes të shtatorit, takim ky që do të pasohet nga një tjetër në nivel ministrash në tetor. Sidoqoftë, datat e sakta të takimeve nuk janë publikuar. Disa analistë e shohin lëvizjen e Pekinit si një gjest miqësor, por jo si një sinjal se të dyja palët janë gati për një marrëveshje. /ABC News Albania 24/7

hong.jpg
G. P.16:59 | 08/09/2019

Protestuesit në Hong Kong i kanë kërkuar ndihmë presidentit Donald Trump. Ata kanë kërkuar që Shtetet e Bashkuara të dalin garant për respektimin e autonomisë së rajonit nga Kina dhe të sanksionojë politikanët kinezë që shkelin liritë e tij.

Protestuesit pro-demokracisë në Hong Kong i kanë kërkuar ndihmë presidentit amerikan Donald Trump, teksa kanë marshuar të dielën në afërsi të konsullatës amerikane.

Disa prej manifestuesve kanë mbajtur parulla me shkrimet “President, shpëtoni Hong Kongun” dhe “Bëjeni Hong Kongun të madh sërish”, njësoj si parulla që shefi i Shtëpisë së Bardhë përdor për Amerikën.

Protestat, që kanë hyrë në javën e 14, kanë vazhduar pavarësisht se qeveria e Hong Kongut përmbushi disa nga kërkesat kyçe të qytetarëve. Turma e njerëzve ka ngritur flamuj amerikanë dhe i ka bërë thirrje Shteteve të Bashkuara që të çlirojnë Hong Kongun nga Kina.

Ata i kanë kërkuar palës amerikane që të miratojë Aktin për demokracinë dhe të drejtat e njeriut në Hong Kong, një ligj që do t’i kërkonte Uashingtonit të siguronte shkallën e lartë të autonomisë së rajonit, si dhe do të ekspozonte zyrtarët kinezë ndaj sanksioneve amerikane nëse konsiderohen përgjegjës për shkelje të lirive të rajonit.

Manifestuesit kanë kënduar himnin kombëtar amerikan dhe kanë insistuar për plotësimin e 5 kërkesave të tjera, pas përmbushjes së asaj për anulimin e ligjit të ekstradimit më herët gjatë javës.

Ndërkohë, qeveria në Kinë ka paralajmëruar vendet e tjera që të mos ndërhyjnë në këtë çështje. Pekini pretendon se situata në Hong Kong, një ish-koloni britanike që iu dorëzua Kinës në vitin 1997, është një çështje e brendshme kineze./ABC News Albania 24/7

trump-xi.jpg
G. P.23:10 | 05/09/2019

Shtetet e Bashkuara dhe Kina do të rinisin më 1 Tetor bisedimet për tejkalimin e luftës tregtare ku janë përfshirë. Bisedimet do të jenë të nivelit të lartë, por sipas agjencisë “Reuters”, palët janë ende larg arritjes së një marrëveshjeje.

Kina dhe Shtetet e Bashkuara ranë dakord të enjten për të mbajtur bisedime të nivelit të lartë në fillim të tetorit në Uashington, për të zgjidhur kontestin tregtar mes tyre.

Rënia dakord në parim ka gëzuar investitorët, të cilët shpresojnë që lufta tregtare të marrë fund, në një kohë kur Amerika ka vendosur tarifa të reja mbi mallrat kineze të konsumit.

Pëlqimi për bisedimet e reja u dha gjatë një bisede telefonike mes zëvendës kryeministrit kinez Liu He dhe sekretarit amerikan të Thesarit, Stiven Mnushin. Ata do të takohen personalisht në kuadër të bisedimeve të nivelit të lartë, të cilat janë ndërprerë që prej fundit të korrikut, kur dështimi i një takimi detyroi presidentin Trump të vijonte me vendosjen e tarifave të reja.

Por mes palëve nuk ka asnjë garanci se raundi i parë i këtyre tarifave do të shfuqizohet falë bisedimeve, ose do të ndalojë rritjen e tarifave nga 15 deri në 25 për qind për 250 miliardë dollarë mallra kineze. Shtetet e Bashkuara dhe Kina mbeten thellësisht të ndara sa i takon thelbit të një marrëveshjeje që do t’i jepte fund luftës tregtare që zgjat prej 14 muajsh.

Në Maj, Uashingtoni akuzoi Pekinin se nuk kishte zbatuar angazhimet e marra përsipër dhe se kishte ndryshuar ligjet dhe praktikat sa i takon mbrojtjes së pronës intelektuale, rritjen e aksesit të produkteve amerikane në tregun kinez dhe hyrjen e teknologjisë amerikane tek kompanitë kineze./ABC News Albania 24/7

china-us.jpg
G. P.19:43 | 01/09/2019

Shtetet e Bashkuara kanë vendosur një paketë të re tarifash ndaj produkteve kineze. Në kuadër të planit të hartuar nga presidenti Donald Trump, këtë herë do të preken veshjet dhe ushqimet kineze.

Shtetet e Bashkuara kanë vendosur tarifa të reja mbi mallra kineze me vlerë 112 miliardë dollarë, duke prekur këtë herë këpucë, pelena për fëmijë dhe ushqime. Tarifat e reja përbëjnë një përshkallëzim të theksuar të luftës tregtare dhe mund të kushtojnë konsumatorëve 800 dollarë në vit.

Lëvizja është gjithashtu faza e parë e planit më të fundit të presidentit Donald Trump për të vendosur 15 për qind tarifa mbi 300 miliardë dollarë mallra kineze brenda këtij viti.

Si kundërpërgjigje, Pekini vendosi tarifa mbi naftën amerikane, duke bërë që për herë të parë të taksohen karburantet. Nëse implementohet tërësisht, programi i zotit Trump do të thotë se thuajse të gjitha importet kineze, me vlerë 550 miliardë dollarë, do të jenë subjekt i tarifave ndëshkuese.

Ajo që fillimisht ishte një përplasje për praktikat e padrejta tregtare të Kinës është kthyer tashmë në një luftë gjeopolitike për pushtet.

Deri më sot, Uashingtoni ka vendosur tarifa për mallra kineze me vlerë 250 miliardë për t’i bërë presion Pekinit që të ndryshojë politikat e tij mbi pronën intelektuale, subvencionet industriale dhe aksesin në treg.

Nga ana e tij, Pekini ka mohuar vazhdimisht praktikat tregtare të padrejta dhe është hakmarrë duke vendosur tarifa për produktet amerikane me vlerë 110 miliardë dollarë./ABC News Albania 24/7

TRUMP-AUTOMJETET.mpg_snapshot_00.07-1280x720.jpg
ent ela20:30 | 30/08/2019

Presidenti Donald Trump ka rindezur debatin me prodhuesit e automjeteve. Në kuadër të luftës tregtare me Kinën, Trump i ka kërkuar gjigantit “Xheneral Motors” që të braktisë vendin aziatik dhe të rikthejë fabrikat e prodhimit në Amerikë.

Presidenti amerikan Donald Trump, i përfshirë në luftën tregtare me Kinën, ka deklaruar të premten se gjigandi amerikan i automjeteve “Xheneral Motors” duhet t’i kthejë fabrikat e saj të prodhimit në Shtetet e Bashkuara. ““Xheneral Motors”, që dikur ishte gjiganti i Detroitit, tani është një nga fabrikat më të vogla që ndodhen atje. Ata i lëvizën impiantet e tyre në Kinë përpara se unë të vija në pushtet, pavarësisht ndihmave që i janë dhënë nga shteti amerikan. Tani, a nuk duhet që ata të kthehen sërish në Shtetet e Bashkuara?”, ka deklaruar Trump në profilin e tij në Tëitter. Kompania e automjeteve nuk i është përgjigjur deklaratës së Trump, por presidenti e ka kritikuar edhe më parë atë, për prodhimin e automjeteve në Meksikë dhe mbylljen e impianteve të prodhimit në Miçigan, Ohajo dhe Merilend. Ndërkohë, Kina është tregu i automjeteve më i madh në botë dhe politikat e qeverisë favorizojnë kompanitë që montojnë automjetet atje dhe rrjedhimisht vendi aziatik nuk i importon ato nga përtej oqeanit. Duke iu përgjigjur tarifave të fundit të Trump, Kina deklaroi javën e kaluar se do të rivendosë 25 për qind tarifa mbi automjetet amerikane. “Xheneral Motors” shiti 3.6 milionë automjete në Kinë vitin e kaluar, kuotë kjo që përbën 43 për qind të shitjeve të saj në mbarë botën. Në qershor, Trump refuzoi kërkesën e kompanisë për të përjashtuar një nga modelet e saj të prodhuara në Kinë nga tarifa prej 25 për qind e vendosur për importin e makinave sportive. /ABC News Albania 24/7

usa.jpg
G. P.13:37 | 27/08/2019

Skuadra kombëtare amerikane mbetet favorite për Kupën e Botës në basketboll për meshkuj, që nis këto ditë në Kinë. Pretendentë për trofeun e madh janë edhe Serbia, Lituania e Greqia.

Me apo pa më të mirët, nuk mbetet pa titullin e favorites. Skuadra e basketbollit të Shteteve të Bashkuara të Amerikës shkon si e tillë në Kupën e Botës që nis në Kinë në 31 gusht, edhe pse nuk është aspak në formën më të mirë.

Pas humbjes me Australinë, SHBA-ja mundi Kanadanë 84-68, duke mos qenë asnjëherë në humbje, e duke kthyer disi besimin në vetvete. Në Melburn, amerikanët pësuan humbjen e parë pas 78 ndeshjesh radhazi.

Mungesa e lojtarëve si Lebron Xhejms, Kevin Durant, Koui Leonard, Stefën Kërri apo Xhejms Hardën, e bën të vështirë detyrën për skuadrën legjendare në Kinë, por gjithsesi, Shtetet e Bashkuara jepen favorite.

Gjithnjë e më shpesh po ndodh që yjet më të mëdhenj amerikanë refuzojnë kombëtaren, të painteresuar për një lavdi të tillë. NBA është tepër e fortë dhe e lodhshme për të lejuar ngarkesa të tjera.

Ekipi i trajnerit të lavdishëm Greg Popoviç ka vetëm emra si Kemba Uoker, Xhejlën Braun, Kris Midëllton, Donovan Miçëll apo Xhejzën Tatëm, dhe fare mirë mund të jetë i thyeshëm.

Cilët pritet të jenë rivalët kryesorë të Amerikës në Kinë?

Padyshim jo skuadra vendase, ndërsa Spanja apo Argjentina nuk janë në nivelet e dikurshme. Pretendente numër 2, sipas parashikimeve, është Serbia.

E cilësuar një superfuqi që prej viteve 60-të kur ishte Jugosllavi, skuadra e trajnerit Gjorgjeviç ka 4 lojtarë në NBA-së, si Nikola Jokiç të Denverit, Boban Marjanoviç të Filadelfias dhe Bogdan Bogdanoviç e Nemanja Bjelica të Sakramentos.

Përveç tyre, janë edhe mjaft lojtarë të ligave më të forta të Europës, por të dëmtuar mbeten yje si Teodosiç, Kuzmiç apo Milosavljeviç. Dy herë kampione e botës si Serbi dhe 5 herë total bashkë me kohën e ish-Jugosllavisë, skuadra ballkanase gjithnjë e ka një shans.

Lituania e trajnerit Adomaitis vlerësohet si pretendente e tretë.

Traditën e lavdishme të Sabonisit, Kurtinaitisit apo Marçulionisit sot e vazhdojnë Domantas Sabonis e Jonas Valançiunas që luajnë në NBA, ndërsa plot 5 lojtarë luajnë në ligën lituaneze me Zhalgirisin e Ritas Vilniusin.

Pretendentja tjetër serioze cilësohet Greqia, dhe kjo së pari për shkak të Janis Antetokumbosit. Lojtari më i mirë i NBA-së sezonin e kaluar, do të ketë në krah vëllanë e tij, Thanasisin, që gjithashtu luan për Miluokin.

Dy afrikanët e lindur në Greqi udhëheqin një ekip me emra të respektuar si Kalathes, Burusis, Slukas, Princezis apo Papanikolau./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono