kadri veseli

lideret.jpg
G. P.12:46 | 06/10/2019

Liderët e partive kryesore në Kosovë si dhe kandidatët për kryeministër menjëherë pas votimit kanë bërë apel që të gjithë qytetarët të bëhen pjesë e kësaj dite historike.

Nuk kanë munguar apelet dhe mesazhet as në ditën e sotme ku menjëherë pas votimit liderët politikë në Kosovë kanë dhënë mesazhet e tyre për qytetarët e vendit. Hashim Thaçi kreu i shtetit të Kosovës dhe njëherë më shumë, pas votimit, ka kërkuar që ai i së dielës të jetë një proces elektoral i lirë dhe i drejtë.

Ramush Haradinaj kandidati për kryeministër i Aleancës për Ardhmërinë e Kosovës bëri apel që të gjithë qytetarët me të drejtë vote të dalin në zgjedhje ndryshe do të ishin të tjerët që do të votonin për ta.

Kandidati i Lëvizjes Vetëvendosje për kryeministër Albin Kurti pas votimit në Prishtinë u shpreh se kjo pjesëmarrje masive në votime do të shndërrohet në një festë masive.

Kadri Veseli kandidati i Partisë Demokratike të Kosovës për kryeministër pasi ka hedhur votën e tij, e ka cilësuar të sotmen si një ditë të jashtëzakonshme për demokracinë e vendit.

Vjosa Osmani nga radhët e Lidhjes Demokratike të Kosovës është e para grua që garon për postin e kryeministrit. Pas votimit, ajo i ftoi të gjithë qytetarët të jenë pjesë e kësaj dite historike.

Kryetari i NISMA, Fatmir Limaj u shpreh se votimi i sotëm do t’i japë mundësi vendit që të bëjë hapat e duhur. Njëzëri liderët politikë theksuan se procesi i votimit duhet të ishte i lirë dhe demokratik në mënyrë që të gjithë të shprehin vullnetin e tyre./ABC News Albania 24/7

kosove-votime.jpg
G. P.09:27 | 06/10/2019

Kryetari i Partisë Demokratike të Kosovës njëkohësisht dhe kandidat për kryeministër, Kadri Veseli, votoi në qendrën e tij të votimit në shkollën “Faik Konica”. Në një prononcim të shkurtër për mediat, Veseli tha se kjo është një ditë e jashtëzakonshme për Kosovën si dhe uroi qytetarët që t’i japin perspektivë perëndimore vendit.

“Sot është një ditë e mirë, një ditë e jashtëzakonshme për Kosovën tonë të shenjtë. I uroj të gjithë qytetarët e vendit tim t’i japin perspektivë vetvetes t’i japin perspektivë Kosovës, të ardhmes sonë. Për hajër na qoftë të gjithëve. Faleminderit të gjithëve”, tha Veseli.

Më shumë se 1.9 milionë qytetarë me të drejtë vote do t’i drejtohen sot kutive të votimit për legjislaturën e shtatë të Kuvendit të Kosovës. Procesi zgjedhor ka nisur në orën 07:00 dhe pritet të përfundojë në orën 19:00.

Në konferencën e parë për mediat, KQZ bëri të ditur se procesi ka nisur i rregullt në përjashtim të disa vendvotime. Bëhet fjalë për disa qendra votimi në Leposaviç dhe Zveçan ku ka pasur përplasje mes komisionerëve serbë për mënyrën e votimit.

Ndërkohë burime për ABC News kanë mësuar se vëzhguesit e OSBE-së në veri të Kosovës shoqërohen nga forca sigurie./abcnews.al

zgjedhje-ne-kosove.jpg
G. P.16:58 | 05/10/2019

Përgatiti Dorina Kurtaj – Është hera e katërt që vendi shkon në zgjedhje të parakohshme që nga shpallja e pavarësisë në vitin 2008. Asnjë qeveri deri tani nuk ka arritur të përfundojë të plotë mandatin.

Vajtja sërish në kutitë e votimit u shkaktua si pasojë e dorëheqjes së kryeministrit Ramush Haradinaj në Korrik dhe shpërndarjes së parlamentit. Haradinaj është kryetar i partisë konservatore Aleanca për Ardhmërinë e Kosovës. Ish-komandanti i Ushtrisë Çlirimtare të Kosovës në konfliktin e 1998-1999 kundër forcave serbe, 51 vjeç, dha dorëheqjen pasi u thërrit nga një gjykatë ndërkombëtare rreth dyshimeve për krime lufte. Dhe në të kaluarën ai ka qenë në qendër të akuzave të tilla, por në fund është shpallur i pafajshëm.

Pavarësia e Kosovës njihet nga më shumë se 100 vende: mes të cilave dhe Shtetet e Bashkuara të Amerikës, të cilat i shohin zgjedhjet e radhës si një mundësi për rifillimin e një dialogu paqësor me Serbinë. Gjithsesi, Rusia, Kina dhe pese vende europiane si Greqia, Qipro, Rumania, Sllovakia dhe Spanja, mbështesin Serbinë, e cila në nivel ndërkombëtar ka ndërmarrë një aktivitet lobues për të bindur vendet anëtare të Kombeve të Bashkuara që të tërheqin njohjen e Kosovës. Vendi i fundit që ka tërhequr njohjen sipas Beogradit, është Togo.

Mes Serbisë dhe Kosovës, tensionet në këto vite nuk janë ulur asnjëherë me të dyja vendet që synojnë anëtarësimin në Bashkimin Europian. Kosova nuk është anëtare as e NATO-s dhe as e Bashkimit Europian, dhe qytetarët e Kosovës janë të vetmit në  të gjithë Ballkanin Perëndimor që kanë nevojë ende për vizë për të udhëtuar në Europë. Gjithsesi sipas analistëve në vend, çështja e Serbisë nuk është në qendër të shqetësimeve të votuesve. Prioritetet e qytetarëve në Kosovë janë:

Masa konkrete për të ndaluar largimin e popullsisë nga vendi dhe papunësia;

Përmirësimi i sistemit të arsimit;

Shërbime shëndetësore të garantuara për të gjithë qytetarët;

Luftë ndaj korrupsionit dhe nepotizmit;

Një standard jetese më të pranueshëm pasi në disa zona mes 25% dhe 40 % e popullsisë nuk përfiton ende nga rrjeti i kanalizimeve;

Ndërsa prioritet politik mbetet rifillimi i dialogut me Serbinë dhe Bashkimin Europian për liberalizimin e vizave;

Ndërsa analistë ndërkombëtarë mendojnë se këto zgjedhje janë të rëndësishme sepse dialogu Beograd-Prishtinë për momentin mbetet i bllokuar. Rifillimi i tij është një kusht thelbësor për të arritur në normalizimin e marrëdhënieve. Një pikë e rëndësishme për Kosovën mbetet përmbushja e kritereve të Bashkimit Europian në luftën kundër korrupsionit. Pa këtë të fundit të rinjtë në Kosovë nuk do të mund të përfitojnë nga liberalizimi i vizave për të gjetur një vend pune në zonën Shengen, në mënyrë që të kenë më shumë të ardhura, në një moment që ekonomia në vend nuk është ende e qëndrueshme.

Kosova ka popullsinë më të re në moshë në Europë, mosha mesatare është 29 vjeç, më pak se një e dhjeta e popullsisë është më shumë se 65 vjeç. Dhe pavarësisht kësaj më shumë se një e treta e popullsisë nuk punon, një përqindje që arrin në 60% mes të rinjve. Më shumë se 200 mijë qytetarët të Kosovës janë larguar nga vendi i tyre duke kërkuar azil në vende të Bashkimit Europian që nga moment që vendi shpalli pavarësinë.

Në vitin 2013, Kosova dhe Serbia pranuan të ulen në tryezën e negociatave nën vëzhgimin e Bashkimit Europian, por atëherë nuk u shënuan progrese të rëndësishme. 90% e politikës në Kosovë refuzon çdo lloj kompromisi i cili përfshin lëshim territori në favor të Beogradit, apo një autonomi më të madhe të komunave me minoritet serb, që jetojnë në veri të vendit.  Ideja e rishikimit të kufijve, e propozuar fillimisht nga presidenti i Kosovës Thaçi dhe nga homologu i tij serb Aleksandër Vuçiç, përballet dhe me kundërshtimin e vendeve si Gjermania, me frikën se çdo lloj shkëmbimi territoresh mund të shkaktojë paqëndrueshmëri në Ballkanin Perëndimor.

Në Nëntor të vitit 2018, Prishtina vendosi një tarifë prej 100 për qind në importin e produkteve serbe, në kuadër të reagimit për sulmim diplomatik serb në nivel ndërkombëtar. Bashkimi Europian ka kërkuar që t’i jepet fund kësaj lufte tregtare, pasojat e së cilës janë ende të diskutueshme. Çmimi i disa produkteve të konsumit është rritur në kurriz të shtresës më të varfër të popullsisë. Jo vetëm, pjesa më kontroverse politikisht e kësaj mase, është se në vend nuk lejohet tregtimi i produkteve që vijnë nga Serbia dhe Bosnje e Hercegovina, të cilat nuk kanë në etiketë emrin kushtetues të Republikës së Kosovës. Të gjitha produktet të etiketuara “Kosovo i Metohija” – emri zyrtar serb i Kosovës apo “Kosovo/UNMIK” –  administrata e OKB-së, janë hequr nga tregu. Disa analistë në Kosovë parashikojnë se kjo luftë tregtare do të vazhdojë dhe në të ardhmen

Duhet theksuar, se të gjithë analistët e konsultuar nga Euronews, bien dakord për faktin se negociatat mes Serbisë dhe Kosovës nuk do të rinisin as me qeverinë e re, dhe nëse fiton një parti si Vetëvendosje, që ka një qëndrim më të ashpër në krahasim me Haradinaj, si dhe është kundër çdo lëshimi kur bëhet fjalë për territoret. Kjo sepse negociatat drejtohen nga dy presidentët dhe forcat parlamentare janë të përjashtuara nga ky dialog. Haradinaj e ka të ndaluar të hyjë në Serbi dhe për të është lëshuar një urdhër arresti ndërkombëtar nga Beogradi. Analistë ndërkombëtarë mendojnë se qeveria është e përjashtuar nga negociatat dhe se politika e jashtme drejtohet ende nga presidenti Thaçi.

Ndërkohë mendohet se nga pothuajse 800 mijë qytetarë të Kosovës të cilët jetojnë jashtë vendit, vetëm 35 mijë prej tyre kanë kërkuar të votojnë me anë të postës. Numri i vogël i kosovarëve në diasporë që vendosin të votojnë tregon se si brezi i dytë dhe i tretë ndihen gjithnjë e më pak të lidhur nga jeta e përditshme kosovare. Madje konsiderohet si një komunitet jo shumë i lidhur nga pikëpamja politike sepse kanë lënë një vend që nuk ishte në gjendje t’u garantonte kushte të pranueshme jetese. Pavarësisht partisë fituese, do të jetë shumë e vështirë që qeveria e re të përmbushë të gjitha prioritetet.

Mundësia e punësimit shpesh kërkon një shumë të caktuar parash ose lidhje politike. Ky mekanizëm është një presion në rritje për brezat e rinj në Kosovë. Të rinjtë e lindur pas luftës e kanë kuptuar vlerën e luftës për çlirim, por janë të lodhur nga papunësia, nga pamundësia për të lëvizur në Europë për të kërkuar një vend pune dhe nga shërbimet e pamjaftueshme në vend.

Qytetarët e Kosovës do të mund të zgjedhin mes 25 listave, mes të cilave dhe ajo serbe e mbështetur nga serbët të cilët duan tërheqjen e autonomisë së vendit. Pragu elektoral është 5%. Asnjë analist nuk mund të parashikojë se kush do të qeverisë pasi nuk ka asnjë parti politike e cila mund të synojë mazhorancën e plotë. Shumë të rëndësishme do të jenë aleancat pas zgjedhjeve. Në vitin 2017 koalicioni qeverisës u krijua nga tre ish liderë të Ushtrisë Çlirimtare të Kosovës: Haradinaj, Kadri Veseli dhe Fatmir Limaj. Por këtë herë ata garojnë si rivalë.

Forcat politike grupohen në katër pole kryesore dhe pse vendimtare do të mund të jetë një forcë e pestë – iniciativa socialdemokrate, Nisma, e cila sipas sondazheve mund të marrë 6 për qind të votave.  Lidhja Demokratike e Kosovës, partia më e vjetër në vend, konservatore dhe me qëndrime pranë nacionalizmit shqiptar është një nga partitë kryesore. Pas një dekade në rënie, në zgjedhjet e përgjithshme të vitit 2017 mori numrin më të madh të bashkive. Për momentin ajo është në opozitë me 25 deputetë në parlament nga 120. Kandidatja e kësaj partie për postin e kryeministrit është Vjosa Osmani e cila sipas sondazheve mund të marrë 25 për qind të mbështetjes.

Vetëvendosja është një tjetër forcë politike në opozitë. Nacionalist, por i majtë, lideri i saj Albin Kurti dëshiron bashkimin e Kosovës me Shqipërinë. Ai mund të përsërisë rezultatin e 2017-ës duke marrë 27.4 për qind të votave dhe të qeverisë së bashku me LDK nëse të dyja partitë do të gjejnë një marrëveshje për emrin e kryeministrit. Partia demokratike e Kosovës, partia politike e presidentit Hashim Thaçi, dhe e drejtuar nga Kadri Veseli, ish-luftëtar i Ushtrisë Çlirimtare të Kosovës, i cili shënon dy mandate si kryetar i parlamentit, vendosi pikërisht emrin e tij për kryeministrin e ardhshëm të vendit. Veseli në fjalimet e tij elektorale ka premtuar luftë ndaj korrupsionit dhe nepotizmit, ndërsa sondazhet i japin 22 për qind të votave.

Aleanca për Ardhmërinë e Kosovës është partia e kryeministrit të dorëhequr Haradinaj, aleat me social demokratët e PSD-së. Pas mbylljes së qendrave të votimit pritet që mëngjesin e të hënës të jetë gati një pjesë e mirë e rezultateve përfundimtare. Partia që do të marrë më shumë vota do të jetë dhe ajo që do të propozojë emrin e kryeministrit të ri. Një  tjetër ditë e rëndësishme do të jetë dhe ajo e zgjedhjes së kryetarit të parlamentit pasi vetëm atëherë do të kuptohet se cila mazhorancë do të qeverisë vendin./ABC News Albania 24/7

kadri-veseli.jpg
G. P.13:30 | 20/08/2019

Partia Demokratike e Kosovës nuk konfirmon nëse është në negociata me ndonjë parti për koalicion parazgjedhor, por as nëse do të garojë tërësisht e vetme. Kreu I kësaj partie Kadri Veseli u shpreh se synon edhe një mandat qeverisës, por kësaj here do të jetë ai në krye të qeverisë.

Kreu i Partisë Demokratike të Kosovës Kadri Veseli është i bindur se partia që ai udhëheq do ti fitojë sërish zgjedhjet. Por për dallim nga herët e kaluara, postin e kryeministrit thotë se do ta mbaj për vete.

Premton rikthimin siç thotë të partneritetit me Shtetet e Bashkuara të Amerikës dhe të Bashkimit Evropian, ndërsa në tryezën e bisedimeve sipas tij nuk do të jetë asnjëherë çështja e shkëmbimit të territoreve.

“Shpejt duhet të shkëputemi nga kjo vetkurthë që jemi futur. Shkojmë me Serbi flasim, kurrë sovraniteti i shtetit të Kosovës nuk ka me u cënu. Mitrovicën nuk guxon askush ta përmend. Nuk duhet të konfrontohemi me askënd”.

Ndonëse parti e cila ka qenë për 12 vjet në pushtet ai thotë se në mandatin e ardhshëm do të luftojë korrupsionin dhe nepotizmin. Ndërsa u shpreh i rezervuar të tregoj për koalicione parazgjedhore, derisa tha se nuk ka vija të kuqe për asnjë parti.

“Jemi duke shkuar rregullt. Duhet të respektojmë vullnetin e qytetarëve për veprimet shumë shpejt e merrni vesh”, tha Veseli.

Më 22 gusht mbahet séance për shpërbrjen e parlamentit të Kosovës pas dorëheqjes së Ramush Haradinajt nga posti i kryeministrit./ABC News Albania 24/7

kadri-eseli.jpg
G. P.23:44 | 20/07/2019

Kadri Veseli, aleati kryesor qeverisës i Ramush Haradinajt shprehet gati për zgjedhje të parakohshme. Në një konferencë për media pas kthimit nga vizita zyrtare në SHBA, kreu i Partisë Demokratike të Kosovës tha se nuk ka patur njoftim paraprak për dorëheqjen e Haradinajt, por e pranon si vendim personal.

Kryetari i Partisë Demokratiketë Kosovës, që ishte partneri kryesor i koalicionit qeverisës, Kadri Veseli, ka thënë se partia e tij është e gatshme për zgjedhje. Në një konferencë për media pas kthimit nga vizita zyrtare në ShBA, ai tha se tash do të ulen të flasin për kohën që duhen mbajtur zgjedhjet.

 “Vendimi i ish-Kryeministrit për dorëheqje është vendim personal dhe si të tillë e kemi pranuar, pavarësisht që për këtë nuk kemi pasur asnjë njoftim ose konsultë paraprake. Tashmë, zgjedhjet e parakohshme janë të pashmangshme. Partia Demokratike e Kosovës është e gatshme për zgjedhje, kurdo që caktohen ato. Ajo që mund të diskutohet tash është vetëm koha kur ato duhet të mbahen. Për këtë, besoj se do të kemi konsulta edhe me partnerët e koalicionit të deritashëm dhe me parti të tjera politike, në pajtim me Kushtetutën dhe ligjet në fuqi”, tha Veseli./ABC News Albania 24/7

delegacioni-franko-gjermane.jpg
nev ila15:30 | 03/06/2019

Delegacioni franko – gjerman është takuar në Prishtinë fillimisht me presidentin e Kosovës Hashim Thaçi e më pas me kryeministrin Ramush Haradinaj e zyrtarë të tjerë. Prishtina zyrtare njëzëri përsëriti se nuk do të heqë taksën e vendosur ndaj Serbisë, dhe që pret liberalizimin e vizave.

Dialogu Kosovë Serbi sipas presidentit të Kosovës Hashim Thaçi do të vazhdojë pa kushte.

Pas takimit me delegacionin e këshilltarëve diplomatikë të presidentit të Francës dhe të kancelares së Gjermanisë Thaçi tha se taksa do të mbetet në fuqi ndërsa nuk do të pranojnë kushte shtesë për liberalizimin e vizave.

Theksuam shumë qartë se tarifa duhet  të mbetet në fuqi, është një vendim legjitim në anën tjetër duhet të respektohet të gjitha marrëveshjet që janë arritur në vitin 2013 nga të gjitha palët. Shpresoj që do të ketë një angazhim serioz edhe për javët e ardhshme që kanë mbetur në mënyrë që të jetë një koordinim i plotë”, tha Thaci.

Zyrtarë të këtij delegacioni kanë zhvilluar takim edhe me krerët e tjerë të shtetit të Kosovës.

Ndërsa kryeministri Ramush Haradinaj ka mirëpritur angazhimin e Gjermanisë dhe Francës për të rikthyer dialogun siç ka thënë ai në binarët e duhur./ABC News Albania 24/7

KADRI-VESELI-INTERVISTE.mpg_snapshot_00.27-1280x720.jpg
ent ela13:11 | 24/05/2019

Kadri Veseli, kryetar i parlamentit të Kosovës, i ka bërë apel Bashkimit Europian që të ushtrojë më shumë presion ndaj Serbisë, në mënyrë që Beogradi të mos lejohet të ndërhyjë në Kosovë përmes Listës Serbe. Por Veseli foli dhe për dialogun me Serbinë si dhe krijimin e gjykatës speciale që do të hetojë genocidin serb në vend. 

Institucionet e Kosovës do të kërkojnë nga Bashkësia Ndërkombëtare që të mos  lejojë Beogradit të ndërhyjë përmes listës serbe në Kosovë. Në një intervistë kryetari i parlamentit Kadri Veseli foli edhe për dialogun Kosovë – Serbi.

Veprimet e kryetarëve të komunave të veriut dhe mundësisë që ata do të dorëhiqen sërish do ti përgjigjen institucionet e Kosovës.

Kryetari i Parlamentit Kadri Veseli tha se influence e Beogradit në veri është ndërhyrje flagrante dhe e dëmton stabilitetin në Ballkan.

Influencës që e domonstron Serbia në Kosovë, ky është shqetësim që do ta adresojmë te Bashkimi Evropian. Është ndërhyrje flagrante, dëmtuese që nuk është duke i ndihmuar stabilitetit në Ballkanit Perëndimor.

Ndërsa duke folur për atë se a do të vazhdojë nëBruksel dialogu, Veseli thotë se Kosova nuk është ajo që i përcakton kushtet e dialogut Kosovë Serbi.

Në një rezolutë të cilën e ka nxjerr OKB-ja përgjegjësinë mes dialogut të Kosovës dhe Serbisë e ka bartur te Bashkimi Evropian. Brukseli nuk është qendër vetëm e Belgjikës por e gjithë BE-së. Qëndrimi do të jetë shumë i qartë në interes në mbrotje të sovranitetit dhe integritetit territorial . Nuk është Kosova që i përcakton kushtet e dialogut ku dhe si do të zhvillohen. Unë pres që BE-ja të ketë një involmim dhe kërkesë e jona është që SHBA-ja të jetë thellë dhe bindshëm në këtë process.

Derisa qëndrimi i tij për taksën mbetet i njëjtë.

Unë nuk e shoh Kosovën si një vend të izoluar me një nacionalizëm folklorik të pabazuar.

Ai ka shfaqur gatishmërinë të vizitojë Kuvendin Komunal të Leposaviqit dhe tu tregoj asamblistëve atje se Kosova është shtet edhe i tyre dhe se jeta e tyre është në Kosovë.

Veseli këmbëngul që ta qoj deri në fund iniciativën e tij për krijimin e një gjykate ndërkombëtare për krimet serbe në Kosovë. Ndërsa thotë se asnjëherë nuk është ftuar nga Gjykata Speciale dhe sipas tij nëse një gjë e tillë ndodh ai do ta bëjë menjëherë publike. /ABC news Albania 24/7

 

kadri-veseli-2.jpg
nev ila21:37 | 23/05/2019

Emri i kryetarit të Parlamentit të Kosovës, Kadri Veseli është përfolur në një video ku elementë të një grupi kriminal diskutojnë për fajde dhe shantazhe. Duke reaguar, Veseli ka mohuar çdo lidhje me personat në fjalë dhe ka paralajmëruar me dorëheqje nëse një gjë e tillë rezulton e vërtetë.

Emri i kryeparlamentarit Kadri Veseli është përmendur në një video të publikuar në media ku dyshohen se janë përfshirë në fajde, mashtrim e detyrim një grup prej së paku 8 personash.

Në një rast njëri nga këta 8 persona dëgjohet duke thënë se Kadri Veseli ka marrë 200 mijë euro. Menjëherë ka pasuar reagimi i Veselit i cili në një konferencë të jashtëzakonshme se nëse del e vërteta se edhe ai është përfshirë në këtë rast, ai do të japë dorëheqje.

Kadri Veseli, kryetar i Parlamentit të Kosovës:

Dua të deklaroj që nuk kam të bej asgjë me rast as me personat e përfshirë. Është rast klasik i mashtrimit dhe manipulimit dhe jam i bindur që organet e drejtësisë kanë qenë të njoftuara me kohë. Nëse del diçka e vërtetë për mua nga ky rast unë do të jap dorëheqje”.

Sipas tij njerëzit që shihen në video nuk i njeh ndërsa shtoi se këtu ka të bëjë me dy krime, atë të kryer dhe atë që është fshehur. Ndërkohë ka reaguar menjeherë Lëvizja Vetëvendosje sipas së cilës Veseli do të duhej të jepte dorëheqje e nëse del fajtor duhet të shkojë në burg./ABC News Albania 24/7

kadri-veseli-1.jpg
nev ila18:18 | 06/05/2019

Kryetari i Parlamentit të Kosovës, Kadri Veseli ka nizur zyrtarisht procedurat për iniciativën dhe formimin e Gjykatës Ndërkombëtare për krimet që Serbia ka kryer gjatë luftës në Kosovë.

Iniciativën për krijimin e një Gjykate Ndërkombëtare për krimet që Serbia ka kryer në Kosovë, kryetari i Kuvendit të Kosovës e ka shpalosur para përfaqësuesve të shoqatave të dala nga lufta e fundit në Kosovë.

Sipas Veselit gjykata do të krijohet jo mbi urrejtjen e pretendimet por mbi masakrat dhe vrasjet me dëshmi reale.

Veseli vuri në dukje se për luftën që ka ndodhur në Kosovë,189 vjet dënime janë dhënë për shqiptarët ndërsa vetëm 49 vjet për serbët.

Ndërsa tha se Tribunali i Hagës e ka lënë të papërfunduar drejtësinë.

Gjatë luftës së fundit kanë ndodhur 186 masakra në qytete e fshatra të Kosovës nga shteti serb, mijëra femra janë dhunuar dhe mbi 1 milion shqiptarë janë dëbuar nga shtëpitë e tyre./ABC News Albania 24/7

seanca-solemne.jpg
G. P.14:04 | 17/02/2019

Në seancën solemne të mbajtur me këtë rast në Kuvend, kryeministri Haradinaj përsëriti gatishmërinë për një marrëveshje me Serbinë, por pa prekur kufijtë. Ndërsa kryeparlamentari Kadri Veseli ftoi liderët e vendit që të përmbahen nga vendimmarrjet individuale.

Kuvendi i Kosovës ka mbajtur të dielën një seancë solemne me rastin e 11-vjetorit të Pavarësisë, ku të pranishëm kanë qenë edhe zyrtarë e diplomatë të huaj, të njohur për kontributin e tyre për Kosovën.

Në fjalën e tij, krahas falenderimeve, kryeministri Ramush Haradinaj është zotuar se do të punojë për konsolidimin e shtetit të Kosovës dhe për realizimin e ambicieve të saj europiane.

Haradinaj është ndalur edhe tek rëndësia që kanë marrëdhëniet ndërfqinjësore, duke shprehur gatishmërinë e kabinetit të tij për një marrëveshje me Serbinë, pa prekur kufijtë.

Ramush Haradinaj: “Jemi të interesuar për një marrëveshje tanimë të quajtur obligative e ligjore, për njohje reciproke me Serbinë në kufijtë ekzistues dhe anëtarësimin e Kosovës në NATO dhe BE. Faleminderit të gjithë aleatëve”.

Ndërsa kryetari i Kuvendit, Kadri Veseli në fjalën e tij ka deklaruar se pavarësia e Kosovës është një realitet që u arrit pas shumë përpjekjesh, sakrificash e vuajtjesh. Duke vlerësuar rëndësinë e marrëdhënieve me aleatët, Veseli ka përsëritur ndonëse në mënyrë indirekte apelin për pezullimin e taksës me Serbinë.

Kadri Veseli: “Vendimmarrja e shtetit nuk duhet të jetë individuale. Duhet të vëmë në peshore interesat strategjike të shtetit tonë përballë Serbisë dhe atyre që na rrethojnë, Rusisë në njërën anë dhe SHBA e BE në anën tjetër. Me këto të fundit përkrah Kosova është më e sigurtë”.

Veseli ka falenderuar vendet perëndimore që kanë njohur Kosovën, e cila sot sipas tij sot ka nevojë të fokusohet tek sundimi i shtetit ligjor, lufta kuundër korrupsionit dhe krimit të organizuar./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono