Juventus

juventus.jpg
G. P.08:16 | 28/11/2018

Skuadra e Juventusit fitoi pa shumë probleme përballjen ndaj Valencias me shifrat minimale 1-0. Fitore arriti edhe Bayern Mynih, Manchester United dhe Real Madrid ndërkohë që Manchester City nuk ia doli ndaj Lyon.

Natë magjike ajo e kësaj të marte në Ligën e Kampioneve. Juventusi bëri detyrën në shtëpi përballë skuadrës së Valencias duke prerë biletën për në fazën me eliminim direkt. Një takim pa shumë histori ku bardhezinjtë e dominuan ndeshjen nga fillimi deri në fund. Bardhezinjtë fituan me golin e shënuar nga Mario Mandzukiç në minutëb e 59.

Ronaldo lihet i lirë në zonë dhe asiston saktë për kroatin që shënon me portën e boshatisur. Valencia shfaqet herë pas here, por pa mundur të vendosë baraspeshën. Fitore në limitet e kohës së rregullt arriti edhe skuadra tjetër e grupit H, Manchester United. Heroi i takimit për “djajtë e kuq” ishte Fellaini i ardhur nga stoli.

Fitore tenistike koleksionoi Bayerni në shtëpi ndaj Benficas. Bavarezët fituan me shifrat e thella 5-1. Arjen Robben dhe Robert Levandovski shënuan nga dy gola secili ndërkohë që festivalin e golave e mbylli Franck Ribery. Bind Reali i Madridit që hedh pas krahëve problemet në kampionatin spanjoll. Kampionët në fuqi të Europës fituan me shifrat e pastra 2-0 ndaj Romës në transfertë. Bale në minutën e 47 dhe Vazquez në të 59-n minutë ishin autorët e golave për galaktikët.

Lyon-i rezultoi të ishte një kockë e fortë për Manchester City-n që nuk shkoi më shumë se një barazim 2-2. Ishin francezët ata që kaluan dy herë në avantazh, por qytetarët arritën të shmangnin humbjen e dytë ndaj Lyon./abcnews.al

juvee.jpg
G. P.19:25 | 25/11/2018

Juventusi nuk njeh limite në kampionatin italian. Fitorja ndaj Spalit hyri në histori, në një mbrëmje të shënuar për Ronaldon e Kielinin.

Theu rekordin e vet në Serinë A. Juventusi nuk ka mëshirë as për të kaluarën e vet, apo ndoshta dëshiron ta përmirësojë, siç bëri me sasinë e pikëve të grumbulluara pas 13 javëve në Serinë A. Suksesi 2-0 ndaj Spalit, me gola të Ronaldos e Manxhukiçit, bëri që bardhezinjtë të kenë 37 pikë në 13 ndeshje, duke lënë pas rekordin e vjetër.

Ai i takonte skuadrës së madhe juventine të drejtuar nga Fabio Kapelo, në sezonin 2005-2006, kur mblodhi 36 pikë në 13 javët e para. Gazetat kryesore sportive në Itali thurën lavdet e rastit.

“La Gazeta delo Sport”: Interi rikthehet, por Juventusi është gjithnjë aty!

“Il Korriere delo Sport”: Seriali Juve! Kristiano zhbllokon dhe arrin në kuotën 9 gola, është kryeshënues. Alegri e quan “mjeshtër”!

“Tutosport”: Topat e Artë! Ronaldo e Manxhukiç, gjithnjë ata. Në sy të francezëve, dyshja bardhezi likujdon edhe Spalin, dhe bën Juventusin të fluturojë!

Jo vetëm kaq, por pati edhe shkëlqim individual. Kristiano Ronaldo arriti në kuotën e 9 golave në Serinë A, baraz me sulmuesin polak të Xhenoas, Krzistof Piontekun, duke qenë dy golshënuesit më të mirë të kampionatit deri tani. CR7-ta u kthye aty ku i takon dhe ku është mësuar të jetë, por edhe ai vendos një rekord.

Bëhet i pari juventin që shënon 9 herë në 13 takime në Serinë A. Trajneri Alegri nuk i kurseu fjalët e mira.

“Ronaldo është një mjeshtër. Ai bën veprime që i zënë në befasi kundërshtarët, dhe ne kemi nevojë pikërisht për këtë. Kristiano mendon dhe lëviz tepër shpejt, diçka që na ndihmon, madje ne duhet ta ndihmojmë më shumë një lojtar si ai”.

Gjithsesi, ndaj Spalit, ishte edhe mbrëmja e Xhorxho Kielinit, edhe pse hyri në pjesën e dytë. Mbrojtësi veteran 34-vjeçar luajti ndeshjen zyrtare numër 483 me fanelën bardhezi, duke lënë pas legjendën Roberto Betega në renditjen e të gjitha kohëve.

Kanë kaluar më shumë se 13 vjet që kur debutoi për Juventusin, dhe kontributi i tij është tepër i madh, ashtu si dhe numri i trofeve të fituar. Kielini ndodhet në vend të pestë, dhe përpara tij janë vetëm Del Piero, Bufon, Shirea e Furino./abcnews.al

massimilianoallegri-cropped_1mm4wnpobiehx1fjenytnquu9a-1280x720.jpg
G. P.08:47 | 13/11/2018

Trajneri i skuadrës së Juventusit, Massimiliano Allegri është shpërblyer me çmimin si strategu më i mirë i vitit në kampionatin Italian. Dominimi me “Zonjën e Vjetër” në Serie A solli vlerësimin maksimal nga shumica votuese. Livornezi grumbulloi 17 vota duke lënë pas Mauricio Sarri dhe Simone Inzaghi me nga 8 vota secili.

Massimiliano Allegri nuk njeh limite. Përtej sukseseve ekipore, trajneri livornez ka fituar së fundmi çmimin si trajneri më i mirë për sezonin 2017-2018. Në votim morën pjese të gjithë trajnerët e skuadrave respektive në Serinë A si dhe specialistë të ndryshëm. 51 vjeçari ia doli të grumbullojë 17 vota duke lënë pas trajnerin e Chelsea Mauricio Sarri dhe tenikun e Lazios Simone Inzaghi me nga 8 vota secili. Jo vetëm kaq pasi në renditjen e përgjithshme ish-trajneri i Milanit lë pas teknikun Fabio Capello dhe Antonio Conte. Vlen të përmendim faktin se Massimiliano Allegri ka fituar me Juventusin katër herë radhazi titullin kampion në Serinë A, një sukses që nuk është arritur më parë nga asnjë trajner tjetër në stolin bardh e zi.

Juventus është në rrugën e duhur për t’u kurorëzuar kampion edhe këtë sezon. Kritikat e kanë shoqëruar Allegrin pothuajse në çdo takim në këtë sezon për shkak të haluçinacioneve që mbrojtja ka përjetuar, por në fund tekniku livornez u është kundërpërgjigjur kritikëve me atë që ai di të bëjë më mirë, fitoren. Në shtëpinë Bardh e zi e dinë mirë se kontributi më i madh që mund të bëjë Allegri është të shpallë Juventusin kampion Europe. Sukses nga i cili ai mund të shpallej edhe si trajneri më i mirë në Europë./abcnews.al

jcagliari_es_squadra-1-1280x853.jpg
ent ela08:52 | 12/11/2018

Juventusi kaloi një tjetër provë të vështirë në Serinë A, duke mundur Milanin në stadiumin “San Siro”. Kampionët ishin superiorë, ndërsa një gol e shënoi edhe Kristiano Ronaldo.

Nuk ishte mbrëmja e duhur për të përballuar Juventusin. Një Milan me mjaft mungesa për shkak të dëmtimeve, dhe shumë i lodhur nga ndeshja në Europë, u detyrua të dorëzohej përpara kampionëve të Italisë.

Përfundoi 2-0 për skuadrën mike, që luajti më mirë në “San Siro”, duke shënuar nga një gol në çdo pjesë loje. Fillimisht, kroati Mario Manxhukiç, dhe pas pushimit Kristiano Ronaldo.

Formacioni i trajnerit Alegri ishte më i plotë dhe më i çlodhur, por gjithashtu edhe më i përgatitur. Juventusi e kontrolloi ndeshjen siç duhej, duke krijuar më shumë raste për shënim, edhe pse luante në fushë kundërshtare.

Në futboll i rëndësishëm është edhe fati, dhe ekipi nga Torino e pati me vete. Gonzalo Higuain, lojtari më i rrezikshëm i Milanit, humbi një penallti, që ishte mundësia më e mirë për të barazuar.

Më pas, sulmuesi argjentinas u përjashtua nga loja me karton të kuq. A do të ketë rivalë Juventusi këtë sezon?

Me fitoren ndaj Milanit, dhe me humbjen që pësoi Interi, duket se vetëm Napoli mund ta rrezikojë, ashtu siç ndodhi edhe vjet.

Milani, ndërkaq, shpreson t’i kthehen sa më shpejt lojtarët e dëmtuar, për të ndjekur objektivin e vitit.

E vërtetë, që skuadra trajnerit Gatuzi nuk është rivale e Juventusit, por i ka të gjitha mundësitë që të kualifikohet për në Champions, sezonin e ardhshëm. /abcnews.al

 

 

MBULIM-IAQUINTA-BURG.mpg_snapshot_00.01-1280x687.jpg
G. P.22:46 | 31/10/2018

Vincenco Jakuinta ish sulmues i Juventusit dhe kombëtares italiane të futbollit është dënuar me dy vjet burg pasi u shpall fajtor për armëmbajtje pa leje me qëllim mafioz. Ndërsa babai i tij u dënua me 19 vjet burg për lidhje me organizata mafioze. Menjëherë pas shpalljes së vendimit të dy të dënuarit e kanë cilësuar qesharak dënimin dhe një turp. Ish futbollisti u shpreh për mediat jashtë sallës së gjyqit se as nuk e dinte se çfarë ishte mafia dhe e vetmja arsye për dënimin ishte origjina e tij kalabrze. Ai u kujtoi gazetarëve se ai ishte futbollisti që kishte fituar një botëror me kombëtare italiane dhe krenar për origjinën e tij./abcnews.al

RONALDO-JUVENTUSV.mpg_snapshot_00.59-1280x944.jpg
G. P.11:35 | 28/10/2018

Kristiano Ronaldo u bë personazhi kryesor i Serisë A pasi i dha fitoren Juventusit në Empoli. Portugezi duket se po justifikon investimin prej qindra milionë eurosh, të bërë për të.

Shkëlqimi ishte lënë në Mançester, por jo sërish pati diçka më shumë. Një Juventus thuajse i shëmtuar ia doli për të marrë një tjetër fitore në Serinë A, por më shumë i gëzuar sepse investimi i madh i verës po jep rezultat. Empoli u mund 2-1 me përmbysje dhe njeriu-kyç ishte kush tjetër përveçse Kristiano Ronaldo. Vendasit luftuan fort në pjesën e parë dhe e mbyllën atë në avantazh me një rrjetë shumë të bukur, por jo më kot thuhet se ndeshja ka 90 minuta.

Pas pushimit, Ronaldo bëri diferencën, edhe pse fillimisht falë një penalltie fituar nga Dibala. Pati protesta, por u duk një 11-metërsh nga ata që iu vidhen kundërshtarëve. Gjithsesi, për tifozët juventinë dhe për klubin torinez, lumturi më e madhe se fitorja ishte paraqitja e CR7-ës, investimi i madh i verës, ndoshta më i madhi në histori. Portugezi po nis të justifikojë 100 milionë eurot e shpenzuara për kartonin, dhe rrogën mbi 30 milionë euro në sezon që do t’i jepet ëpr 4 vite me radhë. Gazetat italiane janë me fat, pasi e kanë personazhin e madh për kopertinat.

“La Gazeta delo Sport”: Qiellor CR7-ta! Penallti dhe gol kryevepër. Gjithçka e bën Ronaldo!
“Il Korriere delo Sport”: Mendon ai! Një Juventus I shëmtuar përmbys dhe fiton në Empoli 2-1, me një mrekulli të Ronaldos!
“Tutosport”: CR7, ari i Juventusit! Penallti e kundërshtuar nga Empoli, dhe raketë nga jashtë zone. Ronaldo firmos përmbysjen bardhezi!
Pas këtyre dy golave, Kristiano ka 7 rrjeta në 10 ndeshje në Serinë A, duke iu afruar dalë nga dalë, standardit të madh që kishte tek Reali./abcnews.al

roni.png
G. P.16:36 | 21/10/2018

Ronaldo arrin një tjetër kulm në karrierën e tij të lavdishme. Ylli portugez ia doli pasi shënoi ndaj Xhenoas në Serinë A.

Shkëlqimi ndoshta nuk është ai i pari, por rekordet vijnë.

Kristiano Ronaldo u bë i pari lojtar në Europë që kap shifrën e 400 golave të shënuar në 5 ligat më të mëdha, ndërsa rivaliteti i ashpër me Lionel Mesin vazhdon. Superylli realizoi sërish në Itali, në ndeshjen e barazuar 1-1 ndaj Xhenoas në Torino.

Edhe pse ka vetëm 5 gola në Serinë A, në 9 ndeshje të luajtura, pra poshtë standardit të tij tek Reali, sërish CR7-ta nuk ndalet. Gjatë karrierës shënoi 84 herë për Mançester Junajtidin në Premier Ligë, dhe 311 në La Liga me Madridin.

Rivali i tij më i madh, Mesi, e ndjek me 390 gola. Kristiano duket se po e përmbush përgjithësisht detyrën, por këtë herë ai nuk ishte i mjaftueshëm për Juventusin, në ndalesën e parë në kampionat pas 8 fitoreve radhazi.

Nga kjo përfitoi Napoli, që fitoi 3-0 në fushën e Udinezes disa orë më vonë, për ta ngushtuar diferencën me kryesuesit në 4 pikë. Kampionët mbeten favoritë për titullin, por duket se do të ketë konkurrencë, siç e shkruajnë me gëzim mediat italiane.

“Është gjallë”, titullon për Serinë A, “Il Korriere delo Sport”.

Gazeta “Tutosport” e Torinos i kërkon pikërisht Kristianos: “Ronaldo, na zgjo ti”. Trajneri Masimiliano Alegri pranoi gabimet e ekipit të tij, duke thënë se futbollistët mesa duket ishin me mendje tek ndeshja në Champions ndaj Mançester Junajtidit.

“Kjo që ndodhi do të na vlejë si leksion”, ishin fjalët e tij.

Juventusi ndërkaq po ndjek me shqetësim akuzat për përdhunim ndaj Ronaldos. Klubi italian ka në total rreth 300 milionë euro për portugezin, me synimin për t’u bërë klub global, dhe nuk dëshiron që investimi gjigand të rrezikohet.

Kampionët e Italisë janë larg fuqisë financiare dhe jehonës botërore të gjigandëve si Real Madrid, Barcelona, Mançester Junajtid apo Bajern, dhe mendojnë se vetëm një emër i madh global si Ronaldo mund t’i ndihmojë, edhe pse mosha 33-vjeçare është një tjetër rrezik i madh./abcnews.al

ronadlo.png
G. P.17:03 | 07/10/2018

Cristiano Ronaldo vërtet shënoi për Juventusin në Serinë A, veçse pozicioni i tij është tepër i rrezikuar për shkak të akuzave për përdhunim që vijnë nga Amerika.

Një gol për të larguar të keqen.

Cristiano Ronaldo do të kishte dashur shumë të kishte qenë kështu, veçse rrjeta në portën e Udinezes, thjesht e ndihmoi për lavdinë sportive dhe po ashtu i dha një dorë Juves për të arritur fitoren e tetë radhazi në Serinë A.

Portugezi nuk mund të shpëtojë dot lehtë nga akuzat e rënda për përdhunim që vijnë nga Amerika, pavarësisht nëse ai është apo jo me të vërtetë fajtor. Goditja ka qenë e rëndë për një nga dy superyjet e futbollit edhe pse flitet për një ngjarje të mundshme të para 9 viteve.

Ketrin Majorga, një ish-modele dhe sot mësuese, e akuzon Kristianon për përdhunim, diçka për të cilën ai rrezikon burgun, nëse gjykata e shpall fajtor. Avokati i Majorgës, Lesli Stovël, ka deklaruar se është kontaktuar nga një tjetër femër që deklaron se është përdhunuar nga futbollisti, pra skandali mund të zgjerohet edhe më shumë.

Një rrethanë lehtësuese për CR7-n sigurohet nga deklaratat e shoferit të taksisë me të cilën Majorga udhëtoi për në takimin me Ronaldon. Vins Hamfri shprehet se Katrina dukej e lumtur për mbrëmjen që do të kalonte me lojtarin, dhe mburrej me trupin e saj të shkëlqyer.

Me shumë gjasë, portugezi do të pyetet nga policia amerikane për ngjarjen, ndërsa ai ka pajtuar një avokat tepër të njohur, Dejvid Çesnof, një njeri që ka mbrojtur në gjyq emra të mëdhenj të sportit apo të artit si Shakill O’Nill, Andre Agasi, Majk Tajson, Leonardo Di Kaprio apo Paris Hilton.

Skandali i supozuar i Ronaldos ka goditur edhe Juventusin. Aksionet e klubit në bursë ranë me 18 për qind brenda ditëve të fundit, ndonëse ndikimi i portugezit mbetet pozitiv, sepse i rriti aksionet me 180 për qind kur mbërriti në Torino.

Edhe Ronaldo mund të ketë pasoja financiare dhe të imazhit, pasi sponsorët e tij si Nike apo EA Sports janë shprehur tepër të shqetësuar për këtë që po ndodh./abcnews.al

udinese.png
G. P.22:20 | 06/10/2018

Juventusi arriti një tjetër fitore në Serinë A, duke triumfuar me rezultatin 2-0 në fushën e Udinezes, e duke vazhduar sukseset radhazi. Kampionët në fuqi kanë 8 fitore në 8 ndeshje të luajtura deri tani në kampionat, duke pasur 24 pikë të plota.

Golat u shënuan në pjesën e parë, fillimisht nga Betankur në minutën e 33-të dhe pastaj nga Kristiano Ronaldo në minutën e 37-të. Më pas, juventinët u përpoqën të realizonin përsëri, por nuk mundën.

Për Ronaldon, ky ishte goli I katërt në 8 ndeshje të luajtura në Serinë A deri tani, një rendiment shumë më i ulët sesa ai që kishte tek Reali i Madridit. Gjithsesi, ishte e rëndësishme që portugezi të jepte bënte një paraqitje të madhe, për shkak se ishte nën presion pas akuzave për përdhunim, ndërsa në Amerikë është rihapur hetimi për të.

Juventusi i trajnerit Alegri, ndërkaq, po vazhdon me ecurinë e viteve të kaluar, duke mos pasur rival në Serinë A, dhe besohet se do të arrijë të fitojë titullin kampion për herë të tetë radhazi./abcnews.al

0_Serie-A-Juventus-v-Bologna.jpg
G. P.10:15 | 28/09/2018

Kristiano Ronaldo sërish nuk e arriti objektivin e tij personal tek Juventusi. Portugezi mbeti pa gol, ndërsa parashikimet janë që nuk do të mbërrijë dot në nivelin që kishte tek Realit.

Nuk mundi të shënonte, edhe pse u përpoq aq shumë. Kristiano Ronaldo po kalon një fillim të vështirë të sezonit në Itali, me vetëm 3 gola në 7 takime, një mesatare tepër e ulët për standardet e tij. Juventusi fitoi në Torino ndaj Bolonjës, madje me shifrat 2-0, por asnjëri nga shënuesit nuk ishte CR7-ta. Fillimisht, Paulo Dibala dhe pastaj Blez Matyidi, realizuan shpejt e shpejt në nisje të pjesës së parë, dhe të paktën objektivi kryesor, fitorja u arrit.

Po objektivat e Ronaldos për t’u shpallur shënuesi më i mirë dhe Këpuca e Artë e Europës? Nuk dihet nëse Juvja mund t’ia mundësojë këtë, siç i mundësoi një rrogë më të lartë sesa Reali, me plot 31 milionë euro në sezon. Në momentin e golit të dytë, portugezi e shprehu hapur pakënaqësinë që nuk u shërbye me top gjatë një kundërsulmi, ndonëse e ndoqi aksionin deri në fund, duke dhënë pasimin e golit të Matyidisë. Për momentin, Kristiano ka mesataren një gol në dy ndeshje në Serinë A, ndërsa në Champions u përjashtua me të kuqe ndaj Valencias, pa arritur të realizonte.

Parashikimet nuk janë të këqija për të, por jo për të arritur nivelin e Realit. Agjencia e specializuar, OLOCIP, bën një analizë sipas së cilës, portugezi do të arrijë 0.8 gola për ndeshje, diçka mjaft e mirë, por ndjeshëm më poshtë sesa në Madrid, ku gjatë 9 viteve karrierë, shënoi 450 gola në 438 takime të luajtura./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono