Juventus

napoli.jpg
gra moz09:20 | 19/04/2018

Gara për titullin në Serinë A mbetet e hapur. Juventusi gaboi, ndërsa Napoli arriti një fitore të vështirë, duke qenë tani vetëm 4 pikë larg
Një tjetër roveshatë ndëshkon kampionët.
Pas asaj që i ndodhi me Cristiano Ronaldon në Champions, ja goditja e radhës, këtë herë në kampionat, në fushën e modestes Crotone.
Ishte një nigerian shtatlartë, me emrin Simi, që realizoi golin vërtet të veçantë që i hoqi Juventusit fitoren nga dora, dhe ia ndërlikoi rrugën drejt titullit.
Barazim 1-1 dhe diferencë e shkurtuar në 4 pikë ndaj Napolit ndjekës, kur duhen edhe 5 ndeshje deri në përfundim të Serisë A.
Ja që edhe kampionët mund të gabojnë, e të mos jenë të përsosur, ndonëse mbeten favoritë për suksesin përfundimtar, duke pasur 85 pikë ndaj 81 të napolitanëve.
Juve kaloi në epërsi me golin e Alex Sandros që në minutën e 16 dhe u mendua se do të fitonte, por nuk ia doli.
Napoli përfitoi, ndonëse e pati tepër pisk ndaj Udinese, brenda në “San Paolo”.
Fitoi 4-2 pasi u ndodh dy herë në dizavantazh, duke treguar se nuk i mungon karakteri edhe kur gjendja duket e pashpresë.
Insigne, Albiol, Milik e Tonelli ishin autorët e golave për ekipin e trajnerit Maurizio Sarri, që kishte sërish si titullar mbrojtësin e kombëtares shqiptare, Elseid Hysaj.
Nëse gara për titull mbetet e çelur, edhe më e hapur është ajo për kualifikim në Champions.
Lazio, Roma e Interi janë në garë, dhe diferenca mes tyre është vetëm 1 pikë.
Lacialët e Tomas Strakoshës kaluan një dramë në Firence, duke ia dalë në fund ndaj Fiorentinës.
Përfundoi 4-3 në stadiumin “Artemio Franki”, ku fillimisht pati dy kartonë të kuq e pastaj 7 gola.
Për kryeqytetasit shënuan Luis Alberto, Martin Casseres, Felipe Anderson dhe sërish Luis Alberto.
Rivalët e tyre, po ashtu nuk gabuan me Romën që kaloi 2-1 Genoan në stadiumin “Olimpico” dhe me Interin që mposhti 4-0 Cagliarin, një ditë më parë.
Nga Championsi abdikon Milani pas barazimit 1-1 në fushën e Torinos.
Ky rezultat e lë ekipin e trajnerit Gatusso10 pikë pas, një diferencë që praktikisht nuk mund të kapërcehet.
Në renditje, Lazio e Roma kanë nga 64 pikë, Interi 63, ndërsa Milani 54./abcnews.al

cristiano-ronaldo-brilliance-brings-juventus-fans-to-their-feet-1280x720.jpg
gra moz15:28 | 04/04/2018

E gjithë bota e futbollit i është ulur në gjunjë Cristiano Ronaldo-s pas golit që shënoi ndaj Juventusit në Champions. Ylli i Realit po krahasohet me legjendat më të mëdha të të gjitha kohëve.

Ky gol sikur vlejti sa një karrierë.
Kristiano Ronaldo është padyshim në kulmin e lavdisë pas asaj që bëri në stadiumin e Juventusit.
Pas mbi 600 rrjetave, njëra më e bukur se tjetra, duhej të vinte kjo në Torino, që të bindte edhe më skeptikët, se ai mund të matet me ajkën e futbollit botëror, me Pelenë, Maradonën dhe Mesin.
Portugezi pati meritën më të madhe që Reali fitoi 3-0 një ndeshje tepër të vështirë të Championsit, që mund të kishte përfunduar edhe ndryshe, ndërsa dy goditjet e tij e kanë siguruar tashmë gjysmëfinalen.
Të mësuar ta dëgjojmë të flas më shumë për veten, sikur u habitëm kur dëgjuam pas sfidës një Ronaldo altruist.

Cristiano Ronaldo: “Ishte një ndeshje shumë e mirë e ekipit. E qartë që njerëzit po flasin shumë për golin tim të dytë, që ishte me të vërtetë spektakolar, ndoshta më i miri i karrierës sime. Dakord, por unë dua të flas më shumë për ekipin, sepse u paraqit shumë lart. Vuajtëm në pjesën e parë, por që të shënosh 3 gola në fushën e Juventusit nuk është aspak e lehtë, por ia dolëm mbanë dhe hodhëm një hap të madh drejt gjysmëfinales”.

Kristiano pati padyshim disa fjalë për tifozët e Juventusit, që u ngritën në këmbë pas roveshatës së tij.

Cristiano Ronaldo: “Dua të falenderoj publikun e Juventusit. Është diçka e madhe që u duartrokita në një stadium si ky i Juventusit, ku kanë luajtur lojtarë të mëdhenj, dhe luajnë sërish lojtarë të mëdhenj. Është një moment i madh për mua, jam i lumtur dhe i nderuar. Juventusi gjithnjë më ka pëlqyer si ekip dhe gjithë italianëve që ishin në stadium dua t’u them faleminderit në italisht”.

Intriguese koincidenca që CR7-ta ka në stol si trajner një yll të dikurshëm që ka bërë gjëra spektakolare, si ky gol fitues në finalen e Championsit në vitin 2002.
Zinedin Zidane u pyet nëse mund të ketë krahasim, dhe foli si tifoz i vetvetes.

Zinedin Zidane: “Dy golat mund të krahasohen, por ai i imi ishte më i mirë. Gjithsesi, ky ishte i fundit, pra vlen ky. Gjithsesi, i duhet hequr kapelja Kristianos. Unë jam vërtet trajner i Realit, por jam edhe tifoz futbolli. Veprimi i tij ishte natyral dhe jam shumë i lumtur për të. Është një lojtar i veçantë pikërisht sepse bën gjëra të tilla. Gëzohem për të, por që të gjithë duhet të jemi të gëzuar që e kemi në ekip”.

Nuk mund të mungonin vlerësimet më të larta nga kundërshtarët.
Ja si shprehet trajneri i Juventusit, Alegri.

Alegri: “Nuk e di nëse ishte goli më i bukur i historisë, por padyshim ishte i jashtëzakonshëm. Për momentin, madje për shumë vite, Kristiano Ronaldo është qendërsulmuesi më i mirë në botë. Është transformuar në këtë rol dhe duhet t’i bëj komplimentet për atë që bëri, sepse ka një kthjelltësi dhe zotësi për të shënuar, që do të hyjë në histori”.

Mediat, si përherë, u ngritën në një hosana për mbretin e momentit në futboll.
Gazeta “Marka” e Madridit titullon thjesht: Goli! Kristiano shënon me një roveshatë për historinë që ngre në këmbë stadiumin e Juventusit
“AS”: Nga cili planet vini? Kristiano goditi topin në 2.23 metra lartësi! Bufon: Vlera e tij është e krahasueshme me Maradonën, Mesin, Pelenë!
“El Mundo Deportivo”: Dje CR7! Sot Mesi!
“Sport” po e Barcelonës është mospërfillëse: Kristiano rrëzon Juventusin, shkruan ajo në një cep. Titulli dhe fotoja e madhe janë për Mesin: Shije Championsi!
“Il Korriere delo Sport” nga Italia: Një vepër arti! Roveshatë kryevepër e Ronaldos në Champions, Reali shkatërron Juventusin!
“La Gazeta delo Sport” me pasthirrmë: CR Uau! Të gjithë në këmbë për Ronaldon që me një roveshatë të çmendur përmbys Zonjën!
“L’Ekip” ka foton e Ronaldos dhe titullin: Në një planet tjetër!
“A Bola” e Portugalisë nuk ka dyshime: Është më i madhi!
Nga Argjentina, vendi i Mesit, komenton “Ole”: CR7 i papërballueshëm! Roveshatë e nivelit botëror!
“Lans” e Brazilit: I papërballueshëm! CR7 një kryevepër!
Natyrisht, Reali nuk ishte vetëm Ronaldo.
Suksesi 3-0 pati edhe meritë të tjerëve, që nga portieri Kejlor Navas, kapiteni Sergio Ramos apo Varan në mbrojtje, Modriç e Kros në mesfushë, Isko e Benzema në sulm, si dhe autori i golit tjetër Marselo.
Në një farë mënyre, madrilenët morën hakun e Totenhemit, që një tur më parë pati epërsi të plotë ndaj kampionëve të Italisë, por u eleminua nga mungesa e përvojës.
Përsa i përket, Juventusit, torinezët provuan edhe një herë sesa e madhe është diferenca mes Serisë A dhe La Ligës së Spanjës./abcnews.al

juventusio.jpg
gra moz13:40 | 03/04/2018

Juventus-Real Madrid është sfida më e madhe e çerekfinaleve të Ligës së Kampionëve. Dy emrat e mëdhenj ndeshen sonte në Torino, dhe spanjollët cilësohen si favoritë për kualifikimin.

Kështu duan të jenë kurdo, përmbi re. Futbollistët e Realit jo më kot janë kampionë të Europës, dhe veten e mendojnë mbi gjithë të tjerët. Të vënë në dyshim të fortë në ligën spanjolle, madrilenët duan të tregojnë epërsinë e tyre në Champions, ndërsa luajnë ndeshjen e parë çerekfinale në fushën e Juventusit.

Përqëndrimi i ekipit spanjoll u duk i plotë, në udhëtimin drejt stadiumit “Alianc Arena”, ku u përgatitën për herë të fundit për sfidën që i pret. Trajneri Zinedin Zidane e pa të arsyeshme t’u fliste kampionëve të tij. Francezi dha këtë mesazh motivues.

Zinedine Zidane: “Ju e dini që ky është futboll, e kemi bërë gjithnjë. Të jemi të gjithë të bashkuar, shumë të fortë. Na duhet të jemi të përqëndruar, sikur po luajmë një finale. Ne na kënaq vetëm të fitojmë tituj dhe të tregojmë se jemi më të mirët”.

Trajneri francez, ish-lojtar i Juventusit për 5 vjet, vlerëson kundërshtarin si shumë të fortë, dhe tregon se çfarë duhet të bëjë ekipi i tij për t’ia dalë.

Zinedine Zidane: “Duhet të zhvillojmë një ndeshje të mirë, kjo është e vetmja porosi e imja për lojtarët. Kështu kemi bërë gjithnjë dhe mendoj se jemi të përgatitur për ta bërë. Gjithsesi, këto ndeshje nuk kanë të bëjnë aspak me atë që ndodhi disa muaj më parë. Ajo që shkoi, shkoi, ndaj duhet të mendojmë vetëm për ndeshjen e radhës. Nuk mund të spjegoj se përse Reali ka fituar 2 finalet ndaj Juventusit, ndërsa është eleminuar kur ka luajtur dy ndeshje. E them sërish se mendoj vetëm për ndeshjen e radhës”.

Harmonia në ekip mendohet të jetë vendimtare në nivele të tilla, por tek Reali ka një çështje “Isko”, me lojtarin që ankohet se luan pak.

Zinedine Zidane: “Isko është një lojtar shumë i rëndësishëm për mua. Ndoshta, është më ndryshe në kombëtare sepse në një vit atje luhen 8 ndeshje, ndërsa tek Reali luhen 60 takime, shpesh herë një herë në tri ditë. Koncepti im është që nuk ka titullarë dhe rezerva, kam 25 lojtarë që për mua janë të gjithë njësoj, dhe uroj që edhe futbollistët të mendojnë kështu”.
S

fida e dyfishtë është padyshim një klasike europiane. Rivalët janë ndeshur shpesh që nga fillimi I viteve 60-të, dhe bilanci i tyre është thuajse i barabartë, në gjithçka.

Ka një dallim, sidoqoftë. Reali i ka fituar të dyja finalet mes tyre, në 1998 dhe në 2017. Nga ana tjetër, Juventusi është kualifikuar katër herë kur duelet kanë qenë me dy ndeshje. Kampionët e Italisë mund të thuhet se vijnë në përballje në momentin më të mirë. Të rikthyer në krye të Serisë A, madje me diferencë me Napolin, dhe finalistë të Kupës së Italisë. Shqetësimi i vetëm është loja jo edhe aq bindëse, siç ndodhi ndaj Totenhemit apo Milanit. Trajneri Alegri, sidoqoftë, kërkon vetëm një gjë nga lojtarët e tij.

Massimiliano Allegri: “Kemi përballë skuadrën që luan pa ndërprerje në Champions që nga viti 1996, që arrin të paktën në gjysmëfinale që nga viti 2011, dhe që është më e forta dhe favorite në Champions. Duhet të kemi ambicien që të luajmë si të barabartë dhe që ta mundim. E kemi studiuar finalen e humbur në Kardif, dhe duhet të jemi më të fortë psikologjikisht. Tani është ndryshe, pasi luhet me dy ndeshje, ndaj dhe duhet të mbetemi në lojë deri në fund, pasi kualifikimin duhet ta marrim në Madrid”.

Një nga shtyllat juventine, Xhorxho Kielini, ka besim pavarësisht nga ajo që ndodhi në Kardif.

Giorgio Chiellini: “Nuk mund të flasim për hakmarrje, pasi gjithë këta vjet kemi fituar dhe jemi mundur me gjithë ekipet e forta. Duam të fitojmë sepse duam të fitojmë Championsin, dhe që ta bësh këtë, do të duhet të përballesh me Barcelonën, Realin apo Bajernin. Kemi përballë një nga dy ekipet më të fortë të botës, kemi respekt për Realin që ka në ekip mbrojtësin më të fortë të botës, Sergio Ramosin, dhe sulmuesin më të mirë të botës për momentin, Kristiano Ronaldon. Gjithsesi, ne duam të fitojmë dhe besojmë se mund të fitojmë”.

Dyshimet e vetme të Juventusit për formacionin janë për aktivizmin e Markizios ose Betankurit në vend të Pjaniçit, ashtu si zgjedhja mes Ruganit e Barxalit./abcnews.al

bonuci.jpg
gra moz09:31 | 01/04/2018

Juventusi fitoi përballjen e madhe ndaj Milanit në Torino, duke iu afruar shumë titullit të 7-të radhazi në Itali. Në një ndeshje me shumë emocione, golin për miqtë e shënoi ish-ylli juventin, Leonardo Bonuçi.

Kur gjyqtari sinjalizoi fundin, pati gëzim, por edhe dëshpërim.

Një nga derbit e Italisë, ai Juventus-Milan, ishte një nga ato ndeshje ku rezultati mund të quhej fare mirë i gënjeshtërt. Kampionët fituan ashtu siç, në Serinë A dinë të bëjnë vetëm ata, pra të triumfojnë edhe kur nuk luajnë mirë. Shënuan tre gola me fare pak gjuajtje në portë, ndërsa përballë tyre, Milani ishte skuadra që bëri shumë më tepër.

Pas golit të mrekullueshëm të Dibalës, erdhi barazimi i merituar, ndërsa tronditja ishte e madhe në stadiumin “Allianz Arena” të Torinos.
Autor i rrjetës për Milanin ishte kapiteni Leonardo Bonuçi, pra një ish-juventin, një nga simbolet e mëdhenj të Juventusit të trajnerëve Conte e Allegri.

Mbrojtësi i qendrës jo vetëm shënoi, por edhe festoi, diçka që tifozët vendas nuk e mendonin aspak se do të ndodhte. Formacioni milanez, i drejtuar nga trajneri Xhenaro Gatuzo, nuk u kënaq me barazimin, por kërkoi fitoren. Karakteri ishte njëlloj si ai i Gatuzos, kur luante vetë në fushë me fanelën kuqezi, veçse përvoja dhe fati nuk ishin me Milanin. Pavarësisht sulmeve dhe rasteve të krijuara, golin e shënoi kundërshtari.

Minutat e fundit ishin një delir për publikun, pasi fillimisht Kuadrado, e pastaj Kedira, fiksuan rezultatin 3-1. Me këtë fitore, Juventusi u shkëput në 4 pikë nga Napoli, që gaboi duke barazuar në fushën e Sasuolos. Titulli i 7-të radhazi duket krejtësisht i mundshëm tani. Milani, ndërkaq, mbeti shumë larg zonës Champions, të cilën ndoshta do të synojë ta arrijë sezonin e ardhshëm.

juventusi-1280x655.jpg
ent ela15:46 | 07/03/2018

Juventusi rrezikon shumë në Londër, në ndeshjen e sotme të Ligës së Kampionëve. Italianët nuk cilësohen favoritë, pas barazimit 2-2 në Torino me Totenhemin.
E habitshme sesi i shpëtoi nga duart ndeshja e parë, por tani është koha për të menduar të dytën.
Juventusi nuk ka më kohë që të dëshpërohet për barazimin 2-2 në Torino ndaj Totenhemit, pasi sonte në mbrëmje, në 20:45, do të duhet të arrijë kualifikimin për në çerekfinale.

Nuk do të jetë aspak e lehtë në Londër, në kryeqytetin e vendit që shpiku futbollin, dhe në stadiumin mitik “Uembli”.
Gjithsesi, Juventusi beson se është gati, dhe se e ka përvojën e duhur.

Për më tepër, në Angli, bashkë me maskotin kanë ardhur shumë tifozë që do të jenë në tribuna.
Trajneri Masimiliano Alegri jep lajme të mira përsa i përket formacionit dhe gjendjes së yjeve kryesorë si Higuain apo Dibala.

Masimiliano Alegri: “Do të luajnë që të dy. Higuain prej dy ditësh është stërvitur me skuadrën, pra është në dispozicion dhe është gati për të luajtur, ashtu siç është edhe Dibala. Dibala rikuperoi mirë pas ndeshjes me Lacion, jo më kot është i ri, 24 vjeç. Ndeshja me Totenhemin është e tillë që secili lojtar dëshiron ta luajë dhe të shkëlqejë, edhe nëse nuk është plotësisht në formë. Nuk e di sesi do të luajë Totenhemi, por mendoj se kundërshtari do të ketë më shumë presion, pasi ka avantazh. Për ne është finale, dhe do të na duhet shumë durim dhe shumë nivel teknik”.

Një nga emrat më të mëdhenj të Juventusit është kapiteni Xhanluixhi Bufon.
Portieri flet për ndeshjen dhe pyetet për të ardhmen e tij.

Xhanluixhi Bufon: “Është një sfidë shumë emocionuese, dhe kjo për faktin se luhet në një stadium, në një teatër historik dhe të pabesueshëm. Ne do të duhet të luftojmë fort për të arritur kualifikimin, dhe duket se do të jetë disi “malore”, për vetë rezultatin e ndeshjes së parë, dhe për forcën që tregoi kundërshtari. Gjithsesi, më mirë kështu, pasi kur të duket më e lehtë, mund të gabosh më shumë. Përsa i përket të ardhmes sime nuk dua që të flas, por shpresoj që kjo të mos jetë ndeshja e fundit e këtij sezoni në Champions, për Juventusin”.

Çfarë mendon për Bufonin, kolegu i tij, portieri i Totenhemit, Hugo Joris, që gjithashtu është kapiten i skuadrës së tij?

Hugo Joris: “Ai është një nga më të mëdhenjtë në historinë e futbollit, padyshim. Ai ka vënë vulën e tij në futbollin botëror dhe meriton të respektohet thellësisht. Kur isha fare i ri, në akademi, na jepnin si shembull dy portierë, Iker Kasijasin dhe Xhanluixhi Bufonin. Gjithsesi, ne duhet të mendojmë për ndeshjen. U treguam me shumë karakter në takimin e parë, por ndaj Juventusit mund të ndodhë gjithçka, sidomos nëse nuk arrin të japësh maksimumin dhe të luash me mentalitetin e duhur”.

Totenhemi po ashtu e pret ndeshjen me optimizëm.

Verën e kaluar luajti ndaj Juventusit pikërisht në “Uembli” dhe fitoi 2-0, ndonëse ajo ishte thjesht një miqësore.
Sot, trajneri Maurisio Poçetino ka në dispozicion thuajse të gjithë lojtarët, ndërsa forma ka qenë shumë e mirë gjatë gjithë sezonit.
Sulmuesi Harri Kejn është shpresa e madhe për suksesin, edhe pse gola mund të shënohen edhe nga shumë të tjerë.
Poçetino bën analizën e tij.

Mauricio Poçetino: “Së pari duhet të dalim në fushë dhe të kënaqemi. E dimë se do të luajmë ndaj njërës prej skuadrave më të mira të Europës, por ne jemi skuadër e guximshme, me moral të lartë dhe që na pëlqejnë sfidat. Ndaj Juventusit luhet edhe për t’u kualifikuar, edhe për t’u kënaqur. Ne mendojmë se mund të fitojmë, por sidoqoftë, rezultati do të vijë si pasojë e paraqitjes sonë në fushën e lojës”.

Juventusi nuk cilësohet favorit, por as pa shanse, përkundrazi.
Në vizitën e fundit që zhvilloi në Angli për Championsin, fitoi 2-1 në fushën e Mançester Sitit në 2015-ën.
Po ashtu, barazimi në ndeshjen e parë nuk ka qenë gjithnjë fatal, pasi gjashtë herë ka arritur të kualifikohet.
Mjafton të kujtohet suksesi në “Kamp Nou” ndaj Barcelonës në vitin 2003, kur italianët arritën finalen e Championsit./abcnews.al

dybala.jpg
gra moz09:48 | 04/03/2018

Paulo Dibala i dha Juventusit një fitore të madhe ndaj Lacios në kryeqytetin e Italisë. Ylli argjentinas mposhti portierin shqiptar, Tomas Strakosha, pikërisht në sekondat e fundit
Fitore të tretë radhazi nuk pati.
Edhe një Lacio shumë e mirë nuk mund t’ia dalë gjithnjë ndaj Juventusit, ndaj edhe në stadiumin “Olimpiko” pati një dështim.
Në Superkupë kishte qenë sukses, po ashtu në Torino, kur Tomas Strakosha ruajti rezultatin duke i pritur penallti Dibalës në sekondat e fundit.
Pikërisht në sekondat e fundit, ishte argjentinasi që fitoi duelin e kësaj jave.
Goli në minutën e 93-të u dha një triumf të madh bardhezinjve, si dhe ua rriti në maksimum shanset për të fituar titullin e shtatë radhazi.
Ndeshja në kryeqytet u luajt e fortë, por jo edhe shumë e bukur.
Taktika dhe pritja e momentit të përshtatshëm bënë që ritmi të ishte I ulët dhe rastet të paktë.
Thuajse gjithçka ishte e barabartë, por me miqtë që nisën të ushtronin më shumë presion në fund.
Trajneri Alegri pati mundësi të mbështetej tek Bufon, Barxali, Kedira, Pjaniç, Dibala e Manxhukiç, që mbuluan mungesat e rëndësishme të Kielinit e Higuainit.
Lacio pagoi mungesën e përvojës përballë një ekipi me shumë eksperiencë.
Ky dështim bën që për Strakoshën dhe shokët e tij të rrezikohet kualifikimi për në Champions sezonin e ardhshëm./abcnews.al

vlcsnap-error329-1-1280x720.jpg
gra moz22:32 | 28/02/2018

Etrit Berisha nuk arriti të kualifikohej për në finalen e Kupës së Italisë. Portieri i kombëtares shqiptare u dorëzua në fund në fushën e Juventusit, edhe pse vetëm pas një penalltie.

Ky brez kampionësh nuk ngopet lehtë.

Xhanluixhi Bufon dhe gjithë yjet e tjerë të Juventusit realizuan një tjetër objektiv, edhe pse një finale dhe jo një trofe, atë të Kupës së Italisë.
Në një sezon më të vështirë se zakonisht, edhe suksesi nuk ishte plotësisht i lehtë ndaj Atalantës modeste si emër, por të fortë në fushë, që pati sërish në portë Etrit Berishën e kombëtares shqiptare.

Suksesi 1-0 në ndeshjen e parë falë golit të Gonzalo Higuainit nuk është se i dha shumë qetësi kampionëve të Italisë, pasi miqtë nga Bergamos ushtruan presion pa u trembur.

Gjithsesi, diferenca në cilësi ishte e madhe në stadiumin e Torinos, pavarësisht nga karakteri i ekipit të drejtuar nga trajneri Gasperini.
Juventusi e mori shpejt komandën, por u duk përsëri se nuk është në momentin më të mirë.

E pati shumë të vështirë të krijonte raste të pastër, diçka e paimagjinueshme për këtë formacion, të paktën në futbollin italian.

Besohet se me këtë formë, nuk do ta ketë të lehtë të arrijë kualifikimin për në çerekfinalet e Championsit, ndërsa shkon në fushën e Totenhemit pas barazimit 2-2 në Torino.

Skuadra e trajnerit Masimiliano Alegri pati madje fat që sfida nuk shkoi në shtesë, pasi vetëm shtylla e shpëtoi nga pësimi i golit, kur takimi ishte në 0-0.
Në fund, lehtësimi erdhi nga një penallti e fituar nga Matyidi.
Për fatin e juventinëve, përballë Etrit Berishës nuk u vendos Dibala, që nuk ishte fare në fushë, por Miralem Pjaniç dhe boshnjaku nuk gaboi.
Fitorja e dytë 1-0 dhe finalja e parë e sezonit për kampionët./abcnews.al

vlcsnap-error871-1-1280x720.jpg
ent ela14:52 | 13/02/2018

Liga e Kampionëve rifillon sonte me një përballje të madhe. Juventusi pret Totenhemin në Torino, në orën 20:45, në një duel të spikatur mes futbollit italian dhe atij anglez.

Mrekullia e Mario Manxhukiçit nuk mjaftoi herën e kaluar.

Juventusi u detyrua të dorëzohej përballë Realit në finalen e Championsit në maj të 2017-ës, por tashmë kemi vit të ri dhe shpresa të reja.

“Zonja e Vjetër” po përgatitet për të pritur Totenhemin, në ndeshjen e parë të turit të dytë, ndërsa kompeticioni kryesor I klubeve në Europë rifillon pikërisht sot.

Dueli italo-anglez është ndër më të bukurit e këtij raundi, edhe pse jo një klasike.

Në çfarë mënyre do të paraqitet Juventusi, do të jetë I kujdesshëm?

Alegri: “Jo, nuk do të luajmë për 0-0. Duam vetëm të mos pësojmë gol në shtëpi. Kjo çerekfinale do të jetë e ekuilibruar, secila nga skuadrat ka nga 50 për qind shanse për kualifikim. Duhet të jemi të kujdesshëm, pasi nuk duhet të lejojmë që kundërshtari të shfrytëzoi cilësitë e tij të larta fizike dhe teknike. Gjithsesi, jemi Juventusi dhe kemi fituar respet të madh për veten me rezultatet që kemi arritur vitet e fundit”.

Xhorxho Kielinit, mbrojtësit më të fortë të Juventusit, iu bë menjëherë pyetja për sulmuesin kryesor kundërshtar, Harri Kejn.

Kielini: “Është një sulmues i jashtëzakonshëm, siç e tregojnë statistikat e tij vitet e fundit. Është përmirësuar shumë këto kohë, diçka që nuk është e lehtë, por ai ia ka dalë. Është futbollist i kompletuar, pasi shënon gola, luan për skuadrën, ndihmon shokët të realizojnë. Është një nga numrat 9 më të mirë në botë”.

Kejn, nga ana e tij, nuk vonoi t’ia kthente komplimentat italianit.

Kejn: “Po, po. Ai është një mbrojtës i mahnitshëm. E mbaj mend në ndeshjen time të parë për Anglinë, kur isha përballë tij, ndërsa luante për Italinë. Bëri një ndërhyrje të ashpër, sikur të më jepte mirëseardhjen në futbollin ndërkombëtar. Gjithsesi, Juventusi nuk ka vetëm Kielinin, por e gjithë skuadra është e fortë. Është një ndeshje vërtet e madhe, nga ato ndeshje që ne kemi dëshirë t’i luajmë”.

Po trajneri i londinezëve, Maurisio Poçetino, si e mendon përballjen.

A është Totenhemi në nivelin e kundërshtarit?

Poçetino: “Juventusi është një klub masiv. Ne nuk mund të krahasohemi me të, dhe këtë e tregon historia e madhe e Juventusit. Po ashtu, vitet e fundit ka fituar gjithçka në Itali dhe ka luajtur dy nga tri finalet e fundit në Champions. Totenhemi, ndërkaq, është një ekip i ri, dhe po ndërton një projekt të rëndësishëm, por ne duam që të jemi në nivelin e Juventusit dhe do ta provojmë. Për mua është emocionuese, gjithashtu, që të vij për herë të parë në Torino, në vendin e origjinës së familjes sime”.

Historia padyshim është në favor të Juventusit, që ka fituar dy herë Championsin, po ashtu edhe Kupën e Kupave të Europës dhe Kupën UEFA, pa harruar Superkupën europiane dhe Kupën e Botës për klubet.

Totenhemi ia ka dalë të fitojë vetëm nga një herë Kupën e Kupave dhe dy herë Kupën UEFA, duke mos qenë i suksesshëm në Champions.

Anglezët kanë fituar vetëm dy tituj në vendin e tyre, ndaj 33 titujve të italianëve në Serinë A.

Dueli më interesant I sfidës është ai mes dy sulmuesve kryesorë, Gonzalo Higuain e Harri Kejn.

Argjentinasi, 30-vjeçar me shumë përvojë, ka fituar 10 trofe të rëndësishëm tek Reali, Napoli e tani tek Juventusi, dhe do të jetë rreziku kryesor për anglezët.

Kejn, ende vetëm 24 vjeç, është në formë të jashtëzakonshme aq sa cilësohet si sulmuesi më i mirë i botës për momentin.

Ai doli shënuesi më i mirë i vitit 2017 duke mundur Lionel Mesin, ndërsa ka fituar Këpucën e Artë të Premier Ligës në dy sezonet e fundit, duke qenë sërish në golshënuesi më i mirë edhe këtë vit.

Juventusit i mungon njëri nga lojtarët më të rëndësishëm, Paulo Dibala, edhe pse u stërvit me skuadrën, dhe po ashtu nuk është as Barxali.

Totenhemi, në të kundërt, nuk ka asnjë problem me dëmtimet apo pezullimet, me përjashtim të mbrojtësit Alderveired që mungon prej 3 muajsh./abcnews.al

 

vlcsnap-error696-1280x719.jpg
gra moz22:39 | 12/01/2018

Kriza e Real Madrid duket se do të prekë trajnerin Zidane. Mediat spanjolle shkruajnë për një zëvendësim të mundshëm të tij, 2 vjet pasi mori drejtimin dhe fitoi çdo trofe.
Në dy vite si trajner i Realit, Zinedine Zidane fitoi thuajse gjithçka, por tashmë duket se epoka e tij në drejtimin e Los Blancos duket se ka ardhur në fund.

Real po dështon jo vetëm në rezultate por edhe në lojë, gjë që është e papranueshme jo vetëm nga tifozët por edhe e pajustifikueshme për drejtuesit e klubit.
Nën shënjestrën e shigjetimit është pikërisht trajneri sepse dihet se kur gjerat nuk shkojnë sipas parashikimeve, përgjegjësia bie mbi të.

Ka zëra se presidenti Perez është duke vlerësuar zëvendësimin e tij, saktësisht 2 vjet pasi e promovoi në postin e trajnerit. Në momente kritike duhet të ruhet qetësia, ka thënë ish-kapiteni Fernando Hierro, por nëse Zidane nuk shkarkohet këto ditë, atij i duhet ofruar një zgjatje e kontratës, që aktualisht është e vlefshme deri në fund të këtij sezoni.

Me të marrë vesh lajmin, në media u raportua një lëvizje e Juventusit në drejtim të francezit. Zizou është një nga lojtarët që ka lënë gjurmë në klubin torinez dhe rikthimi si trajner do të ishte arsye motivimi për lojtarët dhe drejtuesit e bardhezinjve./abcnews.al

vlcsnap-error256-1280x719.jpg
us er11:10 | 10/12/2017

Interi ia doli të merrte një pikë në Derbin e Italisë të zhvilluar në fushën e Juventusit, për Serinë A. Vendasit krijuan më shumë raste, por nuk arritën të shënonin asnjë gol.

Kaloi një provë të madhe në rrugën drejt një titulli të mundshëm
Barazimi në fushën e kampiones në fuqi është gjithnjë një rezultat i madh, pavarësisht sesi arrihet dhe Interi i trajnerit Spaleti nuk do të gjykohet aspak për lojën, nëse në fund të sezonit realizon objektivin.
Derbi i Italisë në Torino nuk ishte një nga ndeshjet më të bukura të Serisë A, por padyshim një nga më të rëndësishmet dhe tregoi se këtë sezon Juventusi nuk mund të ndryshojë situatën në përballjet vendimtare.

Vetë fakti që Interi mori rezultat në një fushë ku gjithnjë është thyer, është tepër i rëndësishëm.
Vendasit patën epërsi në raste edhe pse jo gjithnjë në lojë, por e patën të pamundur të shënonin qoftë edhe një gol.

Në një përballje të fortë fizike, juventinët u dukën më të rrezikshëm para portës së miqve, por sulmuesi kroat, Mario Manxhukiç, nuk pati fat as në pjesën e parë, dhe as pas pushimit.
Interistët protestuan fort për një prekje me dorë të Benatias në zonë, që ata e kërkuan penallti.
Prekja me dorë ishte, ndërsa gjyqtari e quajti të pavullnetshme, madje as nuk denjoi që të kërkonte ndihmën e teknologjisë VAR.
Skuadra e Spaletit mori atë që deshi, ndonëse jo në mënyrë edhe aq bindëse.

Mbajti shumë topin, bëri edhe shpesh presion, por thuajse nuk krijoi asnjë rast të rrezikshëm.
Sidoqoftë, ishte sukses që nuk pësoi gol në fushën e ekipit që shënon më shumë gola në Serinë A, ndërsa e mbajti Juventusin 2 pikë larg në renditje./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono