juli xhokaxhi

lamallarui.jpg
nev ila15:03 | 16/01/2020

I ftuar ditën e sotme në studion e ABC News me gazetaren Juli Xhokaxhi ka qenë i ftuar zv/ministri i Brendshëm Besfort Lamallari. Lamallari foli për paketën kundër krimit të organizuar, dhe vrasjet e bujshme të ndodhura në vend.

Lamallari tha se Policia e Shtetit ka avancuar në lidhje me kapacitet e saj për zbulueshmërinë e krimeve të rënda në vend.

Pjesë nga biseda:

Besfort Lamallari: Ajo që është e rëndësishme është që vërtetë duhet të kemi vëmendjen ndaj vendimeve përfundimtare nga gjykata. Ka shumë për të bërë, si në aspektin e vendimeve që kanë të bëjnë me persona të rrezikshëm të cilët, jo vetëm për rastet që duket sikur janë të lehta, që persona të arrestuar në flagrancë dhe të përfshirë në veprimtari të organizuar kriminale. Kemi parë që persona të dënuar me burg përjetë kanë dalë nga burgu në mënyrë absurde. Kjo e bën më të domosdoshme avancimin e qeverisë shqiptare për të reaguar ndaj një situate të tillë, e cila vjen edhe si një përgjigje e këtyre fenomeneve për të parandaluar situata të tilla.

Juli Xhokaxhi: A po punohet për një strategji ndryshe për parandalimin e krimit nga policia shqiptare ? A duhet të kalojmë në një stad tjetër?

Besfort Lamallari: Sigurisht, ajo çfarë ne i mëshojmë fort është lufta kundër krimit të organizuar. Ka një program të mirëmenduar të Ministrisë së brendshme e adresuar në aspektin e inteligjencës dhe analizës kriminale.

Juli Xhokaxhi: Kemi një fillim të 2020 me bilanc lufte për shkak të vrasjeve dhe aksidenteve. Rasti i Rrëshenit është një nga rastet e rënda, të lë shijen e një vrasjeje mafioze, çfarë ndodh në këto lloj rastesh? Si punohet?

Besfort Lamallari: Kapacitetet e policisë shqiptare janë shumë më të larta në krahasim me ato në të shkuarën. Mekanizmat për hetimin dhe zbulimin e ngjarjeve të caktuar sot gjithmonë e më tepër policia përdor hetime me metoda të ndryshme speciale. Metodat janë tepër të sofistikuara në bashkëpunim edhe me partnerët ndërkombëtarë, mjafton të përmend faktin se në shumë prej vrasjeve janë përdorur teknika tepër të avancuara duke filluar nga gjurmët e gishtave, analizat e ADN të cilat orientojnë drejt zbardhjes së autorëve.

Besfort Lamallari: Për rastin konkret, nga raportimi i policisë së shtetit, jam besimplotë se oficerët që merren me këtë çështje por edhe me të tjera në një kohë të shkurtër do të zbardhin çështjen./abcnews.al

xhokacxhi-balliu.jpg
nev ila19:28 | 21/12/2019

Klevis Balliu ish-deputeti i PD ka qenë i ftuar sonte në studion e ABC News me gazetaren Juli Xhokaxhi.

Balliu bëri publike 4 dokumente të vitit 1990 ku tregohej se kreu i sapozgjedhur i SPAK Arben Kraja ka hetuar 2 vëllezër nën akuzën e “prishjes së moralit komunist” dhe “kalim të paligjshem te kufirit”.  Kjo tha Balliu është fyerje ndaj shqiptarëve pasi zbehin shpresën që ata kanë tek SPAK.

Gjithashtu Balliu tha se në vitin 1990 kur Arben Kraja ka hetuar këtë çështje, prokurorë apo hetues të tjerë, nuk merreshin më me të tilla ngjarje, sepse ndërkohë kishte filluar largimi i shqiptarëve dhe hyrja e tyre nëpër ambasada. Sipas Balliut, kjo tregon se Arben Kraja ka qenë 1 nga hetuesit më ekstremistë të kohës së regjimit komunist.

Më tej Balliu foli edhe për foton e publikuar në media, ku shihet kreu i SPAK i ulur në një kafe me Ulsi Manjën. Kjo sipas Balliut është konflikt interesi pasi Ulsi Manja është kapur në përgjimet e “BILD”, dosjet e të cilës do ti kalojnë për hetim SPAK.

“Kjo që ka ndodhur është e rëndë sepse SPAK është një shpresë jo vetëm për opozitën por për të gjithë qytetarët shqiptarë. Figura të tilla po e zbehin shpresën e qytetarëve shqiptarë për SPAK. Edhe vetë procesi i vettingut që bëhet në Shqipëri ka një konflikt interesi sepse Pamela Balluku, motra e ministres Belinda balluku, bën vettingun e gjyqtarëve që do të gjykojnë dosjet e çuara nga ne për ministrinë e infrastrukturës dhe energjetikës, ndërkohë Pamela do të vendosë për këta gjyqtarë. Pra ka konflikte të mëdha interesi të cilat mund të kenë ndikuar në fitoren e një gjykatësi apo prokurori dhe humbjes të disa të tjerëve. Në rastin e Arben Krajës, për ti qëndruar fakteve dhe provave, kërkova dhe gjeta në fakt 4 letra që janë për të njëjtën çështje të hetuesit Kraja të kohës së diktaturës. Çfarë është e rëndësishme të theksohet për çështjen e tij, është që në vitin 1990 Arben Kraja mbronte moralin komunist. Dua të them që në vitin 1990, edhe hetues komunist, nuk merreshin më me akuza të tilla, sepse ishin drejt fundit, Arben Kraja duket që është një nga të vetmit, nga më ekstremistët, të cilët edhe në korrik të vitit 1990 bënte hetime të tilla. Qytetarët shqiptarë duhet të dinë se, hetuesit në atë kohë ishin më të frikshëm se edhe polici që rrinte aty. Fakti që kjo histori ka ndodhur kur ndryshimet e sistemit kishin nisur që në fillim të viteve 1990, tregon se Arben Kraja ka qenë nga më ekstremistët, sepse po në këtë kohë, prokurorë apo hetues të tjerë nuk merreshin më me çështjet e kalimit të kufirit, sepse mijëra qytetarë kishin kaluar tashmë. Nuk dua të spekulojë por hetuesit në atë kohë, një prej detyrave të tyre, ishte torturimi i qytetarëve deri në pranimin e një faji që ata nuk e kishin bërë. Mendoj se nuk mund të ketë ngelur prokuroria shqiptare, apo ligji shqiptar, për hetuesit e Enver Hoxhës. Në 30 vite, ne duhet të kemi prokurorë të tjerë, të cilët nuk janë të lidhur me atë regjim. Pse duhet me patjetër të jetë ai? Kjo është një fyerje për shqiptarët. Këto janë dokumente të arkivave të shtetit dhe nuk mundet askush, as zoti Kraja që ti mohojë, janë të pamohueshme dhe kjo është një çështje e mbyllur”, tha Balliu.

Juli Xhokaxhi: Diçka tjetër që ka lidhje me SPAK është edhe fotoja e dalë ku shihet Ulsi Manja i ulur me një nga kandidatët për kryesimin e SPAK, çfarë të keqe ka, çfarë thotë ligji në këtë rast?

Klevis Balliu: Ajo që dua të theksoj fillimisht është se Zoti Manja është kapur në përgjimet e BILD, për vjedhjen e votës dhe është një dosje e cila do ti kalojë SPAK. A nuk ka një konflikt interesi këtu, si ka mundësi të takohet ky njeri? Edhe nëse do e kishte të afërm nuk mund të zgjidhej në krye të SPAK sepse ka konflikt interesi me persona që do i duhet të hetojë. Të dy këto raste, për kreun e SPAK, mendoj që duhet të mbahet një qëndrim, kam besim të plotë te investimet e SHBA dhe do të ishte mirë, qoftë edhe për të mos fyer shqiptarët me hetues të Enver Hoxhës, që për këta njerëz duhet të mbahet një qëndrim./abcnews.al

juli-ervin-salianjo.jpg
nev ila11:00 | 19/12/2019

I ftuar në studio me Juli Xhokaxhi ditën e sotme ishte Ervin Salianji i cili deklaroi se do të publikojë në vazhdim prova dhe fakte të reja që tregojnë lidhjet në trafikun e drogës, të vëllait të ish-Ministrit të Brendshëm, Agron Xhafaj.

Sipas Salianjit, Agron Xhafaj është ortak dhe partner, me personat që janë kapur përpara disa muajve me tonelata droge në shtetin grek.

Juli Xhokaxhi: Jo më larg se dje keni deklaruar se do të publikoni prova dhe fakte të reja. A mund të na thoni dicka?

Ervin Salianji: E kam thënë pak, por po pres që të marr konfirmime të plota, nga i njëjti grup i strukturuar kriminal që ka denoncuar gazetari dhe Albert Veliu, në Gusht, janë kapur tonelata me drogë në Greqi, disa skafe, të cilët janë ortakë, partnerë dhe shoferë, që rrinë gjithë kohën bashkë me Agron Xhafajn. Kështuqë në momentin që do ti faktojmë, do ti bëjmë publike. Ashtu sic thuhet dhe në Akt-ekspertimin britanik, që ka vërtetuar se zëri në audio-përgjim është i Agron Xhafaj, dhe ka përjashtuar kategorikisht një “Agron” tjetër (Agron Hyseni) që ka futur SHISH për të ngatërruar akt-ekspertimin. Pra kanë gjetur një “Agron” tjetër, që të bëjnë cfarëdolloj marifeti dhe ngatërrese, për të mbuluar Agron Xhafajn.

Juli Xhokaxhi: A po mblidhni prova të tjera?

Ervin Salinanji: Ka shumë prova aty që do të ndërtohej narrativa e cila duhet të ishte bërë tashmë. Ne do ti drejtohemi edhe SPAK në vazhdim për këtë çështje. Gjithsesi është shumë e habitshme që Agron Xhafaj, nuk doli kurrë me zë dhe figurë, për të mohuar se zëri në përgjime nuk ishte i tij, Ai e deklaroi këtë vetëm me një shkresë.

Ditën e djeshme Gjykata Penale e Tiranës mori vendimin për të akuzuarit në çështjen “Babale”.

Gjyqtari Artan Gjermeni vendosi që Ervin Salianji të dënohet me 1 vit burg. Ndërkohë dënoi me 3 vite e 5 muaj burg Albert Veliun dhe 2 vite burg për Fredi Alizotin ndërsa për Gazetarin Jetmir Olldashi gjykata vendosi dënimin e tij me 6 muaj burg të konvertuar në 100 orë shërbim komuniteti.

Por çfarë është dosja “Babale”?

Pranverën e 2018-ës, PD botoi 2 audioregjistrime, përmes së cilave supozonte se vëllai i ministrit të Brendshëm aso kohe, Fatmir Xhafaj, Agroni ishte i përfshirë në trafikimin e lëndëve narkotike. E tërë çështja u emërua “Babalja”, pasi dëshmitari X i Partisë Demokratike, i cili ishte i përfshirë në audioregjistrime, thirrej në to me pseudonimin Babale.

Krimet e Rënda lëshuan urdhër-arreste për protagonistët e audiopërgjimit, Albert Veliu, i njohur ndryshe me nofkën “Babalja” dhe kunatin e tij, Fredi Alizoti. Nga ekspertiza që i është bërë kampionit të zërit, ai që dëgjohet në audio është i Agron Xhafajt, por i Alizotit, i cili pranonte se kishte imituar zërin e vëllait të ministrit, pasi iu ishin premtuar 200 mijë euro nga deputeti me mbiemrin Salianji./abcnews.al

 

zogaj1.jpg
ent ela17:32 | 19/11/2019

Analisti Preç Zogaj ka përjashtuar mundësinë e kapjes së sistemit të ri të drejtësisë, pais sipas tij drejtësia e vjetër ka qenë e kapur nga pushteti i radhës. I ftuar në studion e ABC News, Zogaj theksoi se sot ka përpjekje për ta tribluar dhe vonuar, por sipas tij nuk ka asnjë rrugëdalje tjetër veç ngritjes së institucioneve të drejtësisë.

“Situata është e paqartë, e ndërlikuar, sidomos ditët e fundit është një situatë juridike jo shumë e qartë për publikun. Nuk kuptohet qartë nga njerëzit dhe për fat të keq konflikti është për atë institucion që duhet të gjykonte konfliktet e tjera dhe duket pa rrugëdalje, por vendi do shkojë drejt ngritjes së Gjykatës Kushtetuese, reforma në drejtësi po ecën, po ngrihet SPAK e BKH dhe këto janë arritje të rëndësishme dhe paralel Gjykata Kushtetuese dhe Gjykata e Lartë, por në thelb reflekton një mundim dy vjeçar për ngritjen e reformës në drejtësi, kaq e rëndësishme ëhtë kjo reformë që pritet t’i japë fund periudhës së tranzionit për një fillim të ri në Shqipëri. Ka përpjekje për ta penguar.

Unë këtë të kapjes në dallim nga shumë të tjerë e përjashtoj, e kapur ishte se ekzistonte si e kapur. Qeveria e kryeministri i radhës e kishte drejtësinë në dorë, në momentin që ndodhte rrotacioni drejtësia i ofrohej sistemit të ri. Nga kjo pikëpamje drejtësia ishte e kapur, më të kapur Rama kishte të vjetrën jo këtë sot. Bëhet fjalë për një reformë shumëvjeçare, për kapje nuk flas, por përpjekje për ta tribluar dhe vonuar pak”. /abcnews.al

silva-caka.jpg
ad min18:04 | 24/10/2019

Të gjitha palët politike u vunë në punë sot për reformën zgjedhore. Një pjesë, ajo parlamentarja u mblodh në Kuvend, ndërsa opozita në selinë e Partisë Demokratike. Ish-deputetja e LSI-së, Silva Caka, deklaroi këtë të enjte se opozita dhe mazhoranca mund të ulen të dialogojnë nëse plotësohen 5 kushtet që ajo i ka dërguar.

Por sipas Cakës, pengesa e parë që duhet kaluar për të arritur deri aty është dorëheqja e Damian Gjiknurit si bashkëkryetar i Komisionit të Posaçëm për Reformën Zgjedhore.

Ish-deputetja, e cila është pjesë e grupit të punës të opozitës që po merret me reformën zgjedhore, tha gjithashtu se propozimi final që do t’i jepet Ramës do të kundërshtohet nga ai. Megjithatë në fund do ta pranojë atë për shkak të presionit për mos-hapjen e negociatave, vendosjen e kushteve dhe veton që do vendosin institucionet ndërkombëtare.

“Në kushtet ku jemi unë besoj që do të ketë shumë kundërshtime sepse është e vështirë që të kafshosh veten me dhëmbë. Në momentin që të vjen një kërkesë për të dekriminalizuar listat e tuaja do ta kesh të vështirë sepse i ke mbushur plot me kriminelë, me njerëz që financojnë fushatat, plot me njerëz që financojnë kandidatët e tyre. E shoh të vështirë që Edi Rama të pranojë shumë prej kushteve tona, por jam e bindur që edhe falë ndikimit dhe i vendosur në presionin e JO-së që morëm dhe prej kushteve që janë vendosur dhe do të vendosen do duhet të pranojë. Edhe nëse ai nuk i pranon do të jenë atëherë do të jenë institucione evropiane, BE, OSBE apo edhe shtete të caktuara që kanë në dorë një veto për çelje negociatash dhe do ta imponojnë më vonë produktin që do të nxjerrë ky grup”, tha Caka.

Ish-deputetja paralajmëroi se shumë shpejt do të zhvillohen zgjedhje të parakohshme dhe vendore. Sipas saj, mazhoranca po zvarrit ngritjen e gjykatës së Lartë dhe asaj Kushtetuese.

“Besoj se do të kemi së shpejti do të kemi shumë shpejt dy procese zgjedhore, zgjedhje të parakohshme dhe zgjedhje vendore. Edhe raporti i ODIHR për votimet moniste të 30 Qershorit , por edhe kushtet e Bundestagut nuk kanë vënë në ndonjë moment dekretet e presidentit. Shprehin se do të jetë Gjykata që do të vendosë për ligjshmërinë e këtyre dekreteve dhe legjitimitetin e atyre zgjedhjeve. Kam bindjen e plotë se Gjykata Kushtetuese mund të dojë shumë kohë. Deri tani është vetëm një anëta, por Kuvendi është duke u përpjekur që ta zgjasë sa më shumë në kohë edhe pse i kanë shkruar propozimet nga KED. Unë personalisht e kam të qartë që Grmoz Ruçi, Edi Rama, po përpiqen të zvarrisin Gjykatën e Lartë dhe Gjykatën Kushtetuese. Kjo do krijohet një ditë dhe kur të krijohet do të japë një verdikt që do i japë të drejtë dekreteve të Presidentit dhe do shpallen të pavlefshme zgjedhjet e 30 Qershorit dhe ne do hymë në zgjedhje vendore sërish”, tha Caka./abcnews.al

juli-xhokaxhi-klevis-balliu-1280x611.jpg
nev ila20:55 | 19/10/2019

“Jo-ja iu dha Ramës jo shqiptarëve. Këto janë barsoleta të Edi Ramës dhe të Spiropalit. Qeveria e tij është e dështuar”, kështu e nisi bisedën e tij, ish deputeti i PD Klevis Balliu. Balliu ka qenë i ftuar mbrëmjen e sotme në ABC News me gazetaren Juli Xhokaxhi. Balliu tha se, Jo-ja për çeljen e negociatave nuk iu dha shqiptarëve por kryeministrit Edi Rama dhe qeverisë së tij pasi kanë kriminalizuar vendin. Sipas Balliut kryeministri Rama duhet të japë dorëheqjen, dhe se të gjithë akuzat që ka ngritur Partia Demokratike janë faktuar. Balliu gjithashtu në bisedën e tij, u shpreh se gjesti i Borschardt ishte i turpshëm dhe se për këtë ai duhet të jepte dorëheqjen.

“Shqiptarët vuajnë për ujin e pijshëm ky do të hapë negociatat?!Ndërkombëtarët kanë pasqyrën reale të aktualitetit shqiptar. Ministrja e jashtme e Francës sot tha që nuk kemi thënë JO vetëm për azilkërkuesit por edhe për reformën në drejtësi etj. Kështu që midis udhëheqësve të mëdhenj dhe burrave me poture zgjedh të dëgjoj udhëheqësit. Të gjitha akuzat që janë ngritur nga PD janë faktuar me seriozitetin më të madh. Edi Rama duhet të japë dorëheqjen si Zaev, por ai e ka të vështirë sepse është i kapur nga krimi, ka futur duart te xhepat e qytetarëve shqiptarë“, tha Balliu.

I pyetur nga gazetarja Juli Xhokaxhi se çfarë u bë me peticionin që kishin ndërmarrë banorët e unazës së re kundër ambasadorit Berndt Borschardt, Balliu tha:

“Vazhdon një vrull i madh i mbledhjeve të firmave sepse ai ishte një nga aktet më të turpshme dhe më të ulëta, një akt i një militanti të partisë socialiste. Vetëm një militant i Edi Ramës mund ti tregonte gishtin në atë mënyrë barbare dhe ofenduese nënave dhe motrave dhe zonjave shqiptare. Ne kemi shumë respekt për të huajt por jo të vijnë e të na shajnë nënat dhe motrat këtu me gjeste. Akt i turpshëm, falja është dorëheqja. Qindra firma janë mbledhur për këtë dhe do vazhdojnë akoma të tjera”./abcnews.al

edmond-panariti-1280x709.jpg
nev ila18:28 | 17/10/2019

Mbrëmjen e sotme në studion e ABC News në rubrikën Intervista me gazetaren Juli Xhokaxhi, ka qenë i ftuar ish-ministri i jashtëm Edmond Panariti. Panariti tha se Shqipëria nuk ka bërë ende asnjë hap, në lidhje me 9 kushtet e vendosura nga Gjermania, për hapjen e negociatave. Sipas Panaritit, PO-ja gjermane është dhënë me kushte të forta, për të cilat ende nuk janë parë rezultate. Ish-ministri gjithashtu tha se, Franca ka paguar një kosto të rëndë, në raport me Shqipërinë, për hapat që janë hedhur drejt integrimit.

Juli Xhokaxhi: iMacron duket se këmbëngul në Jo-në e tij, nëse do të bënim një gjykim të ftohtë dhe të drejtpërdrejtë duhet t’ia kërkojmë përgjegjësinë vetëm Parisit apo kemi përgjegjësitë tona.

Edmond Panariti: Për tju përgjigjur në mënyrë objektive pa asnjë lloj pasioni, supozoni se pozicioni i Francës nuk është në rolin vendimmarrës dhe shihni pozicionet e shteteve që tashmë janë shprehur. Grupi i shteteve tradicionale të cilët vazhdimisht kanë qenë pro hapjes së negociatave e kryesuar nga Italia dhe krejt blloku perëndimor, ke grupin e vendeve skeptike që janë Holanda, e cila është shprehur për JO në parlamentin e saj. Edhe Gjermania është shprehur për PO në paradhomë por jo në dhomë  gjithsesi de fakto për 9 kushtet nuk kemi bërë asnjë hap drejt tyre.

Juli Xhokaxhi: Po thoni që Kryeministri Edi Rama po lexon vetëm paragrafin e parë të PO-së së Gjermanisë?

Edmond Panariti: Këtë kam frikë. PO-ja gjermane, nuk kemi asnjë hap për reformën në drejtësi në konstituivin e institucioneve të drejtësisë, nuk kemi ende asnjë hap për dënimin e personave që tashmë janë të evidentuar në dosjet e përgjimit, nuk kemi asnjë hap për proceset hetimore ndaj gjyqtarëve të cilët u përfshinë në procesin e vetingut, nuk kemi asnjë hap për gjykimin nga gjykata kushtetuese të legjitimitetit të zgjedhjeve të 30 qershorit, pra shihni se sa e gjatë është radha e kushteve dhe prandaj po ta lexosh ato që u hapën, e lexon thjesht për ta marketuar politikisht, por ky është një lexim jo realist dhe praktikisht PO-ja gjermane është në një farë mënyre kalim në paradhomë e Shqipërisë dhe Franca nuk do të na fusë as në paradhomë.

Juli Xhokaxhi: Si e shihni deklaratën e Macron kur thotë se me Shqipërinë kemi vepruar gabim?

Edmond Panariti: Franca ka paguar në raport me Shqipërinë një kosto të rëndë. Nëse do të shikoni azilkërkuesit shqiptarë në Francë janë të parët për nga numri i popullsisë dhe të dytët pas afganëve për kërkesat e azilit. Ju e dini që është një problem jashtëzakonisht i rëndë. Është krijuar një stigmë dhe një opinion negativ për Shqipërinë. Pozicioni i Francës duket që është on block kundër Ballkanit perëndimor. Pozicioni i Francës mbetet një pozicion i Veto-s dhe ne futemi në një ngërç të rënduar. Është një dëshpërim për të gjithë popullin shqiptar por sidomos për rininë shqiptare.

Juli Xhokaxhi: Si i shihni qëndrimet e dy kryeministrave ?

Edmond Panariti: Zaev e futi në kuadër të një sfide personale dhe tha që nëse nuk e arrin hapjen e negociatave ai largohet ndërsa Rama tha se diellin do të lindë sërisht dhe jeta vazhdon normalisht, pra janë dy qëndrime krejt të ndryshme të të dyve./abcnews.al

 

klajda-gjosha-1280x721.jpg
nev ila19:06 | 15/10/2019

E ftuar në studion e ABC News me gazetaren Juli Xhokaxhi mbrëmjen e sotme ka qenë Klajda Gjosha. Gjosha ka folur në lidhje me negociatat dhe procesin e Shqipërisë drejt integrimit. Sipas saj, qeveria shqiptare ka patur një mangësi të theksuar në përmbushjen e kushteve që i janë vendosur.

Gjithashtu Gjosha tha se, opozita ka ofruar zgjidhjen e saj për krizën politike, dhe se është e gatshme të ulet, e të diskutojë me mazhorancën pa kushte për reformën zgjedhore. Ajo theksoi se Europa nuk është çështje dashurie siç e quan kryeministri por një çështje detyrimesh dhe përgjegjësish.

Pjesë nga intervista në studio me Klajda Gjoshën: 

Juli Xhokaxhi: Sa gjasa ka që Macron të ndryshojë mendje?

Klajda Gjosha: Shpresoj që këtë herë të mos përsëritet situata e vitit 2016 ku vendet nuk arritën të dalin në një vendim të përbashkët sepse ky do të ishte precedenti i dytë, në atë kohë nuk arritën në një vendim të përbashkët për shkak të Turqisë ndërsa tani me sa duket molla e sherrit është pikërisht Shqipëria më pak Maqedonia e Veriut. Vendet e tjera janë për pro dhe për një ndarje të kësaj dysheje që shkon drejt procesit të integrimit megjithatë do të uroja që Shqipëria të mos kthehet edhe në një pengese për Maqedoninë e Veriut.

Juli Xhokaxhi: Sa gjasa ka të shkojë drejt një divorci të Shqipërisë dhe Maqedoninë e Veriut në vendimin përfundimtar?

Klajda Gjosha: Franca e ka kërkuar me kohë këtë dhe kjo nuk do të ishte mirë për Shqipërinë sepse do na çonte shumë vite pas dhe do ti shtonte rrugëtimit tonë vështirësi të pafundme por ndoshta edhe vite të gjata në këtë proces. Duket shumë e vështirë që Franca të heqë dorë. Është e para herë që shkohet me rekomandim pozitiv dhe aty përballesh me kushte të vendeve anëtare gjë e cila nuk ka ndodhur asnjë herë sepse vendet anëtare kanë marrë gjithmonë një vendim politik. Pra i gjithë procesi teknik ka kaluar përmes Komisionit evropian dhe vendimi ka qenë më pas politik. Vendet anëtare janë duke u kthyer më teknike se vetë komisioni evropian.

Juli Xhokaxhi: Kryeministri Rama sot ka thënë që negociatat janë çështje e brendshme e BE dhe jo se Shqipëria nuk ka arritur të plotësojë kushtet dhe kriteret. Një pjesë e zyrtarëve të lartë kanë thënë se Shqipëria ka ende shumë për të bërë. Kë duhet të besojmë ?

Klajda Gjosha: Patjetër që BE ka problematika të saj sepse ka të bëjë me vetë reformimin e BE por kjo nuk i pengon vendet si shqipëria që të ecin përpara me proceset në bazë të meritave. Diskutimet më të mëdha kanë të bëjnë me kushtet, kriteret dhe standardet, Shqipëria ka patur një mangësi të theksuar në plotësimin e kushteve. Fakti që në 2018 Shqipërisë iu vendosën kushte iu dha edhe një datë, dhe institucionet tona në momentin që duhet të vendoseshin në një punë kolosale dhe në vend që mazhoranca ti shtrinte dorën opozitës, për të vazhduar të përmbushte kushtet nuk bëri asgjë. Asgjë nuk u bë për përmbushjen e këtyre kushteve. Bundestagu gjerman ka qenë i prerë, deri në plotësimin e kushteve të vendosura nuk ka një datë të çeljes së negociatave.

Juli Xhokaxhi: Si është e mundur që Bundestagu gjerman jep një PO me kushte të fuqishme, dhe ministri i jashtëm gjerman jep sot një parantezë të tillë?

Klajda Gjosha: Mos harrojmë se edhe ministri jashtëm vjen nga një parti politike. Bundestagu gjerman është mbi kancelarinë. Është e qartë që Shqipëria do të ketë kushte për këtë çështje.

Juli Xhokaxhi: Ka një element që vlen të përmendet, Maqedonia e Veriut iu kërkua marrëveshja për ndryshimin e emrit me Greqinë, Shqipërisë i është kërkuar reforma në drejtësi, sa rrezikon BE në këtë moment që të zhgënjejë pritshmëritë e qytetarëve?

Klajda Gjosha: Nuk është e njëjta gjë të ndryshosh emrin dhe të firmosësh një marrëveshje e cila ka qenë historike për Maqedoninë e Veriut ndërsa Shqipëria ka kosto, thoni ju, por ka kosto për mirë për të përmirësuar një sistem. Shpresa te ajo reformë ka qenë shumë e madhe. Janë dy çështje të ndryshme. Tashmë vendet anëtare duan të shohin edhe implementimin e reformave. Shqipëria ka patur gjithmonë ligje të mira por zbatimi i tyre ka patur probleme.

Juli Xhokaxhi: Sot ka qenë kryeministri italian Giuseppe Conte në Shqipëri i cili ka shprehur mbështetjen e Italisë në lidhje me hapjen e negociatave. Sa vlen një aleat si Italia?

Klajda Gjosha: Italia ka qenë gjithmonë mbështetëse. Italia është një vend që ndahet në kufi me Shqipërinë dhe i intereson stabiliteti ekonomik dhe politik i Shqipërisë sepse qytetarët shqiptarë që largohen drejt Italisë nuk janë mirë për të. Italia di të bëj mirë kalkulimet e saj.

Juli Xhokaxhi: Si funksionon çështja e vetos?

Klajda Gjosha: Do të mjaftonte vetëm Franca kundër, dhe do të thotë një JO e prerë për çeljen e negociatave me Shqipërinë.

Juli Xhokaxhi: Si do të reflektoje politika shqiptare ndaj një PO-je apo një JO-je nga BE?

Klajda Gjosha: Përgjegjësi për procesin e integrimit kanë të gjitha palët, por ekzekutivi është ai që vepron ndaj këtyre proceseve. Ne kemi ofruar një zgjidhje, e cila e pranon të ulet me mazhorancën e të diskutojmë në lidhje me reformën zgjedhore. Ndaj përgjegjësia është shumë me e madhe e qeverisë. Për sa kohë kryeministri e konsideron procesin e integrimit si një çështje dashurie nuk do kemi asnjëherë asnjë rezultat. Evropa është proces përgjegjësie dhe detyrimesh./abcnews.al

mesila-doda-1.jpg
ad min17:48 | 09/10/2019

“Ne negociata duke përdorur kazuse të tilla nuk kemi për të bërë. Kemi një mendim tonin lidhur me problemet e sistemit politik, por që të futemi në negociata me dikë që është garanti i kësaj politike që është sot nuk kemi ndërmend të futemi, për arsyen sepse është treguar sa herë që ulemi të dialoguar si politikanë gjendemi përpara një personi që e keqpërdor edhe dialogun politik”.

Kështu u shpreh sekretarja e Përgjithshme e PDIU-së, Mesila Doda, pasi u pyet nëse reforma zgjedhore po përdoret për të ulur palët politike në tavolinë. Gjatë një bisede në studion e ABC News, me gazetaren Juli Xhokaxhi, ajo u shpreh se problemi në Shqipëri nuk është me sistemin zgjedhor, por me vullnetin politik.

“Nuk dua t’i hyj çështjes në vetvete, por dua të kuptojmë këtë. Po me këtë sistem janë bërë disa zgjedhje me të cilat OSBE thoshte që janë arritur standarde shumë të mira. Kësaj radhe nuk u arritën standardet dhe kjo do të thotë që nuk është çështje e sistemit, është çështje e vullnetit politik. Nëse nuk ka vullnet banditë do të jenë më shumë herën tjetër.

Nuk do të kemi përmirësim të klimës politike, nuk do të kemi përmirësim të sistemi politik. Do kemi problemin tjetër që do votojnë njerëzit, por nuk do të votohen partitë. Do kemi një shifër akoma më të madhe dhe një rrëmujë akoma më të madhe. Pra le të themi që në thelb nuk kam asnjë probleme për sistemin, të gjitha sistemet janë të pranueshme në demokraci. Në rastin tonë nuk është çështje sistemi, por mentaliteti dhe duhet të ndahet njëherë e mirë krimi nga politikanët”, tha Mesila Doda, sipas të cilës sa herë që Rama ka qenë në krye, zgjedhjet kanë qenë të shkatërruara./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono