Jens Stoltenberg

stoltenberg.jpg
ad min19:37 | 30/10/2019

Sekretari i përgjithshëm i NATO-s Jens Stoltenberg ka nisur një vizitë dy ditore në Ukrainë nga ku i ka bërë thirrje Rusisë të tërheqë trupat ushtarake nga veriu i këtij vendi. Në portin e Odesës ishin katër anije të NATO-s, shenjë sipas Stoltenberg e mbështetjes për tërësinë territoriale të Ukrainës.

Sekretari i përgjithshëm i NATO-s Jens Stoltenberg i kërkoi Rusisë të tërheqë trupat e saj nga Lindja e Ukrainës, një ditë pas tërheqjes së ushtarëve ukrainas dhe rebelëve pro-rusë nga sektori kyç i linjës së frontit.

“NATO e thotë qartë se Rusia ka një përgjegjësi të posaçme në zbatimin e marrëveshjes së paqes së Minskut dhe ajo duhet të tërheqë të gjitha trupat e saj, të gjithë oficerët nga lindja e Ukrainës dhe të ndalë destabilizimin e këtij territori”? Kështu ka deklaruar Jens Stoltenberg gjatë vizitës së tij në Odesë në jug të Ukrainës.

Kievi dhe Perëndimi akuzojnë Rusinë se ka furnizuar me armë separatistët pro-rusë dhe ka çuar trupat e saj në veri të Ukrainës, ku rreth 13 mijë persona janë vrarë prej fillimit të konfliktit  prej 5 vitesh.

Moska ka hedhur gjithnjë poshtë akuzat për implikim ushtarak pavarësisht konstatimeve të shumë mediave. Të martën, me nxitjen e presidentit të ri të Ukrainës Volodimir Zelenski që ka premtuar rikthimin e paqes, Kievi dhe separatistët kanë nisur prej të martës tërheqjen e trupave në një sektor të vogël të linjës së frontit.

Akti është përshëndetur nga sekretari i NATO-s i cili kujtoi se ka ende rrugë të gjatë për të bërë, sepse ka gjithmonë dhunime të armëpushimit. Stoltenberg dha një deklaratë për mediat në portin e Odesës ku katër anije të NATO-s kanë mbërritur, shenjë sipas Stoltenberg e një fronti mbështetjeje për sovranitetin dhe tërësinë territoriale të Ukrainës.

Në krah të tij zv/kryeministri i Ukrainës Dmitro Kouleba nënvizoi objektivin ambicioz të vendit të tij për përmbushjen brenda 5 viteve të kritereve për anëtarësim në NATO, një projekt që irriton Rusinë fqinje.

Dera e NATO-s mbetet e hapur ka thënë Stoltenberg gjatë një takimi me student ukrainas. Ish-Republika Sovjetike e Ukrainës është në krizë me Moskën pas aneksimit nga Rusia në 2014-ën të gadishullit të Krimesë. Në vizitën dy ditore në Ukrainë, shefi i NATOs do takojë presidentin Zeleneski dhe do mbajë një fjalë në parlamentin Ukrainas./ABC News Albania

ilir-meta-1280x711.jpg
nev ila21:16 | 28/10/2019

NATO nuk ka në plan të investojë për një bazë detare në Shqipëri pavarësisht kërkesës së bërë nga ministria e mbrojtjes. E deklaroi sekretari i përgjithshëm Stoltenberg gjatë një konferencë për shtyp me presidentin Meta në Bruksel.

Një shenjë e përkushtimit të NATO-s ndaj shqipërisë është investimi në një bazë ajrore në Kucovë, cka do rriste sigurinë e vendit tonë. Ky është qëndrimi i sekretarit të përgjithshëm të NATOs Jens Stoltenberg në konferencën e përbashkët për shtyp me presidentin meta, në vizitë zyrtare në selinë e NATO-s në Bruksel. I pyetur nga abcneës mbi kërkesën e ministres shqiptare të mbrojtjes që NATO të ketë edhe bazë detare në Shqipëri, sekretari i përgjithshëm tha se nuk ka një vendimmarrje të tillë

Shqipëria luan një rol të rëndësishëm në NATO. Kjo është e rëndësishme për shqipërinë dhe NATO-n dhe sic e përmenda ne kemi një program investimi për ngritjen e një baze ajrore ushtarake në Shqipëri. Deri tani nuk ka një vendim për ndonjë investim shtesë për një bazë detare, por kjo është dicka që vlerësohet nga autoritetet tona ushtarake dhe ekspertët e bazuar në të NATO merr vendim”, tha Stoltenberg.

Investimi i NATOs për një bazë ajrore në Kucovë është vlerësuar edhe nga presidenti Meta. Kreu i shtetit ka përmendur sfidën e përbashkët të Shqipërisë e Maqedonisë së Veriut për të dyfishuar përpjekjet drejt BE, pas refuzimit për hapjen e negociatave

“Mbi situatën politike në shqipëri mendoj që ende mund të konsiderojmë mesazhet e drejta që sekretari i përgjithshëm i NATOs dha gjatë vizitës së tij në Tiranë në pranverë duke nënvizuar dialogun dhe forcimin e rëndësisë së të kuptuarit se në zemër të NATOs qëndron demokracia dhe jam i sigurt se ne do dyfishojmë përpjekjet tona për të punuar në atë drejtim si anëtar i besueshëm i NATOs që shumë shpejt do bëhet anëtar tepër i besueshëm në rrugën drejt atnatërsimit në BE”, tha presidenti Meta.

Presidenti Meta dhe sekretari Stoltenberg kanë vlerësuar angazhimin e Shqipërisë për të rritur investimet për mbrojtjen, sipas synimit të vënë nga NATO, deri në 2% të GDP deri në vitin 2024./abcnews.al

 

meta-stoltenberg-1280x661.jpg
nev ila17:30 | 28/10/2019

Pas takimit mes Presidentit të Republikës së Shqipërisë Ilir Meta dhe shefit të NATO-s Jens Stoltenberg, të dy ata mbajtën një konferencë për shtyp duke theksuar nevojën që Ballkani Perëndimor të jetë i orientuar nga Perëndimi duke shmangur ndikimet e tjera në rajon.

I pyetur nga gazetarja e Abc News Erisa Zykaj nëse kanë në plan të ngrenë edhe një bazë detare krahas asaj ajrore në Shqipëri, Stoltenberg theksoi se nuk kanë marrë në shqyrtim një fakt të tillë.

“Shqipëria luan një rol të rëndësishëm në NATO. Deri tani nuk ka pasur asnjë vendimmarrje për sa i përket ndërtimit të bazave ushtarake në Shqipëri”, theksoi ai.

Ndërsa Meta tha se diskutimi me Stoltenberg ka qenë në lidhje me zgjerimin e Bashkimit Europian.

“Ne kemi diskutuar me sekretarin e Përgjithshëm në lidhje me zgjerimin e Bashkimit Evropian. Ashtu siç e kemi bërë të qartë edhe gjatë takimit me Presidentin e Maqedonisë, ne jemi të vendosur në përpjekjet tona për anëtarësimin në Bashkimin Evropian. Ne jemi një vend anëtar i besueshëm i NATO-së dhe kemi besim për anëtarësim në BE”, tha Meta./abcnews.al

von-der-leyen.jpg
ad min16:20 | 03/10/2019

Një hapësirë prej 25 metrash katrorë për të jetuar sa më pranë zyrës së saj dhe sigurisht për të kursyer. Është kjo kërkesa e presidentes së zgjedhur së Komisionit Europian Ursula von der Leyen.

Presidentja e zgjedhur e Komisionit Europian, gjermania Ursula Von Der Leyen, 60 vjeç, ka vendosur të gjejë një hapësirë të vogël pranë zyrës së saj në katin e 13-të të Berlejmont, selinë e institucionit në Bruksel.

Nga bashkëpunëtorët e saj u konfirmua për mediat se ajo ka kërkuar jo më shumë se 25 metra katrorë për të kaluar netët në Bruksel. Lajmi fillimisht u konfirmua nga DI Velt, e cila citon pikërisht bashkëpunëtorët e saj. E përditshmja gjermane më tej shkruan se Ursula Von Der Leyen do të marrë detyrën e saj në 1 Nëntor.

Rezidenca e saj do të jetë sërish në Hanover, theksojnë bashkëpunëtorët, të cilët shtojnë se ajo preferon këtë hapësirë të vogël dhe jo një apartament apo dhomë hoteli. Përveç sigurisë, ajo zgjedh dhe një avantazh praktik, pasi nuk do të përballet me trafikun në Bruksel.

Paraardhësi i saj, Jean-Claude Juncker, 64-vjeçari nga Luksemburgu, gjithashtu ruajti rezidencën e tij në atdhe, ndërsa në Bruksel qëndronte në një dhomë hoteli 50 metra katrorë për të cilin paguante 3250 euro në muaj. Këto shifra konfirmohen nga një e përditshme tjetër gjermane, Bild.

Ndërkohë Sekretari i Përgjithshëm i NATO-s, Jens Stoltenberg ka vendosur të jetojë në një kështjellë ku herë pas here fton dhe kolegë e miq për të pushuar. Presidenti i Komisionit Europian është një i punësuar me kohë të plotë, dhe duhet të jetë i pranishëm 18 orë në ditë, shprehej dikur Jean-Claude Juncker.

Paga e këtij të fundit llogaritet rreth 28 mijë euro bruto në muaj, ndërsa taksohej 45 për qind e saj, por ai gjithashtu përfitonte dhe dieta që llogariten rreth 6 mijë euro në muaj./ABC News Albania 24/7

shkup-stolcemberg-1280x711.jpg
ad min16:40 | 03/06/2019

Sekretari i Përgjithshëm i NATO-s, Jens Stoltenberg gjatë vizitës në Shkup theksoi se Maqedonia e Veriut po i gëzon që tani përfitimet si anëtare e ardhshme e NATO-s. Shefi i NATO-s përgëzoi edhe njëherë Maqedoninë e Veriut për marrëveshjen mes Shkupit dhe Athinës. Stoltenberg tha se të dyja vendet me këtë marrëveshje treguan se e pamundura mund të bëhet realitet dhe mosmarrëveshjet mes fqinjëve të marrin fund.

Me përshëndetje të ngrohta, sekretari i Përgjithshëm i NATO-s Jens Stoltenberg dhe kryeministri Zoran Zaev pas takimit të përbashkët të Këshillit Euro-Atlantik dhe  përfaqësuesve të qeverisë numëruan një sërë përfitimesh por edhe obligimesh nga anëtarësimi në aleancë, që për Maqedoninë pritet të rrumbullakësohet deri në fund të vitit ose në muajt e parë të vitit të ardhshëm. Historia e dyerve të hapura të NATO-s u tregua e suksesshme, theksoi Stoltenberg, duke marrë si shembull vendin e tij.

Jens Stoltenberg: Unë vij nga një vend i vogël në veri, i cili kishte shumë përfitime nga anëtarësimi në aleancë, dhe jam absolutisht i sigurtë se edhe Maqedonia do të ketë përfitime nga kjo aleancë. Siguron bazë për përparim, sepse siguria është parakusht për zhvillim ekonomik dhe prosperitet, tanimë e shohim se investimet në Maqedoninë e Veriut rriten, që është mirë edhe për vendin edhe për rajonin.

Anëtaret e NATO-s duhet të dorëzojnë edhe 16 ratifikime të protokolleve për anëtarësimin e Maqedonisë si vendi I 30-të në NATO, ndërkaq nga Maqedonia e Veriut  pritet plotësimi i premtimit për harxhime ne mbrojtje 2% nga bruto prodhimi vendor dhe t`i rrumbullakësojë reformat për  sistemet e sigurisë dhe të zbulimit e kundër-zbulimit, që të jetë e gatshme  për shkëmbimin e informacioneve të besueshme.

Zoran Zaev: I zbatuam gjithashtu edhe hapat e nevojshëm për riformimin e agjencive të zbulimit dhe kundër-zbulimit, dhe të shërbimeve të sigurisë në mënyrë transparente dhe gjithëpërfshirëse, me partnerë vendas dhe ndërkombëtarë dhe palët e interesuara. Tani ato prapë e morën rolin autentik, të jenë në shërbim të sigurisë së qytetarëve dhe të interesave të vendit dhe aleatëve të saj. Republika e Maqedonisë së Veriut po bëhet pjesë e aleancës trans-atlantike.

Në lidhje me tensionet në veriun e Kosovës dhe çështjen e pazgjidhur midis Prishtinës dhe Beogradit, Stoltenberg edhe një herë si model për zgjidhje e sugjeroi Marrëveshjen e Prespës.

Jens Stoltenberg: Kjo tregon se është e mundur të tejkalohen dallimet nga e kaluara, të tejkalohen mospajtueshmëritë historike. Jo të harrohet e kaluara, por të mos lejohet ajo të rrezikojë të ardhmen. Të tejkalohen dallimet dhe së bashku të shkohet më tutj”.

Stoltenberg në Shkup arriti nga Tirana, ku theksoi se nuk është e pranueshme dhuna dhe çdo përpjekje për të minuar institucionet demokratike, duke bërë thirrje që të respektohen këto institucione.

29 ambasadorët e vendeve anëtare të aleancës në krye me Sekretarin e Përgjithshëm Stoltenberg u takuan edhe me presidentin e shtetit  Stevo Pendarovski, deri vonë koordinator kombëtar për NATO-n në Maqedoni.

Pasditen e sotme Stoltenberg do të mbajë ligjëratë edhe në  Fakultetin Ekonomik, ,ku pritet të fokusohet në përfitimet ekonomike që i sjell anëtarësimi. Ai vetë në më shumë drejtime theksoi se shkalla e investimeve të huaja në vend, këtë vit është tre herë më e lartë se vitin e kaluar, duke e lidhur këtë me sigurinë e anëtarësimit në aleancë. /ABC News Albania 24/7

jens-stoltenberg-1.jpg
ad min12:05 | 03/06/2019

Sekretari i Përgjithshëm i NATO-s, Jens Stoltenberg, ka filluar takimet me krerët shtetërorë në kuadër të vizitës së tij dyditore në Maqedoninë e Veriut.

Pas mbërritjes në Aeroportin Ndërkombëtar të Shkupit, Stoltenberg bashkë me ambasadorët e vendeve anëtare të NATO-s, arritën në Kuvendin e Republikës së Maqedonisë së Veriut, ku u organizua pritje solemne për nder të tyre.

Përveç kryetarit të parlamentit Xhaferi, në Kuvend ishin të pranishëm edhe delegacioni qeveritar i kryesuar nga kryeministri Zoran Zaev, si dhe diplomatë të vendeve të ndryshme.

Ndërkohë Stoltenberg do të zhvillojë takim dypalësh me kryeministrin Zoran Zaev, dhe më pas do të mbahet takimi i Këshillit Veriatlantik me Komitetin për Integrim të Republikës së Maqedonisë së Veriut në NATO.

Gjithashtu, ai do të takohet edhe me presidentin e shtetit, Stevo Pendarovski. Kjo është vizita e parë e Sekretarit të Përgjithshëm të NATO-s dhe Këshillit Veriatlantik në Shkup pas nënshkrimit të protokollit për anëtarësimin e vendit në Aleancë./ABC News Albania 24/7

jens-stoltenberg.jpg
ad min17:52 | 02/06/2019

Një zgjidhje për krizën politike në vend u duk se do të vijë nga vizita surprizë e sekretarit të përgjithshëm të NATO-s në Tiranë, Jens Stoltenberg.

Veçanërisht sepse u planifikua vetëm pak orë para protestës së shtatë kombëtare  të opozitës së bashkuar. Ajo që u artikulua prej tij më shumë se një herë është thirrja për dialog e vetëpërmbajtje të politikës.

Këmbëngul që edhe zgjedhjet janë pjesë e një procesi demokratik që nuk duhen anashkaluar. Ndërsa për kryeministrin Edi Rama gjithçka ndodh apo mund të ndodhë me protestat e kundërshtarëve të tij politikë janë inskenime që nuk do të arrijnë të cënojnë imazhin e vendit.

“Kjo është inskenim politik dhe nuk ka shans të shtrihet përtej kufijve të skenës politike. Ne do të zhvillojmë zgjedhjet si proces i patjetërsueshëm demokratik”, tha Rama.

Pyetjes se a ka ndikim të Rusisë në  në protestat që po zhvillohen në disa vende të Ballkanit, i dha përgjigje vetëm kryeministri Rama.

“Me ose pa dashje çon ujë në mullirin e atyre që nuk e dëshirojnë integrimin e plotë të Ballkanit Perëndimor as në NATO, as në BE”, tha Rama.

Kryeministri zbuloi pak nga arsyet e paqarta të kësaj vizite të sekretarit të përgjithshëm të NATO-s.

“Vizita e Sekretarit të Përgjithshëm përkon dhe me vitin e 10-vjetorit të anëtarësimit tonë në NATO dhe po ashtu është edhe një afirmim i vëmendjes së kujdesit ndaj Shqipërisë dhe ndaj rajonit”, tha Rama.

Mirëseardhja i urohet gjithmonë një miku të tillë nënvizoi kryeministri i keqardhur që këtë herë retë mbuluan qiellin e Tiranës.

“Është gjithmonë i mirëseardhur në Shqipëri. I kam kërkuar ndjesë për motin jo tipikisht për Tiranën dhe vendin në këto kohë, por ndoshta është ndjerë si në shtëpinë e tij në Norvegji”, tha Rama.

Më pas sekretari i përgjithshëm i NATO-s u prit në një takim nga kreu i shtetit Ilir Meta. Në një njoftim për shtyp të zyrës së presidentit thuhet se kryetari i shtetit çmoi investimin e NATO-s në Bazën Ajrore të Kuçovës si një aset për sigurinë e vendit, rajonit dhe Aleancës.

Më tej, kreu i shtetit u shpreh se Shqipëria mbështet të drejtën legjitime dhe sovrane të Kosovës për një tranzicion gradual të Forcës së Sigurisë së Kosovës në ushtri multietnike dhe në ndërveprim të plotë me NATO-n./ABC News Albania 24/7

meta-1280x853.jpg
ad min16:49 | 02/06/2019

Sekretari i Përgjithshëm i NATO-s Stoltenberg në këtë vizite disa orëshe në Tiranë u prit në një takim nga kreu i shtetit Ilir Meta.

Në një njoftim për shtyp të zyrës së presidentit thuhet se kreu i shtetit theksoi se ndan plotësisht vizionin e Sekretarit Stoltenberg se është detyra dhe përgjegjësia e çdo aleati të forcojë organizatën e Atlantikut te Veriut.

Presidenti Meta çmoi investimin e NATO-s në Bazën Ajrore të Kuçovës si një aset për sigurinë e vendit, rajonit dhe Aleancës. Kreu i Shtetit theksoi se Shqipëria e pret me entuziazëm anëtarësimin e afërt të Maqedonisë së Veriut në NATO.

Më tej Kreu i Shtetit u shpreh se Shqipëria mbështet të drejtën legjitime dhe sovrane të Kosovës për një tranzicion gradual të Forcës së Sigurisë së Kosovës në ushtri multietnike dhe në ndërveprim të plotë me NATO-n./ABC News Albania 24/7

jens-stoltenberg-NATO-1280x727.jpg
nev ila09:52 | 02/06/2019

Sekretari i Përgjithshëm i NATO, Jens Stoltenberg do të zhvillojë sot një vizite disa orëshe në Tiranë. Ai do të mbërrijë pas mesdite në aeroportin “Nënë Tereza”, ku do të pritet nga Ministrja e Mbrojtjes, Olta Xhaçka.

Ndalesa e parë do të jetë në Kryeministri, ku do të pritet nga Kryeministri Rama, shoqëruar me takim dypalësh dhe një konferencë të shkurtër për shtyp.

Me pas Sekretari Stoltenberg do të zhvillojë një takim dypalësh në Presidencë. Pas këtij takimi, ai do të largohet nga Tirana për të udhëtuar drejt Maqedonisë./abcnews.al

stoltenberg-1280x720.jpg
ent ela16:45 | 18/03/2019

Në një intervistë për mediat serbe, Sekretari i Përgjithshëm i NATO-s, Jens Stoltenberg theksoi se aleanca do të vazhdojë misionin e saj në Kosovë me qëllim për të mbrojtur të gjithë qytetarët

NATO nuk do të tërhiqet nga baza në Bondsteel dhe do t’i mbrojë të gjithë qytetarët e Kosovës. Ka qenë kjo deklarata e sekretarit të përgjithshëm të NATO-s, Jens Stolltenberg, gjatë një interviste për mediat serve. Ai theksoi për të disatën e herë se nuk ka asnjë plan për reduktimin e trupave në Kosovë.

Stoltenbergut i është kërkuar të komentojë se si e sheh pas kaq vitesh bombardimin e Jugosllavisë në atë kohë. Sekretari i Përgjithshëm i NATO-s ndër të tjera u shpreh se ka qenë dhe është detyrë e NATO-s që të ndalohen tragjedi humanitare por dhe shmangia e viktimave mes civilëve.

Stoltenbergu tha se NATO e respekton qëndrimin e Serbisë, e cila nuk dëshiron të jetë anëtare e Aleancës duke kërkuar të mbetet neutrale, por gjithashtu respekton dhe faktin se Serbia dëshiron të jetë partnere e NATO-s në luftën kundër terrorizmit, dhe në rastet e fatkeqësive natyrore./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono