Japoni

viti-i-ri-bote.jpg
G. P.16:27 | 01/01/2019

Ndërrimi i viteve nuk kaloi pa incidente të ngjashme me sulmet terroriste. Në qytetin anglez të Manchester-it, një person plagosi 3 vetë me thikë pasi bërtiti “Allah”, ndërsa në Tokio një 21-vjeçar sulmoi me furgon një grup këmbësorësh.

Ndërrimi i viteve nuk ka qenë imun nga incidentet e tipit terrorist, ndonëse autoritetet policore të vendeve ku episodet u verifikuan nuk e konsiderojnë të mirëqënë këtë pistë. Në Manchester të Britanisë, tre persona, mes të cilëve një agjent policie, u sulmuan me thikë pranë stacionit hekurudhor të qytetit. Sipas mediave britanike, të lënduarit morën plagë serioze, por që nuk përbëjnë rrezik për jetën e tyre. Forcat e rendit arrestuan agresorin, ndërkohë që hetimet mbi ngjarjen u morën nën kontroll nga oficerët e anti-terrorizmit.

“Të gjitha pistat janë të hapura”, deklaroi njëri prej tyre.

Agjenti që mbeti i plagosur la disa orë më vonë spitalin, ndërsa dëshmitarë nga vendi i ngjarjes deklaruan se gjatë agresionit, autori bërtiti “Allah” dhe parulla kritike në adresë të qeverive perëndimore. Një tjetër incident u verifikua në Tokio, ku një furgon vërshoi mes kalimtarëve që po festonin ndërrimin e viteve. Drejtuesi i mjetit u largua menjëherë nga vendi i ngjarjes, por u arrestua pak më vonë nga policia për tentativë vrasjeje.

Nga incidenti, i ndodhur në një nga lagjet më moderne të Tokios, Harajuku, 9 persona mbetën të plagosur, njëri prej të cilëve në gjendje të rëndë. Policia japoneze deklaroi paraprakisht se agresioni kishte qenë një sulm terrorist, por pas marrjes në pyetje të autorit, një 21-vjeçar vendas, njoftoi se sulmi kishte qëllime hakmarrjeje personale. Agjencia e lajmeve “Kyodo”, që citon burime të afërta me hetimet, bëri të ditur se një fuçi me lëndë djegëse kerozen u gjet brenda automjetit, të cilit 21-vjeçari kishte në plan t’i vinte flakën./abcnews.al

fukushima.jpg
ent ela12:16 | 27/12/2018

Prokurorët japonezë kanë kërkuar 15 vjet burg në total për tre ish-menaxherë të centralit bërthamor ne Fukushima. Sipas akuzës ata nuk parandaluan shpërthimet dhe rrjedhjen e materialeve radioaktive pas tërmetit të vitit 2011, ndonëse kishin mundësi të pezullonin aktivitetin e centralit.

Për tragjedinë bërthamore pas tërmetit të 11 marsit 2011 në centralin e Fukushimës, në Japoni, u kërkuan pesë vjet burg për tre ish-menaxherë të impiantit bërthamor.

Prokurorët japonezë akuzojnë të tre ish menaxherët për neglizhencë me pasojë vdekjen, në një kohë që të tre pretendojnë se janë të pafajshëm. Ata janë të vetmit që kanë akuzuar për problemet e reaktorit dhe rrjedhjeve radioactive. Sipas akuzës të tre ishin në dijeni të të dhënave që tregonin rrezikshmërinë e incidenteve që lidheshin me tërmete dhe tsunami të mundshme me dallgë deri në 15 metra lartësi. Sipas gjykatësëve ata duhej të kishin ndaluar cdo aktivitet, por nuk e bënë një gjë të tillë.

Në 11 mars të vitit 2011, për shkak të tërmetit me magnitudë 9 dhe të tsunamit që pasoi, centrali bërthamor i Fukushimës pësoi dëme të mëdha që shkaktuan daljen nga përdorimi të sistemeve të ndryshme të ftohjes të impiantit. Por dhe shpërthime të ndryshme në tre reaktorë që shkaktuan rrjedhjen e sasive të mëdha të materialeve radioactive në ambient.

Incidenti ishte në shkallën më të lartë të rrezikshmërisë duke detyruar autoritetet që të evakuajnë banorët deri në një rreze prej 30 kilometrash. Kjo ishte katastrofa bërthamore më e rëndë pas asaj të Cernobil. Viktimat ishin 20 mijë, ndërsa 120 mijë persona u evakuan. Edhe sot në rajonin e goditur nga tragjedia bërthamore ka akoma problem që lidhen me radioaktivitetin. /abcnews.al

 

ERION-VELIAJ-NE-JAPONI.mpg_snapshot_00.08-1280x720.jpg
G. P.14:02 | 20/12/2018

Kryebashkiaku i Tiranës, Erion Veliaj gjatë vizitës së tij në Japoni ka marrë mbështetjen e qeverisë japoneze për financimin e projektit të menaxhimit të ujërave të zeza, si dhe ka dhënë një lajm të mirë për shtetasit shqiptarë që shumë shpejt mund të lëvizin pa viza drejt Japonisë.

Në vijim të vizitës së tij në Japoni, kryebashkiaku i Tiranës, Erion Veliaj, zhvilloi një takim me kreun e Agjencisë Japoneze të Zhvillimit, nga i cili mori garancinë për financimin e projektit për kanalet e ujërave të zeza dhe sistemin e tyre në Tiranë.

Erion Veliaj, kryetar i Bashkisë Tiranë: “Agjencia Japoneze e Zhvillimit do të vazhdojë me financimin e projektit për kanalet e ujërave të zeza dhe sistemin e filtrimit të ujërave të zeza në Tiranë. Kemi pasur disa probleme me ish-administratën e Ministrisë së Transporteve, të cilat janë në rrugën e zgjidhjes, dhe për gjithë qytetarët e Tiranës lajmi i mirë është se projekti do të vazhdojë”.

Veliaj u takua edhe me Ministrin e Punëve të Jashtme të Japonisë me të cilin bisedoi edhe për lëvizjen e lirë ku shumë shpejt pritet edhe heqja e vizave për qytetarët shqiptarë.

“Më në fund kemi një Ambasadë si në Shqipëri, ashtu edhe në Japoni, do të thotë se marrëdhëniet e vendeve janë në një nivel akoma më të lartë. Një nga kërkesat tona ka qenë edhe heqja e vizave për qytetarët shqiptarë, e cila po vlerësohet”.

Gjatë vizitës në Japoni, Veliaj pati takim edhe me shtetasit shqiptarë që studiojnë dhe punojnë në Japoni, tregues ky i marrëdhënieve të mira mes vendeve./abcnews.al

VELIAJ-NE-JAPONI_ABC-M2-T1.mpg_snapshot_00.13-1280x720.jpg
G. P.14:48 | 19/12/2018

Kryetari i Bashkisë Tiranë, Erion Veliaj zhvilloi një vizitë në Japoni ku gjatë takimit me zyrtarët e lartë diskutoi për bashkëpunimin mes Tiranës dhe Tokios, si dhe për menaxhimin e emergjencave civile dhe për transportin publik në kryeqytet.

Kryetari i Bashkisë Tiranë, Erion Veliaj zhvilloi një vizitë zyrtare në Japoni ku diskutoi për shkëmbimin e eksperiencave në menaxhimin e emergjencave civile dhe fatkeqësive natyrore, si dhe ato për një transport publik miqësor me mjedisin. Në takimin me Guvernatoren e Tokios, kryebashkiaku Veliaj foli edhe mbi rritjen e marrëdhënieve dhe bashkëpunimit mes dy qyteteve për një sërë projektesh konkrete.

Erion Veliaj, kryetar i Bashkisë Tiranë: “Ajo që dakordësuam është se në fushën e emergjencave civile, vitin tjetër do të fillojmë një projekt të veçantë me Bashkinë e Tokios, kryesisht për të menaxhuar ato që shihen si më problematike, siç janë zjarret, përmbytjet apo të gjithë ndërhyrjet e tjera që duhet të bëjmë në një rrjet infrastrukture që e bën qytetin më të qëndrueshëm”.

Gjatë vizitës së tij në Tokio të Japonisë Veliaj zhvilloi një takim edhe me ministrin e Punëve të Jashtme të Japonisë, ku u vlerësuan marrëdhëniet shumë të mira që ekzistojnë mes dy vendeve tona.

“Qeverinë japoneze e kemi pasur pranë në shumë nga transformimet e Tiranës, qoftë për projektin që po bëhet me qeverinë qendrore, lidhur me kanalizimet e ujërave të zeza të Tiranës dhe asaj që është impianti i Kasharit apo edhe në nivel bashkie, i kemi bërë me ndihmën e agjencive dhe kolegëve japonezë”.

Kreu i Bashkisë së Tiranës vlerësoi gjithashtu rolin që luajnë dy ambasadat respektive në Tiranë dhe Tokio, si ura të forta bashkëpunimi, jo vetëm me shkëmbimet tregtare, por edhe në ato sociale./abcnews.al

JAPONIA-KINEZET-ABC-M4-T1.mpg_snapshot_00.10-1280x720.jpg
G. P.08:51 | 11/12/2018

Frika nga lidhja me qeverinë kineze dhe spiunazhi kibernetik ka detyruar qeveritë e Japonisë, Australisë dhe Zelandës së Re të përjashtojnë kolosët kinezë të teknologjisë, mes të cilëve markën e njohur “Huawei”, nga kontratat për ngritjen e rreteve 5G.

Qeveri të shumë vendeve të botës po izolojnë gjigandët kinezë të telekomunikacionit, “ZTE” dhe “Huawei”, ky i fundit i tronditur pas arrestimit të shefes së financave Mang Uanzhou javën e kaluar në Kanada. Qeveria japoneze ka njoftuar të hënën atë që shumë media e kishin paralajmëruar, përjashtimin e kolosëve kinezë të elektronikës nga tenderat për kontrollin e linjave të internetit për shkak të lidhjeve me qeverinë e Pekinit. Vendimi i Tokios pason atë të miratuar në muajin gusht nga Shtetet e Bashkuara, që përmes Aktit Kombëtar të Mbrojtjes ndaluan produktet e kompanive kineze në aparatet shtetërore për shkak të lidhjeve të dyshuara me qeverinë e vendit aziatik.

Duke publikuar vendimin, ekzekutivi japonez nuk ka cituar asnjë nga dy grupet e telekomunikacionit për të mos dëmtuar marrëdhëniet tregtare me Kinën, por u mjaftua vetëm duke thënë se largimi i tyre nga procedura delikate e kontratave është lidhet me sigurinë kombëtare. “Huawei” është bllokuar ndërkohë edhe në Australi dhe Zelandën e Re, ku i është mohuar mundësia për të ngritur rrjetet 5G nga frika e lidhjeve me qeverinë kineze. Vetë kompania ka deklaruar se Pekini nuk ka asnjë ndikim tek ajo, por fjalët e saj zor se janë dëgjuar. Ndërkohë, tregjet financiare vazhdojnë të luhaten pas arrrestimit të menaxheres Mang Uanzhou, pasi kjo lëvizje mund të acarojë luftën tregtare mes Shteteve të Bashkuara dhe Kinës, që së fundmi kishte treguar shenja zbutjeje./abcnews.al

fight-1280x720.jpg
G. P.21:37 | 26/11/2018

Dy emra të mëdhenj të futbollit u përfshinë në një sherr masiv në ligën japoneze. Andres Iniesta e Lukas Podolski ishin shumë të dëshpëruar që pësuan gol pas 14 minutash shtesë.

Çfarë mund të ndodhë kur shtesa e lojës shkon 14 minuta, dhe pëson gol?

Asgjë më shumë sesa një sherr masiv, në të cilin mund të përfshihen edhe lojtarët më shembullorë dhe më të edukuar të botës. Këtë fat patën dy yje europianë që luajnë në Japoni, Andres Iniesta dhe Lukas Podolski, pasi ekipit të tyre Visel Kobe i shpëtoi fitorja nga duart në minutën e 104-ët. Ndeshja e kampionatit japonez përfundoi 3-3 ndaj Shimizu S-Pulses, dhe dëshpërimi ishte edhe më i madh sepse ky rezultat u vulos nga portieri kundërshtar, Juxhi Rokutan.

Skenat që pasuan barazimin ishin të shëmtuara, dhe në konflikt u përfshi edhe ish-ylli i Spanjës dhe i Barcelonës, Iniesta, si dhe ish-sulmuesi i Gjermanisë dhe i Bajernit, Podolski. Në të vërtetë, Iniesta u përpoq ta shuante sherrin, por Podolski bëri të kundërtën. Gjermani u filmua duke shtyrë trajnerët kundërshtarë, përpara sesa ta merrnin dhe ta largonin nga vendi i dhunës. Një fatkeqësi e vërtetë, pasi Visel Kobe po kryesonte 3-1, ndërsa vendasit përfituan nga kartonët e kuq të dy lojtarëve miq. Ishte pikërisht përjashtimi i sulmuesit brazilian, De Souza që solli vonesa të lojës, dhe shtyrjen me 14 minuta./abcnews.al

JAPONI-MINISTRI-ABCM4T1.mpg_snapshot_00.01-1280x720.jpg
G. P.21:35 | 15/11/2018

Ministri për Sigurinë Kibernetike në Japoni ka shokuar qytetarët dhe deputetët në parlament, ndërsa pohoi se nuk ka përdorur kurrë një kompjuter dhe se nuk e di se ç’është një USB. Ai është ngarkuar nga qeveria e Tokios në organizimin e Lojërave Olimpike të 2020-s.

Yoshitaka Sakurada është 68 vjeç, jeton në Japoni dhe ka pohuar se nuk ka përdorur kurrë kompjuter. Asgjë të veçantë deri këtu, po të mos ishte për faktin që ministri japonez merret me Sigurinë Kibernetike. Sakurada, i ngarkuar për të organizuar Lojërat Olimpike Tokjo 2020, ka në portofolin e tij pikërisht sigurinë kibernetike, por përballë parlamentit njoftoi: “Nuk kam përdorur kompjuter pasi që kur isha 25 vjeç isha në poste ku sekretaret dhe punonjësit merreshin me ato gjëra për mua”.

I emëruar pa më shumë se një muaj më parë, pas rikompozimit të fundit të qeverisë së kryeministrit Shinzo Abe, ministri ka tërhequr vëmendjen. Duke iu përgjigjur një pyetjes tjetër, Sakurada duket se as nuk e di se çfarë është një USB. Opozita më pas kaloi në sulm. Masato Imai, një parlamentar i pavarur, pohoi se është shokuar nga fakti që përgjegjësi për sigurinë kibernetike nuk ka prekur kurrë një kompjuter. Ndërsa kur e pyetën se çfarë masash do të merrte për të mbrojtur centralet bërthamore nga sulmet kibernetike ai u përgjigj: “Nuk jam i informuar për detajet”.

Magjithatë ajo që ndodhi në debatin parlamentar nuk ishte gafa e tij e vetme. Në fillim të nëntorit gjatë një debati në komisionin e buxhetit në Dhomën e Ulët për Lëjrat Olimpike të ardhshme, Sakurada tha se shpenzimet e parashikuara ishin vetëm 11 euro, ndërsa parashikimi ishte për 1.2 miliardë euro. Më pas ai mohoi se një eksponent i qeverisë së Koresë së Veriut do të merrte pjesë në një mbledhje me të Tokio. Por ai u korrigjua nga një asistent dhe kërkoi menjëherë falje duke thënë se nëse do t’i dinte pyetjet më përara nuk do të ishte kaq i papërgatitur./abcnews.al

KRONIKE-VELIAJ-AMBASADORI-JAPONEZ.mpg_snapshot_00.28-1280x720.jpg
G. P.13:44 | 11/11/2018

Kryebashkiaku Erion Veliaj i shoqëruar nga ambasadori i Japonisë në vendin tonë ka deklaruar se Parku i Liqenit do të pastrohet me mjete moderne dhe ekologjike, duke përsëritur thirrjen drejtuar qytetarëve për kontribut në këtë drejtim.

Bashkia e Tiranës, mbështetur nga Ambasada Japoneze në Tiranë ka pajisur Agjencinë e Parqeve dhe Rekreacionit me makineri dhe kosha që mundësojnë një pastrim më të shpejtë dhe efikas të Parkut të Liqenit. Kryetari i Bashkisë së Tiranës, Erion Veliaj, i shoqëruar nga ambasadori i Japonisë në vendin tonë, Makoto Ito, falenderoi këtë të fundit dhe i kërkoi qytetarëve ndihmë në mirëmbajtjen e ambientit.

“Tani na duhet shumë bashkëpunim nga qytetarët, duhet ta mirëmbajmë parkun, t’i hedhim mbeturinat atje ku duhet, të bëhemi pjesë e fushatës së mbjelljes së pemëve, të ulim lëvizjet me makinat private për distancat e vogla, që jo detyrimisht janë të nevojshme”.

Kto të fundit janë i vetmi burim i ndotjes në Tiranë sipas Veliajt ndaj përsëriti thirrjen për përdorimin e biçikletës dhe mbjelljen e pemëve në kryeqytet./abcnews.al

peshku.png
G. P.21:57 | 06/10/2018

Në Japoni ka mbyllur dyert tregu historik i peshkut në Tokio, që çdo vit tërheq mijëra vizitorë nga e gjithë bota për shkak të variacionit të ushqimeve me bazë peshku. Kompleksi do të zhvendoset në kuadër të një plani të ri të Bashkisë së Tokios në shërbim të Lojrave Olimpike 2020.

Tregu i famshëm i peshkut në Tokio ka mbyllur dyert të shtunën, për t’u zhvendosur në një zonë tjetër të kryeqytetit japonez. Tregu më i madh i peshkut në botë, i hapur prej 83 vjetësh, do të zhvendoset në kuadër të një projekti zhvillimi të qeverisë për Lojërat Olimpike të vitit 2020.

Tregtarët kanë mbajtur të shtunën ankandin e fundit për shitjen e peshkut tuna, aq të përdorur në ushqimin vendas, i njohur si sushi. Ata do të lëvizin për shkak të amortizimit të kompleksit të vjetër dhe kompleksi i ri ku do të vendosen do të jetë më modern dhe vetëm 2 kilometra larg.

Largimi i tregut historik ka qenë i planifikuar prej vitesh nga pushteti vendor në Tokio, por zbatimi i planit ishte shtyrë për shkak të protestave të shumta, që zgjatën deri në ditët e fundit.

Rreth 500 lloje të ndryshme ushqimesh detare shiten në tregun e famshëm të kryeqytetit japonez i ngritur në rajonin Tsukizhi, në një distancë të afërt me rajonin Ginza, ku ndodhen restorantet më luksoze të Tokios, të cilët kanë kërkesat kryesore për produktet dhe ndër vite kanë vendosur marrëdhënie të ngushta me tregtarët.

Tregu u ndërtua 83 vjet më parë pas tërmetit të madh të 1923-shit me streha metalike të ndërthurura me njëra-tjetrën. Me kalimin e viteve ai u kthye në një atraksion turistik, por për autoritetet ambjenti në të kishte degraduar për shkak të mbipopullimit./abcnews.al

BILANCI-JAPONI-1280x720.jpg
ent ela10:47 | 01/10/2018

Dy persona kanë humbur jetën pasi një tajfun i fuqishëm goditi Japoninë. Tajfuni I pagëzuar me emrin “Trami” solli shkatërrim të dielën në afërsi të qytetit Osaka, me erëra që shkonin deri në 216 kilometra në orë. Stuhia shkaktoi probleme të shumta. Shumë fluturime dhe linja treni janë anulluar. Gjithashtu njoftohet se mbi 750 mijë banesa kanë mbetur pa energji elektrike. Të paktën 120 persona janë plagosur. Tajfuni vjen një muaj pasi Japonia u godit rëndë nga stuhia më e fuqishme e 25 viteve të fundit. Tajfuni “Jebi” shkaktoi përmbytje të mëdha dhe viktima në fillim të shtatorit. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono