Ivica Daçiç

ivica-dacic.jpg
G. P.19:22 | 11/07/2018

Ministri i Jashtëm i Serbisë, Ivica Daçiç, thotë për ABC News se tani është koha për të gjetur zgjidhje për Kosovën. Ai nënvizon se duhet të arrihet paqe afatgjatë për të dy vendet.

Ivica Daçiç, ministër i Jashtëm i Serbisë: “Ne kemi gjëra të ndryshme që dëmtojnë procesin dhe këto janë incidentet që ndodhin dhe një polarizim i thellë që ekziston dhe kjo natyrisht nuk shkon në dobi të gjetjes së zgjidhjes pasi tani presidenti Vuçiç dhe Thaçi duhet të vazhdojnë bisedimet në Bruksel. Do të duhej që në një periudhë të afërt të fillohet të flitet se çfarë domethënë zgjidhja përfundimtare nëse duam të vëmë pikën në këtë çështje. Kjo do të ishte në interes të të gjithëve”.

Idro Seferi: “Keni thënë se jeta është në mes të asaj që mendon Kosova dhe asaj që mendon Serbia. Si ta kuptojmë se çfarë është zgjidhja e kompromisit dhe duhet ndonjë konferencë apo vazhdimi i dialogut”?

Ivica Daçiç: “Jemi përcaktuar për të vazhduar dialogun në këtë formë dhe kjo nuk do të thotë se nuk duhet organizuar edhe ndonjë takim ndërkombëtar. Natyrisht për zgjidhjen duhe të pyeten edhe serbët edhe shqiptarët dhe me rëndësi është edhe faktori ndërkombëtarë siç janë Bashkimi Europian, por edhe SHBA nga njëra anë dhe Rusia dhe Kina duke patur parasyshë që këto vende janë anëtare të përhershme të Këshillit të Sigurimit të OKB. Natyrisht se cili është ky model ne kemi hapur librin për të propozuar zgjidhje, por është me rëndësi që kjo zgjidhje të jetë e qëndrueshme për të dyja palët”.

Idro Seferi: “Domethënë ju dëshironi një zgjidhje me shqiptarët, por që të bëhet diçka në mes, kjo të mos jetë pavarësia apo jeni të hapur për të diskutuar për çdo ide”?

Ivica Daçiç: “Ekzistojnë dy pikëpamje në këtë. Në Prishtinë ky është akti I deklarimit të pavarësisë. Në Serbi në bazë të kushtetutës thuhet se Kosova është pjesë e Serbisë me një autonomi. Mendoj se duhet të fillojmë nga kjo nëse është reale njëra apo tjetra. Unë mendoj se nuk është reale as njëra e as tjetra. Çfarë është gjëja më pak e dëmshme në fund të fundit. Mendoj se kjo do të kishte efekte të mira për të gjithë pasi me këtë ne do të tejkalonim problemet tona. Shqiptarët dhe serbët nuk do të kishin për çfarë të zihen dhe këtë duhet inkurajuar”.

Idro Seferi: “Marrëdhëniet me Tiranën janë më të mira se sa vitet e shkuara. Si e shikoni tani këtë dhe a mund të ndihmoj diçka”?

Ivica Daçiç: “Mendoj se duhet të ndajmë qartë marrëdhëniet me Tiranën dhe Prishtinën. Me Tiranën përveç Kosovës nuk kemi çështje të hapura përveç dallimeve për Kosovën dhe duhet të mbështesim njëri-tjetrin. Nga ana tjetër mendoj se Prishtina ka një pozitë, e cila mund të kaloj diku në Perëndim nëse nuk e njohin situatën. Ne nuk mund të flasim që në Kosovë jetojnë kosovarët dhe në Tiranë shqiptarët. Ja tani kemi shqiptarët në Preshevë që thonë se janë pakicë kombëtare. Pakicë e kujt e Kosovës apo shqiptare? Ne nuk mund të bëhemi të verbër. Ky është populli i njejtë që jeton në Tiranë dhe në Prishtinë. Andaj duhet të flasim për të gjitha. Unë kam qenë gjithmonë për atë që problemi të zgjidhet mes dy shteteve amë, mes Shqipërisë dhe Serbisë. Natyrisht unë nuk them që nuk duhet pyetur ata që jetojnë në Kosovë dhe Metohi, por sikur të ishim nisur në këtë rrugë mendoj se problemi do të zgjidhej që në vitet ’90”./abcnews.al

dacic.jpg
G. P.18:54 | 20/06/2018

Ministri i Jashtëm i Serbisë, Ivica Daçiç, ka njoftuar se Liberia ka tërhequr njohjen e pavarësisë së Kosovës. Ndërkohë, Daçiç i ka bërë thirrje presidentit Hashim Thaçi të bëjë kujdes me deklaratat për kufij ndërkombëtarë.

Serbia nuk e ka pritur mirë deklarimin e presidentit kosovar, Hashim Thaçi, për bisedimet në Bruksel pasi ka përmendur se kufiri me Serbinë do të jetë në tavolinën e bisedimeve. Këtë gjë e ka konsideruar të pamundur shefi i zyrës për Kosovën, Marko Gjuriç, i cili tha se nuk pret shumë nga bisedimet pasi Prishtina nuk ka planë të bëj kompromis. Shefi i diplomacisë serbe, Ivica Daçiç, ka dalë në një konferencë të jashtëzakonshme me homologun e tij nga Liberia, e cila ka tërhequr njohjen e pavarësisë së Kosovës.

Ivica Daçiç, ministër i Jashtëm i Serbisë: “Nuk ekziston kufi ndërkombëtar me Kosovën. Thaçi e thotë këtë pasi dëshiron të ketë kufi, por ne së pari mund të themi se duhet ta shohim a ekziston një kufi me Shqipërinë, pasi nuk ka kontroll dhe kjo është Shqipëri e madhe. Por, lajmi i madh është sot se Liberia ka tërhequr njohjen dhe kjo do të thotë se puna nuk ka mbaruar”.

Ministri serb ka kërkuar që të zbatohen marrëveshjet e nënshkruara deri më tani në Bruksel në mënyrë që të bisedohet tutje. Për Serbinë bisedimet priten me interes pasi është takimi i parë i rëndësishëm, por do të insistohet në themelimin e Asociacionit të Komunave më shumicë serbe./abcnews.al

reagon-dacic.jpg
G. P.16:26 | 15/04/2018

Ministri i Jashtëm serb, Ivica Daçiç nuk mohon se Kosova në të ardhmen mund të bëhet pjesë e Organizatës së Kombeve të Bashkuara. Në një intervistë për mediat vendase ai nënvizon se për këtë vendos vetëm Serbia.

“Është e mundur, por vetëm nëse pala serbe e pranon një gjë të tillë. Ndryshe nuk mund të jetë”, tha Daçiç.

Kryediplomati më tej nënvizoi se nuk mund t’i thotë Rusisë dhe Kinës që të mos e pengojnë anëtarësimin e Kosovës në OKB.

Daçiç njofton gjithashtu se askush deri më tani nuk e di se çfarë do të përmbajë marrëveshja përfundimtare ndërmjet Kosovës dhe Serbisë. Ndërsa për Asociacionin, ministrin serb akuzoi Brukselin, që sipas tij, po i jep përkrahje Kosovës./abcnews.al

nikosi.jpg
G. P.16:42 | 11/04/2018

Greqia nuk do të ndryshojë qëndrim për pavarësinë e Kosovës. Shefi i diplomacisë greke, Nikos Kotzias, ka vizituar Serbinë ku ka thënë se Greqia ka bërë marrëveshje për hapjen e një zyre tregtare të Kosovës në Athinë, por kjo nuk ka të bëje me ndryshim qëndrimesh.

Pas takimit me homologun serb, Ivica Daçiç, ministri grek vlerësoi se ashtu sikurse në marrëdhëniet me Maqedoninë, është i nevojshëm të gjendet kompromisi.

Nikos Kotzias, ministër i Jashtëm i Greqisë: “Marrëveshjet duhen zbatuar dhe jo vetëm njëanshëm, por në tërësi dhe këtë të gjithë duhet ta kenë parasysh. Zyra tregtare e Kosovës nuk do të jetë përfaqësi diplomatike”.

Kotzias ka thënë se me Maqedoninë është bërë progres mjaft i madh në gjetjen e zgjidhjes.

Homologu i tij serb tha se për Kosovën nuk ka ndryshime, por Serbia mund të ofroj takime Shkup-Athinë.

Ivica Daçiç, ministër i Jashtëm i Serbisë:Jugosllavia e atëhershme ka krijuar marrëdhënie me Maqedoninë pasi ajo ka qenë ish-Republikë jugosllave siç e thotë edhe emri. Mendoj se nuk ka qenë një vendim i menduar mirë. Sjellja e Shkupit ndaj interesave tona nuk ka qenë e duhur. Ne jemi për zgjidhje dhe ajo që mund të bëjmë është të ofrojmë takime edhe tek ne”.

Kryediplomati grek në takim me presidentin, Aleksandër Vuçiç, ka thënë se Bashkimi Europian është garanci për rajonin dhe kësaj pjese i nevojitet bashkëpunim./abcnews.al

reagon-dacic.jpg
G. P.14:55 | 07/04/2018

Kosova është e gatshme të pranojë ndarje të territorit të saj me Serbinë, por një gjë të tillë nuk ia lejojnë ndërkombëtarët. Është kjo deklarata e ministrit të Jashtëm serb, Ivica Daçiç, i cili shtoi se Prishtina bën çfarë i thonë ndërkombëtarët.

Ministri i Jashtëm serb, Ivica Daçiç, deklaroi se Prishtina do të ishte e gatshme të pranonte propozimin serb për ndarjen e Kosovës, por një gjë e tillë nuk i lejohet nga ndërkombëtarët.

Në një intervistë për të përditshmen serbe Blic, ai theksoi se nëse do të bisedohej hapur për ndarjen e Kosovës, pa ndërkombëtarët, Prishtina do të nisej nga interesat e saj dhe do të pranonte këtë propozim.

Daçiç shtoi se fuqitë e mëdha, kur përmendet demarkacioni dhe ndarja, mendojnë se pasoja do të ishte një zhvendosje masive e popullsisë, duke mos marrë parasysh se situata etnike në terren është në përputhje me propozimin për ndarje.

Ministri i Jashtëm serb tha se fuqitë e mëdha nuk duan të diskutojnë propozimin për ndarjen e Kosovës, sepse mendojnë se çështja e Kosovës është mbyllur në vitin 2008, duke u nisur nga fakti se e kanë njohur pavarësinë.

I pyetur nëse janë të vërteta pretendimet e Presidentit të Partisë Popullore, Vuk Jeremiç, se Presidenti i Serbisë, Aleksandër Vuçiç ka ofruar jugun e Serbisë, në këmbim të veriut të Kosovës, Daçic u përgjigj se “nuk ka pasur asnjë bisedë në përpjekje për zgjidhje të qëndrueshme të çështjes së Kosovës”.

Duke folur për aktivitetet që priten lidhur me çështjen e Kosovës, Daçiç konfirmoi se se javën e ardhshme në Beograd do të jenë ministrat e Jashtëm të Greqisë dhe Francës dhe se priten biseda të rëndësishme./abcnews.al

reagon-dacic.jpg
G. P.15:25 | 03/04/2018

Ivica Daçiç, ministri i Jashtëm serb, deklaroi se Prishtina po provokon Beogradin me mbështetjen e disa fuqive të huaja si dhe duke mos implementuar marrëveshjet e arritura mes dy vendeve në Bruksel.

Përkushtimi i Beogradit për një dialog të sinqertë dhe konstruktiv me Prishtinën me ndërmjetësimin e Bashkimit Europian, nuk po jep rezultatet e duhura. Deklarata u bë nga ministri i Jashtëm serb, Ivica Daçiç, i cili shtoi se autoritetet në Prishtinë me mbështetjen e fuqive të huaja nuk po implementojnë marrëveshjet e arritura në Bruksel.

Daçiç ishte i pranishëm në ceremoninë e hapjes së një pikëkalimi të ri kufitar mes Serbisë dhe Hungarisë, ku u takua dhe me ministrin e Jashtëm hungarez, Peter Szijjarto. Ministri i jashtëm serb i tha homologut të tij se pret që Hungaria të kuptojë qëndrimin e Serbisë që bazohet në ruajtjen e vlerave të krishtera dhe europiane.

Daçiç shtoi se në historinë e rajonit fuqitë më të mëdha të botës janë përplasur shpesh me Serbinë dhe Hungarinë si dhe kanë ushtruar presion. Presione të cilat ekzistojnë dhe sot kur Republika e Serbisë po bën një përpjekje shumë të madhe për të pasur vendin që meriton në komunitetitn e vendeve europiane.

ivica-dacic-1280x656.jpg
G. P.13:50 | 22/03/2018

Ministry i Jashtëm serb, Ivica Daçiç, u shpreh se vendi i tij ishte vetëpropozuar për të organizuar dhe pritur një takim mes Vladimir Putin dhe Donald Trump. Daçiç shtoi se Beogradi është shumë i përgatitur për një takim të tillë të një rëndësie planetare.

Ai tha se si një vend neutral ushtarakisht, Serbia ka kapacitetet e duhura në fushën e politikave të jashtme për të pritur presidentin rus dhe atë amerikan. Ministri i Jashtëm serb theksoi se nëse realizohej takimi do të ishte një dëshmi se politika, që po ndjek shteti serb është e duhura./abcnews.al

dacic.jpg
G. P.12:45 | 17/03/2018

Kosova nuk do të ketë ushtri, pasi një gjë e tillë nuk është parashikuar në rezolutën 1244 të Këshillit të Sigurisë së Kombeve të Bashkuara, në këtë mënyrë ministri i Jashtëm serb, Daçiç, ka përsëritur qëndrimin e Beogradit ndaj kësaj çështjeje.

Ministri i Jashtëm serb, Ivica Daçiç, kundërshton me forcë mundësinë e krijimit të ushtrisë së Kosovës. Ai u shpreh se Rezoluta 1244 e Këshillit të Sigurimit të Kombeve të Bashkuara nuk parashikon formimin e Ushtrisë së Kosovës. Daçiç më tej tha se kur bëhet fjalë për Ushtrinë e Kosovës, Prishtina mund ta kërkojë në Këshillin e Sigurimit të OKB-së. Në seancën e Këshillit të Sigurimit nuk do të ketë një vendim për këtë të ashtuquajturën Ushtrinë e Kosovës. Duke theksuar se Serbia nuk e pranon këtë Daçiç tha se serbët në Parlamentin e Kosovës nuk do të votonin për krijimin e saj.

Daçiç shtoi se Serbia do të zgjidhë problemet dhe prandaj edhe po propozon zgjidhje përfundimtare për Kosovën, duke thënë se është Kosova nga ana tjetër, që nuk po zbaton marrëveshjet e arritura në Bruksel duke këmbëngulur për krijimin e ushtrisë./abcnews.al

vlcsnap-error212-1-1280x720.jpg
G. P.21:09 | 27/02/2018

Nga Beogradi, ku ndodhej për takimin trilateral, ministri i Jashtëm, Ditmir Bushati, është përpjekur të ulë tensionet e ngritura nga deklaratat e kryeministrit Rama për Kosovën. Ndërsa homologu i tij serb, Ivica Daçiç, ka bërë thirrje për një diplomaci më të kujdesshme.

Takimi trilateral i Shqipërisë, Serbisë dhe Italisë ka mbledhur tre shefat e diplomacive në kryeqytetin serb. Ministri shqiptar është pyetur për deklaratat e kryeministrit Edi Rama nga gazetarët serbë, për një politikë dhe president të përbashkët me Kosovën. Bushati tha se Shqpëria është anëtare e NATO-s dhe kandidate për Bashkimin Evropian.

Ditmir Bushati: “Shqipëria, Kosova duhet të bëhen gati për një proces integrimi europian që ne shpresojmë të jetë i shpejtë, ku siç shihet qartë nga dinamikat e tij një pjesë të mirë të çështjeve që lidhen me politikën e jashtme janë çështje që i delegohen autoriteteve superkombëtare”.

Nga ana tjetër, shefi i diplomacisë serbe, Ivica Daçiç tha se edhe Serbia mund të bëjë deklarata të tilla me serbët e Bosnjës. Ndërsa me Shqipërinë e ka të qartë se nuk pajtohet rreth pavarësisë së Kosovës.

Ivica Daçiç, ministër i Jashtëm i Serbisë: “Ne e dimë për çfarë nuk pajtohemi dhe ajo është Kosova. Do të doja të kishim më pak deklarata në rajon rreth kësaj çështjeje”.

Shqipëria dhe Serbia do të vazhdojnë bashkëpunimin në të gjitha fushat e sidomos në atë të ekonomisë. Shefi i diplomacisë italiane, Angelino Alfano tha se për Ballkanin është me rëndësi të tejkalohet faqja e së shkuarës në histori, duke mbështetur vendet kandidate në procesin e integrimit./abcnews.al

lavrov-1280x653.jpg
G. P.16:05 | 22/02/2018

Ministri i Jashtëm i Federatës Ruse, Sergej Lavrov, ka sqaruar në Beograd se Kremlini nuk do të njohë pavarësinë e Kosovës. Ai akuzoi vendet e NATO-s për presion në Ballkan.

Rusia nuk do ta ndryshojë qëndrimin për Kosovën dhe nuk do ta njohë pavarësinë e saj. Ministri i Jashtëm rus, Sergej Lavrov, i është përgjigjur kërkesës së presidentit kosovar, Hashim Thaçi, në idenë e njohjes së pavarësisë nga Rusia. Ai ka thënë se është për zgjidhje të të gjitha problemeve në Europë me marrëveshje.

Sergej Lavrov, ministër i Jashtëm i Rusisë: “Ai, si shumica e politikanëve në Prishtinë, duhet të merren me punët e tyre dhe sidomos me faktin që janë të akuzuar për kryerjen e krimeve të luftës. Ne e respektojmë rezolutën 1244 dhe retoritkat e tilla nuk ndryshojnë mendimin tonë”.

Homologu i tij serb, Ivica Daçiç, ka kritikuar gjithashtu qëndrimet e Prishtinës duke falendëruar Rusinë për mbështetje.

Ivica Daçiç, ministër i Jashtëm i Serbisë: “Thaçi ka deklaruar se njohja nga Rusia do ta ndihmonte procesin, e unë them që është e logjikshme tërheqja e njohjes nga SHBA dhe Britania e Madhe do ta ndihmonte ndalimin e histerisë së madhe shqiptare në rajon”.

Kryediplomati rus akuzoi vendet anëtare të NATO-s për presion në Ballkan. Për të në Serbi janë përgatitur aktivitete të ndryshme dhe dhurata nga zemra.

Idro Seferi: “Shefi i diplomacisë ruse, Sergej Lavrov, ka quajtur të papërshtatshme në Europë, pasi për shkak se siç ka thënë disa vende të NATO-s tentojnë të zgjerohen në Ballkan, përfshirë Maqedoninë, Malin e Zi dhe Bosnjen në drejtim të lindjes”./abcnews.al

Idro Seferi, gazetar i ABC News


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono