islanda

Giroud.jpg
Igli Nikolli22:10 | 11/10/2019

Një penallti e fituar është kthyer në gol nga Oliver Giroud në mesin e pjesës së dytë. Franca ka zhbllokuar sfidën përballë Islandës dhe ky është një lajm i mirë për kombëtaren tonë, pasi nordikët janë një ndër rivalët për vendin e dytë.

Sigurisht që diçka e tillë nuk ka vlerë nëse nuk fitojmë në Turqi, pasi trepikëshi është jetik për ëndrrën kualifikim. Sulmuesi i Chelsea është treguar i saktë përballë portierit vendas, duke kaluar kampionët e botës në avantazh. /abcnews.al

eros-grezda.jpg
ad min11:48 | 12/09/2019

Eros Grezda është një nga futbollistët shqiptarë me potencialin më të madh. Jo më kot, Rangers e Steven Gerrard i pagoi një vit më parë 2 milionë Euro Osijek-ut për të marrë shërbimet e tij.

Mirëpo në sezonin e parë për skocezët, Grezda nuk pati shumë hapësira. Situata arriti deri aty saqë, ish-mesfushori i Liveprool nuk e grumbulloi këtë sezon me ekipin e parë, por e ka dërguar tek skuadra e rezervave.

Pikërisht në këtë ekip Grezda është duke gjetur formën e tij. Këtë e konfirmon edhe trajneri i të rinjve të Rangers, Graeme Murty.

Sipas tij, Grezda ka qenë një ndihmesë e jashtëzakonshme për skuadrën. Murty e ka përdorur shqiptarin në disa ndeshje këtë sezon. Sipas tij, Grezda ka një rol të jashtëzakonshëm edhe për rritjen e lojtarëve të rinj.

Kujtojmë që Eros Grezda nuk mori një ftesë nga Edy Reja për ndeshjet ndaj Islandës dhe Francës. Shkak është bërë mungesa e hapësirave që ka pasur tek ekipi i parë i Rangers./ABC News Albania 24/7

edi-rejajj.jpg
ad min11:53 | 11/09/2019

As edhe një fitore 4-2 nuk e kënaqi plotësisht trajnerin e kombëtares, Edi Reja. Italiani pati kritika për golat e pësuar, ndonëse u ndje i lumtur për reagimin e ekipit.

Doli krejt si papritur në zonën e intervistave. Vëmendja u zhvendos menjëherë nga Sokol Cikalleshi tek Edi Reja, por fillimisht, trajneri i kombëtares pati një ankesë pasi u pengua.

“Po si mund të vendoset kjo tavolinë këtu, për cilin është kjo tavolinë këtu? Epo mirë, le të flasim për ndeshjen”.

Pyetja e parë ishte pikërisht për Cikalleshin.

“Nëse ai dëshiron të luajë, duhet të shënojë gola, të ndihmojë mesfushën, dhe madje edhe mbrojtjen. Ndryshe, me mua nuk luan. Sokoli është i fortë, dhe mund t’ia dalë. Ka kohë që nuk luan në klubin e tij, por sot bëri 90 minuta , po ashtu luajti 30 minuta në Paris. Kjo, sepse ai është profesionist, kujdeset për veten. Por, duhet të përmirësohet, sepse humbi më shumë topa sesa duhet”.

Fitorja ishte çlirim, por Reja nuk u duk shumë entuziast, as plotësisht i kënaqur.

“Përtej 4 golave, për të cilët jam shumë i lumtur, nuk pranoj dot që të pësojmë dy gola. Nuk pranoj golin e pësuar në fillim të pjesës së dytë. Një skuadër e mirë nuk pëson gol të tillë, sepse e rrezikuam veten seriozisht. Kjo, sepse Islanda ka cilësi fizike superiore ndaj nesh. Sidoqoftë, lojtarët u treguan të zotët që ruajtën zotërimin e topit”.

Pavarësisht kritikave, italiani e vlerësoi lart skuadrën e tij.

“Nuk më intereson edhe aq fitorja, por më intereson shpirti i garës që tregoi skuadra, reagimi që ajo bëri, dëshira për të fituar. Luftoi për çdo top, dhe është pikërisht kjo që tregon se je skuadër. Suksesi im si trajner ishte ky, që lojtarët reaguan, dhe që kemi një raport shumë të mirë me njëri-tjetrin, që punojnë shumë mirë. Nuk më interesoi shumë fitorja, por fryma dhe uniteti që u rikthyen. Kjo do të thotë se jemi një skuadër”./ABC News Albania 24/7

trajneri.jpg
ad min14:42 | 10/09/2019

Trajneri i Islandës, Erik Hamren e konsideron ndeshjen ndaj Shqipërisë si tepër të vështirë. Tekniku 62-vjeçar zbulon se ndaj kuqezinjve do të mungojnë disa futbollistë të rëndësishëm.

Trajneri i Islandës, Erik Hamren, e konsideron tepër të rëndësishme duelin me Shqipërinë pasi objektivi i islandezëve është kualifikimi në Europianin e vitit të ardhshëm. Kreu i pankinës së Islandës parashikon një ndeshje të vështirë dhe zbulon se në skuadrën e tij ka disa mungesa.

“Është një ndeshje shumë e rëndësishme për të dyja skuadrat. Kemi ardhur vetëm për fitore dhe kemi respekt të madh për Shqipërinë. Objektivi jonë është kualifikimi në Europianin e vitit 2020. Shqipëria është një skuadër e fortë. Ndaj Turqisë, ata luajtën shumë mirë, por nuk patën fat. Kanë një avantazh të lehtë ndaj nesh pasi luajnë në shtëpi. Parashikoj një ndeshje të vështirë mes dy skuadrave të një niveli. Kemi disa mungesa në skuadër për shkak dëmtimesh, por jemi të gatshëm për këtë sfidë”, tha trajneri.

Kombëtarja e Islandës po paraqitet mjaft mirë në këto kualifikuese pasi janë me pikë të barabarta me Francën dhe Turqinë./ABC News Albania 24/7

de-biasi-1.jpg
ad min11:44 | 10/09/2019

Ish trajneri i ekipit kombëtar, Gianni De Biasi, në një lidhje telefonike në emisionin “Pressing” në ABC News ka komentuar aktualitetin në përfaqësuesen kuqezi. Tekniku, i cili dërgoi Shqipërinë në Euro 2016 e konsideron bashkëkombasin e tij Edy Reja si njeriun e duhur për të drejtuar kombëtaren.

Situata në ekipin kombëtar është shqetësuese dhe shanset për një kualifikim në europian janë thuajse zero. Ish-trajneri i përfaqësueses Gianni De Biasi gjatë një ndërhyrje telefonike për emisionin “Pressing” në ABC News analizoi formën dhe ecurinë e deritanishme të kuqezinjve nën drejtimin e teknikut Edy Reja. Trajneri, i cili dërgoi përfaqësuesen në Euro 2016 bëri të ditur se në Shqipëri nuk ka një kulturë për të pranuar humbjen.

“Nuk po ndodh asgjë. Kemi marrë fitore me Andorrën dhe Moldavinë. Trajneri Edy Reja do të bëjë maksimumin. Fillon një rrugëtim mjaft i vështirë dhe ndaj Islandës duhet marrë një fitore. Në Shqipëri mungon një lloj kulture në situata të tilla. Skuadra duhet mbështetur jo vetëm kur fiton, por edhe kur humbet. Shqipëria nuk është skuadra më e fortë e grupit. Kjo është Shqipëria që është. Në bazën e ecurisë dhe problemeve duhen kuptuar rezultatet dhe përpjekjet për të bërë më të mirën në situata të tilla kritike”, tha De Biasi.

Por çfarë mendon De Biasi për rreshtimin taktik 3-5-2 që aplikon trajneri Edi Reja?

“Nuk është problem sistemi apo moduli që zgjedh trajneri se sa situata në të cilën lojtarët janë për momentin. Një pjesë e mirë e futbollistëve që unë drejtoja ishin në kapacitetet e tyre maksimale. Kishin shumë minuta nën këmbë dhe aktivizoheshin rregullisht. Ndoshta aktualisht një pjesë e tyre nuk luajnë shumë dhe kjo krijon komplikacione respektive për sa i përket ecurisë. Sistemi i lojës mund të përshtatet në mënyra të ndryshme. Nga 3-5-2 mund të ndryshojë gjatë lojës”, tha De Biasi.

Në fund edhe një sugjerim për kuqezinjtë.

“Nuk duhet menduar se kemi qenë në europianin e vitit 2016 pasi gjithmonë ka një fillim dhe një fund. Duhet gjetur forca për të filluar sërish dhe ecur përpara.  Duhet të lini të qetë trajnerin për të punuar me skuadrën. Ai ka kapacitete të mira dhe potencialin e duhur për të drejtuar Shqipërinë. Duhet të mbështesni këtë skuadër edhe në momentet e vështira dhe jo vetëm kur fiton. Lojtarët duhet të mbajnë përgjegjësitë e tyre në momentet e veçanta sa i përket performancës dhe pjesës së tyre në fushë. Kjo është shumë e rëndësishme sa i përket situatës në përfaqësuese”, u shpreh ai.

Shqipëria luan sonte në mbrëmje në “Elbasan Arena” ndaj Islandës ku synimi kryesor mbetet rikthimi tek fitorja./ABC News Albania 24/7

shqiperia.jpg
ad min15:47 | 09/09/2019

Kombëtarja shqiptare do të ketë 4-5 ndryshime në formacion për sfidën e së martës ndaj Islandës në “Elbasan Arena”. Trajneri Reja ul në stol kapitenin Mavraj dhe deklaron se ndeshja është përcaktuese për Europianin.

Nuk duhet lënë pas vetëm ajo që pësuam pak ditë më parë. Franca tashmë kaloi, bashkë me humbjen 1-4, dhe në radhë është Islanda, një ekip që e kemi më shumë detyrim ta mundim, por që na theu në duelin e parë në Rejkjavik. Ja kur vjen momenti i së vërtetës dhe trajneri i kombëtares Edi Reja nuk ngurron të pohojë.

“Kjo do të jetë ndeshja jonë më vendimtare. Kjo do të tregojë nëse do ta vazhdojmë ëndrrën tonë europiane, apo jo. Normalisht, në rast se nuk fitojmë kjo gjë do na heqë shumë mundësi për t’u kualifikuar. Kemi tri ndeshje në shtëpi, duhet të shfrytëzojmë faktorin fushë, do të na japë një shtysë shumë të fortë për kualifikimin. Kalendari na favorizon për të bërë më të mirën. Do të kërkojmë të bëjmë më të mirën jashtë fushë. Nesër do të japim 200% për të marrë fitoren”.

Pas lodhjes ndaj Francës, Reja e ka të qartë se çfarë do të bëjë.

“Formacioni 3-5-2 që kemi ne, do të më bëjë të ndryshoj disa lojtarë. Dermaku do të jetë titullar në vend të Mavrajt. Do mundohemi që të jemi më ofensivë. Do të bëjmë vlerësimin për formacionin përfundimtar, vetëm para ndeshjes. Kush rikuperon më shumë dhe kush më pak do të duket në stërvitje dhe do të vendosim”.

Në stol, edhe kapiteni Mërgim Mavraj, për të cilin pati kritika.

“Është një zgjedhje teknike nga ana ime. Do të bëj një vlerësim të të gjithë grupit. Përsa i përket Mërgimit është shumë i zoti në ajër, garanton një mbulim të mirë në goditje këndi, por ne kemi edhe lojtarë të tjerë. Në e vlerësojmë Islandën në bazë të ndeshjes së parë, ku nuk e toleruam. Duhet të bëjmë një vlerësim të grupit, për të luajtur më të mirët, ata që janë në formë. Duhet patjetër që ata që do të jenë në fushë, të jenë 100% të motivuar”.

Çfarë mendimi ka trajneri i Shqipërisë, për Islandën?

“Kundërshtari është brenda mundësive tona, është një skuadër me vlera të rëndësishme, por jemi në kushte që të përgjigjemi. Nëse lojtarët bëjnë detyrën dhe janë në 100%, ne do të kemi mundësinë ta mundim Islandën. Jam shumë i bindur që mund të bëjmë një ndeshje të madhe”./ABC News Albania 24/7

EtritBerishaO8d4yxbhqX1m.jpg
ad min13:07 | 09/09/2019

Portieri Etrit Berisha është larguar nga stërvitja me kombëtaren për shkak të një dëmtimi. Në vend të portierit të SPAL është grumbullua Gentian Osmani nga Shqipëria U21. Kombëtarja e futbollit ka nisur stërvitjet për ndeshjen ndaj Islandës, e cila është e vlefshme për eliminatoret Euro 2020.

Ndeshja do të luhet të martën në “Elbasan Arena”. Kuqezinjtë vijnë në këtë sfidë pas disfatës 4-1 me Francën. Ndërkohë Islanda fitoi me rezultatin 3-0 ndaj Moldavisë.

Skuadra e Edi Rejës ndodhet në vendin e katërt të tabelës së klasifikimi me 6 pikë, ndërsa Islanda pozicionohet e treta me 12 pikë. Të njëjtën sasi pikësh si islandezët kanë edhe Turqia e Franca, e cila udhëheq grupin H, ndërkohë shpresat për një kualifikim të kombëtares sonë pothuajse janë shuar./abcnews.al

kombetarja-shqiperia.jpg
ad min20:24 | 08/09/2019

Kombëtarja shqiptare nisi përgatitjet për ndeshjen tjetër eliminatore të Europianit, ndaj Islandës. Trajneri Edi Reja zhvilloi një seancë të lehtë, për shkak të lodhjes pas duelit me Francën dhe udhëtimit të dyfishtë.

Humbja në Francë u la pas, ndërsa tani ka një detyrë tjetër. Siç e kishte thënë trajneri Edi Reja, ndeshja e Shqipërisë nuk ishte ajo në Paris, por ajo që do të luhet të martën në “Elbasan Arena” ndaj Islandës.

Pas kthimit nga Franca dhe një pushimi të shkurtër, ekipi përfaqësues realizoi seancën e parë anti-Islandë, e cila gjithsesi ishte e lehtë, sidomos për lojtarët që ishin titullarë, apo që u aktivizuan ndaj Francës.

Futbollistët më së shumti, punuan për të mbledhur veten dhe për të qenë gati për duelin me Islandën.

Me shumë gjasë, Reja do të bëjë ndryshime në formacion, duke pasur parasysh se shumë kuqezinj shpenzuan shumë energji ndaj kampionëve të botës, sidomos të tillë si Balaj, Bare, Abrashi apo Roshi.

Gjithsesi, vendimin për formacionin ai do ta marrë vetëm pas seancës së fundit stërvitore në “Elbasan Arena”. Një shqetësim të veçantë për trajnerin italian ka aspekti psikologjik, pasi ekipi duhet të kalojë goditjen e rëndë të marrë në Paris, me humbjen 1-4.

Në renditje, Islanda ka 12 pikë ndaj 6 të Shqipërisë, por një fitore e kombëtares mund të rriste shanset për kualifikim për në finalet e Europianit./ABC News Albania 24/7

ndeshja-me-francen.jpg
ad min15:55 | 08/09/2019

Futbollistët e kombëtares pranuan diferencën me Francën në ndeshjen e Europianit dhe deklaruan se tani duhet menduar për duelin ndaj Islandës.

Të gjithë ishin të ndërgjegjshëm se humbjen e merituam.

Futbollistët e kombëtares nuk është se vrapuan të flisnin para kamerave, për duelin e Europianit ndaj Francës, ndërsa u përpoqën të qetësonin veten dhe të shikonin përpara.

Kapiteni Mërgim Mavraj theksoi për Supersportin të metën kryesore të ekipit, por edhe nuk pranoi që gjithçka të quhej negative.

“E dimë që me skuadra të tilla është shumë e vështirë, kur nuk e qarkullon topin, por besoj që golat e parë ishin gabime shumë të thjeshta, shumë të lehta. Nuk ju jap të drejtë kur thoni që ishte zhgënjyese. Nuk shoh arsye pse me pa këtë ndeshje kaq radikal se e dimë të gjithë kush është Franca”, tha Mavraj.

Odise Roshi edhe u kritikua për gabimet, edhe u quajt fatkeq që u vendos në atë pozicion nga trajneri Reja.

“Është e vërtetë, u ndjeva në vështirësi sepse luajta ndaj dy kundërshtarëve shumë të fortë dhe shumë të shpejtë. Ata e shfrytëzuan shpejtësinë e tyre. Na ndëshkuan që në minutat e para, por lozëm me një sistem me 3-5. Unë bëra maksimumin tim dhe tashmë shpresojmë në ndeshjen e ardhshme ndaj Islandës, të marrim një rezultat sa më të mirë”, tha Roshi.

Një lojtar që Reja e vlerësoi maksimalisht ishte Keidi Bare.

“Çdo lojtar shqiptar do të donte të lozte këtë ndeshje sidomos përballë Francës. Dola nga fusha… i dhashë të gjitha unë dhe shokët e mi, megjithatë rezultati ishte negativ”, tha Bare./ABC News Albania 24/7

KOMBETARJA-IZOLOHET-NE-DURRES.mpg_snapshot_00.06-1280x720.jpg
ent ela19:05 | 09/06/2019

Kombëtarja shqiptare ka nisur punën në Durrës, për ndeshjen e dytë eleminatore të Europianit, atë ndaj Moldavisë. Trajneri Reja përpiqet të mbajë lart moralin pas humbjes me Islandën.

U kthyem duarbosh, por kemi edhe një ndeshje tjetër.

Kombëtarja shqiptare ndoshta mund të mos jetë me moralin më të lartë pas humbjes në Islandë, veçse të martën duhet të jetë gati për Moldavinë.

Trajneri Edi Reja është kujdesur që skuadra të jetë tërësisht e izoluar në kompleksin “Tropikal” në Durrës, edhe pse është periudhë pushimesh, ndërsa në seancën stërvitore pranon kamerat, si gjithnjë, vetëm 15 minuta.

Italiani është përpjekur gjatë gjithë kohës të nxisë lojtarët, duke theksuar se prova në Islandë ishte pozitive, pavarësisht humbjes, pra një bazë e mirë për vazhdimin.

Trajneri lavdëroi karakterin e treguar nga lojtarët e tij, që nuk u tronditën pas pësimit të golit, por luajtën fort deri në fund.

Për fat në skuadër kthehet kapiteni Mavraj, i cili përfundoi pezullimin prej 3 ndeshjesh, dhe ky do të jetë një plus I madh për repartin e mbrojtjes, që tregoi dobësi në Rejkjavik, sidomos në pësimin e golit.

Ende nuk dihet se cila mund të jetë skema e Rejës për ndeshjen eleminatore të Europianit, të martën ndaj Moldavisë në “Elbasan Arena”.

Me shumë gjasë, do të jetë pak a shumë ajo e Islandës, ku kombëtarja luajti me dy sulmues, dhe me modulin 4-3-3.

Italiani do të shikojë gjendjen fizike të lojtarëve, sidomos pas 90 minutave të lodhshme të së shtunës, dhe mund të bëjë ndryshime në formacion, ku Sadiku, Kaçe apo Ndoj mund të mendohen titullarë. /ABC News Albania 24/7

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono