ISIS

GJERMANI-ISIS-MBULIM.mpg_snapshot_00.16-1280x530.jpg
ent ela22:01 | 21/02/2019

Autoritetet policore në Gjermani kanë bastisur një seri banesash në landin e Renit Verior Vestfalia dhe kanë arrestuar 12 persona të dyshuar si militantë islamikë. Sipas mediave gjermane, të arrestuarit dyshohet se po përgatisnin një sulm terrorist në Gjermani dhe se më parë kishin ndihmuar persona të ndryshëm që t’i bashkoheshin Shtetit Islamik në Siri. Ata janë shtetas gjermanë me prejardhje marokene të moshave nga 22 në 33 vjeç. Mes tyre rezulton edhe një çift që kishte udhëtuar për në Siri në vitin 2016, duke marrë me vete edhe fëmijët, por gjatë udhëtimit në Turqi ishte ndalur nga autoritetet vendase dhe kthyer mbrapsht për në Gjermani. /abcnews.al

skynews-donald-trump-us-president_4407328-933x445.jpg
G. P.15:50 | 17/02/2019

Presidenti Donald Trump i ka kërkuar Europës dhe Mbretërisë së Bashkuar që të pranojnë dhe të gjykojnë në territorin e tyre 800 luftëtarë të ISIS. Trump u ka kërkuar vendeve në fjalë që të bëjnë detyrën e tyre, në të kundërt ka paralajmëruar se Amerika do t’i lërë të lirë xhihadistët.

Presidenti Donald Trump i ka kërkuar Britanisë së Madhe dhe aleatëve europianë që të pranojnë dhe gjykojnë mbi 800 luftëtarë të Shtetit Islamik të kapur rob në betejën e fundit kundër grupit terrorist. Apelin e tij shefi i Shtëpisë së Bardhë e ka bërë përmes një postimi në Twitter, në një kohë kur trupat kurde pro-amerikane vazhdojnë betejën në bastionin e fundit të ISIS, në kufirin siriano-iraken.

“Luftëtarët e ISIS po mbahen nga trupat kurde. Shtetet e Bashkuara nuk duan të shohin se si këta njerëz përshkojnë rrugën drejt Europës, sepse ata atje duan të shkojnë. Ne kemi bërë shumë, kemi shpenzuar shumë, ndaj është koha që të tjerët të bëjnë përpara dhe të bëjnë detyrën e tyre”, ka thënë Trump.

Në të kundërt, presidenti amerikan ka paralajmëruar se Shtetet e Bashkuara do të detyrohen t’i lirojnë ata. Paralajmërimi i Trump vjen vjen pak ditë pas deklaratës së shefit të shërbimeve sekrete britanike, se Shteti Islamik po riorganizohet për të kryer më shumë sulme, pavarësisht disfatës në Siri. Gjithashtu, anëtarë të administratës amerikane kanë deklaruar se druhen se disa nga xhihadistët e ndaluar mund të kthehen në rrezik për vendet europiane, nëse këto të fundit nuk organizohen për t’i çuar ata para drejtësisë./abcnews.al

1-1280x581.jpg
ent ela17:45 | 10/02/2019

Kishin udhëtuar me prindërit e tyre në zonat e konflikteve për të luftuar përkrah Shtetit Islamik. Autoritetet ruse kanë mundësuar kthimin në atdhe të mbi 20 fëmijëve, nënat e të cilëve mbahen ende peng nga terroristët, ndërsa etërit janë vrarë në luftime.

Të paktën 27 fëmijë rusë u riatdhesuan të dielën në Moskë nga Iraku, ku kishin shkuar me prindërit e tyre për t’u bashkuar me Shtetin Islamik. Sipas agjencisë së lajmeve “AFP”, nënat e fëmijëve janë ende në duart e ISIS, ndërkohë që etërit janë vrarë në luftimet mes grupit xhihadist dhe trupave irakene në tre vitet e fundit. Në fillim të vitit, Kremlini njoftoi se 115 fëmijë rusë 10 vjeç dhe 8 të tjerë të moshave nga 11 në 17 vjeç ndodheshin ende në Irak. Përveç fëmijëve të riatdhesuar këtë të diel, 30 fëmijë të tjerë rusë u rikthyen në atdhe në fund të dhjetorit. Ndërkohë, rreth 100 fëmijë dhe gra, kryesisht nga republikat e Kaukazit, janë kthyer deri më tani në Rusi – thanë autoritetet. Një vit më parë, Shërbimi i Sigurimit Federal të Rusisë njoftoi se ishin rreth 4.500 qytetarët rusë që kishin udhëtuar drejt zonave të konflikteve për të luftuar përkrah terroristëve të Shtetit Islamik. Më shumë se 300 persona, duke përfshirë qindra të huaj, u dënuan me vdekje në Irak, ndërsa shumë të tjerë me burgim të përjetshëm pasi i përkisnin radhëve të grupit terrorist. Shumica e të dënuarve ishin nga Turqia dhe ish-republikat e Bashkimit Sovjetik. Ligji iraken i lejon të burgosurit të mbajnë fëmijët e tyre me ta derisa të mbushin 3 vjeç, por përtej kësaj moshe fëmijët duhet të qëndrojnë me të afërmit. /abcnews.al

trump-inauguration.jpg
G. P.09:15 | 08/02/2019

Presidenti Donald Trump tha dje se parashikon që brenda pak ditësh të bëhet një njoftim zyrtar që konfirmon se koalicioni i udhëhequr nga Shtetet e Bashkuara ka rimarrë nën kontroll të gjithë territorin që mbante prej dy vjetësh grupi terrorist. Presidenti pohoi se mbetje të grupit terrorist mund të jenë ende aktive në disa pjesë të Sirisë dhe Irakut, por shtoi se ato nuk janë në gjendje të mbledhin taksa apo të gjenerojnë burime financiare për të mbështetur aktivitetin luftarak.

Presidenti Trump foli dje para Koalicionit Global për të Mposhtur ISIS-in, një aleancë me 79 vende anëtare.

“Ushtria e Shteteve të Bashkuara, partnerët tanë në koalicion dhe Forcat Demokratike Siriane kanë çliruar në realitet të gjithë territorin që mbante më parë ISIS-i në Siri dhe Irak. Do të bëhet njoftimi zyrtar së shpejti, ndoshta nga java e ardhshme se ne kontrollojmë 100% të Kalifatit”.

Presidenti tha se ka ardhur koha për t’i kthyer ushtarët amerikanë në atdhe. Por ai u bëri thirrje aleatëve të ndjekin shembullin e Amerikës, duke mbrojtur kufijtë nga terroristët që përpiqen të futen.

“Duhet ta pranojmë se siguria në imigracion është siguri kombëtare dhe se nuk duhet t’u lëmë luftëtarëve të huaj mundësi të futen në vendet tona. Ne jemi treguar shumë të prerë”.

Duke këmbëngulur për tërheqjen nga Siria të kontigjentit amerikan me 2000 ushtarë, zoti Trump tha në një intervistë ditët e fundit se donte që trupat amerikane në Irak të mbanin nën vëzhgim Iranin.

Zyrtarët irakianë thonë se kushtetuta e vendit nuk e lejon që territori irakian të përdoret si bazë kërcënimesh ndaj fqinjve. Por ministri i jashtëm irakian i bëri dje thirrje koalicionit të ndihmojë për të luftuar celulat e fjetura të ISIS-it:

“U bëj thirrje të gjitha vendeve të botës të ndihmojnë Irakun që të luftojë celulat e fjetura në të gjithë vendin dhe të ndihmojnë Irakun të rikthejë stabilitetin dhe të rikthejë zonat e çliruara në gjendjen e mëparshme që terrorizmi të mos ekzistojë më”.

Presidenti Trump pohoi se mbetje të grupeve terroriste ende ekzistojnë në disa zona dhe mund të vazhdojnë të paraqesin rrezik. Por ai tha se Shtetet e Bashkuara dhe aleatët e tyre janë të gatshëm të përballen me terroristët kudo që ndodhen./Zëri i Amerikës

isis-1-1280x854.jpg
G. P.23:24 | 19/12/2018

ISIS vijon të vrasë në lindje të Sirisë, ku sipas të dhënave të fundit janë rreth 700 pengjet e vrara nga terroristët në këto dy muajt e fundit. Ndërkohë pengjet në duart e tyre janë ende me qindra.

Në lindje të Sirisë, terroristët e Shtetit Islamik kanë vrarë rreth 700 pengje në vetëm dy muaj. Shifrat alarmante janë bërë publike në një deklaratë për mediat të vëzhguesve sirianë për të drejtat e njeriut, me seli në Britaninë e Madhe. Sipas kësaj organizate, viktimat janë rreth 1,350 civilë dhe luftëtarë të mbajtur nga Shteti Islamik si pengje në një zonë afër kufirit me Irakun, transmeton. Xhihadistët kontrollojnë një zonë të vogël tokësore në lindje të lumit sirian Eufrat afër qytetit të Hadzin, ku forcat e mbështetura nga shtetet e bashkuara të amerikës kanë mundur të hyjnë vetëm këtë muaj.

Forcat Demokratike të Sirisë të drejtuara nga militantët siriane kanë luftuar me ISIS për disa muaj me ndihmën e forcave ajrore dhe forcat speciale amerikane. Komandanti i SDF-së konfirmoi për agjencinë e lajmeve Reuters se të paktën 5,000 luftëtarë të ISIS qëndrojnë në zonë, mes tyre një numër i madh i luftëtarëve janë të huaj dhe se të gjithë duket të jenë gati të luftojnë deri në vdekje. Kalifati i vetëshpallur i shtetit islamik pësoi një goditje për shkak të ofensivës së madhe të kryer përgjatë Irakut dhe Sirisë, por luftëtarët e ISIS ende kryejnë operacione dhe sulme nga rajoni kufitar i shkretëtirës./abcnews.al

MBULIM-STRASBURG-VIKTIMAT_ABC-M1-T1.mpg_snapshot_00.07-1280x720.jpg
G. P.12:42 | 17/12/2018

Zyra e Prokurorit në Paris konfirmoi viktimën e pestë të sulmit në tregun e Krishtlindjeve në Strasburg, që ndodhi një javë më parë. Viktima ishte nga Polonia. Autori i sulmit u ekzekutua nga agjentët e policisë të enjten e kaluar në përpjekje për ta arrestuar. Shekatt, i lindur në Strasburg, ishte një emër i njohur për shërbimet e sigurisë në Francë.

Ai ka qenë në listën e personave që përbëjnë rrezik potencial për sigurinë kombëtare. Agjencia e lajmeve të grupit militant, Shteti Islamik (IS), Amaq, konfirmuan se ai ka qenë “ushtar i ISIS”. Të dielën qindra persona janë mbledhur në një tempull në Strasburg për të nderuar viktimat me lexime dhe këngë./abcnews.al

isis123.jpg
G. P.22:58 | 15/12/2018

ISIS në Siri i ka ditët e numëruara. Kështu ka deklaruar Shon Rajan, zëdhënës i koalicionit të udhëhequr nga Shtetet e Bashkuara kundër organizatës terroriste.

Deklarata ka ardhur një ditë pasi forcat kurdo-siriane të mbështetura nga Amerika morën nën kontroll qytetin e Haxhinit, i konsideruar bastion i xhihadistëve në veri të Sirisë.

Rajan ka nënvizuar megjithatë se luftimet kundër ISIS në lindje të Sirisë nuk kanë përfunduar dhe se në fshatrat përreth Haxhinit, në kufi me Irakun, ka ende militantë të fshehur.

Forcat kurdo-siriane të pranishme në zonë kryejnë prej javësh një ofensivë tokësore të mbështetur nga aviacioni amerikan./abcnews.al

ISISI-AUSTRALI.mpg_snapshot_00.31-1280x672.jpg
G. P.14:22 | 09/11/2018

ISIS ka marrë përsipër përgjegjësinë për sulmin në Australi, duke konfirmuar se agresori ishte një luftëtar i tyre. Autori i vrasjes së një personi dhe plagosjes së tre të tjerëve para se të sulmonte me thikë, i vuri zjarrin makinës së tij.

Sulmi në Australi ku mbeti i vrarë një person dhe u plagosën tre të tjerë është kryer nga një luftëtar i Isis. Nëpërmjet agjencisë së tij të propagandës Amak, ISIS konfirmoi se sulmi me thikë në Melburn u krye nga një luftëtar i shtetit islamik, dhe kishte si objektiv vrasjen e qytetarëve të koalicionit. Bilanci përfundimtar është një i vdekur dhe dy të plagosur. Këtij bilanci i shtohet dhe vetë autori i masakrës i cili ndërroi jetë në spital pasi u plagos nga agjentët e policisë.

Autori i sulmit i vuri zjarrin automjetit të tij paraditen e së premtes dhe më pas sulmoi me thikë tre persona në qendër të qytetit, duke vrarë një prej tyre. Ndërhyrja e policisë ishte e shpejtë dhe agresori u arrestua pasi u qëllua nga njëri prej agjentëve. Para se t’i vinte zjarrin automjetit të tij dhe të sulmonte tre personat, agresori përplasi furgonin e tij në një qendër tregtare.

Në rrjetin social Tuiter, dëshmitarë të ndryshëm konfirmuan kronologjinë e ngjarjes, duke treguar se një i ri i kishte vënë zjarrin automjetit të tij dhe më pas kishte sulmuar agjentët e policisë me thikë./abcnews.al

IRAK-VARRET-ABC-M2-T1.mpg_snapshot_00.01.jpg
G. P.14:34 | 06/11/2018

202 varre të përbashkëta ku mendohet të ndodhen deri në 12 mijë trupa. Është kjo e dhëna shokuese e publikuar nga raporti i fundit i Organizatës së Kombeve të Bashkuara. Varret janë zbuluar në tre province të ndryshme të Irakut ku ISIS ka pasur kontroll të gjerë në periudhën 2014 – 2017.

Eshtrat e mijëra personave, ndoshta deri në 12 mijë, janë gjetur në 202 varre të përbashkëta në Irak. Lajmi është bërë public nga misioni i OKB-së në vend, duke shpjeguar se për momentin vetëm disa nga varret janë ekzaminuar, dhe janë identifikuar 1.258 trupa. Këto varre janë krijuar nga ISIS që ka kontrolluar zona të gjera të Irakut nga viti 2014 deri në 2017-n. Përfaqësuesi i Organizatës së Kombeve të Bashkuara në Irak, u shpreh se varret e dokumentuara në raport janë një testament i një masakre të vërtetë të kryer ndaj civilëve në vend.

Varret e përbashkëta mund të përmbajnë material të vlefshëm për të garantuar hetime të besueshme, procese dhe dënime të përshtatshme me standartet ndërkombëtare. Sipas raportit të përgatitur nga OKB, për tre vjet xhihadistët kanë shkelur në mënyrë sistematike të drejtat e njeriut, me akte që përbëjnë krime lufte, krime kundër njerëzimit dhe një genocide të mundshëm./abcnews.al

putin.jpg
G. P.10:18 | 19/10/2018

Presidenti i Rusisë, Vladimir Putin ka njoftuar se në Siri po mbahen 700 pengje nga ISIS. Mes tyre ka edhe shtetas amerikanë dhe evropianë. Ai paralajmëroi se xhihadistët kërcënojnë të vrasin 10 prej tyre në ditë.

Xhihadistët e ISIS kanë kapur në Siri, në zonën lindore të Eufratit, që në teori kontrollohet nga koalicioni i SHBA-ve, “700 pengje”, mes të cilëve edhe “shtetas amerikanë dhe evropianë” dhe kërcënojnë të vrasin “10 në ditë”. Një rrufe në qiell të hapur. Ai që e lëshoi ishte presidenti rus, Vladimir Putin në sajë të një eventi dedikuar politikës ndërkombëtare në Soçi. “Është një katastrofë dhe askush nuk thotë gjë çuditërisht”, nënvizoi Putin. Ai gjithashtu bëri me dije se 10 ekzekutimet e para kanë ndodhur disa ditë më parë.

Presidenti rus lëshoi bombën kur diskutimi u kthye nga Siria dhe rolin që luajti Moska në zgjidhjen e krizës. “Ne – nënvizoi ai – kemi çliruar 95% të territorit sirian në këto vite dhe nuk kemi lejuar që shteti të shpërbëhet”. Natyrisht, puna ende nuk është përfunduar dhe në këtë drejtim Putini ka pranuar se Turqia, në kundërshtim me atë që u premtua gjatë samiteve të fundit, ende nuk ka përfunduar krijimin e zonës së çmilitarizuar në krahinën siriane të Idlibit, edhe pse është “duke punuar” . “Gjërat nuk janë të lehta, përkundrazi, gjithçka është e vështirë”, shtoi Putin, duke falënderuar Ankaranë për përpjekjet e bëra.

Në fakt janë SHBA-të dhe aleatët e tyre, është arsyetimi i Putin, që nuk kanë bërë mjaftueshëm. “Shtetet e Bashkuara qartësisht nuk kanë arritur objektivat”, nënvizoi ai. Përkundrazi, ISIS, në zonën e tyre të kompetencës, kanë shtuar prezencën. Sipas shefit të Kremlinit, xhihadistët kanë shtruar kërkesa duke lëshuar dhe ultimatume dhe kërcënime. Më tej Putin i bëri apel komunitetit ndërkombëtar për të bashkuar përpjekjet për të shkatërruar terrorizmin. Sipas tij ky fenomen nuk është mposhtur ende, madje janë regjistruar humbje të mëdha./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono