ISIS

trumpo.jpg
G. P.23:20 | 21/08/2019

Presidenti amerikan Donald Trump ka deklaruar se Shtetet e Bashkuara nuk duan të kalojnë 19 vjet të tjera luftë si ajo në Afganistan, ndaj u ka bërë thirrje vendeve të tjera që të luftojnë Shtetin Islamik. Veç vendeve ku ISIS është i pranishëm, Trump ka thënë se në betejë duhet të përfshihen edhe Rusia dhe India.

Presidenti amerikan Donald Trump deklaroi të mërkurën se vende të tjera veç Shteteve të Bashkuara duhet ta luftojnë Shtetin Islamik, duke cituar Rusinë, Pakistanin dhe Irakun si shembuj.

“Në njëfarë pike, Rusia, Afganistani, Irani, Iraku dhe Turqia duhet të luftojnë luftën e tyre”, tha Trump nga Shtëpia e Bardhë, duke shtuar se edhe India duhet të përfshihet.

Sipas tij, të gjitha vendet ku ISIS është i pranishëm duhet të përfshihen në betejë.

“Shtetet e Bashkuara nuk duan të kalojnë 19 vjet të tjera duke luftuar në Afganistan”, deklaroi Trump.

Një ditë më parë, sekretari i Shtetit, Mike Pompeo deklaroi se militantët e Shtetit Islamik po rifitonin terren në disa zona, por shtoi se kapacitetet e grupit për të kryer sulme janë reduktuar në mënyrë të ndjeshme.

Po të martën, Departamenti i Shtetit ofroi një shpërblim prej 5 milionë dollarësh për çdo informacion që do të çonte në lokalizimin e liderëve të ISIS. Më herët gjatë vitit, forcat e mbështetura nga Shtetet e Bashkuara deklaruan rimarrjen e territorit të fundit të Shtetit Islamik në Siri.

Sidoqoftë, që atëherë janë ngritur shqetësime se grupi terrorist po forcohet sërish, përveç Sirisë edhe në Irak. Ndërkohë, në Afganistan, një marrëveshje e paqes mes talebanëve dhe Shteteve të Bashkuara për uljen e armëve mund t’i shtyjë guerrilasit afganë të bashkohen me ISIS, kanë paralajmëruar autoritetet në Kabul./ABC News Albania 24/7

alameti-1280x960.jpg
G. P.09:39 | 15/08/2019

Një gjyqtare në Shtetet e Bashkuara të Amerikës ka urdhëruar që një agjent i FBI-së të maskohet në kohën kur do të japë dëshminë ndaj Fabjan Alametit. Shqiptari u arrestua pasi akuzohet si mbështetës i ISIS dhe dyshohet se do të kryente sulme terroriste në Amerikë.

Ndërkohë prokurori federal kërkoi që seanca gjyqësore ku pritet të jepet dëshmia e agjentit të kryhej me dyer të mbyllura. Por Gjyqtarja Dana Christensen vendosi  të kundërtën. Ajo lejoi që agjenti të dalë i maskuar me paruke ose kapele, syze dhe qime false në fytyrë në mënyrë që t’i mbrohet identiteti.

FBI-ja pretendon se Alameti ka dashur të bashkohet me ISIS-in dhe donte të sulmonte civilë amerikanë në shenjë hakmarrjeje për sulmin në dy xhamitë në Christchurch të Zelandës së Re, ku u vranë 50 persona.

Ai u arrestua në Prill në një poligon armësh në Bozeman. Sipas hetuesve, shqiptari shkonte aty për të marrë armë dhe për t’u praktikuar me një pushkë gjysmë automatike. Alameti u kap pasi komunikoi me një agjent të infiltruar të FBI-së, të cilin e informoi për planet e tij për t’iu bashkuar ISIS dhe për të sulmuar në tokën amerikane./abcnews.al

kosove.jpg
G. P.09:05 | 02/08/2019

Koordinatori amerikan për kundërterrorizmin, ambasadori Nathan A. Tales, thotë se Kosova është një nga vendet e para në riatdhesimin e qytetarëve të vetë, që kanë luftuar për ISIS. Në një konferencë për shtyp, mbajtur të enjten (01.08) në Departamentin e Shtetit, ambasadori Tales tha:  “Sa i përket riatdhesimit dhe gjykimit të luftëtarëve të huaj ne kemi pasur disa suksese dhe duam që ato të shtohen. Vende si Kazakistani dhe Kosova kanë qenë në gjendje të riatdhesojnë dhjetra dhe në disa raste qindra luftëtarë dhe familjarë të tyre, kanë dënuar ata që kanë bërë krime dhe kanë dërguar në qendra rihabilitimi fëmijët dhe familjarët, të cilët marrin pjesë në programe çradikalizimi dhe integrimi”.

Duke përmendur Italinë, e cila ka thënë së fundmi se do të riatdhesojë një luftëtar të huaj, i cili do të gjykohet për vepër penale, ambasadori Tales kërkoi që më shumë vende perëndimore të bëjnë të njëjtën gjë. ”Çdo vend është i detyruar të zgjidhë problemin e qytetarëve të vet, që kanë shkuar për të luftuar për ISIS. Asnjë vend nuk duhet të presë që SHBA ose SDF, forcat demokratike siriane të zgjidhin këtë problem për ta. Ky është një problem që ka të bëjë me vendin ku janë radikalizuar më parë këta luftëtarë të huaj”, tha Tales.

ISIS i përhapur në gjithë botën

Ai theksoi se i ashtuquajturi ISIS Kalifat është shkatërruar, por lloje të tjera të ISIS vazhdojnë të jenë të gjalla në gjithë botën. Ai përmendi Afrikën dhe Azinë juglindore si shembuj ku shihen rreziqe për shembull në Nigeri, Egjipt dhe Sri Lanka e Afganistan.

Konferencën e shtypit Tales e mbajti së bashku me ambasadorin James Jeffrey, të dërguarin special për koalicionin botëror kundër ISIS, i cili foli për rezultatet e luftës kundër ISIS në Siri dhe Irak. Në Siri lufta kundër ISIS ka pasur sukses, por në pjesë të ndryshme të vendit ISIS vazhdon të jetë aktiv. Edhe në Irak ka grupe terroriste të lidhura me ISIS.

Çlirimi i disa zonave të Sirisë ka prodhuar një numër të madh luftëtarësh të huaj dhe terroristësh që mbahen në kampe. 70 mijë vetë mbahen në al Hawl. 60 mijë prej tyre janë sirianë dhe irakianë dhe 10 mijë janë nga vende të treta dhe i janë bashkuar 2 mijë luftëtarëve të huaj terroristë. “Aty ekziston problemi i radikalizimit. Ne duam që t’ i largojmë këta njerëz nga andej dhe t’i kthejmë tek komunitetet e tyre,” tha ambasadori Jeffrey.

SHBA ka riatdhesuar pesë të rritur, katër meshkuj dhe një femër, të cilët janë akuzuar për vepra penale të lidhura me terrorizmin dhe mbështetjen e ISIS. Një person është dënuar. Proceset e tjera nuk kanë përfunduar./DW

49561866_403.jpg
nev ila17:05 | 12/07/2019

Gjykata Administrative e Berlinit ka vendosur: Po, Gjermania duhet t’u mundësojë kthimin në shtëpi familjeve të luftëtarëve të të ashtuquajturit “Shteti Islamik”, IS. Vendimi nuk ka hyrë ende në fuqi.

Me vendimin e ditës së mërkurë, Ministrisë së Jashtme gjermane i kërkohet që të përcaktojë identitetin e tre fëmijëve në një kamp refugjatësh sirianë dhe më pas të marrë nënën dhe fëmijët e saj në Gjermani, u shpreh një zëdhënës i gjykatës gjermane në Berlin.

Ministria e Jashtme mund ta apelojë vendimin e gjykatës. Por në rast të tillë duhet të vendosë Gjykata e Lartë e Berlinit. “Vendimi i marrë në procedurë të përshpejtuar e që nuk ka hyrë në fuqi ka mbërritur tek Ministria e Jashtem dhe po veifikohet”, tha një zëdhënës i Ministrisë së Jashtme.

Ministria e Jashtme

Kërcënim për fëmijët

Në vendimin e gjykatës administrative thuhet, se nëna nga landi i Saksonisë së Poshtme dhe fëmijët e saj mund t’i referohen detyrimit të shtetit për të ofruar mbrojtje, i sanksionuar ky në kushtetutë. Gjendja në kamp është një kërcënim për jetën e fëmijëve. Ata kërcënohen nga “pasoja të rënda, të padurueshme dhe të pamundura për t’u mënjanuar”, nëse qëndrojnë në kamp, thuhet në vendimin e gjykatësve.

Televizionet NDR, WDR e “Süddeutsche Zeitung” raportuan që të mërkurën për vendimin e gjykatës. Sipas raportimit të këtyre mediave, fëmijët janë 8, 7 dhe afër dy vjeç. Ministria e Jashtme kishte argumentuar, se nuk shihte asnjë detyrim për të ndihmuar edhe nënën të kthehej nga Siria. Ministri i Punëve të Brendshme, Horst Seehofer ka deklaruar, se edhe fëmijët e të rinjtë përdoren për luftën e IS-it. Qeveria gjermane duhet të jetë për këtë arsye e kujdesshme në pranimin e pjesëtarëve të familjeve të tyre. Kjo edhe për arsye, sepse ka paqartësi në çështjet e nënshtetësisë.

Sipas mediave në kampet kurde në Siri ndodhen shumë luftëtarë gjermanë të IS-it gratë dhe fëmijët e tyre./DW

isis.jpg
G. P.18:53 | 31/05/2019

Lufta kundër Shtetit Islamik, përveç militantëve të grupit terrorist ka marrë jetën edhe të 1.300 civilëve në Siri dhe Irak. Ka qenë vetë koalicioni ndërkombëtar anti-ISIS që ka publikuar numrin e viktimave, ndërkohë që sipas grupeve të të drejtave të njeriut, bilanci është shumë më i lartë.

Koalicioni anti-ISIS i udhëhequr nga Shtetet e Bashkuara ka vrarë mbi 1 mijë e 300 civilë në Irak dhe Siri që prej vitit 2014. Lajmin e ka bërë të ditur vetë misioni ushtarak, që ka nënvizuar se civilët janë vrarë pa dashje në bombardimet kundër objektivave të Shtetit Islamik, të nisura 5 vjet më parë.

Koalicioni i udhëhequr nga Shtetet e Bashkuara hyri në veprim pasi militantët e ISIS morën nën kontroll pjesë dërrmuese territori si në Siri dhe në Irak. Organizata terroriste vendosi ligjin e saj brutal mbi miliona njerëz që ranë nën kontrollin e saj dhe organizoi sulme të shumta vdekjeprurëse në mbarë botën.

Shifra e fundit e publikuar nga koalicioni është pak më e lartë se ajo e publikuar 8 muaj më parë, kur kuota e civilëve të vdekur ishte 1 mijë e 100. Në deklaratën për shtyp thuhet se po verifikohet ndërkohë vdekja e 111 personave të tjerë.

Sidoqoftë, të dhënat bien ndesh me ato të grupeve për të drejtat e njeriut, të cilat pretendojnë se numri i viktimave është shumë më i lartë. Një grup monitorimi me bazë në Mbretërinë e Bashkuar ka deklaruar se bilanci real është 13 mijë civilë të vrarë.

Edhe organizata Amnesti International ka akuzuar koalicionin e udhëhequr nga SHBA se mohon vazhdimisht shkallën reale të dëmeve në njerëz./ABC News Albania 24/7

baghdadi.jpg
G. P.14:48 | 30/04/2019

Regjistrimi video i kreut të ISIS Al Baghdadi, i publikuar një ditë më parë po analizohet për të konfirmuar origjinalitetin e tij.

Një zëdhënës i Departamentit Amerikan të Shtetit konfirmoi lajmin dhe shtoi  se koalicioni i udhëhequr nga Shtetet e Bashkuara është i vendosur që “liderët e mbetur të ISIS-it t’i dorëzohen drejtësisë dhe të marrin atë që meritojnë”.

Agjencia Qendrore e Inteligjencës (CIA) ende nuk ka bërë komente lidhur me këtë rast. Ndërkohë, zëdhënësi e Pentagonit, Sean Robertson, tha se SHBA po vazhdon mbështetjen ndaj partnerëve në misionin e tyre për të siguruar mposhtjen e ISIS.

Paraqitja e fundit publike e Baghdadit ka qenë në vitin 2014 nga xhamia Al-Nuri në Mosul të Irakut./abcnews.al

xbh101-ap-2.jpg
Sej rie22:51 | 29/04/2019

Është shfaqur pas 5 vjet mungesë lideri i Shtetit Islamik, Abu Bakër al Bagdadi. Në një video të transmetuar në rrjetin informativ të ISIS, kreu i grupit terrorist bën thirrje për hakmarrje për territoret e humbura.

Personi që dyshohet të jetë lideri i Shtetit Islamik ka bërë një shfaqje të rrallë në një video, ku betohet se do të kërkojë hakmarrje për humbjen e territorit. Abu Bakër Al Bagdadi nuk shfaqej që prejj vitit 2014, kur nga qyteti i Mosulit shpalli krijimin e Kalifatit në disa pjesë të Sirisë dhe Irakut. Në videon e re, ai pranon disfatën në Baguz, bastioni i fundit i grupit terrorist në rajon. Ende nuk është e qartë se kur është regjistruar videoja, por ISIS bën me dije se ajo është realizuar në prill. Pamjet janë postuar në rrjetin mediatik të organizatës, Al Furkan.

Përveç se pranon rënien në Baguz, Al Bagdadi flet gjithashtu për të dielën e Pashkës në Sri Lanka, si dhe zotohet për forcimin e aleancave me milicitë në Mali dhe vende të tjera afrikane. Megjithatë, imazhi i liderit të ISIS zhduket nga fundi i videos dhe një material audio për sulmet në Sri Lanka luhet përgjatë materialit të mbetur me ekran të bardhë, gjë që sipas ekspertëve tregon se kjo pjesë është regjistruar pas videos kryesore. Në materialin filmik, Al Bagdadi flet edhe për protestat në Sudan dhe Algjeri, duke thënë se xhihadi është e vetmja zgjidhje ndaj tiranëve. Në të dyja vendet liderët afatgjatë u rrëzuan nga pushteti këtë muaj./abcnews.al

1539AEFF-1FCE-4E38-8689-CC00F554644B_w1597_n_r1_st-1280x720.jpg
nev ila09:40 | 20/04/2019

Janë rikthyer në orët e para të së shtunës me dhjetëra gra dhe fëmijë të xhihadistëve kosovarë në Siri. Dhe pse nuk dihet nëse mes  tyre ka ish-luftëtarë, mediat kosovare raportojnë se mes 150 të kthyerve, katër persona konsiderohen të rrezikshmërisë së lartë.

Me dhjetëra gra dhe fëmijë, të afërm të xhihadistëve kosovarë që luftonin në Siri, janë rikthyer në Kosovë nën masa të rrepta sigurie. Ndërkohë që mediat kosovare raportojnë se katër nga të kthyerit konsiderohen persona me rrezikshmëri të lartë.

Ministri kosovar i drejtësisë, Tahiri konfirmoi për mediat se operacioni për rikthimin e tyre në vend nga Siria kishte përfunduar me sukses në orët e para të së shtunës. Pas disa orësh në aeroport, dy autobusa ku ndodheshin fëmijë dhe gra, u transportuan nën shoqërimin e policisë në Baraka ushtarake në periferi të Prishtinës.

Më shumë se 300 shtetas kosovarë, burra, gra dhe fëmijë kanë udhëtuar në Siri që nga viti 2012. Rreth 70 burra kanë mbetur të vrarë duke luftuar në krah të militantëve ekstremistë.

Policia e Kosovës bëri të ditur se rreth 150 gra dhe fëmijë, përfshirë dhe 60 fëmijë që kishin lindur në zonat e luftës, ishin kapur pasi i ashtuquajturi shteti islamik kishte humbur kontrollin në zonën ku ata jetonin.

Është ende e paqartë nëse janë kthyer të gjithë, ndërkohë që as ministria e drejtësisë dhe as policia e Kosovës nuk dhanë detaje nëse në mesin e të rikthyerve kishte dhe ndonjë ish-luftëtar.

Agjencitë vendore dhe ndërkombëtare të sigurisë, edhe më parë kanë paralajmëruar për rrezikun që vjen nga ish luftëtarët që rikthehen në vendet e lindjes. Në vitin 2015 në Kosovë, u miratua ligji sipas të cilit, ata që luftojnë në konflikte jashtë vendit mund të dënohen deri në 15 vjet burg.

Nuk ka pasur asnjëherë ndonjë incident që lidhet me terrorizmin islamik në Kosovë, dhe pse më shumë se 100 burra janë burgosur apo arrestuar me akuzën se kanë luftuar në Siri dhe Irak. Disa prej tyre janë shpallur fajtor për planifikimin e sulmeve në Kosovë.

Qeveria e Kosovës më parë është shprehur se një formë e islamit radikal është importuar në Kosovë nga organizata jo qeveritare nga lindja e mesme në periudhën 1998 – 1999./abcnews.al

syria.jpg
nev ila13:03 | 18/04/2019

Balkan Insight ka identifikuar të paktën 85 fëmijë të lindur nga gratë me kombësi shqiptare që janë nga Shqipëria, Kosova dhe Maqedonia e Veriut të cilët, ndodhen në një kamp, të drejtuar nga kurdët në Siri, nën kontrollin e shtetit islamik.

Lavdrim Muhaxheri, një luftëtar i njohur i Shtetit Islamik nga Kosova, i cili e deklaroi veten si komandant i shqiptarëve që luftonin për grupin militant në Siri dhe Irak, u shpall i vdekur në mes të vitit 2017.

Sipas investigimit të Balkan Insight, fëmijët e tij të lindur në Siri nga martesa me një grua shqiptare nga Tirana, po jetojnë në një kamp të drejtuar nga kurdët, në Veri-lindje të Sirisë.

Të dy fëmijët e Muhaxherit, gjenden në mesin e gjithsej 85 fëmijëve, në kampin ‘Al Hol’ të grave me etni shqiptare të cilat janë nga Shqipëria, Kosova dhe Maqedonia Veriore. Ato janë identifikuar nga Balkan Insight.

Sipas listave emërore që ka siguruar Balkan Insight, të paktën 27 prej këtyre fëmijëve kanë lindur në Siri. Shumë prej tyre kanë humbur të paktën një prind. Ndërsa tre fëmijë të lindur nga një grua kosovare raportohet se kanë vdekur bashkë me nënën e tyre.

Aktualisht, një grup prej 108 gra dhe fëmijë nga Shqipëria, Kosova dhe Maqedonia e Veriut, duan të kthehen në Ballkan nga kampi “Al Hol”. Ndërkohë ekzistojnë edhe një numër tjetër më i vogël, i familjeve me etni shqiptare, në dy kampe të tjera në Siri.

Sipas një studimi të vitit 2017 nga Qendra Soufan me seli në Nju Jork, (një organizëm hulumtues i përqendruar në sigurinë globale), rreth 90 persona që ishin nga Shqipëria, 138 nga Kosova dhe rreth 140 nga Maqedonia Veriore, ndodheshin ende në Shtetin Islamik.

Kalifati mund të jetë rrëzuar, por rruga e shtëpisë për këto gra dhe fëmijë duket më e ndërlikuar sesa mund ta kishin imagjinuar. Autoritetet në të tre vendet e Ballkanit, nuk kanë ende një plan, se si këta persona të mund të riatdhesohen.

Kampi “Al Hol” ndodhet në provincën siriane të el-Hasakah. Sipas Kombeve të Bashkuara, aktualisht ka rreth 73,000 njerëz të strehuar aty.

Sipas Zyrës së OKB-së për Koordinimin e Çështjeve Humanitare, rreth 65 % e njerëzve në kamp, janë fëmijë nën moshën 18 vjeç. Rreth 27 % e totalit janë gra.

Refugjatët e zhvendosur brenda vendit dhe refugjatët irakianë përbëjnë shumicën e madhe, por 15 % e tyre janë nga të ashtuquajturat shtetas të vendeve të treta.

Kosova – Gjithsej 48 – 38 fëmijë dhe 10 gra (Të paktën 14 fëmijë kanë lindur në Siri)

Shqipëria – Gjithsej 52 – 41 fëmijë dhe 11 gra (Trembëdhjetë fëmijë kanë lindur në Siri)

Maqedonia Veriore – Gjithsej 8 – gjashtë fëmijë dhe dy gra

Gjithsej – 108 njerëz nga të 3 vendet

Shumë nga gratë shqiptare dhe fëmijët e tyre janë të dëshpëruar për t’u kthyer në shtëpi.

Ata na kanë nën mbikëqyrje dhe jemi të rrethuar nga tela dhe ushtarë. Nuk mund të flas shpesh, por ju lutemi flisni me shtetin tonë që të vijnë dhe të na marrin “, dëgjohet një fëmijë duke qarë, në një incizim audio të dëgjuar nga Balkan Insight ndërsa i tregon një të afërmi në Shqipëri.

Elodie Schindler, një zëdhënëse për Evropën dhe Azinë Qendrore në Komitetin Ndërkombëtar të Kryqit të Kuq, ICRC, tha se gratë dhe fëmijët në kampe kërkonin mbrojtje të veçantë.

Shindler tha se shumë fëmijë ishin pa shtetësi zyrtare, nuk kishin qasje në shkollim dhe ishin të prekshëm nga abuzimet dhe sëmundjet.

Fëmijët në këtë histori meritojnë humanizmin tonë, jo urrejtjen tonë. Këta fëmijë janë viktima që nuk duhet të ndëshkohen për mëkatet e prindërve të tyre … Shumë prej tyre nuk kanë ushqim të mjaftueshëm. Ata duhet të trajtohen më mirë “, tha Schindler për Balkan Insight.

Balkan Insight i kërkoi Ministrive të Brendshme të Shqipërisë, Kosovës dhe Maqedonisë Veriore nëse ata kishin identifikuar dhe kontaktuar qytetarët e tyre në këto kampe, por Ministria e Brendshme shqiptare nuk u përgjigj. Kosova nuk pranoi të komentojë, ndërsa Ministria e Brendshme e Maqedonisë Veriore tha se kishte identifikuar 4 gra maqedonase dhe shtatë fëmijët e tyre.

“Ata kanë vendosur kontakte me qëllim të marrjes së dokumenteve dhe lehtësimin e transportit nga Siria në Maqedoninë Veriore“, tha një zëdhënës i ministrisë.

Kjo ministri tha se nuk kishte juridiksion për të lehtësuar kthimin e tyre nga Siria dhe nuk specifikoi nëse ndonjë institucion tjetër shtetëror po merrej me çështjen.

Ai tha se që nga fillimi i konfliktit, në vitin 2011, rreth 80 shtetas maqedonas që ishin pjesë e shtetit islamik ishin kthyer në shtëpi, duke përfshirë një grua dhe një fëmijë.

Në Kosovë, Bedri Elezi, Drejtor i Studimeve të Sigurisë në Institutin e Kosovës për Studime Ndërkombëtare, tha se vendi e kishte lënë pas dore këtë çështje.

Elezi tha për Balkan Insight, se në shtator 2017, Instituti i tij kontaktoi me gjashtë gra dhe 21 fëmijë në Siri, të cilët dëshironin të ktheheshin në Kosovë, por se nuk ishte në gjendje të lehtësonte një marrëveshje me autoritetet e Kosovës për t’i kthyer ata.

Grupi qëndroi për një muaj pranë kufirit turk, duke pritur miratimin e autoriteteve të Kosovës për t’u kthyer, ne kontaktuam me ministrin e jashtëm, zyrën e kryeministrit, presidentin, kryetarin e parlamentit, por ata nuk arritën një zgjidhje,” tha ai.

KNKK, tha Schindler, inkurajon shtetet për të balancuar çështjet e sigurisë dhe llogaridhënies me nevojën për t’i trajtuar njerëzit në mënyrë humane.

Vendet e origjinës nuk mund të kthejnë shpinën“, tha ajo. Përktheu nga Balkan Insight, Abc News.

notre-dame-10-1280x853.jpg
nev ila10:05 | 17/04/2019

Përkrahësit e ISIS kanë festuar për shkatërrimin nga zjarri të katedrales 850 vjeçare, Notre Dame, vetëm disa ditë përpara Pashkëve. Ata e kanë quajtur zjarrin shkatërrues, si “Hakmarrje dhe ndëshkim”, raportojnë ekspertët e inteligjencës së anti-terrorit sipas të  përditshmes Daily Mail.

Sipas Ekspertëve të Studimit të Analizës së Terrorizmit, një poster i katedrales së përfshirë nga flakët u shfaq në internet shoqëruar me fjalët “Ditën e mirë“.

Ky poster, sipas ekspertëve, është  krijuar nga grupi i Al-Muntasir i lidhur me ISIS.

Në poster thuhet:

Ndërtimi i saj filloi në vitin 1163 dhe përfundoi në 1345. Është koha për t’i thënë lamtumirë, oratorisë tuaj politeiste”.

Zyra e prokurorit të Parisit ka përjashtuar për momentin, pistën e hetimit të zjarrvënies së qëllimshme apo trajtimin e çështjes si akt terrorist dhe thotë se, po e trajtojnë shkakun e zjarrit në Notre Dame, si një aksident.

Kjo nuk është hera e parë që organizata mediatike Al-Munatsir ka festuar për sulmet terroriste që kanë tronditur Francën përgjatë ketyre viteve./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono