irlanda e veriut

brexit.jpg
G. P.16:59 | 17/10/2019

Pas lajmit për arritjen e marrëveshjes mes Londrës dhe Brukselit për Brexit, në media qarkullojnë detajet e tekstit. Ndërkohë që unionistët e Irlandës së veriut deklarojnë se nuk do ta mbështesin kur të vijë radha e votimit në parlamentin britanik.

Sipas të dhënave të publikuara nga mediat, në marrëveshjen e arritur për Brexit mes Londrës dhe Brukselit, parashikohet se formalisht Irlanda e Veriut nuk do të jetë në unionin doganor me Mbretërinë e Bashkuar, por faktikisht për të paktën dhjetë vjet do të jetë pjesë e tregut të përbashkët europian.

Nuk do të ketë një kufi të ashpër mes dy Irlandave!

Irlanda e veriut do të zbatojë disa rregulla tregtare europiane, ndërsa autoritetet britanike do të vëzhgojnë rregullat doganore që do të aplikohen. Irlanda e veriut do të qëndrojë në unionin doganor britanik por do të jetë një pikë hyrëse në tregun e përbashkët të Bashkimit Europian. Autoritetet britanike mund të aplikojnë tarifa nëse nuk do të hyjnë më në tregun e përbashkët.

Çdo katër vjet përfaqësuesit e Irlandës së veriut mund të vendosin me mazhorancë të thjeshtë nëse do të vazhdojnë të aplikojnë rregullat europiane ose jo.

Por partia unioniste e Irlandës së Veriut, bëri të qartë me anë të një deklarate për mediat se nuk do të mbështesë këtë marrëveshje. Dyshimet kanë të bëjnë me regjimin doganor dhe me mungesën e qartësisë për taksat.

Unionistët mendojnë se kjo marrëveshja është vetëm hapi i parë i braktisjes progressive nga ana e Londrës. Një zyrtar i Bashkimit Europian bëri të qarë se gjatë Këshillit Europian nuk do të ketë negociata të tjera për Brexit.

Pa mbështetjen e deputetëve të Irlandës së Veriut është shumë e vështirë që kjo marrëveshje të miratohet në parlamentin britanik.

Dhe lideri i opozitës Corbin shprehu qartë kundërshtimin e tij për marrëveshjen duke thënë se Johnson kishte negociuar një marrëveshje dhe më të keqe se ajo e paraardhëses së tij May.

Duke shtuar se marrëveshja duhej refuzuar pasi është një shitje e vendit, Korbin theksoi se mënyra më e mirë për të zgjidhur çështjen e Brexit ishte dhënia e një mundësie të re që britanikët të shprehin vullnetin me votë./ABC News Albania

image.jpg
G. P.11:24 | 17/10/2019

Edhe nëse arrihet një marrëveshje mes qeverisë britanike të kryeministrit Johnson dhe komisionit të Bashkimit Europian, marrëveshja vështirë se do të ratifikohet nga parlamenti britanik. Kjo për arsyen se partia nacionaliste e Irlandës së Veriut bëri të qartë se nuk do të mbështeste asnjë marrëveshje.

Liderja e partisë unioniste demokrate, të nacionalistëve të Irlandës së Veriut, Arlen Foster, dhe zëvendësi i saj Najgel Dods, bënë të ditur se nuk do të mbështesin marrëveshjen për Brexit mbi të cilën po punojnë qeveria e kryeministrit britanik Boris Johnson dhe Komisioni i BE-së. Pa mbështetjen e kësaj partie është e vështirë që parlamenti britanik të ratifikojë çfarëdo marrëveshje.

Me anë të një mesazhi të përbashkët në Twitter ata shkruajnë se në situatën aktuale nuk mund të mbështesin atë që sugjerohet për sa i përket çështjeve doganore. Më tej shtohet se do të vazhdojë puna me qeverinë në përpjekje për të arritur një marrëveshje të arsyeshme e cila funksionon për Irlandën e veriut si dhe mbron integritetin ekonomik dhe kushtetues të Mbretërisë së Bashkuar.

Kancelarja gjermane Merkel nga ana e saj u shpreh se ende nuk janë pranë një marrëveshjeje. Ajo iu referua negociatave për Brexit, gjatë fjalës në parlamentin gjerman. Merkel theksoi se kohët e fundit kishte pasur lëvizje përpara, por marrëveshja është ende larg./ABC News Albania

brexit-1.jpg
G. P.19:34 | 20/09/2019

Bashkimi Europian dhe Britania kanë zbutur qëndrimet në lidhje me Brexit. Pas një vizite të zhvilluar në Bruksel, negociatori britanik ka deklaruar se palët ndajnë të njëjtin qëllim për arritjen e një marrëveshjeje.

Sekretari britanik për çështjen e Brexit, Stephen Barclay ka deklaruar se Mbretëria e Bashkuar dhe Bashkimi Europian ndajnë të njëjtin qëllim sa i takon arritjes së një marrëveshjeje. Deklarata ka ardhur pas një takimi të zhvilluar në Bruksel me negociatorin e BE-së, Mishel Barnier.

Barclay tha se me Barnier kishte patur bisedime serioze e të detajuara dhe se gjërat tashmë po ecin përpara. Nga ana e tij, negociatori europian e cilësoi takimin si “miqësor”, por shtoi se shumë punë mbeten për t’u bërë në ditët e ardhshme.

Data për daljen e Britanisë së Madhe nga Unioni është caktuar për më 31 Tetor. Të enjten, presidenti i Komisionit Europian, Jean Claude Juncker tha se deri atëherë mund të arrihet një marrëveshje e re për Brexit.

Edhe kryeministri Boris Johnson vlerësoi se në bisedime e sipër është arritur progres, por shtoi se nuk duhet ekzagjeruar. Por ministri i Jashtëm irlandez Simon Coveney tha të premten për BBC se mes Londrës dhe Brukselit ka një hendek të madh, pasi europianët kërkojnë ende propozime konkrete nga pala britanike.

Çështja e kufirit të Irlandës së Veriut mbetet sfida kryesore në kontestin BE-Britani. Ajo ishte një nga pikat që pengoi marrëveshjen e arritur nga ish-kryeministrja Theresa May të miratohej në Parlament./ABC News Albania 24/7

germany-1280x713.jpg
G. P.14:53 | 09/09/2019

Gjermania rrezikon të mos shkojë në finalet e Europianit nëse dështon sonte në fushën e Irlandës së Veriut. Skuadra e Joakim Lëvit është nën presion, pas hapit të gabuar ndaj Holandës.

Ndodhi kjo humbje dhe gjithçka ndryshoi për keq. Pas hapit të gabuar ndaj Holandës, Gjermania rrezikon të mos shkojë në fazën finale të Europianit të vitit 2020, nëse pëson disfatë edhe sonte në fushën e Irlandës së Veriut.

Ish-kampionët e botës mbërritën në kryeqytetin Belfast me kokën ulur, nëse mund të themi kështu, të ndërgjegjshëm se aktualisht nuk janë superfuqia e dikurshme. Trajneri Joakim Lëv është nën presion, që pas dështimit në Kupën e Botës dhe në Ligën e Kombeve, dhe një tjetër arritje negative mund të ishte fatale për stolin e tij.

Gjermania do të ketë sërish mungesa pasi Leroi Sane mbetet i dëmtuar, po ashtu siç janë Ilkai Gyndogan, Marko Rojs dhe Niko Shulc.

“Jam i bindur se futbollistët e mi do të reagojnë pas humbjes me Holandën, – deklaroi Lëvi, –  pavarësisht mungesave dhe problemeve, nga ne sot pritet rezultat pozitiv. Edhe barazimi do të ishte mirë, por ne duhet të luajmë gjithnjë vetëm për fitore”.

Irlanda e Veriut është optimiste, pasi i ka fituar të katër ndeshjet në grup deri tani, duke qenë 3 pikë mbi gjermanët. Vendasit kanë bilanc negativ ndaj teutonëve, por nuk harrohen dy fitoret 1-0 kundër tyre në eliminatoret e Euro 1984, kur Gjermania Perëndimore u shpëtua nga fitorja ndaj Shqipërisë në fushën e saj, 2-1 në minutat e fundit./ABC News Albania 24/7

bombe.jpg
G. P.21:45 | 19/08/2019

Një bombë ka shpërthyer të hënën në kufirin e Irlandës së Veriut. Ndonëse nuk kanë prova konkrete, autoritetet vendase dyshojnë se atentati ka lidhje me daljen e Britanisë nga BE-ja dhe çështjen e kufirit irlandez. Ndërkohë, dyshimet bien mbi dy lëvizje nacionaliste irlandeze, vazhduese të grupit famëkeq IRA.

Një pajisje me eksploziv shpërtheu të hënën në Irlandën e Veriut, në afërsi të kufirit me Irlandën, një episod të cilin policia vendase e cilësoi një përpjekje për të vrarë oficerët e policisë.

Asnjë grup nuk mori përsipër përgjegjësinë e shpërthimit, që ndodhi pranë një vendi ku agjentët e policisë po hetonin një incident të mëparshëm. Në muajt e fundit në Irlandën e Veriut ka patur një rritje të sulmeve ndaj policisë, të marra përsipër nga grupe që kundërshtojnë sundimin britanik dhe marrëveshjen e paqes të vitit 1998, që i dha fund tre dekadave dhunë.

Policia në të dyja anët e kufirit druhet se do të ketë atentate të tjera nëse pas daljes së Britanisë nga BE-ja në zonë rikthehen pikat e kontrollit kufitar. Autoritetet vendase deklaruan se për momentin nuk kanë të dhëna konkrete se kush mund të fshihet pas sulmit, por nuk e konsiderojnë rastësi që ai të ndodhë kur Mbretëria e Bashkuar po bëhet gati të largohet nga Unioni Europian.

Kryeministri Boris Xhonson ka deklaruar se Breksit do të realizohet më 31 tetor dhe kufiri mes Irlandës së Veriut dhe Irlandës, që do të bëhet kufiri i vetëm tokësor brenda BE-së, mbetet pika më e nxehtë e negociatave.

Lidhur me atentatin, policia dyshon se ai mban firmën e dy grupeve të vogla nacionaliste irlandeze, IRA e Re dhe Vazhdimi i IRA-s, të cilat kanë marrë përsipër përgjegjësinë për sulme të mëparshme./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono