iran

723401-rouhanihassan-reuters-021518-1280x720.jpg
G. P.13:47 | 21/05/2019

Sipas presidentit të Iranit, Hasan Rouhani, aktualisht është e pamundur që të ketë diplomaci me Shtetet e Bashkuara të Amerikës. Ai ka kërkuar më shumë pushtet për qeverinë në Teheran, në mënyrë që të përballet me këtë luftë ekonomike që po i bëhet vendit.

Përshkrimi i rrugës së diplomacisë me administratën Trump nuk është e mundur. Është kjo deklarata e presidentit Iranian Hassan Rouhani, duke shpjeguar se ai e mbështet dialogun dhe diplomacinë, por rrethanat aktuale nuk janë të përshtatshme për dialog dhe zgjedhja e vetme që i mbetet Teheranit është rezistenca ndaj Shteteve të Bashkuara të Amerikës

Duke kritikuar SHBA-të për luftën ekonomike që po i bën Iranit, Rouhani gjithsesi theksoi se nuk do të jetë Teherani që do të bëjë lëvizjen e parë ushtarake. Ai premtoi ndër të tjera se nuk ka ndërmend të kalojë në histori si presidenti që shkaktoi një konflikt.

Presidenti iranian theksoi se nëse vendi i tij do të kishte dalë nga marrëveshja për programin bërthamor i 2015-s, si pasojë e provokimeve të SHBA-së, atëherë përveç Uashingtonit dhe Kombet e Bashkuara e pjesa tjetër e botës do të kishin vendosur sanksione ndaj vendit.

Sipas tij, ndër të tjera për t’u përballur me luftën ekonomike të nisur nga Shtetet e Bashkuara kundër Iranit, qeveria ka nevojë për më shumë pushtet, si ai që iu dha Këshillit të Lartë të Luftës, i cili u krijua gjatë konfliktit me Irakun në vitet ’80.

Republika islamike, sipas Rouhanit po përballet me vështirësi shumë të mëdha në sektorin bankar dhe në shitjen e naftës. E për këtë arsye sot qeveria iraniane ka nevojë për më shumë pushtet./ABC News Albania 24/7

steinitz.jpg
G. P.21:40 | 12/05/2019

Përplasja mes Shteteve të Bashkuara dhe Iranit për shkak të programit bërthamor të Republikës Islamike ka shqetësuar Izraelin. Ndryshe nga më parë, shteti hebre ka thyer heshtjen duke dhënë alarmin se Teherani mund ta sulmojë nëse tensionet mes dy palëve thellohen më tej.

Qeveria izraelite paralajmëroi të dielën se Izraeli rrezikon të sulmohet nga Irani nëse përballja mes Teheranit dhe Uashingtonit përshkallëzohet më tej. Shtetet e Bashkuara kanë rritur presionin ekonomik dhe ushtarak ndaj Iranit, me presidentin Donald Trump që të enjten u bëri thirrje liderëve të vendit që të ulen me të në tryezë, në të kundërt ai nuk do ta përjashtojë opsionin ushtarak.

Qeveria e kryeministrit Beniamin Netanjahu, që mbështet taktikën e ashpër të Trump ndaj armikut të tij, në përgjithësi ka qenë fjalëpakë në lidhje me spiralen e tensioneve në të cilën janë përfshirë dy vendet. Por duke thyer heshtjen, ministri izraelit i Energjitikës, Juval Shtajnic deklaroi se temperaturat në zonën e Gjirit po rriten gjithnjë e më shumë.

“Nëse do të ketë ndonjë shkëmbim zjarri mes Shteteve të Bashkuara dhe Iranit dhe fqinjëve të tij, personalisht nuk e përjashtoj mundësinë që ata të aktivizojnë lëvizjen Hezbollah dhe Xhihadin Islamik nga Gaza, ose të qëllojnë raketa nga Irani ndaj Izraelit”, deklaroi Shtajnic.

Hezbollah dhe Xhihadi Islamik janë dy grupe guerrilase të financuara nga Irani që veprojnë në kufijtë e Izraelit, ndërsa më parë kanë vepruar edhe në Siri, Liban dhe Palestinë. Ndërkohë, ushtria izraelite refuzoi të komentonte kur u pyet nga agjencia e lajmeve “Reuters” nëse po përgatitet për sulme të mundshme nga Republika Islamike./ABC News Albania 24/7

iran-dhe-shba.jpg
G. P.09:00 | 27/03/2019

Administrata amerikane ka vendosur sanksione të reja ndaj Iranit, duke goditur këtë herë një rrjet individësh dhe kompanish, përgjegjës për transferta ilegale parash për të mbështetur trupat ushtarake elitë të Republikës Islamike.

Shtetet e Bashkuara vendosën të martën sanksione të reja në dëm të Iranit, duke vepruar ndaj një rrjeti kompanish dhe individësh në Iran, Turqi dhe Emiratet e Bashkuara Arabe. Subjektet në fjalë konsiderohen përgjegjës për transferimin e miliarda dollarëve dhe eurove në mbështetje të Gardës Revolucionare Iraniane.

Departamenti amerikan i Thesarit ka deklaruar se, në tërësi ka futur në listën e zezë 25 persona dhe ente, përfshirë këtu kompani që shërbenin si mbulim dhe me bazë në të tre vendet. Institucionet e sanksionuara, të lidhura me Gardën dhe Ministrinë iraniane të Mbrojtjes, përfshijnë banka dhe grupe të tjera financiare mes të cilave Ansar Benk, Atlas Iksçejnxh dhe Iranian Atlas Kompani.

“Po vëmë në shënjestër një rrjet të gjerë kompanish fiktive dhe një numër individësh për të çrrënjosur një skemë që regjimi iranian e ka përdorur për të lëvizur në mënyrë ilegale mbi 1 miliard dollarë”, ka deklaruar sekretari i Thesarit, Stiven Mnushin.

Sanksionet synojnë të bllokojnë kompanitë e sipërpërmendura dhe t’i mbajnë ato jashtë sistemit financiar global, duke ndaluar njëkohësisht shtetas dhe biznese amerikane, si dhe banka ndërkombëtare me filiale në Amerikë, që të bëjnë biznes me to./abcnews.al

plane.jpg
G. P.10:54 | 14/01/2019

15 viktima është bilanci i një aksidentit ajror në Iran ku një avion kargo ka ngatërruar pistën e uljes dhe është përplasur me murin e një ndërtese. Nga aksidenti ka mundur të shpëtojë vetëm mekaniku i avionit.

Një avion kargo i kompanisë ajrore të Kirgistanit me 16 persona në bord u përplas mëngjesin e të hënës në aeroportin e Fat’h, pranë kryeqytetit Iranian, Teheran. Lajmi u konfirmua nga mediat vendase të cilat theksojnë se avioni i përplasur, një Boeing 707, ishte nisur nga Bishkek, kryeqytet i Kirgistanit. Sipas informacioneve të para, avioni është përplasur gjatë uljes dhe piloti ka pasur vështirësi të ulej, ndërkohë që në zonë kishte një stuhi të fortë.

Burime të aeroportit sqaruan se avioni u përplas me murin e një ndërtese pasi piloti ngatërroi pistën. Skuadrat e shpëtimit kanë kërkuar viktimat mes asaj që kishte mbetur nga avioni. Deri tani janë nxjerrë shtatë trupa të pajetë. Duke marrë në konsideratë se në bord ishin 16 persona dhe vetëm mekaniku ka arritur të shpëtojë, numri viktimave është 15./abcnews.al

70853Bashkimi.jpg
G. P.19:27 | 08/01/2019

Një njësi e Ministrisë iraniane të Inteligjincës si dhe dy persona nga stafi i saj janë vendosur në listën e terrorizmit nga ana e Bashkimit Europian. Teherani zyratar reagoi se ky veprim synon të dëmtojë marrëdhëniet e vendit me Brukselin.

Bashkimi Europian ka vendosur një njësi të Ministrisë iraniane të Inteligjencës dhe dy persona nga stafi i saj në listën e terrorizmit të BE-së për tentativa vrasjesh në Europë. Lajmi është konfirmuar nga Ministria e Jashtme daneze dhe diplomatët e BE-së. Ky vendim, i cili ngrin brenda bllokut asetet financiare që i përkasin kësaj njësie dhe dy personave, vjen pasi një vit më parë, Danimarka deklaroi se dyshonte që një shërbim i inteligjencës së qeverisë iraniane kishte kryer një tentativë vrasjeje në tokën daneze. Nga ana e saj, Franca këmbëngul se nuk ka dyshim që Ministria iraniane e Inteligjencës qëndronte prapa një sulmi të dështuar në Paris. Por Irani mohon çdo përfshirje në këto komplote të supozuara, duke thënë se këto akuza kanë për qëllim të dëmtojnë marrëdhëniet BE-Iran.

“BE sapo ka rënë dakord që të vendosë sanksione kundër një Shërbimi iranian të Inteligjencës për shkak të komploteve të tij për vrasje në tokën europiane. Një sinjal i fuqishëm nga BE që nuk do ta pranojmë një sjellje të tillë në Europë” shkruan në Twitter, Ministri i Jashtëm i Danimarkës, Anders Samuelsen.

Vendimi u mor pa debat në një mbledhje, e cila nuk kishte lidhje me këtë gjë, të ministrave të Europës në Bruksel dhe ngrirja e aseteve hyn në fuqi të mërkurën, sipas zyrtarëve të BE-së. Ministria e Jashtme daneze i ka identifikuar dy punonjësit si zëvendësministri dhe Drejtori i Përgjithshëm i Inteligjencës, Saeid Hashemi Moghadam dhe Assadollah Asadi, një diplomat me bazë në Vienë. Emrat e tyre do të shfaqen zyrtarisht në Revistën Zyrtare të BE-së të mërkurën. Ky veprim është një vazhdim i përpjekjeve nga Danimarka dhe Franca për të krijuar një përgjigje nga e gjithë BE-ja ndaj akuzimeve të komploteve iraniane në Francë e Danimarkë nga fundi i vitit të shkuar./abcnews.al

MEDIAT-PER-AMBASADORIN.mpg_snapshot_00.01-1280x720.jpg
G. P.15:20 | 20/12/2018

Mediat ndërkombëtare kanë pasqyruar lajmin për dëbimin e ambasadorit iranian dhe të një diplomati tjetër nga Shqipëria me akuzën se rrezikonin sigurinë në vend.

E përditshmja franceze “Le Figaro” raportoi gjatë ditës për lajmin e dëbimit të ambasadorit Iranian nga Shqipëria dhe të një diplomati tjetër, për të cilët u hodhën akuzat se rrezikojnë sigurinë kombëtare. Por Ministria e Punëve të Jashtme të Shqipërisë nuk saktëson identitetin e tyre dhe as datën e saktë të dëbimit.
Shtetet e Bashkuara të Amerikës përgëzojnë Shqipërinë për dëbimin e ambasadorit iranian shkruan “Deutsche Velle”. Tirana dëbon dy diplomatë iranianë pasi shkelën statusin e tyre diplomatik. Të dyja vendet kanë marrëdhënie jo të mira që nga momenti kur Shqipëria pranoi të strehonte me mijëra anëtarë të opozitës iraniane në vitin 2016.

“Radio Evropa e Lirë” në pasqyrimin e lajmit shkruan se me anë të një deklarate për mediat, Ministria e Jashtme shqiptare konfirmoi dhe për “Associated Press” se dëbimet u vendosën pasi bisedimeve dhe me vendet e tjera përfshirë dhe Izraelin. Agjencia e lajmeve “Reuters” përqendrohet në reagimin e Teheranit për këtë vendim. Me anë të një deklarate për mediat Irani i kërkon Shqipërisë të respektojë pavarësinë e saj dhe të mos bjerë pre e presionit amerikan dhe izraelit. “Uashington Post” shkruan ndër të tjera se diplomatët iranianë u dëbuan për arsye sigurie./abcnews.al

femra.png
G. P.22:46 | 10/11/2018

Autoritetet iraniane kanë vendosur të zbusin rregullat arkaike që u ndalonin grave të ndiqnin ndeshjet e futbollit. Këtë herë qindra tifozeve femra u është lejuar hyrja në stadium për finalen e Ligës së Kampioneve Aziatike, e luajtur në kryeqytetin Teheran.

Qindra gra iraniane u lejuan nga autoritetet e Republikës Islamike të ndiqnin në stadium finalen e Ligës së Kampioneve të Azisë, në Teheran. Lëvizja e qeverisë iraniane shihet si një shans për t’i dhënë fund rregullit të rreptë që prej 35 vitesh u ndalon grave ndjekjen e ndeshjeve të futbollit. Pjesa dërrmuese e grave që ishin të pranishme në stadium ishin të afërme të lojtarëve, ose pjesëtare të ekipeve për femrat.

Ndeshja mes ekipit vendas Perspolis dhe atij japonez Kashima Antlers u mbyll në barazim zero me zero, por i dha titullin kësaj të fundit pas fitores 2-0 të regjistruar në ndeshjen e parë. Muajin e kaluar rreth 100 gra u lejuan të shihnin ndeshjen miqësore mes Iranit dhe Bolivisë, por menjëherë më pas kufizimet u rivendosën. Aktualisht edhe organi qeverisës i futbollit, FIFA po punon me Teheranin për t’i dhënë fund ndalimit.

Në Mars të këtij viti, 35 gra u arrestuan pasi u përpoqën të ndiqnin derbin kryeqytetas mes Persepolis dhe Esteklalit. I pranishëm në këtë ndeshje ishte edhe presidenti i FIFA-s, Xhani Infantino, së bashku me ministrin iranian të Sporteve, Masud Soltanifar. Që prej Revolucionit Islamik të vitit 1979, gratë dhe vajzat iraniane rrallë herë janë lejuar të ndjekin evente sportive ku performojnë meshkujt. “Stadiumet e Hapura”, një shoqatë që lufton për të drejtat e grave në Iran, i dërgoi më herët gjatë javës një peticion FIFA-s, i cili ishte nënshkruar nga mbi 200 mijë persona./abcnews.al

SANKSIONET-IRANI-SHBA.mpg_snapshot_00.00-1280x741.jpg
G. P.11:07 | 05/11/2018

Kanë hyrë në fuqi sanksionet e reja të Shteteve të Bashkuara kundër Iranit. Presidenti Trump i konsideron ato si më të ashpërat të vendosura ndonjëherë. Ndërsa sekretari i shtetit tha se Uashingtoni do të përjashtojë disa vende nga këto sanksione pasi kanë reduktuar importimin e naftës nga Irani.

Në mesnatë ka hyrë në fuqi raundi i ri i sanksioneve të Shteteve të Bashkuara kundër Iranit. “Janë më të ashpërat që vendi ynë ka vendosur ndonjëherë, të shohim se çfarë do të ndodhë”. Kështu i ka komentuar presidenti amerikan Donald Trump. Sekretari i shtetit Mike Pompeo, ka shpjeguar se SHBA-të parashikojnë të përjashtojnë në mënyrë të përkohshme nga këto masa ndëshkuese, për 6 muaj, 8 vende që në kohët e fundit kanë punuar për të reduktuar në zero importimet e naftës nga Teherani. “Ekziston një numër vendesh që kanë reduktuar në mënyrë domethënëse importimet e naftës së papërpunuar dhe kanë nevojë për pak më shumë kohë për të arritur kuotën zero, dhe ne do t’u japim kohë”, shjegoi Pompeo pa treguar se për cilat vende bëhet fjalë. Shefi i diplomacisë amerikane ka përjashtuar që administrate Trump të zgjasë këto përjashtime për më shumë se 6 muaj.

Ndërkohë, Irani zbriti në shesh kundër Trump. Flamujt me vija të kuqe dhe yje janë djegur nën thërritjet: “vdekje Amerikës”. Gjithashtu pati edhe imazhe tallëse të kreut të Shtëpisë së Bardhë. “Kombi Iranian do t’i tregojë zotërisë Trump se është shumë i vogël për ta gjunjëzuar Iranin”, u shpreh kreu i parlamentit Larijani. Ndërsa presidenti Hassan Rouhani theksoi: “Qeveria nuk i frikësohet kërcënimeve të Shteteve të Bashkuara”. “Irani mund të kalojë këtë luftë ekonomike dhe dështimi i projektit të sanksioneve është i pashmangshëm”, tha ministri i jashtëm Jafari ndërsa njoftoi se tashmë vendi është mësuar të prodhojë gjithçka në mungesë të importimeve. Ndërkohë, më herët edhe lideri supreme Ali Khamenei sulmoi Trump: “Presidenti amerikan ka konsumuar besueshmërin që qëndronte tek SHBA-të dhe në demokracinë liberale”, nënvizoi ai./abcnews.al

rita-susmuth.png
G. P.16:40 | 22/10/2018

Një delegacion i lartë i parlamentit federal gjerman ka zhvilluar ditën e hënë takime me përfaqësues të politikës shqiptare në Tiranë. Pjesë e delegacionit ishte ish-presidentja e Bundestagut, Rita Sussmuth, e cila së bashku me grupin e deputetëve dhe ish-deputetëve gjermanë, u prit nga kreu i Kuvendit, Gramoz Ruçi, në ambientet e Kryesisë.

Ky i fundit pasi shprehu mirënjohjen për mbështetjen e dhënë deri tani nga shteti gjerman, i kërkoi presidentes Sussmuth dhe antarëve të tjerë të delegacionit të rrisin ndikimin e tyre për zgjerimin e mbështetjes për Shqipërinë gjatë fazës vendimtare të përgatitjes për hapjen e negociatave me Bashkimin Europian.

Delegacioni i kryesuar nga ish-presidentja Sussmith zhvilloi edhe një takim me kreun e opozitës shqiptare Lulzim Basha në ambjentet e selisë blu ku qëndruan për rreth 30 minuta. Delegacioni vizitoi kompleksin e Muxhahedinëve Iranianë në Manzë të Durrësit, qëllim i vizitës së tyre në vendin tonë, ku biseduan me të strehuarit atje lidhur me kushtet e ofruara në kamp./abcnews.al

iran-1-863x445.jpg
G. P.09:55 | 29/09/2018

Të paktën 10 persona kanë vdekur nga helmimi me alkool në Bender Abbas, një qytet në jug të provincës Hurmuzgan të Iranit.

Fatma Nevruziyan nga Fakulteti i Mjekësisë në Hurmuzgan konfirmoi se 10 persona kanë vdekur ndërsa 118 të tjerë janë shtrirë në spital për shkak të helmimit me alkool.

Ajo theksoi se në mesin e të shtruarve ka prej tyre që janë në gjendje kritike.

Sipas agjencisë së lajmeve ISNA, zëvendës shefi i policisë në Hurmuzgan, Muhammed Sherifi ka nisur hetime në lidhje me rastin, ndërsa deri më tani një person i cili dyshohet se ka shitur alkoolin e prodhuar ilegalisht është arrestuar.

Në Iran ndalohet shitja dhe konsumimi i alkoolit, por ka raste të kontrabandimit dhe prodhimit të tij ilegal.

Sipas ligjeve iraniane, prodhuesi, blerësi apo presoni që konsumon alkoolin e pret një dënim me burg ose goditje me kamxhik./AA


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono