iran

pompeo.jpg
G. P.09:27 | 13/07/2018

Sekretari amerikan i Shtetit Mike Pompeo, u bëri thirrje vendeve evropiane të mbajnë një qëndrim të ashpër ndaj Iranit, duke shkurtuar të gjitha fondet që vendi mund të përdorë për të nxitur paqëndrueshmëri në Lindjen e Mesme dhe më gjerë.

Zoti Pompeo u takua me zyrtarët europianë në Bruksel, pas takimit të udhëheqësve të NATO-s. Ai u kërkoi atyre të bashkohen me një fushatë presioni ekonomik të udhëhequr nga SHBA-ja kundër Teheranit, që nisi pasi Presidenti Donald Trump u tërhoq nga marrëveshja e rëndësishme bërthamore e Iranit në muajin maj.

Ne u kërkojmë aleatëve dhe partnerëve tanë të bashkohen me fushatën tonë të presionit ekonomik ndaj regjimit të Iranit“, shkruante zoti Pompeo në një postim në Twitter përpara bisedimeve. “Ne duhet të presim të gjitha fondet që regjimi përdor për të financuar terrorizmin dhe luftërat e ndërsjellta. Do të jetë e pamundur të përcaktohet se kur Irani mund të përpiqet të nxisë terrorizmin, dhunën dhe paqëndrueshmërinë në një nga vendet tona më pas”. Postimi i tij shoqërohej me një hartë që akuzonte Iranin për sponsorizimin e të paktën 11 sulmeve terroriste në Evropë që nga viti 1978.

Komentet e zotit Pompeo vijnë pasi zyrtarë të tjerë amerikanë po zhvillojnë vizita në vende të ndryshme të botës për t’i paralajmëruar ato të ndalojnë blerjen e naftës nga Irani pasi në të kundërt do të përballen me sanksione dhe pasi ai akuzoi Iranin për përdorimin e ambasadave të saj për të komplotuar sulme terroriste në Evropë./Zëri i Amerikës

ARRESTIMI-IRAN-1280x720.jpg
ent ela15:52 | 08/07/2018

Autoritetet iraniane kanë arrestuar një 18-vjeçare pasi kishte publikuar në profilin e saj në Instagram disa video duke kërcyer dhe pa shami në kokë. Televizioni shtetëror ka transmetuar një rrëfim të adoleshentes, e cila pranon se ka shkelur normat morale. Ajo tashmë është liruar me kusht dhe nuk mund të japë intervista. Nuk është e qartë nëse rrëfimi për televizionin shtetëror është bërë kundër dëshirës së saj. 18-vjeçarja kishte rreth 43 mijë ndjekës dhe kishte publikuar rreth 300 video. Policia iraniane ka njoftuar se do të mbyllë profile të tilla, ndërsa ministria e drejtësisë po mendon për bllokimin e Instagram. Ndërkohë, Irani ka bllokuar qasjen në Facebook, Tuitër dhe rrjete sociale të tjera. /abcnews.al

rouhani.jpg
G. P.22:39 | 03/07/2018

Teherani zyrtar i është përgjigjur të martën presioneve të Shteteve të Bashkuara duke kërcënuar se do të bllokojë rrugët tregtare në rajonin e Lindjes së Mesme, nëse eksportet e naftës iraniane ndërpriten.

Presidenti iranian Hasan Ruhani ka deklaruar të martën se do të bllokojë ngarkesat me naftë të vendeve fqinje nëse pranojnë presionet e Uashingtonit për të mos blerë më naftë iraniane. I pyetur nëse deklarata e tij përbën një kërcënim, kreu i Republikës Islamike ka refuzuar të japë sqarime.

Në të kaluarën, zyrtarët iranianë kanë kërcënuar me bllokimin e rrugëve tregtare siç është ngushtica e Hormuzit, ndër më të rëndësishmet për transportin e arit të zi.

“Amerikanët kanë deklaruar se duan ta bllokojnë tërësisht eksportin e naftës iraniane, por kjo nuk ka kuptim kur nafta e fqinjëve tanë vazhdon të eksportohet”, ka thënë Ruhani.

Në Maj, Shtetet e Bashkuara u tërhoqën nga marrëveshja shumëkombëshe, që i ofronte Iranit lehtësim të sanksioneve në këmbim të pezullimit të programit të tij bërthamor. Që prej atëherë, Uashingtoni zyrtar u ka bërë thirrje të gjitha vendeve që të ndërpresin importet e naftës iraniane duke filluar nga data 4 Nëntor, ndryshe do të përballen me sanksione financiare.

Nga një konferencë për shtyp në Bernë, Ruhani ka theksuar se presioni i Shteteve të Bashkuara nuk duhet kurrësesi të ketë sukse.

“Nuk është e drejtë dhe as e mençur që një ditë të gjitha vendet prodhuese të mund të eksportojnë naftën e tyre, ndërsa Irani jo”, ka shtuar Ruhani./abcnews.al

PERLESHJET-IRAN-1280x720.jpg
ent ela14:10 | 01/07/2018

Iranianët kanë protestuar kundër rritjes së çmimit të ujit. Mësohet se gjatë manifestimeve, një person është vrarë me armë zjarri nga policia. Ndërsa disa të tjerë kanë mbetur të plagosur.

Të paktën 1 person është vrarë në përleshjet e dhunshme të regjistruara në qytetin Khorramshahr, në jug të Iranit, mes policisë dhe manifestuesve, të cilët protestonin kundër rritjes së çmimit të ujit. Lajmi raportohet nga mediat ndërkombëtare që citojnë burime lokale. Në këto përleshje, kanë mbetur të plagosur dhe disa persona.

Sipas asaj që bën të ditur agjencia shtetërore e lajmeve IRNA, agjentët kanë përdorur gaz lotësjellës për të shpërndarë qytetarët. Por këta të fundit janë kundërpërgjigjur duke lëshuar gurë dhe objekte të tjera të forta kundër policisë. Gjatë përleshjeve janë regjistruar dëme të shumta materiale. Ndërkohë në internet po qarkullojnë video ku shfaqin forcat e rendit që hapin zjarr kundër manifestuesve.

Sipas agjencisë IRNA, manifestuesit kanë lëshuar gurë ndaj policisë, që është përgjigjur me gaz lotësjellës. Në raportim nuk përmenden të shtënat. Protestat, vijnë pas 3 ditëve manifestime në Teheran, gjatë së cilave qytetarët janë përleshur me policinë jashtë godinës së parlamentit. Edhe në këtë rast, agjentët kanë qëlluar me gaz lotësjellës kundër turmës. Manifestimet kanë çuar në mbylljen e përkohshme të disa atraksioneve turistike në Iran. /abcnews.al

 

diego-costa-spain-iran-1280x713.jpg
G. P.22:45 | 20/06/2018

Spanja pati nevojë për një gol aksidental që të arrinte fitore në ndeshjen ndaj Iranit në Kupën e Botës. Skuadra nga Europa e pati shumë të vështirë dhe u shpëtua nga Diego Costa.

I duhej dikush që ta nxirrte nga balta.

Spanja e gjeti tek Diego Costa, njeriu që shënon golat dhe siguron fitoret, ashtu si Cristiano Ronaldo tek Portugalia.

I mbiquajturi “djalë i keq i futbollit”, sulmuesi 29-vjeçar e gjeti mënyrën sesi të realizonte në portën e Iranit, me gju apo me ndonjë pjesë tjetër të këmbës, dhe të shpëtonte ekipin e tij nga telashet.

U mendua e lehtë, por doli shumë e vështirë që ish-kampionët e botës dhe dy herë kampionët e Europës të kalonin pengesën iraniane në stadiumin e Kazanit. Patën përballë një trajner që i njeh mirë si Carlos Queiroz, por patën edhe faj vetë, përveç meritës së Iranit, që fitorja nuk doli aspak e sigurt.

Loja e iberikëve nuk ishte aspak e shpejtë dhe pasimet horizontale nuk i dhanë befasi ndaj një kundërshtari që u mbrojt dhe luftoi fort për çdo top. Iranianët vendosën të sulmonin vetëm pasi pësuan golin, pasi nuk kishin çfarë të humbisnin më.

Për hir të së vërtetës, u treguan shumë të rrezikshëm, dhe Spanja nuk e pati aspak të lehtë t’i përballonte. Madje u shënua edhe një gol, por që u anulua në mënyrë korrekte nga përdorimi i VAR-it.

Ezatolahi ishte në pozicion jashtë loje në momentin e shënimit, edhe pse gjyqtarit iu deshën 2 minuta që të përdorte teknologjinë për ta vërtetuar.

Ashtu si Portugalia, as Spanja nuk bindi, duke forcuar bindjen se asnjë skuadër e madhe nuk ka mbërritur në formën e duhur në Botërorin rus.

Pavarësisht fitores, spanjollët nuk janë të kualifikuar, madje edhe mund të eleminohen në rast kombinimi të pafavorshëm të rezultateve në ndeshjet e fundit të grupit B, Spanjë-Marok dhe Portugali-Iran./abcnews.al

spanjaaaa.jpg
G. P.17:47 | 20/06/2018

Spanja luan sonte ndaj Iranit me synim arritjen e fitores së parë në Botëror. Pretendentja për titull nuk mund të bëjë më asnjë gabim, pas barazimit me Portugalinë.

Nuk u kënaqën plotësisht me të parën.

Tifozët spanjollë shpresojnë që skuadra e tyre të lerë pas përfundimisht krizën e stolit, dhe barazimin 3-3 ndaj Portugalisë e të nisë të fitojë në Botëror. Sfida e dytë e grupit B, është ajo ndaj Iranit, teorikisht e fitueshme, por që mbetet gjithsesi për t’u fituar në fushë.

Trajneri Hierro është i qetë të paktën nuk ka probleme fizike. Mbrojtësi Carvajal është shumë mirë ndërsa la pas dëmtimin e finales së Championsit, dhe është i disponueshëm. Hierro ndërkaq pyetet për duelin me ish-trajnerin e tij tek Reali, Carlos Queiroz-in e Iranit.

Fernando Hierro: “Po, është e vërtetë që e njohim Karlosin prej shumë kohësh, një njeri për të cilin është kënaqësi të flasësh dhe me të cilin të punosh. Keiroz ka krijuar një ekip të fortë dhe të bashkuar, në mbrojtje dhe në sulm. E dimë se Irani pëson pak gola, dhe shumë i rrezikshëm në goditjet standarde. Duhet të japim maksimumin për të fituar”.

Andres Iniesta, dashuria e gjithë spanjollëve, u pyet për ndikimin e ndryshimit të trajnerit, dhe u përgjigj duke thënë se “është një situatë që u përpoqëm ta kalonim sa më shpejt, një situatë jo e mirë”.

Ish-ylli i Barcelonës nuk pranoi kritika për mbrojtjen, duke thënë se është gjithë ekipi që mbron, jo vetëm katër lojtarët e prapavijës.

Irani është në pozitë më komode.

Fitorja ndaj Marokut e bën që të luajë edhe për barazimin, që dihet se do ta ketë shumë të vështirë, por me trajnerin Queiroz që nuk dorëzohet.

Carlos Queiroz: “Është kënaqësi të luajmë ndaj Spanjës, njërit prej kandidatëve kryesorë për të fituar Botërorin. Të gjithë lojtarët e mi e vlerësojnë shumë këtë mundësi dhe duan që ta luajnë siç duhet. Ne vijmë pas një fitoreje, por nuk duam të ndalojmë këtu. Nuk kemi ardhur në Botëror thjesht për të luajtur, por për të fituar ndeshjet”./abcnews.al

iraniiii.jpg
G. P.15:13 | 08/06/2018

Kompania amerikane Nike refuzon të furnizojë me atlete lojtarët e kipit kombëtar të futbollit të Iranit për shkak të rivendosjes së sanksioneve ndaj vendit nga ana e administratës Trump.

Trajneri i ekipit kombëtar iranian të futbollit, Karlos Kueiroz, ka reaguar pas vendimit të Nike për të mos furnizuar me atlete lojtarët iranianë si pasojë e sanksioneve të vendosura nga administrata Trump ndaj vendit.

Nike konfirmoi se nuk do të furnizonte kombëtaren iraniane një nga ekipet pjesëmarrëse në kampionatin botëror të futbollit Rusia 2018, pasi Shtëpia e Bardhë rivendosi sanksionet ndaj Iranit pas daljes së shteteve të Bashkuara të Amerikës nga marrëveshja e 2015-s për programin bërthamor iranian.

Kueiroz u shpreh se lojtarët kanë nevojë për atlete. Ai shtoi se i ka kërkuar FIFA-s të ndërhyjë në këtë çështje.

Por Nike sqaroi se sanksionet e Shtëpisë së Bardhë nënkuptojnë se si një kompani amerikane nuk mund të furnizojë me atlete lojtarët e ekipit iranian.

Ndërsa veshja është e Adidas, kompanisë gjermane dhe rivalja kryesore e Nike. Lojtarët lejohen të veshin atlete të çdo lloj firme, por lojtarët iranianë që sponsorizohen nga Nike nuk mund t’i veshin ato. Përfshirë këtu dhe golashënuesin Saman Godos, i cili do të duhet të zgjedhë një markë tjetër.

Irani ishte ekipi i parë që mbërriti në Rusi të martën, ndërsa ndeshjen e dytë e ka në 20 Qershor në Kazan kundër Spanjës, kurse e para është ajo ndaj Lituanisë./abcnews.al

IRANI-PASURIMI-URANIUMIT-1280x720.jpg
ent ela13:14 | 05/06/2018

Udhëheqësi suprem i Iranit, njoftoi se do të rifillojë pasurimi i uraniumit, edhe me marrëveshjen bërthamore. Në një fjalim, Ajatollah Ali Kamenei, kritikoi edhe Europën, duke thënë se po përpiqet të mashtrojë Iranin.

“Pasurimi i uraniumit do të rifillojë edhe nën marrëveshjen bërthamore”. Kështu udhëheqësi suprem i Iranit, Ajatollah Ali Khamenei, i cili para qindra mijëra njerëz të mbledhur në jug të Teheranit në mauzoleun e Imam Khomeinit, në përvjetorin e vdekjes së tij, në fakt kërcënoi se do të tërhiqej nga pakti bërthamor. Vendimi i tij vjen pas largimit Sheteteve të Bashkuara nga marrëveshja më 8 maj.

Në fjalimin e tij Khamenei gjithashtu përdori tone të ashpra kundër Evropës, e cila sipas tij po përpiqet ta mashtrojë Iranin, duke kërkuar që Teherani të vazhdojë të pranojë kufizimet në programin e tij bërthamor sipas marrëveshjes, por nuk mund të përfitojë nga avantazhet ekonomike që ofron ky akord. Fjalët e Khameneit u brohoritën nga qytetarët e mbledhur për të ndjekur fjalimin e tij.

I ashpër ndaj presidentit Donald Trump, është shprehur gjithashtu i biri i Shahut të fundit. Skena politike iraniane është tronditur në fakt nga një intervistë dhënë medias amerikane nga Ardeshir Zahedi, ambasadori i fundit iranian në Uashington, ish kryeministër dhe pasardhës i Shahut të fundit, praktikisht anëtari më i shquar i familjes mbretërore persiane sot në qarkullim, e cila nuk ka simpati për qeverinë aktuale iraniane. Zahedi thotë se historia ka treguar se kërcënimet kundër popullit Iranian janë të kota.

Ndërkohë, deklarata e presidentit Khamenei kanë shqetësuar jo pak nënshkruesit e marrëveshjes bërthamore. Gjatë një takimi me kryeministrin e Izraelit, Benxhamin Netanjahu, kancelarja Gjermane, Angela Merkel thotë se e kupton shqetësimin e shtetit hebre lidhur me Iranin. Ajo kërkoi nga Teherani që të tërheqë ushtarët nga Siria. /abcnews.al

mike-pompeo.jpg
G. P.19:50 | 21/05/2018

Administrata amerikane ka paralajmëruar vendosjen e sanksioneve më të ashpra në histori ndaj Iranit. Duke paralajmëruar Republikën Islamike për pasoja të rënda nëse nuk ndryshon kurs politik, sekretari i Shtetit, Mike Pompeo, ka kërkuar edhe ndihmën e aleatëve europianë.

Sekretari i Shtetit, Mike Pompeo kërcënoi të hënën se do të vendosë sanksionet më të ashpra në histori kundër Iranit, nëse vendi nuk ndryshon kursin e politikës së brendshme dhe asaj të jashtme. Disa javë pasi Shtetet e Bashkuara u tërhoqën nga marrëveshja ndërkombëtare për programin bërthamor, Pompeo u shfaq me një qasje të ashpër ndaj Republikës Islamike, duke e vënë theksin tek bashkëpunimi me Pentagonin dhe aleatët rajonalë për t’i vënë fre ambicjeve të Teheranit.

Shefi i diplomacisë amerikane publikoi 12 kërkesa për Iranin dhe theksoi se politikat shtrënguese do të lehtësohen vetëm atëherë kur Uashingtoni të shohë ndryshime serioze në politikat e Iranit. Pompeo theksoi gjithashtu se Shtetet e Bashkuara do të mbajnë qëndrim edhe për ata që tregtojnë produkte të ndaluara me Iranin. Kërcënimi i tij vjen në një kohë kur vendet Europiane, Gjermania, Franca dhe Britania po punojnë për ta shpëtuar marrëveshjen me Republikën Islamike pas tërheqjes së Amerikës.

Sekretari i Shtetit nënvizoi se Uashingtoni është i hapur për një traktat të ri dhe në këtë drejtim kërkoi mbështetjen e aleatëve perëndimorë. Më herët gjatë muajit, presidenti Donald Trump njoftoi tërheqjen nga marrëveshja bërthamore e vitit 2015, të cilën e cilësoi “të tmerrshme” dhe tha se nuk e kishte ndaluar Teheranin të vijonte programin e tij të pasurimit të uraniumit./abcnews.al

angela-merkel-1-e1526466537940.jpg
G. P.13:15 | 16/05/2018

Kancelarja gjermane, Angela Merkel, ka kërkuar që të respektohet marrëveshja bërthamore me Iranin. Nga ana tjetër, presidenti Hasan Rouhani, pas rivendosjes së sanksioneve amerikane, u shpreh se nuk do të dorëzohet nga presioni i Uashingtonit.

“Mënyra më e mirë për të trajtuar shqetësimin ndërkombëtar në lidhje me rolin e Iranit në rajon dhe programin e raketave balistike është brenda kuadrit të marrëveshjes bërthamore, edhe pas largimit të Shteteve të Bashkuara”. Ky është qëndrimi i prerë i kancelares Gjermane, Angela Merkel.

“Çështja është nëse mund të flisni më mirë nëse i jepni fund një marrëveshjeje ose nëse qëndroni aty … ne themi se mund të flisni më mirë nëse qëndroni në të”, u shpreh Merkel përpara ligjvënësve në Bundestag.

Fuqitë europiane u zotuan të mbajnë gjallë marrëveshjen bërthamore të 2015-s edhe pa SHBA-të dhe pranuan se do të angazhohen në garantimin e kërkesave të Teheranit.

“Kjo marrëveshje është çdo gjë tjetër përveç ideales, por Irani, sipas të gjithë dijenisë së autoriteteve nukleare ndërkombëtare, po respekton angazhimet e ndërmarra në marrëveshje”, shtoi kancelarja gjermane.

Javën e kaluar, Presidenti amerikan braktisi paktin të cilin e quan “marrëveshjen më të keqe të historisë” dhe rivendosi sanksionet ekonomike ndaj Iranit.

Lidhur me këtë ka ardhur dhe një reagim nga regjimi i Teheranit.

“Irani nuk do të dorëzohet ndaj presionit të SHBA”, u shpreh presidenti Hassan Rouhani.

“Ata mendojnë se mund ta detyrojnë kombin Iranian të dorëzohet duke vendosur presion ndaj Iranit, me sanksione dhe kërcënime me luftë. Kombi iranian do të rezistojë kundër komplotëve të SHBA-së”, shtoi më tej ai./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono