intervistë

Idro-Seferi-ne-burg-1280x767.jpg
ent ela12:56 | 04/04/2019

Dhjetëra shtetas shqiptarë vuajnë dënime në burgjet e Serbisë për vepra të ndryshme penale. Shumë prej tyre kanë kërkuar prej vitesh që vuajtjen e dënimit ta kryenin në atdhe. Për një pjesë ka mbërritur edhe miratimi i autoriteteve të Beogradit. Por nga Tirana zyrtare nuk ka ende reagim. Gazetari i ABC News Idro Seferi, sjell një reportazh të veçantë nga brenda qelive të këtyre burgjeve si dhe intervista me të dënuar shqiptar.

Mitrovica e Sremit në Serbi. Në këtë rrugë është një hotel dhe një burg. Këtu një pjesë e të burgosurve mund të dalin edhe jashtë pas një kohe më të gjatë dhe të shëtisin. Një nga burgjet më të mëdha në Ballkan. Shumica e të huajve që kryejnë burgun ndodhen pikërisht në këtë qendër për të vuajtur dënimin e tyre.

Filmimi është lejuar, por duke fshehur identitetin e çdo të burgosuri me rregulla strikte, pa treguar fytyrat, por edhe asnjë detaj të trupit të tyre. Për këtë kërkohet leje nga çdo i burgosur. Këtu ka edhe njerëz që flasin shqip dhe kanë bërë kërkesa për ekstradim.

Që nga viti 2010 e deri në vitin 2018 kanë qenë 14 kërkesa nga shtetasit shqiptar për ekstradim. Pesë prej tyre janë pranuar, por nuk janë realizuar asnjëherë. Tre janë liruar para se të transferoheshin, një ka kryer burgun para se të kthehet kërkesa e pranuar, dhe një tjetri i është refuzuar në fund. Nëntë kërkesa janë në pritje.

Ky këtu është një djalë nga bregdeti shqiptar, jo larg Tiranës. I lindur në vitin 1996, është dënuar për trafikim të 16 kilogramëve marijuanë. Është lutur të kthehet në shtëpi.

“Historia është që më patën arrestuar në kufi të Serbi-Hungarisë, sepse makina që kisha blerë prej 1 muaji kishte brenda një vend me marijuanë, për këtë jam këtu. Avokati më tha që rruga më e mirë është pranimi i veprës, për shpejtësinë e procedurave. Më pas të bëhet transferimi për në Shqipëri. Ajo u bë dhe unë jam ende këtu”, thotë ai.

Autoritetet serbe i kanë miratuar kthimin në Shqipëri me 4 korrik të vitit të kaluar, por për të kryer dhe tri vite të tjera më shumë burg, duhet një përgjigje nga Tirana të cilin ende po e pret.

Të burgosurit këtu lirinë e kanë sistematike. Mund të lëvizin në kushte të kontrolluara dhe të përfitojnë gjithnjë e më shumë liri. Por, kjo ndodh me kalimin e kohës kur një pjesë prej tyre mund të punojnë dhe të kenë aktivitete.

Mund të kenë pushime në fundjava ndonjëherë, të kenë vizita, por edhe pushime vjetore për të dalë nga burgu. Për shtetasit shqiptar që nuk kanë shumë kohë këtu, është e rëndësishme ta kryejnë burgun në vendlindje, pasi risocializimi nuk është i lehtë.

“Eshtë mbyllur procesi penal, janë mbyllur të gjitha dhe pritet përgjigja nga ana e Ministrisë së Drejtësisë Shqiptare për lejen e transferimit. Autoritetet Serbe i kanë dhënë të gjitha lejet, thjesht mungon një leje zyrtare nga pala tjetër. Duke pritur këtë përgjigje nga Tirana ka kaluar shumë kohë, si për mua edhe për të tjerët që kanë 2 apo 3 vjet që ende presin përgjigje nga Ministria e Drejtësisë Shqiptare. Këtu kam 1 vit e 3 muaj, kushtet i shikoni vetë. Unë jam munduar të informojë edhe Ambasadën Shqiptare se në çfarë kushtesh gjenden shqiptarët këtu, mund të merrni dëshminë edhe të shqiptarëve të tjerë. Ne kemi kërkuar që të na vizitojnë nga ana e ambasadës dhe ata na kanë mashtruar, duke na thënë se do të vinin për vizitë por nuk kanë ardhur asnjë herë”, bën me dije ai.

Novi Sadi është kryeqendra e krahinës së Vojvodinës në Serbi. Fillimisht ka qenë e mundur të kontaktohet një avokat.

Bojan Papic, ka një zyrë këtu bashkë me shumë kolegë profesionist të njohur. Klienti i tij në intervistë thotë se ka të drejtë ligjore të kërkoj që të transferohet në vendlindje. Por, përgjigje nga Shqipëria nuk ka. I pyetur se përse nuk ka ende një përgjigje nga Tirana, thotë se nuk e di arsyen.

“Klienti im në Serbi është gjykuar me 26 janar në Suboticë për akuzën e trafikut të drogës. Ka bërë marrëveshje dhe është dënuar me 4 vjet e 10 muaj. Në bazë të ligjeve në Serbi është mundësuar që i dënuari të kryejë dënimin në shtetin amë, në këtë rast në Shqipëri”, shprehet avokati.

Ai shpreson se përgjigja do të jetë e shpejtë, pasi për të burgosurit nuk është e lehtë të jenë, edhe të dënuar dhe të mos kenë komunikim social të vazhdueshëm. Avokati kërkon një përgjigje, pasi thotë se kjo është e nevojshme.

“Është në një ambient ku është problem komunikimi, që nga rojet e deri tek kushtet. Janë gjëra që vështirësojnë jetën aty, ndërsa transferimi do të mundësonte kryerjen e të njëjtit dënim por në Shqipëri, e jo në Serbi”.

Në këtë hapësirë të burgut është një pjesë më e mbyllur e tij. Liria ndodh pak, dhe pse kanë kushte, mjekë, kisha dhe aktivitete të tjera që mund të bëhen gjatë kohës. Kanë kantinë, palestër dhe mund të blejnë gjëra nëse kanë para. Kanë edhe kurse për gjuhët, në mënyrë që të huajt dhe lokalët të mund të komunikojnë.

Intervista dhe çdo gjë këtu është filmuar në praninë e autoriteteve, të përkthyesve të të dy gjuhëve (shqip-serbisht) dhe përfaqësuesve të burgut që kanë pranuar reportazhin tonë. I riu nga Shqipëria, thotë se ndjehet shumë keq, pasi ka vënë në siklet familjen, të cilët nuk kanë shumë kushte për t’i bërë vizita. Është djalë i vetëm i dy prindërve në moshë.

“Nuk jam qytetar këtu, as nuk kam patur synim të qëndroj këtu, thjesht kam kaluar në kufirin Serbo-Hungarez. Shkaku i marrjes së përgjegjësisë për këtë vepër penale ishte se, nëse do ta pranoja, do të transferohesha për në Shqipëri. Atje kam familjen, shokët. Të gjithë procedurat u bënë shumë shpejt për shkak të transferimit. Atje kam më shumë lehtësi. Nëse është e nevojshme unë ju listoj të gjitha vështirësitë këtu duke filluar nga kushtet  por pikësynimi nuk është të jem kundër autoriteteve të këtushëm, synimi është të largohem prej këtej. Në Shqipëri kam qenë student, kam punuar si agjent shitjesh. Unë thjesht kërkoj transferimin sepse është e drejta ime, e drejtë që po më cenohet. Familjen e takoj 1 herë në 1 ose 2 muaj”, thotë ai.

Për drejtësinë serbe këto janë raste të mbyllura dhe mjafton të shkojnë në burg në vendlindje. Por nëse jo, mund të rrinë këtu dhe me sjellje të mira mund ta kalojnë më lehtë e mbase lirohen edhe më shpejt se sa dënimi. Por deri atëherë, duhet t’i përmbahen rregullave dhe të presin mundësinë e dytë në jetë për të qenë përsëri të lirë./abcnews.al

ulsi-1280x721.jpg
ent ela18:55 | 07/03/2019

Aktin e ndërmarrë nga opozita për dorëzimin e mandateve, deputeti i PS-së Ulsi Manja e shikon si vetëvrasje politike. Ai më tej shton se ati opozita i kërkon qeverisë që t’i heqë litarin, por harron se kundërshtari politik të heq karrigen dhe jo litarin.

Ulsi Manja: Në rastin konkret pakica kërkon të marrë peng politikisht shumicën sepse dialogu në një sistem demokratik ka vendin e vet ku zhvillohet. Kjo që thotë opozita nuk lë shteg për dialog. Opozita i thotë shumicës qeverisëse e dalë nga zgjedhjet e viti 2017 i thotë ik ti, dhe nuk thotë ik ti si shumicë, të ikë lideri i shumicës pra Kryeministri i vendit dhe pastaj thotë me pjesën tjetër do shohim e do bëjmë ne. Do ulemi dhe do merremi vesh. Që këtu ne kemi të bëjmë me një opozitë joserioze. Në një “marrje koke erë” mund të themi nga pikëpamja politike vendosi të varë vetën politikisht tek pishat para parlamentit dhe tani i kërkon shumicës se pse nuk më pret litarin, ndërkohë që në rrafshin politik, kundërshtari politik të heq karrigen dhe nuk të pret litarin. Kjo është politika në demokraci. Është një vendimmarrje që e morën vetë. Tani venisin edhe ca kushte që nuk kanë lidhje me sistemin politik që kemi zgjedhur dhe ju i kërkoni zgjidhje shumicë, kur vetë opozita nuk është e qartë se çfarë kërkon. Dhe që në momentin që opozita merr përsipër të përcaktojë liderin politik të kundërshtarit që këtu kanë rënë bisedimet ka rënë dialogu.

Juli Xhokaxhi: Nuk ka përcaktuar lider politik, ka kërkuar të ikë Edi Rama, të krijohet një qeveri tranzitore, e cila do të riparojë sistemin, do bëjë reformën elektorale dhe do sjellë vendin në zgjedhje të përgjithshme, të rregullta, të ndershme, dhe pa blerje votash. Se kush i fiton këto zgjedhje këtë pastaj e vendos populli. Mund të jetë prapë Edi Rama ai që fiton, të paktën këtë kanë shprehur eksponentët e opozitës.

Ulsi Manja: Por si do ikë Edi Rama? Kush e lë Edi Ramën të ikë?

Juli Xhokaxhi: Si kush e lë?!

Ulsi Manja: Edi Rama në vitin 2017 në një proces të certifikuara zgjedhje të lira, demokratike dhe të  të ndershme ka marrë një mazhorancë të plotë me 74 mandate.  Janë qytetarët shqiptarë ata që i kanë thënë Ramës urdhëro mandatet dhe qeveris vendin. Tani në krahun tjetër një pakicë që shqiptarët vendosën që opozita të jetë pakicë dy vjet pasi u pranua zgjedhjet, pasi e pranuan rezultatin 7 : 1, dhe nuk paraqitën as ankesën më të vogël, një ditë të bukur pranvere thonë jo  ne nuk i njohim më zgjedhjet se janë vjedhur. Po kush e thotë këtë që janë vjedhur?!  E thotë dosja 339 dhe dosja 184./abcnews.al

sali-berisha-6.jpg
G. P.13:22 | 18/02/2019

Mediat e huaja vazhdojnë t’i japin një hapërirë të gjerë asaj që po ndodh në Shqipëri. Italiania “Il Messagero” ka intervistuar ish-kryeministrin Sali Berisha, i cili thekson se Shqipëria është në kaos dhe në duar të narko-politikanëve.

Në një intervistë për italianen “Il Messagero” ish-kryeministri shqiptar Sali Berisha ka hedhur akuza të forta ndaj qeverisë duke thënë se janë dy kryeqytetet që protestojnë: Karakas kundër Maduros dhe Tirana kundër Edi Ramës.

Më tej, ai shton se opozita ka bërë çdo lëshim që mundej dhe ka pranuar të gjitha marrëveshjet e mundshme të firmosura në Maj të 2017-ës. Por sipas tij ka qenë Rama ai që i ka shkelur dhe për këtë arsye, ai duhet të japë dorëheqjen dhe t’i lërë vendin një qeverie tranzicioni që i ndalon të menaxhojë dhe të manipulojë procesin e votimit.

Më tej, e përditshmja italiane e përshkruan Berishën si liderin historik të Partisë Demokratike, i cili ka qenë lideri më jetëgjatë në Shqipëri pas Enver Hoxhës. I pyetur për arsyet e protestës Berisha shprehet se protesta u bë kundër narkoshtetit që drejron Shqiprëinë, por arsyeja më e madhe është ajo e shkeljes së rregullave elektoraleve.

Berisha shkon dhe më tej duke thënë se me Ramën në pushtet nuk mund të ketë zgjedhje të lira. Beteja është e ashpër, thekson Berisha, por protestat janë një mësim, të cilin Rama duhet ta kuptojë, përndryshe do të ketë ditë të vështira dhe fundi i tij do të jetë i tmerrshëm: njerëzit mund ta vrasin, do ta hedhin në lumë.

Dhuna e përdorur në protestën e së shtunës u dënua nga komuniteti ndërkombëtar, por sipas ish-kryeministrit dhuna e vërtetë është shkelja e të drejtës së votës dhe tashmë nuk ka më kthim prapa pasi situata është kritike.

Duke këmbëngulur se dalja e tij nga skena politike është pa kthim, Berisha premton se do të bëjë çdo gjë që shqiptarët të votojnë si qytetarët europianë, pasi aktualisht Shqipëria është i vetmi vend në Europë me një gjysmë diktaturë si në Venezuelë./abcnews.al

armand-duka.jpg
G. P.19:24 | 11/02/2019

Presidenti i Federatës Shqiptare të Futbollit, Armand Duka, flet për ABC News pas zgjedhjes në Komitetin Ekzekutiv të UEFA-s. Ai tregon strategjinë e përdorur, ndërsa bën kritika për qeverinë dhe paralajmëron klubet e Superligës.

Misionin në UEFA e përfundoi, ndonëse sfidat vazhdojnë. Armand Duka është padyshim krenar dhe i lumtur që u zgjodh në forumin më të lartë të futbollit europian, pas një gare e cila, siç thotë edhe vetë e lodhi jo pak. Pasi bëri nxemjen dy vjet më parë, duke mos ia dalë, cila ishte strategjia fituese?

“Para se të shkoj me ia thënë votuesve ia kam bërë këtë pyetje vetes. Ia kam bërë këtë pyetje disa njerëzve të mi rreth e rrotull. Më thuaj tre arsye pse njerëzit duhet të më votojnë mua dhe me këto tre arsye që unë kam menduar që pse duhet të më votojnë kam shkuar dhe kam kërkuar që të më mbështesin. Tre arsyet që kam kërkuar të jem: eskperienca që unë kam në drejtimin e FSHF dhe duke qenë anëtar dhe drejtues në disa komisione në UEFA dhe në FIFA. Europa përbëhet nga shumë vende dhe ka nevojë Komiteti Ekzekutiv që të ketë në përbërjen e tij përfaqësuesin e një vendi specifik apo të vogël”, tha Duka.

Duka nuk flet për ndarje politike, por e qartë që pati një mbështetje në Perëndim, dhe një kundërshti në Lindje.

“Mbështetja ime ka qenë nga të gjitha rajonet, kryesisht nga Europa Qendrore. Të gjithë vendet e mëdha, duke filluar nga Anglia, Gjermania, Italia, Franca, Spanja, Austria, Hungaria, Polonia, vendet nordike më kanë mbështetur pothujse të gjithë. Vendet nga ish-Bashkimi Sovjetik kanë pasur një lloj skepticizmi ndofta dhe sepse nuk e njohin shumë mirë Shqipërinë, nuk e njohin shumë mirë realitetin”, u shpreh kreu i FSHF-së.

Ndryshe nga sa pritej, Ballkani ishte pozitiv me kandidatin shqiptar, madje edhe Serbia.

“Ky nuk është votim politik, është votim sportiv. Marrëdhëniet me të gjitha federatat janë korrekte. Luajmë kundër njëri-tjetrit. Hyjmë në fushë që të fitojmë kundër njëri-tjetrit. Ka një lloj solidariteti dhe vendet e rajonit në përgjithësi kanë qenë pozitive, e kanë mbështet kandidaturën time”, tha Duka.

Pritet që Shqipëria të fitojë më shumë përkrahje pas zgjedhjes së Dukës, por presidenti e sheh ndryshe.

“Shqipëria nuk ka vuajtur në realizimin e projekteve të veta nëpërmjet FIFA-s apo UEFA-s. Kjo ka qenë dhe arsyeja pse është mbështet kandidatura e Shqipërisë sepse një vend si Shqipëria, të paktën vetëm me dy projektet e mëdha të vitit 2019, stadiumin e Tiranës dhe zyrat, pothuajse asnjë federatë nuk ka finalizuar projekte të tilla. Nuk është ky qëllimi i anëtarësimit në Komitetin Ekzekutiv. Qëlli është për të kontribuar bashkarisht për të tërën”, tha ai.

Armand Duka duhet të ketë një ekzistencë të dyfishtë, në UEFA dhe në realitetin shqiptar.

“Të qenit pjesë e një organizate shumë të rëndësishme si UEFa apo FIFA, pjesa e të qenit anëtar i një komuniteti europian apo botëror i futbollit është patjetër pjesa e kënaqësisë, pjesa e lumturisë e të qenit president i Federatës së Futbollit. Pjesa e menaxhimit të brendshëm të garave, e probleme, e pengesave, policia, arbitri, ankesa, kontestime është pjesa e halleve të mëdha”, tha presidenti i FSHF-së.

Problemet e futbollit Duka i sheh tek indiferenca e aktorëve, si qeveria, parlamenti, drejtësia apo policia. Vlerëson investimet e kryeministrit Rama, por i quan spordike, pa strategji.

“Klubeve dhe Federata kanë një investim Zero. Investime pothuajse përveç këtyre që thamë Zero. Qeveria të marrë një vendim dhe të thotë do të financojmë 200 fusha futbolli në Shqipëri. Kush i dëgjon mund t’i duken shumë, por janë pak. Tirana që vërtetë luajnë futboll të gjithë fëmijët që duan të luajnë futboll, ka nevojë për 100 fusha futbolli. Është e vështirë për hapësirat, por duhet t’i gjejmë dhe to, por buxheti qoftë i Bashkisë së Tiranës, qoftë dhe i qeverisë nuk është se varfërohet për kaq pak para për një sport që shqiptarët e dashurojnë shumë”, tha Duka.

Duka risjell një propozim të harruar të vitit 2013.

“Kur Rama do vinte në qeveri u mendua, madje mbaj mend që Fidel Ylli bëri fushatë me këtë që do kishte Ministri Sporti, e cila do mendonte për sportin dhe realisht kur ka një ministri, kur ka një administratë, e cila bashkon dhe mbledh grupet e interesit dhe prodhon vërtetë strategjira dhe politika të pakteave fiskale që ndihmojnë sportin, gjërat nëse nuk realizohen 100% do realizohen 50”, tha ai.

Problemi tjetër i madh është ai ligjor.

“Tek ne ka një ligj që është qesharak. Më duket se është i ’94-s. Është pakësuar. Kanë lindur herë pas here iniciativa të cilat shuhen shpejt. Iniciativë të cilën e kemi marrë dhe ne. E kemi propozuar një herë një paketë fiskale që shkuam ta mbronim dhe në komision parlamentar dhe çuditërisht ca njerëz të sportit brenda komisionit i dolën kundra dhe u shua dhe ajo”, u shpreh Duka.

Duka vlerëson se Shqipëria duhet të marrë shembull nga Kosova.

“Politika kosovare e mështet sportin më shumë se politika shqiptare. Në mënyrë strategjike dhe jo në mënyrë spontane. Buxhetet që ka Kosova qoftë dhe buxhetet për financimin e sporteve janë 10 ose 20 herë më të mëdha se Shqipëria. Ajo paketë fiskale që për mua nuk është e plotë dhe që ka duhet të jetë dhe më e mirë e Kosovës”, tha ai.

Maksimumi, sipas tij, do të ishte përvoja hungareze.

“Hungaria i detyron kompanitë, shoqëritë e biznesit të shkojnë të bien dakord me një nga federatat e 4 sporteve prioritare dhe të investojnë nga fitimet e tyre. Kjo pjesë nga Tatimet. Në tre-katër vitet e fundit janë shifra marramendëse. Janë ndërtuar fusha futbolli pa fund dhe do ketë ndryshime”, u shpreh Armand Duka.

Pavarësisht nga problemet financiare të klubeve, numri 1 i Federatës e sheh gotën gjysmë plot.

“Nëse do shohim kolonën e të ardhurave dhe shpenzimeve të 10 viteve më parë me sot ndryshimi është më shumë se 200% nga sponsorizimet që kanë vetë klubet, të cilat nuk kanë ekzistuar dikur. Ka të ardhura nga e drejta televizive. Ka të ardhura nga shitjet e lojtarëve dhe vetëm të ardhurat e klubeve nga UEFA nëse 10 vite më parë e gjithë Shqipëria në total kishte të ardhura 700-800 mijë euro, në 3-4 vitet e fundit të ardhurat totale janë mesatarisht 8-9 milionë euro”, tha Duka.

Gjithsesi, ai ka një këshillë për klubet e Superligës.

“Duhet të bëjmë aq futboll sa kemi të ardhurat. Sa prodhojmë në atë lloj niveli gare duhet të jemi. Ekipet e kategorisë Superiore në Shqipëri me një menaxhim të mirë mund të jenë me një bilanc pozitiv. Disa prej tyre janë”, tha Duka.

Përveç këshillës, ja ku vjen një kërcënim.

“Deri më sot ne nuk është se kemi marrë ndonjë masë për të përjashtuar nga aktivitete apo për të zbritur nga një kategtori më poshtë. Duhet të jemi akoma më strikt dhe duhet t’i ndihmojmë që të jenë me bilanc pozitiv dhe në të njëjtën kohë mos t’i lejojmë për të vazhduar me bilanc negativ”, tha kreu i FSHF-së.

Së fundmi, një ngacmim për përzgjedhjet në kombëtaret e moshave, ku përflitet se ka padrejtësi dhe korrupsion.

“Selektimi sot nuk bëhet nga një indidvid. Selektimi bëhet nga i gjithë stafi teknik i Federatës së Futbollit dhe sot e them me bindje, në edicionin që jemi, që nuk ka shans që të selektohet një njeri që nuk e meriton. Të gjitha të tjerat që fëmija im është si Maradona por nuk e thirrin janë legjenda urbane. Është i gjithë stafi, të gjithë trajnerët, drejtori teknik bashkë me ta, të cilët shkojnë në fushë, japin vlerësimet individuale të pavarur nga njëri tjetr pa ia ditur emrin lojratir, vetëm me numra”, theksoi Duka./abcnews.al

isa-mustafa.jpg
G. P.11:23 | 10/02/2019

Në “Balkan ABC” këtë javë do ndiqni një intervistë që drejtori i informacionit të Klan Maqedonisë, Seladin Xhezairi, ka zhvilluar me kryetarin e LDK-së, Isa Mustafa.

Marrëveshja mes Kosovës dhe Serbisë, qëndrimi i opozitës kosovare, tarifa ndaj produkteve serbe, dhe shumë të tjera janë disa prej çështjeve të trajtuara në këtë intervistë./abcnews.al

selman-sheme.jpg
G. P.13:20 | 09/02/2019

“Parqet kombëtare të Shqipërisë” është botimi i ri që i është shtuar vitrinave të librarive. Ky album unikal në llojin e tij është punuar nga një grup studiuesish dhe një sërë fotografësh. Për të folur rreth tij ishte i ftuar në ABC News edhe një prej autorëve të librit, Profesot Doktor Selman Sheme.

“Parqet kombëtare bëjnë pjesë në atë që quhet zona të mbrojtura. Në kompleksotet ato zona të Shqipërisë janë të virgjëra të paprekura. Këto zona me pasuri të mëdha mbrohen me ligj. Është miratur që në Shqipëri zona të tilla të mbrojtura janë disa. Janë gjashtë kategori. Por një një nga kategoritë janë parqet kombëtare. Gjithsej janë 15. Parqet kombëtare kryesore janë në Alpe, Thethi dhe Valbona të njohura nga qytetarët. Është Lura, Zalli i Gjoçajve, Qafshtama, Dajti, Tomorri, Prespa, Jabllanicë-Shebenicë. Është pylli i Hotovës, Bredhi i Drenovës dhe në zonën bregdetare të Adriatik Jonit është Divjaka, Sazan-Karaburuni, Llogaraja dhe Butrinti. Parqet janë ato zona të mbrojtura që kanë vlera jashtëzakonshme shkencore, por edhe ekologjike, kulturore, turistike”, u shpreh profesori.

Selman Sheme theksoi se albumi ka 255 foto të realizuar nga një grup fotografësh. Teksti i librit është përkthyer në Anglisht dhe turistët e huaj mund të njihen me bukuritë e Shqipërisë.

“Kemi parë në terren, kemi bërë ekplorim të këtyre parqeve dhe produkti i kësaj pune shoqëruar dhe me punën e një grupi fotografësh në bazë të sugjerimeve tona janë bërë fotot që ilustrojnë. Albumi ka 300 faqe dhe ka njëherazi 255 foto që ilustrojnë dhe në mënyrë vizuale perceptohet natyra, peizazhi. Teksti shkencor ëhstë përtkhyer në anglisht. Është i lexueshëm nga çdo qytetar jshtë vendit tonë. Lehtësisht është i lexueshëm perceptueshëm nga vizitorët e huaj. Ka dy muaj që ka dalë në botim. Botuesi do ta shpërndajë fillimisht në Ballkan qdhe pastaj në Europë që të njihet vendi jonë. Kryesisht është e njohur Valbona dhe Thethi”, tha Sheme./abcnews.al

47263646_303.jpg
ent ela16:59 | 28/01/2019

Me rastin e hapjes së ekspozitës personale në Berlin, Deutsche Welle ka intervistuar kryeministrin e Shqipërisë Edi Rama, i cili duke iu përgjigjur pyetjeve mes politikës dhe artit premton: “Nuk do plakem keq”

Edi Rama hapi në Berlin ekspozitën e tij të dytë personale brenda një kohe të shkurtër në Gjermani. Gjatë vizitës së tij private, Rama nuk pati asnjë takim me përfaqësues zyrtarë. Në këtë mënyrë nis intervista për Deutsche Welle e kreut të ekzekutivit Edi Rama.

I pyetur nga gazetari nëse fakti që shpesh herë pikturon mbi dokumente zyrtare, ka lidhje me përzierjen e artit dhe pikturës, Rama përgjigjet thjesht: se politika këtu nuk ka asnjë lidhje:

“Unë thjesht gjatë kohës së punës vizatoj, vizatoj gjatë takimeve, vizatoj gjatë telefonatave, gjatë momenteve të pauzave dhe është një proces krejt i natyrshëm, ku dora ndjek njërin sy dhe njëri sy ndjek dorën, ndërkohë që vëmendja është e gjitha e përqendruar tek diskutimet, tek puna, tek vendimet për t’u marrë, tek çështjet për t’u adresuar”.

Për sa i përket politikës së jashtme nëse aktualisht vendi i ka marrëdhëniet më të mira me Berlinin apo Uashingtonit, Rama u shpreh se Shtetet e Bashkuara të Amerikës kanë qenë të angazhuara dhe mbështetëse të Kosovës qysh në ditën një dhe pa Shtetet e Bashkuara të Amerikës Kosova nuk do të ishte çliruar dot nga kthetrat e Beogradit dhe nuk do të ishte dot shteti i pavarur që është sot. K

ështu që Shtetet e Bashkuara të Amerikës kanë qenë qysh në ditën një mbështetëse të palëkundura të zhvillimit të demokracisë në Shqipëri dhe qysh në ditën një Shqipëria ka qenë qartësisht e shprehur për partneritetin strategjik me Shtetet e Bashkuara të Amerikës, pavarësisht se kush ka qenë në qeveri, e majta dhe e djathta.

Sërish duke folur për Kosovën Rama theksoi se dialogu me Serbinë është i domosdoshëm dhe duhet të përfundojë me një marrëveshje historike mes dy vendeve. Por Rama nuk ka pranuar të përgjigjet për sa i pëket paralajmërimit për protesta nga opozita shqiptare, duke thënë se nuk flet për politikën e brendshme kur është jashtë vendit

Dhe pse nuk ka dhënë detaje se ku e sheh veten në tardhmen, Rama përfundoi intervistën duke thënë se nuk do të plakek keq, si ata që nuk larghen dot nga politika kur mund të bëjnë dicka shumë më fisnike në moshën e tyre…

Ekspozita e titulluar “Uorks” qëndron e hapur deri në datën 9 Mars. /abcnews.al

de-biassi.jpg
G. P.13:47 | 19/11/2018

Ish-trajneri i kombëtares, Gianni De Biasi, flet për emisionin “Pressing” në ABC News për situatën aspak pozitive që po kalojnë kuqezinjtë, veçanërisht pas humbjes dërrmuese me Skocinë. Ish-tekniku italian mendon se duhet një analizë e fortë, por edhe zhvillime, tashmë që është vënë në pikëpyetje fati i trajnerit aktual Kristian Panuçi.

Ekipi kombëtar i futbollit po kalon një moment aspak pozitiv shumë delikat dhe me shumë pikëpyetje rreth vazhdimësisë së pankinës. Humbja dërrmuese e së shtunës me Skocinë në “Loro Boriçi” dikton domosdoshmërisht zhvillime dhe një analizë të fortë. Gianni De Biasi, trajneri i kombëtares së dikurshme në Europianin e Francës, sonte në mbrëmje në studion e “Pressing” bën një rezyme të plotë se çfarë po ndodh në këtë ekip. Ish-tekniku, prezent në shumë sfida të epokës Panucci jep përgjigje shumë pyetjeve në lidhje me momentin aspak normal që po kalon kjo skuadër dhe pritshmërive që e presin në vijëmësi.

De Biasi: “Një humbje që vjen direkt pas asaj në Izrael çka duhet të përfundojë në një analizë shumë shumë të thellë. Unë mendoj që kemi bërë shumë pak në atë ndeshje që në pësimin e golit të parë. Të pësosh golin e parë dhe të luash me 10 lojtarë bëhet shumë shumë e vështirë sidoqoftë kjo disfatë kërkon analizën e saj të detajuar.”

Situata aktuale. Si e lexon ai nga jashtë? Ai përgjigjet ekipi trajnerit? Çfarë rekomandon? Çfarë ka që nuk shkon aty? A ka ndryshuar filozofia e lojës së tij me këtë aktuale? Pse kaq ndryshime taktike? Këto dhe shumë të tjera marrin përgjigje nga Gianni de Biasi në “Pressin” në orën 22:00 në ABC News shoqëruar më pas me një panel gazetarësh në debatin për ekipin kombëtar të futbollit pas disfatës së shëmtuar me Skocinë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono