Inter
Formacionet e ndeshjes

Vidal.png
Vladimir Prenga11:01 | 07/12/2019

Barcelona ka një objektiv dhe plan për të afruar në ekip pasuesin e Luis Suarez. Drejtuesit e klubit katalanas duan një lojtar që t’i japë mundësinë uruguaianit të pushojë, pasi ai nuk ka freskinë fizike të dikurshme.

Lautaro Martinez shikohet si lojtari ideal për sulmin e Barcelonës dhe “Mundo Deportivo” shkruan se për të arritur të argjentinasi do përdoret “karta” Arturo Vidal. Mesfushori i Kilit nuk ka shumë hapësira te spanjollët dhe do të ishte i gatshëm ta merrte në konsideratë një ndryshim ambienti.

Interi dhe Conte e kanë në shënjestër mesfushorin, madje e duan që në janar. Ai mund të përdoret për të ulur çmimin e Martinez, por zikaltrit nuk e mendojnë shitjen e tij në janar. Shanset që të ndodhë një lëvizje e tillë janë më të shumta në verë. /abcnews.al

Lautaro Martinez

 

de-paul.jpg
Klejdi Kaimi10:26 | 07/12/2019

Mesfushori i Udinezes, Rodrigo De Paul, beson se trajneri i Interit, Antonio Conte, është një nga tre trajnerët më të mirë në botë, së bashku me Pep Guardiola dhe Maurizio Sarri. Paraqitjet e mira të argjentinasit në Seria A e kanë futur atë në merkato, ku klube si Inter, Juventus dhe Napoli kërkojnë shërbimet e De Paul.

”Udineze më dha mua ëndrrën italiane dhe ndjej përgjegjësi sa herë e vesh këtë fanellë. Për mua Conte është një nga më të mirët në botë, bashkë me Sarrin e Guardiolën, por mos më pyesni për radhitjen. Unë besoj se gara për titullin kampion do të shkojë pikë më pikë deri në fund. Vendi i parë nuk do të ketë distancë të madhe nga vendi i dytë, siç jemi mësuar ta shikojmë vitet e fundit,” tregon De Paul në një intervistë për ‘Corriere dello sport’.

”Lautaro? Më vjen mirë për shokun tim. Ai është i lumtur, po bën mirë dhe ndjehet i rëndësishëm për Interin. Ai ka gjetur një trajneri i cili i ka dhënë shumë besim dhe kjo duket. Fusha po e tregon punën e bërë nga Conte”. Kur mesfushori pyetet nëse ai vlen 40 milionë  €, ai përgjigjet: ”Nëse unë vlej aq para, është vetëm nga ju gazetarët. Për mua kjo pjesë nuk ka shumë rëndësi, mendoj vetëm për futbollin e luajtur”. /abcnews.al

Conte.png
Vladimir Prenga23:54 | 06/12/2019

Antonio Conte, trajneri i Interit, pas ndeshjes me Romës, deklaroi për Sky Sport: “Kur flisni për zotërimin e topit, për rastet, shkoni dhe shikoni ndeshjen dhe do të vini re se Mirante ka qenë më i miri në fushë. Sot kishim raste, rrezikuam ndaj një ekipi të mirë dhe e gjithë merita shkon për djemtë, të cilët dhanë gjithçka në fushë. Duhet të shënojmë, mundësitë i kemi pasur dhe madje të pastra. Kishte edhe disa gabime, që vijnë nga presioni. Duhet të ishim më të këqij për ta dërguar topin në rrjetë. Gjithsesi nuk kam asnjë kritikë për lojtarët, pasi ata dhanë gjithçka”.

“Candreva? Gjendja e tij tani është gjëja e fundit që na vjen në mendje. Mendojmë të pushojmë dhe nuk dua të flas për të dëmtuarit tani. Të martën na pret një ndeshje e vështirë me Barcelonën dhe 11 vetë do të jenë në fushë”.

“Duhet të përpiqemi të shkojmë në mënyrën më të mirë deri në pushim të kampionatit. E dimë që është e vështirë, por në të njëjtën kohë jam i lumtur që djemtë po reagojnë mirë. Publiku duhet të na mbështesë dhe në këtë moment është e domosdoshme diçka e tillë. Sot pati vërshëllima kur ndalohej loja. Të gjithë tifozët duhet ta kuptojnë: ata duhet të na mbështesin, jo të na fishkëllejnë në gabimin e parë.  Nuk është e lehtë të luash në San Siro. Disa lojtarë janë të rinj, të gjithë kanë nevojë për ndihmë. Doja ta thosha këtë, pasi grupi duhet mbrojtur dhe që të kuptohet që këta djem duhen mbështetur gjithmonë”.

“Presingu lart? Kur bëni presing lart, nëse arrin ta marrësh topin atëherë mund të shkosh menjëherë te porta e kundërshtarit. Nëse nuk ndodh, atëherë aspekti negativ është që i lë hapësirë kundërshtarit. Ndaj duhet shumë kujdes për ta bërë diçka të tillë. Ekipi e bëri mirë, madje ndaj një ekipi që e mban topin dhe ka lojtarë me aftësi të mira dribluese. Ishte diçka e studiuar prej nesh”.

“Por, duhet thënë që sot Mirante bëri një paraqitje super. Ishte më i miri në fushë dhe shpëtoi disa herë Romën nga goli. Kur fitojmë, e bëjmë të gjithë së bashku. Edhe kur nuk fitojmë është përgjegjësi e të gjithëve dhe jo vetëm e sulmuesve. Në këto lloj ndeshjesh duhet të shënosh kur e ke mundësinë, pasi më pas edhe ekuilibrat ndryshojnë në lojë”. /abcnews.al

inter-roma-ndeshja.jpg
Vladimir Prenga22:46 | 06/12/2019

Interi dhe Roma treguan limitet e tyre sonte, në një ndeshje që u mbyll në barazim pa gola. Zikaltrit, kryesues në Serie A, i lanë terren verdhekuqve që në fillim, por kishin mundësinë më të mirë të shënimit me Belgun Romelo Lukaku.

Gjithsesi Mirante tregoi vlerat e tij dhe e ndali sulmuesin e Interit. Handanovic në krahun tjetër nuk u vu në vështirësi dhe e mbajti rrjetën e paprekur. Roma kishte kontrollin e lojës, por pa Dzeko në fushë e kishte të vështirë të ishte e rrezikoshme.

Në pjesën e dytë ishte Interi disi më lart, por jo mjaftueshëm për të bërë diferencën dhe për të shkuar te goli që do të vendoste fituesin. Asnjëra skuadër nuk dëshironte të humbte dhe minutat e fundit nuk ishin të mjaftueshme për të luajtur gjithçka për gjithçka.

0-0 dhe nga një pikë për të dyja skuadrat. Interi mbetet në krye, me 38 pikë dhe shpreson që Juventusi të ndalet nesër me Lazion. Roma ngjitet për momentin në vendin e katërt, me një pikë më shumë se Cagliari, surpriza e deritanishme e Serie A.

SERIE A / JAVA 15
INTER-ROMA 0-0

INTER (3-5-2): Handanovic; Godin, De Vrij, Skriniar; Candreva (Lazaro 45+2′), Vecino, Borja Valero (Asamoah 72′), Brozovic, Biraghi (D’Ambrosio 88′); Lukaku, Lautaro. Trajner: Conte

ROMA (4-2-3-1): Mirante; Santon (Spinazzola 16′), Mancini, Smalling, Kolarov; Veretout, Diawara; Mkhitaryan (Florenzi 89′), Pellegrini, Perotti (Dzeko 67′); Zaniolo. Trajner: Fonseca

Kartonë të verdhë: Godin 61′, Lazaro 62′, Brozovic 80′ / Mancini 77′

Atletico.jpg
Veronik Istrefaj10:28 | 06/12/2019

Atletico Madrid nuk ka ndërmend të presë dhe sipas medieve spanjolle, oferta e parë për Olivier Giroud ka mbërritur në tavolinën e Chelsea. Sulmuesi francez është objektivi kryesor i Interit, po zikaltërit po presin në një ulje të shifrave të kërkuara nga lojtari, i cili synon 6.5 milionë euro në sezon.

Atletico ka financa shumë më të shëndosha se Interi dhe tashmë, konsiderohet si skuadra favorite për të arritur te firma e kampionit të botës. Giroud nuk po luan thuajse fare te skuadra e Chelsea, pasi Lampard preferon emra si Abraham dhe Batshuyai.

Kjo gjë ka shtyrë sulmuesin francez të kërkojë largimin dhe te Chelsea, janë gati ta lënë të lirë për 5 milionë euro. Problem mbetet vetëm paga e lojtarit, pro Atletico duket gati të nënshkruajë me shtatlartin./abcnews.al

Lukaku-Martinez.png
Veronik Istrefaj09:04 | 06/12/2019

Sulmuesi i Interit, Romelu Lukaku, po bën shumë mirë brenda fushave të lojës për zikaltërit, por jashtë saj, krijon shumë polemika. Pasi iu doli kundër tifozëve dhe UEFA-s për racizmin në Itali, sulmuesi ka dalë dhe kundër medieve italiane, konkretisht Corriere Dello Sport, duke i quajtur idiotë. Në Instagramin e tij, bomberi belg shkroi:

“Në vend që të përqendrohet te sfida mes dy skuadrave, “Corriere dello Sport” ka përdorur titullin më idiot që kam parë në karrierën time. Në këtë mënyrë nxitet racizmi.

Në vend që të flitet për një ndeshje të bukur që do të luhet në San Siro mes dy skuadrave të mëdha… Edukimi është çelësi. Ju të “Corriere dello Sport” duhet ta bëni më mirë punën tuaj. Faleminderit të gjithë tifozëve dhe gazetarëve të tjerë për mbështetjen dhe të shikojmë të gjithë përpara drejt ndeshjes së ardhshme.

Forca Inter!”/abcnews.al

Lautaro-Martinez.png
Igli Nikolli20:31 | 05/12/2019

Drejtuesit e Inter po punojnë për të përforcuar kontingjentin e Antonio Contes, por edhe për të rinovuar me disa nga yjet e ekipit. Forma e mirë dhe golat e shumtë të shënuar këtë sezon kanë tërhequr vëmendjen e shumë klubeve europiane për Lautaro Martinez.

Argjentinasi ka një kontratë deri në vitin 2023 me klubin zikaltër dhe klauzola e largimit të tij është 111 milionë euro. Një shifër e tillë nuk është aspak problem për klubet e mëdha dhe diçka e tillë shtyn Interin t’i ofrojë rinovimin sulmuesit.

Agjentët e 22-vjeçarit pritet të zbarkojnë në Milano sipas mediave italiane, teksa drejtuesit kanë gjithçka gati. Lautaros do t’i shkojë rroga në 3.5 milionë euro në sezon (dyfishohet) dhe kontrata e re do të zgjasë deri në vitin 2025. Pika kyçe është klauzola e largimit.

Kryesuesit e Serie A duan ta heqin fare, por nuk përjashtohet një dyfishim i saj. Palët janë afër arritjes së marrëveshjes dhe së shpejti mund të vijë akordi zyrtar, një lajm që po e presin me padurim tifozët e Interit. /abcnews.al

Materazzi.png
Igli Nikolli19:29 | 05/12/2019

Zlatan Ibrahimovic nuk duhet ta acarosh kurrë. Hakmarrja e tij është e sigurt, edhe pse mund të ndodhë pas 4 vitesh. Sulmuesi suedez i është rikthyer dëmtimit të Marco Materazzit gjatë një derbi midis Milanit dhe Interit.

38-vjeçari ishte pjesë e kuqezinjve dhe në një moment realizoi një veprim akrobatik për t’i marrë topin mbrojtësit zikaltër, më saktë për ta dëmtuar. Ibra rrëfen gjithçka në një prononcim për suedezen GQ, aty ku pranon se ndërhyrja e tij ishte me qëllim.

Isha pjesë e Juventusit dhe luanim përballë Interit në një ndeshje të vitit 2006. U dëmtova dhe u detyrova të dilja jashtë loje pas një ndërhyrje vrasëse të Materazzit. Pasi kalova te Milani, gjatë një derbi, Materezzi nisi të më karikojë në pjesën e dytë.

Vendosa t’i bëj një ndërhyrje taekwondo dhe ai përfundoi në spital. Stankovic më pyeti: ‘Pse e bërë këtë, Ibra?’ Unë iu përgjigja: ‘Po e prisja këtë moment prej 4 vitesh, ja përse‘ dhe u largova prej aty“, zbulon Zlatan Ibrahimovic. /abcnews.al

Lautaro.jpg
Klejdi Kaimi16:05 | 05/12/2019

Forma e mirë e shfaqur këtë sezon nga Lautaro Martinez e ka kthyer atë në një nga lojtarët më të kërkuar të momentit. Barcelona ka kohë që e monitoron me kujdes situatën, por në ditët e fundit duket se edhe Manchester City i Guardiolës ka shfaqur interes për sulmuesin argjentinas.

”Ne e pëlqejmë Lautaron. Ai është një lojtar i kompletuar dhe tashmë luan në nivele të larta,” ka deklaruar Eric Abidal, i cili mban rolin e drejtorit sportiv tek katalanasit. Ndërkohë nga ana tjetër City me një kërkesë specifike nga trajneri Guardiola, mund të paraqesë një ofertë në merkaton e janarit për Lautaron, siç raporton ‘Sky Sports’.

22-vjeçari iu bashkua Interit në verën e 2018 për shumën e 25 milionë € nga Racing Club. Klauzola e sulmuesit me klubin milanez është plot 111 milionë €, ndërkohë që ai është në bisedime me drejtuesit për rinovimin e kontratës, ku do të ketë dhe rritje page. /abcnews.al

Lukaku.jpg
Klejdi Kaimi13:15 | 05/12/2019

Romelu Lukaku është më i lumtur se kurrë tek Interi. Që nga transferimi i tij këtë verë nga Manchester United në Milano, sulmuesi është rikthyer të jetë protagonist me lojën dhe golat e tij. Këtë fakt e shpreh dhe trajneri i Belgjikës, Roberto Martinez, i cili tregon se Lukaku ka rilindur tek Interi.

”Duket qartazi marrëdhënia shume e mirë e tij me Conten. Transferimi tek zikaltrit i ka bërë shumë mirë Lukakut. Po flasim për një lojtar të madh. Si kur luan për Belgjikën si për Interin, Romelu jep maksimumin e tij. Është e vërtetë që në muajt e fundit tek United ai nuk ishte më i lumtur. Tashmë ai ndihet i lumtur pasi e konsideron veten të rëndësishëm për ekipin e tij,” deklaron Martinez për ‘Corriere dello Sport’.

26-vjeçari duket se është përshtatur shumë shpejt me kampionatin italian. Në sezonin e tij të parë në Seria A, sulmuesi belg numëron 10 gola në 14 ndeshje. Besimi dhe marrëdhënia shumë e mirë me trajnerin Conte, e ka rikthyer dhe një herë Lukakun në qendër të vëmendjes. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono