Idro Seferi

fshat.jpg
G. P.19:59 | 03/02/2019

Fshati Leran i Preshevës është një vend ku serbët dhe shqiptarët jetojnë bashkë si fqinj, ndajnë veglat e punës dhe gjithashtu fatin e tyre. Kur vjen fjala tek çështja e Kosovës, ata thonë se më shumë se sa zgjidhja i shqetëson vëmendja e institucioneve që deri më sot rezulton e munguar.

 

Ky është Korridori i Dhjetë, një trase e rëndësishme transporti për Evropën. Shqiptarët që jetojnë në pjesën që mund të ngelet në Serbi, thonë se kushtet për jetesë janë të vështira. Në fshatin Leran, ku shqiptarë e serb jetojnë bashkë, familja Mehmeti punojnë në bujqësi nga të rinjët deri tek gjyshi. Ndihma nuk kanë dhe subvencione për punë nuk marrin. Nëse shkëmbëhen, siç thonë, ose të gjithë ose askush pasi njerëzit i braktisin pronat.

Burhan Mehmeti: Këmbimi kur të jetë këmbim le të bëhet për krejt jo veç për dikë po e dikë jo. Ne komunë nuk kemi këtu, komunë kemi Preshevën. E ku do bëjmë në komunën? Këto duhet krejt me i lënë dhe me shku diku. Me i shit s’ka kush i blen.

Serbët këtu fillimisht nuk duan të flasin lehtë. Edhe ata si bashkëfshatarët shqiptarë kanë ikur, në fshat rrinë ata që nuk kanë shumë zgjidhje. Kryefjala e përbashkët etknike e problemit këtu është varfëria. Belgëzim Kamberi, aktivist për të drejtat e njeriut, thotë se Lugina e Preshevës, ka patur gati aspak investime. Kurse të drejtat e shqiptarëve janë trajtuar si problem i brendshëm i Serbisë pavarësisht se në jetën e këtushme problemet Kosovë-Serbi u kanë kushtuar. Në çfarëdo platofme ata duhet të përmenden në marrëveshjen përfundimtare.

Belgëzim Kamberi: Lugina e Preshevës është përjashtuar dhe problemet veçse janë rritur dhe nuk kemi pasur zgjidhje, por në rastin më të keq kemi pasur migrim të popullatës, qoftë të shqiptarëve apo të serbëve. Në këtë rast është jashtëzakonisht e rëndësishme që pavarësisht pranisë fizike apo jo të përfaqësuesve të Luginës së Preshevës në dialog, tema e çështjes së Luginës së Preshevës duhet të jetë në dialog.

Pasdite në fshat. Para dyqanit dhe kafenesë së lagjes rrinë bashkë. Aty arrinë Predrag Trajkoviç, i punësuar herën e fundit në vitin 2003. Tani edhe ai rri me duar në xhepa. Për shqiptarët betohet se nuk ka patur asnjëherë probleme.

Predrag Trajkoviç: Nuk kam frikë sido që të vendoset pasi nuk i kam borxh askujt. Nuk duhet të vuajnë as shqiptarët, as ne. Ata nuk më pengojnë e as unë ata. Këto janë marrëzira, ne duam të jetojmë.

Pas fitimit të besimit, Predrag, insiston të na tregoj një lagje në brendësi për ilustrim. Tomisllav jeton këtu me bashkëshorten, Sllavkën. Fëmijët janë larguar dhe pensionin e kanë rreth 80 euro. Të sëmurë, thonë se nuk kanë as për bukë. Në shtëpi gjithcka kundërmon si një gjë e harruar me shekuj. Banorët e këtij fshati të entuziazmuar për të treguar historinë e tyre, thonë se është në rregull që politika ta zgjidhë problemin, por para kësaj ftojnë liderët të vijnë në këtë fshat pasi kanë shumë porosi t’ua thonë në fytyrë./abcnews.al

v.jpg
G. P.19:19 | 29/11/2018

Në reagimin e radhës në lidhje me taksën e Prishtinës zyrtare, presidenti Aleksandër Vuçiç ka deklaruar se Serbia i ka opsionet e kufizuara, pasi e ka humbur kontrollin e territorit në Kosovë. Ndërkohë, kryetari i Listës Serbe ka akuzuar Bashkimin Europian se po hesht lidhur me situatën.

Presidenti serb, Aleksandër Vuçiç ka kërkuar nga serbët e Kosovës protesta të qeta, pavarësisht vendimeve të Prishtinës. Fillimisht, ai foli gjatë një aktiviteti të zakonshëm, ku pranoi se mundësitë e Serbisë janë të vogla.

Aleksandër Vuçiç, president i Serbisë: “Natyrisht nuk jemi në një pozitë të mirë, pasi nuk kontrollojmë më organet tona shtetërore dhe asnjë pëllëmbë të territorit të saj. Kemi vetëm popullin tonë që është i vendosur të luftojë për të drejtat e tij dhe Serbinë që do t’i ndihmojë”.

Serbët e Kosovës arritën pasdite në presidencë për të diskutuar për veprimet e tyre. Presidenti është kujdesur që Serbia dhe serbët të mos bëjnë veprime të nxituara dhe incidente. Pas takimit, ata dolën për të thënë planet e tyre në të ardhmen, pasi ofruan dorëheqjen.

Goran Rakiç, kryetar i Listës Serbe: Këto vendime nuk janë kundër Serbisë, por kundër serbëve të Kosovës dhe qëndrimit të tyre atje. Nuk është hera e parë që duan ta marrin veriun dhe gjendja në terren është alarmante. Bashkimi Evropian hesht. Presidenti na kërkoi të bëjmë protesta të qeta”.

Serbia, pavarësisht reagimeve ndërkombëtare, do të mundohet të lobojë kundër vendimit të Kosovës, pasi siç thanë krerët e shtetit serb, vendimi vazhdon të jetë kërcënim për paqen./abcnews.al

dubaiii.jpg
G. P.22:11 | 19/11/2018

Mes Prishtinës dhe Beogradit ka polemika për shkak të vendimit që pritet të merrët nga INTERPOL për pranimin  ose jo të Kosovës. Analistët japin mendime të ndryshme për këtë çështje.

Vendimi i Asamblesë së Përgjithshme të Interpol-it që është mbledhur në Dubai, për pranimin apo jo të Kosovës në këtë organizëm, ka ngjallur polemika të rrepta mes palës kosovare dhe asaj serbe. Përderisa Prishtina zyrtare e arsyeton nevojën e aderimit me luftimin e krimit të organizuar e të korrupsionit, si një ndër levat kryesore për qëndrueshmërinë edhe rajonale, Beogradi pohon të kundërtën, se pranimi i Kosovës në Interpol do t’u mundësonte strukturave terroriste të posedojnë të dhëna për personat të cilët dyshohen për vepra të rënda penale.

Analistët Milivoje Mihajloviç dhe Idro Seferi duke folur për këto debatet që shoqërojnë verdiktin e Asamblesë së Përgjithshme të Interpolit në Dubai, kanë shfaqur mendimet e tyre për kërkesën e Kosovës që të bëhet anëtare me të drejta të plota në këtë organizëm. Mihajloviq ka lënë të kuptohet se gjasat janë më në favor të palës kosovare, për shkak se, thotë ai, vendet të cilat e mbështesin Kosovën janë më të fuqishme se ato që përkrahin Serbinë.

“Tensioni është tepër i lartë. Çështja e pjesëmarrjes ose e hyrjes së Kosovës në Interpol po shtrohet si çështje të jesh a të mos jesh, edhe në Beograd, edhe në Prishtinë dhe prandaj nervoza është shumë e madhe si tek njëri ashtu edhe delegacioni tjetër. Është legjitime që të dyja palët të lobojnë”, thekson Milivoje Mihajloviç.

Ndërkaq, kolegu Idro Seferi është i mendimit se përtej tensioneve aktuale politike aderimi i Kosovës në Interpol do të ishte me rëndësi për sigurinë në rajon.

“Politikisht është e rëndësishme, nëse kjo kalon, edhe për Serbinë, edhe për Kosovën. Për Kosovën do të jetë dëshmi se vazhdon të ketë mbështetje të fuqishme ndërkombëtare, kurse nga ana tjetër, për Serbinë, kjo mbase do të ishte një disfatë e madhe”, thekson Idro Seferi.

Këto komente ai dhe Mihajloviç i kanë bërë për TV Prva pas pretendimeve të medias serbe përfaqësuesit e Kosovës i paskan provokuar ata të Serbisë, të pranishëm në mbledhjen e Asamblesë së Përgjithshme të Interpolit./abcnews.al

angela-merkel.png
G. P.08:32 | 06/11/2018

Koalicioni qeverisës në Gjermani duket se po i reziston presioneve, të rritura pas performancës së dobët në zgjedhjet rajonale dhe paralajmërimit të Merkel për dorëheqje nga drejtimi i CDU-së. Në mbledhjen e radhës, aleatët kanë rënë dakord të vazhdojnë punën.

Koalicioni i madh në Gjermani duket se do të vazhdojë të qeverisë vendin, pavarësisht lëkundjeve nga rezultati i dobët në zgjedhjet lokale dhe paralajmërimit të Merkel se do të heqë dorë nga politika. Në përfundim të një takimi të mbajtur ditën e hënë mes aleatëve, Merkel tha se partia e saj CDU, Partia Social-demokrate dhe Unioni kristian-socialist i Bavarisë janë dakord për të vazhduar punën.

“Mendoj se e rëndësishme për social-demokratët, dhe natyrisht për ne si CDU, është se jemi gati të vazhdojmë zotimin që kemi marrë përsipër në kuadër të marrëveshjes së koalicionit”, tha Merkel.

Kancelarja nënvizoi se, mbështetja në radhët e partive për të vijuar punën e koalicionit është unanime.

“Që do të thotë se ekziston bindje tërësore se ne duhet të vazhdojmë punën, siç është rënë dakord në marrëveshje”, theksoi Merkel.

Javën e kaluar Merkel njoftoi tërheqjen nga posti i kryetares së CDU-së, por të hënën ajo nënvizoi se do të vazhdojë detyrën e kancelares deri në përfundim të mandatit, që skadon në 2021-shin.

Nga ana tjetër, social-demokratët, të ndodhur nën presion për shkak të performancës së dobët në zgjedhjet rajonale, braktisja e koalicionit qeverisës është jashtë çdo diskutimi. E pyetur në një konferencë shtypi pas takimeve nëse liderët politikë e kanë diskutuar një opsion të tillë me konservatorët, kryetarja Andrea Nahles u përgjigj prerë: “JO”./abcnews.al

bosnja.png
G. P.16:55 | 06/10/2018

Bosnja do të zgjedhë tre presidentet e saj, të cilët udhëheqin shtetin që prej përfundimit të luftës dhe marrëveshjes se Deytonit. Dy rivalët kryesorë janë presidenti i serbëve të Bosnjës, Millorad Dodik që shpesh kërkon pavarësinë e krahinës së tij dhe djali i ish-presidentit, Alija Izetbegoviç, i cili udhëhoqi në kohën e luftës. Analistët thonë se tensionet politike e mbajnë vendin larg normalitetit.

Banja Luka, kryeqyteti i serbëve të Bosnjës. Këtu nuk kanë ngelur shumë myslimanë. Republika serbe është një nga dy njësitë e Bosnjës. Që prej fundit të luftës serbët ende e kanë idenë e ndarjes. Kësaj ideje i prin, Millorad Dodik, presidenti i Republikës. I është futur garës për presidencë në vendin që nuk e do shumë, në Sarajevë.

Bosnja ka jetuar vështirë në ngërçin politik mes shumë ngatërresash administrative, qeverive e tre presidentëve. Një pjesë thonë se gjithçka është e kontrolluar.

Vladimir Kovaçeviç është gazetar me profesion. Ka bërë një karrierë në raportim korrupsioni e krimi. Ende punon ndonëse i kishte ndodhur edhe një sulm i cilësuar tentim vrasje. Nuk e di se nga kush e ka porosinë.

Vladimir Kovaçeviç, gazetar i BNTV: “Jam shumë i sigurt se problemet mes qytetarëve do të zgjidheshin shumë shpejt sikur të mos kishte politika nacionaliste që përiftojnë nga kjo gjendje. Ne kemi probleme serioze këtu dhe njerëzit nuk janë të egër dhe kjo gjëndje do të përmirësohej menjeherë”.

Shteti nën ndërtim bën thirrje për zgjedhje. Nga posterët politikanët flasin për përgjegjësi, besë, e dinjitet. Ndasia etnike është në tërë vendin në sisteme. Banja Luka dhe Sarajeva duken si rivalë e jo si një shtet.

Në anën tjetër, i biri i presidentit të luftës, Bakir Izetbegoviç fuqishëm kthen përgjigje. Betejat e të atit duket se nuk kanë mbaruar.

Analisti Puhalo thotë se kjo është një teknikë e thjesht politike e ndarjes dhe qeverisjes për politikën e këtushme.

Srdjan Puhalo, analist:Është formulë e lehtë për të qeverisur me një fuqi të madhe dhe përgjegjësi minimale. Pavarësia e republikës serbe, analuimi apo gjithçka e tillë janë vetëm mjete për qeverisje në mënyrë etnike dhe jo gjëra që do të ndodhin”.

Boshnjakët zgjedhin 13 qeveri, dy kryesore të kantoneve e federatës dhe presidenca është me sistem përfaqësimi, tre anëtarë të presidencës.

Dikur ky shtet ishte shembull i bashkëjetesës në ish-Jugosllavi. Lufta pikërisht e rrënoi më së shumti dhe ata tani mes vete, pavarësisht ngjashmërisë totale, flasin tre gjuhë jo vetëm politike./abcnews.al

aleksander-vucic-1.jpg
G. P.15:48 | 09/09/2018

Kanë qenë të ashpra reagimet në Beograd pas anulimit të vizitës së presidentit serb Vuçiç në Skënderaj. Zyrtarët serbë akuzojnë Kosovën për paaftësi duke thënë se shqiptarët njohin vetëm dhunën, dhe nëse do të jetë e nevojshme ushtria serbe është në gatishmëri.

Kryeministrja e Serbisë, Ana Brnabiç, i ka quajtur shqiptarët si të paparashikueshëm dhe ka thënë se Kosova nuk respekton marrëveshjet. “Jemi në gjendje të reagojmë”, ka thënë ajo. Reagimet në Serbi kanë qenë të ashpra.

Kanë reaguar ministri i Mbrojtjes, i Policisë dhe ai i Jashtëm. Vizitën e presidentit serb e kanë quajtur historike dhe kanë shkuar deri tek mundësia e intervenimit me ushtri nëse është e nevojshme.

Gazetari, Zoran Panovic, thotë se tani fillon realiteti i marrëdhënieve Beograd-Prishtinë.

Zoran Panoviç, gazetar: Ka qenë një fjalim me mesazhe paqeje me idenë se Vuçiç është i gatshëm për kompromis dhe vendime të mëdha, por nuk ka sqaruar thelbin e fjalës së vitit: përkufizimin”.

Deputeti i opozitës, Gjorgje Vukadinoviç, thotë se vizita ka edhe pasoja negative.

Gjorgje Vukadinoviç, deputet serb:Ky incident sa spontan edhe aq me regji u ka levërdisur të dyja palëve. Mund të ketë efekte negative për serbët e Kosovës, por jo për dialogun. Vuçiç ka ngritur kredibilitetin patriotik dhe njëkohësisht është edhe pacifist”.

Një pjesë e shtypit serb shkruan se edhe pas vizitës në Kosovë ende nuk dihet ideja e qartë e zgjidhjes pasi, Aleksandër Vuçiç nuk tha gjë të re. /abcnews.al

idro-seferiii.jpg
G. P.15:59 | 07/09/2018

Nuk kanë vonuar reagimet në Beograd pas refuzimit të presidentit Vuçiç për t’u takuar me kreun e shtetit të Kosovës Thaçi në Bruksel. Analistët e vlerësojnë këtë vendim si një goditje të rëndë për ecurinë e dialogut. 

Presidenti serb, Aleksandër Vuçiç është kthyer për në Beograd. Në mbrëmje pritet t’i drejtohet kombit dhe ta bëjë të ditur vendimin e tij nëse do të shkoj apo jo në Kosovë përfundimisht. Kjo situatë ka shkaktuar dyshime edhe për sigurinë e tij. Fillimisht u tha se problemi ishte Liqeni i Gazivodës dhe më pas Lugina e Preshevës.

Optimizmi i tepruar i ka dhënë fund kuptimit të çdo tentimi perëndimor, thotë Dushan Janjiç, i Forumit për marrëdhënie ndëretnike. Dialogu do të shtyhet për muaj të tërë.

Dushan Janjiç, Forumi për marrëdhënie ndëretnike, Beograd: “Kjo vë në pikëpyetje edhe përpjekjet e Berlinit dhe të gjitha qendrave të tjera se duan Ballkanin Perëndimor në Bashkimin Europian. Po të mos ishte kështu Mogherini nuk mund të kishte një vlerësim kaq të dobët dhe të drejtonte dialogun në këtë mënyrë. Kjo ka lejuar lojëra të tilla në traditën ballkanike. Kështu konflikti i ngrirë do të vazhdojë me muaj apo edhe vite”.

Ai thotë se vizita e presidenti serb në Kosovë tani nuk ka kuptim dhe mundësia e zgjedhjeve edhe në Serbi, por edhe Kosovë mund të duket si tema e ardhshme.

Dushan Janjiç: “Çfarë mund të tregojë Vuçiç tani? Që është i guximshëm apo provokator? Të tregojë se në mënyrë indirekte bashkëpunon me Thaçin? Nuk e besoj. Nuk mund të shkojë dhe të mos shpalosë tërë idetë pasi pritshmëritë janë rritur”.

Shtypi serb thotë se ende ekziston një mundësi e vogël për ta parë Vuçiç drejt Kosovës, por gjithçka është e paqartë. /abcnews.al

idrooo.jpg
G. P.14:40 | 30/08/2018

Serbia ka kërkuar hapur përkufizim me shqiptarët që një pjesë e quajnë shkëmbim territoresh apo ndarje. Kosova ka kërkuar Luginën e Preshevës. Presidenti serb do ta vizitoj Kosovën me 9 Shtator për të komunikuar me serbët gjatë dy ditëve qëndrim. Ndarja edhe mes serbëve ka shkaktuar kundërshti dhe reagime. Analistët në Beograd thonë se pyetja është se si do të paraqitet plani konkret. 

Presidenti serb, Aleksandër Vuçiç, në fillim të Shtatorit do të vizitojë serbët e Kosovës për të biseduar për zgjidhjen. Tani do të vijë me idenë e tij për ndarjen. Në mesin e serbëve ka patur shumë kundërshtarë të kësaj ideje. Por, duket se fuqishëm kreu serb shkon drejt saj.

Maja Bjellosh, analiste për Kosovën, thotë se kjo nuk është ide e re. Shumica e serbëve mendojnë se kjo është zgjidhja më e mirë. Politika nuk fliste hapur për të.

Maja Bjellosh, analiste për Kosovën: “Serbia do ta njohë Kosovën edhe nëse nuk do të vijë deri tek ndarja. Ekziston mesazhi nga bashkësia ndërkombëtare për njohjen e realitetit. Që nga viti 1999 ekziston ideja për njohjen e Kosovës në kufijtë ekzistues. Nga marrëveshja e Kumanovës, tërheqjen e forcave, pajtimin për punën e EULEX-it dhe marrëveshja e Brukselit kanë qenë njohje indirekte. Nuk duhet pritur një njoftim për shtyp për këtë”.

Bjellosh thotë se plani megjithatë nuk është konkret pasi duhet të jetë më i saktë. Një nga pyetjet që shtrohen është ndikimi i një vendimi të tillë.

Maja Bjellosh, analiste për Kosovën:Kjo sigurisht që do t’i lëverdiste presidentit të serbëve të Bosnjes, Millorad Dodik, pasi do të hapte mundësine e bashkimit të serbëve me Serbinë. Por, ekziston një porosi nga bashkësia ndërkombëtare për respektimin e integritetit territorial të vendeve të Ballkanit”.

Ideja e ndarjes pati kundërshtime ndërkombëtare fillimisht. Por, edhe progres si e tillë pas takimeve të para. Gjithsesi, enigmë ende është se si do të dukej ajo./abcnews.al

 

 

KOSOVA.mpg_snapshot_00.02-1280x720.jpg
ent ela19:28 | 16/08/2018

Çështja e Kosovës duket se ka përçarë Serbinë. Për një pjesë të shoqërisë dhe politikës serbe, përfshirë segmente në pushtet, Kosova është një çështje e mbyllur. Ndërsa për pjesën tjetër ajo duhet ende të zgjidhet. Sipas analistëve, gjithçka do të varet nga qëndrimi i Perëndimit. 

Serbia është e ndarë rreth idesë së zgjidhjes së problemit të Kosovës. Ndarja apo shkëmbimi i territoreve e vënë shoqërinë para idesë se a do ta njohë Serbia pavarësinë e Kosovës. Ekziston dilema se cfarë mbështetje ka kjo ide që për një pjesë duket punë e kryer. Eksperti Marko Savkovic, thotë se gjendja në kryeqytetin serb është e rënd pasi idetë kanë ndarë shoqërinë dhe kanë kthyer idenë e shteteve etnike.

Marko Savkoviç, Fondi Beogradas për Politika të Veçanta: “Mendoj se në radhët e partive në qeveri ka nga ato që do ta pranonin Kosovën dhe që e kuptojnë momentin historik për zgjidhjen. Por ka edhe nga ata që janë kundër. Kështu është edhe me opozitën për zgjidhjen e problemit, pavarësisht se ka kundër dhe pro”.

Shpreson që ideja e Asociacionit të Komunave Serbe të mos jetë larguar nga tryeza e bisedimeve. Por, nëse zgjidhje nuk ka Serbia do të ishte në gjendje të vështirë pasi kompensimi për të është i rëndësishëm.

Marko Savkoviç, Fondi Beogradas për Politika të Veçanta: “Pyetja kryesore është se si do të jetë Perëndimi, unik apo i ndarë. Me politikën e re të Rusisë këtu loja ka ndryshuar. Nëse në Perëndim shtrohet pyetja përse duhet zgjidhur problemin tani dhe nuk duhet lejuar është që Rusisë t’i pamundësohet qasja. Përkundër atmosferës së keqe besoj se viti 2019 ëshë viti i zgjidhjes”.

Krerët serbë nuk kanë hequr nga ideja e përkufizimit me shqiparët siç është quajtur, por kjo ka hapur shumë pyetje dhe sidomos reagimin e Berlinit kundër saj. /abcnews.al

Gazetar i ABC News: Idro Seferi

 

kroaciaa.jpg
G. P.16:56 | 16/07/2018

Ndryshe nga Franca, në Kroaci u festua qetë vendi i dytë dhe përkundër humbjes, kroatët ishin të lumtur, pasi realizuan një kthim të madh në futboll. Festa u bë në çdo zonë të vendit. Vukovari, dikur kryqendra e luftës së viteve ’90, tani feston dhe e sheh si rimëkëmbje, finalen e shtetit tashmë edhe anëtar i BE.

Ndryshe nga Franca, në Kroaci u festua qetë vendi i dytë dhe përkundër humbjes kroatët ishin të lumtur, duke arritur një kthim të madh në futboll. Festa u bë në të gjitha vendet e këtij shteti.

Vukovari, që dikur ishte kryqendra e luftës së viteve ’90 dhe ku ranë gjysma e viktimave, tani feston dhe e sheh si rimëkëmbje finalen e shtetit të fundit që u antarësua në BE.

Në rrugët e Kroacisë nuk ka ngelur njeri. Të gjithë kanë ikur të ndjekin ethet e futbollit. Në sheshin “Franje Tuxhman” të Vukovarit, qytetit të shkatërruar të luftës tani kroatët janë për finale.

Ndeshja fillon me entuziazëm. Vite pas luftës sporti tregon kthimin e fuqisë së shtetit ish Jugosllav. Pjesa e parë me pak fat, por kroatët arrijnë të shënojnë gol.  Francezët janë të vështirë, por për kroatët kjo eshtë festë gjithsesi.

“Jemi të lumtur pasi im atë ka mbrojtur në luftë Kroacinë dhe ata na kanë mundësuar ne këtë festë”.

“Lumturi e madhe pasi jemi popull i vogël dhe komb i madh në futboll”.

“Pas gjithë gjërave që kanë ndodhur në luftë këtu kjo për ne është lumturi e pafund”.

Pjesa e dytë zbeh paksa shpresat. Të gjithë janë të veshur në ngjyrat e simbolit të shahut e deri tek luku. Kroacia ende shpreson të jetë e para. Shënojnë golin e dytë.  Fundi nuk i dëshpëron dhe duartrokitjet nuk mungojnë, ashtu siç nuk mungon as mbështetja për çunat kroatë në Rusi.

“Kroacia është shteti i dytë në mjeshtrinë  e futbollit në botë. Dhe kjo është arritja më e madhe që pas pavarësisë e Kroacisë në këtë sport”.

Festa vazhdoi në tërë Kroacinë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono