humbje

skenderbeu-1.jpg
G. P.21:15 | 16/12/2018

Skënderbeu i ka bërë rrugë humbjet në Superligë, madje edhe kur luan në fushën e vet. Kështu i ndodhi edhe në ndeshjen e fundit me Luftëtarin, duke pësuar disfatë me shifrat 3-2. Kampionët kaluan të parët në epërsi me anë të Bregut që në minutën e 10-të, por gjirokastritët përmbysën gjithçka në fare pak minuta.

Në minutën e 25-të, Bregu barazoi sërish rezultatin dhe u desh të pritej fundi i ndeshjes që të shënohej goli vendimtar. Luftëtarit i erdhi në ndihmë arbitri që akordoi një penallti tepër të dyshimtë për miqtë. Nga pika e bardhë nuk gaboi sulmuesi Shkurtaj që vulosi rezultatin 3-2.

Kjo ishte humbja e pestë e Skënderbeut këtë sezon, diçka tepër e habitshme për një ekip që ka arritur të mundë dy herë Partizanin kryesues. Korçarët kanë zbritur në vendin e katërt, me me shumë gjasë mund të kalohen edhe nga Laçi e Flamurtari. Luftëtari, ndërkaq, u ngjit mbi Tiranën me 16 pikë, dhe ka më shumë shpresa për mbijetesë në Superligë./abcnews.al

durant-1280x720.jpg
G. P.17:05 | 15/12/2018

Golden State reagoi shpejt në basketbollin amerikan, duke arritur një sukses të rëndësishëm në Sacramento. Kampionët në fuqi, pavarësisht luhatjeve, mbeten pranë kreut.

Përgjigjia më e mirë pas një humbjeje, është fitorja. Kështu bëri edhe Golden State, madje në fushën e një skuadre shumë të mirë si Sakramento. Disfata me Toronton ishte tepër e hidhur, pasi ishte e thellë, brenda një shtëpi dhe ndaj një rivali për titull, por gjithsesi kampionët e dinë se sezoni do të jetë i gjatë. Përfundoi 130-125, në një sfidë tepër të fortë, ku Golden State kryesoi në pjesën më të madhe të kohës, por thuajse i shpëtoi ndeshja nga duart. U desh një rezultat i pjesshëm 17-2, në 3 minutat e fundit, që të arrihej fitorja e 20-të e edicionit.

Suksesi u arrit më së shumti falë treshes së madhe.

Stephen Curry shënoi 35 pikë, pati 7 topa në tabela dhe 6 pasime për kosh, kapiteni Clay Thompson shënoi 27 pikë, ndërsa Kevin Duranti e mbylli takimin me 33 pikë, 8 topa në tabela e 8 asistë. Nuk duhet harruar edhe Draymond Green, i cili vërtet shënoi pak pikë, por kontribuoi me 14 topa në tabela dhe 10 pasime për kosh. Sacramento tregoi se ka bërë përparim të madh, duke u matur si e barabartë me kampionët, ndonëse ende i mungon përvoja për gjëra të mëdha.

Gjithsesi, Golden State u shfaq shumë më i vendosur dhe i freskët fizikisht sesa ndaj Torontos, kur humbi me 20 pikë diferencë. Tashmë, kampionët kanë 20 fitore e 10 humbje, dhe janë në vendin e dytë në Perëndim, me vetëm 1 humbje më shumë sesa Denveri./abcnews.al

loss.jpg
G. P.13:45 | 13/12/2018

Reali po pëson humbje të rënda këtë sezon. Në Champions dhe në kampionatin spanjoll, madrilenët po turpërohen, ndërsa e ardhmja është e paqartë.

Një mbrëmje historike, por në versionin negativ. Reali pësoi humbjen më të rëndë europiane në “Bernabeu” në historinë e tij mbi 60-vjeçare kontinentale, dhe kjo, jo nga ndonjë rival i madh, por nga CSKA-ja e Moskës.

Gjithsesi, nuk ishte katastrofa e parë këtë sezon. Madrilenët e nisën me një 2-4 ndaj Atletikos, në derbin e luajtur për finalen e Superkupës së Europës në Gusht. Tronditja u bë më e rëndë me humbjen 0-3 në fushën e Seviljes për ligën spanjolle, dhe pozitat e trajnerit të asaj kohe, Julen Lopetegui, u lëkundën.

Ish-tekniku i Spanjës u shkarkua menjëherë pas turpërimit 1-5 në “Camp Nou” ndaj Barcelonës, dhe u mendua se diçka do të ndryshonte. Trajneri i ekipit B, ish-ylli argjentinas, Santiago Solari, mori drejtimin, por shpresa ishte që në fillim e paktë.

Pas 4 fitoreve relativisht të lehta, erdhi rrëzimi i madh i radhës, 0-3 në fushën e Eibarit, edhe ky krejt i pamenduar më parë. Diçka e panatyrshme po ndodh me klubin më të famshëm të botës, ajo që askush nuk po habitet që ekipi po mundet thellë.

Normalitet i hidhur edhe 0-3 me CSKA-në në Champions, që e goditi shumë Solarin.

“Jam shumë i mërzitur dhe i shqetësuar, – tha trajneri, – e di se po rrezikojmë shumë, e kam shumë të qartë. Duhet të marr përgjegjësinë time për këtë që ndodhi, pasi nuk ishim të mirë në asnjë sektor të fushës. Sidomos, pjesa e dytë ishte shumë e keqe. E vetmja gjë që vlen është se disa lojtarë pushuan, dhe disa të rinj morën përvojë duke luajtur titullarë”.

Edhe vetë gazetat sikur nuk u skandalizuan aq shumë.

“Marca”: Një natë për t’u harruar! Të bardhët pësuan humbjen më të rëndë europiane në “Bernabeu”. Isko u vërshëllye nga tifozët dhe u përplas me ta!

“AS”: Rezervat nuk vlejnë! Humbja më e rëndë europiane në “Bernabeu”! Marselo: Nuk mund të japim këtë imazh!

“Sport” e Barcelonës: Qesharake dhe vërshëllima në “Bernabeu”! Real Madrid-CSKA 0-3!

Tifozët ishin ndoshta të vetmit që u tërbuan plotësisht, aq sa vërshëllyen skuadrën, e sidomos Iscon.

Reali mbetet brenda çdo objektivi këtë edicion, por kush beson më se një ekip që turpërohet kështu, ka forcë të fitojë Championsin apo La Ligën?/abcnews.al

NBA-HUMB-LEBRON-XHEJMSI_ABC-M1-T1.mpg_snapshot_00.01-1280x653.jpg
G. P.18:03 | 08/12/2018

Lebron Xhejms nuk e shmangu dot humbjen e skuadrës së tij në ndeshjet e fundit në basketbollin amerikan. Ylli kryesor në botë provoi humbjen e 10-të të sezonit.

Jo gjithnjë mjafton një paraqitje e madhe në NBA. Lebron Xhejms nuk ishte përcaktues për Los Anxhelos Lejkërsat, ndonëse shënoi 35 pikë, kapi 8 topa në tabela, shërbeu 11 asistë dhe pati 2 vjedhje topi. Në fushën e San Antonios nuk qe e mundur të shmangej humbja, ndërsa u ngritën sërish dyshime për qendrueshmërinë e skuadrës së famshme nga Kalifornia.

Vendasit, të drejtuar nga trajneri-mjeshtër, Greg Popoviç, fituan 133-120. Xhejmsi nuk është se u la vetëm, pasi shumë mirë luajtën edhe Kuzma pikë, Boll, Kalduell-Poup apo Mekgi, por San Antonio u tregua ekip më i fortë. Demar Derozanin ishte heroi që shënoi 36 pikë, kapi 8 topa në tabela, e shërbeu 9 asistë. Kjo ishte disfata e 10-të e Lejkërsave, që zbritën në vendin e gjashtë në Konferencën Perëndimore. Po në Perëndim, Golden Stejti tregoi sërish se e ka lënë pas krizën.

Kampionët triumfuan 105-95 në një fushë të vështirë, si ajo e Miluokit, një prej ekipeve më të mirë të sezonit. Kjo dhe pse Kevin Duranti shënoi vetëm 11 pikë. Gjithsesi, plot 8 lojtarë miq ishin realizues, nga të cilët veçohen Kërri e Tompsoni me nga 20 pikë. Suksesi bëri që Golden Stejti të mbetej shumë pranë kreut të Konferencës, me një humbje më shumë sesa Denveri e Klipersat. Në ndeshjet e fundit në NBA, pësoi humbje skuadra më e mirë e ligës, Toronto, që u mund në Arenën e Bruklinit, 105-106. Edhe Oklahoma humbi, por ylli i saj, Rasëll Uestbruk pati një tjetër tripëll dabëll, me 24 pikë, 17 topa në tabela e 13 asistë./abcnews.al

goli.jpg
G. P.18:14 | 02/12/2018

Flamurtari pësoi një humbje të papritur dhe të rëndë në fushën e Kastriotit, duke mbetur larg zonës europiane në Superligë. Rezultatet e javës së fundit bënë që lufta për mbijetesë të ashpërsohet në maksimum.

Nuk luhet vetëm për titull, por edhe për Europën. Gjithsesi, duket se Flamurtari i cilësuar pretendent, po i largohet gjithnjë e më shumë edhe këtij objektivi. Fitorja ndaj Partizanit një javë më parë në Vlorë dha shpresa, por ja ku u bë thuajse e pavlefshme nga disfata në fushën e Kastriotit. Në stadiumin e Fushë Krujës, në një terren vërtet të vështirë për të luajtur futboll, vlonjatët nuk arritën të përshtateshin, dhe ishin pikërisht ata që u dëmtuan më shumë, si lojtarë me cilësi më të lartë.

Goli i shënuar nga afrikani Ogebugu në pjesën e parë përcaktoi fatin e ndeshjes së javës së 15-të të Superligës, duke e lënë ekipin e trajnerit Ilir Daja 12 pikë larg kreut dhe 5 pikë poshtë zonës europiane. Kohë ka për t’ia dalë, por Flamurtarit i mungon ende vazhdimësia. Kastrioti mund të kishte fituar më thellë, pasi pati në favor edhe një 11-metërsh, ndërsa i dha vetes shpresë për mbijetesën.

Suksesi bëri që skuadra e trajnerit Stavri Nica të parakalonte Kamzën dhe të ngjitej në vend të parafundit. Rezultati në Fushë Krujë, i kombinuar edhe me barazimin pa gola mes Laçit e Kamzës, bëri që lufta për mbijetesë në Superligë të ashpërsohej në maksimum. Luftëtari, Tirana, Kastrioti e Kamza ndahen vetëm nga 4 pikë, dhe secila prej tyre mund të shpëtojë, ose të bjerë në Kategorinë e Parë./abcnews.al

kategoria.png
G. P.19:51 | 11/11/2018

Tirana pësoi një tjetër humbje në Superligë, duke rrezikuar edhe më shumë për të rënë nga kategoria. Luftëtari e mundi me përmbysje në Gjirokastër.

Po shkon keq e më keq, dhe nuk dihet nëse mund të ketë shpresë. Tirana e madhe, 24 herë kampione dhe që dominonte kampionatet shqiptare, është kthyer në “të sëmurën” e Superligës, siç e tregoi edhe në Gjirokastër. Tjetër disfatë, këtë herë në fushën e Luftëtarit, në javën e 13-të, dhe sërish një ekip që nuk arrin të luajë futboll për 90 minuta.

Edhe pse kryeqytetasit kaluan të parët në epërsi me anë të afrikanit Sentamu, sërish nuk ditën të kontrollonin ndeshjen, e të ruanin rezultatin. Luftëtari i trajnerit Genatian Mezani meritoi gjithçka, të paktën për rastet që krijoi dhe për forcën psikologjike që tregoi në momentet më të vështira.

Fillimisht, barazoi me anë të Vasil Shkurtajt, menjëherë pas pushimit, ndërsa në minutat e fundit ktheu epërsinë në gol, me atë të brazilianit Dunga. Trajneri tiranas, Ardian Mema, mbeti sërish tepër i zhgënjyer me ekipin e tij, madje pas ndeshjes deklaroi se po mendonte dorëheqjen.

Me këtë humbje, Tirana ka vetëm 10 pikë, duke qenë shumë pranë vendit të fundit. Luftëtari, po ashtu, është keq në renditje, por tashmë u shkëput tri pikë përpara bardhebluve dhe ka më shumë shpresë për mbijetesën.

Në ndeshjen tjetër të luajtur paralelisht me atë në Gjirokastër, Kastrioti arriti një fitore të thellë 3-0 ndaj Kamzës, duke mbetur me shpresë për të mbijetuar në Superligë./abcnews.al

oshee-1280x764.png
G. P.12:04 | 01/11/2018

Konsolidimi i reformave, sipas ministrit të Infrastrukturës dhe Energjisë, Damian Gjiknuri, po jep efekte dhe po shëndosh financiarisht kompanitë publike.   Operatori i Shpërndarjes së Energjisë Elektrike tha ministri ka vendosur një rekord historik në humbjet e energjisë elektrike.

Nga zyra e kujdesit ndaj klientit në Kukës, ministri deklaroi se për nëntë muajt e parë të vitit ato arritën nën 24%. Kjo sipas Gjiknurit i ka bërë kompanitë të afta të përballojnë edhe sfida hidrike pa kërkuar të mbështeten nga buxheti i shtetit siç ndodhte më parë./abcnews.al

ardian-mema.png
G. P.21:22 | 22/10/2018

Ardian Mema e humbi ndeshjen e tij të parë në stolin e Tiranës. Kryeqytetasit u mundën në Vlorë nga Flamurtari dhe trajneri Ilir Daja e fitoi duelin me ish-ndihmësin e tij.

Për fat të keq, debutimet mund të jenë të hidhur. I tillë është ky i Ardian Memës në stolin e Tiranës edhe pse humbja mund të quhet me plot gojën, e pamerituar. Disfata në Vlorë ndaj Flamurtarit ishte minimale, 0-1, në ndeshjen e javës së 9-të të Superligës.

Skuadra kryeqytetase u ndëshkua nga një gabim i mbrojtjes në minutën e 72-të, të cilin e shfrytëzoi më së miri sulmuesi brazilian i vendasve, Danilo Alvesh. Ndikimi i ardhjes së Memës në stol u duk në pjesën e parë, kur tiranasit ishin më lart, sulmuan më shumë dhe krijuan më shumë raste.

Natyrisht, nuk duhet harruar se edhe me ish-trajnerin Ze Maria, Tirana pati paraqitje të tilla, si në pjesën e parë në Korçë ndaj Skënderbeut. Për fat të keq, miqtë nuk arritën të shënonin, dhe kjo nuk i dha mundësi as të fitonin, madje as të merrnin barazimin. Pas pushimit, skuadrat sikur u kujdesën për të mos u ndëshkuar, dhe ndeshja mund të përfundonte pa gola, nëse nuk do të kishte qenë gabimi i mbrojtjes bardheblu.

Kjo disfatë e rëndon shumë gjendjen e Tiranës, që mbetet në vendin e 7-të me vetëm 8 pikë, dhe me golaverazh negativ. Sukses me rëndësi për Flamurtarin e trajnerit Daja, që e fitoi duelin me ish-ndihmësin e tij, Memën. Vlonjatët kanë tani 14 pikë dhe janë fare pranë vendit të tretë./abcnews.al

lebron-james-1280x720.jpg
G. P.18:54 | 19/10/2018

Lebron Xhejms e nisi me humbje karrierën tek Los Anxhelos Lejkërsat. Edhe pse luajti shumë mirë, nuk përballoi dot sfidën në fushën e Portlendit. Luajti siç di ai, por nuk ia doli.

Lebron Xhejms e pati humbje nisjen e karrierës me Los Anxhelos Lejkërsat, ndërsa Portlendi i tregoi sesa të vështirë do ta ketë.
Vëmendja ishte e gjitha te ai që mbiquhet lojtari më i madh i botës në basketboll, ndoshta më i madhi i të gjitha kohëve dhe kamerat ishin të përqëndruara mbi Lebronin edhe pse fitues ishin vendasit me shifrat 128-119.

Numri 23, veshur për herë të parë me fanelën e famshme të verdhë, ishte më i miri lojtar në fushë duke shënuar 26 pikë, kapur 12 topa në tabela e shërbyer 8 pasime për kosh.
Gjigandi që mbush 34 vjeç në fund të vitit, ishte sërish I pamundur për t’u mbuluar, dhe shokët e tij nuk luajtën aspak keq, sidomos Hart, Ingram apo Kuzma, veçse Lejkërsat kanë ende shumë punë për të bërë, që të pretendojnë titullin.

Në një ligë tepër të fortë si NBA, nuk do të jetë aspak e lehtë të thyhen kampionët në fuqi të Golden Stejtit, apo të rivalizohen ekipe shumë të fortë si Hjustoni apo Bostoni.
Lebron, për më tepër, nuk ka shumë kohë në dispozicion pasi vitet do të bëjnë punën e tyre. Ai ka arritur të fitojë vetëm tre tituj kampion në karrierë, dy me Majemin e një me Klivlendin, ndërsa legjendat më të mëdha të së kaluarës, si Bill Rasëll apo Majkëll Xhordan kanë shumë më tepër trofe sesa ai./abcnews.al

panuci.png
G. P.22:58 | 14/10/2018

Në fund, rëndësi kanë pikët dhe jo loja e mirë. Kështu thotë aksioma e futbollit, ndërsa kombëtarja shqiptare do të donte të kujtonte formulën tjetër, atë që pas lojës së mirë vijnë edhe rezultatet.
Duhet të presim gjithsesi, sepse rezultati këtë herë nuk ishte me ne, por me Izraelin që fitoi 2-0 në stadiumin e Haifës, duke iu afruar kualifikimit për në gjysmëfinalet e Ligës së Kombeve.

Kualifikim që duket i pamundur për ekipin e trajnerit Kristian Panuçi, pas njërës prej ndeshjeve më të mira të zhvilluara prej tij. Kombëtarja reagoi pas humbjes së rëndë në fushën e Skocisë, duke qenë më e mirë sesa izraelitët në pjesën më të madhe të kohës. Një lojtar i ri si Uzuni ishte vërtet zbulim, po ashtu Grezda u konfirmua si vlerë e shtuar, ndërsa Lilaj që zëvendësoi Bashën, dha një shtysë më shumë për lojën e kuqezinjve. Jo vetëm kaq, por edhe mbrojtësit e krahut, Hysaj e Binaku, shtynë përpara duke ndihmuar sulmin, ndërsa vendasit u detyruan të mbylleshin në gjysmëfushën e tyre. Shqipërisë së Panuçit, sidoqoftë, i mungoi gjëja më e rëndësishme, goli.

Nxitimi para portës kundërshtare ishte i madh, pra qetësia psikologjike u duk larg. Po ashtu, ekipi përfaqësues pati edhe fat, pasi portieri Strakosha bëri pritje të rëndësishme, ndërsa mungoi edhe pjekuria. Mbrojtja e një skuadre që pretendon vështirë se mund të pësojë gola, siç ishte i pari i izraelitëve. Pas tri ndeshjeve në grup, kombëtarja ka vetëm 3 pikë, golaverazh negativ, 1-4, por gjithsesi paraqitja në Haifa bën që Panuçi ta meritojë mundësinë për të vazhduar punën. Ndoshta do të jemi ndryshe në eleminatoret e Europianit./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono