humbje

putin-904x445.jpg
G. P.13:38 | 09/09/2019

Partia e presidentit Putin ka shënuar një rënie të konsiderueshme në zgjedhjet vendore të së dielës në Moskë, duke humbur një të tretat e vendeve në parlamentin e kryeqytetit. Lideri i opozitës Navalni e konsideroi këtë fakt si një sinjal të mirë për të ardhmen e vendit.

“Rusia e bashkuar”, partia kryesore mbështetëse e presidentit Vladimir Putin në parlament, ka humbur rreth një të tretat e vendeve në kuadër të zgjedhjeve vendore të së dielës në Moskë. Një votë që dhe pse vendore, u transformua nga opozita e Navalnit dhe aleatët e tij një rast për të qenë më të sigurtë në zgjedhjet e përgjithshme të vitit 2021.

Rënia e dukshme e mbështetjes gjithsesi nuk e pengon Rusinë e Bashkuar që të ruajë mazhorancën në parlamentin e qytetit. Pjesëmarrja në votime ka qenë shumë e ulët si dhe ka pasur polemika pasi nuk ka pasur exit poll.

Sipas të dhënave zyrtare, partia e Vladimir Putin ka marrë 25 vende nga 45, ndërsa më parë kishte 40. Opozita tashmë ka 20 vende. Zgjedhjet shkuan shumë mirë për Partinë Komuniste e cila pa të fitonte 13 kandidatët e saj.

Ky proces zgjedhor ku u përfshinë rreth 15 rajone ruse u karakterizua që nga muaji Qershor, nga shumë protesta kundër qeverisë. Autoritetet në fakt përjashtuan nga listat kandidatët e opozitës me arsyetimin se listat me pesë mijë firma që kishin dorëzuar nuk ishin të sakta.

Lideri i opozitës Navalni e ka cilësuar si një votë inteligjente atë të së dielës duke thënë se ky ishte një sinjal i mirë për të ardhmen e vendit./ABC News Albania 24/7

edi-reja-1.jpg
G. P.13:35 | 08/09/2019

Trajneri i Shqipërisë, Edi Reja, pohoi gabimet e tij dhe të skuadrës në humbjen e rëndë pësuar në Paris. Italiani u duk si i dorëzuar për shkak të epërsisë së Francës.

Një analizë direkt “në të nxehtë” nuk është asnjëherë e lehtë. Gjithsesi, futbolli duhet t’u bindet rregullave të reja, atyre të televizionit dhe të publikut që i japin miliona, dhe kështu bëri edhe trajneri i Shqipërisë, Edi Reja.

Italiani provoi një disfatë të rëndë në Paris ndaj Francës, diçka që e shqetëson edhe një profesionist me 1 000 ndeshje të drejtuara në karrierë. Fillimisht, ai tregoi gabimet kryesore të ekipit, duke folur për Supersportin.

“Na goditën gabimet e fillimit, pasi nuk e mendoja që do të ishim aq shpejt me dy gola të pësuar. Pati mjaft gabime nga ana jonë në ato minuta, por nuk duhet të harrojmë se Franca ka lojtarë të një niveli shumë të lartë, shumë të shpejtë. Nëse do të kishim qenë pak më të vëmendshëm, sidomos taktikisht, golat e parë mund t’i kishim evituar”.

Më pas, pohoi atë që e quajti gabimin e tij personal.

“Për fat të keq, nuk mund ta luajmë sërish këtë ndeshje. I kërkova Roshit nëse mund ta bënte i vetëm gjithë krahun. U kuptua se pati vështirësi sepse Franca kishte dy lojtarë në ato pozicione. Roshi nuk është me tipare mbrojtëse dhe ishte faji im, dhe përgjegjësinë e marr unë, por meqë francezët ishin të shpejtë dhe teknikë, mendova për Roshin që ka shpejtësi dhe forcë fizike”.

Gjithsesi, kritika të veçanta pati për dy sulmuesit.

“Në pjesën e parë e mbajtëm shumë pak topin, edhe Bala, edhe Uzuni, dhe kjo do të na kishte lejuar që të merrnim pak frymë. Tentuam kundërsulmin, dhe disa herë e realizuam, por kur skuadra është në vështirësi, lojtarët e sulmit bëhen të rëndësishëm. Ata duhej ta mbanin më shumë topin, dhe të lehtësonin mbrojtjen dhe mesfushën”.

Reja gjykon, sidoqoftë, se Shqipëria fitoi diçka nga kjo ndeshje.

“Bare ishte shumë mirë. Luajti 90 minuta në nivel të lartë, hodhi në zonë shumë krosime. Është një lojtar me nivel edhe në aspektin teknik. Po ashtu edhe Gjasula. Shqipërisë i kanë ardhur dy lojtarë të rëndësishëm”./ABC News Albania 24/7

rennais.jpg
G. P.12:20 | 19/08/2019

PSG-ja humbet në ndeshjen e dytë ndaj Rennais në transfertë me rezultatin 2-1. Edhe pse kaluan të parët në avantazh me Cavanin, skuadra pariziene pësoi dy gola duke mos evituar dot humbjen. Një humbje që tregon se gjërat te Parisi nuk janë edhe aq të qeta me çështjen Neymar dhe me mungesën e tij në fushën e lojës.

Pa brazilianin Neymar në dispozicion për arsyen më shumë merkatoje se sa sportive e fizike, kampionët e Francës janë mundur në sfidën e radhës në Ligën 1 në Francë në transfertën ndaj Rennes.

Duket në një farë mënyre që PSG po has shumë vështirësi të bëjë diferencën pa një lojtar si Nejmar në radhët e tij, edhe pse trajneri Tuhel ka në dispozicion emra si Kavani, Mbape, Di Maria apo Verrati që do i kishte zili çdo ekip.

Mungesat bënë të vetën në ë ndeshjen e javës së dytë ndaj Rennais, ku parisienët për çudinë e të gjithëve dolën të mposhtur nga fusha. Edhe pse shënuan të parët me Kavanin, pas një gabimi të mbrojtjes, futbollistët e skuadrës pariziene mbajtën topin, por nuk prodhuan aq shumë raste sa pritej prej tyre.

Në fundin e pjesën së parë, ishte Niang ai që barazoi rezultatin për vendasit, ndërsa në fillimin e të dytës, Del Kastijo shënoi me kokë për të siguruar avantazhin 2-1. Aktivizimi i Sarabia, Dagba apo Paredes nuk solli asgjë të re dhe u pa qarët se tashmë PSG ka më pak alternativa ofensive, situatë që duhet zgjidhur me kthimin në “normalitet” të Neymar, ose me afrimin e një emri të ri në repartin e avancuar.

Një humbje e cila edhe pse vje në javën e dytë sërish ka marrë komentet dhe kritikat përkatëse. Një start të tillë nuk është se ka patur vetëm PSG, duke ditur bllokimin e Bajernit me Hertën në Mynih, apo edhe humbjen e Barcelonës në Bilbao.

Sidoqoftë, çështja Neymar do të vijojë edhe për disa ditë deri në një vendim final. E megjithatë, humbja me Rëne nuk mund të faturohet kurrsesi me mungesën e brazilianit, për vetë emrat e tjerë që ka në dispozicion trajneri Tuhel./ABC News Albania 24/7

argentina-1.jpg
nev ila16:36 | 16/06/2019

Argjentina dhe Lionel Mesi morën një tjetër goditje të rëndë. Ata pësuan humbje me Kolumbinë në debutimin në Kupën e Amerikës në Brazil.

Ky mallkim duket se do ta ndjekë pas deri në fund.

Lionel Mesi fitues me Argjentinën është diçka që mund të shikohet vetëm në ëndërr, dhe superylli i futbollit botëror rrezikon ta mbyllë gjithë karrierën e tij të lavdishme pa një trofe të madh me kombëtaren.

Kjo ende nuk është vendosur, veçse këtë tregoi debutimi me humbje i argjentinasve në Kupën e Amerikës që po zhvillohet në Brazil.

Humbje tërësisht e merituar 0-2 ndaj Kolumbisë në stadiumin e qytetit Salvador, me një paraqitje kaq të dobët saqë i hoqi shpresën edhe tifozëve më ekstremistë.

Kolumbianët triumfuan me autoritet, duke dominuar pjesën e parë, në të cilën Argjentina nuk bëri asnjë gjuajtje në portë, dhe duke shënuar pas pushimit me anë të Martinezit në minutën e 71-të dhe Duvan Zapatës, katër minuta para fundit.

Gazetat argjentinase vunë kujën pasi ndoqën një ndeshje kaq të dobët.

“Ole”: Goditje e madhe! Debutim për keq! Seleksioni u tregua delikat! Nivel i ulët historik, Kolumbia fitoi 2-0 autoritet! Cila është ideja, Skaloni?

“Klarin”: Kolumbia përfitoi nga mallkimi i seleksionit! Argjentina debutoi me humbje në Kupën e Amerikës në Brazil. U mund 0-2 nga Kolumbia dhe ishte inferiore në pjesën më të madhe të ndeshjes!

Çfarë zhgënjimi për një ekip të madh, dy herë kampion i botës, e 14 herë kampion i Amerikës së Jugut, që kishte mbërritur në Brazil për të thyer më në fund mallkimin që e ndjek që nga viti 1993.

Çfarë vuajtjeje për gjeniun e futbollit botëror që fiton vetëm me Barcelonën dhe jo me kombëtaren.

Në Kupën e Amerikës dështoi në finalet e viteve 2007, 2015 e 2016, mundur nga Brazili dhe dy herë, në mënyrë të pabesueshme nga Kili.

Në Kupën e Botës iu afrua trofeut në 2014 në Brazil, por humbi finalen ndaj Gjermanisë, që mori trofeun e artë të FIFA-s.

Të vetmit tituj me fanelën e seleksionit, Mesi i fitoi në moshë të re.

Në vitin 2005, fitoi Botërorin për moshën nën 20-vjeçare, duke fituar Topin e Artë dhe Këpucën e Artë, si lojtari më i mirë dhe shënuesi më i mirë i kampionatit.

Në vitin 2008, fitoi medaljen e artë në Lojrat Olimpike në Pekin, me Argjentinën U23.

Natyrisht, argjentinasit ende kanë shpresë në Kupën e Amerikës në Brazil, pasi është luajtur vetëm ndeshja e parë në grup.

Ata do të bënë çmos të triumfojnë, por fillimi nuk duket aspak premtues./ABC News Albania 24/7

xhaka.jpg
G. P.19:01 | 30/05/2019

Arsenali humbi të mërkurën finalen e Europa League ndaj Chelsea-t. Përveç kupës, fitorja do t’u sillte edhe një kualifikim në Champions League lojtarëve të Unai Emery, por në fund mbeti vetëm zhgënjimi.

Kështu ndihej edhe lotari me origjinë shqiptare i Arsenalit, Granit Xhaka. Ai ka zbuluar për mediat britanike se çfarë ndodhi në dhomat e zhveshjes pas përfundimit të ndeshjes.

“Trajneri, lojtarët, askush nuk fliste në dhomat e zhveshjes”, tha Xhaka.

Futbollisti iu përgjigj edhe pyetjes nëse e dinte arsyen se pse Emery nuk foli asgjë.

“Nuk e di. Ishte i zhgënjyer me siguri. Mendoj se e dimë si luajtëm. E dimë që humbëm ndeshjen. Nuk ka të bëjë me të bërtiturat sa herë që humbasim. Mund të thoni gjithçka tani, por nuk është koha për të shpjeguar pse dhe çfarë ndodhi në fushën e lojës. Mendoj se ishte një mundësi e madhe për ne, të cilën nuk e kapëm dot”, përfundoi sulmuesi i Zvicrës.

Chelsea arriti të fitonte 4-1 ndeshjen që u luajt në Baku të Azerbajxhanit. Për “Blutë” shënuan Pedro, Giroud dhe dy herë Hazard. Ndërsa golin e nderit për “Topçinjtë” e shënoi Iwobi./abcnews.al

tottenham.jpg
G. P.21:28 | 04/05/2019

Skuadra e Tottenham u mund minimalisht 1-0 në transfertën e Bournemouth. Londinezët luajtën rreth 45 minuta me 9 lojtarë ndërkohë që rrezikojnë vendin e tretë në renditje.

Me dy lojtarë më pak rezistojnë deri në kohën shtesë, dhe më pas e pësojnë. Tottenham sërish humbet këtë radhë në fushën e modestëve të Bournemouth, në një ndeshje ku “Spurs” luajtën për rreth 45 minuta me 9 lojtarë. Me këtë humbje siguria e tyre në vend të tretë është vënë në pikëpyetje, pasi do të varet nga rezultati i Chelsea dhe i ndeshjes së ardhshme.

Në pjesën e parë ishte Son Heung-Min, më saktë në minutën 43’, kur koreano-jugori u ndëshkua direkt me karton të kuq pasi goditi me grusht kundërshtarin. Juan Foyth zë vendin e tij në fillim të pjesës së dytë, por mbrojtësi 21-vjeçar pati fatin e zi të ndëshkohet edhe ai direkt me karton të kuq pas tre minutash lojë, për një ndërhyrje me takë në këmbën e kundërshtarit.

Në minutat në vijim skuadra e Pochettino u mundua të rezistojë me dy lojtarë më pak dhe ia doli deri në minutën 90+1’, kur Ake shënoi golin e fitores për skuadrën vendase, në një goditje këndi. Për Bournemouth kjo ndeshje nuk kishte ndonjë vlerë sepse nuk kanë asnjë objektiv në këtë fund sezoni.

Një moment jo fort pozitiv për Spursat të cilët kanë një pengesë shumë të vështirë në “Johan Cruyyf” arena javën e ardhëshme për sfidën e kthimit në gjysmëfinalen e Champions, por ndërkaq rrezikojnë ndjeshëm në kampionat, për sa i përket edhe sezonit të ardhshëm në Champions./ABC News Albania 24/7

milan-lazip-1280x720.jpg
G. P.17:30 | 14/04/2019

Igli Tare akuzon gjyqtarin pas humbjes së Lazios në fushën e Milanit. Drejtori sportiv shqiptar u shpreh se rezultati nuk u vendos nga fusha e lojës.

Ishte si një finale dhe tensioni pritej, por jo i tillë. Milan-Lazio në “San Siro” vendoste jo pak për kualifikimin në Champions dhe presioni psikologjik mbi nervat e lojtarëve kaloi kufirin normal.

Ishin dy momente, i pari një pretendim penalltie nga ana e Lazios, pas duelit në zonë mes Rodrigezit e Milinkoviç-Saviçit, dhe pastaj një festim i padenjë i dy lojtarëve milanistë me fanellën e dhuruar nga futbollisti i Lazios, Acerbi.

Pas veprimit të fundit, plasi sherri në fushën e lojës, një ngjarje e shëmtuar sidomos për një kampionat të nivelit dhe famës së Serisë A. Gjykata Sportive kërkoi materialet filmike për të nisur hetimin dhe për të dhënë dënimet.

Milani fitoi falë një penalltie të drejtë, shkaktuar nga Riza Durmishaj ndaj Muzakios, pra nga një shqiptar i Suedisë ndaj një arbëreshi.

Autori i golit ishte Franck Kessie që ekzekutoi me gjakftohtësi përballë Strakoshës. Portieri shqiptar shpëtoi Lazion nga pësimi i ndonjë goli tjetër me pritjet e tij. Në fund të ndeshjes doli në skenë shqiptari tjetër, Igli Tare.

Ai ishte tepër i zemëruar me arbitrin Rocchi që, sipas tij, mezi priti për të dhënë penalltitë e Milanit, duke sinjalizuar edhe këtë episod në zonë, më pas të anuluar nga VAR-i. Për drejtorin sportiv të Lazios gjithçka ishte e qartë.

“Kjo ishte histori e një vdekjeje të paralajmëruar, – tha drejtori sportiv lacial, – pikërisht, gjëja që i trembeshim përpara ndeshjes. Na vjen keq që humbëm një ndeshje që e luajtëm shumë mirë, sidomos në pjesën e parë. Shpresonim që ndeshja të vendosej në fushë, por ishim viktimë e VAR-it dhe e gjykimit. Penalltia e Milanit edhe jepej, por gjithashtu ishte penallti për ne, pasi ishte ndërhyrje e rrezikshme në zonë. Duket se në Itali dinë ta dallojnë rëndësinë e klubeve”.

Gazetat sportive italiane i bënë jehonë polemikave.

“Il Corriere dello Sport”: Stuhi Championsi! Milani mund Lazion 1-0 dhe shkëputet, ka polemika për penalltinë e padhënë për Milinkoviçin!

“La Gazeta dello Sport”: Po, Kessie! Për Milanin, finalja ndaj Lazios, 1-0! Provë bindëse e kuqezinjve me penallti në fund, por Tare akuzon arbitrin!

Pas kësaj ndeshjeje, Milani ka 55 pikë, duke qenë në vend të katërt 1 pikë mbi Romën, ndërsa Lazio mbeti prapa me 49 pikë, kur duhen edhe 6 javë deri në përfundim./abcnews.al

lebron-xhejms-1280x611.jpg
ent ela14:47 | 18/03/2019

Lebron Xhejms luajti një tjetër ndeshje të madhe në basketbollin amerikan, por pësoi një tjetër humbje. Numri 1 I botës shënoi 33 pikë për Lejkërsat, por Nju Jorku fitoi në fund

Majkëll Xhordan nuk shkoi dot në plej of vetëm në mbyllje të karrierës, kur ishte 40 vjeç.

Lebron Xhejmsit kjo po I ndodh kur ende është në kulmin e formës, edhe pse 34-vjeçar, siç u kuptua qartë në duelin në “Medison Skuer Garden”.

Numri 1 i basketbollit botëror hodhi një tjetër hap drejt lavdisë, por edhe një tjetër hap prapa për kualifikimin në plej of.

Ylli i Lejkërsave shënoi 33 pikë në 35 minuta lojë, duke kapur edhe 6 topa në tabela, e duke shërbyer 8 pasime për kosh, por as kjo nuk mjaftoi për ekipin nga Kalifornia.

Nju Jork Niks fitoi në Arenën e tij, me rezultatin më të ngushtë të mundshëm, 124-123, dhe Lejkërsat janë thuajse edhe matematikisht të eliminuar nga faza pas sezonit të rregullt.

Rikthimi i talentit të ri, Kajl Kuzma, i dha më shumë potencial ekipit mik, por mungesa në vazhdim e Lonzo Bollit dhe Brandon Ingramit, sërish u ndje.

Të pesë lojtarët e formacionit të Nju Jorkut shënuan më shumë se 10 pikë, Madiei pati 28 dhe Dotson 25.

Ndeshja u duk e humbur për vendasit, kur kalifornianët u shkëputën deri në 11 pikë në minutat e fundit, por përmbysën gjithçka me rezultatin e pjesshëm 13-1.

Momenti vendimtar ishte kur gjuajtja e Lebronit, që mund të kishte dhënë fitoren, u bllokua nga kroati Mario Hezonja në sekondat e fundit.

Kjo ishte një goditje e rëndë për Lejkërsat që kanë bilancin 31 fitore e 39 humbje, tepër larg Klipersave, ndërsa u mundën nga skuadra më e dobët e NBA-së këtë sezon./abcnews.al

777-1280x699.jpg
ent ela14:36 | 28/02/2019

Një kosh i veteranit Duejn Uejd i dha fitoren Majemit ndaj Golden Stejtit në basketbollin amerikan. Kampionët pësuan një tjetër humbje

Nuk mund të nënvleftësohet për asnjë moment, por nuk është siç duhet në shina.

Golden Stejti e ka humbur shkëlqimin e sezonit të kaluar, siç u kuptua edhe një herë në sfidën e NBA-së në fushën e Majemit, të humbur në sekondat e fundit, 125-126.

Ishte disfata e 18-të në këtë edicion, diçka jo shumë normale për skuadrën tri herë kampione të 4 viteve të fundit.

Nuk mund të jetë arsye e mjaftueshme mungesa e lojtarit kryesor qendër, Demarkus Kouzinsit, të lënë pushim për të mos e lodhur pas dëmtimit të gjatë.

Lajmet janë që formacioni nuk është aq i bashkuar sa më parë, me Kevin Durantin me mendjen për të ikur.

Kapiteni Klej Tompson bëri gjithçka për të shmangur humbjen.

Duke respektuar shirin, ai shënoi 36 pikë, duke i dhënë mundësi Golden Stejtit të reagonte pasi u ndodh në humbje me diferencë të madhe.

Duranti shtoi 29 pikë dhe Stefën Kërri 25, por pjesa tjetër e lojtarëve bëri pak. Dikur, stoli ishte arma plus e kalifornianëve, por për momentin nuk është i tillë. Majemi fitoi i udhëhequr nga veterani Duejn Uejd.

Ylli 37-vjeçar po shkëlqen në sezonin e tij të fundit në NBA, dhe ndaj kampionëve shënoi 25 pikë e kapi 7 topa në tabela.

Ishte ai që vendosi fatin e duelit në Arenën e Majemit, me një kosh të çuditshëm në sekondat e fundit. Golden Stejti mbetet në krye të Konferencës Perëndimore, por tashmë me pikë të barabarta me Denverin./abcnews.al

barca.jpg
G. P.21:40 | 24/01/2019

Barcelona është vënë nën akuzë pas humbjes me Seviljen në Kupën e Mbretit. Trajneri Valverde po kritikohet pasi la pushim Lionel Mesin.

Kur kjo skuadër humb, gjithnjë ka procese, sidomos kur dështon në këtë mënyrë. Barcelona dhe trajneri i saj, Ernesto Valverde, nuk i shmangën kritikat e ashpra në vijim të disfatës 0-2 në fushën e Seviljes për Kupën e Mbretit, madje duke u dyshuar për integritetin e katalanasve ndaj kësaj gare. Valverde kishte lënë Lionel Mesin në shtëpi, për ta ruajtur për kampionatin, ndërsa në stol ishin Ter Shtegen, Zhordi Alba, Luis Suarez dhe Sergi Buskets.

Vetëm Alba e Suarez u aktivizuan në pjesën e dytë, ndërsa debutimi i Kevin Prins Boatengut ishte i hidhur. Sevilja luajti më mirë dhe e meritoi fitoren, arritur me golat e realizuar nga Pablo Sarabia dhe Uisam Ben Jeder, që të dy pas pushimit.

“Vitin e kaluar vuajtëm lodhjen për të ecur përpara në kupë, – tha ai, – këtë vit, po bëjmë më shumë rotacion sepse kështu mendojmë se është më mirë”.

I ngacmuar se mos ndeshja u nënvleftësua qëllimisht, Valverde u përgjigj se “nuk mund të mendohet kështu, por mesa duket kur e fiton kupën shumë vite, nuk të vlerësojnë, ndërsa kur humbet, atëherë kuptohet sesa e rëndësishme është”.

Gjithsesi, trajneri nuk u kursye nga gazetat.

“Marka”: Një Sevilje e shkëlqyer kompromenton eksperimentin e Valverdes në Kupë, ndërsa Mesi ishte në shtëpi!

“AS”: Dhe Mesi nuk mund të pushojë! Një Sevilje e madhe dënoi një Barçë të mbushur me zëvendësues!

“El Mundo Deportivo” fillimisht jep lajmin e mirë, “De Jong, është lojtar I yni”, ndërsa me titull më të vogël lajmëron disfatën: Duhet një tjetër përmbysje!

Ndeshja pati momentin më emocionues, kur Ben Jeder, pasi shënoi golin e dytë, zbuloi dedikimin në bluzën poshtë fanelës së Seviljes.

“Më vëllanë tim, forca Emiliano Sala”, ishin fjalët për yllin e zhdukur në La Mansh.

Nuk dihet nëse Mesi do të luajë në ndeshjen e dytë ndaj Seviljes, ndërsa Valverde ka prioritet La Ligën dhe Championsin, ndërsa katalanasit e kanë fituar Kupën, katër herë radhazi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono