hetime

peleshi-dhe-mazniku.jpg
G. P.15:17 | 30/09/2019

Prokuroria e Tiranës ka marrë në pyetje nënkryetarin e Bashkisë së Tiranës Arbjan Mazniku pasi dyshohet së kompania “Fusha Sh.p.k.” i ka paguar faturat e fjetjes në një hotel në Barcelone në shumën e 1816 eurove. Para organit të akuzës dha sqarime edhe ish-Ministri i Bujqësisë Niko Peleshi lidhur me pesticidin “Silicon mix”.

Prokuroria e Tiranës ka marrë në pyetje nënkryetarin e Bashkisë së Tiranës Arbjan Mazniku. Partia Demokratike e akuzoi atë se pronari dhe administratori i Fusha sh.p.k. i ka paguar hotelin 908 euro nata në Barcelonë për dy net. Pas rreth dy orësh përballë grupit hetimore Mazniku deklaroi se ka sqaruar pozicionin e tij.

“Nuk do merrem me lajme të rreme. Dhashë sqarime për pozicioni tim le të merret drejtësia me ata që hedhin baltë. Ishte kënaqësi të sqaroja bashkëpunimin e Bashkisë së Tiranës me Prokurorinë”, tha Mazniku.

Ndërkohë ketë të hënë është përballur më prokurorinë edhe ish-ministri i Bujqësisë Niko Peleshi. Hetimet për Peleshin ka nisur pas publikimit në media të lajmit se kur ishte ministër i Bujqësisë ka lejuar të futet në vend pesticidi “Silicon mix” që konsiderohet i dëmshme për njerëzit. Ish-ministri i Bujqësisë nuk pranoi të jepte asnjë sqarim për mediat pas daljes nga prokuroria.

Hetimi për Niko Peleshin ka nisur pas shkresës zyrtare që Prokuroria e Përgjithshme i dërgoi Prokurorisë së Tiranës. Në shkresë thuhej se ndaj Peleshit ka dyshime se ka shpërdoruar detyrën duke lëshuar urdhrin për zhbllokimin e këtij pesticidi i cili përdoret në kultivimin e frutave dhe perimeve duke shkaktuar pasoja të dëmshme tek konsumatorët. Organi i akuzës pas marrjes së deklarimeve do të vendosin nëse Peleshi do të merret merret i pandehur për këtë çështje./ABC News Albania 24/7

malindi.jpg
G. P.13:53 | 27/09/2019

Zbulohet biznesmeni që ishte pritësi i 137 kilogramëve kokainë në portin e Durrësit, në kuadër të një operacioni ndërkombëtar, me pjesëmarrjen dhe të agjentëve të DEA-s amerikane. Ai është Gentian Malindi, i arrestuar më parë dhe për një sasi prej 500 kilogramë hashash.

Ky është Gentian Malindi që dyshohet se ishte porositësi i 137 kg kokainë të sekuestruara në portin e Durrësit. Biznesmeni u shpall në kërkim nga uniformat blu, ndërsa më herët u arrestuan Altin Myslihaga dhe Ardian Bega të dy punonjës në portin e Durrësit. Lënda narkotike ishte fshehur në katër kontenierë me banene që ishte nga Ekuadori, kishte ndaluar në Greqi dhe sipas prokurorisë së krimeve të rënda destinacioni final ishte Shqipëria. Operacioni ndërkombëtar “Kuito” u drejtua nga DEA Amerikane, policia Greke dhe Prokuroria e Krimeve të Rënda.

Pas nisjes së kokainës nga Ekuadori në Greqi, më pas në vendin tonë, lënda narkotike u dorëzua në mënyrë të kontrolluar. Nga pamjet e kamerave të sigurisë është fiskuar ky moment, ku Ardian Bega 53 vjeç është futur brenda ambienteve të portit të Durrësit.

Sipas dëshmisë së dhënë nga një prej të arrestuarve, ata kanë hyrë në port nga ana e Urës së Dajlanit dhe kanë mundur të marrin disa nga pako me drogë. Rruga e tyre ka vijuar drejt Shkëmbit të Kavajës, kur gjatë ecjes kanë kuptuar se diçka nuk shkonte. Ishte pikërisht Gentian Malindi që kuptoi se në pakot e kokainës kishte edhe oriz. Sipas dëshmisë dhënë para oficerëve të Ardian Begës, Malindi u ka kërkuar të mos flasin pasi në automjet mund të kishte përgjues. Gentian Malindi ka qenë edhe më herët i arrestuar dhe proceduar për drogë. Në qershor të vitit 2013, Malindi është arrestuar pasi në një furgon mallrash u gjet nga policia mbi 300 kilogramë kanabis, që vinte nga Lazarati.

Në lidhje me shpalljen në kërkim nga policia të Gentian Majlindit ka reaguar edhe babai Ilir Malindi, i cili është edhe avokat i tij. “Djali im nuk ka lidhje me lëndën narkotike. Ai nuk do të dorëzohet derisa çështja të marrë rrugë ligjore”- u shpreh ai.

/ABC News Albania 24/7

toyota-yaris.jpg
G. P.15:41 | 24/09/2019

Pas mbylljes se hetimeve për çështjen “Toyota Yaris” në media është publikuar një udhëzim i drejtueses se Prokurorisë për Krime të Rënda, Donika Prela, dërguar prokurorëve të çështjes. Por në një reagim për mediat, Prokuroria shprehet se udhëzimi nuk ka cënuar punën hetimore të prokurorëve.

Mbyllja e hetimeve për dosjen “Toyota Yaris” ka shkaktuar debate në prokurori. Shkak është bërë udhëzimi i firmosur nga drejtuesja e komanduar e Prokurorisë për Krime të Rënda, Donika Prela, e cila udhëzon prokurorët e çështjes që të mbyllin hetimet brenda datës 24 Shtator.

Përmes shkresës së firmosur me 11 Shtator, Prela u kërkon dy prokurorëve Doloreza Musabelliu dhe Eneid Nakuçi që të dërgojnë dosjen për gjykim. Në shkresën e siguruar nga ABC News thuhet:

“Prokurorët e ngarkuar me hetimin të kryejnë veprimet si edhe të marrin masa për dërgimin e çështjes për gjykim përpara datës 24/09/2019, datë në të cilën përfundon afati tërësor i paraburgimit në hetim për katër të pandehurit”.

Drejtuesja e Prokurorisë për Krime të Rënda, Donika Prela ka reaguar për këtë çështje duke sqaruar udhëzimi i saj nuk cënon punën e prokurorëve të çështjes.

“Drejtuesi i Prokurorisë, ashtu sikurse ka ndodhur në rastin konkret ka të drejtë, vetëm të udhëzojë prokurorët dhe oficerët e policisë gjyqësore, me udhëzim jo të detyrueshëm për të kryer veprime hetimore, përfundimin e shpejtë dhe në afat të dosjes, duke mos cenuar në asnjë rast të drejtën e prokurorëve për zgjidhje”.

Por sipas ligjit për funksionimin e prokurorive në Republikën e Shqipërisë, në nenin 48 pika 3 thuhet: Udhëzimet në lidhje me procedime konkrete, sipas pikave 1 dhe 2, të këtij neni, mund të jepen kryesisht në momentin e caktimit të çështjes për ndjekje prokurorit, ose më pas, kur vlerësohet e nevojshme për mbarëvajtjen e ecurisë së procedimit.

Të arrestuar për çështjen  “Toyota Yaris” ku brenda dy makinave u gjetën 3.4 milionë euro në portin e Durrësit janë babë e bir Edi Lika e Klevi Cani, Alban Mollaymeri, dhe Agim Cekaj, ndërsa në kërkim janë kushërinjtë Alfred dhe Elvis Vladi./ABC News Albania 24/7

policia-compressor-1-1.jpg
G. P.11:12 | 14/09/2019

Ish-drejtori i Aluiznit dhe ish-specialisti i këtij institucioni janë proceduar penalisht për shpërdorim detyre. Nën hetim për të njëjtën akuzë janë edhe 4 ish-punonjës të ndërmarrjes së llixhave në Dibër. Shkeljet e tyre u konstatuan nga Kontrolli i Lartë i Shtetit.

Ish-drejtori i Aluiznit të Dibrës që aktualisht punon në Bashkinë e Tiranës është proceduar penalisht për shpërdorim detyre nga policia. Për të njëjtën vepër penale po ndiqet edhe Elvis Manga, ish-specialist i Aluiznit.

Të dy dyshohet se kur mbanin poste drejtuese kanë favorizuar persona të ndryshëm në kundërshtim me ligjin dhe në dëm të territorit. Nën hetim sipas policisë janë edhe katër ish-punonjës të ndërmarrjes së llixhave në Dibër.

Dy ish-drejtore përkatesisht Islam Qoku i cili ka drejtuar qendrën nga viti 2013 deri në vitin 2014. Kurse Spartak Koltraka e ka ushtruar këtë detyre nga viti 2014 deri në vitin 2017.

Të proceduar janë edhe dy ish-financierë. Të gjithë dyshohet se kanë përvetësuar shuma të ndryshme monetare duke i shkaktuar një humbje të madhe ndërmarrjes së llixhave. Shkeljet janë konstatuar nga Kontrolli i Lartë i Shtetit.

/ABC News Albania 24/7

toyota-yaris.jpg
G. P.11:52 | 12/09/2019

Mbyllen hetimet për 3.4 milionë eurot e sekuestruara në dy makinat, “Toyota Yaris”. Prokuroria për Krime të Rënda i ka komunikuar akuzën, e “pastrimit të parave në kuadër të grupit të strukturuar kriminal”, 3 prej 4 të arrestuarve. Agim Ceka akuzohet vetëm për armëmbajtje pa leje.

Prokuroria e Krimeve të Rënda ka mbyllur hetimet për dosjen e njohur si “Toyota Yaris” dhe ka ngritur akuza ndaj 4 personave të arrestuar në Shqipëri. Prokurorët i kanë komunikuar akuzën e pastrimit të parave në kuadër të grupit të strukturuar kriminal, Alban Mollaymerit, Edi dhe Klevi Likës.

Ndërsa Agim Cekës i është komunikuar akuza për armëmbajtje pa leje, për shkak se gjatë kontrollit në banesë, i është gjetur një armë zjarri. Pas mbylljes së hetimeve dosja për 10 ditë do të zhvillohet seanca paraprake dhe do të vendoset nëse kjo dosje do të shkojë ose jo për gjykim.

Në 24 Qershor 2018, autoritetet sekuestruan në portin e Durrësit 3.4 milionë euro në dy automjete “Toyota Yaris” që vinin nga Belgjika. Katër të arrestuarit ishin pjesë e kompanisë, që sillte makinat.

Ata kanë mohuar të kishin dijeni për 3.4 milionë eurot e fshehura në dy automjetet e ardhura nga Belgjika. Në arrati, me një urdhër arresti ndaj tyre janë dy kushërinjtë Elvis dhe Alfred Vladi, porositës të makinave. Hetimet për të dy vijojnë, pasi policia i ka shpallë në kërkim ndërkombëtarë.

Për të njëjtën dosje po kryhen hetime edhe nga prokuroria belge, e cila më 25 Korrik më mori në pyetje të arrestuarit në Shqipëri, si dhe kreun e opozitës Lulzim Basha, se nga e kishte marrë informacionin se drejt Portit të Durrësit ishin nisur të fshehura miliona euro me “Toyota Yaris”.

Para për të cilat lideri i opozitës ka akuzuar numrin dy të partisë Socialiste Taulant Balla, 3 ditë përpara se 3.4 milionë eurot të sekuestroheshin.

/ABC News Albania 24/7

angjarja-e-santiago-malkos.jpg
G. P.15:21 | 09/09/2019

Ish-efektivi Santiago Malko, i ekzekutuar në Tiranë edhe pse ishte person nën hetim për disa ngjarje kriminale, kishte mundur të emërohej prej 9 muajsh si inspektor pyjesh në Dajt. Prej muajit janar, 26-vjeçari nuk kishte qenë asnjë ditë në punë, por ishte paguar rregullisht.

Prej 9-muajsh ish-efektivi Santiago Malko i ekzekutuar në mënyrë mafioze mbrëmjen e 27 Gushtit ishte emëruar si inspektor pyjesh në Dajt.  26-vjeçari ishte një person nën hetim për disa ngjarje të rënda kriminale në Tiranë dhe Durrës, si edhe i dënuar për armëmbajtje pa leje dhe plagosje me dashje.

Burime nga grupi hetimor bëjnë të ditur për ABC News se prej Janarit të 2019-së, ai nuk ishte paraqitur asnjë ditë të vetme në punë, ndërkohë që pagesat kryheshin normalisht në llogarinë e tij bankare.

Për këto arsye po hetohet edhe praktika e ndjekur në rastin Malko. Për t’u punësuar në administratën shtetërorë dëshmia e penalitetit është kriteri kryesor. Ajo duhet të jetë e pastër për aplikuesit për një vend pune ose personi duhet të jetë i rehabilituar pas dënimit të kryer.

Dyshohet se Malko ka falsifikuar dosjen e tij për dëshminë e penalitetit, duke e deklaruar atë të pastër në drejtorinë e burimeve njerëzore në Inspektoriatin e Mjedisit dhe Pyjeve.

Policia e ka referuar dosjen për ekzekutimin e ish-efektivit pa autor në Prokurorinë e Tiranës. Grupi hetimor ka sekuestruar pamjet e më shumë se 40 kamerave të sigurisë të bizneseve në të gjithë gjatësinë e rrugës “Xhenfize Keko” për të bërë të mundur zbulimin dhe identifikimin e autorëve në vrasjen e 26-vjeçarit.

Po kështu rezultoi se në krim u përdor vetëm një armë zjarri tip automatik Kallashnikov model 54, ndërsa arma e tjetër nuk ka kryer qitje sipas ekspertëve të kriminalistikës.

Ndërkohë u përdorën dy automjete për të kryer ekzekutimin e të riut në zonën e Porcelanit. Hetimet për vrasjen e Malkos janë përqendruar kryesisht në larje hesapesh mes grupeve rivale./ABC News Albania 24/7

spitali-fier-1280x703.jpg
ent ela11:55 | 02/09/2019

Një grup specialistësh po hetojnë ngjarjen e mbrëmjes së të shtunës, ku u plagosën pesë persona në Levan dhe në spitalin e Fierit. Në këtë hetim është përfshirë edhe roli i policit të cilit iu mor arma nga brezi dhe u qëllua mbi një person.

Ishte raportimi i kryepolicit të Fierit dhe drejtoreshës së spitalit vetëm pak minuta, pasi një person shtiu me armën e policit mbi të tjerë persona. U tha për dy të plagosur me armë nga policia, dhe tre nga spitali.

Një ditë më pas në komunikatën zyrtare, u njoftua vetëm për një të plagosur me armë zjarri, kurse katër të tjerët ishin të rrahur dhe goditur me sende të forta dhe thikë.

Një grup specialistësh po hetojnë ngjarjen e mbrëmjes së të shtunës që nisi në Levan dhe përfundoi në spitalin e Fierit.

Në këtë hetim është përfshirë edhe roli i policit të cilit iu mor arma nga brezi dhe u qëllua mbi një person.

Deklarata e kryepolicit të Fierit dhe ajo e Drejtoreshës vetëm pak minuta pas ngjarjes, ku folën për dy dhe tre të plagosur me armë zjarri, ka ngritur pistat e para të dyshimit për fshehje gjurmësh.

Një ditë më pas, zyrtarisht u tha për vetëm një të plagosur me armë zjarri, duke lënë pa sqaruar nëse ishte gabim i policisë apo paaftësi në menaxhimin e situatës.

Ende nuk ka asnjë informacion për rezultatin e këtij hetimi. Kurse  lidhur me rolin e policit në ngjarje, burime nga spitali i Fierit thanë se dy efektivët që u angazhuan me shoqërimin e të plagosurve të Levanit  ndodheshin në spital për verifikimin e një aksidenti rrugor.

Në kohën kur njëri prej tyre po shoqëronte Aldi Zhapajn në ashensor, tjetri që ndodhej në hyrje të korridorit iu mor arma nga Gazmend Brace, i cili qëlloi mbi babain e Aldi Zhapajt, Aleksandër Zhapaj. Ky i fundit këtë të hënë u dërgua në Tiranë për mjekim më të specializuar.  Në këtë ngjarje 5 persona u plagosen dhe 5 u arrestuan./ABC News Albania 24/7

santjago-malko.jpg
G. P.15:03 | 28/08/2019

Zbardhet skema e ekzekutimit të ish-policit Santiago Malko në Tiranë. Policia ka shoqëruar mbi 20 persona për ngjarjen, por ende nuk ka asnjë të dyshuar. Pistat kryesore që po hetohen për vrasjen e 26-vjeçarit janë konfliktet e tij të kaluara dhe përfshirja në aktivitetin e paligjshëm të lojërave të fatit.

Zbardhen detaje të reja nga ekzekutimi  i ish-policit Santiago Malko në Tiranë. Pista kryesore që po heton policia është ajo e zhvillimit të aktivitetit të paligjshëm të lojërave të fatit, nisur edhe nga e kaluara e ish-policit.

Nga burimet policore mësohet se 26-vjeçari është qëlluar me armë zjarri kallashnikov sapo ka dalë nga një lavazh në rrugën “Xhanfize Keko” në zonën e Porcelanit, ku ishte futur për të larë automjetin e tij tip “BMW”.

Por, për shkak se lavazhi ka qenë i mbyllur, Malko nuk ka mundur të qëndrojë gjatë aty, ndërsa policia dyshon se viktima e ka kuptuar që ishte në ndjekje dhe për këtë arsye është futur në lavazh për të humbur gjurmët.

Dëshmitarë në vendin e ngjarjes kanë treguar para grupit hetimor se atentatorët kanë përdorur dy mjete për ekzekutimin e 26-vjeçarit. Një mjet “Mercedez-Benz” i ka prerë rrugën të riut, ndërsa nga makina tjetër, një furgon i bardhë, autorët kanë qëlluar me breshëri armësh.

Mësohet se viktima ka rritur shpejtësinë e lëvizjes në përpjekje për t’u larguar, por makina i ka dalë nga kontrolli dhe është përplasur me një shtyllë elektrike dhe kazanët e mbetjeve urbane, duke përfunduar pranë murit të një biznesi, aty ku Santiago Malko u gjet më pas i pa jetë nga uniformat blu.

Autorët kanë qenë të maskuar me kapuç të zinj dhe nuk janë kapur nga asnjë kamer sigurie në zonë që ka filmuar atentatin. Policia ka gjetur në vendin e ngjarjes 10 gëzhoja, ndërsa mbi makinën e viktimës ka pasur më shumë shenja plumbash. Ndërsa në trupin e viktimës, i cili është dërguar në morg për ekspertizë mjeko-ligjore janë gjetur një plumb në kokë dhe një në kraharor.

Pas ngjarjes, autorët e atentatit janë larguar në drejtim të fshatit Ferraj, ku dhe kanë djegur mjetin tip “Mercedes Benz”. Në makinë është gjetur edhe  arma tip kallashnikov, që dyshohet se është përdorur për ekzekutimin e Santiago Malkos.

Policia ka shoqëruar mbi 20 persona dëshmitarë të ngjarjes dhe të afërm të viktimës që mund të ndihmojnë grupin hetimor për të zbuluar autorët e vrasjes së 26-vjeçarit.

Santiago Malko ishte shoqëruar në polici më parë për atentatin e 4 Tetorit të vitit 2018 në ish-Bllok, ku mbeti i vrarë Fabiol Gaxha dhe u plagosën Ervis Martinaj dhe Eljon Hato.

Por, ai më pas u la lirë si person që nuk kishte lidhje me këtë ngjarje, por që mbahej nën vëzhgim nga policia. 26-vjeçari ishte edhe mik i ngushtë i biznesmenit të lojërave të fatit, Ervis Martinaj.

Një tjetër pistë që mund të ketë lidhje me vrasjen e tij është edhe një konflikt që ai ka pasur me dy vëllezërit Edmond dhe Gentian Lashi në vitin 2016 për një borxh të pa shlyer që ata kishin vendosur në një nga pikat e basteve që kontrollohej nga Santiago Malko. Në këtë kohë, ish-efektivi është larguar edhe nga policia./ABC News Albania 24/7

agim-kajmakuu.jpg
G. P.16:10 | 23/08/2019

Prokuroria e Përgjithshme ka nisur hetimin për të verifikuar nëse Agim Kajmaku kryetari i Bashkisë së Vorës, ka qene i dënuar, dëbuar apo shpallur në kërkim nga autoritetet greke, siç është deklaruar publikisht nga Partia Demokratike.

Sipas burimeve nga Prokuroria e Përgjithshme, është nisur letërporosi drejt institucioneve të drejtësisë në Greqi, lidhur me të shkuarën e Agim Kajmakut në Greqi. Gjithashtu është kërkuar informacion nga zyra e Gjendjes Gjyqësore nga Ministria e Drejtësisë dhe prokuroritë e Shkallëve të Para dhe atyre të Apelit në Tiranë./ABC News Albania 24/7

ishp.jpg
G. P.16:06 | 19/08/2019

Inspektoriati Shtetëror i Punës ka reaguar për vdekjen e dy punëtorëve, të cilët u rrëzuan nga skela pak ditë më parë ndërsa po riparonin fasadën e një pallati në Tiranë. Dy kompanitë e skelave sipas Drejtorit të Përgjithshëm janë nën hetim. Seferaj e cilësoi sektorin e ndërtimit me risk shumë të lartë sa i përket humbjeve të jetëve në punë.

“Rasti i fundit i aksidentit të ndodhur si shkak i rënies së skelës në kantierin e ndërtimit të pallatit me pasojë humbjen e jetës së dy punëmarrësve dhe plagosjen e katër të tjerëve tregon se kontrollet duhet të intensifikohen më shumë në sektorin e ndërtimit dhe jo vetëm duke synuar rritjen e cilësisë së inspektimeve me qëllim parandalimin dhe mosndodhjen në të ardhmen. Subjektet “Xhimi Taurush” dhe “Skela Syla”, të cilët u përfshinë në këtë aksident në punë janë në proces hetimi nga inspektorët e punës së degës rajonale Tiranë duke bashkëpunuar edhe me organet e Policisë së Shtetit me rezultatet e të cilit do t’ju bëjmë me dije në përfundim të këtij procesi. Ergys Ibrahimidhe Genc Bardhi i lënduar janë punëmarrës të subjektit “Xhimi Tarushi”. Orjan Kodra që ka humbur jetën, Eugidius Lika, Behar Sadria, dhe Altin Marku, të plagosur janë punëmarrës të subjektit “Skela Syla””, tha Seferaj./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono