hetime

tia.jpg
G. P.15:49 | 17/04/2019

Dy zyrtarë të Aeroportit të Tiranës kanë deklaruar para grupit hetimor për grabitjen në Rinas se kanë zbatuar rregullat e sigurisë. Por grabitësit, sipas tyre, kanë përdorur dyert që janë në dispozicion të zjarrfikësve, të cilat nuk janë të fortifikuara.

Zyrtarë të sigurisë së aeroportit të Rinasit, të marrë në pyetje pas grabitjes së parave në 9 Prill, u kanë sqaruar hetuesve se kanë zbatuar rregullat e sigurisë dhe se grabitësit përdorën ato që quhen “crash doors”.

Sipas deklarimeve të këtyre zyrtarëve, këto dyer, të cilat u përdorën edhe nga grabitësit për të hyrë në aeroport, nuk janë të fortifikuara, pasi në raste avarie të rrëzimit të një avioni, makina e zjarrfikëses duhet të depërtojë në pistë, duke i shkatërruar këto dyer.

Nisur nga ky sqarim i zyrtarëve të TIA-s gjatë marrjes në pyetje, ngrihen dyshime të forta së grupi kriminal që realizoi grabitjen e dispononte një informacion të tillë. Admir Murataj së bashku me grupin e tij kanë shfrytëzuar pikërisht këtë mënyre për të realizuar grabitjen.

Prokurorët e Krimeve të Rënda Arenc Çela, Besnik Miçi dhe Klodian Braho kanë sekuestruar të gjitha konventat apo marrëveshjet pranë zyrave të këtij institucioni, atij të Autoritetit të Acionit Civil apo kompanisë “ICTS”, të cilat do të analizohen në përputhje me faktet e rrethanat konkrete të ngjarjes.

Zyrtarët e aeroportit pretendojnë se kanë njoftuar policinë, sapo konstatuan çarjen e derës dhe panë furgonin t’i afrohej avionit të linjës Tiranë-Vjenë. Ndërse policia nga ana tjetër ka deklaruar se informacionin e ka marrë nga burime të tjera dhe jo nga punonjësit e TIA-s.

Organi i akuzës po heton edhe mbi origjinën e jelekëve antiplumb dhe veshjeve ushtarake të përdorura nga grabitësit. Sipas burimeve në Tiranë janë vetëm 3 dyqane që mund të tregtojnë pajisje të tilla.

Në bazë të verifikimeve dhe pamjeve të kamerave të sigurisë nuk ka rezultuar që të kenë blerë persona të dyshimtë. Pavarësisht hetimeve intensive, prokuroria ende nuk ka mundur të identifikojë bashkëpunëtorët e tjerë të Admir Muratajt./abcnews.al

zjarri.jpg
G. P.13:52 | 16/04/2019

Prokurori francez që po heton rastin e zjarrit në katedralen e Notre Dame është fokusuar në pistën e një aksidenti. Zyrtari ka deklaruar se për momentin nuk është gjetur asnjë gjurmë që të çon drejt pistës së një akti të qëllimshëm.

Hetimet e para mbi flakët që përfshinë të hënën katedralen e Notre Dame në Paris favorizojnë pistën e një zjarri aksidental. Deklarata është bërë nga prokurori i çështjes, Remi Heitz, i cituar nga e përditshmja franceze “Le Figaro”.

“Dua të jem i qartë se asgjë në këtë fazë nuk tregon për një veprim të qëllimshëm, ndaj pista e një zjarri aksidental është më e privilegjuara”, deklaroi Heitz.

Ai garantoi se do të përdorë çdo mjet për të zbuluar origjinën e zjarrit dhe konfirmoi se dëgjesat e dëshmitarëve janë ende në vazhdim.

“5 kompani të ndryshme po punonin në vendin e ngjarjes dhe dëgjesat e punonjësve dhe punëdhënësve janë në zhvillim e sipër. Në tërësi janë 15 dëshmi që duhet të mblidhen”, deklaroi prokurori.

Hetuesi sqaroi më tej se alarmi i parë mbi ngjarjen e rëndë ra në orën 18 e 20, por në vendin e ngjarjes nuk u gjetën gjurmë zjarri.

Më pas pati një alarm të dytë në 18 e 43 dhe zjarri u konstatua në përmasa të mëdha. Ndërkohë, njerëzit e pranishëm në katedrale, ku po mbahej një meshë, kishin filluar të evakuoheshin pak më herët.

“Hetimet do të jenë të gjata dhe komplekse, por do të përdoren të gjitha mjetet për të arritur tek e vërteta, tek origjina e këtij zjarri të tmerrshëm”, deklaroi prokurori./abcnews.al

ASSANGE-PLANI-_ABC-M1-T1.mpg_snapshot_00.17-1280x712.jpg
G. P.23:30 | 12/04/2019

Pas arrestimit të Julian Assange, autoritetet suedeze paralajmërojnë hapjen e hetimeve ndaj themeluesit të Wikileaks, për akuzën e agresionit seksual. Ekstradimin e tij e kërkojnë edhe Shtetet e Bashkuara.

Themeluesi i Wikileaks, Julian Assange mund të përballet me një rihapje të hetimeve për dhunim seksual në Suedi. Assange, 47 vjeç, u arrestua ditën e enjte pas 7 vjet strehim në Ambasadën e Ekuadorit në Londër.

Prokurorët suedezë deklarojnë se po ekzaminojnë çështjen me kërkesë të avokatit të viktimës së dhunimit. Avokatja suedeze Elizabeth Masi Fric ka deklaruar se do të bëjë gjithçka që hetimet në vendin nordik të hapen sërish. Assange aludohet ta ketë kryer dhunimin në vitin 2010 në Stockholm, ku do të mbante një fjalim para studentëve në lidhje me portalin e tij Wikileaks.

Vetë ai i ka mohuar gjithmonë akuzat duke deklaruar se marrëdhënia seksuale kishte qenë konsensuale. Prokurorët suedezë e mbyllën hetimin ndaj tij në vitin 2017 pasi nuk arritën ta procedonin 47-vjeçarin, që ndërkohë ishte strehuar në ambasadën ekuadoriane.

Por tani ata do të riekzaminojnë çështjen për të vendosur nëse do ta rifillojnë procesin dhe për këtë do të kenë afat deri në vitin 2020. Ndërkohë, edhe Shtetet e Bashkuara dëshirojnë ta ekstradojnë atë nga Britania në lidhje me rolin e luajtur në publikimin e informacioneve konfidenciale qeveritare në vitin 2010.

Në rast ekstradimi në Amerikë, ai rrezikon të dënohet me 5 vjet burg, por avokatët e tij druhen se mund të vuajë shumë më tepër./abcnews.al

MUELLER-PYETJET-1280x720.jpg
G. P.23:15 | 22/03/2019

Pas 22 muaj hetime, akuza ndaj 37 të pandehurve, 7 pranime faji dhe një dënim, zyra e hetuesit të posaçëm Robert Mueller ka mbyllur hetimet mbi ndërhyrjen e përfolur ruse në zgjedhjet presidenciale të vitit 2016. Përfundimet e hetimit nuk janë publikuar, por pritet që një pjesë e tyre të raportohen në Dhomën e Përfaqësuesve të Kongresit amerikan.

Hetimi i prokurorit të posaçëm Robert Mueller mbi lidhjet e përfolura mes Rusisë dhe stafit elektoral të presidentit Donald Trump kanë prekur vijën e finishit. Raporti i zotit Mueller është dorëzuar të premten në Departamentin e Drejtësisë, ku prokurori i përgjithshëm Uilliam Berr do të vendosë se sa material do të ndajë me Kongresin.

Në një letër dërguar Dhomës së Përfaqësuesve, Berr tha se mund t’i raportojë përfundimet kryesore të hetimit brenda javës. Detaje të raportit të Myler nuk janë publikuar, por një burim nga Departamenti i Drejtësisë ka deklaruar për CNN se bëhet fjalë për një dosje gjithëpërfshirëse. Dokumenti synon të sqarojë vendimet proceduriale që hetuesi i posaçëm ka marrë në 22 muaj që nga caktimi i tij në krye të task forcës.

Vetë Trump dhe republikanët e kanë kritikuar vazhdimisht hetimin, duke e cilësuar një “gjueti shtrigash” dhe duke përsëritur se nuk ka pasur asnjë mpleksje me palën ruse. Duke reaguar, zëdhënësja e presidentit Trump, Sarah Sanders ka deklaruar se Shtëpia e Bardhë nuk i ka parë përfundimet e Mueller.

“Hapat e ardhshëm i takojnë prokurorit të përgjithshëm dhe ne presim që ai të bëjë lëvizjen e tij”, ka thënë Sanders.

Përfundimi i hetimit të koduar “Russiagate” shënon fundin e një prej kapitujve më dramatikë të presidencës së Donald Trump, që ka çuar mes të tjerash në një seri padish dhe disa pranime faji nga disa prej bashkëpunëtorët më të ngushtë të tij. Por nga ana tjetër, mbyllja e hetimeve hap një kapitull të ri mbi pasojat që do të kenë përfundimet sapo ato të bëhen publike./abcnews.al

shkoder-2-1280x702.jpg
ent ela13:00 | 18/03/2019

Hetimet për 12 të arrestuarit e fajdeve ne Shkodër janë shtrirë dhe në Tiranë, ndërsa ka njerëz të tjerë që kanë denoncuar përveç ish-prefektit Radovani. Por avokati i të arrestuarve thotë se nuk ka prova për implikimin e tyre.

12 të arrestuarit e operacionit “Maranaj” ndodhen në qeli me tre akuza të rënda. Hetimet për këtë grup që jepte lekë me fajde, dhe nëse borxhi nuk shlyhej arrinin t’u merrnin pasuri, shtëpia, toka apo biznese, janë shtrirë jo vetëm në qytetin e Shkodrës. Ka dyshime se aktiviteti tyre është zhvilluar dhe ne metropol, apo në qytete të tjera. Sikurse në këtë ngjarje, ish Prefekti Paulin Radovani nuk ishte denoncuesi i vetëm. Por ka dhe të tjerë persona, viktima te këtij aktiviteti kriminal të organizatës, biznesmenë dhe punonjës te administratës .

Megjithatë hetimet e deritashme për avokatin Anton Kosteri nuk kanë afruar prova ligjore. Ai tha gazetarëve e gjitha bëhet për shoë.

Kosteri tha se nuk ka prova që Radovani dhe djemtë e tij janë kërcënuar. Por avokati nuk pranoi të flasë në lidhje nëse klientët e tij kanë pohuar gjatë marrjes në pyetje se i kanë dhënë borxh djemve të ish prefektit Radovani.

12 te arrestuarit në kuadër të operacionit “Maranaj” janë arrestuar nën akuzën e: “ushtrim aktiviteti financiar të paliçensuar”, “prodhim dhe mbajtje pa leje e armeve luftarake dhe municioneve” dhe “mos kallëzim krimi”.  Hetimi ka zgjatur disa muaj dhe se përveç ish prefektit Radovani, ka nisur marrja në pyetje e personave tjerë të cilët dyshohet se kanë marrë lekë me fajde.

Gazetar: Simon Shkreli

Operator: Elton Shllaku

policiaaa.jpg
G. P.12:05 | 15/03/2019

Aktiviteti kriminal i grupit të fajdeve është i shtrirë në disa institucione të Shkodrës dhe të Tiranës. Mësohet nga burime të Abc News se personat e përfshirë në këtë skemë janë më shumë se 22 vetë.

Në grupin që jepte hua në Shkodër me interesa deri 20% mendohet se janë përfshirë shume persona. Nga burime të ABC News mësohet se aktiviteti kriminal është shtrirë në disa institucione të Shkodrës, të Tiranës si dhe në biznese të ndryshme.

Të arrestuarit në aksion dhe personat e shpallur në kërkim dyshohet se para se të jepnin hua merrnin informacion për pasuritë dhe asetet që zotëronin shtetasit që kërkonin para borxh.

Më pas ofroheshin për të dhënë para me interesa të larta në mënyrë që huamarrësit ta kishin të vështirë për t’i shlyer për një javë.

Kështu biznesmenë të ndryshëm apo zyrtarë binin pre e fajdexhinjve duke humbur pronën, shtëpitë dhe gjithçka kishin. Këta të fundit ishin ata që denoncuan të parët grupin kriminal dhe prokuroria nisi menjëherë hetimet.

Pas disa muajsh punë u arrestuan 12 persona, mes tyre avokate dhe policë dhe u shpallën në kërkim disa të tjerë. Dhënia hua e këtyre shumave ishte për interesa që variojnë nga 3%-20% në javë nga ana e personave të implikuar.  Policia ka sekuestruar të gjitha pasuritë dhe automjetet e regjistruara në emër të grupit kriminal./abcnews.al

TRUMP-KASHOGI-FOX-NEWS.mpg_snapshot_00.06.jpg
G. P.12:21 | 12/03/2019

“Trump Organziation” është vënë nën hetim nga Prokurorja e Përgjithshme e New York. Në qendër të hetimeve janë përpjekjet për blerjen e një skuadre amerikane të futbollit profesional.

Prokurorja e përgjithshme e New York, Leticia James, ka nisur një hetim civil për aktivitetin e “Trump Organization”. Lajmi është publikuar nga Nju Jork Tajms, duke shtuar se drejtuesit e Deutsche Bank dhe Investor Bank, u detyruan të dorëzojnë dokumentet që lidheshin me financimin e të paktën katër projekteve kryesore të fondacionit.

Gjithashtu janë marrë më pyetje dhe disa persona. New York Times raporton se hetimet për “Trump Organization”, kanë të bëjnë dhe me përpjekjet, më pas të dështuara, për të blerë në 2014-n një skuadër të futbollit amerikan, Bufalo Bills, të New York.

Hetuesit janë përqendruar më shumë tek Deutsche Bank, një nga pak banka që është ende e gatshme për ti dhënë kredi Donald Trump, vitet e fundit. Banka gjermane është gjithashtu në qendër të dy hetimeve të tjera nga Kongresi amerikan.

Hetimet e reja të Prokurorisë së Përgjithshme, u nxitën nga dëshmia në Kongres e Michael Cohen, ish avokat i Trump. Cohen, ndër të tjera, pranoi nën betim, se kreu i Shtëpisë së Bardhë kishte fryrë vlerën e vërtetë të aseteve të tij në deklarimet financiare të prezantuar në Deutsche Bank./abcnews.al

khashoggi.jpg
G. P.23:12 | 11/02/2019

Uashingtoni nuk i ka mbyllur hetimet mbi vrasjen e gazetarit saudit Jamal Khashoggi. Administrata amerikane ka bërë me dije se të hënën do të marrë masa ndaj personave përgjegjës për ekzekutimin e tij.

Sekretari amerikan i Shtetit, Mike Pompeo ka deklaruar se Shtetet e Bashkuara do të vazhdojnë hetimet mbi vrasjen e gazetarit saudit Jamal Khashoggi.

“Amerika nuk mund ta mbulojë këtë vrasje”, tha të hënën Pompeo, duke shtuar se Uashingtoni do të ndërveprojë për të mbajtur përgjegjës të gjithë personat e përfshirë në vdekjen e gazetarit.

Analisti saudit që jetonte në Shtetet e Bashkuara u vra tetorin e kaluar brenda konsullatës saudite në Stamboll. Pasi fillimisht hodhi poshtë çdo përgjegjësi, Arabia Saudite konfirmoi se agjentë të shërbimeve sekrete të saj kishin kryer vrasjen, por mohoi përfshirjen e familjes mbretërore në të.

Më 8 Shkurt administrata e presidentit Donald Trump u ndodh përballë skadimit të afatit kur duhet të dorëzonte në Kongres një raport lidhur me personat përgjegjës për vrasjen e Kashogit dhe sanksionet e mundshme ndaj tyre.

Të premten e kaluar, një zëdhënës i Departamentit të Shtetit deklaroi se sekretari Pompeo i kishte njoftuar ligjvënësit mbi hetimet por pa dhënë detaje të tjera. Por senatori Tim Kane, anëtar i komisionit për forcat e armatosura dhe marrëdhëniet me jashtë, tha të dielën që kaloi se raporti i kërkuar nuk ishte dorëzuar.

“Kjo do të thotë se administrata Trump po mbulon një vrasje. Amerika nuk duhet të bjerë kurrë në këtë nivel imoraliteti”, deklaroi Kane./abcnews.al

vrasja-ne-selite.jpg
G. P.15:12 | 05/02/2019

Grupi hetimor i vrasjes së ish-policit Arben Bilali në Tiranë ka në dorë disa elemente të rëndësishëm që mund të çojnë tek autorët e atentatit. Bëhet fjalë për një armë dhe disa sende të gjetura në një makinë që dyshohet se u braktis nga autorët pas krimit.

Arma e krimit, një maskë dhe dorezat që u gjendën në një automjet në periferi të kryeqytetit, që dyshohet se u përdorën për ekzekutimin e ish-policit Arben Bilali, u dërguan në Laboratorin e Policisë Shkencore ku po i nënshtrohen një ekzaminimi të detajuar.

Këto prova sipas grupit hetimor janë thelbësore, pasi nga pamjet e kamerave të sigurisë nuk është bërë e mundur identifikimi i personave që ndodheshin në automjetin, “Mercedes-Benz tip CLS”. Mjeti gjithashtu i është nënshtruar një procesi të thellë për të gjetur faktorë plotësues si gjurmë të gishtave në dyer apo xhama, fije floku apo edhe mbetje të tjera që mund të çojnë në identifikimin e ekzektutorëve.

Provat e reja të gjetura jo shumë larg zonës së Selitës, kanë sjellë një tjetër kthesë për hetimin. Policia kriminale është në pritje të përgjigjeve që do të sjellë Laboratori i Policisë Shkencore për të parë se kujt i përkasin profilet gjenetike të zbuluara në automjetin me targa të vjedhura e më pas të bëhet e mundur ndalimi personave të dyshuar.

Hetuesit dyshojnë se autorët kanë vepruar në nxitim e sipër kur janë larguar nga vendngjarja. Në përfundim të Unazës së Madhe, në afërsi të Saukut, afër në një rrugë dytësore ku nuk ka shumë lëvizje, ata kishin braktisur makinën sportive. Dyshohet se ata janë sinjalizuar për prani të policisë në zonë, ndaj për të mos humbur kohë, ekzekutorët nuk kanë pasur mundësi të fshehin provat apo t’i dërgojnë diku tjetër. Pista kryesore ku janë fokusuar hetimet për vrasjen e Arben Bilalt mbetet ajo e hakmarrjes./abcnews.al

saimir-tahiri.jpg
G. P.17:00 | 28/01/2019

Ish-ministri i Brendshëm, Saimir Tahiri, ka ankimuar vendimin e Prokurorisë për Krimet e Rënda për zgjatjen me 3 muaj të hetimeve ndaj tij. Sipas Tahirit, vendimi i datës 17 Janar 2019 është i pabazuar në ligj dhe në prova, që ka si qëllim zvarritjen e hetimit dhe vonimin e dhënies së drejtësisë.

Në ankimin e përpiluar nga avokati i ish-ministrit, Maksim Haxhia, Prokuroria për Krimet e Rënda ka pasur të gjithë mundësitë kohore për t’i përfunduar hetimet. Shtyrja e fundit e hetimeve për Tahirin është e pesta në radhë nga nisja e procedimit penal ndaj tij.

Koha shtesë, sipas prokurorëve, nevojitet për pritjen e një letër-porosie nga Mali i Zi dhe një tjetre nga autoritetet italiane të drejtësisë. Ish-ministri Tahiri po hetohet për “trafik të lëndëve narkotike”, në formën e grupit të strukturuar kriminal dhe “korrupsion”. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono