hetim

donald-trump1-1280x853.jpg
G. P.12:06 | 12/01/2019

Sipas New York Times, FBI ka hetuar kreun e Shtëpisë së Bardhë, Donald Tramp nëse ka bashkëpunuar në mënyrë të vetëdijshme ose jo me Rusinë, kundër interesave të amerikanëve. Ndërkohë në ditën e 22 të tij Shutdown-i ëshët zyrtarisht më i gjati i regjistruar ndonjëherë në vend.

Sjellja e Donald Trump ditët pas pushimit nga puna të James Comey, vendosi në gjendje alarmi FBI-në duke detyruar agjencinë që të nisë hetimet për t’u siguruar nëse Presidenti amerikan punonte ose jo në mënyrë sekrete me Rusinë kundër interesave të amerikanëve. Një hetim eksploziv sipas New York Times, me hetuesit e kundër spiunazhit të impenjjuar për të vlerësuar nëse veprimet e presidentit përfaqësonin një kërcënim për sigurinë kombëtare. Dhe për të vendosur nëse Trump bashkëpunonte në mënyrë të vetëdijshme me Rusinë ose kishte përfunduar në mënyrë të pandërgjegjshme nën influencën e Moskës.

Hetimi i hapur nga FBI përmbante dhe një aspekt penal, mundësinë që pushimi nga puna i Comey përfaqësonte një pengesë të drejtësisë. Agjentët e FBI-së, shkruan New York Times, dyshonin për lidhjet e Trump me Rusinë që në fushatën elektorale të 2016-s, por nuk hapën hetim kundër tij sepse ishin të pasigurtë se si do të e vazhdonin. Por aktivitetet e Presidentit para dhe pas pushimit nga puna të Comey në vitin 2017, sidomos në dy raste kur Trump lidhi daljen nga skena të Comey me hetimet për Rusinë, shërbyen për të ngritur dyshimet e duhura mbi aspektine kundër spiunazhit të hetimeve. Prokurori special Robert Mueller mori drejtimin e hetimeve mbi Trump kur u emërua pak ditë pas nisjes së hetimeve të FBI-së. Ky hetim është një nga pjesët më  të rëndësishme të punës së Mueller për ndërhyrjet ruse në zgjedhjet presidenciale amerikane.

Hetimet kanë në qendër mundësinë që Trump pushoi nga puna Comey për të ndaluar apo për t’i dhënë fund hetimeve mbi Rusinë; një krim i mundshëm dhe një shqetësim për sigurinë kombëtare. Avokati i Donald Trump, Rudolf Xhuliani u shpreh i bindur se nuk ekziston asnjë provë për të vërtetuar këto akuza. Ndërkohë sindikatat e nënpunësve federal kanë hedhur në gjyq qeverinë amerikane për shotdown-in. Sipas tyre situata e krijuar shkel rregullat për punën duke u kërkuar nënpunësve të konsideruar të rëndësishëm, që të punojnë pa u paguar. Ndërsa është zyrtar rekordi, kjo është dita e 22 e shotdown-it të pjesshëm të qeverisë federale amerikane, duke u bërë më i gjati që ka përjetuar ndonjëherë vendi./abcnews.al

lulzim-basha-1280x853.jpg
G. P.23:20 | 10/01/2019

Lulzim Basha ka folur për herë të parë në “Opinion” për mosdekretimin nga presidenti të Gent Cakajt, si ministër i Jashtëm. Kryetari i PD-së nuk pranoi të shprehej nëse refuzimi i Metës ishte antikushtetues, por tha se kryeministri nuk nxorri mësim nga refuzimi i Sandër Lleshajt, por me Cakajn e thelloi më tej papërgjegjshmërinë.

Sipas Bashës, Rama propozoi për ministër të jashtëm një person që ka thyer rregullat për dokumentet e klasifikuara, e që u certifikua nga DSIK brenda një dite. Basha tha se ato veprime të zbardhura nga presidenti në refuzimin e tij, duhet të hetohen, e përgjegjësinë e parë e ka zv ministri Cakaj, e së dyti duhet të zbulohet se kush i dha urdhër DSIK ta lante, atë që kreu i PD e konsideron krim, në kuptimin ligjor të fjalës.

I pyetur për ndryshimet në qeveri, kreu i PD tha se ato përfaqësojnë rënien përfundimtare të fasadës, pasi vendimet i ka marrë kryeministri, e jo ata, përfshi edhe atë mbi aferën e Unazës së Re. Lidhur me protestat e banorëve të Unazës dhe të studentëve, Basha tha se detyra e opozitës është mbështetja e tyre dhe denoncimi i skandaleve të qeverisë, sic ka bërë në këto 6 vjet.

Ka ikur koha, tha Basha, që pushteti të merret me taktika si ajo e 21 Janarit. Sipas kreut të PD, Rama ikën me zgjedhje, e nëse do kishte zgjedhje në Shqipëri, Rama është i rënë./abcnews.al

dh-albania.jpg
G. P.19:43 | 16/12/2018

Hetimi i dy tenderave me vlerë 30 milionë euro të fituara nga kompania “DH Albania” është shtrirë deri në Shtetet e Bashkuara të Amerikës, ku është regjistruar kompania mëmë e saj “Danwell Haberman”.  Grupi hetimor ka nisur drejt SHBA-ve letër-porosi ku kërkon informacione nga autoritetet ligjzbatuese të shtetit të Delawerit mbi mënyrën e regjistrimit të firmës “Dunwell Haberman” atje.

Kjo pas konfirmimit se kompania  ka falsifikuar firmën e sekretarit të Shtetit tw Delawer, për datën e themelimit si dhe të dhëna të tjera që kanë të bëjnë me bilancet e saj ndër vite dhe gjendjen financiare të saj. Skandali mund të jetë akoma më i madh pasi Prokuroria ka dyshime se edhe noterizimi i dokumenteve në shtetit e Delawerit të jetë i falsifikuar. Ky proces sipas burimeve nga grupi i hetimit mund të jetë totalisht fiktiv dhe kjo pritet të verifikohet nga informacioni që do të mbërrijë nga shtetet e bashkuara. Këto dokumente janë përdorur nga përfaqësuesit e “DH Albania” fillimisht ne fitimin  e tenderit të OST për ndërtimin e linjës 220 kilovolt Burrel-Peshkopi me vlere 12 milionë euro. I njëjti dokumentacion thonë burimet është përdorur edhe në tenderin e ndërtimit të lotit të parë të unazës së re, me vlerë 18 milionë euro.

Prokuroria amerikane nga ana e saj është duke kryer një hetim për rastin pasi falsifikimi i firmës së sekretarit te shtetit te Delawerit dhe ajo e një noteri është krim fedaral dhe ndëshkohet rendë. Prokuroria e Tiranë regjistroi procedimin penal për 4 vepra shpërdorim detyre, shkelje e barazisë në tendera, falsifikim dokumentesh dhe mashtrim. Hetuesit janë duke verifikuar edhe veprimet e Autoritetit Rrugor dhe Operatorit të Sistemit të Transmetimit dhe disa prej tyre do të merren në pyetje. Para hetuesve do të japin deponimet e tyre të gjithë personat e përfshirë në dy tenderat./abcnews.al

CIFTI-NUDO-NE-EGJIPT-1280x720.jpg
G. P.22:59 | 10/12/2018

Një material filmik i publikuar në internet ka ngjallur polemika në të gjithë botën por u bë shkak që në Egjipt të niste një hetim. Prokuroria e Kairos po heton nëse është e vërtetë që një çift danez ngjiti Piramidën e Gizës dhe pozoi nudo mbi të.

Egjipti po heton një video që shfaq një çift danez që ngjit Piramidën e Madhe të Gizës por edhe duke pozuar lakuriq. Incidenti ka shkaktuar zemërim në vendin mysliman konservator. Prokurorët do të shqyrtojnë nëse videoja është reale, dhe nëse po si ata ishin në gjendje të ngjiteshin në strukturën e gjatë prej 140 metrash, raportoi gazeta shtetërore Al-Ahram. Zyrtarët fillimisht sugjeruan se pamjet mund të jenë të rreme. Piramida e Madhe e Gizës, e njohur edhe si Khufu ose Cheops, është një nga shtatë mrekullitë e botës së lashtë. Ministri egjiptian i antikitetit i tha deputetëve se prokurorët po hetonin nëse çifti danez filmoi ose jo një video pornografike në vendin e famshëm në Giza.

Një video 3 minutëshe, e cila u publikua në YouTube nga fotografi danez Andreas Hvid, tregon një femër që ngjit atë që duket piramida e lartë e Gizës. Fotografi tha se bashkë me një mikeshe të tij kishin kaluar disa orë “duke u fshehur përreth” përpara se të ngjiteshin. Në pamjet filmike përfshihet edhe një imazh i çiftit që pozon në majë të objektit 4500 vjeçar. Gjithashtu edhe një fotografi të çiftit, të cilët qëndrojnë në majë të piramidës të zhveshur. Videoja dhe imazhet u bënë virale në internet, por për më tepër shkaktuan zemërimin e shumë personave nga e gjithë bota./abcnew.al

lb.jpg
G. P.21:39 | 30/11/2018

Ora 17:00 i gjeti në rrugë. Banorët, shtëpitë e të cilëve preken nga projekti i zgjerimit të Unazës së Re, si çdo ditë prej disa javësh tashmë, dolën në protestë. Në mbështetje të tyre edhe kreu i demokratëve, Lulzim Basha dhe deputetë të grupit të tij parlamentar. Në 17 e 5 minuta, pavarësisht irritimit të ndonjë shoferi, rruga u bllokua nga të dy krahët dhe protesta vijoi. Për kryedemokratin, ajo që quan mega-aferë, është dy herë vjedhje e shqiptarëve.

“Së pari kemi të bëjmë me një dëmtim të interest të qytetarëve, taksapaguesve shqiptarë. Janë paratë e shqiptarëve që po vidhen, nuk janë vetëm paratë e qytetarëve që po protestojnë këtu. Vjedhja e dytë që po bëhet, është nxjerrja para festive të fundvitit, në mes të katër rrugëve e mijëra familjeve, mijëra vogëlushve, vetëm e vetëm që të mbushet me para thesi i Agait të Surrelit. Tani ja ku jemi siç e thatë vetë, po mbushen pothuajse katër javë këtu, dhe ne jemi e do të jemi në krah të qytetarëve. Nuk I braktisim, nuk i lëmë vetëm. Ka një padi nga banorët. Heshtja e prokurorisë tregon se është një prokurori e kapur dhe e bërë palë me vjedhjen. Ky është një fakt shumë tronditës. Mund të isha cinik dhe të thoja: Çfarë pret nga një prokurori që është bërë palë me krimin?! Por duhet ta themi dhe duhet ta thoni: Duhet të ja vini këta mikrofona Arta Markut, çdo prokurori dhe ti thoni: Pse nuk reagoni. Nuk del ajo?! Kushtdo që del nga dera e prokurorisë ta pyesni: Çfarë po bëni me kallzimin e banorëve? Pse nuk veproni? Pse nuk zbatoni ligjin”, theksoi Basha.

Pjesë e këtij hetimi duhet të jenë edhe ata që po i ushtrojnë presion banorëve, thekson Basha.

“Banorët ankohen vazhdimisht se njerëz me profil kriminal, bredhin derë më derë për të ju bërë presion apo për ti joshur që të lënë banesat e tyre. Por, siç e shikoni, nuk ia kanë dalë dhe ne do të jemi në krahun e tyre ditën dhe natën, në çdo moment. Ka vetëm një zgjidhje: Anulimi I këtij projekti korruptiv, hetimi i tij dhe çuarja para drejtësisë e atyre që kanë shkelur ligjin, kanë shkelur të gjitha ligjet e vendit dhe atyre të cilët kanë ushtruar dhunë psikologjike dhe fizike mbi banorët”, tha Basha.

Kreu i selisë blu theksoi se Partia Demokratike do të vijojë mbështetjen e protestës së banorëve./abcnews.al

mannafaort.jpeg
G. P.23:03 | 27/11/2018

Hetuesit amerikanë akuzojnë ish-kreun e fushatës elektorale të Donald Trump, Paul Manafort se ka gënjyer FBI-në. Sipas tyre, ai fsheh informacione të rëndësishme për ndërhyrjen ruse në fushatën presidenciale të Trump.

Ish kreu i fushatës elektorale të Donald Trump, Paul Manafort, akuzohet nga ekipi i prokurorit special Muller, i cili po heton për ndërhyrjet e Rusisë në zgjedhjet amerikane të 2016-s, se ka shkelur marrëveshjen me hetuesit duke i gënjyer agjentët e FBI-së mbi disa çështje. Në muajin shtator Manafort prano të bashkëpunonte me hetimet

Sipas FBI-së Manafort, ka gënjyer për tema të ndryshme por pa specifikuar mbi cilat argumente ish presidenti i fushatës së Tramp ka gënjyer. Avokatët e Manafort kanë hedhur poshtë akuzat duke këmbëngulur se klienti i tyre ka thënë vetëm të vërtetën. Mungesa e një marrëveshjeje mes dy palëve ka bërë që gjykata të caktojë një datë tjetër për vendimin.

Akuza ndaj Manafort tregon se sa shumë po këmbëngul prokurori Muller në hetimet për këtë çështje si dhe sa të forta janë dyshimet se Manafort po fsheh detaje që mund të lidhen me ndërhyrjet ruse në zgjedhjet presisenciale amerikane./abcnews.al

HETIME-PER-ATENTATIN-DURRES_ABCM2-T1.mpg_snapshot_00.34-1280x720.jpg
G. P.12:35 | 08/11/2018

48 orë nga atentati mafioz, ku mbeti i vrarë Edison Harizaj dhe shoku i tij Genci Caca, policia ende nuk ka një të dyshuar për krimin. Nga burime të ABC News mësohet se e vetmja pistë që po hetohet është ajo e hakmarrjes, për shkak të së shkuarës kriminale të vlonjatit Harizaj. Autorët mendohet se kanë ardhur nga rrethet, ose nga jashtë vendit.

Hakmarrje për shkak të se shkuarës kriminale është kjo e vetmja pistë që ekspërte të çështjes po hetojnë për ekzekutimin e tipit mafioz të Edison Harizajt dhe mikut të tij Genci Caca. Emri i vlonjatit Harizajt sipas hetuesve ka dalë vazhdimisht në ngjarje të rënda kriminale siç është perfshirja në vrasjen e gjyqtarit Skerdilajd Konomi, apo zhdukjen e Albano Xhaferrit në Vlorë. Ndërsa sç fundmi, miku i Emiljano Shullazit ishtë përfolur si person që nëpërmjet kanosjes u vinte gjoba biznesmenëve të ndryshëm. Pavarësisht se policia, nuk ka ende një të ndaluar per ngjarjen, dyshohet se ekzekutorët nuk janë banorë të Durrësit.

Burime për ABC News thanë se Harizaj nuk ishte pjesë e ndonjë hetimi apo ndonjë ngjarjeje kriminale në Durrës ç’ka mendohet se ekzekutorët të kenë ardhur nga rrethet apo jashtë vendit. Këto dyshime janë ngritur referuar dosjes kriminale të viktimes, por edhe nga kqyrja e vendit të ngjarjes ku rezulton se autorët kanë qenë në dijeni të lëvizjes së Harizajt dhe Cacës të cilët po udhetonin me mjetin tip Audi. Në momentin që automjeti i tyre është futur në rrugë dytësore në unazën e Plazhit është qëlluar me breshëri automatiku nga dy qitës të ndryshëm. Menjëherë pas ngjarjes policia gjeti një automjet të djegur në Shën vlash, e cila mendohet është përdorur nga autorët. Për të zbardhur krimin e rëndë policia e Durrësit ka kërkuar informacion edhe nga policia e Vlorës, aty ku dy viktimat ishin rezidentë./abcnews.al

saimir-tahiri.png
G. P.13:29 | 29/10/2018

Ish-ministri i Brendshëm, Saimir Tahiri, ishte të hënën në Prokurorinë për Krimet e Rënda. Ai depozitoi një provë, të cilën e konsideroi si vendimtare për hetimin e nisur ndaj tij. Tahiri tha se do të tregojë përmbajen e saj pas dy ditësh, por jozyrtarisht mësohet se bëhet fjalë për një akt të drejtësisë italiane që shuan dyshimet e ngritura ndaj tij.

Katër ditë anuloi një një dalje para mediave të njoftuar prej tij, ish-ministri i brendshëm, Saimir Tahiri, mbërriti  në Prokurorinë për Krimet e Rënda për të depozituar një provë të re. Ish-ministri nën hetim për “trafik narkotikësh” si grup i strukturuar kriminal dhe “korrupsion” kaloi pragun e godinës së qeltë në orën 13:00 në shoqërinë e avokatit të tij, Maksim Haxhia, ku qëndroi vetëm pak minuta. Në dalje Tahiri theksoi rëndësinë e provës që depozitoi, por kërkoi kohë shtesë për të publikuar përmbajtjen e saj.

Saimir Tahiri: “Unë paraqita diçka që ka rëndësi për procesi. Do kërkoj mirëkuptimin tuaj unë do flas pas 2-3 ditësh për çfarë është, më vjen keq që keni ardhur këtu. Dorëzova një provë që e quaj decizive për procesin”.

Pyetje: “A keni frikë se do të merreni i pandehur”?

Saimir Tahiri: “Unë nuk kam frikë gjë”.

Ky është dokument i palës italiane, që Tahiri ka depozituar në Prokurorinë e Krimeve të Rënda. Bëhet fjalë për një kërkesë të Prokurorisë së Katanias për arkivimin e hetimit ndaj ish ministrit Tahiri pasi nuk ka elementë të nevojshëm për të mbështetur akuzën mbi bisedën e përgjuar ku përmendet emri “Saimir”, si personi të cilit po i bliheshin dhurata të shtrenjta. Në fund të dokumentit është edhe vendimi aprovues i gjykatësit për mbylljen e hetimit për Tahirin. Ky akt pritet të vendosë jo pak në vështirësi prokurorët e Krimeve të Rënda për shkak se procedimi ndaj ish-ministrit nga Krimet e Rënda ka nisur bazuar në akte të përcjella nga autoritetet italiane.

Aktualisht Tahiri po hetohet nga Krimet e Rënda si garantor i grupit kriminal të “Habilajve” në trafikun e drogës. Në 15 tetor Prokuroria për Krimet e Rënda shtyu me tre muaj afatin e hetimit për të. Prokurorët kërkuan zgjatjen e afatit pasi ende janë në pritje të përgjigjes së një letër-porosie të dërguar në Itali, mes të cilës kërkohej marrja në pyetje e italianit Frederico Silvestri, që dyshohet se u ka shitur një skaf grupit të “Habilajve”. Afati shtesë u nevojitej prokurorëve edhe për kryerjen e disa verifikimeve mbi letërporosinë e ardhur nga Mali i Zi, si edhe për kryerjen e verifikimeve pasurore./abcnews.al

697ee3fa-7d1d-43ae-b4ac-69be9d99be55-1-933x445-1.jpg
ent ela15:02 | 26/10/2018

Pas deklaratave të një dite më parë në një studio televizive nga kryebashkiaku i Durrësit Vangjush Dako, ka reaguar kryedemokrati Lulzim Basha përmes një postimi në rrjetin social Facebook. Kreu i selisë blu ka theksuar se tashmë është e qartë për këdo se Edi Rama ka patur një plan të mirëmenduar e të shtrirë anembanë vendit, për bashkëpunim me krimin për të vjedhur zgjedhjet. Sipas Bashës duhet urgjentisht një hetim i posaçëm dhe i pavarur për këtë operacion kriminal. Më tej në mesazhin e tij Lulzim Basha deklaron se kryebashkiaku i Durrësit Vangjush Dako është i pari që duhet të merret i pandehur.

“Lënia e tij i lirë edhe pasi pranoi publikisht bashkëpunimin me bandat për të dhunuar zgjedhjet, është shkatërrim i demokracisë dhe vdekje e drejtësisë. Dua t’i kujtoj Donika Prelës dhe Arta Markut se dëmtimi i provave dhe manipulimi i hetimeve për krimet elektorale të Dakos, Ballës, Gjiknurit, Tahirit e të tjerë, është veprim i rëndë kriminal për të cilën ato do të mbajnë shpejt përgjegjësi deri më një.”

Kur prokuroria mbron krimin, ka rënë shteti përfundon mesazhin e tij kreu i Partisë Demokratike Lulzim Basha duke sjellë reagimin e menjëhershëm të të akuzuarit drejtpërdrejt prej tij, vangjush Dako. Edhe ky i fundit përmes rrejtit social facebook ka akuzuar kryedemokratin për shpifje.

“Ti duhet ta kuptosh që s’ke vota o Lulëzim dhe s’ta kam fajin as unë, as durrsakët, as shijaksit as krutanët. NUK KE VOTE! Je një peshk rezervati që nuk hahesh dot dhe hidhu përpjetë sa të dush me kaseta me telefonata e me sajesa vemjesh, ty nuk të beson askush”.

Do të shihemi në gjyq bashkë – përfundon Dako në postimin e tij në facebook. /abcnews.al

NOKA-PER-DAKON-SINKRON-ABC-M5-T2.mpg_snapshot_00.50-1280x720.jpg
G. P.20:44 | 24/10/2018

Emri i kryetarit të Bashkisë së Durrësit Vangjush Dako, sipas Partisë Demokratike është pjesë e dosjes së përgjimeve të trafikantëve të drogës në Shijak. Pasi bëri këtë deklartë, deputeti Flamur Noka pyeti organin e akuzës se pse ka bllokuar arrestimin e kryetarit të Bashkisë së Durrësit, pasi sipas Nokës, prej 24 orësh ka dalë një urdhër arresti për të.

Flamur Noka, deputet i PD: “Me një prokurori që nuk do të ishte nën urdhrat politikë të Edi Ramës, sot, Vangjush Dako duhet të ishte në burg. Kyetari i Bashkisë së Durrësit është pjesë e dosjes me numër 339, njësoj si miqtë e tij kriminelë – trafikantë droge apo si dy ish-deputetët e Partisë Socialiste, që sot janë prapa hekurave për të shpëtuar më të rëndësishmin e dosjes 339, Vangjush Dakon. Ka të paktën 24 orë që fletë arresti për Vangjush Dakon është prerë, por ekzekutimi I tij është bllokuar. Prokuroria duhet t’u japë shqiptarëve dy përgjigje të thjeshta: Pse është kthyer mbrapsht urdhri për arrestimin e Vangjush Dakos sot në mesditë? Kush po ndërhyn që Vangush Dako, “xhuxhi”, siç e quajnë kriminelët e tij, të mos arrestohet në bazë të përgjimeve të dosjes 339?
Kryetari i Bashkisë së Durrësit është peshku i madh i dosjes 339 dhe përpjekjet për të shpëtuar Vangjush Dakon janë të pashpresa! Askush nuk duhet të guxojë të prishë provat e përgjimit të Vangjush Dakos me kriminelët më të rrezikshëm të Durrësit! Çdo përpjekje për prishjen e provave, për zhdukjen e përgjimit apo për fshirjen e faqeve të transkriptuara të Vangjush Dakos me kriminelët është krim i rëndë, që paguhet me burg të gjatë. Askush nuk mund ta zhbëjë të vërtetën se kriminelët e Durrësit e të Shijakut kanë blerë vota për pushtetin e Vangjush Dakos dhe Edi Ramës dhe, si shpërblim, kanë marrë leje ndërtimi dhe tendera miliona eurosh. Këtë fakt e denoncoi një vit më parë Lulzim Basha. Për këtë fakt, e paditi për shpifje Vangjush Dako. Me këtë fakt, me dosjen me numër 339, Lulzim Basha fitoi gjyqin.
Paditë shterpë kundër opozitës dhe propaganda e lodhur se gjoja po luftohet krimi, pa arrestuar asnjë bos të krimit, janë në funksion të mbulimit të së vërtetës: se Edi Rama është peng i krimit të organizuar, i cili po qeveris dhe po pasurohet bashkë me Edi Ramën!”/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono