hec

protesta-heci.jpg
nev ila15:33 | 05/11/2019

Në Kacinar të Mirditës, banorët kanë vijuar bllokadën ndaj punimeve për ndërtimin e Hec-it në këtë zonë. Ata janë bërë shkak për të mos penguar dërgimin e tubacioneve në destinacion duke u bllokuar rrugën mjeteve.

Një grup personash vendosën pritë në hyrje të rrugës drejt Hec-it duke detyruar drejtuesit e mjeteve që të kthehen pas. Nuk kanë munguar edhe kërcënimet ndaj drejtuesve të mjeteve që janë gjendur papritur në këtë situatë.

Për ngjarjen është lajmëruar edhe policia e Mirditës. Këta të fundit kanë shoqëruar për të marrë në pyetje 3 persona që ishin pjesë e grupit që bllokoi ditën e sotme lëvizjen e mjeteve.

Pas marrjes në pyetje, policia ka lënë të lirë Anton Kolën, Florin Gjokën dhe Gjovalin Lleshin ndërsa bëhet e ditur se vijojnë hetimet për këtë incident. Banorët e Kaçinarit vazhdojnë protestat e tyre për të penguar vazhdimin e punimeve për ndërtimin e Hec-it në këtë zonë, ndërsa nuk kanë munguar edhe aktet e dhunës.

Dy roje të firmës që po kryenin punimet u dhunuan nga persona ende të paidentifikuar dhe 4 mjete të saj u dogjën, ndërsa për ngjarjen nuk ka asnjë person të ndaluar.

Protestat nisën në maj të këtij viti dhe kanë vijuar pa ndërprerje, ndërsa banorët kanë shprehur vendosmërinë e tyre për të mos lejuar ndërtimin e këtij Hec-i, duke përmendur edhe kërcënime nëse do të vazhdohet./abcnews.al

ambulance-1280x694.jpg
nev ila18:15 | 31/10/2019

Pas marrjes së ndihmës mjekësore njëri nga rojet e dhunuar në Hec-in e Kacinarit është larguar nga spitali kurse tjetri vazhdon të qëndrojë aty. Mjeku që u kujdes për të lënduarit thotë se rojet erdhën me dëmtime të rënda ndërsa policia ende nuk ka dhënë informacion zyrtar për ngjarjen.

Pas marrjes së ndihmës mjekësorë njëri nga rojet e dhunuar në Hec-in e Kacinarit është larguar nga spitali kurse tjetri vazhdon të qëndrojë aty. Mjeku që u kujdes për të lënduarit thotë se rojet erdhën me dëmtime të rënda ndërsa policia ende nuk ka dhënë informacion zyrtar për ngjarjen.

Njëri nga dy rojet e dhunuar në kantierin e ngritur për ndërtimin e Hec-it në Kaçinar të Mirditës doli nga spitali i Rrëshenit rreth orës 15:30 minuta. Ai shoqërohej nga një oficer krimesh, por nuk ka pranuar të flasë. Kolegu i tij vazhdon të jetë nën kujdesin e mjekëve nga dëmtimet e rënda.

Dy roje të firmës që po ndërton këtë Hec u dhunuan me sende të forta në tentativë për të bllokuar disa persona që të mos kryenin dëme në kantier. Nga aktet e dhunës  pësuan lëndime në pjesën e kokës dhe të fytyrës.

Më pas autorët u kanë vënë flakën edhe 4 mjeteve dhe janë larguar. Dy të lënduarit u morën me ambulancë në spitalin e Rrëshenit. Policia e Mirditës nuk e ka konfirmuar ngjarjen.

Banorët vazhdimisht kanë protestuar për ndërtimin e  HEC-it në Kacinar .Ata kanë kundërshtuar këtë projekt që sipas tyre dëmton zonën. Banorët e këtushëm kanë deklaruar se do të përdorin çdo mjet për të penguar ndërtimin e tij./abcnews.al

protesta-3.jpg
ent ela12:48 | 31/10/2019

Dy rojet e makinerive të firmës që do të ndërtojë HEC-et në Kaçinar të Mirditës, janë rrahur gjatë natës së mbrëmshme si dhe janë djegur 4 automjete.

Sipas disa burimeve bëhet me dije se është ushtruar dhunë ndaj dy rojeve të makinerive, të cilët janë dërguar për në spitalin e Rrëshenit për ndihmë mjekësore.

Sipas informacioneve të marra pranë spitalit të Rrëshenit dy persona kanë mbërritur në urgjencë me fraktura në trup  dhe ndodhen jashtë rrezikut për jetën. /abcnews.al

bistrica-2-1280x641.jpg
nev ila10:07 | 05/07/2019

Policia e Sarandës ditën e sotme ka bërë të ditur se, ka arrestuar 2 persona, të cilët dyshohet se, kanë hapur portën e kanalit ujitës dhe për pasojë është përmbytur hidrocentrali “Bistrica 2”, i cili momentalisht është jashtë funksionit.

Njoftimi i Policisë:

“Policia ka arrestuar shtetasit V. R., 51 vjeç, banues në Finiq dhe N. R., 66 vjeç, banues në Delvinë, pasi:

Më datë 03.07.2019, në vendin e quajtur “Mesopotam i Sipërm” Finiq, këta shtetas në bashkëpunim me njëri-tjerin dyshohet se kanë hapur portën e kanalit ujitës duke përmbytur kështu Hidrocentralin “Bistrica 2”.

Si rrjedhojë, momentalisht ky Hidrocentral është jashtë funksionit.

Materialet iu referuan Prokurorisë në ngarkim të tyre për veprën penale “Shkatërrimi i pronës me përmbytje“, bën me dije policia në komunikatën e saj./abcnews.al

 

 

bonati.jpg
ad min12:46 | 15/04/2019

Mosrespektimi i afateve procedurale, mosrespektimi i kushteve ligjore dhe kritereve në kontratat dhe lejet e lëshuara.

Janë këto problemet që ka ndeshur më shpesh Ministria e Infrastrukturës dhe Energjisë në kontratat për ndërtimin e Hidrocentraleve. Për këtë qëllim, ministria shton edhe 9 HEC-e të tjerë në listën e ndërprerjes së kontratës nga ana e tyre.

“Nga vijimi i procesit të skanimit, kanë rezultuar dhe 9 raste të tjera të shkeljeve të kushteve kontraktuale nga ana e subjekteve, për të cilat do të fillohet procedura për ndërprerjen në mënyrë të njëanshme të kontratës. Pra, deri më sot, numri total i praktikave për të cilat ka filluar procesi i ndërprerjes në mënyrë të njëanshme të kontratave koncensionare shkon në 17 raste”.

Sipas Ministrisë së Infrastrukturës dhe Energjisë këto veprime janë ndërmarrë për të minimizuar risqet e mundshme dhe implikimet financiare për buxhetin e shtetit./abcnews.al

HEC-896x445.jpg
ent ela08:30 | 09/03/2019

Në Parlamentin Evropian u mblodhën për të kërkuar mbështetje për mbrojtjen e lumenjve aktivistë nga i gjithë Ballkani.

Në mbështetje të grupit të së Majtës Evropiane dhe të së Gjelbrës Nordike në Parlamentin Evropian, të enjten (07.03) në Bruksel u mblodhën për të kërkuar mbështetje për agjendën e tyre aktivistë për mbrojtjen e lumenjve nga i gjithë Ballkani.

Personazhe të filmave dokumentarë dhe reportazheve televizive që kanë mbuluar rezistencën popullore kundër HEC-eve nga i tërë Ballkani u bashkuan në një sallë të Parlamentit Evropian. Këtu përfaqësuesit e komuniteteve dhe gazetarët bënin foto së bashku dhe këmbenin përvojat e tyre në ndaljen e HEC-eve në vendet e veta.

Maida Bilali qëndronte pranë flamurit shqiptar me pankartën e saj nga Bosnja, ku shihej mbishkrimi i vendlindjes së vet Krusica, fshati ku banorët e ndalën ndërtimin e hidrocentralit me trupat e tyre. Bilali me bashkëvendaset e veta e bllokuan rrugën për në pikën e ndërtimit 505 ditë me radhë, 24 orë në ditë. Në këtë mënyrë ato kishin ndalur ndërtimin e HEC-eve ne fahstin e tyre. Mirëpo tregon Maida “beteja nuk ka përfunduar, pasi ende nuk është tërhequr kontrata e koncesionit”.

“Këtu kemi pasur një takim të rëndësishëm me Komisionin Evropian, ku kemi përcjellë rëndësinë e ruajtjes se resurseve natyrore, pasi vizioni im është që këtë pasuri ta ruaj për gjeneratat e ardhme”, thotë ajo për DW .

Në Bruksel është edhe guida turistike dhe aktivisti ekologjik nga Shqipëria Alben Kola, i cili me vete kishte posterin ikonik të protestës së fundit në Kosovë kundër ndërtimit të HEC-eve ne shtratin e lumit Lumbradh të Pejës. Posteri me grusht të mbyllur, flamuri kuq e zi dhe simbolet boshnjake kishin mbuluar koridorin e Parlamentit Evropian. Në sallë u shfaq filmi dokumentar i Elton Baxhakut “Free Flow”, ku u shpjeguan detajisht shumë probleme që janë shkaktuar nga HEC-et dhe procesi i ndërtimit të tyre.

Pse qeveritë e Ballkanit ua japin burimet e veta të tjerëve

Pas filmit, eurodeputeti Thomas Waitz, nga të Gjelbrit e Austrisë tha se HEC-et sjellin përfitim për disa, por shkatërrojnë potencialin për zhvillim të turizmit për tërë zonën. “Pse për të ardhurat e një kompanie energjetike austriake duhet të shkatërrohet një vend?”, pyeti austriaku. “Si është e mundur që qeveritë e vendeve si Bosnja e Hercegovina, Serbia, Shqipëria, Mali i Zi, Kosova janë të gatshme të shkatërrojnë vendin e tyre për llogari të të tjerëve? Është korrupsion”, tha Waitz.

“Është Dhoma Ekonomike e Austrisë, që është po lobon për këto hidrocentrale. Unë kam biseduar me disa ambasadorë të Austrisë dhe ata janë mjaft kritikë për këto praktika. Por është edhe qeveria që lobon për këto kompani, pasi kompanitë janë të afërta me partitë në pushtet”, tha ai.

Në pyetjen nëse hidrocentralet mund të ndalen dhe a ka shpresë, Waitz tha se “disa nga ato janë ndalur”.

Kush i financon HEC-et

Igor Vejnoviç nga Bankwatch, një OJQ ndërkombëtare ka hulumtuar se kush i financon këto hidrocentrale dhe se kush përfiton prej tyre në Ballkan. Për ndryshim prej Evropës Perëndimore ku kompanitë shtetërore apo lokale i kanë ndërtuar hidrocentralet, në Ballkan të gjitha projektet janë të bëra nga kompanitë e huaja.

Ai tregoi më tej se institucionet e BE-së duhen bërë përgjegjëse për financimin e hidrocentraleve në Balkan. Ai veçoi Bankën Evropiane për Zhvillim dhe Rindërtim, Bankën Evropiane për Investime si banka publike, të cilat shpesh i financojnë këto projekte përmes bankave lokale si Unikredit nga Italia dhe Erste nga Austria.

Nga ana e tij Besar Likmeta, tregoi përvojat e tij si gazetar që ka mbuluar çështjet e lidhura me HEC-et. Ai tregoi se në Shqipëri opinioni publik është plotësisht kundër HEC-eve, mirëpo te to vazhdohet të investohet, dhe arsye kryesore janë paratë. Për të vënë vulën se hidrocentralet nuk kanë të bëjnë fare me të Gjelbrën dhe mbrojtjen e ambjentit, përfaqësuesja e ëF, Adria Irma Popoviç-Dujmoviç, tha: “Këto nuk janë projekte të gjelbra dhe nuk duhet të financohen”.

Në debat u kyçën edhe raportuesi për Shqipërisë nga Parlamenti Evropian, Ivan Jakovcic dhe Eduard Kukan nga EPP./DW

KLOSI-PER-HECET.mpg_snapshot_00.29-1280x720.jpg
ad min17:12 | 08/10/2018

Ministri i Mjedisit dhe Turizmit Blendi Klosi pranon dhënien e lejeve për HEC-e në zona të mbrojtuara e pa studim të ndikimit në mjedis. Ministri Klosi bëri të ditur se rregullorja e re do të jetë gati shumë shpejt.

Nga 175 koncesione për ndërtimin e hidrocentraleve vetëm 100 prej tyre janë dhënë në respekt të legjislacionit në fuqi. Ministri i Mjedisit dhe Turizmit Blendi Klosi pranon dhënien e lejeve për HEC-e në zona të mbrojtuara, pa studim të ndikimit në mjedis apo kompanive pa burime të mjaftueshme financiare të cila kanë dëmtuar mjedisin dhe nuk e kanë realizuar investimin e parashikuar.

Blendi Klosi, ministër i Mjedisit dhe Turizmit: “Sot nga 175 koncesione të dhëna të cilat janë që të gjitha me dëshirën e mirë që të realizohet diçka, por në fund të fundit vetëm 100 prej tyre funksionojnë pasi nuk kanë gjetur mundësinë që të realizohen sepse studimet e dhëna nga ekspertët, firmat e ekspertëve mjedisorë, të hidroteknikës ose inxhinierë kanë qenë firma të dhëna në terr dhe firma të dhëna të palogjikshme.”

Ministri bën të ditur se leje për HEC-e në zona të mbrojtura nuk do të ketë më, ndërsa rregullorja e re do të jetë gati shumë shpejt.

“Edhe kjo është një gjë shumë e mirë dhe sa kohë kam unë ministër, por besoj kushdo mnistër pas meje do ta ketë pothuajse të pamundur, unë do të shpresoja 100% të pamundur që të japë leje mjedisore në një zonë që është zonë e mbrojtur.”

Nderkohë, ministri i Mjedisit dhe Turizmit i ka bërë thirrje ambientalistëve dhe spcialisteve të fushës të ndihmojnë për gjetjen e një ekuilibri ndërmjet zhvilimit të qëndrueshëm të ekonomisë së turizmit edhe mbrojtjes së natyrës./abcnews.al

blendi-klsssss.jpg
ad min15:11 | 31/07/2018

Hidrocentralet mbi Osum nuk do të ndërtohen. Gjykata Administrative i ka dhënë të drejtë Ministrisë së Mjedisit dhe Turizmit, e cila pak muaj më parë pezulloi punimet. Ministri Blendi Klosi e cilësoi këtë vendim nxitje për të vijuar betejat në mbrojtje të natyrë.

Gjykata Administrative ka vendosur anulimin e ndërtimit të dy hidrocentraleve në kanionet e Osumit. Ajo ka rrëzuar ankimimin e kompanive private dhe i ka dhënë të drejtë Ministrisë së Mjedisit dhe Turizmit, e cila pak muaj më parë pezulloi punimet. Ministri Blendi Klosi gjatë një aktiviteti në ditën botërore të Rangers e cilësoi këtë nxitje për të vijuar betejën ndaj çdo vendimi të padrejtë.

“Në bazë të vlerësimit të Gjykatës Administrative, vendimi ynë i disa muajve më parë për bllokimin e këtyre dy HEC-ve është marrë në përputhje të plotë me legjislacionin dhe procedurat ligjore në fuqi. Vendimi i gjykatës na nxit edhe më shumë në intensifikimin e përpjekjeve tona për të parë procedurat e të shkuarës. Për të riparë trashëgiminë në zyrat tona, e cila është mbushur me bomba, me veprime ilegale, në kundërshtim të drejtëpërdrejtë të komunitetit tonë”, tha ai.

Por jo gjithmonë drejtësia ka qenë për mbrojtjen e natyrës. Ministri Klosi ndërsa bën këtë deklaratë i referohet vendimeve të dhëna nga gjykata për guroret në Berat.

“Ne kemi parë vendime jo të drejta nga ana e gjykatave. Në rastin e bllokimit të 9 guroreve në malin e Tomorrit, dy prej të cilave gjykata iu dha leje për të vazhduar punë, paçka se ata tashmë janë pasuri dhe mbrohem. Ne nuk do lejojmë që pasuria atje të shkatërrohet”, tha ai.

Pavarësisht kësaj, Ministri i Mjedisit dhe Turizmit deklaroi se lufta për mbrojtjen e natyrës do të vazhdojë pa kompromis. Ndërkohë ministri Klosi vlerësoi me certifikata të rinjtë e parë të programit Junior Rangers, që zhvillohet pranë Agjencisë së Zonave të Mbrojtura./abcnews.al

drini-1280x658.jpg
ad min19:10 | 09/03/2018

Korporata Elektroenergjetike Shqiptare njoftoi se situata hidroenergjitike në kaskadën e Drinit po përmirësohet. Sipas të dhënave, prurjet natyrale të ujit në orën 17:00 rezultonin në 116O m3/sek.

“Duke parë tendencën në rënie të prurjeve natyrale, parashikimet meteorologjike për ditët në vijim dhe me qëllim dhënien e kontributit të saj në lehtësimin e aspekteve operacionale të Shtabit te Emergjencave Civile te Qarkut të Shkodrës, KESH gjykoi të mundshme në që në orën 23:00 të së premtes të reduktojë më tej shkarkimet duke mbyllur plotësisht portat e shkarkimit dhe përpunuar prurjet permes ngarkimit maksimal të mundshëm të turbinave per prodhim energjie”, njoftoi KESH./abcnews.al

Capture-12-1280x666.jpg
ent ela10:49 | 09/03/2018

Bazuar në informacionet e ardhur nga terreni, situata deri në orën 09. 00  ka qenë si më poshtë:

Situata në basenet ujëmbledhëse të H/C-ve:

FIERZA: Kuota 295.16 m; Q=900 m3/sek; P=440 MW; 4AG në punë; Shkarkim nga porta 400 m3/s.

KOMANI: Kuota 171.76 m; Q=1200/400 m3/sek; P=580 MW; 4AG në punë; Shkarkim nga porta 600 m3/s.

V.DEJES: Kuota 74.44; Q=1430/250 m3/sek; P=239 MW; 5 Ag në punë; Shkarkim nga porta 1000 m3/s.

Qarku Shkodër.

Të dhënat e prurjeve të Liqenit dhe Lumenjve Drin e Bunë

Nivelet e Liqenit:  kuota kritike 9.00 m kuota aktuale 8.45 m.

Bahçallëku: kuota kritike 8.5, kuota aktuale 7. 27 m.

Gramsh i Bregut të Bunës: kuota kritike 6.30, kuota aktuale 6.40 m.

Bashkia Vau-Dejës: Njësia Administrative Bushat, janë përmbytur 320 ha tokë dhe 10 ha jonxhë në fshatin Fshati i Ri, si dhe është dëmtuar Ura e Gjolulit.

Bashkia Shkodër:

Njësia Administrative Dajç, janë përmbytur 650 ha tokë.

Në fshatin Darragjat 30 ha tokë nga të cilat 13 ha janë të mbjella foragjerë.

Në fshatin Shirq 210 ha tokë nga të cilat 60 ha janë të mbjella foragjerë. Nga prezenca e ujit janë të bllokuara 16 familje.

Në fshatin Mushan 245 ha tokë nga të cilat 55 ha janë të mbjella foragjerë.

Në fshatin Sukaj 65 ha tokë, nga të cilat 13 ha janë të mbjella foragjerë.

Në fshatin Dajç 100 ha tokë, nga të cilat 10 ha janë të mbjella foragjerë.

Aksi rrugor rural që lidh fshatin Darragjat me fshatin Shirq është i bllokuar nga rritja e nivelit të ujit. Është i kalueshëm vetëm me mjete të larta.

Në Njësinë Administrative Bërdicë janë përmbytur rreth 250 ha tokë në fshatin Trush.

Në Njësinë Administrative Velipojë në fshatin Luarz ka dalë uji nga argjinatura.

Njësia Administrative Ana e Malit, janë përmbytur 1150 ha tokë, si dhe 665 ha jonxhë, 180 ha foragjerë, 442 ha livadhe, 1 ha vreshta, 2 ha sera dhe 5.2 ha bimë dekorative.

Në fshatin Obot janë përmbytur 200 ha tokë.

Në fshatin Oblikë 550 ha tokë.

Në fshatin Muriqan 400 ha tokë.

Në fshatin Obot disa segmente rrugore janë bllokuar. Ujësjellësi Oblika është përmbytur dhe është jashtë funksionit dhe rreth 800 banorë nuk kanë furnizim me ujë të pijshëm. Rrezikon të përmbytet dhe Ujësjellësi Oblika 2.

Në Njësinë Administrative Gur i Zi, konstatohet fenomeni i erozionit në tokat bujqësore. Vazhdon gërryerja e tokës në fshatin Juban në një vijë gjatësore rreth 1 km.

Në Njësinë Administrative Rrethina, në fushat e Zuesit është rritur prezenca e ujit me 20 cm.

Në aksin rrugor rural për në malin e Shoshit lëvizja e mjeteve bëhet me zinxhirë për shkak të reshjeve të dëborës.

Ditën e djeshme në të gjithë zonën e prekur nga uji janë shpërndarë 620 pako ndihma në ushqime, 200 pako me detergjentë dhe 2,8 ton ujë i pijshëm.

Qarku Dibër. Në bashkinë Klos aksi rrugor rural Xibër-Tiranë është i pa kalueshëm.

Qarku Kukës. Akset rrugore nacionale që përshkojnë Qarkun e Kukësit vazhdojnë të jenë nën efektin e rënies së gurëve dhe dherave. Firmat Kontraktore janë në gadishmëri për ndërhyrje në problematikat e shfaqura.

Qarku Lezhë. Në rrugën që lidh qytetin e Lezhës me Kalanë e qytetit një masiv shkëmbor rrezikon të bjerë duke u bërë rrezik për banorët dhe për turistët që vizitojnë kalanë. Prefekti i qarkut Lezhë ka kërkuar që një ekip nga Shërbimi Gjeologjik Shqiptar (SHGJSH) të shkojë në vendngjarje dhe të kryej studimin e tokës. QKEC i ka dërguar kërkesë SHGJSH për të dërguar një ekip ekspertësh për të kryer studimin e zonës e cila rrezikohet nga masivi shkëmbor.

Qarku Tiranë. Në zonën e quajtur Kodër e Kuqe, Njësia Administrative Paskuqan, bashkia Kamëz, ka pasur një rrëshqitje toke e cila është problem për banorët e zonës. Me marrjen e njoftimit nga Prefektura Tiranë, QKOEC i ka dërguar kërkesë Shërbimit Gjeologjik Shqiptar për dërgimin e ekspertëve për të kryer studimin e tokës.

Qarku Korçë. Në fshatin Çërravë të Njësisë Administrative Çërravë, bashkia Pogradec, ka pasur një rrëshqitje masivi shkëmbor. Kjo është një rrezik serioz për banorët e zonës pasi masivi mund të prek disa banesa të zonës. QKOEC me marrjen e njoftimit ka dërguar në QBO një kërkesë për dërgimin e një ekipi specialistësh xhenierë për të bërë thërrmimin e masivit shkëmbor.

Forcat e Armatosura gjatë ditës së djeshme janë angazhuar per perballimin e situates me efektive dhe mjete. Gjatë këtij angazhimi janë transportuar 56 banorë, si dhe jane shperndare 620 pako ushqimore, 200 kuti detergjent si dhe 2.8 ton uje. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono