Hashim Thaçi

hashim-thaci-4.jpg
G. P.22:49 | 30/05/2019

Presidenti i Kosovës Hashim Thaçi ka bërë deklarata dhe akuza të rënda kundër ish-presidentit Sali Berisha. Sipas Thaçit, të gjitha informacionet dhe indiciet për vrasjen e gazetarit Ali Uka, në 30 korrik të 1997,  të çojnë tek zyra e ish-presidentit Berisha. Sipas Thaçit, Ali Uka është vrarë pasi kishte gjetur dhe do të publikonte informacione për takimet e fshehta të Berishës me Millosheviçin, Gligorovin dhe Arkanin.

Ali Uka kishte prova edhe për zhdukjen dhe vrasjen e Remzi Hoxhës nga shërbimet sekrete të kohës së Berishës, tha Thaçi në një intervistë dhënë për TV Dukagjin ku ai ishte përballë dy panelesh gazetarësh nga Kosova dhe Shqipëria.

“Dua të them një fakt për herë të parë. Është e vërtetë se Ali Uka atë kohë pretendonte dhe donte të botonte në  shtyp të vërtetën e vrasjes së atdhetarit Remzi Hoxha. Ali Uka punonte në gazetën “Shqiptare”. Remzi Hoxha i cili sipas Aliut kishte bërë zbulimin e takimeve të fshehta në Ohër në mes të Sali Ramë Berishës, Millosheviçit dhe Gligorovit. Pra Presidentit të Maqedonisë, Shqipërisë dhe Serbisë. Aliu fliste hapur me emra dhe mbiemra se kush e kishte arrestuar Remziun dhe si kishte përfunduar i vrarë. Rrëfimi i Aliut të conte direkt në zyrën e Sali Ramë Berishës, tek njerëzit në zyrën e Sali Ramë Berishës.

Ndërsa flas për takimin e fshehtë mes Berishës, Millosheviçit dhe Gligorovit në pranverë të vitit 1995. Nuk është folur shumë në publik për këtë. Pretendimi i dytë i gazetarit Ali Uka ishte se kishte zbuluar atëherë skemën e Arkanit në Shqipëri dhe takimet me zyrtarët e lartë të SHISH. Aliu fliste me fakte që Sali Ramë Berisha ishte në dijeni të plotë të qëndrimit të Arkanit dhe Legias në Fushë Krujë dhe Shkodër dhe që kontraktonin dhe merreshin me kontrabandë por para së gjithash të armatimit të njësive paramilitare të serbëve edhe në Kosovë, edhe në Kroaci, edhe në Bosnje. Këto deklarime të tij për mua kanë qenë intriguese. Sali Berisha e di shumë mirë kush e ka vra Ali Ukën. Me emër dhe mbiemër. E di se kur u burgos, si u dënu dhe kur u liru me ndikim të drejtpërdrejtë të Sali Ramë Berishës. Ali Uka ka qëndruar dhe ka pi me të në tavolinë, me dy nga këshilltarët e Sali ramë Berishës dhe dy persona të tjerë”, tha Thaçi./ABC News Albania 24/7

hashim-thaci-3.jpg
G. P.22:31 | 30/05/2019

Presidenti i Kosovës, Hashim Thaçi i është kundërpërgjigjur Sali Berishës, duke deklaruar se ky i fundit kërkon të qëndrojë në skenë duke u marrë me kreun e shtetit të Kosovës.

Sipas Thaçit, Berisha do të përdorë debatin kundër tij për fushatën në Shqipëri.

“Ndjej keqardhje kur e shoh në këtë gjendje të arrogancës dhe humbjes së kontrollit si gërmadhë apo si fosil. Mendoj se ka nevojë për një trajtim mjekësor se sa të merret seriozisht në kuptimin e një debati politik. Është humbje e madhe e kohës për të diskutuar për të, por vendimin më të madh e  kanë marrë vetë qytetarët në Shqipëri, por ndoshta mendon me qëndruar në skenë duke u marrë me mua dhe ka nxjerrë mllefin që ka pasur 3 dekada. Ai dëshiron që të qëndrojë në këtë debat për shkak të fushatës që ka në Shqipëri dhe nuk do dëshiroj që të interferoj në këtë proces. Është punë e tyre. Urrejtje ndaj Ramës mund ta shprehë atje, por jo ndaj meje në Kosovë”, tha Thaçi.

Ai i ka kthyer përgjigje edhe për akuzat që Sali Berisha deklaroi në emisionin “Opinion” në TV Klan, në lidhje me arrestimin e kreut të shtetit të Kosovës për shkak të vrasjes së gazetarit Ali Uka bë vitin 1997. Thaçi theksoi se është arrestuar nga autoritetet e Berishës dhe kur është vrarë gazetari ka qenë në komisariat.

Argati i Millosheviçit thotë që jam arrestuar për çështje ordinere. Viti ‘97 Shqipëria ka qenë me pushkë në dorë për shkak të politikave të tij të dobëta me fajde. Unë jam arrestuar, kjo është e vërtetë, për armëmbajtje dhe për disa krehra kallashnikovësh për t’i sjellë në Ushtrinë Çlirimtare të Kosovës. Unë jam arrestuar 10 orë para se të vritej Ali Uka. Jam arrestuar tek ura e Elbasanit, në mënyrë brutale, nga autoritetet e Sali Ramë Berishës. Kam qëndruar 24 orë në komisariat dhe kur është vrarë Ali Uka unë kam qenë në komisariat”, tha Thaçi./abcnews.al

hashim-thaci-2.jpg
G. P.21:48 | 30/05/2019

“BE duhet të ndryshojë përndryshe kjo rrugë do të çojë domosdoshmërisht, ky izolim i Kosovës, në një angazhim të dy parlamenteve, dy qeverive për një shtet të përbashkët”.

Kjo është deklarata që lëshoi këtë të enjte Presidenti Hashim Thaçi në lidhje me idenë për bashkimin kombëtar mes Shqipërisë dhe Kosovës. Kjo sipas Presidentit vjen si rezultat i vonesave, diskriminimit dhe izolimit që i është bërë Kosovës nga shtetet anëtare të BE-së.

Deklaratat kreu i shtetit të Kosovës i bëri gjatë emisionit “Debat Plus” në TV Dukagjini, ku ishte përballë një paneli me gazetarë kosovarë dhe shqiptarë falë një bashkëpunimi me ABC News.

“Ideja për korrigjimin e padrejtësive historike për bashkangjitjen e Preshevës, Medvegjës dhe Bujanovcit me Republikën e Kosovës kurrë nuk ka qenë më e sensibilizuar në rrafshin kombëtar dhe ndërkombëtar. Edhe në takimin e Berlinit nuk është mbyllur ndonjë ide dhe nuk është paraqitur ndonjë ide nga ndërkombëtarët. Pas vonesave dhe diskriminimit që është duke i bërë BE apo shtetet anëtare të BE-së Kosovës, mendoj që ka ardhur koha që të mendojmë seriozisht për ndërmarrjen e hapave konkretë dhe institucional për një angazhim të të gjithëve, edhe institucioneve dhe qytetarëve që nëse BE vazhdon me këtë izolim dhe mbyllje të derës për Kosovën, për mos respektim të arritjeve që kemi pasur deri tani atëherë realisht duhet të shkojmë deri në një formulë të bashkimit kombëtar, qoftë edhe nëpërmjet një rezolute të Kuvendit të dy vendeve tona, apo dhe përmes referendumit në Kosovë dhe Shqipëri. Gjithmonë duke përfshi Preshevën, Medvegjën dhe Bujanovcin.

Unë i besoj shtetit të Kosovës, kam investuar gjithë jetën time. Jam vetëshpallësi i pavarësisë së Kosovës, i nxjerrjes së deklaratës së pavarësisë dhe kam arsye të fuqishme dhe personale dhe historike dhe të legacisë, por edhe të realitetit që t’i besoj shtetit të Kosovës. Jam më optimist se të tjerët sa i përket të ardhmes së Kosovës. Unë dua që Kosova dhe Shqipëria të jenë si dy vende në NATO dhe në BE, por me dy vota në OKB, por kjo vonesë e BE-së, ky izolim, ky diskriminim dhe ky poshtërim që i bëhet Kosovës, por edhe shqiptarëve çon në vendimin që definitivisht nëse nuk na duan me dy flamuj atëherë le të jemi me një flamur edhe në NATO edhe në BE edhe në OKB.

Nuk është presion, nuk është kërcënim, por është një qasje reale dhe do ta shtyj përpara që ta diskutoj me të tjerë. Është mirë që të gjithë të reflektojnë në kuptimin pozitiv. BE duhet të ndryshojë përndryshe kjo rrugë do të çojë domosdoshmërisht, ky izolim i Kosovës, në një angazhim të dy parlamenteve, dy qeverive për një shtet të përbashkët”, tha Presidenti Hashim Thaçi.

Ndërkohë pyetjes së gazetares Mirela Milori nëse kjo ide është diskutuar edhe nga Tirana, Hashim Thaçi tha se, “Zyrtarisht ende nuk është trajtuar kjo çështje, por kjo nuk do thotë që nuk do të trajtohet në të ardhmen shumë të afërt, por jo gjatë periudhës elektorale në Shqipëri”./abcnews.al

hashim-thaci.jpg
ent ela15:34 | 24/05/2019

Me anë të një postimi të gjatë në profilin e tij zyrtar në Facebook, presidenti i Kosovës Hashim Thaçi ka reaguar ndaj deklaratave të një dite më parë të ish-kryeministrit shqiptar Sali Berisha. Kreu i Shtetit të Kosovës, akuzoi sërish Berishën se i ka shërbyer Millosheviçit duke i shitur armë Serbisë.

Vijon përplasja në distancë mes ish-kryeministrit shqiptar Sali Berisha dhe presidentit të Kosovës Hashim Thaçi. Ky i fundit ka reaguar me një postim të gjatë në profilin e tij zyrtar në Facebook, ndaj deklaratave të bëra nga Berisha në emisionin “Opinion” të gazetarit Blendi Fevziu, mbrëmjen e së enjtes.

Berisha, foli për përplasjen me Thaçin, duke përsëritur qëndrimin e tij se e konsideron presidentin si një argat të Serbisë, si dhe ka treguar edhe arsyen e ndalimit të Thaçit nga autoritetet shqiptare.

Berisha tha se Thaçin e kishin ndaluar, për ta marrë në pyetje rreth vrasjes së gazetarit Ali Uka, pasi kishte fjetur në të njëjtën dhomë me Thaçin, e në të njëjtën dhomë ishte gjetur i vdekur.

Thaçi nga ana e tij në reagimin në Facebook përsëriti akuzat se Berisha i ka shërbyer Sllobodan Milloshevic, duke i shitur armë Serbisë, në kohën kur Kosova ishte në luftë.

Ndër të tjera ai thotë se ia ka pasur frikën gjithmonë një gjuhe të tillë, për të cilën thotë se tashmë është zhvendosur edhe në disa parti në Kosovë.

Thaçi shprehet se nuk ka asnjë kënaqësi të merret me një relike të shëmtuar – duke iu referuar Berishës – i vetëdijshëm se ky intrigant bën përpjekje dëshpëruese të ushqejë hijen e tij, duke hedhur baltë mbi çdo gjë që konsiderohet si vlerë e traditës dhe kulturës sonë kombëtare.

“Nuk kam asnjë dyshim se një ndër krimet më të mëdha në rrugëtimin e S.R.B, përveç përpjekjes për puç institucional, shkatërrimin e shtetit dhe demokracisë në Shqipëri, është edhe fakti se ai i shkatërroi edhe kodet e sjelljes dhe komunikimit të Odës Shqiptare.

Ai punoi tërë jetën duke përçarë kombin dhe vendin. Tiparet e malësorit i humbi duke i shërbyer bllokut në vitet e diktaturës”, vijon më tej reagimi i kreut të shtetit të Kosovës.

Duke iu referuar vetëm me iniciale, Thaçi shton se “S.R.B është ai që solli këtë fatkeqësi të madhe në sofrën tonë dhe infektoi shumë politikanë me fjalorin e tij vulgar, duke u bërë modeli më i keq.

E kam thënë dhe do ta them gjithnjë, se kam dhimbje kur e shoh si ka përfunduar në një gërmadhë morale dhe politike”, shkruan më tej ai.

“S.R.B sot nuk paraqet asgjë tjetër, vetëm një fosil.

“Dua ta kuptojnë të gjithë shqiptarët se unë kur flasë për S.R.B., nuk e bëj aspak për të pastruar ndonjë hesap personal. Këtë e bëjë vetëm si shërbim të interesit publik, që njerëzit të mos shurdhohen nga kambanat e këtij ndjellësi të fatkeqësive dhe që të gjithë së bashku të reflektojmë për këtë fatkeqësi kombëtare, që shfaqet në formën e shpifjeve, sharjeve dhe sulmeve të ulëta mes shqiptarëve”-përfundon Thaçi. /ABC News Albania 24/7

sali-berisha-1.jpg
G. P.12:03 | 24/05/2019

Ish-kryeministri Sali Berisha akuzon presidentin e Kosovës, Hashim Thaçi, se po e copëton Kosovën për të shpëtuar lëkurën e tij. Deklaratat ish-kreu i qeverisë i ka bërë në emisionin “Opinion”.

“Unë po diskutoj që ky ka marrë misionin e Serbisë së Madhe në mënyrë absolute. Pasi dështoi në anulimin e Gjykatës Speciale. Unë i kam bërë një propozim Kosovës, largojeni nga propozimi në negociata gjersa të zgjidhet çështja në Hagë. Të mos shkojë në negociata pa u zgjidhur problemi. Nuk mund të imagjinoja kurrë të sulmoja një drejtues të Kosovës po qe se nuk kërcënoheshin në mënyrë jetike interesat e saj. Gjithë verën e kaloi do ndryshojmë kufijtë, s’do ndryshojmë kufijtë. Gjithë kohën e kalon, të hiqet taksa të mos hiqet taksa”, tha Berisha./ABC News Albania 24/7

klan.jpg
G. P.22:25 | 09/05/2019

Korrigjimi i kufijve të Kosovës dhe shkëmbimi i territoreve mes Serbisë dhe Kosovës janë dy terma që kanë ndarë në dy kampe politikën në Shqipëri dhe Kosovë.

Presidenti i Kosovës, Hashim Thaçi, i ftuar në emisionin “Opinion” në Tv Klan ka sulmuar ashpër ish-Kryeministrin Sali Berisha, pasi ky i fundit e ka akuzuar atë si “Argat të Beogradit”.

“Mëkate të mëdha” ka bërë Berisha, tha Presidenti Thaçi, duke iu referuar luftës së Ushtrisë Çlirimtare të Kosovës. Ndërsa sa i përket qëndrimit që mban Sali Berisha duke kundërshtuar shkëmbimin e territoreve Kosovë-Serbi, Presidenti Thaçi e konsideron ish-Kryeministrin shqiptar “gërmadhë të politikës”.

Hashim Thaçi: “Z.Berisha nuk ka patur guximin të kundërshtonte idenë për shkëmbimin e territoreve nga z.Rugova. Z.Berisha ka bërë mëkate të mëdha ndaj UÇK dhe këto mëkate kanë qenë paralele të luftës në terren kundër shqiptarëve dhe propagandës së ashpër për UÇK terroriste. Në vitin 1999 unë kam shkuar në zyrën etij dhe pastaj kemi patur një komunikim normal. Kur jam zgjedhur Kryeministër, kemi pasur respekt reciprok.

Shpreh keqardhje për gjendjen e tij emocionale si një gërmadhë për skenën e politikës shqiptare. Nëse dikush mendon që dialogu Kosovë-Serbi ka qenë i dëmshëm, mendoj se është shumë naiv. Për arsye se ka qenë transparent. Unë jam vetëm për korrigjim të padrejtësive historike. Ky është pozicioni im”. /tvklan.al

neshooo.jpg
G. P.21:22 | 09/05/2019

Pas takimit me kryeministrin e Shqipërisë ditën e djeshme, Presidenti i Kosovës, Hashim Thaçi deklaroi se kishin biseduar për domosdoshmërinë në lidhje me hapjen e plotë të kufirit me Shqipërinë dhe krijimin e një hapësire shqiptare pa kufi nën ombrellën e aleancën euroatlantike.

Për diplomatin Agim Nesho, pavarësisht përpjekjeve të liderëve lokalë të Ballkanit Perëndimor, rregullat i cakton Europa dhe do zgjidhet sipas kushteve të saj. Sipas tij, kjo është një aventurë e paprecedentë që nuk lejohet as nga e drejta ndërkombëtare.

Agim Nesho: Unë mendoj që është një retorikë që i shërben më tej atij patriotizmit shqiptar dhe vlerësimit ndaj asaj që ka ndodhur në Berlin. Unë mendoj që Berlini ka qenë shumë i prerë dhe i saktë duke thënë që “doni të vini në familjen tonë evropiane, këto janë konditat. Asnjë fuqi tjetër mund të përcaktojë rregullat e shtëpisë tonë”. Çfarë do përpjekjesh të bëjnë udhëheqësit lokalë me prioritet që kanë duke thirrur një forcë ose një forcë tjetër, kjo gjë i takon Europës dhe në një kuptim kjo gjë do të zgjidhet në Europë dhe sipas kushteve të Europës. Kjo është një aventurë sepse nuk e lejon ligji ndërkombëtar, sepse jo vetëm Kosova, e cila me këtë deklaratë prek Kushtetutën e saj edhe vë në rrezik atë që komuniteti ndërkombëtar i ka përcaktuar, nuk ka bashkim me vende të tjera, nuk ka sovranitet ndaj Serbisë më. Përmendja e zonave të ndryshme në territorin e Serbisë, ashtu si edhe një ide tjetër për heqjen e kufijve, sado patriotike të jetë, është e dëmshme për këto momente, për Kosovën sepse ka të bëjë me procesin e njohjeve dhe aderimin në OKB.

Mirela Milori: Nëse kjo ndodh përbën rrezik faktori shqiptar e pështjellon rajoni nëse do hapej kufiri Kosovë-Shqipëri?

Agim Nesho: Ne mund të duam që sot të bashkohemi të gjitha hapësirat ku jetojnë shqiptarët, por kjo nuk mund të ndodhë. Paprecedentët në të drejtën ndërkombëtare kanë një ligj dhe ndryshe do të veprojë si në një pyll të egër ku ligjin do e bëjë më i forti. Sot nuk lejohet sepse sot ka pasur një reagim shumë të fortë. Daciç ka thënë që kjo është një pështymë ndaj BE-së për arsye sepse prek çështja e kufijve. Vetë Europa nuk mund ta lejojë këtë precedent pastaj do fillojë Srpska Republika do kërkojë të hapë kufijtë, fillojnë të çmontohen dhe krijohet një konfiguracion i ri gjeopolitik. Fuqitë e tjera nuk do jenë indiferente tani që ka dalë një botë polare dhe me shumë fuqi që kanë interes të veçantë mbi Ballkan./abcnews.al

ramna-dhe-macron.jpg
G. P.21:24 | 04/05/2019

Samiti i Berlinit ishte zhvillimi gjeopolitik që testoi tensionin politik në Shqipëri. Kryeministri Rama mbajti një profil të ulët publik mbi atë samit që pati në fokus marrëdhënien Kosovës Serbi, si pjesë e shqetësimit Europian për të patur stabilitet në rajon. Në Tiranë, Lulzim Basha artikuloi për herë të parë kërkesën për shtyrje të zgjedhjeve, ndërsa presidenti Meta deklaroi se nuk mund të ketë zgjedhje me standarde pa opozitën. Vetë Kryeministri i ndjek jo pa vëmendje ato lëvizje.

Po çfarë ndodhi javën politike që lamë pas?

Angela Merkel dhe Emmanuel Macron mblodhën të hënën e 29 Prillit në Berlin udhëheqësit e Ballkanit Perëndimor, për një takim informal. Formati ishte ai i Procesit të Berlinit të Gushtit 2014, iniciativë e kancelares gjermane. Franca e Gjermania, pavarësisht ulje-ngritjeve ndër vite në marrëdhënien e tyre, njihen motori i ndërtimit të Europës.

Madje miqësia franko gjermane është një nocion i njohur diplomatik, i zhvilluar paralelisht me Bashkimin Europian. Në Janar të këtij viti Merkel e Macron nënshkruan një traktat bashkëpunimi, që u pa si një thellim i marrëveshjes historike të Elysee të vitit 1963 mes presidentit Charles de Gaulle dhe kancelarit Konrad Adenhauer, për ta kthyer bashkëpunimin franko-gjerman në një realitet të përditshëm.

Merkel e Makron kanë marrë përsipër rajonin tonë e në modelin e marrëveshjes së suksesshme mes Athinës e Shkupit, synojnë një të ngjashme mes Kosovës e Serbisë. Por në atë samit dy vende të rajonit, Shqipëria e Maqedonia e Veriut janë në pritje për të dytin vit radhazi dritën jeshile për hapjen e negociatave të antarësimit. Dukshëm ky nuk ishte prioriteti i dyshes franko-gjermane. Për Macron prioritet është stabiliteti në rajon, si çështje europiane.

Por Shqipëria e Maqedonia e Veriut kanë pritshmëri për hapjen e negociatave. Rama e Zaev patën secili takime kokë më kokë me kancelaren. Në një deklaratë të shkurtër e të kujdesshme, Km nuk pati asnjë referencë për qëndrimin e Merkel për Shqipërinë. Entuziazëm nga ai takim përcolli ministri i Jashtëm në Detyrë Gent Cakaj që foli për mbështetje absolute të Gjermanisë për hapjen e negociatave.

Kryeministri Zaev dukej më i pakënaquri për mungesën e një premtimi për hapje negociatash. Vendi i tij ndryshoi emrin për të arritur marrëveshjen me Greqinë, e cila u mor si model në Samitin e Berlinit për ngërçin mes Kosovës e Serbisë, por premtim nuk pati. Mediat raportuan se Zaev u kishte deklaruar interlokutorëve Merkel e Macron, se do jepte dorëheqjen nëse vendit të tij nuk i hapeshin negociatat e anëtarësimit në BE, edhe pse përmbushi kushtin që i ishte vënë për marrëveshje me Athinën. Mesazhi i Zaev për qytetarët e reflektonte këtë

Por dyshja franko-gjermane dukej kishte tjetër plan, normalizimin e marrëdhënies mes Kosovës e Serbisë, duke u ndalur së pari projektin që kishte tensionuar marrëdhënien: korrigjimin e kufijve e më pas në taksën për produktet serbe. Në konkluzionet e përbashkëta të samitit evidentohet rëndësia e një marrëveshje gjithpërfshirëse, sërish me ndërmjetësimin e BE, pavarësisht kërkesave nga pala e KS për përfshirje të SHBA.

Serbia dhe Kosova janë dakordësuar të çojnë përpara përpjekjet për të zbatuar marrëveshjet ekzistuese dhe të angazhohen sërish në mënyrë konstruktive për normalizimin e dialogut me ndërmjetësimin e BE, me qëllim arritjen e një marrëveshje gjithëpërfshirëse dhe përfundimtare. Mes konkluzioneve, edhe një detyrë që dukej enkas për Mogherinin si lehtësuese e dialogut Kosovë Serbi.

Një nga ata që ka humbur besimin dhe është përplasur me Mogherinin është Kryeministri Haradinaj, që nuk u shfaq në takimin që shefja e diplomacisë zhvilloi me delegacionet në Berlin. Nëse Serbia u paraqit me presidentin Vuçiç e Kryeministren Brnabiç, nga Kosova u shfaq vetëm presidenti e zv.kryeministri.

Një ditë pas samitit, KE njoftonte se në Berlin ishte konfirmuar roli i Mogherinit si ndërmjetëse, ndërsa qëndrimi i saj 2 muaj më herët dukej se ishte harruar. Pas samitit të Berlinit, flitet për dialog, por jo kushte.

Spikati pas këtij Samiti një ndryshim në qëndrim edhe nga Presidenti Thaçi. Me të mbërritur në aeroportin e Prishtinës tha se vendosja e taksës ishte e drejtë, ndërsa Serbia nuk duhej të vinte kushte.

Por palët shqiptare nuk kishin qenë unison në Berlin. Haradinaj arriti një fitore jo të vogël me kundërshtinë e tij ndaj idesë së ndryshimit të kufijve dhe vënien në pikëpyetje të taksës serbe. I dha peshë akteve të veta duke akuzuar publikisht Presidentin Thaçi e Rama për presion në samit për heqjen e taksës.

Nëse Thaçi nuk reagoi, Rama u përgjigj një ditë më vonë. Përmes një statusi të gjatë në rrjetet sociale me titull, e vërteta ime me shumë dëshmitarë, thuhej se Haradinaj po gënjente për përfitim politik.

Por pas këtij mohimi, vinte pohimi se i tiji kishte qenë një sugjerim, që Haradinaj të pranonte propozimin Merkel Makron për pezullim të përkohshëm të taksës, në mënyrë që të mbështesnin njohjen e plotë ndërkombëtarisht të Kosovës.

Ndërsa Lulzim Basha lexonte qëndrimin e Merkel e Macron, si një tjetër “jo” për hapjen e negociatave me Shqipërinë. I qartë se hapja e negociatave ka ndjeshmëri publike, Km publikoi në rrjetet sociale dy takime që i vlerësoi si pozitive për këtë proces: me Kryetaren e socialdemokratëve gjermanë, Andrea Nahles dhe nënkryetarin e Grupit Parlamentar të CDU/CSU, Johann Ëadephul.

Nënkryetari i grupit parlamentar të kancelarës, u pyet nga DW për situatën në Shqipëri e djegien e mandateve nga opozita.  Spikati në përgjigje kujdesi në koment për PD, partinë simotër në PPE. Zyrtari i lartë i grupit parlamentar të Merkel megjithatë, nuk dukej gati për një premtim për hapje negociatash

Në ditën e fundit të afatit ligjor për Koalicionet, në KQZ u regjistrua koalicioni i majtë i udhëhequr nga PS me emrin e njohur Aleanca për Shqipërinë Europiane, si dhe një koalicion i djathtë me një grup partish të vogla, me emrin “Shpresa për ndryshim”. 13 maji është afati për regjistrimin e kandidatëve, e atë ditë socialistët do zyrtarizojnë kandidatët për 61 bashkitë.

Të paktën publikisht palët duken ekstremisht larg: Kryeministri që përgatitet për zgjedhje e opozita që përgatitet për protestë të shtunën e 11 Majit para selisë së qeverisë dhe bojkot zgjedhor.

Sytë mbeten nga presidenti i Republikës. A do arrijë Ilir Meta të ulë palët në tryezë, e a do e ndërmarrë aktin e shtyrjes së zgjedhjeve, ndërsa afatet për 30 qershorin e dekretuar prej tij po skadojnë njëri pas tjetrit për opozitën?/ABC News Albania 24/7

hashim-thaci-1.jpg
G. P.12:59 | 01/05/2019

Presidenti i Kosovës, Hashim Thaçi, tha se Serbia, pavarësisht qasjes armiqësore ndaj Kosovës, ka ecur e papenguar në rrugën e saj drejt integrimeve evropiane. Gjatë një konference për shtyp, Thaçi kërkoi nga Kuvendi miratimin e një rezolute për gjenocidin serb në Kosovë.

Ndonëse Serbia ka sjellje armiqësore dhe antievropiane nuk është penguar fare në rrugën e saj drejt integrimit evropian ka thënë presidenti i Kosovës Hashim Thaçi. Ndërsa Kosova po mbetet e izoluar për shkak të bllokadave të cilat sipas tij po i bëhen nga 5 vendet e BE-së që nuk e kanë njohur pavarësinë e saj.

Ai ka thënë se marrëdhëniet e Kosovës me Serbinë janë vazhdimisht të acaruara. Thaçi në një konferencë për mediat ka folur edhe për rrëfimin e Vasfije Krasniqit në Kongresin amerikan për dhunën seksuale që ka përjetuar ajo gjatë luftës në Kosovë.

Ka kërkuar nga Kuvendi që të nxjerrë një rezolutë për gjenocidin dhe krimet e kryera nga Serbia ndaj shqiptarëve në Kosovë. Sipas tij asnjë krim i kryer nga Serbia nuk duhet heshtur.

“Edhe pas 20 vitesh askush nga urdhërrendësit apo ekzekutorët e këtyre masakrave dhe veprimeve genocidale në Kosovë nuk doli para drejtësisë vendore apo ndërkombëtare”, tha ai.

Pas dy dekadash e mbijetuara e dhunës seksuale gjatë luftës në Kosovë, Vasfije Krasniqi-Goodman ka raportuar dje para Kongresit amerikan për përjetimet e saj të tmerrshme të asaj kohe./ABC News Albania 24/7

thaci-prestigji.jpg
nev ila12:48 | 30/04/2019

Prestigjiozja amerikane “New York Times”, shkruan në një analize për zhvillimet në Kosovë se  popullariteti i presidentit Hashim Thaci ka pësuar rënie. Sipas gazetës kryeministri Haradinaj ka më shumë mbështetje për shkak të qëndrimeve të tij kundër ndryshimit të kufijve.

Prestigjiozja amerikane “New York Times” shkruan se popullariteti i presidentit të Kosovës Hashim Thaçi është gjithnjë e më në rënie. Sipas kësaj të përditshmeje, kreu i shtetit në Kosovë krahasohet në shkrime nëpër mure të kryeqytetit, Prishtinë, me presidentin e Rusisë, Vladimir Putin.

Kosova nuk është Krime”, thuhet në një fjali, në anglisht.

Nga ana tjetër kryeministri Haradinaj i ka shfrytëzuar reagimet popullore ndaj asaj që nganjëherë shihet si marrëdhënie e ngrohtë e presidentit me Serbinë, duke lëvizur në një drejtim që shumë njerëz thonë se e forcon shtetësinë e Kosovës. Në dhjetor, Kuvendi i Kosovës miratoi ligjet për krijimin e ushtrisë, duke nxitur kritika nga NATO, e cila ruan paqen e brishtë, vijon më tej shkrimi.

Pak ditë më vonë, qeveria e Haradinaj vendosi taksën prej 100 për qind ndaj eksporteve serbe në Kosovë, në hakmarrje ndaj sabotimit që Beogradi po i bën anëtarësimit të Kosovës në institucionet ndërkombëtare, siç janë Interpol dhe Unesco. Që të dy vendimet kanë qenë ndër më të pëlqyerat që i ka ndërmarrë një qeveri në Prishtinë në një dekadë pavarësi.

Në një intervistë me New York Times, Thaçi hodhi poshtë pretendimet se ekziston një luftë për pushtet me kryeministrin Haradinaj. Ai tha se të kishin qenë shokë lufte në përpjekjet për pavarësinë e vendit, e që tashmë ishin miq. Por gjithsesi ai pranoi se kishin këndvështrime të ndryshme

Por kreu i shtetit këmbëngul se është optimist dhe beson në arritjen e një marrëveshjeje që përfundon me njohjen e pavarësisë së Kosovës nga Serbia, ndërsa Haradinaj sipas tij është më skeptik.

Haradinaj këmbëngul në qëndrimin e tij se eksperimentimi me kufijtë është anti-kushtetues. Në një citim për New York Times kreu i ekzekutivit shprehet se nuk ka të bëjë me pushtetin por çdo gjë lidhet me të ardhmen e kombit.

Cilido që po punon në kurriz të Kosovës është gabim, sepse nuk po bëhet për Kosovën por për një njeri të vetëm – dhe ai është presidenti. Nëse diku është shkruar se ai ka rënë dakord për ndryshimin e kufijve, ai duhet të japë menjëherë dorëheqjen”, përfundon Haradinaj./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono