grupi

raketa-1-1280x743.jpg
Sej rie21:15 | 15/07/2019

Autoritetet italiane kanë sekuestruar një raketë ushtarake dhe armë të sofistikuara në një operacion masiv kundër ekstremistëve të djathtë. Në pranga kanë përfunduar tre persona, të cilët sipas hetuesve luftonin përkrah separatistëve pro-rusë në lindje të Ukrainës.

Agjentë të seksionit të anti-terrorit në veri të Italisë kanë sekuestruar një raketë “ajër-ajër” dhe armë të tjera të sofistikuara gjatë një operacioni kundër grupeve të ekstremit të djathtë. Sipas mediave italiane, tre persona u arrestuan, dy prej të cilëve në afërsi të një aeroporti, ndërsa u konfiskuan edhe materiale propagandistike neo-naziste. Burimet mediatike nënvizojnë se bastisjet e policisë ishin pjesë e një hetimi mbi ndihmën që ekstremistët italianë i kanë ofruar separatistëve pro-rusë në lindje të Ukrainës.

Operacionet e policisë u udhëhoqën nga drejtoria e anti-terrorit të Torinos, DIGOS, dhe u shtrinë në qytetet Milano, Vareze, Forli dhe Novara. Personat e arrestuar janë dy shtetas italianë dhe një zviceran me origjinë italiane. Më 3 korrik, një gjykatë në Xhenova dënoi me burg tre persona që u shpallën fajtorë për pjesëmarrje në luftimet përkrah separatistëve pro-rusë, që kontrollojnë pjesën dërrmuese të rajoneve Donetsk dhe Luhansk në lindje të Ukrainës.

Dy prej tyre, mes të cilëve shtetasi shqiptar Olsi Krutani, u dënuan me nga dy vjet e tetë muaj, ndërsa i treti, një shtetas moldav, me 1 vit e 4 muaj. Mbi 10 mijë persona kanë humbur jetën në luftimet që kur separatistët e mbështetur nga Moska nisën ofensivën në lindje të Ukrainës, në prill të vitit 2014. Luftimet vazhdojnë ende, por janë më sporadike dhe fronti i betejës ka mbetur i qëndrueshëm prej më shumë se një viti./ABC News Albania 24/7

SHULLAZI-1280x720.jpg
G. P.14:44 | 18/06/2019

Seanca në Gjykatën e Apelit për Krime të Rënda për grupin e Emiljano Shullazit ka dështuar sërish. Gilmando Dani, i ka kujtuar gjyqtares Albana Boski se ajo duhet që të japi dorëheqjen duke qene se ka gjykuar çështjen e “Hotel Vollgës” në Durrës, ashtu siç kanë bërë edhe shumë kolegë të tjerë të saj.

Gjyqtarja Albana Boksi, që më short është caktuar edhe kryesuese në këtë proces, i ktheu përgjigje Danit duke i thënë “Faleminderit për paralajmërimin”. Seanca duhet që të shtyhej pas Apeli i Krimeve të Rënda ka pranuar kërkesën e Blerim Shullazit për përjashtimin e Saida Dollanit nga trupi gjykues.

Pasi ky i fundit e kishte ngritur padi më herët për Dollanin duke e akuzuar për shkelej proceduriale.  Seanca është shtyrë për në datën 24 Qershor, në orën 11:00 pasi KLGJ akoma nuk ka caktuar gjyqtarin e tretë në këtë çështje.

Pritet që Apeli për Krime të Rënda të shqyrtoj kërkesën për përjashtimin e Albana Boksit. Në këtë seancë mungonin edhe avokatët e caktuar kryesisht./ABC News Albania 24/7

volvo.jpg
G. P.15:33 | 04/06/2019

Lirohet ish-efektivi i policisë së Sarandës i arrestuar në kuadër të operacionit “Vol-vo 4”. Gjykata për Krime të Rënda i ndryshoi masën e sigurisë nga “arrest me burg” në “arrest shtëpie” Jasin Abdul për arsye shëndetësore. Gjykata ka urdhëruar që Abdul të mos takojë asnjë person tjetër përveç familjarëve që jetojnë me të.

Gjykata e Krimeve të Rënda ka liruar ish-efektivin e Policisë së Sarandës Jasin Abdul, anëtar i dyshuar i bandës së Avdylajve të Shijakut. Abdul ishte një nga efektivët e uniformave blu u arrestua në kuadër të megaoperacionit “Vol-vo 4”. Ish-policit  i është ndryshuar masa e sigurisë nga “arrest me burg” në “arrest shtëpie” për arsye shëndetësore.

Gjykata e Krimeve te Rënda  ka urdhëruar që pavarësisht se në arrest shtëpie, Abdul nuk duhet të kontaktojë me asnjë person të jashtëm, përveç familjarëve që jetojnë në të njëjtën banesë me të. Ish-efektivi i uniformave blu u arrestua pasi Prokuroria për Krime të Rënda, e akuzoi atë së kishte bashkëpunuar me “Avdylajt” e Shijakut, për të trafikuar lëndë narkotike nga Shqipëria në drejtim të Greqisë.

Jasin Abdul u arrestua bashkë me 43 persona të tjerë, të akuzuar për veprat penale ”Prodhimi dhe shitja e narkotikëve”, ”Trafikim i narkotikëve”, në bashkëpunim në formën e posaçme të grupit të strukturuar kriminal dhe organizatë kriminale, si dhe pastrim i produkteve të veprës penale, të drejtuar nga grupi i Shijakut.

Në kuadër të operacionit “Vol-vo 4” u goditën 4 grupe kriminale, midis tyre u zbulua edhe laboratori përpunimit të heroinës në fshatin Brenog të Hasit, ku u sekuestruan 182.5 kg morfinë, e ndarë në 175 pako, 22 litra lëndë e lëngshme, të cilat do të përdoreshin për të prodhuar  heroinë./ABC News Albania 24/7

fishekzjarre-1280x720.jpg
G. P.22:51 | 02/06/2019

Pasi u zhvendosën drejt godinës së parlamentit, protesta e opozitës është shoqëruar me tensione. Tubuesit hodhën mjete piroteknike në drejtim të policisë. Ata përdorën flakadanë, tymuese, kapsolla, por edhe fishekzjarre.

Në një video të siguruar nga ABC News përpara Kuvendit duket momenti, kur ndaj policisë lëshohen fishekzjarre. Siç shikohet në video janë disa persona të paidentifikueshëm pasi janë me kapuç, të cilët lëshojnë fishekzjarre në drejtim të uniformave blu.

Mirëpo për shkak se shpërthimi nuk ka shkuar siç duhet të gjithë pjesëmarrësit në rreshtin e parë, duke përfshirë gazetarë dhe protestues, kanë qenë të rrezikuar për të pësuar lëndime.

Ndërkohë pak më vonë edhe efektivët e policisë kanë reaguar ndaj turmës duke përdorur gaz lotsjellës disa herë. Ata hodhën edhe ujë ndaj turmës. Gjithashtu gjatë gjithë kohës i kanë bërë thirrje organizatorëve të tubimit Lulzim Basha dhe Gazment Bardhi që të marrin masa të menjëhershme që protestuesit te ndërpresin veprimet e dhunshme pasi dëmtojnë dhe rrezikojnë jetën e punonjësve të policisë./abcnews.al

SHULLAZI-1280x720.jpg
G. P.14:32 | 23/05/2019

Debat e replika të ashpra kanë shoqëruar seancën gjyqësore ndaj Emiljano Shullazit e të pandehurve të tjerë në Gjykatën e Apelit të Krimeve të Renda. Të pandehurit e avokatët e tyre janë përplasur me drejtuesen e trupit gjykues, e më pas braktisën seancën.

Seanca e radhës e gjyqit ndaj Emiljano Shullazit dhe 4 të pandehurve të tjerë, u shndërrua në një debat me replika të ashpra mes të pandehurve, kryetares së trupit gjykues Saida Dollani dhe avokatëve mbrojtës.

Gilmando Dani i kërkoi kryesueses së seancës, njëkohësisht drejtuese e Gjykatës së Apelit për Krimet e Rënda, që të sqaronte para mediave se kush e kishte kërcënuar atë dhe bashkëshortin e saj. Gjyqtarja Dollani i kërkoi të pandehurit Dani që të ulej në vend, por pas kundërshtimit të tij, togat e zeza e gjobitën me 30 mijë lekë gjobë dhe e përjashtuan nga seanca.

Vendimi irritoi të pandehurit e tjerë, të cilët e konsideruan të padrejtë. I pandehuri Endrit Qyqja aludoi se gjyqtarja Dollani me këtë qëndrim synonte të kalonte vettingun në kurrizin e tyre, por sipas tij, kjo nuk do ndodhte. Pas këtyre deklaratave, në shenjë revolte të gjithë të pandehurit u larguan nga séance bashkë me avokatët e tyre. Më herët, avokatët kishin renditur çka quajtën një sërë parregullsish në proces, përfshi mos njoftimin personave të tjerë që konsiderohen viktima.

Avokatët e grupit të Shullazit, kishin kërkuan përjashtim nga procesi të gjyqtares Valdete Hoxha, pasi kishte marrë pjesë si drejtuese seance në një proces penal ndaj Ylvi Beqajt, që për këtë dosje, ka statusin “dëshmitar i mbrojtur”, në lidhje me “hotel Vollgën”. Vetë gjyqtarja Hoxha e kishte paraqitur dorëheqjen, por kërkesa e saj ishte refuzuar nga Gjykata e Apelit për Krime të Rënda. Por edhe ndaj kryesueses së trupit gjykues Saida Dollani janë paraqitur 8 kërkesa për përjashtim nga ky gjyq./ABC News Albania 24/7

MBULIM-SHULLAZI.mpg_snapshot_00.32-1280x720.jpg
ent ela15:00 | 19/05/2019

Këshilli i Lartë Gjyqësor do të delegojë në mbledhjen e 20 Majit, gjyqtarin e tretë që do i bashkohet Saida Dollanit dhe Albana Boksit në procesin për grupin e “Shullazit”. Gjykimi nuk ka nisur në Apel për arsye se janë larguar 2 gjyqtarë të çështjes.

Procesi për Emiljano Shullazin dhe 4 të pandehurit e tjerë në Gjykatën e Apelit për Krime të Rënda do të rinisë me një trupë të re gjykuese.

Burime nga kjo gjykatë bëjnë me dije se gjyqtari i tretë që do t’i bashkohet Saida Dollanit dhe Albana Boksit do vendoset në mbledhjen e 20 majit që do të zhvillojë Këshilli i Lartë Gjyqësor. Këshilli do të delegojë një gjyqtar nga gjykatat e Apelit, pasi gjyqtarët e Gjykatë së Apelit për Krime të Rënda janë ezauruar.

Procesi në Apel për grupin e “Shullazit” nuk ka nisur për shkak të largimit nga trupa gjykuese e dy gjyqtarëve të çështjes. Ligji parashikon se kur ndryshohen dy nga anëtarët e trupës gjykuese, procesi duhet që të nisë nga e para. Dy gjyqtarët e larguar janë Fehmi Petku që u shkarkua nga Komisioni i Pavarur i Kualifikimit dhe Nure Dreni që u dorëhoq për shkak se kishte shqyrtuar një çështje tjetër në lidhje me Shullazin.

Më herët është dorëhequr edhe Sokol Binaj, por pa shpjeguar arsyen. I pandehuri Blerim Shullazi ka kallëzuar penalisht në prokurorinë e Tiranës gjyqtaren Saida Dollani për shpërdorim detyre dhe ka kërkuar përjashtimin e saj me arsyetimin se e ka gjykuar në një tjetër proces. Grupi i Emiljano Shullazit u dënua në shkallë të parë me 55 vite burg. /ABC News Albania 24/7

shqiptaret.jpg
Sej rie09:41 | 26/04/2019

Tre shtetas shqiptarë kanë përfunduar në pranga në Itali, si anëtarë të një bande kriminale përgjegjëse për 66 grabitje në verilindje të vendit. Vlera e sendeve të grabitura shkon në 2 milion euro

Policia e Pordenones arrestoi anëtarët e një bande kriminale, tre shtetas shqiptarë, të specializuar në grabitje vilash dhe banesash në verilindje të vendit. Tre shtetasit shqiptarë, kanë kryer 66 grabitje në provincat e Pordenones dhe Trevizos. Vlera e sendeve të vjedhura shkon në dy milion euro, përfshirë bizhuteri, ora dhe ar.

Grabitjet kanë nisur në dhjetor të 2018-ës. Të arrestuarve u janë gjetur pistoleta dhe municione, dhe sipas policisë ata po përgatiteshin për grabitje të tjera në zonë

Policia italiane gjithashtu zbuloi se një pjesë e mirë e parave transferoheshin në Shqipëri ku investoheshin dhe ricikloheshin. Pronarëve të grabitur u janë kthyer shumë bizhuteri me vlerën e qindra mijëra eurove./abcnews.al

DENOHEN-GRABITESIT-E-BANKAVE.mpg_snapshot_00.39-1280x720.jpg
ent ela15:47 | 26/03/2019

Gjykata për Krime të Rënda ka shpallur fajtorë anëtarët e bandës së grabitjes së parave në Rinas, por edhe të disa grabitjeve të bankave të nivelit të dytë. Vendimi është marrë në seancën e djeshme, ku është shpallur fajtor për të gjitha akuzat, Dash Kupa dhe bashkëpunëtorët e tij.

Gjykata e Krimeve të Rënda dënon në total me 156 vite burg 9 të pandehurit të akuzuar për grabitjet me dhunë të tre bankave në Tiranë dhe të autoblindave me para’ në rrugën e Rinasit.

Grupi i drejtuar nga Admir Murataj, person në kërkim dhe i vetmi ende i padenuar nga antarët e grupit, ka kryer një sërë grabitjesh nga 2015- 2017 ku kanë përfituar disa milionë euro.

Të hënën gjyakta e krime të vendosi të dënojë të prangosurit; Dash Kupa 27 vite burg, Ernest Kupa dhe Neim Avdylaj 26 vjet burg, Fatjon Xhyliu me 21 vite burg, Dritan Sinani me 20 vite burg dhe Aleksandër Murataj 19 vjet burg. Ndërsa Ditjon Memlika dhe Admir Cerpja bashkëpunëtorë të drejtësisë u dënuam me 8 vjet e gjashtë muaj heqje lirie.

Por, të gjithë të arrestuarit do të përfitojnë ulje me 1/3 e dënimit në aplikim të gjykimit të shkurtuar.

Sipas prokurorisë së krimeve të rënda, grabitja e parë ndodhi më 12 shkurt të 2015 ku në një bank të nivelit të dytë, afër stacionit të “Trenit” në Tiranë, morën nën kërcënimin e armëve, 900 mijë Franga Zvicerane, 800 mijë Paund Britanik. Në dhjetor të po atij viti, u grabitën në Qafë Kashar nga i njëjti grup ndodhur në  kohën kur paratë transportoheshin me mjete të blinduara në drejtim të Rinasit, 1. 8 Milion Paund Britanik, 800 mijë Dollarë Amerikanë, dhe 400 mijë  mijë Dollarë Kanadezë dhe Australian.

Por shkurti i 2017 ishte më frytëdhënësi për anëtarët e grupit të strukturuar kriminal. Në fshatin Domje, në rrugën e Rinasit, u grabitën duke goditur me një mjet të blinduar, makinën që transportonte paratë, ku u morën më  shumë se 3 milion euro. Në të gjitha grabitjet anëtarët e grupit kishin si veshje kamoflazhi, si ato të ushtrisë, ndërsa idenifikimi i tyre u bë pasi shumë shumë se 2 vitesh ndjekje. /abcnews.al

 

policiaaa.jpg
G. P.12:05 | 15/03/2019

Aktiviteti kriminal i grupit të fajdeve është i shtrirë në disa institucione të Shkodrës dhe të Tiranës. Mësohet nga burime të Abc News se personat e përfshirë në këtë skemë janë më shumë se 22 vetë.

Në grupin që jepte hua në Shkodër me interesa deri 20% mendohet se janë përfshirë shume persona. Nga burime të ABC News mësohet se aktiviteti kriminal është shtrirë në disa institucione të Shkodrës, të Tiranës si dhe në biznese të ndryshme.

Të arrestuarit në aksion dhe personat e shpallur në kërkim dyshohet se para se të jepnin hua merrnin informacion për pasuritë dhe asetet që zotëronin shtetasit që kërkonin para borxh.

Më pas ofroheshin për të dhënë para me interesa të larta në mënyrë që huamarrësit ta kishin të vështirë për t’i shlyer për një javë.

Kështu biznesmenë të ndryshëm apo zyrtarë binin pre e fajdexhinjve duke humbur pronën, shtëpitë dhe gjithçka kishin. Këta të fundit ishin ata që denoncuan të parët grupin kriminal dhe prokuroria nisi menjëherë hetimet.

Pas disa muajsh punë u arrestuan 12 persona, mes tyre avokate dhe policë dhe u shpallën në kërkim disa të tjerë. Dhënia hua e këtyre shumave ishte për interesa që variojnë nga 3%-20% në javë nga ana e personave të implikuar.  Policia ka sekuestruar të gjitha pasuritë dhe automjetet e regjistruara në emër të grupit kriminal./abcnews.al

MEYA-DHE-RAMA-1280x678.jpg
ent ela14:48 | 28/01/2019

Grupi parlamentar socialist ka vendosur ti thotë jo kërksesës së presidentit për rishqyrtim të ligjit për Noterinë. Në mbledhjen e zhvilluar pa praninë e kryeministrit Edi Rama, deputetët kanë marrë vendim edhe për të rishikuar ligjin për kadastrën, një tjetër dekret për rishqyrtim i presidentit Ilir Meta.

Mazhoranca socialiste dhe Institucioni i Presidencës kanë gjetur një pikë të përbashkët. Atë të refuzimit të ligjeve dhe dekreteve që i dërgojnë njëri tjetrit.

Rasti më i fundit është ai i ligjit për Noterinë.

Deputetët socialistë të mbledhur nën drejtimin e kryetarit të grupit parlamentar Taulant Balla vendosën që të rrëzojnë dekretin e Presidentit të Republikës Ilir Meta për noterinë.

Kryetari i shtetit në 14 janar vendosi ta kthejë në në Kuvend ligjin “Për noterinë”, me qëllim rishqyrtimin e neneve 61, 65 dhe 76 të këtij ligji.

Në argumentimin e vendimit, presidenti Meta thotë se ka paqartësi në formulimin e neneve të cilat do të krijojnë mundësi të interpretimit gjatë aplikimit në praktikë duke krijuar pasiguri për noterin dhe qytetarët që marrin shërbime noteriale.

Ndërsa neni 76 i ligjit, nuk është i qartë dhe nuk ofron siguri ligjore për mbrojtjen dhe mbështetjen e shtresave të pamunduara të shoqërisë për të përballuar tarifat dhe shpenzimet noteriale, apo të kategorive të veçanta të shoqërisë.

Argumentimet e presidentit nuk kanë bindur deputetët socialistë të cilët kanë paralajmëruar votën kundër dekretit të presidentit për rishqyrtim të Ligjit për Noterinë.

Një tjetër ligj i kthyer nga kryetari i shtetit është ai për kadastrën. Ndryshe nga Ligji për noterinë presidenti i Republikës vlerësoi përputhshmërinë e ligjit nr. 111/2018 “Për kadastrën” me Kushtetutën, dhe në përfundim të shqyrtimit çmon se disa nene të veçanta të këtij ligji, bien në kundërshtim me legjislacionin bazë të së drejtës civile në Republikën e Shqipërisë; cënojnë parimin e sigurisë juridike; krijojnë tension kushtetues; si dhe nuk janë në harmoni me jurisprudencën kushtetuese.

Grupi parlamentar ka parë me vend që ta rishikojnë edhe një herë lëtë ligj.

Në total janë rreth 7 ligje të rëndësishëm që nuk janë pranuar nga presidenti Ilir Meta duke ia kthyer për shqyrtim parlamentit. Midis të cilaje janë Ligji

“Për tarifat gjyqësore në Republikën e Shqipërisë”.

Ligji për buxhetin e viti 2019

Ligji për tatimin mbi të ardhurat

Ligji për teatrin

Ligji për lojrat e fatit dhe së fundi ligji për noterinë dhe ligji për kadastrën./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono