gjykata kushtetuese

balla-1.jpg
Autor E12:46 | 14/11/2019

Kreu i Grupit Parlamentar të PS-së, Taulant Balla njoftoi sot para mediave se pak më vonë do të mblidhet Konferenca e Kryetarëve që do të bëjë një vlerësim të dekretit të djeshëm të Presidentit Meta si edhe të betimit të sotëm të Arta Vorpsit para noteres si anëtare e Gjykatës Kushtetuese.

“Nuk dua të bëj një koment për këtë çështje këtu, do të kemi kohë boll. Pas pak minutash do të mblidhet Konferenca e Kryetarëve ku do të ketë një diskutim për këtë çështje. Mendoj se në këtë kontekst të krijuar, duhet një qendrim institucional në mbrojtje të Kushtetutës”, iu përgjigj Balla interesit të gazetarëve, ndërkohë që njoftonte shpërndarjen e materialeve zgjedhore për zgjedhjet e delegatëve të Partisë Socialiste.

Noterna kur Vorpsi beri betimin

Arta Vorpsi u betua sot para noteres Miranda Xhemalçe dhe më pas hyri në zyrën e saj në godinën e Gjykatës Kushtetuese për të filluar punë. E gjithë kjo shkaktoi reagime të forta publike, ku institucioni i Presidencës theksoi se s’mund të ndalonte betimin e askujt as tek noterja dhe as tek parukierja, kurse nga PD deklaruan se Rama praktikisht i ka kapur të gjitha institucionet. /abcnews.al

Momenti kur Vorpsi hyn ne zyre
kuvendi.jpg
nev ila12:18 | 14/11/2019

Pas zhvillimeve të fundit nga ana e Presidencës, kur kreu i Shtetit, Ilir Meta ka dekretuar si anetaren e dytë të Gjykatës Kushtetuese, Marsida Xhaferllarin, Kuvendi i Shqipërise njofton mbajtjen e një seance plenare të jashtëzakonshme.  

Sipas raportimit, të gazetares Esjona Konomi për abcnews.al, bëhet me dije se sot në orën 13:00 do të mblidhet Konferenca e Kryetarëve për të caktuar diten e nesërme zhvillimin e një seance të jashtëzakonshme.

Mësohet se rendi i dites do të jetë dekreti i Presidentit për caktimin e Marsida Xhafellarit si anëtare e Gjykatës Kushtetuese i cili është cilësuar nga maxhoranca si i papranueshëm./abcnews.al

vorpsi-1280x720.jpg
Autor E11:17 | 14/11/2019

Pas betimit gjatë mëngjesit të sotëm para një notereje, Arta Vorpsi ka filluar nga puna duke u futur në ambientet e Gjykatës Kushtetuese.

Gazetarja Esiona Konomi raporton për abcneës.al se Vorpsi është futur direkt në ambientet e gjykatës pasi u betua tek noterja Miranda Xhemalçe.

Siç duket edhe në foto, Vorpsi është shoqëruar edhe nga persona të tjerë gjatë futjes në ambientet e gjykatës.

Një ditë më parë, Presidenti Meta tha se nuk e njeh Vorpsin si anëtare të Gjykatës Kushtetuese.

“Jam shumë i qartë për këtë çështje. Kuvendi është i mirëpritur të komunikojë zyrtarisht me institucionin e Presidentit, dhe jemi të hapur për të bashkëpunuar në respekt të ksuhtetutës dhe detyrimeve kushtetuese dhe kjo është një çështje e mbyllur dhe shumë e qartë”, tha Meta. /abcnews.al

presidenca.jpg
nev ila11:16 | 14/11/2019

Reagon presidenca për betimin e Arta Vorpsit:

Institucioni i Presidentit ka reaguar sot në lidhje me veprimin e Arta Vorpsit, e cila bëri betimin si anëtare e Gjykatës Kushtetuese përpara noterit.

Përmes zëdhënësit Tedi Blushi, presidenca ka sqaruar se kreu i shtetit, nuk ndalon askënd të betohet, as tek noterja dhe as tek parukierja. Gjithashtu në reagim, thuhet se Presidenti Meta, është betuar me dorë në Kushtetutë, dhe se Shqipëria dhe shqiptarët janë të parët.

“Të dashur gazetarë,
Lidhur me pyetjet tuaja për një lajm qesharak që qarkullon në media, dua t’ju sqaroj se:
Presidenti i Republikës Sh.T.Z Ilir Meta nuk ndalon askënd të betohet as tek noterja, as tek parukierja.
Presidenti Meta është betuar me dorë mbi Kushtetutë dhe për të Shqipëria dhe shqiptarët janë të parët.“, thuhet në reagimin e zëdhënëist Blushi./abcnews.al

 

 

 

Arta-Vorpsi-491x400.jpg
nev ila10:30 | 14/11/2019

Arta Vorpsi është betuar përpara noteres si anëtare e Gjykatës Kushtetuese. Ndërkohë për këtë betim, Vorpsi ka njoftuar KED, Parlamentin dhe Presidentin Ilir Meta.

Veprimi i Vorpsit vjen pas dekretit të djeshëm të Metës, për emërimin e Marsida Xhaferllarit si anëtare të Gjykatës Kushtetuese.

ABC News ka mësuar nga burime qeveritare, se procedura është rakorduar me partnerët ndërkombëtarë dhe në mbështetje të një rekomandimi të Komisionit të Venecias, ku i cilëson betimet si akte të thjeshta ceremoniale.

Sipas nenit 129 i Kushtetutës së Republikës së Shqipërisë, një anëtar i gjykatës Kushtetuese mandatohet në këtë funksion, duke u betuar përpara Presidentit të Republikës./abcnews.al

byro-politike-juristet-1280x613.jpg
nev ila22:50 | 13/11/2019

Në studion e “Byro Politike”, mbrëmjen e sotme, me gazetaren Juli Xhokaxhi, kanë qenë të ftuar ekspertë të jurisprudencës shqiptare.

Në një diskutim, për ngërçin e krijuar për zgjedhjen e anëtarëve të Gjykatës Kushtetuese, i krijuar mes institucionit të Presidentit, Parlamentit dhe KED, ata thanë se ky proces i përzgjedhjes së tyre duhet të vazhdojë.

Më tej ata u shprehën se, ndryshimi i Kushtetutës është i domosdoshëm, për të evituar përsëritje të konfliktit mes institucioneve.

Por si do të zgjidhet ngërçi i Gjykatës Kushtetuese? Ja si përgjigjen ata:

Prof. Shefqet Muçi: Procedura po vazhdon dhe është normale, pra duhet të ecë.  Konflikti aktual i palëve është për kapriço. Nëse do ketë mirëkuptim mes tyre do të ketë zgjidhje.

Shkëlqim Hajdari, ish-prokuror: Faktorët politikë të koordinuar me faktorët e përgjegjshëm ndërkombëtarë në Shqipëri, ti krijojnë kushtet dhe ti kërkojnë llogari rritjes së ritmit të dy komisioneve, të nivelit të parë dhe të apelimit të vettingut. Këto njerëz që punojnë në vetting, nuk mund të funksionojnë si shtet ishullor. Komisionet e vettingut mund të shkarkojnë njerëz, por jo të bëjnë nga 1 gjyq në jave, por duhet të shtojnë punën e tyre e të përshpejtojnë ritmet. Atyre duhet t’u rritet puna për kalimin sa më shumë në vetting, të prokurorëve dhe gjyqtarëve, në mënyrë që të zhbllokohet sistemi.  Gjithashtu organet më të larta në Shqipëri duhet që në mënyrë urgjente të ndryshojnë kushtetutën për të zhbllokuar Gjykatën Kushtetuese.

Jordan Daci, avokat: Lëvizja e Kuvendit për të emëruar 2 kandidatë në vend të 1, dhe për tu shprehur për zonjën Vorpsi, ishte lëvizje e pastër politike, për ti marrë Presidentit të Republikës kompetencën, dhe për të vënë një anëtar të vetin, gjithashtu për të mos emëruar zonjën Xhaferllari. Kjo është një lëvizje e dukshme politike. E vetmja zgjidhje për këtë situatë, është ndryshimi i Kushtetutës, i cili do ti hapte rrugë një gjykate pa këto probleme themelore.

Ledjon Braho, Avokat: Nuk mund të presim ndryshimet kushtetuese në një kuvend të tillë, që të reformojmë Gjykatën Kushtetuese, jemi në një rreth vicioz. Në këtë situatë nuk mundet që të presim ndryshimet kushtetuese. Duke qenë në këto kushte, duhet të vazhdojë emërimi i anëtarëve të Gjykatës Kushtetuese./abcnews.al

presidenti-ilir-meta-1280x824.jpg
nev ila21:26 | 13/11/2019

Në konferencën për shtyp, mbrëmjen e sotme, presidenti  Meta deklaroi se, do të qëndrojë në detyrën e Presidentit të Republikës deri në datën 24 Korrik 2022.

“Asnjë dyshim deri në 24 korrik 2022, do të jem në krye të Institucionit të Presidentit, me dorën mbi Kushtetutë. Të paktën ju nuk duhet të keni asnjë dyshim për këtë”, deklaroi Meta.

Më tej Meta tha se Presidenti i republikës nuk ka asnjë përplasje me askënd.

“Ka një vullnet sistematik, të vendosur, institucional, zyrtar të presidentit të republikës për të bashkëpunuar me KED. Në këtë aspekt ka një informim të vazhdueshëm  nga ana e presidentit edhe për parlamentin, në mënyrë që të ketë bashkëpunim. Është presidenti ai që kërkon zgjidhje,  kërkon respektimin e kushtetutës. Është presidenti ai që ditën e Hënë nga Parisi i ka kërkuar kuvendit të ushtrojë me përgjegjësi kompetencat e tij sepse ky është proces që ka të bëjë me të ardhmen evropiane të Shqipërisë, që dikush nuk e do me patjetër. Për këtë proces do të informohet edhe Bundestagu por edhe vendet e tjera. Nuk ka individ mbi kushtetutën, nuk ka fuqi  mbi kushtetutën. Nga ana e presidentit ka vetëm kërkesë për bashkëpunim. Do ju vëmë në dispozicion të gjitha letrat tona drejtuar KED dhe kryetarit, se çfarë i kemi kërkuar, ia kemi dërguar në kohë”, tha Meta./abcnews.al

ilir-metaaa.jpg
ger ta20:51 | 13/11/2019

Presidenti i Republikës Ilir Meta po jep arsyetimet e tij lidhur me emërimet për Gjykatën Kushtetuese.

Sipas Metës,  KED shkeli Kushtetutën me radhën e emërimeve. Meta sqaron më tej se është korrekt me veprimet e tij, por kjo ka të bëjë me një rrethanë provokuese nga individë të caktuar të mazhorancës që kanë keqpërdorur kryetarin e KED.

I është kërkuar KED në kohë që të marri të gjitha masat që të mos vijë në një situatë të tillë, të garantimit të listave që për cdo vakancë të kemi kandidatë të paktën. Jo të vemi në një situatë ku është shumë e qartë ku të gjithë kandidatët janë të paracaktuar dhe mundësia e zgjedhjes është zero.  Ka qenë një kërkesë zyrtare që të mos kemi këtë situatë ku u dërgohet në të njëjëtn kohë dy vakanca të ndryshme. Nëse presidenti do kishte vepruar në atë mënyrë, që u përpoq kryetari i KED, është një shkelje e hapur e Kushtetutës por njëkohësisht presidenti mund të akuzohej nga Parlenti që jo vetëm që shkeli kushtetutën por e la parlamentin jashtë mundësive për të zgjedhur. Prandaj jo vetëm Presidenti ka komunikuar me KED shumë më herët se tani apo shumë më herët se KED të dërgonte për presidentin dhe të njëjtat lista i çon për Parlamentin. Por njëkohësisht ka komunikuar edhe me Parlamentin dhe kërkon të sqarohet kjo situatë dhe kërkon të ketë një bashkëpunim në mënyrë që të mos ishim në një situatë të konfliktit kjo vetëm me Kushtetutën.

Të hënën u detyrova të bëj një postim ku i kam thënë Kuvendit ju lutem ju përmbushni përgjegjësinë tuaj, unë e përmbusha timen, ju plotësoni të dytën dhe unë u kam thënë brenda 24 orësh të plotësoj vakancën tjetër. Ata vepruan ndryshe, kjo është përgjegjësi e tyre nuk është e imja dhe unë jam i detyruar të ndërmarr përgjegjësitë e mia në fundkison të Kushtetutës.

Unë jam shumë korrekt sepse kushtetuta thotë shumë qartë se vakancën e parë e plotëson Presidenti, të dytën Parlamenti dhe të tretën Gjykata e Lartë dhe kjo përsëritet dhe radhitja nuk është rastësi është për të ruajtur vetë balancat se si krijohet gjykata Kushtetuese. Presidenti nuk mund të bëjë dy emërime të njëpasnjëshme se është shkelje e Kushtetutës.

Kemi të bëjmë me një rrethanë provokuese nga individë të caktuar të mazhorancës që kanë keqpërpdorur kryetarin e KED në mënyrë që presidenti të vihej në këtë pozitë që ose të bënte një veprim që do ishte shkelje e Kushtetutës ose të bëjë një interpretim përmes marrëzive të tilla që ty të ka kaluar tani afati. Presidenti nuk ka shprehur mungesë vullneti për të zgjedhur se në rast se presidenti do thoshte nuk pranoj të zgjedh asnjë atëherë mund të ecej me atë llogjikë”, deklaroi Meta.

ilir-meta-konference-1280x696.jpg
nev ila20:49 | 13/11/2019

Presidenti Ilir Meta gjatë mbrëmjes së sotme, në konferencën e tij për shtyp, iu përgjigj edhe pyetjeve të gazetareve.

I pyetur se, nëse ishte e rëndësishme data apo afati i përcaktuar në kushtetutë, prej 30 ditësh, pas vendimit të vetë Metës që të “ngrijë” procesi i përzgjedhjes së kandidatëve për në gjykatën kushtetuese,  Meta theksoi se në Kushtetutë nuk ka një afat të caktuar për Presidentin e Republikës, aq më tepër tha ai kur bëhet fjalë për krijimin e gjykatës kushtetuese.

“Duhet të kemi të qartë të gjithë që nuk ka një afat të caktuar për Presidentin e Republikës. Nuk kemi një afat të përcaktuar në Kushtetutë për Presidentin. Kushtetuta është mbi çdo gjë, aq më tepër kur bëhet fjalë për krijimin e Gjykatës Kushtetuese. Për herë të parë krijohet gjykata kushtetuese sipas kushteve të reformës në drejtësi. Çdo akt në këtë proces i Presidentit, Parlamentit,  dhe i gjithë institucioneve, është historik sepse do të ngelet një referencë në të ardhmen. Çdo veprim i Presidentit aktual do të mbetet si referencë për presidentët e ardhshëm. Duhet të kemi të qartë që Komisioni i Emërimeve në Drejtësi është një institucion që merret vetëm me menaxhimin administrativ, për të garantuar zbatimin e Kushtetutës dhe të ligjit për krijimin e gjykatës kushtetuese, asgjë tjetër. Kushtetuta tregon qartë se si krijohet gjykata kushtetuese. Kushtetuta e thotë qartë që presidenti ka të drejtën të zgjedhë i pari vakancën e parë, pastaj është parlamenti dhe në këtë mënyrë përsëritet e njëjta renditje. Është detyra e KED që të rregullojë listat e kritereve dhe të afateve në respekt të ligjit. KED është institucion kolegjial dhe merr vendime kolegjiale, dhe jo që Kryetari i KED të bëj lojëra të karakterit administrativ, duke vendosur vetë kohën se si i dërgon listat në mënyrë të atillë, tepër të dyshimtë, për të mos thënë mafioze, që të vendosë Presidentin në pozitën që, o të shkeli detyrimisht kushtetutën e Shqipërisë, o të bëhen interpretime qesharake, si ai që Presidentit i ka mbaruar afati. Kjo është e turpshme, skandaloze dhe mafioze“, tha Meta./abcnews.al

astrit-patozi.jpg
ger ta17:39 | 13/11/2019

Situata me ngritjen e Gjykatës Kushtetuese duket se i ka shkaktuar të qeshura, kreut të Bindjes Demokratike, Astrit Patozit.

Kreu i BD me ironi pyet se pse të mos kemi 3 gjykata Kushtetuese.

Reagimi i Patozit vjen pas vendimit të Metës për të dekretuar si anëtare të Kushtetueses Marsida Xhaferllarin.

Reagimi i Patozit:

PSE TË MOS KEMI 3 GJYKATA KUSHTETUESE?

Hahaha. Çfarë shteti qesharak! Kishim dy vjet pa Gjykatë Kushtetuese fare, kurse tani, me sa duket, do të kemi dy të tilla njëherësh. Njërën, sipas Edi Ramës, dhe tjetrën, sipas Ilir Metës.

E sigurt është se që të dyja po ngrihen për të mbrojtur interesin publik, ndaj dhe protagonistët duhen falënderuar me gjithë zemër për kontributin dhe sakrificën.

Problemi i vetëm që ka dalë është se pse të mos kishim edhe një Gjykatë Kushtetuese tjetër, sipas Lulzim Bashës. Me këtë rast, ekuilibri do të ishte i plotë, por edhe suksesi i garantuar.

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono