gjykata kushtetuese

gjykata-kushtetuese-1280x703.jpg
G. P.20:04 | 21/08/2019

Kuvendi i Shqipërisë ka shpallur këtë të mërkurë hapjen e procedurës së aplikimit për vendin vakant për një anëtar të Gjykatës Kushtetuese.

Në njoftimin e Kuvendit thuhet se rishpall hapjen e procedurës së aplikimit për të plotësuar vakancën e parakohshme të krijuar për shkak të mbarimit para afatit të mandatit të Fatos Lulos.

Lulo u shkarkua nga të dy shkallët e Vettingut për mosjustifikim pasurie.

Lëvizja e Kuvendit vjen në kuadër të procesit të nisur nga Këshilli i Emërimeve në Drejtësi për plotësimin e 6 vendeve bosh në këtë gjykatë, 3 nga të cilët duhet të emërohen nga presidenti e 3 nga parlamenti.

Gjykata Kushtetuese, aktualisht ka vetëm një anëtar, Vitore Tushën, por që të nisë funksionin e të ketë mundësi vendimmarrjeje duhen edhe të paktën edhe 5 anëtarë të rinj./ABC News Albania 24/7

ambasada-amerikane-1280x702.jpg
nev ila09:25 | 13/08/2019

Së shpejti, Shqipëria do të ketë një Gjykatë Kushtetuese me gjyqtarë të kualifikuar, të paanshëm dhe apolitik. Mesazhi vjen nga ambasada e Shteteve të Bashkuara të Amerikës e cila nëpërmjet një video të postuar në rrjetet sociale tregon hapat që do të ndiqen për krijimin e gjykatës më të lartë në vend.

Ka një institucion që është mbi të gjithë. Kjo është Gjykata Kushtetuese që mund të vendosë edhe kundër Presidentit, Kryeministrit si dhe agjencive qeveritare.

Ky është leksioni i radhës që vjen nga selia e ambasadës së Shteteve të Bashkuara të Amerikës në Tiranë që ka marrë përsipër t’i japë përgjigje një pyetjeje.

“Por cili ishte problemi me këtë gjykatë në sistemin e vjetër”?

Në videon e publikuar në faqen e Facebook-ut, Ambasada e Shteteve të Bashkuara shpjegon se në të kaluarën Kuvendi dhe Presidenti duhet të binin dakord, për një kandidat që ky të bëhej gjyqtar i Gjykatës Kushtetuese.

“Por kjo shpesh nuk binte dakord dhe shkaktonte vende bosh për një kohë të gjatë. Kur binin dakord personi që zgkidhnin ishte si pasojë e një kompromisi mes politikanëve, por nuk ishin gjithnjë të përqendruar tek kualifikimi i personit. Detyra e një gjyqtari të Gjykatës Kushtetuese kërkon persona të kualifikuar, të cilët qytetarët mund t’u besojnë mbrojtjen e të drejtave të tyre jo kompromise politike”.

Gjykata Kushtetuese ka 9 vende, pasi gjyqtarët iu nënshtruan vlerësimit, vetëm 1 prej tyre kaloi. Pas reformës në drejtësisë, Kushtetuta përcakton standardet për të qenë gjyqtar i kësaj Gjykate. Këto standarde vihen në zbatim nga Këshilli i Emërimeve në Drejtësi i cili është grup Gjyqtarësh dhe Prokurorësh me përvojë të cilët kontrollojnë kualifikimet e Kandidatit. Ky Këshill rendit tri kandidatë kryesorë për çdo vend në Gjykatë bazuar në kualifikimet e tyre.

“Tani kjo kalon me rotacion mes Kuvendit, Presidentit dhe Gjykatës së Lartë. Por këta mund të zgjedhin vetëm nga lista me tre gjyqtarëve të kualifikuar për këtë post. Kjo do të thotë që nuk do të ketë ngecje, por edhe që politikanët nuk mund të emërojnë thjeshtë atë që duan ata.

Nëse Presidenti, Parlamenti apo Gjykata e Lartë nuk arrijnë të zgjedhin dikë, atëherë zgjidhet automatikisht kandidati i renditur më lart nga lista e Këshillit të emërimeve në Drejtësi. Sipas ambasadës së Shteteve të Bashkuara të Amerikës ky sistem i ri siguron që gjyqtarët e zgjedhur të jenë të kualifikuar, ndihmon për të parandaluar boshllëqet për kohë të gjatë si dhe nuk lejon një person që të ketë më tepër pushtet në procesin e përzgjedhjes.

Kaq e thjeshtë është në dukje ndonëse  vendit i mungon gjykata më e lartë në vend prej marsit 2018 kur nisi edhe procesi i Vettingut. 27 vjet pas ngritjes së Gjykatës Kushtetuese pritet rindërtimi i këtij institucioni. Nga 9 anëtarë aty qëndron e vetmja që u konstatua e pastër nga procesi rivlerësues, Vitore Tusha rojtarja e Kushtetutës me mandat të përfunduar./abcnews.al

KED-1280x823.jpg
nev ila12:13 | 31/07/2019

Këshilli i Emërimeve në Drejtësi ka përfunduar verifikimet për një pjese të kandidatëve për vendet vakante për Gjykatën Kushtetuese dhe Inspektorin e Lartë të Drejtësi.

Kështu KED ka miratuar lejimin e kandidimit për gjyqtar në Kushtetuese të Elsa Toskës, e cila ka aplikuar për vendet vakante që ka shpallur Presidenti dhe Kuvendi.

KED njofton se ka vendosur të ndalojë kandidimin e kandidatëve për gjyqtarë në Gjykatën Kushtetuese të 7 kandidatëve, të cilët kishin paraqitur interesin pas shpalljes së vakancave nga Institucioni i Presidentit të Republikës e Kuvendi.

Bëhet fjalë për:

1. Valbona Bala,

2. Klodian Rado,

3. Rexhep Bekteshi,

4. Sinan Tafaj,

5. Petrit Kaja,

6. Gëzim Allaraj,

7. Fiona Papajorgji.

Ndërsa për vendin vakant të Inspektorit të Lartë të Drejtësisë, KED ka vendosur të lejojë kandidimin e Artur Metanit e të ndalojë atë të Genci Gjonçajt.

Në njoftimin e KED thuhet se në mbledhjen e radhës do shqyrtohen kandidaturat e Eris Hysit, Klodian Rados, Zhaklina Petos dhe Marsida Xhaferllarit.

Procedura e vlerësimit të kandidatëve nga KED përfshin kontrollin e pasurisë, figurën dhe integritetin si dhe kushtet ligjore që mundësojnë kandidimin./ABC News Albania 24/7

gjykata-kushtetuese-1-1280x713.jpg
nev ila17:00 | 29/07/2019

Për dy ditë do të jetë gati lista përfundimtare me kandidatët që plotësojnë kriteret për të qenë anëtarë të Gjykatës Kushtetuese. E konfirmon për ABC News, Kreu i Këshilli të Emërimeve në Drejtësi Ardian Dvorani.

Dvorani bën të ditur se menjëherë pas përfundimit të verifikimeve nga KED, do të nisë intervistimin e kandidatëve, për të bërë pikëzimin e tyre.

KED ka përfunduar verifikimet për 11 nga 14 kandidatët, që garojnë për 6 vendet vakante. Mosfunksionimi i Gjykatës Kushtetuese, është shoqëruar me debat politik e publik. Presidenti dhe parlamenti kanë të drejtën e përzgjedhjes së 3 anëtarëve secili.

Për dy ditë do të jetë gati lista përfundimtare me kandidatët që plotësojnë kriteret për të qënë antarë në gjykatën kushtetuese, këtë e konfirmoi për për ABCNEËS Kreu i Këshilli të Emërimeve në Drejtësi Ardian Dvorani.

Gjithashtu Dvorani u shpreh se mënjëherë pas përfundimit të verifikimeve Këshilli i Emërimeve në Drejtësi do të nis intervistimin e kandiatëve ku do të bëhet edhe pikëzimi. KED ka përfunduar verifikimet për 11 nga 14 kandidatët që garojnë për 6 vëndet vakante.

Mosfunksionimi i Gjykatës Kushtetuese, është bërë mollë sherri mes qeverisë dhe presidentit, ku secila pale ka të drejtën për të zgjedhur 3 antarë./ABC News Albania 24/7

haradinaj-1280x720.jpeg
nev ila16:00 | 29/07/2019

 

Kryeministri në dorëheqje i Kosovës Ramush Haradinaj dorëzoi në Gjykatën Kushtetuese kërkesën për interpretim të kompetencave të tij pas dorëheqjes. Ai gjithashtu kërkoi që të mos zvarritet më caktimi i datës së zgjedhjeve të reja. 

Kryeministri në dorëheqje Ramush Haradinaj ka kërkuar nga Gjykata Kushtetuese  përcaktim të kompetencave dhe funksionimit të qeverisë pas dorëheqjes së tij.

“Kjo nuk është ndërhyrje në afate të zgjedhjes por për të krijuar shembull për herët e ardhshme. Kushtetuta jonë nuk e ka precizuar se si veprohet kur kryeministri jep dorëheqje. Këtë nuk e bëj vetëm për vete por Kosova duhet të ketë një rregullore që e përcakton këtë.  Si kryetar i qeverisë nuk kam interes pas dorëheqjes të kthehem në qeveri, as nuk vij se është fllad, por vij që të mos lë vakum qeverisës”, tha Haradinaj.

Haradinaj ka kërkuar që të mos zvarritet caktimi i datës së zgjedhjeve.

“Unë kam kërkuar nga nënkryetari i partisë të fillojë konsultat me partitë e të shpërndahet kuvendi. Pra të mos vonohen zgjedhjet. Mirë është të zbatohen afatet kohore”, tha ai.

Ai i ka ftuar për të martën në një takim, dy liderët e tjerë të koalicionit qeverisës, kreun e PDK-së, Kadri Veselin, dhe atë të Nismës Socialdemokrate, Fatmir Limajn. Haradinaj është pyetur edhe për mos njoftimin e liderëve të tjerë institucional për dorëheqjen e tij, por ka thënë se ai e ka bërë njoftimin në vendin dhe kohën e duhur./ABC News Albania 24/7

ramush-haradinajj.jpg
G. P.19:38 | 26/07/2019

Kryeministri në dorëheqje Ramush Haradinaj do t’i drejtohet Gjykatës Kushtetuese në lidhje me kompetencat që do të ketë qeveria në detyrë deri në zgjedhje, pas situatës së re të krijuar që nga dorëheqja e tij e parevokueshme.

Paqartësitë lidhur me kompetencat dhe vendimet që mund të marrë qeveria deri në zgjedhjen e qeverisë së re ka ndikuar që kryeministri Ramush Haradinaj të mos vazhdoj me rendin e ditës në mbledhjen e sotme.

Ai ka ngarkuar zyrën ligjore të kryeministrisë të sqarojë situatën e Qeverisë që tashmë është dorëhequr, dhe t’i drejtohet me pyetje Gjykatës Kushtetuese.

Ai ka kërkuar aprovimin e ministrave për këtë çështje, por u kundërshtua nga zëvendëskryeministri dhe ministrat e PDK-së të cilët insistonin që të ketë një takim mes liderëve politik të koalicionit në mënyrë që të marrin një vendim.

Ramush Haradinaj: Të vendosim bashkarisht për t’iu drejtuar Gjykatës Kushtetuese, a dëshironi me shqyrto këtë bazën që ka dhënë zyra ligjore.

Enver Hoxhaj- Zv/Kryeministër në largim: Një koordinim politik do të ishte më lehtë edhe për ne të marrim një vendim për Gjykatë Kushtetuese.

Haradinaj nuk ka dashur të gjykojë zvarritjen një takimi konsultues të  presidentit me partitë politike.

Ramush Haradinaj: Mendoj që Presidenti e ka situatën shumë të thjeshtë para vetes. Nuk i kërkon shumë punë, kur i mbledh partitë politike dhe u jep opsionet.

Ramush Haradinaj ka dhënë dorëheqje të parevokueshme nga posti i kryeministrit javën e kaluar për shkak të ftesës që i kishte ardhur nga Gjykata Speciale për tu marrë në pyetje në cilësinë e të dyshuarit./ABC News Albania 24/7

maxresdefault-3-1-1280x720.jpg
nev ila20:00 | 25/07/2019

Sekretari i Përgjithshëm i OSBE, z. Thomas Greminger, i është përgjigjur një kërkese të Aleancës për një takim gjatë vizitës në Tiranë.

Z. Greminger ka sqaruar se agjenda e tij e ngjeshur nuk i lejonte një takim tjetër. Gjithsesi, z. Greminger shprehet se qeveria duhet të ndalë të gjitha hapat e saj për aq kohë sa Shqipëria nuk ka një Gjykatë Kushtetuese funksionale kur kjo çështje mund të gjykohet.

“Ne e mirëpresim këtë qëndrim të z. Greminger dhë jemi tërësisht dakord me të. Krijimi i një sistemit funksional të drejtësisë, së bashku me dy gjykatat e larta në vend, atë Kushtetuese dhe të Lartë, është hapi i parë i domosdoshëm për gjykimin e çështjeve publike. Ashtu siç kemi thënë prej kohësh, pa një shqyrtim normal në Gjykatën Kushtetuese çdo veprim ndaj godinës është i jashtëligjshëm dhe kriminal.

Falënderojmë z. Greminger për komunikimin e tij dhe gjykojmë se institucionet lokale duhet ta dëgjojnë qartë mesazhin e tij pa ekuivokë”, shkruan Aleanca për Mbrojtjen e Teatrit me ane te nje statusi ne rrjetet sociale./abcnews.al

 

 

META-TREGON-RAMAFORMEN.mpg_snapshot_00.39-1280x720.jpg
ent ela17:00 | 16/07/2019

Nëpërmjet një postimi të gjatë në rrjetet sociale, kreu i shtetit Ilir Meta ka treguar arsyet se pse vendi ynë gjendet sot pa Gjykatë Kushtetuese. Autori i vetëm, i kësaj situate të qëllimtë, thekson Meta nëpërmjet argumenteve të tij, është kryeministri Edi Rama. Presidenti Ilir Meta ka marrë përsipër të tregojë me hollësi shkaqet që kanë lënë sipas tij vendin pa Gjykatë Kushtetuese.

Ndryshimet kushtetuese të Reformës në Drejtësi u miratuan në 21-22 Korrik 2016, me 140 vota unanime të Kuvendit të Shqipërisë. Më pas Kuvendi ka zgjedhur me short vit pas viti 3 (tre) Këshilla të Emërimeve në Drejtësi, për të funksionuar përgjatë viteve 2017, 2018, 2019.

“Fakt është që dy Këshillat e zgjedhur për të punuar përgjatë viteve 2017 dhe 2018, nuk kanë funksionuar, pasi janë bllokuar qëllimisht.

Lind pyetja përse nuk kanë funksionuar dy Këshillat (KED), përgjatë viteve 2017-2018 ?

Kush e bllokoi funksionimin e KED?

Kujt i interesonte që KED të mos funksionojë dhe rrjedhimisht të mos plotësohej edhe numri i nevojshëm i anëtarëve të Gjykatës Kushtetuese?”.

Kuvendi në datë 27 janar 2017, nën kujdesin e Kryetarit të Kuvendit Ilir Meta, organizoi shortin dhe përzgjodhi Këshillin e Emërimeve në Drejtësi.

Ky ishte momenti i parë kyç sipas presidentit Meta  për ngritjen e institucioneve të reja, pas ndryshimeve kushtetuese. Në sqarimin e tij kreu i shtetit shkrua se është fakt që ky Këshill, nuk u mblodh asnjëherë dhe mandati i tij përfundoi më datë 31.12.2017, pa kryer asnjë mbledhje të vetme.

“Nëse dikush nuk e di pse-në e kësaj gjendje, po e sqarojmë.

Kryeministri Rama 4 (katër) ditë pas hedhjes së shortit doli hapur dhe publikisht për t’u shprehur se nuk i pëlqenin emrat e anëtarëve të KED-së”.

Në 3 nëntor 2017, si President i Republikës i kërkoi  takim Ambasadores së BE-së, znj.Romana Vlahutin për të disktuar mbi funksionimin e Këshillit të Përkohshëm të Emërimeve në Drejtësi,procesin e zgjedhjes së Këshillit të ri të Emërimeve në Drejtësi, që do të funksionojë përgjatë vitit 2018; dhe nisjen e proçedurave me qëllim plotësimin e vendeve vakante në Gjykatën Kushtetuese;

Pas realizimit të këtij takimi Presidenti i Republikës mori të gjitha garancitë prej Zj.Vlahutin dhe misionit EURALIUS 4, se ky mision do të asistonte në zhvillimin e një tryeze konsultative në datat 9 – 10 nëntor 2017 me prezencën e gjithë aktorëve të interesuar.

“Në punë e sipër për realizimin e kësaj tryeze, në datë 8 nëntor 2017, në mënyrë të papritur EURALIUS njofton në rrugë telefonike për mospjesëmarrjen e drejtueses znj.Agnes Bernhard dhe ekspertëve të EURALIUS në këtë tryezë, pa dhënë asnjë arsye bindëse.

Pra ekspertiza e BE-së (EURALIUS) dhe Delegacioni i BE-së, e “braktisën” këtë iniciativë të Kreut të Shtetit”.

Presidenti i gjendur në këto kushte, iu drejtua mënjeherë Kuvendit të Shqipërisë, duke i kërkuar realizimin e procesit të hedhjes së shortit për përzgjedhjen e anëtarëve të Këshillit të Emërimeve në Drejtësi që u bë në datë 7 dhjetor 2017 por sërish u shfaqën të njëjtat problematika me listat sipas kreut të shtetit.

“Edhe emrat, që dolën nga ky short, sërish nuk i pëlqyen Ramaformës”.

Presidenti i Republikës, në shkurt 2018 i kërkoi përsëri zyrtarisht KED-së që të mblidhej dhe të shqyrtonte me precedencë të gjitha kandidaturat e paraqitura për plotësimin e të gjitha vakancave të shfaqura në Gjykatën Kushtetuese.

“A u mblodh Këshilli, do të pyesni ju?

Këshilli u mblodh vetëm një herë në 19 mars 2018, ku zhvilloi mbledhjen e tij të parë dhe të vetme, pasi KED nuk është mbledhur më asnjëherë.

A e dini pse?”

Përgjigjen presidenti e gjen tek  Kryetari i Komisionit të Ligjeve Ulsi Manja I cili  në datë 5 Mars 2018 doli në media dhe i bënte thirrje publike anëtarëve të KED-së se duhet të kalojnë vetting-un, përpara se të fillojnë nga puna për të bërë filtrin e kandidatëve për Gjykatën Kushtetuese.

“Ulsiu në datë 19 mars 2018, shkoi dhe u paraqit në mbledhjen e parë dhe të vetme të KED-së dhe i shantazhoi drejtpërdrejtë anëtarët e këtij organi pa ju dridhur qerpiku.

Ai  debatoi me ta dhe i përsëriti të njëjtin kërcënim se KED mund të mblidhet për veprimtari administrative, por jo për vlerësimin dhe renditjen e kandidatëve për anëtar të Gjykatës Kushtetuese.

Ai e dinte fare mirë se ajo që po bënte ishte një krim kushtetues”.

Sipas presidentit Ulsi Manja e shantazhoi KED dhe ia arriti sepse ky organ pas datës 19 mars 2018, nuk u mblodh më asnjëherë.

“Kështu u bllokua edhe me 1 (një) vit tjetër Këshilli i Emërimeve në Drejtësi.

Kjo është mënyra se si Ramaforma shantazhoi Këshillin e Emërimeve në Drejtësi për 2 vite me radhë, 2017 dhe 2018, dhe bllokoi emërimin e gjyqtarëve të rinj të Gjykatës Kushtetuese”.

Sipas kryetarit të shtetit kryeministri Rama nuk e donte Gjykatën Kushtetuese funksionale, sepse vetëm kështu nuk kishte se kush t’i kontrollonte vendimmarrjet antikushtetuese që ai realizoi. E pa gjykatë kushtetuese aksush nuk kishte ku të ankohej.

Një tjetër guinness i ri shqiptar, 16 muaj (Prill 2018 – Korrik 2019) Republika e Shqipërisë një shtet demokratik i së drejtës është pa Gjykatë Kushtetuese funksionale!!!!!”

Në mbyllje Presidenti kujton se ndërkohë që kanë kaluar 3 vjet nga miratimi i reformës në drejtësi, jo vetëm nuk kemi Gjykatë Kushtetuese, por as Gjykatë të Lartë funksionale dhe as Inspektor të Lartë të Drejtësisë. /ABC News Albania 24/7

gjyakata-e-larte.jpg
G. P.15:27 | 05/07/2019

Javën e ardhshme hapet gara për anëtarët jo gjyqtarë të Gjykatës së Lartë. Këshilli i Lartë Gjyqësor miratoi projekt-aktet dhe kriteret që duhet të plotësoj çdo kandidat. Kjo lëvizje e KLGJ-së erdhi pas kritikave të presidentit të Republikës Ilir Meta.

Pak ditë pas letrës së Presidentit të Republikës, ku i drejtoi gishtin Këshillit të Lartë Gjyqësor se është 6 muaj e 20 ditë me vonesë për t’i dërguar listën e emrave për kandidatë për anëtarë të Gjykatës së Lartë, KLGJ-ja hodhi një gjysmë hapi duke miratuar projekt rregulloren që do ti hap rrugën garës për anëtarët jo gjyqtarë. Gjykata e Lartë ka në përbërje të saj 19 anëtarë, ku 4 prej të cilëve do të jenë nga jashtë sistemit të gjyqësorit.

Këshilli i Lartë Gjyqësorë ka përcaktuar se juristët e spikatur do të vlerësohen për tre kritere, aftësitë profesionale, morale dhe menaxheriale.  Në rendin e ditës të KLGJ-së nuk ishte i përfshirë dhe nuk është caktuar akoma se kur do të hartohet projekt-akti për kriteret që duhet të ketë një gjyqtarë që të jetë anëtar i Gjykatës së Lartë. Anëtarët gjyqtarë duhet që më përpara të kenë kaluar të gjitha hallkat e Vetingut, pra KPK dhe KPA. Vetëm procesi i kalimit të Vetingut kërkon minimalisht 4 muaj kohë.

Praktikisht Gjykata e Lartë do të jetë jashtë funksionit edhe për disa muaj.  Presidenti Meta duhet që të presë mbase edhe disa muaj që në tavolinën e tij të ketë listën e plotë me emrat e kandidatëve për Gjykatën Supreme. Zyrtarisht gara për anëtarët jo gjyqtarë pritet të hapet javën që vjen, por akoma nga këshilli nuk është caktuar koha që do të kenë në dispozicion anëtarët për të kandiduar.

Për secilin prej kandidatëve do të kërkohet informacion në institucionet e tjera siç janë Drejtoria e Sigurimit të Informacionit të Klasifikuar, Inspektoriati i Lartë i Deklarimit dhe Kontrollit të Pasurive dhe Konfliktit të Interesit, Shërbimi Informativ Shtetëror etj. Në mbledhjen e Këshillit nuk u diskutua as rekomandimi i EURALIUS, për komandim të përkohshëm të gjyqtarëve nga nivelet me të ulëta në Gjykatën e Lartë,  i cili ka hasur kundërshtime si nga presidenti, ashtu edhe nga anëtarët gjyqtarë të KLGJ-së.

Qeveria e re gjyqësore ka ndjekur rregullat e KLD-së duke i mbyllur dyert mediave pavarësisht interesit të madh që ka publiku, i rritur ndjeshëm pas kritikës që bëri Presidenti i Republikës. Gjykata e Lartë është aktualisht me dy anëtarë Xhezair Zaganjorin që po zhvillon betejen e tij në Kolegjin e Posaçëm të Apelimit dhe Ardian Dvoranin./ABC News Albania 24/7

sali-berisha-1.jpg
G. P.12:00 | 04/07/2019

Antikushtetuese janë zgjedhjet e 30 Qershorit edhe për misionin e vëzhguesve të OSBE/ODIHR deklaroi ish-kryeministri Sali Berisha në një komunikim me gazetarët jashtë selisë së Partisë Demokratike. Ish-kreu i qeverisë ftoi shqiptarët të vazhdojnë kryengritjet deri në rikthimin e pluralizmit.

Varrosjen nuk ia bëri vetëm bojkoti i shumicës së shqiptarëve, por edhe vetë mendjendriturit e OSBE/ODIHR-it u shpreh ish kryeministri Sali Berisha. Deklarata të zgjuara dhe ironike i cilësoi Sali Berisha ato të të njohurës së tij prej vitesh, megjithatë edhe mund ta kishin refuzuar vëzhgimin e këtyre zgjedhje nënvizoi ai siç bëri Kongresi i Autoriteteve Lokale dhe Rajonale të Këshillit të Evropës.

“Ndonëse ODIHR për mendimin tim duhet të braktiste vëzhgimin zgjedhjeve moniste. ODIHR nuk mund të vëzhgojë zgjedhje që janë në shkelje flagrante të Konventës Europiane të të Drejtave të Njeriut. Këto janë historia komplekse. Nuk e kanë marrë vetë vendimin ata. Vendimi është më kompleks, nuk mund t’i fajësoj për këtë qëllim”, tha Berisha.

Pretendimi i mazhorancës për ta gjykuar më vonë legjitimitetin e e këtyre zgjedhjeve e bën të buzëqeshë ish-kryeministrin demokrat. Këshillon të mos i shohin shqiptarët aq naivë.

“Absolutisht kurrë sapunin për djathë nuk e hanë. Ta harrojnë kur s’e kanë ngrënë atëherë kur s’kanë patur as 10 vetë me shkrim e këndim, por vetëm eksperiencën e natyrës. Ata që iu thonë shqiptarëve të gjykojë Gjykata Kushtetuese pasi është varros i dënuari ata bëjnë një propozim qesharak”.

Sikundër i kërkon mazhorancës të mos bëhen qesharakë me deklaratat se drejtësia do të hetojë krimin elektoral në dosjet e fjetura të prokurorisë për rasten në Durrës e Dibër. Ajo pseudoreformë e Soros do t’i jepte Edi Ramës të gjitha pushtetet që e shndërroi drejtësinë në narkodrejtësi.

Tërheqja e opozitës ditën e zgjedhjeve për të fokusuar vetëm tek thirrjet është vendimi i duhur sipas Sali Berishës.

“ Opozita bëri një tërheqje, kjo është e vërtetë, por bëri shumë mirë sepse opozita bëri përpjekjet më të jashtëzakonshme për të demaskuar farsën elektorale, thirrjes së qytetarëve për të bojkotuar iu përgjigj pasivisht, më tutje aty nuk mund të shtynte. Liria ime përfundon aty ku përfundon liria e tjetrit.”

Të vetmen përgjigje që refuzon ta japë është gara për një president të ri. Era e ndryshimit po afron prandaj dhe koha e protestave nuk ka mbaruar sipas ish kryetarit të qeverisë. Kryengritja është zgjidhja e vetme që artikulon ai.

“Kryengritje popullore me 51 format e mosbindjes civile”./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono