Gjykata e Larte

klgj-1280x714.jpg
G. P.13:17 | 11/09/2019

Këshilli i Lartë Gjyqësor ka miratuar 8 kandidatë për gjyqtarë, që garojnë për tre vende në Gjykatën e Lartë. 14 kandidatë të tjerë u skualifikuan për mosplotësim të kritereve për atë detyrë.

Këshilli i Lartë Gjyqësor vendosi skualifikimin nga gara për 14 nga 22 kandidatët për Gjykatën e Lartë. Kandidatët garonin për 3 vendet vakante në Gjykatën supreme dhe ishin nga radhët e anëtarëve jo gjyqtarë. Relatorët miratuan 8 kandidatë dhe përjashtuan 14 të tjerë për mosplotësim të kriterëve të kandidimit.  8 kandidatët e kualifikuar janë Jetmira Rragami, Ervin Pupe, Theodhori Sollaku, Kestrin Katro, Sokol Sadushaj, Ilir Panda, Rezarta Melo, dhe Ardita Buna Alsula. Ata tashmë do i nënshkrohen fazës së dytë të verifimimit, mbi pasurinë, aftësitë profesionale dhe do intervistohen nga KLGJ.

Me shumicë votash u miratua skualifikimi i 10 kandidatëve të nga vijimi i garës, ndërsa 4 të tjerë kishin dhënë dorëheqjen. Skualifikimi për kandidatët u bë kryesisht për mospërmbushje të kritereve, që janë mos pasja e një grade shkencorë në fushën e drejtësisë, mos plotësimi i 15 viteve karrierë në drejtësi dhe mbajtja e posteve politike brënda 10 viteve të fundit.

Sidoqoftë sipas ligjit kandidatët e skualifikuar mund ta ankimojnë këtë vendim në Gjykatën Administrative. Nëse Gjykata vendos në favor të kandidatit të përjashtuar, KLGJ do duhet t’i rikthejë në garë, për të vijuar me fazën e dytë të verifikimeve.

Aktualisht Gjykata e Lartë është jashtë funksionit pasi ka mbetur vetëm me një anetar, gjyqtarin Ardian Dvorani. Numri i dosjeve në pritje për shqyrtim ka shkuar në rreth 33 mijë. Plotësimi me tre anëtarë i Gjykatës së Lartë, do t’i hapë rrugën, shqyrtimit të masave të sigurisë. Pas kësaj faze, KLGJ duhet të hartojë projektrregulloren me kriteret për të plotësuar Gjykatën e Lartë me 15 gjyqtarë nga 19 anëtarë që kjo gjykatë ka në total. /ABC News Albania 24/7

gjykata-1280x714.jpg
Sej rie17:15 | 02/08/2019

Zgjidhet çështja e ekstradimeve në Gjykatën e Lartë. Treshaj e formuar me dy gjyqtarë të komanduar, ka vendosur që  pro ekstradimit të Valentina Dushkut, Besnik Lekës, Robens Berberit dhe Hajri Seferit. Tashme do të jetë Ministra e Drejtësisë që do të marrë vendimin përfundimtarë.

Gjykata e Lartë i ka dhënë zgjidhje çështjeve të ekstradimeve të cilave ‘iu mbaronte afati brenda muajit Gusht. Ardian Dvorani së bashku me dy gjyqtarët e komanduar nga Këshilli i Lartë Gjyqësor Sokol Binaj dhe Albana Boksi kanë vendosur  në dhomë këshillimi që të rrëzojnë  rekursin e të pandehurve.

Treshja e formuar vetëm për të shqyrtuar këto çështje ka vendosur që ti hapë rrugën ekstradimit të Valentina Dushkut, Besnik Lekës, Robens Berberit dhe Hajri Seferit. Ky i fundit është në hetim nga Prokuroria e Krimeve të Rënda pasi është arrestuar në kuadër të operacionit  “Volvo 4”. Tashmë topi ka mbetur në dorën e ministres së Drejtësisë Etilda Gjonaj nëse kjo e fundit do të vendosë pro ekstradimit të 4 shtetasve të kërkuar nga autoritetet e huaja.

Por më e nxehtë është çështja e Hari Seferit, pasi konsiderohet si ndërmjetësi i grupeve kriminale me bandën e “Avdylajve”, të Shijakut. Përveçse në dosjen “vol-vo 4”, ai është edhe pjesë e “dosjes 339”.

Do të jetë ministrja ajo që do të vendosë nëse do ta dorëzojë personin e kërkuar nga italianët që në vitin 2016, apo do ta pezullojë ekstradimin deri sa të përfundojë hetimi nga Prokuroria për Krime të Rënda. Ndërsa Gjykata e Lartë ka mbetur sërish vetëm me një anëtarë në detyrë Ardian Dvoranin, në pritje të caktimit të tre anëtarëve jo-gjyqtarë./ABC News Albania 24/7

GJYKATA-E-LARTE-TRUMP_ABC-M2-T1.mpg_snapshot_00.02-1280x720.jpg
ent ela14:20 | 27/07/2019

Administrata Trump tashmë mund të përdorë fondet me një vlerë prej 2.5 miliard dollarë të Pentagonit për të ndërtuar murin në kufi me Meksikën. Vendimi u mor nga gjykata e lartë e Shteteve të Bashkuara të Amerikës.

Gjykata e lartë e Shteteve të Bashkuara të Amerikës i ka dhënë dritën jeshile administratës Tramp për të përdorur 2.5 miliardë dollarë për ndërtimin e një muri në kufi me Meksikën. Kreu i Shtëpisë së Bardhë ka reaguar menjëherë me anë të një mesazhi në Tuiter duke shkruar: “Uai! Një fitore e madhe për Murin. Gjykata e lartë ka rrëzuar një padrejtësi të madhe duke lejuar vazhdimin e ndërtimit të murit me Meksikën. Një fitore e madhe për sigurinë në kufi.”

Një fitore e rëndësishme për Trump i cili mund të përdorë fonde për Pentagonin, rreth 2.5 miliard dollarë, për ndërtimin e rreth 160.9 kilometra mur në kufi me Meksikën ndërsa beteja e hapur në gjykata të ndryshme vazhdon ende. Kundër këtij vendimi mbeten ende katër gjykatës federalë.

Gjykata e lartë rrëzoi në këtë mënyrë vendimin e gjykatës së apelit të qarkut të nëntë, që ishte rreshtuar me “Sierra Club” dhe një koalicion komunitetesh në kufi, që e cilësonin si shkelje të ligjit përfitimin e fondeve nga ana e departamentit amerikan të mbrojtjes për ndërtimin e murit. Sipas gjykatës së lartë qeveria ka paraqitur prova të mjaftueshme për faktin se nuk ka asnjë bazë për të bllokuar transferimin e fondeve.

Presidenti amerikan shpalli gjendjen e jashtëzakonshme në Kufi me Meksikën në shkurt të këtij viti, pas dy muajsh betejë me kongresin amerikan, që shkaktoi dhe “shatdaun” më të gjatë në historinë amerikane. Një situatë emergjence që sipas Trump i jepte të drejtë të mund të përdorte fonde të agjencive të tjera qeveritare për ndërtimin e murit. Një deklaratë që shkaktoi veprime ligjore dhe nga ana e dhomës së deputetëve. Një përpjekje e dështuar kjo me gjykatësin Trevor Mekfaden i cili theksoi se gjykatat mund të zgjidhin debatet mes pushtetit ekzekutiv dhe atij legjislativ, vetëm si burim i fundit. /ABC News Albania 24/7

gjykata-e-larte-1-1-1280x714.jpg
nev ila19:00 | 25/07/2019

Mbyllet gara për kandidatët jo gjyqtarë për Gjykatën e Lartë. Ndër 21 emrat e publikuar, janë: Sergjio Mazreku, Ndue Pjetra, Ergys Misha, Aldona Sula, Jordan Daci, Alma Loci, Lindita Troja, dhe Jetmira Rragami të gjithë me profesion juristë. Nga këta, do të zgjidhen 4 kandidatë.

Të interesuarit kanë pasur dy javë kohë që të shprehin interesin e tyre duke dorëzuar dokumentacionin përkatës. Duke iu referuar rregullores, faza e përzgjedhjes do të kalojë në 5 etapa, duke  filluar nga shqyrtimi dhe miratimi nga Komisioni i projektvendimit paraprak të vlerësimit dhe pikëzimit të kandidatëve./ABC News Albania 24/7

 

klgj-1280x714.jpg
nev ila20:58 | 23/07/2019

Këshilli i lartë Gjyqësor ka gjetur zgjidhjen për zhbllokimin e Gjykatës së Lartë.

Në mbledhjen e kësaj të marte, u vendos që shqyrtimi i çështjeve të bëhet nga gjyqtarë të gjykatave të Apelit, të cilët duhet të kenë jo më pak se 13 vite eksperiencë pune, e të kenë kaluar vettingun.

Kjo zgjidhje e KLGJ është një nga tre opsionet që misioni EURALIUS sugjeroi për të bërë funksionale Gjykatën e Lartë. Sipas ekspertëve evropianë, ky opsion duhej të ishte masa e fundit që duhej ndërmarrë vetëm në raste të veçanta.

Në Gjykatën e Lartë ka shkuar në 32 mijë numri i dosjeve në pritje, ndërsa ka disa çështje ekstradimi të cilave nëse u kalojnë afatet, rrezikojnë lirimin e personave që presin ekstradimin e zgjidhja e KLGJ ka patur parasysh këtë situatë delikate.

Aktualisht Gjykata e Lartë ka mbetur vetëm me 2 gjyqtarë, nga 19 që duhet të ketë. Për 3 kandidatë jo gjyqtarë ka nisur verifikimi, ndërsa për kandidatët gjyqtarë duhet të përfundojë procesi i vettingut në të dyja shkallët. Cka do thotë se bazuar në këtë proces, ngritja e Gjykatës së Lartë do kërkojë edhe disa muaj./ABC News Albania 24/7

etilda-gjonaj-1280x960.jpeg
nev ila17:15 | 11/07/2019

Plan strategjik për sistemin gjyqësor, Gjonaj: S’ka asnjë forcë për t’i penguar institucionet e reja, debatet politike një ditë do harrohen kurse reforma në drejtësi i shërben brezave.

Ministria e Drejtësisë dhe Këshilli i Lartë Gjyqësor kanë zhvilluar një takim konstruktiv ku është prezantuar projekt-plani strategjik 2019-2020 për sistemin gjyqësor i cili vjen si derivat dhe kërkesë në zbatim nga Strategjia ndërsektoriale e drejtësisë e miratuar me vendim të Këshillit të Ministrave.

Pasi është njohur nga kryetarja dhe anëtarët e grupit të punës lidhur me planin e veprimit, ministrja Etilda Gjonaj ka vënë theksin te rëndësia që ka kjo iniciativë në kuadër të ngritjes së institucioneve të reja të drejtësisë.

Teksa ka falënderuar hartuesit e planit strategjik, Gjonaj ka bërë edhe një rezyme të zbatimit të reformës në drejtësi, ku nënvizoi se “procesi i ngritjes së organeve të reja tashmë janë në fazën ku s’ka më asnjë forcë për t’i penguar në ushtrimin e përgjegjësisë së tyre kushtetuese dhe ligjore”.

Gjithashtu ajo komentoi telegrafikisht edhe sulmet politike ku tha se:

Ata që mundën veç ta vonojnë, por kurrsesi ta ndalojë, uroj ta kenë kuptuar se dëshira dhe nevoja e një populli të tërë për drejtësi është aq e madhe sa s’mund të asgjësohet nga retorika politike të cilat në fund të ditës do të harrohen, ndërsa të nesërmes do t’i ngelen veç institucionet e shëndetshme të një shteti që po vrapon drejt familjes evropiane.”

Ndër të tjera Gjonaj shprehet:

“Me ftesë nga Këshilli i Lartë Gjyqësor, ndoqa me interes prezantimin e projekt-planit strategjik 2019-2020, për plotësimin dhe forcimin e sistemit gjyqësor në përputhje me Strategjinë Ndërsektoriale të Drejtësisë. Jam besimplotë se procesi i reformimit do ta kalojë periudhën transitore për të vijuar me funksionimin efektiv të sistemit të drejtësisë. Plotësimi i vendeve vakante dhe funksionimi i Gjykatës së lartë si pjesë edhe e planit strategjik të KLGJ-së do të jetë një ndër prioritetet Këshillit të Lartë Gjyqësor. Shqiptarët tashmë janë dëshmitarë të historisë, se si mundëm të hedhim themelet dhe nisëm të rindërtojmë këtë pallat drejtësi që po ngjall shpresën për të ndryshuar, ashtu siç na ka shtuar forcën për të punuar. Ata që mundën veç ta vonojnë, por kurrsesi ta ndalojë, uroj ta kenë kuptuar se dëshira dhe nevoja e një populli të tërë për drejtësi është aq e madhe sa s’mund të asgjësohet nga retorika politike të cilat në fund të ditës do të harrohen, ndërsa të nesërmes do t’i ngelen veç institucionet e shëndetshme të një shteti që po vrapon drejt familjes evropiane”, shprehet Gjonaj.

Strategjia Ndërsektoriale e Drejtësisë dhe Plani Strategjik i KLGJ-së, janë të ndërlidhura me përparësitë e politikave kombëtare, ku ndër të tjera synohet:

  • Përshpejtimi i Reformës së Pushtetit Gjyqësor dhe Akordimit të Burimeve. (Bërja funksionale e Gjykatës së Lartë si prioritet emergjent, duke marrë masat e nevojshme për plotësimin e vendeve vakante në një kohe sa më të shpejtë)
  • Përcaktimi dhe Zbatimi i Standardeve për Ekselencë gjyqësore. ( Rritja e transparencës në emërimet dhe promovimet e gjyqtarëve dhe administratës gjyqësore, përmes sigurimit të standardeve të meritokracisë)
  • Ofrimi Efikas i Shërbimeve dhe funksionimi më i mirë i gjykatave. (Rritja e efikasitetit, saktësisë se te dhënave dhe efektivitetit ne menaxhimin e ceshtjeve gjyqesore nepermjet zhvillimit te nje sistemi elektronik te unifikuar per menaxhimin e ceshtjeve sipas standardeve ndërkombetare.)
  • Zhvillimi i Kapaciteteve të Brendshme të KLGJ-së.( Hartimi i akteve nënligjore për zbatimin e reformës gjyqësore, ushtrimin e përgjegjësive nga ana e KLGJ-së me qellim sigurimin e pavarësisë gjyqësore)
  • Hartimi i Strategjive të Efektshme për Komunikimin e Jashtëm. ( Ofrimi dhe zbatimi i mënyrave novatore dhe të përshtatshme për palët e interesit, në veçanti përmes sistemeve online, për rritjen e bashkëpunimit të publikut me KLGJ-në, personelin administrativ dhe gjykatat).

Në vitin  2016, Shqipëria miratoi reforma kushtetuese dhe legjislative gjithëpërfshirëse, me qëllim forcimin e integritetit dhe qeverisjes së gjyqësorit në vend. Këto reforma përcaktonin edhe ngritjen e institucioneve të reja, përfshirë Këshillin e Lartë Gjyqësor (KLGJ), Këshillin e Lartë të Prokurorisë, Këshillin e Emërimeve në Drejtësi dhe Inspektoratin e Lartë të Drejtësisë./abcnews.al

gjyakata-e-larte.jpg
G. P.15:27 | 05/07/2019

Javën e ardhshme hapet gara për anëtarët jo gjyqtarë të Gjykatës së Lartë. Këshilli i Lartë Gjyqësor miratoi projekt-aktet dhe kriteret që duhet të plotësoj çdo kandidat. Kjo lëvizje e KLGJ-së erdhi pas kritikave të presidentit të Republikës Ilir Meta.

Pak ditë pas letrës së Presidentit të Republikës, ku i drejtoi gishtin Këshillit të Lartë Gjyqësor se është 6 muaj e 20 ditë me vonesë për t’i dërguar listën e emrave për kandidatë për anëtarë të Gjykatës së Lartë, KLGJ-ja hodhi një gjysmë hapi duke miratuar projekt rregulloren që do ti hap rrugën garës për anëtarët jo gjyqtarë. Gjykata e Lartë ka në përbërje të saj 19 anëtarë, ku 4 prej të cilëve do të jenë nga jashtë sistemit të gjyqësorit.

Këshilli i Lartë Gjyqësorë ka përcaktuar se juristët e spikatur do të vlerësohen për tre kritere, aftësitë profesionale, morale dhe menaxheriale.  Në rendin e ditës të KLGJ-së nuk ishte i përfshirë dhe nuk është caktuar akoma se kur do të hartohet projekt-akti për kriteret që duhet të ketë një gjyqtarë që të jetë anëtar i Gjykatës së Lartë. Anëtarët gjyqtarë duhet që më përpara të kenë kaluar të gjitha hallkat e Vetingut, pra KPK dhe KPA. Vetëm procesi i kalimit të Vetingut kërkon minimalisht 4 muaj kohë.

Praktikisht Gjykata e Lartë do të jetë jashtë funksionit edhe për disa muaj.  Presidenti Meta duhet që të presë mbase edhe disa muaj që në tavolinën e tij të ketë listën e plotë me emrat e kandidatëve për Gjykatën Supreme. Zyrtarisht gara për anëtarët jo gjyqtarë pritet të hapet javën që vjen, por akoma nga këshilli nuk është caktuar koha që do të kenë në dispozicion anëtarët për të kandiduar.

Për secilin prej kandidatëve do të kërkohet informacion në institucionet e tjera siç janë Drejtoria e Sigurimit të Informacionit të Klasifikuar, Inspektoriati i Lartë i Deklarimit dhe Kontrollit të Pasurive dhe Konfliktit të Interesit, Shërbimi Informativ Shtetëror etj. Në mbledhjen e Këshillit nuk u diskutua as rekomandimi i EURALIUS, për komandim të përkohshëm të gjyqtarëve nga nivelet me të ulëta në Gjykatën e Lartë,  i cili ka hasur kundërshtime si nga presidenti, ashtu edhe nga anëtarët gjyqtarë të KLGJ-së.

Qeveria e re gjyqësore ka ndjekur rregullat e KLD-së duke i mbyllur dyert mediave pavarësisht interesit të madh që ka publiku, i rritur ndjeshëm pas kritikës që bëri Presidenti i Republikës. Gjykata e Lartë është aktualisht me dy anëtarë Xhezair Zaganjorin që po zhvillon betejen e tij në Kolegjin e Posaçëm të Apelimit dhe Ardian Dvoranin./ABC News Albania 24/7

zgajedjet-fatmir-mediu.jpg
G. P.19:25 | 24/06/2019

Ka reaguar edhe kreu i Partisë Republikane që në një deklaratë për mediat, u ka bërë thirrje socialistëve e ndërkombëtarëve, që të ndalojnë zgjedhjet me 30 Qershor. Fatmir Mediu tha se Rama po keqpërdor Kolegjin Zgjedhor, e po e çon vendin drejt konfliktit civil.

“I bëj thirrje të gjithë socialistëve që besojnë tek liria dhe demokracia, zgjedhjet e lira dhe të ndershme, tek qeverisja për njerëzit dhe tek njerëzit, që duan një shtet pa krim dhe korrupsion. Të bashkohen me gjithë shqiptarët për të shmangur konfliktin civil që po përgatit qëllimisht Rama me klanet e tij nëpërmjet një procesi farsë zgjedhor të paprecedentë më 30 Qershor. Ram sot ka kapur dhe përdor politikisht institucionet zgjedhore si KQZ, me një mazhorancë politike të aprovuar në mënyrë antikushtetuese, e provuar e paligjshme dhe apolitike në çdo vendim të saj, Kolegjin Zgjedhor nëpërmjet presionit të gjyqtarëve dhe Vettingun politik.

Rama ka vjedhur zgjedhjet në çdo rast me bandat të cilat kanë komanduar strukturat elektorale të PS, ka shkatërruar dhe po shkatërron pushtetin gjyqësor. Jemi i vetmi vend në botë pa Gjykatë Kushtetuese dhe pa Gjykatë të Lartë, e ka kthyer çdo gjë në funksion të tij, krimit dhe korrupsionit. Procesi farsë dhe i dhunshëm që po organizon në datën 30 Qershor është instalimi përfundimtar i grushtit të shtetit dhe diktaturës së krimit dhe korrupsionit në Shqipëri. Më 30 Qershor nuk duhet dhe nuk do të ketë zgjedhje të ligjshme. Në emër të PR i bëj thirrje gjithashtu faktorit ndërkombëtar, atyre që kanë mbështetur pluralizmin, kushtetutshmërinë, luftën kundër krimit dhe korrupsionit, që mbështetën Shqipërinë në NATO dhe në rrugën tonë evropiane të ndalojnë këtë krim elektoral dhe antikombëtar të Ramës, i cili do të ketë pasoja jo vetëm në Shqipëri, por në të gjithë rajonin”, tha Mediu./ABC News Albania 24/7

KRONIKE-GJYKATA-E-LARTE_ABC-M1-T1.mpg_snapshot_00.11-1280x720.jpg
ent ela15:15 | 01/06/2019

Mosfunksionimi i Gjykatës së Lartë ka rritur numrin e dosjeve që presin në radhë për t’u gjykuar. Deri më tani numri ka vajtur në 33 mijë. Ndërkohë nga ana tjetër Këshilli i Lartë Gjyqësor ka hartuar rregulloren për të gjithë kandidatët që duan të jenë pjesë e gjykatës supreme.

Numri i dosjeve të regjistruara në Gykatën e Lartë vazhdon të shtohet nga dita në ditë. Ndërsa Gjykatës supreme të vendit i është vënë kyçi pasi ka mbetur vetëm me dy gjyqtarë, kryetarin Xhezair Zaganjori, si dhe anëtarin Ardian Dvorani.Vetëm pak kohë pas shkarkimt të gjyqtarit Edmond Islamaj nga Kolegji i Posaçëm i Apelimit, numri i dosjeve që presin rradhën për tu gjykuar ka vajtur në 33 mijë. Rreth 17.000 prej të cilave janë civile, 11.000 dosje administrative dhe 5.000  të tjera janë penale.

Ky nuk është një numër përfundimtarë pasi vazhdon që të rritet çdo ditë deri sa institucionet përgjegjëse të gjejnë një zgjidhje. Plotësimi i trupës me të paktën 9 gjyqtarë është në dorën e Këshillit të Lartë Gjyqësor, institucion ky i cili duhet të çelë garën.  Por burime pranë KLGJ shprehen se edhe për të paktën 3 muaj, vendi do të jetë pa Gjykatë të Lartë, e dyta kjo më e rëndësishmja pas Gjykatës Kushtetuese. I njëjti burim ka saktësuar se rregullorja parashikon që çdo kandidatë që do të garojë për të qenë gjyqatrë në Gjykatën Supreme duhe që më para të ketë kalura të gjitha instancat e vetingut, KPK dhe KPA.

Gjykata e Lartë ka pasur 17 anëtarë gjithsej. Që nga viti 2016, ky numër u pakësua pasi disa u dorëhoqën nga sistemi, ndëra një pjese tjetër u mbaroi afati. Gjyqtarja Majlinda Andrea u dënua për korrupsion. 5 anëtarë të tjerë: Edmond Islamaj, Tom Ndrecaj, Admir Thanza, Artan Zeneli dhe Shkëlzen Selimi u shkarkuan nga Vetingu me vendim të formës së prerë. Gjyqtari Artan Broci e ka ankimuar në KPA vendimin e shkarkimit nga KPK.  Ndërkohë, në Kolegjin e Posaçëm të Apelimit do të dalë edhe kryetari i Gjykatës së Lartë Xhezair Zaganjori. Ai u konfirmua në shkallën e parë, por Komisioneri Publik ankimoi vendimin duke kërkuar shkarkimin. /ABC news Albania 24/7

ulsi-manjaaa.jpg
G. P.20:54 | 31/05/2019

Deputeti i Partisë Socialiste, Ulsi Manja, ka treguar në emisionin “Provokacija” momentin se kur mund të jetë gati Gjykata Kushtetuese dhe Gjykata e Lartë. Sipas kryetarit të komisionit të ligjeve Gjykata Kushtetuese do të jetë funksionale brenda muajit Korrik.

Gjithashtu ai theksoi se në të njëjtin stad procesi është edhe Inspektori i Lartë i Drejtësisë. Për Gjykatën e Lartë, Manja theksoi se do të jetë gati brenda verës.

“E thotë ligji se kush i nënshtrohet me përparësi Vettingut. Për mua nuk është bërë gabim. Fakti që nuk e kemi funksionale sot Gjykatën Kushtetuese dhe nuk kemi funksionale dhe Gjykatën e Lartë e ka hapur një lloj debati, por për mua Vettingu, natyrisht që nga Gjykata Kushtetuese do duhet të fillonte reforma në drejtësi. Kur e nisëm reformën në drejtësi një nga arsyet që e nisëm ishte se Gjykata e Lartë nuk e ka ushtruar si duhet rolin udhëheqës në sistemin gjyqësor.

Unë shpresoj dhe besoj se brenda Korrikut Gjykata Kushtetuese do të jetë funksionale. Në fazën ku është procesi i përzgjedhjes së anëtarëve të gjykatës kushtetuese nga KED, unë them që jo brenda Korrikut po e po, por unë shpresoj që brenda 20 Korrikut ta kemi funksionale Gjykatën Kushtetuese. Ndërsa Inspektori i Lartë i Drejtësisë që është hallka kryesore e reformës sepse është inspektori që do kontrollojë sistemin dhe lidhet me llogaridhënien e sistemit, do të ngrihet paralelisht me Gjykatën Kushtetuese. Janë në të njëjtën shkallë, në të njëjtin stad procesi. Brenda këtij sesioni parlamenti do të votojë anëtarët e Gjykatës Kushtetuese dhe Inspektorin. Ndërsa me Gjykatën e Lartë unë e di që këtë javë KLGJ do hapë garën për anëtarët e Gjykatës së Lartë që vijnë nga jashtë sistemit. Gjykata e Lartë mjafton të krijohet një trupë gjykuese prej gjashtë gjyqtarësh dhe fillon plotësohet në mënyrë dinamike. Edhe Gjykata e Lartë me këtë formulë plotësimi mund të jetë funksionale para verës”, tha Manja.

Kreu i komisionit të ligjeve nënvizoi se nga reforma në drejtësi kanë frikë të gjithë. Mirëpo mazhoranca sipas tij ka qenë promotor i saj dhe  si e tillë do ta çojë deri në fund pasi e ka kalin e saj të betejës.

“Nuk kanë frikë nga reforma vetëm ata. Frikë nga reforma kemi edhe ne. Të gjitha palët kanë frikë nga reforma. Ose le të themi në një target më të ngushtë, kush e di se çfarë ka nën kësulë sigurisht që ka frikë nga reforma. Por qasja politike ndaj reformës është e ndryshme. Ne si mazhorancë kemi qenë promotori i kësaj reformë. E kemi suportuar që në momentin e parë dhe do ta çojmë deri në fund sepse e kemi kalin tonë të betejës. Për këtë na votuan shqiptarët në 2013 dhe për këtë na dhanë një mandat të vetëm në 2017-n. Sepse drejtësia si pushtet është siguresa e sistemit kushtetues që kemi zgjedhur. Unë e njoh procesin e reformës në drejtësi në detaje dhe dua të them që ka qenë një marrëveshje e madhe politike. Kush nuk e ka kuptuar që ka qenë një marrëveshje e madhe politike mes nesh, SHBA dhe BE-së bën gabim. Çështja e frikës nuk është se ata paskan frikë nga SPAK dhe BKH dhe ne që jemi në pushtet paskemi frikë. Jo. Ne e kemi pranuar që organet e reja të drejtësisë, sistemi i ri i drejtësisë që ne kemi ndërtuar do i përfshijë të gjithë”, tha Manja.


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono