Gjermani

Steinmeier-Erdogan-696x379.jpg
G. P.23:07 | 25/09/2018

Presidenti i Turqisë, Rexhep Tajip Erdogan do të zhvillojë këtë javë një vizitë zyrtare në Gjermani. Disa politikanë kryesorë të këtij vendi, përfshirë kancelaren Angela Merkel, refuzuan ftesën për të marrë pjesë në darkën e shtruar në nder të Erdogan. Organizator i këtij eventi, i cili mbahet të premten, është presidenti gjerman Frank-Walter Steinmeier. “Prania e kancelares në bankete të organizuara nga presidenti nuk është rregull”, konfirmoi kabineti i presidentit gjerman, duke bërë të ditur se Merkel nuk do të marrë pjesë në darkë. Në njoftim thuhet se Merkel “vetëm herë pas here” merr pjesë në ceremonitë në rezidencën presidenciale. Hera e fundit ishte gjatë vizitës së Mbretëreshës Elizabeth II në Berlin, në vitin 2015./abcnews.al

MBULIM-DEPUTETJA-GJERMANE.mpg_snapshot_00.01-1280x720.jpg
G. P.20:24 | 24/09/2018

Deputetja gjermane liberale, Renata Alt kërkon nga qeveria gjermane që të bëjë më shumë presion për njohjen e Kosovës nga vendet anëtare të BE-së. Ajo bën me dije se nuk e mbështet planin për ndryshimin e kufijve. “Nuk është e këshillueshme që në Ballkan të ketë ndryshime kufijsh mbi baza të pastra etnike.

Është një lojë e rrezikshme që mund të ketë pasoja të paparashikueshme që nuk i merr dot me mend askush në këtë moment”, shprehet ajo në një intervistë për Dojçe Vele. Deputetja e Bundestagut nënvizoi se Gjermania do të mbështesë Prishtinën dhe Beogradin në transformimin e tyre në një sistem të mirëfilltë demokratik, në mbështetjen e shtetit të së drejtës dhe të të drejtave të njeriut./abcnews.al

kkk.jpg
G. P.13:06 | 23/09/2018

Emigrantët evropianë në Gjermani, kryesisht ata nga italia, kanë frikë se mund të dëbohen nëse nuk gjejnë punë për të siguruar mbijetesën. Alarmi është dhënë nga një radio në Këln, që raportoi rastin e një gruaje italiane, të cilës i është dhënë 15 kohë për të gjetur një punë, në të kundërt do të dëbohet.

Shqiptarët nuk janë të vetmit që rrezikojnë dëbimin nga Gjermania. Italianët dhe të gjithë evropianët të cilët kanë emigruar në Gjermani dhe që kanë mbetur pa punë mund të dëbohen nëse nuk mund të gjejnë punë brenda gjashtë muajve. Alarmi është dhënë nga Radio Këln, me një shërbim transmetimi në italisht, që transmetonte dëshminë tronditëse të një gruaje italiane, të cilës iu dha 15 ditë kohë për të gjetur një punë, në të kundërt do të riatdhesohej me forcë.

“Nëse do të ishte e vërtetë, qëndrimi i Gjermanisë do të ishte shumë serioz dhe do të prekte vetë thelbin e BE-së,” tha për ANSA nënsekretari italian i Punëve të Jashtme, Riçardo Merlo.

Ai thekson se “do të ishte një paradoks: Italia nën akuzë sepse përpiqet të mbrojë Evropën nga emigracioni i paligjshëm dhe Merkel që po godet një të drejtë themelore të qytetarëve të BE-së”.

Një grua italiane tha se ishte thirrur nga Zyra e Emigracionit, e cila i dha asaj një lloj ultimatumi.

“Ata më thanë se kisha pesëmbëdhjetë ditë kohë, duke parë që nuk mund të siguroja mbijetesën time, për të gjetur një punë: ndryshe do të riatdhesohesha dhe ata do të më paguanin udhëtimin për mua dhe vajzat, nëse nuk do të kisha mundësi t’i paguaja”, nënvizon shtetasja italiane.

Gruaja shtoi se ajo kishte hequr dorë nga puna për shkak të shtatëzanisë dhe pastaj ishte ndarë, duke mbetur pa mjete për të siguruar jetesën. Pas kërkesës për ndihmë sociale dhe një pritje prej tre muajsh, paralajmërimi mbërriti. Por nuk është një rast i izoluar dhe shumë prej tyre kanë pasur komunikime të ngjashme, fillimisht me fjalë dhe pastaj me letër./abcnews.al

g.jpg
G. P.08:39 | 23/09/2018

Në sondazhin e ARD-së për tendencat elektorale në Gjermani populistët e djathtë të AfD-së për herë të parë renditen para socialdemokratëve, SPD. Demokratët në Gjermani tani duhet të ruajnë arsyen, mendon Jens Thurau.

Ta themi qysh në krye të herës: populistët e djathtë të “Alternativa për Gjermaninë” (AfD) nuk ofrojnë asgjë, asgjë fare për zgjidhjen e problemeve në vend. Tema e vetme e tyre është, se refugjatët janë shkaku i të gjitha problemeve. Ata bëjnë sehir kur në demonstratat e tyre bëhen përshëndetje hitleriane, ata heshtin, kur sulmohen restorante hebreje. Tema të tjera – mungesa e banesave, çështjet sociale – atyre nuk u interesojnë.

AfD kryeson në Lindje

Por ata kryesojnë në sondazhin e fundit të ARD-së për herë të parë kundrejt socialdemokratëve (SPD), partisë prestigjoze, partisë më të vjetër gjermane. E ky është vetëm fiksimi i një çasti në një zhvillim, që ende nuk ka marrë fund. Në landet lindore të Gjermanisë AfD-ja sipas anketimeve arrin mesatarisht vendin e parë.

E megjithatë: 82 përqind e të pyeturve në sondazh nuk kanë vendosur për AfD. Po të hedhësh një sy në vendet e tjera europiane kupton, që Gjermania megjithatë rezulton mjaft mirë. Në Itali populistët janë në pushtet, Hungaria dhe Polonia qeverisen prej populistëve. Ndërsa në Uashington gjëmon Donald Trumpi.

Të gjithë votuesit e AfD esktremistë të djathtë?

18 përqind e të pyeturve pra do të votonin për AfD-në. Një parti antidemokratike, ksenofobe, plot reminishenca, pa empati për minoritetet. Një parti, e cila vë në pikëpyetje ndarjen e pushteteve. A janë këta 18 përqind të gjithë edhe të këtij mendimi?

Në fakt jo. Nëse në Chemnitz, ashtu sikurse ndodhi, mijëra qytetarë i bashkohen një marshimi në demonstratë, në krye të së cilës himnizohet Adolf Hitleri dhe bëhet thirrje për të sulmuar shtetin, atëherë kjo më keq s’ka ku të vejë. Por kjo është edhe shenjë, që njerëzit nuk gjejnë një vend tjetër, në të cilin të munden të shkarkojnë indinjatën dhe zhgënjimin e tyre. Këtu nuk bëhet fjalë vetëm për azilkërkues dhe probleme bashkëjetese, por ndër të tjera edhe për këtë. Këtu është fjala për vlerësim, respekt, ndjenjës, se nuk të marrin seriozisht, kur në një botë të pasigurtë po shtohen gjithnjë e më shumë frikërat.

Prej shumë kohësh të gjitha partitë i kanë lënë pas dore temat thelbësore si mungesa e banesave, pabarazia sociale. Nga një atmosferë e tillë gjithmonë historia ka treguar, se pavarësisht ku, përfitojnë ata që i thjeshtojnë më së shumti gjërat dhe nxisin urrejtjen. Por në Gjermaninë e pasluftës, fillimisht vetëm në Perëndim, ka qenë ndryshe. Nisur nga përvoja prej krimeve të tmerrshme të nazistëve, shumica e gjermanëve mendonin për pajtim, maturi dhe sa më pak debate polarizuese. Tani gjërat kanë ndryshuar. Anë e mbanë ndihet acarimi, në rrugë e nëpër qytete.

Demokratët duhet të reflektojnë

Politika e vjetër, e etabluar luan rolin e vet këtu: e pështjelluar në grindje të hapura, për muaj të tërë, pa impulse të vërteta për zgjidhje lidhur me politikën e azilit. Hesht gjithashtu, që prej kohësh në qeveri ka një konsensus, që në thelb duhen mbyllur kufijtë e Europës. Kushdo e kupton, se këtu kemi të bëjmë edhe me larje personale hesapesh, si p.sh. mes kancelares dhe kritikëve në radhët e saj, kryesisht në radhët e kristiansocialëve, partisë bavareze simotër e kristiandemokratëve të kancelares. Ndërsa ne mediet nuk ia dalim, që një pjesë të popullsisë, e cila voton për AfD-në pa qenë vërtetë ekstremiste e djathtë, ta vlerësojmë poizitivisht dhe ta pasqyrojmë atë vërtetë ashtu siç është me motivet e saj.

Tani është e nevojshme, që shoqëria duhet ta mësojë nga e para bashkëbisedimin. Njerëzit e arsyeshëm në të gjitha partitë e etabluara – të tillë ka – duhet t’i çojnë ato në parada e t’u japin mikrofonin për të mbrojtur demokracinë. Ndërsa mediet duhet të kujtojnë një parim të vjetër e të mirë të tyren: të raportojnë. Jo duke u bërë palë vetëm me një anë – e jo vetëm me një anë të mirë./DW

MERKEL-NAZIZMI.mpg_snapshot_00.40.jpg
G. P.08:55 | 22/09/2018

Rasti i shefit të shërbimeve sekrete që shprehte simpati për ekstremistët e djathtë vazhdon të thellojë ndasitë në koalicionin qeverisës në Gjermani. Aleatët kanë kritikuar kancelaren Merkel se kanë humbur besimin e qytetarëve dhe kanë bërë me dije se do të rishikojnë qëndrimin e tyre.

Dy parti të koalicionit qeverisës në Gjermani po rishqyrtojnë pozicionin e tyre pas skandalit që përfshiu kreun e shërbimeve sekrete, duke bërë që ekzekutivi i drejtuar nga Angela Merkel të vijojë lëkundjen. Hans Georg Masen u akuzua për mbështetje të së djathtës ekstreme pasi hodhi dyshime mbi origjinalitetin e një videoje ku ekstremistët u viheshin pas emigrantëve në qytetin lindor Çemnic. Të martën mes partnerëve të koalicionit u arrit një marrëveshje për shkarkimin e Masen nga posti, por caktimi i tij në një detyrë tjetër më të mirëpaguar ka shkaktuar pakënaqësi. Liderja e social-demokratëve Andrea Nahles ka deklaruar se reagimi negativ i qytetarëve ndaj vendimit të pak ditëve më parë tregon se koalicioni qeverisës ka gabuar.

“Kemi humbur besimin e qytetarëve në vend që ta fitonim atë. Kjo duhet të na bëjë të reflektojmë dhe të rishikojmë marrëveshjen tonë”, ka shkruar Nahles në një letër dërguar kancelares Angela Merkel dhe ministrit të Brendshëm, Horst Zehofer. Rasti i Masen, ish-shef i shërbimeve sekrete të brendshme, ka nxjerrë në pah ndasitë e thella në klasën politike dhe shoqërinë gjermane, ku çdo përkrahje për idetë e së djathtës ekstreme është kritikuar që nga fundi i epokës naziste. Frenimi i këtyre i deve ka qenë më pak i dukshëm në rajonet lindore të vendit, që kanë qenë nën ndikimin e ekstremizmit politik dhe kanë shërbyer si satelit i Bashkimit Sovietik deri në unifikimin e vendit në vitin 1990.

heiko-mas.jpg
G. P.12:33 | 19/09/2018

Ministri i Jashtëm gjerman, Heiko Maas, po zhvillon sot një vizitë zyrtare në Tiranë.

Gjatë konferencës për shtyp me homologun Bushati, zyrtari gjerman deklaroi se negociatat e anëtarësimit të Shqipërisë nuk do të hapen automatikisht Qershorin e ardhshëm, por do të vlerësohet ecuria e reformave kryesore.

Megjithatë ministri i Jashtëm gjerman garantoi mbështetjen e Berlinit zyrtar.

Qershori i 2019 nuk do të jetë automatikishti nisje e procesit të anëtarësimit. Kriteret për këtë janë të hapura dhe të qarta dhe duhet të ekzsitojnë hapa për rezultate të tjera përsa i përket reformave në mënyrë që të bindin edhe ata që janë disi spkeptikë përsa i përket kësaj çështje. I dashur Ditmir ju mund të vazhdoni të mbështeteni tek gjermani në pjesën tjetër të rrugës tuaj. Ne e dimë të gjithë se rruga në procesin e reformave mund të jetë e dhimbshme ndoshta dhe me pengesa, por jamm i bindur që në fundd për të gjithë ne do tia vlejë. Perspektiva e anëtarësimit është më afër se kurrë dhe besoj se sëbashku tia dalim”, tha Maas./abcnews.al

GJERMANI-SPIUNI.mpg_snapshot_00.01-1280x720.jpg
G. P.22:56 | 18/09/2018

Deklaratat raciste kanë bërë që shefi i shërbimeve sekrete gjermane të shkarkohet nga detyra. Por lëvizja e ministrit të Brendshëm për largimin e zyrtarit që kishte shprehur simpati për ekstremistët e djathtë konsiderohet në të njëjtën kohë shpëtimi i qeverisë së kancelares Angela Merkel.

Qeveria gjermane ka njoftuar të martën shkarkimin e shefit të shërbimeve sekrete të brendshme, pas akuzave se kishte shprehur simpati për të djathtën ekstreme. Vendimi për zëvendësimin e Hans Georg Masen i jep fund debateve që vunë në dukje përçarjet e thella në qeverinë e kancelares Angela Merkel. Masen, i cili kishte vënë në dyshim origjinalitetin e pamjeve filmike që tregonin ekstremistët e djathtë që u viheshin pas emigrantëve në qytetin lindor Çemnic, mësohet se do të caktohet në një post tjetër në Ministrinë e Brendshme. Social-demokratët e qendrës së majtë, që janë pjesëtarët e rinj të bllokut konservator të Merkel, kërkuan largimin e Masen nga detyra që ai mbante që prej vitit 2012.

Në një komunikatë të qeverisë gjermane thuhet se vendimi për largimin e Masen ishte marrë nga ministri i Brendshëm Horst Zehofer. Në njoftimin zyrtar saktësohet se në detyrën e ri, Masen nuk do të ketë lidhje me veprimtarinë e shërbimeve sekrete. Ndërkohë, mediat gjermane e kanë komentuar vendimin si një masë të qeverisë për të shpëtuar fytyrën, që nuk është gjë tjetër përveç se një promovim i Masen, që mes të tjerash është kritikuar edhe për keqmenaxhim të disa hetimeve të profilit të lartë. Aktet e dhunshme të ekstremistëve të djathtë në Gjermani, më të rëndat në disa dekada, ndodhën në fillim të muajit pas vrasjes së një shtetasi gjerman, për të cilën u fajësuan dy emigrantë. Komentet e Masen për pamjet filmike binin ndesh me ato të Merkel, që i cilësonte veprimet “një shprehje të qartë të urrejtjes” që nuk mund të tolerohej./abcnews.al

FUTBOLLISTET-SHQIPTARE-NE-EUROPE-1280x720.jpg
ent ela18:25 | 17/09/2018

Dy futbollistë të Shqipërisë dhe një i Kosovës shkëlqyen këtë fundjavë në Europë. Tomas Strakosha shpëtoi Lacion, ndërsa i riu Kolaj realizoi dy herë në Greqi.

Mundi i gjithë ekipit mund të kishte shkuar kot. Lacio vërtet fitoi 1-0 në fushën e Empolit, por sfida e Serisë A do të kishte përfunduar fare mirë në barazim, nëse në portën mike nuk do të kishte qenë Tomas Strakosha.

Ai që tashmë është titullar i kombëtares shqiptare, bëri pritjen ndoshta më të vështirë të javës, pse jo edhe të gjithë kampionatit deri tani, duke mos lejuar tundjen e rrjetës.

Një instinkt i pastër që shpëtoi trajnerin Simone Inzagi dhe i dha mundësi Lacios të vazhdojë pretendimet për në Champions.

Një tjetër lojtar kombëtareje, veçse i asaj U19 shkëlqeu në Itali.

Aristidh Kolaj realizoi dy gola në kampionatin e Shpresave, duke i dhënë një fitore të madhe Sasuolos ndaj Romës.

Miqtë nga kryeqyteti ishin në epërsi 3-0, por Kolaj ndryshoi një ndeshje që u duk se ishte e vendosur.

Ishte ai që shënoi dy golat e parë për Sasuolon që mori zemër dhe përmbysi shifrat në 5-3.

Vendimtar edhe një djalë fare i ri nga Kosova.

Lirim Kastrati, tashmë pjesë e ekipit përfaqësues të të rriturve, ishte I papërmbajtshëm në Ligën e Parë të Kroacisë.

Realizoi tri herë në suksesin 5-2 që Lokomotiva e Zagrebit e arriti në fushën e Sllaven Belupos.

Kastrati 19-vjeçar kaloi në avantazh 1-0 Lokomotivën në minutën e 23-të, pastaj shënoi për 3-0 me të nisur pjesa e dytë dhe mbylli paraqitjen e tij të madhe me golin e katërt të ekipit 7 minuta para fundit, kur vendasit ishin afruar në 2-3. /abcnews.al

MichaelRoth-1160x757.jpg
ent ela20:38 | 16/09/2018

Ministri gjerman për Evropën, Michael Roth, gjatë një vizite në Beograd ka njoftuar se Berlini dhe Bashkimi Evropian janë kundër ndryshimit të kufijve mes Kosovës dhe Serbisë. Sipas tij, problemet nuk do të zgjidhen përmes rishikimit të kufijve.

Ministri për Evropën në Ministrinë e Punëve të jashtme të Gjermanisë Michael Roth, gjatë një vizite zyrtare në Beograd, tha se “me vullnet të mirë dhe me guxim mund të arrihet zgjidhja për Kosovën”. Megjithatë ka përcjellë edhe mesazhin nga Berlini se “problemet nuk mund të zgjidhen me vizatimin e kufijve të rinj”. Zyrtari gjerman në një deklaratë për agjencinë shtetërore të lajmeve të Serbisë, Tanjug, ka sjellë në vëmendje se “shtetet e Ballkanit Perëndimor prapa vetes kanë një histori tragjike, një luftë civile me qindra mijëra të vrarë dhe me miliona njerëz të dëbuar dhe të zhvendosur. Pikërisht për këtë arsye, tha Roth, të gjithë duhet të nxjerrin mësime nga ajo histori tragjike.

Michael Roth, ministër i Gjermanisë për Evropën: “E ardhmja e Ballkanit Perëndimor janë shoqëritë që janë të hapura për të gjithë popujt, religjionet, kulturat. Për këtë angazhohet Evropa dhe BE-ja. Për këtë arsye edhe një herë mundem vetëm të paralajmëroj se problemet nuk zgjidhen me atë që do të vizatohen kufij të rinj”.

Roth u pyet edhe për mundësinë e ndryshimit të kufijve, apo shkëmbimit të territoreve mes Kosovës dhe Serbisë. “Kam një përshtypje se as në Ballkanin Perëndimor, sepse shumë shpesh e vizitoj, nuk ka simpati për një ide të tillë. Hapja e Kutisë së Pandorës mund të jetë me pasoja të rënda”, tha diplomati gjerman. Në fund ai nënvizoi se rasti i marrëveshjes për emrin mes Maqedonisë dhe Greqisë duhet të shikohet si shembull për zgjidhjen e mosmarrëveshjeve./abcnews.al

GJERMANI-SKANDALI-KISHAT-ABC-M-4-T-2-HD.mpg_snapshot_00.57-1280x725.jpg
G. P.08:49 | 13/09/2018

Një studim në Gjermani ka thelluar skandalin e Kishës Katolike. Priftërinjtë akuzohen se për 7 dekada kanë abuzuar seksualisht me mijëra fëmijë.

Më shumë se 3600 fëmijë kanë pësuar sulme seksuale nga priftërinjtë Katolikë në Gjermani për rreth 7 dekada. Kjo është raportuar nga mediat vendase, duke cituar një studim të drejtuar nga Konferenca Gjermane e Dioqezës. Raporti, të cilin do ta prezantojë zyrtarisht Kardinali Reinhard Marx me 25 shtator, i jep një tjetër goditje Kishës pas denoncimeve në të gjithë botën për abuzimin ndaj fëmijëve.

Sipas studimit, 1670 klerikë në Gjermani kanë kryer disa llojë të sulmeve seksuale kundër 3677 minorenëve mes viteve 1964 dhe 2014, raporton Spiegel Online. Shumica e viktimave ishin djem. Mbi 50% e tyre ishin 13 vjeç ose më të rinj të kohën e abuzimit, nënvizohet në studim, për të cilin janë ekzaminuar 38 mijë dokumente nga 27 dioqeza Gjermane.

Gjithashtu shkruhet se disa të dhëna janë “shkatërruar apo manipuluar”, dhe paralajmëron se shkalla e abuzimit është dhe më e madhe. Priftërinjë e përfshirë në këtë lloj skandali, sheshherë janë transferuar për në kisha të tjera dhe është fshirë e shkuara e tyre. Vetëm 566 nga 1670 të akuzuarit ishin subjekt i ndëshkimeve disiplinore nga Kisha, dhe shumica kanë marrë dënime minimale.
Ndërkohë, vitinm e kaluar u zbulua se një kor i famshëm i një shkolle katolike në Gjermani, i përbërë nga 500 djem, pësoi abuzim seksual dhe fizik. Viktimat e cilësuan shkollën si “burg, ferr dhe kamp përqëndrimi”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono