Gjermani

GJERMANI-ISIS-MBULIM.mpg_snapshot_00.16-1280x530.jpg
ent ela22:01 | 21/02/2019

Autoritetet policore në Gjermani kanë bastisur një seri banesash në landin e Renit Verior Vestfalia dhe kanë arrestuar 12 persona të dyshuar si militantë islamikë. Sipas mediave gjermane, të arrestuarit dyshohet se po përgatisnin një sulm terrorist në Gjermani dhe se më parë kishin ndihmuar persona të ndryshëm që t’i bashkoheshin Shtetit Islamik në Siri. Ata janë shtetas gjermanë me prejardhje marokene të moshave nga 22 në 33 vjeç. Mes tyre rezulton edhe një çift që kishte udhëtuar për në Siri në vitin 2016, duke marrë me vete edhe fëmijët, por gjatë udhëtimit në Turqi ishte ndalur nga autoritetet vendase dhe kthyer mbrapsht për në Gjermani. /abcnews.al

gjermani.jpg
G. P.08:20 | 21/02/2019

Në Ditën Ndërkombëtare të Gjuhës Amtare, 21 Shkurt, autori Krsto Lazarevic kërkon që Gjermania të nxisë dhe të përdorë shumëllojshmërinë e gjuhëve.

Dy shokë të mi mësuan gjatë studimeve arabisht. Falë njohurive të gjuhës, ata punojnë sot si forcë drejtuese në një sipërmarrje shumëmiliardëshe, që është aktive në 120 vende të botës. Njohuritë e gjuhës arabe i kanë kthyer ata në “Expats” të suksesshëm dhe konsulentë të kërkuar. Kur gjermanët flasin arabisht, kjo i favorizon në marrjen e vendeve të punës në sipërmarrjet ndërkombëtare.

Kur të rinjtë në Berlin- Neukölln flasin arabisht, kjo nuk i ndihmon ata të gjejnë një punë më të mirë. Në pjesën më të madhe të rasteve ata nuk shihen si “Expats”, por shihen si njerëz me sfond migracioni gjuha e nënës, e të cilëve përbën një problem.

Në muajin nëntor gazeta bulevardeske gjermane shkruante se “vetëm një në 103 fëmijë flet në shtëpi gjermanisht”. Prandaj një rektore shkolle paralajmëronte se “jemi arabizuar”. Bëhej fjalë për klasën e parë të një shkolle fillore në lagjen Neukölln të Berlinit, e cila është me shumicë popullsie migrante. Gazeta mund të kishte shkruar edhe “Lagje e favorizuar e Berlinit: Në Neukölln gati të gjithë fëmijët flasin edhe një gjuhë tjetër përveç gjuhës gjermane.” Por titulli i parë i shërben më mirë paragjykimeve të shumë lexuesve. Nuk do të ishte parë si problem nëse fëmijët në shtëpi do të flisnin suedisht, japonisht apo spanjisht. Si problem shihet kur ata flasin arabisht, turqisht, ose boshnjakisht.

Sa gjuhë mund të futen në tru?

Gjuha që flasin prindërit nuk është fajtore për perspektivat e këqija të fëmijëve. Fajin e kanë raportet në Gjermani, ku pozicioni social dhe shancet e jetës trashëgohen nga prindërit tek fëmija. Për shumë fëmijë nga familjet me probleme sociale, zotërimi i një gjuhe tjetër është privilegji i vetëm dhe përfitimi i vetëm që kanë në konkurencën me të tjerët.

Është mirë për fëmijët nëse ata rriten me dy gjuhë. Kjo nxit aftësinë e tyre për të mësuar dhe e bën më të lehtë mësimin e gjuhëve të tjera në të ardhmen. Me studimet që mbështesin këtë ide, mund të mbushet pa problem një Airbus A 380.

Megjithatë debati bëhet pjesërisht, sikur truri i njeriut ka vend vetëm për një gjuhë, e cila zë vend aty dhe sigurisht, që në Gjermani kjo duhet të jetë gjuha gjermane.

Që para propozimit të bërë nga Këshilli i integracionit në Landin e Vestfalisë, që në planet mësimore të futet pjesërisht edhe mësim në gjuhën e nënës, komentet raciste dhe të mbushura me urrejtje mbushën mediat sociale. Sikur dy orë mësimi në javë gjuhën turke do të sillte shkatërrimin e oksidentit.

Një gjuhë e “bukur” – dhe të tjerat të pista

Ndërkohë nxitja e qëllimtë e mësimit të gjuhës së nënës mund të ndihmojë shumë fëmijë me sfond migracioni, që të flasin një gjuhë tjetër dhe të përmirësojnë shancet për të ardhmen. Në këtë pikë ekziston potencial i madh. Shumë fëmijë që rriten dygjuhësh, janë në gjendje të kuptojnë gjuhën që flasin prindërit, por shpesh ata nuk e zotërojnë këtë gjuhë në të folur, sepse atyre u ka munguar mësimi. Me dhënie mësimi në gjuhën e nënës kjo gjë mund të bëhej më e lehtë. Unë jam duke e shkruajtur këtë tekst në gjermanisht. Unë mund ta shkruaja këtë artikull edhe në gjuhën e prindërve të mi. Artikulli do të ishte në gjendje të kuptohej, por nga ane e stilit nuk do të ishte shumë elegant.

Kur ne erdhëm në vitin 1992 në Gjermani nga Bosnjë Hercegovina, në kopshte dhe shkolla kishte shumë fëmijë nga ish-Jugosllavia. Gjermanishtja është gjuha e të vërtetës, të mirës dhe të bukurës. Kurse në gjuhën e prindërve të mi është ngjitur zhuli, gjaku dhe katundaria. Kështu na u përcoll ideja nga pjesa më e madhe e shoqërisë gjermane, që kur ishim të vegjël.

Ne ishim pothuajse të gjithë me sfond migracioni. Nga mësuesit tanë asnjë nuk qe me sfond migracioni. Në atë kohë mua mu përcoll ideja se gjuha e prindërve të mi nuk do të kishte vlerë në të ardhmen. As ekonomikisht, as personalisht.

Gjermania dhe shumëllojshmëria e gjuhëve

Unë e kisha harruar gjuhën e prindërve të mi dhe kur isha adoleshent mezi kuptohesha me familjen time. Mua mu desh ta mësoja gjuhën me mundim të madh. Sot unë jetoj me këtë gjuhë, sepse i nxjerr të ardhurat ngaqë e di gjuhën. Por asnjëherë nuk do të jem në gjendje ta flas atë pa akcent. Mbas daljes së Britanisë së Madhe nga BE, Polonia do të kthehet në vendin e pestë më të madh të Bashkimit Europian dhe një partner i rëndësishëm tregëtar i Gjermanisë. Megjithatë për shumë gjermanë është e çuditshme që të mësojnë polonisht. Pse? Në Frankfurt mbi Oder, në kufirin me Poloninë mund të të hyjë më shumë në punë polonishtja se sa frëngjishtja. Gjermanisë do i bëhej mirë nëse do të nxiste dhe mësonte gjuhë të tjera përveç anglishtes, frëngjishtes dhe spanjishtes./DW

steinmeier.jpg
G. P.14:40 | 19/02/2019

Gjatë qëndrimit në Gjermani, presidenti Meta është takuar me homologun e tij gjerman Frank-Walter Steinmeier.

Kreu i shtetit i ka shprehur mirënjohjen për  mbështetjen domethënëse të Gjermanisë përgjatë viteve. Nëpërmjet një stausi në Facebook, Presidenti Meta bën të ditur edhe interesimin e dy vendeve për të rritur bashkëpunimin e gjithanshëm.

Një vëmendje dhe interes i veçantë dy homologët kanë shprehur edhe për perspektivën evropiane të Shqipërisë dhe rajonit. /abcnews.al

GJERMANI-GJYQI.mpg_snapshot_00.11-1280x720.jpg
ent ela12:09 | 13/02/2019

Mediat gjermane e kanë konsideruar si ndoshta nga gjyqet më të mëdha për trafikun e kokainës në historinë e vendit, e ndërsa të akuzuarit janë shtetas shqiptarë. Këta të fundit dyshohen të kenë trafikuar rreth 2 ton kokainë gjatë periudhës 2017 – 2018.

Prokuroria e Landit në Bavari ka bërë gati aktakuzën për një nga proceset më të mëdha gjyqësore të kokainës në Gjermani. Mediat gjermane theksojnë se ky mund të jetë gjyqi më i madh i kokainës në historikun e Republikës Federale Gjermane. Prokuroria e Landshutit ka përpiluar aktakuzën kundër tetë personave. Hetuesit supozojnë se të pandehurit janë pjesë e një rrjeti kontrabandistësh që mendohet të kenë kontrabanduar në Gjermani rreth dy tonë kokainë gjatë periudhës midis shtatorit 2017 dhe prillit 2018. Ata akuzohen për tregti të palejuar me lëndë narkotike. “Süddeutsche Zeitung” shkruan se janë kapur element të nivelit të mesëm menaxhues të rrjetit ndërkombëtar të trafikut të lëndëve narkotike.

Policia zbuloi trafikun rastësisht në shtator 2017, kur në disa supermarkete të Bavarisë së Ulët ishin dërguar kuti me banane, në të cilat punëtorët e supermarketeve kishin gjetur paketa me kokainë. Hetuesit gjurmuan itinerarin e bananeve dhe konstatuan se në depot, ku ato rrinin për t’u stazhionuar kishte pasur disa vjedhje. Në këto depo ruhen banane dhe lloje të tjera frutash prej ku ato shpërndahen në Gjermani dhe Europë. Me ndihmën e një përgjimi shumë të ndërlikuar hetuesit kishin arritur kështu të zbulonin trafikantët. Në operacionet hetuese dhe zbuluese kishin marrë pjesë deri në 500 nëpunës të policisë, doganave dhe  hetuesisë.

Hetimet zbuluan se kokaina kishte hyrë në kutitë e bananeve në Ekuador dhe prej andej dërgohej në adresë të një kompanie me seli në Gjermani. Vjedhësit hynin më pas në depot ku ruheshin frutat dhe vidhnin aty kokainën, deri më 320 kg për çdo vjedhje.

Bandat e vjedhësve vinin enkas nga Shqipëria. Gjatë periudhës së survejimit të depove, Enti Bavarez i Kriminalistikës kishte regjistruar gjithsej tetë vjedhje në depo staxhionimi, e në disa filmime nga kamerate vendosura nga policia, personat ishin dhe të armatosur.

Grupi kontrollohej dhe drejtohej, me sa duket, nga Hamburgu, ku njëri prej të akuzuarve kryesorë, Dario L. (21 vjeç), kishte marrë një banesë me qira. Në këtë banesë hetuesit më vonë gjetën edhe fletëngarkesa për banane. L. supozohet të jetë marrë me logjistikën e bandës, kurse Klajdi D. (25 vjeç) merrej me organizimin e vjedhjeve. Udhëheqës i grupit mendohet të ketë qenë 40-vjeçari shqiptar, Alberto K.

Në prill 2018 policia gjermane vendosi të kryejë goditjen e parë në mbarë Gjermaninë. U  kontrolluan apartamente banimi në Ahrensburg, Hamburg dhe Hannover, ku u gjetën dy revole dhe mbi 30 mijë euro cash. Katër anëtarë të bandës  u dënuan në dhjetorin e vitit të kaluar në Hamburg, në një gjyq më vete, pasi ishin kapur si korrierë të drogës teksa transportonin 180 kg kokainë nga Hamburgu në Holandë. Ata kanë marrë dënime me nga disa vjet burg, por prokuroria e Hamburgut ka paralajmëruar se do ta dërgojë vendimin në Apel, sepse masa e dënimit konsiderohet shumë e ulët.

Persona të tjerë që kanë të bëjnë me këtë grup, të cilët gjenden në Shqipëri, në Holandë dhe në Amerikën e Jugut, nuk janë kapur ende. /abcnews.al

ruci-dhe-balla.jpg
ent ela22:25 | 05/02/2019

Kryetari i Kuvendit, Gramoz Ruçi dhe kreu i grupit parlamentar socialist, Taulant Balla kanë zhvilluar një vizitë zyrtare në Gjermani. Gjatë vizitës, Ruçi dhe Balla kanë zhvilluar takime me anëtarë të Bundestagut si dhe përfaqësues të qeverisë gjermane.

Ndër takimet më të rëndësishme ishte ai Ruçit me kreun e Bundestagut gjerman, Ëolfgang Schäuble, i cili garantoi se Gjermania do të vijojë të mbështesë Shqipërinë në rrugëtimin e saj drejt integrimit europian.

Kryeparlamentari Ruçi e vlerësoi Schaublen si një mik të madh të Shqipërisë dhe i shprehu mirënjohjen e thellë për mbështetjen e Bundestagut dhe të Kancelares, në kuadër të vendimit të Këshillit Europian për rekomandimin për çeljen e negociatave në qershor 2019.

Diplomatët gjermane vijojnë të inkurajojnë vazhdimin e proceseve integruese, ruajtjen e qëndrueshmërisë së tyre si dhe thellimin e reformave në vend.

Gjatë vizitës zyrtare në Gjermani, delegacioni shqiptar i kryesuar nga Gramoz Ruçi do të pritet në takime edhe në kabinetin e Angela Merkel nga Ministri për Europën, Michael Roth./abcnews.al

gazsjellesi.jpg
G. P.08:15 | 05/02/2019

Projekti gjermano-rus për energji po përballet me kundërshtime të shumta. Së shpejti duhet të vendoset lidhur me të ardhmen e gazsjellësit të drejtpërdrejtë nga Rusia deri në Gjermani. Ukraina e SHBA kanë rezerva.

Gati një e treta e tubacioneve për përçimin e gazit rus janë vendosur në Detin Balltik. Projekti i ndihmon Rusisë të dërgojë një sasi shumë më të madhe të gazit në Gjermani, e prej atje edhe në vendet e tjera të Bashkimit Evropian. Por rezistenca ndaj këtij projekti po shtohet. Në fillim kanë qenë kundër vetëm Ukraina dhe Polonia. “Projekti e vret Ukrainën”, tha së fundi ministri i Jashtëm polak, Jacek Czaputowicz. Polonia mendon se me këtë projekt përjashtohet Ukraina nga tranziti, që do të thotë se humbasin edhe garancitë për mbrojtjen e këtij vendi nga agresionet e tjera të Rusisë. Varshava mendon se Nord Stream 2 paraqet një dëshmi për “mungesën e luajalitetit gjerman ndaj fqinjëve lindorë dhe krijimin e raporteve të veçanta me Rusinë”, thotë Kay-Olaf Lang, nga Fondacioni për Shkencë dhe Politikë.

Në Berlin është injoruar kjo kritikë. Por prej përfshirjes së SHBA në këto kritika, çështja ka marrë përmasa të tjera. Verën e kaluar Presidenti Donald Trump deklaroi: “Gjermania do të jetë tërësisht e varur nga energjia ruse, nëse nuk e ndërron menjëherë kursin e tanishëm.” Richard Grenell, ambasadori amerikan në Berlin, ka kërcënuar madje me sanksione sipërmarrjet gjermane të përfshira në këtë projekt. Uashingtoni duket se po e humb durimin: “Koha për veprim është tani”, tha një përfaqësues i lartë i qeverisë amerikane në një deklaratë për Deutsche Wellen. “Kur të përfundojë gazpërçuesi, Evropa do të humbë hapësirën e veprimit kundrejt Rusisë.”

Por qeveria gjermane është e mendimit se këtu kemi të bëjmë me interesa biznesi: SHBA është e interesuar që në Gjermani të shesë gazin e saj, sikundër bën tani me Poloninë. Në vitin 2016, Polonia ka hapur një terminal të madh për gazin amerikan në kufi me Gjermaninë. Ministri gjerman për Ekonominë, Peter Altmaier nuk ka përjashtuar as importet nga SHBA, por vetëm si plotësim shtesë për gazin rus – nëse çmimi është në rregull. Berlini pohon se nuk do t’u nënshtrohet në asnjë mënyrë presioneve nga jashtë. Këtë e ka theksuar edhe kancelarja gjermane Angela Merkel, në Forumin Ekonomik në Davos.

Ish-kancelari Schröder lobon për Rusinë

Për Rusinë ky është një projekt strategjik, sepse ky vend jeton në masë të madhe nga eksportet e gazit. Kremlini do të përfitojë sa më shumë nga këto burime. Ndërkohë që Moska synon të evitojë mundësinë që Ukraina dhe Polonia të ndërpresin furnizimin me gaz. Presidenti rus Vladimir Putin ka angazhuar ish-kancelarin Gerhard Schröder, me qëllim ndërtimin pa pengesa të projektit North Stream 2. Nëse shtohen kritikat, Moska do të jetë e gatshme të bëjë lëshime ndaj Ukrainës, por lëshime nuk do të ketë deri në përfundimin e projektit. Më pas Rusia mund të veprojë nga pozicione më të fuqishme.

Koha po kalon

Nord Stream 2 është një çështje e rëndësishme edhe për Bashkimin Evropian. Këtu përplasen interesat e vendeve të ndryshme, ndaj Komisioni duhet të gjejë një zgjidhje për të gjithë vendet e BE. Komisioneri për Energji, Miguel Arias Canete ka deklaruar në vitin 2016 se Nord Stream nuk është një projekt me interes për të gjitha vendet e BE. Komisioni po përpiqet që të mos pengojë hapur shtrirjen e tubacioneve, por ai është i interesuar që projekti t’u përmbahet rregullave strikte të konkurrencës në BE.

Për një vendim të këtillë kërkohet miratimi i Parlamentit Evropian, Këshillit dhe shteteve anëtare. Polonia dhe vendet baltike janë kundër projektit Nord Stream 2. Ato mund të llogarisin me mbështetjen e Britanisë së Madhe, Danimarkës, Sllovakisë, Irlandës, Suedisë, Italisë, Luksemburgut dhe Kroacisë. Gjermania, Austria dhe Holanda duan në anën tjetër që Nord Stream 2 të mbetet në formën e tanishme. Firmat nga këto vende janë të përfshira në realizimin e projektit. Vendimtar do të jetë ndër tjera edhe qëndrimi i Francës, e cila ende nuk është prononcuar qartë. Nëse Parisi deklarohet kundër, atëherë projekti nuk do ta ketë shumicën e duhur. Por Franca tradicionalisht është në anën e Gjermanisë, ndërkohë që edhe koncerni francez Engie është i përfshirë në Nord Stream 2.

Presidenca rumune e BE po përpiqet të gjejë një kompromis. Por për këtë ka shumë pak kohë, sepse në maj do të mbahen zgjedhjet për PE. Më pas duhet të krijohet një Komision i ri, deri në nëntor. Ndërkohë projekti do të vazhdojë. E nëse Brexiti realizohet deri me 29 mars, atëherë kundërshtarët do të humbisnin një partner të fuqishëm.

Projekt politik?

Bllokimi i Nord Stream 2 duket i pamundur. Por kundërshtarët kanë arritur një fitore. “Varshava ka arritur që lidhur me këtë projekt ekonomik të hapë një debat i gjerë politik”, thotë Kay-Olaf Lang. Rezistenca ndaj Nord Stream 2 është rritur jo vetëm në vendet lindore por edhe në Gjermani ky projekt përdoret si një argument në debatet gjeostrategjike.

Kundërshtarët e Nord Stream 2 theksojnë në veçanti një deklaratë të kancelares Merkel nga prilli i vitit 2018. Pas një takimi me Presidentin ukrainas Petro Poroschenko në Berlin ajo tha se “gazpërçuesi nuk është vetëm projekt ekonomik por edhe politik”. Wolfgang Ischinger, shef i Konferencës së Sigurisë në Mynih, pohon se kjo deklaratë e Merkelit ka ardhur shumë vonë dhe se interesat e evropianolindorëve nuk janë trajtuar si duhet. Polonia, Ukraina dhe vendet baltike shpresojnë mbështetje më të fuqishme nga Gjermania./DW

aa123.jpg
G. P.09:01 | 01/02/2019

Ministri gjerman i Ekonomisë Peter Altmaier ka prezantuar në Berlin raportin me prognozat për zhvillimin ekonomik gjatë këtij viti. Zhvillimi do të vazhdojë, por jo siç ishte planifikuar!

Rritja ekonomike në Gjermani do të vazhdojë edhe këtë vit – të dhjetin me radhë. Kështu thuhet në prognozat e deritanishme. Ministri i Ekonomisë Peter Altmaier (CDU) nënvizoi të merkurën në Berlin se qeveria gjermane llogarit me një rritje ekonomike gjatë këtij viti prej 1 %. Në vitin 2017 është shënuar një rritje e prodhimit bruto prej 2,2 %, ndërsa vitin e kaluar rritja ka qenë 1,5%. Prognozat para disa mujave kanë qenë se rritja do të jetë rreth 1,8%, por për shkak të zhvillimeve globale, ato janë ulur.”Kjo është periudha më e gjatë e rritjes ekonomike në Gjermani, që nga viti 1966″, tha ministri, i cili nënvizoi se rritja megjithatë nuk do të jetë aq e lartë sa është parashikuar më parë. Punësimi, rrogat dhe porositë për ekonominë gjermane  – gjithandej ka sinjale pozitive, tha Altmaier. “Të gjithë parametrat tregojnë se rritja ekonomike do të vazhdojë.” Pritet që papunësia gjatë këtij viti të bjerë në nivelin rekord, prej më pak se 5%.

Rreziqet: Brexit-i dhe konflikti global tregtar

Nëse rritja ekonomike vërtet do të vazhdojë dhe në çfarë niveli, kjo varet edhe nga disa faktorë që nuk kanë lidhje vetëm me ekonominë gjermane. Rreziqet ndërlidhen në masë të madhe me Brexitin, pra daljen e Britanisë së Madhe nga Bashkimi Evropian. Aktualisht askush nuk mund të parashikojë se cilat do të jenë pasojat e përgjithshme të daljes së Britanisë së Madhe nga BE dhe nëse ky vend do të futet në recesion. Ministri Altmaier ka apeluar tek qeveria britanike që të mos pranoj një dalje pa marrëvehje – pra skenarin “No-Deal”. Ndërkohë janë shtuar edhe rreziqet e tjera globale.

Një problem tjetër shumë i madh është konflikti tregtar mes SHBA dhe Kinës. Deri tani nuk ka ndonjë shkallëzim të konfliktit dhe për këtë një pjesë e meritës i takon angazhimit diplomatik të Gjermanisë, theksoi ministri.

Kriza e shkaktuar nga prodhuesit gjermanë të automjeteve me mashtrimet për nivelin e gazrave ndotë që çlirohen në ajër mund të jetë një faktor tjetër për uljen e zhvillimit ekonomik. Por Altmaier thekson se pajisjet për pastrimin e gazrave që lirohen nga motorët në ajër, të koncerneve VW, Audi, Mercedes dhe prodhues të tjerë, influencojnë vetëm 0,2% nivelin e zhvillimit ekonomik. Një zgjidhje e shpejtë e këtij problemi do të ishte e mirë, por nga kjo nuk duhet pritur ndonjë ngritje e madhe e zhvillimit ekonomik të përgjithshëm, tha ai.

Librat e porosive për sipërmarrjet gjermane ende janë plot, tha Altmaier. Qeveria po përpiqet që të zgjidhë edhe problemin me mangësinë e fuqisë punëtore. Për këtë qëllim është miratuar edhe projektligji për migracionin, i cili këtë vit duhet të miratohet edhe nga Parlamenti.

Heqja e pengesave burokratike

Për të evituar rënien e zhvillimit ekonomik dhe për të dhënë impulse të reja, Altmaier kërkon shfrytëzimin e të gjitha mundësive që ofrohen në buxhet. Ai kërkon miratimin e një ligji për përshpejtimin e planeve zhvillimore, sepse kjo mund të mënjanojë pengesat burokratike për investime. Ndërkohë që duhen bërë ndryshimet strukturore edhe për kalimin nga prodhimi i qymyrit në burime të tjera të energjisë. Qeveria ka planifikuar zvogëlimet e tatimeve për sipërmarrjet që merren me studime dhe hulumtime shkencore në këtë drejtim. “Ne do të barazohemi në këtë drejtim me vendet e tjera evropiane”, thotë ministri. Qeveria planifikon uljen edhe të pengesave të tjera burokratike për zhvillimin ekonomik. Në përgjithësi ministri shpreson se masat e parashikuara do të shoqërohen me një mbështetje financiare prej 10 miliardë euro. “Ne duam që zhvillimi ekonomik të vazhdojë edhe shumë vite.”

BDI ankohet për shkak të ngarkesave tatimore dhe mungesës së investimeve

Përfaqësuesit e Shoqatës  Gjermane të Industrisë (BDI) mendojnë se ekonomia gjermane është nën presion. Drejtuesi Joachim Lang pohon se qeveria duhet të krijojë kushtet për më shumë investime dhe për uljen e tatimeve, sepse sipërmarrjet gjermane në Gjermani aktualisht janë të ngarkuara me tatime deri në 30 % ndërsa mesatarja evropiane është rreth 22%. Si shembull përmenden koncernet e mëdha si Apple, Amazon apo Ikea, të cilat nuk paguajnë gati aspak tatime.

Ministri Altmaier thotë se ulja e tatimeve nuk është në listën e prioriteteve të qeverisë së tanishme. Ai mendon se sipërmarrjet dhe koncernet gjermane dhe ato evropiane duhet të krijojnë mundësi për bashkëpunim dhe rritjen e zhvillimit ekonomik. Si shembull pozitiv ai përmendi koncernin Airbus, ku janë futur në përdorim edhe inteligjencës artificiale për prodhim./DW

GettyImages-982087486-640x420.jpg
ent ela08:30 | 31/01/2019

Siç raportoi “Express”, rreth 2,700 migrantë nga vendet e Ballkanit si Shqipëria, Maqedonia dhe Serbia kanë shkuar në mënyrë të paligjshme në Gjermani në javët e fundit për të kërkuar strehim në qytetin e Këlnit.

“Meqënëse strehimi përbën një kërcënim për sigurinë dhe rendin publik,” qyteti i Këlnës është i detyruar të marrë njerëz nga Evropa Juglindore për të parandaluar pasigurinë e tyre.

Meqë deri në 100 njerëz arrijnë në mënyrë të paligjshme në qytet çdo ditë, të gjitha strehimet e emergjencës dhe refugjatëve janë shfrytëzuar plotësisht, kështu që disa nga personat e ardhur në mënyrë të paligjshme duhet të shpërndahen në qytete të tjera.

900 persona u strehuan në gjimnaze ku ka një staf që kujdeset për shpenzimet, ushqim, kujdes mjekësor dhe akomodim.

Për vitin 2019, Këln gjithashtu po planifikon më shumë se 2,000 vende të reja për emigrantët e paligjshëm nga Ballkani, duke përfshirë kontejnerë si dhe apartamente.

Një anëtar i agjencisë së ndihmës për refugjatë thotë për “Express”, se njerëzit nga Ballkani vijnë rregullisht në Këln për të kaluar dimrin. Në pranverë, ata kthehen në atdheun e tyre.

“Njerëzit janë të lumtur që, ndryshe nga atdheu i tyre, ata kanë një shtëpi të ngrohtë, të pastër, ushqim të mirë dhe kujdes mjekësor gjatë muajve të dimrit”, tha punonjësi. “Për ta është pushimi i ëndrrave, prandaj shumë njerëz vijnë çdo vit në Këln me familjen e tyre.”

Por, siç raporton Express, udhëtimi në Këln nuk është vetëm pushimi i ëndrrave. Në mesin e atyre që kërkojnë azil ka edhe kriminelë. Në mesin e emigrantëve që qëndrojnë në Këln ka hajdutë të cilët kryejnë grabitje dhe më pas i shesin ato në vendet e tyre të origjinës.

Por edhe në mesin e grupeve armiqësore si shqiptarët dhe serbët, gjithnjë ka një mosmarrëveshje: “Gjithmonë ka një përplasje dhe ne duhet të vendosim”, tha punonjësi i ndihmës së refugjatëve për “Expressit”. /abcnews.al

drogaa.jpg
G. P.19:16 | 30/01/2019

Prokuroria për Krimet e Rënda kërkoi 38 vite burg në total për 7 persona, mes të cilëve ish-policë dhe ish-doganierë, të akuzuar trafikimin e një sasie prej 2.5 tonë kanabis me destinacion Gjermaninë. Droga u bllokua në Itali, ndërsa dëshmia e një “të penduari” zbardhi gjithë mekanizmin e grupit.

Prokuroria për Krimet e Rënda lexoi pretencën në gjykimin ndaj shtatë personave të akuzuar për trafikimin e një sasie prej 2.5 tonë kanabis drejt Italisë. Droga e dalë nga Shqipëria përmes një kamioni të ngarkuar me lëndë drusore kishte destinacion fundor Gjermaninë, por u pikas nga policia në portin e Ankonas në Itali në Dhjetor të vitit 2017.

Për akuzën e “trafikut të narkotikëve” në formën e grupit të strukturuar kriminal prokurori Dritan Prençi kërkoi deklarimin e fajshëm dhe nga 13 vite burg për të pandehurit Euron Hoti dhe Malton Lleshi. 13 vite burg u kërkuan edhe për të pandehurin Aurel Lazaj, por për shkak se ai gëzon statusin e të penduarit dhe dëshmia e tij “zbërtheu” gjithë linjën e trafikut, përfundimisht dënimi i kërkuar ishte 2 vjet burg.

Për ish punonjësit e policisë kufitare Gëzim Dervishi e Agron Kapllani dhe për dy ish-doganierë të Portit Durrës, Altin Katundi e Mikail Lila, të akuzuar për “shpërdorim detyre”, u kërkua fajësi dhe dënimi i tyre me nga 2 vite heqje lirie.

Karta e fortë e prokurorisë në këtë proces ishte rrëfimi i të penduarit Aurel Lazaj. Ai sqaroi gjithë mekanizimin e trafikut, personat e përfshirë në të si edhe ndihmën e zyrtarëe të policisë apo doganës. Në dëshmi Lazaj ka rrëfyer edhe për përfshirjen e tij të mëhershme në trafikun e kanabisit, ku droga kalonte kufirin përmes kamionëve që transportonin mermer.

Sipas prokurorisë, kamioni me 2.5 tonë kanabis u bllokua në Ankona për shkak të një problemi me dokumentacionin. Të pandehurit dërguan një tjetër kamion me qëllim ndërrimin e targave dhe shkëmbimin e tyre. Por kjo orvatje u diktua nga policia italiane dhe më pas u realizua edhe gjetja e drogës. Sipas hetimit, pritës i drogës në Gjermani ishte i pandehuri Euron Hoti. /abcnews.al

5C8FA6E7-A0CE-436D-A4B7-ADD1ECE9C129_w1023_r1_s-933x445.jpg
ent ela09:05 | 22/01/2019

Gjermania ia ka tërhequr licencën linjës ajrore të Iranit ‘Mahan Air’, duke përmendur si arsye “shqetësimet për sigurinë” dhe aktivitetet e kompanisë në Siri.

Zyra Federale e Aviacionit tha se mori vendim për ndalimin e menjëhershëm të fluturimeve të avionëve të kompanisë Mahan Air.

Zëdhënësi i Qeverisë gjermane, Steffen Seibert, tha se vendimi u mor pas konsultimeve me aleatët evropianë dhe Shtetet e Bashkuara. Sekretari Amerikan i Shtetit, Mike Pompeo, e mirëpriti vendimin dhe u bëri thirrje aleatëve të Uashingtonit që ta ndjekin atë.

Mahan Air, kompania e dytë më e madhe ajrore e Iranit, është nën sanksionet e SHBA-së që prej vitit 2011 dhe Uashingtoni u ka bërë thirrje edhe vendeve të tjera që ta penalizojnë. Thesari amerikan ka kërcënuar me sanksione kundër vendeve ose kompanive që i ofrojnë shërbime Mahan Air.

Teherani i ka akuzuar Shtetet e Bashkuara dhe Izraelin për përpjekje për të dëmtuar marrëdhëniet e Iranit me Evropën, në mënyrë që kjo e fundit të sabotojë marrëveshjen e vitit 2015, e cila ia ka hequr sanksionet Iranit në këmbim të kufizimit të programit bërthamor. Por, Seibert tha se vendimi për Mahan Air nuk është rezultat i presionit amerikan./REL


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono