Gianni De Biasi

De-Biasi.jpg
Igli Nikolli18:26 | 24/01/2020

Gianni De Biasi mbetet një nga personat më të dashur të popullit shqiptar. Trajneri italian i dhuroi tifozëve emocione të paharrueshme dhe ia doli të kualifikonte kombëtaren kuqezi në Euro 2016.

63-vjeçari nuk e harron aventurën fantastike me kuqezinjtë, ndërsa është pranë rikthimit në stol. Irani është gati t’i dorëzojë pankinën dhe akordi është afër. De Biasi zbulon gjithçka në një prononcim për Italiasera, aty ku flet edhe për kujtimet më të bukura të karrierës së tij.

IRANI – “Po merremi me disa detaje dhe gjërat nuk bëhen kurrë pa ardhur firma. Jam i disponueshëm në çdo moment”.

SHQIPËRIA – “Te Shqipëria kam kaluar 5.5 vite intensive dhe me një dëshirë të madhe për të treguar veten. Arritëm një objektiv të pamenduar në fillim. Kam punuar gjithmonë me shumë përkushtim te Shqipëria dhe isha i bindur që rezultatet do të vinin në fund, falë një metodologjie të përcaktuar mirë dhe duke i bërë djemtë të ëndërronin me sy hapur. Në fund ia dolëm të realizonim të pamundurën”.

Tifozat Kuq e Zi

KLUB APO KOMBËTARE? – “Nuk bëj dallime, unë jap gjithçka nga vetja në gjithçka që bëj. Ajo që ka rëndësi është sesa arrij të përfshihem, qoftë klub apo kombëtare. Rëndësi ka të përcaktosh objektivat në fillim dhe t’i arrish më pas. Qartësia në objektiva është parakushti i parë për të bërë një punë të mirë”.

KUJTIMET MË TË BUKURA – “Kam shumë. Kualifikimi në Europian me Shqipërinë është padyshim një ndër më të bukurit, sepse arritëm ta dërgonim kombëtaren aty ku nuk e kishte menduar as tifozi më optimist. Kujtimi tjetër i bukur është Modena. Arrita të ndërtoj një skuadër që e nisi nga Serie C dhe mbërriti në Serie A. Fituam në kryeqytet përballë Romës, që renditej në vend të dytë. Më pas vjen Torino. Kishim merkaton e bllokuar, ndërtuam një skuadër në pak ditë dhe ia dolëm ta dërgonim ekipi në vend të parë”. /abcnews.al

Altin-Lala.png
Vladimir Prenga09:37 | 15/01/2020

Altin Lala është një legjendë te Hannover në Gjermani dhe në të shkuarën tentoi të transferonte aty Milot Rashicën. Historia rrodhi ndryshe dhe djaloshi nga Vushtrria iu bashkua skuadrës së Vitesse në Holandë dhe shpërtheu.

Para EURO 2016, Rashica u grumbullua edhe nga Shqipëria dhe luajti në një miqësore. Trajneri i kombëtares në atë periudhë, Gianni De Biasi, nuk e ka të arsyeshme ta merrte në Europian dhe tani Rashica i përket Kosovës. Italiani shpesh është shënjestruar për atë zgjedhje të bërë, ndërkohë që Altin Lala tregon se e ngacmon ende De Biasin për Rashicën.

“E tall akoma me batuta (qesh). Çfarë i thoni dhe si përgjigjet? Nuk përgjigjet. Nuk e di se çfarë gjuhe flet pastaj. As shqip, as italisht, as arabisht (qesh)”, tregon me humor Lala në një intervistë për “Panorama Sport”. Sigurisht nuk mund të mos pyetet në lidhje me zërat e merkatos rreth Rashicës.

“Rashica po kalon një moment të mirë. Ka bërë hapa shumë të mëdhenj përpara dhe shpresojmë që të ketë vazhdueshmëri. Një ditë do ta shohim në një ekip të madh. Shpresoj që aty të jetë lojtar formacioni dhe deçiziv. Cili klub i madh ju ka kontaktuar? Po t’jua thosha këtë gjë juve, do të rrija nëpër kafene pastaj.

“Ofertë zyrtare? Nuk ka zyrtare. Pra, ka interesa. Janë shumë klube që e kanë vëzhguar, por për momentin nuk ka negociata aktuale. Të shohim në të ardhmen”, shprehet Lala, i cili menaxhon Rashicën dhe është i fokusuar pikërisht në këtë fushë të futbollit, pasi prej kohësh e ka shprehur që nuk e sheh dot veten si trajner, edhe pse e provoi një periudhë të ishte pjesë e stafit të kombëtares. /abcnews.al

de-biassi.jpg
Vladimir Prenga17:36 | 14/10/2019

Ish-tekniku i kombëtares, Gianni De Biasi, mendon se Shqipëria mund të fitojë në Moldavi. Italiani foli për ndeshjen e sotme dhe për epokën e tij kuqezi, i intervistuar në Emisionin e Mëngjesit në Abc News.

Kush mund t’i ketë harruar këto skena? Gianni De Biasi u soll si një personalitet i nivelit të lartë, ndërsa kombëtarja shqiptare luajti rolin e saj më të rëndësishëm në histori, atë të finalistes së Kampionatit Europian. Kanë kaluar katër vet nga kualifikimi i madh dhe tre vite nga Euro 2016 në Francë, kombëtarja synon sot të arrijë në ato nivele. Gjithsesi, së pari duhet të luajë sonte në Moldavi dhe italiani pyetet në Emisionin e Mëngjesit në Abc News, nga Enkel Demi.

“Mendoj se Shqipëria fiton. Nuk do të jetë e lehtë, por besoj se ka mundësi për ta fituar këtë ndeshje. Pashë edhe ndeshjen ndaj Turqisë, ku humbja erdhi vetëm nga një gabim i Strakoshës dhe i mbrojtësit. Mendoj se Shqipëria luajti një ndeshje shumë të mirë dhe jam shumë i kënaqur”.

Si e gjykon De Biazi periudhën në të cilën drejtoi kombëtaren? “Mendoj se ishte një etapë fondamentale për historinë e Shqipërisë, sepse mund të themi se kemi arritur në nivele të tjera, dhe shpresoj që këto nivele të arrihen sërish në të ardhmen. Patëm një detyrë jo të lehtë sepse duhej ndryshuar një mentalitet, një mënyrë pune, dhe mbi të gjitha sepse duhej të harronim gjithçka tjetër dhe të përqendroheshim vetëm tek futbolli, tek dëshirat dhe ëndrrat e një futbollisti. Besoj se kjo na ndihmoi shumë për t’u rritur”.

A mund të flasim për një “Debiazizëm” për futbollin? “Në Shqipëri, padyshim që po, por në vende të tjera është më e vështirë. Ndoshta mund të flitet për “debiazizëm” në Modena, po ashtu në Shqipëri. Mund të thuash pjesërisht në Torino, por jo tek Juventusi, me të cilin jeni tifozë ti Enkel dhe Gerti.  Kjo është më tepër çështje e gazetarëve, që me të drejtë bëjnë punën e tyre”.

Shqipëria drejtohet sërish nga një italian si Edi Reja, a mund të flasim për ngjashmëri?”Jo, unë mendoj se secili prej nesh ka mënyrën e tij në punën që bën, ka një stil sesi bashkëpunon me njerëzit që ka pranë, lojtarë apo ndihmës. Mendoj se gjëra kryesore është që t’i bësh njerëzit që të kenë besim se mund t’ia dalin mbanë, sepse jo gjithnjë njerëzit kanë besim se së bashku mund të arrijmë një objektiv të caktuar. Nëse arrin t’i bindësh dhe t’u tregosh rrugën për t’ia dalë, është më e lehtë të kesh sukses. Nuk është e lehtë, por bëhet pak më e lehtë”,  u shpreh trajneri italian. /ABC NEWS 24/7

abc-e-mengjesit-123.jpg
ad min09:08 | 14/10/2019

14 Tetor 2019. Sot u bënë 5 vjet nga ndeshja Serbi-Shqipëri, e cila u pezullua për shkak të hedhjes së flakadanëve dhe objekteve të tjera nga tifozët ndaj lojtarëve të kombëtares. Ndeshja ishte e vlefshme për eliminatoret për Kampionatin Evropian 2016, ku ne do të arrinim historinë dhe do të kualifikoheshim për herë të parë.

Të gjitha ndodhën më 14 Tetor 2014! Raste shënimi nga kombëtarja jonë, një dron me simbole patriotike shqiptare dhe në fund mësymja dhe dhuna ndaj lojtarëve të kombëtares, çka do të çonte në anulimin e ndeshjes.

Zyrtari i Federatës Shqiptare të Futbollit, Dritan Kokona, i ftuar në “ABC-në e mëngjesit” me gazetarin Enkel Demi ka kujtuar edhe njëherë se çfarë ndodhi atë ditë.

“Ballafaqimi filloi që në aeroport deri ku qëndronim ne. Deri këtu e quanim normale, sa i takon kushteve të sigurisë. Ditën e ndeshjes ishte një situatë tjetër. Kishte grupime tifozësh të organizuar për këtë punë. Unë isha në një ekstrem ku nuk kishte shumë lidhje me tribunën, por nuk u dëgjua himni. Ata nuk po kuptonin si mund të luanim kaq mirë futboll, që nga momenti i Canës me kokë dhe pastaj godasin Ansin me flakadanë. Këtu filloi gjithçka. Kemi ndenjur për gati 3-4 orë në stadium dhe pastaj jemi shoqëruar për në stadium. Kur zbritëm në Tiranë edhe në avion dëgjoheshin thirrjet e tifozëve. Një nga gjërat që do të mbaj mend është një konferencë e shtypit e organizuar në orën 4 të mëngjesit. Ishte e paimagjinueshme. Nuk e kam kuptuar se çfarë po ndodh”, tha Kokona, i cili shtoi se më pas u morën masat që kjo çështje të fitohej ligjërisht.

Ndërkohë në një lidhje të drejtpërdrejtë nga Italia ishte ish-trajneri i kombëtares shqiptare, Gianni De Biasi, i cili udhëhoqi vendin drejt atij kualifikimi historik për në Francë 2016.

“Mendoj që ka qenë një fazë shumë e rëndësishme në historinë e Shqipërisë dhe mund të themi që kemi hapur një kufi të ri dhe shpresojmë që të rihapet edhe në vitet në vazhdim. Është e vëshiterë sepse në jetë gjërat nuk përsëriten kaq thjesht”, tha ish-trajneri i kombëtares shqiptare, Gianni De Biasi.

Në stadiumin e Partizanit të Beogradit, himni i Shqipërisë u vërshëllye rëndë, dhe thirrjet antishqiptare ushtuan me të madhe, bashkë me ofendimet. Në 41 minuta, arbitri anglez Martin Atkinson u detyrua ta ndërpriste ndeshjen dy herë, për hedhje të tymueseve, çakmakëve apo monedhave në fushë.

Në të 41-ët u shfaq mbi stadium droni me një banderolë me fushë te zezë, me një hartë të Shqipërisë së madhe me ngjyrë të kuqe, dhe me dy personalitetet e Pavarësisë, Ismail Qemalin dhe Isa Boletinin.

Futbollistët serbë kapën të parët banderolën, dhe pas kësaj lojtarët shqiptarë reaguan. Pasi Balaj mori në dorë flamurin, tifozë serbë dhe deri forca të sigurisë sulmuan ekipin kuqezi, duke sjellë një sherr masiv.

Të rrezikuar për jetën, lojtarët shqiptarë u larguan me vrap drejt dhomave të zhveshjes, bashkë me gjithë delegacionin. Në të njëjtën kohë, tifozë ultras serbë u përleshën me policinë dhe u përpoqën të hynin në fushë.

Në ambientet e brendshme të stadiumit, kombëtarja iu nënshtrua kontrollit të policisë, dhe me shumë vështirësi mundi të largohej drejt aeroportit për t’u kthyer urgjent në Shqipëri. Mbërritja në Rinas ishte triumfale, me mijëra tifozë që prisnin ekipin përfaqësues, duke i shprehur mbështetjen e tyre të plotë.

Jehona ishte e jashtëzakonshme, pasuan procese gjyqësore sportive, dhe përfundimisht ndeshja iu dha Shqipërisë në tavolinë me rezultatin 3-0, ndërsa një vit më vonë kombëtarja arriti kualifikimin për në Euro 2016./abcnews.al

PRESING-DE-BIAZI-PJ-1.mpg_snapshot_00.29-1280x720.jpg
Vladimir Prenga09:45 | 09/10/2019

Sampdoria është në kërkim të një trajneri dhe janë disa kandidaturat. Mes tyre është edhe ish-trajneri i kombëtares shqiptare, Gianni De Biasi. Italiani ka folur në lidhje me këtë opsion dhe e pranon se në tavolinën e Sampdorias është edhe emri i tij.

“Të mos e ekzagjerojmë. Mos thoni se do të jem unë trajneri i ardhshëm sepse nuk do të ishte korrekte. Klubi po vlerëson disa kandidatë, përfshirë edhe mua. Kjo më bën të ndihem krenar”, është shprehur De Biasi për “Il Secolo XIX”.

“A e kam parë Sampdorian? E kam parë thuajse gjithmonë, kjo pasi kushdo që bën punën time do të qëndrojë i informuar për zhvillimet e fundit. Kurrë nuk kam folur me presidentin Ferrerro”, shton trajneri italian, i cili pas largimit nga Shqipëria drejtoi për pak muaj spanjollët e Alaves. /abcnews.al

gerti-carcanii.jpg
ad min13:25 | 10/09/2019

Çdo të hënë, ABC News i ka kushtuar kohën e saj sportit me anë të emisionit “Pressing”. Këtë puntatë u diskutua rreth kombëtares shqiptare. Humbja me Francën dhe ndeshja me Islandën. Gjithashtu u fol për Kosovën, e cila nuk njeh humbje prej ndeshjesh.

Të ftuar në studio ishin: Jurgen Zela, gazetar; Eno Skarço, gazetar; Daniel Xhafa, ish-futbollist dhe Andi Matraxhiu, menaxher lojtarësh. Ndërkohë në lidhje live me telefon ishte ish-trajneri i kombëtares, Gianni De Biasi./abcnews.al

de-biasi-1.jpg
ad min11:44 | 10/09/2019

Ish trajneri i ekipit kombëtar, Gianni De Biasi, në një lidhje telefonike në emisionin “Pressing” në ABC News ka komentuar aktualitetin në përfaqësuesen kuqezi. Tekniku, i cili dërgoi Shqipërinë në Euro 2016 e konsideron bashkëkombasin e tij Edy Reja si njeriun e duhur për të drejtuar kombëtaren.

Situata në ekipin kombëtar është shqetësuese dhe shanset për një kualifikim në europian janë thuajse zero. Ish-trajneri i përfaqësueses Gianni De Biasi gjatë një ndërhyrje telefonike për emisionin “Pressing” në ABC News analizoi formën dhe ecurinë e deritanishme të kuqezinjve nën drejtimin e teknikut Edy Reja. Trajneri, i cili dërgoi përfaqësuesen në Euro 2016 bëri të ditur se në Shqipëri nuk ka një kulturë për të pranuar humbjen.

“Nuk po ndodh asgjë. Kemi marrë fitore me Andorrën dhe Moldavinë. Trajneri Edy Reja do të bëjë maksimumin. Fillon një rrugëtim mjaft i vështirë dhe ndaj Islandës duhet marrë një fitore. Në Shqipëri mungon një lloj kulture në situata të tilla. Skuadra duhet mbështetur jo vetëm kur fiton, por edhe kur humbet. Shqipëria nuk është skuadra më e fortë e grupit. Kjo është Shqipëria që është. Në bazën e ecurisë dhe problemeve duhen kuptuar rezultatet dhe përpjekjet për të bërë më të mirën në situata të tilla kritike”, tha De Biasi.

Por çfarë mendon De Biasi për rreshtimin taktik 3-5-2 që aplikon trajneri Edi Reja?

“Nuk është problem sistemi apo moduli që zgjedh trajneri se sa situata në të cilën lojtarët janë për momentin. Një pjesë e mirë e futbollistëve që unë drejtoja ishin në kapacitetet e tyre maksimale. Kishin shumë minuta nën këmbë dhe aktivizoheshin rregullisht. Ndoshta aktualisht një pjesë e tyre nuk luajnë shumë dhe kjo krijon komplikacione respektive për sa i përket ecurisë. Sistemi i lojës mund të përshtatet në mënyra të ndryshme. Nga 3-5-2 mund të ndryshojë gjatë lojës”, tha De Biasi.

Në fund edhe një sugjerim për kuqezinjtë.

“Nuk duhet menduar se kemi qenë në europianin e vitit 2016 pasi gjithmonë ka një fillim dhe një fund. Duhet gjetur forca për të filluar sërish dhe ecur përpara.  Duhet të lini të qetë trajnerin për të punuar me skuadrën. Ai ka kapacitete të mira dhe potencialin e duhur për të drejtuar Shqipërinë. Duhet të mbështesni këtë skuadër edhe në momentet e vështira dhe jo vetëm kur fiton. Lojtarët duhet të mbajnë përgjegjësitë e tyre në momentet e veçanta sa i përket performancës dhe pjesës së tyre në fushë. Kjo është shumë e rëndësishme sa i përket situatës në përfaqësuese”, u shpreh ai.

Shqipëria luan sonte në mbrëmje në “Elbasan Arena” ndaj Islandës ku synimi kryesor mbetet rikthimi tek fitorja./ABC News Albania 24/7

de-biasi.jpg
ad min18:56 | 05/09/2019

Trajneri që çoi Shqipërinë në Europianin e Francës i rikthehet edhe njëherë përballjeve me Francën, por këtë radhë në aspektin e një opinioni. Franca është favorite, por Shqipëria duhet të luajë pa frikë. Ata janë po aq të fortë sa katër vite më parë, thotë ndër të tjera trajneri që bëri histori.

Ish-trajneri i skuadrës kombëtare të futbollit Gianni De Biasi, me bilanc pozitiv në përballjet e tij me Francën, kthehet sërish të komentojë në lidhje me sfidën zyrtare eliminatore të së shtunës në “Stade de France” me kampionët. Sipas tij, skuadra kundërshtare është po kaq e fortë, por shumë më e pjekur se atëherë. Në një prononcim për neësport, De Biasi theksoi se Shqipëria do të bëjë lojën e saj, duke besuar te ajo që trajneri ka menduar të hedhë në fushë.

“Ndeshjet asnjëherë nuk duhen nënvlerësuar, ato duhen luajtur. Është e qartë se në këtë takim favoritë janë francezët. Unë besoj se Franca është sot aq e fortë sa ishte 4 vite më parë. Vetëm se tani skuadra është më e pjekur. Trajneri Edy Reja është një person i zgjuar dhe i aftë. Ai është një trajner ekspert. Unë mendoj se ai do të jetë në gjendje të përfitojë sa më shumë nga ky grup i lojtarëve që ka në dispozicion. Varet shumë se sa lojtarët do të përfshihen në këtë ndeshje dhe varet sa të vendosur janë për të dhënë gjithçka në fushën e lojës”, tha ai.

Nën drejtimin e trajnerit që dërgoi Shqipërinë në Europian, De Biasi, skuadra kombëtare kuqezi ka arritur një fitore në miqësoren në “Elbasan Arena”, barazim në miqësoren në Rene 1-1 dhe humbjen në ndeshjen e dytë në grup në fazën finale të Europianit 2016, 2-0. Tashmë një tjetër sfidë, shumë e vështirë, por me Shqipërinë që luan shanset e saj të fundit, dhe Franca që kërkon të mbyllë kapitullin kualifikim./ABC News Albania 24/7

PRESING-DE-BIAZI-PJ-1.mpg_snapshot_00.29-1280x720.jpg
ad min22:47 | 19/11/2018

I ftuari i parë i kësaj puntate të emisionit sportiv “Pressing” nga gazetari Gerti Çarçani, ishte ish-trajneri i skuadrës përfaqësuese të futbollit shqiptar Gianni de Biasi. Një bisedë e zhvilluar për situatën aktuale në ekipin kombëtar dhe se si e ka ndjekuar ai këtë ekip që në gjenezë.

Fillimisht ish-trajneri foli për mendimin e tij se si e vlerësoi këtë raund të ekipit tonë në Nations League.

“Ishte një turne i ekuilibruar dhe pse Shqipëria nuk arriti të jepte maksimumin dhe nuk arriti ta shprehë potencialin që ka. Besoj se pak nga mungesat, por edhe kërkimi për një identitet të ri nuk ndihmoi që objektivat të arriheshin.”

De Biasi u shpreh edhe për arsyet që e çuan Shqipërinë në humbjen e thellë ndaj Skocisë.

“Ne fatkeqësisht bëmë një gabim tek goli i parë nga dalja e gabuar e një mesfushori. Ishin 3 kundër 2 dhe humbëm topin. Kur humbet topin në gjysëm fushën tënde dhe pas 13 minutash kë pësuar një gol për 1 – 0 dhe nuk është e lehtë. 10 minuta më vonë mbetesh me 10 lojtarë dhe kjo ndikon tek pjesa e mbetur e lojës. Mungesa kishte Shqipëria, mungesa kishte dhe Skocia. Unë gjithmonë kam bërë si dhe Panuçi nuk mund të bënte ndryshe me ato që kishte në dispozicion. Nuk mund të qash kur të mungon dikush, nuk mund të bësh asgjë. Natyrisht po të kishte patur Roshin, Sadikun, Hysajn, Bashën do të luhej një ndeshje tjetër.”

Ai bëri dhe një krahasim ndërmjet kombëtares në kohën e tij dhe kombëtares së sotme nën drejtimin e Panuçit.

“Nuk e di nëse ka ndryshuar. Unë u përpoqa të isha shumë i kujdesshëm ndaj rivalëve ndaj vendosa tu hiqja mundësitë dhe burimet e lojës të ekipeve që luanin kundër nesh. Tentova të shfrytëzoja cilësitë e futbollistëve që kisha. S’mund të sillesh si Brazili kur je Shqipëria. Gjithësecili me mundësitë që ka duhet të japë maksimumin. Aftësia e një trajnerit është ajo që të dijë situatën dhe të japë maksimumin.”/abcnews.al

de-biasi.jpg
ad min16:18 | 07/09/2018

Gianni De Biasi ndodhet në Shqipëri për të ndjekur ndeshjen e kombëtares ndaj Izraelit. Ish-trajneri kuqezi flet për takimin e sotëm, dhe për shanset tona në grupin e Ligës së Kombeve.

Kaloi më shumë se një vit që nga largimi i tij.

Gianni De Biasi është sot një “ish” në kombëtare, ndonëse një “ish” i madh, ndërsa Shqipëria nuk ngjan aspak me atë që la ai.

Italiani me pasaportën shqiptare ka ardhur në Tiranë për të parë sfidën ndaj Izraelit në Ligën e Kombeve, por a e ka ndjekur ish-ekipin?

“Po e kam ndjekur gjithmonë kombëtaren sepse kam një lidhje shpirtërore me Shqipërinë. Ndeshja e fundit që ndoqa ishte ajo ndaj Kosovës që për fat të keq u humb në Zyrih”, thotë De Biasi.

Tre humbje radhazi në miqësore, për më tepër me lojë jo të mirë.

Problem i madh fakti se shumë lojtarë nuk luajnë sa duhet apo nuk luajnë fare në klubet e tyre.

“Loja do të vijë me kalimin e kohës. Nuk është e lehtë pasi duhet të gjejmë ekuilibrat, por kjo do të ndodhë kur të zgjidhet formacioni ideal. Natyrisht kjo do të varet nga ecuria e lojtarëve të ndryshëm në skuadrat e tyre. Edhe kur isha unë trajner kishte lojtarë që luanin pak, por kur vinin në kombëtare ndikoheshin nga fanela, takoni shokët e tjerë dhe jepnin kontribut të madh”, shprehet De Biasi.

Panuçi ka thënë se dëshiron të luajë në sulm.

A është e drejtë dhe e mundshme, sipas De Biazit?

“Të gjithë e kemi dëshirën për të luajtur në sulm, gjithsesi ndeshjet në sulm bëhen nëse ke mundësi t’i bësh. Bëhen nëse kundërshtari është më i dobët se ti apo se nuk është në një ditë të mirë. Por gjëja kryesore është të kesh ekuilibrat dhe të marrësh të gjitha përgjigjet e duhura nga lojtarët”, tregon ish-trajneri.

Agolli u la jashtë ndeshjeve miqësore.

“Tani është ndeshja e parë dhe ai u thirr në rolin e tij. Mendoj se është një lojtar i rëndësishëm së pari prej përvojës dhe së dyti sepse skuadrt formohen kur ka lojtarë të tillë seriozë”, thotë De Biasi.

Sonte Shqipëria luan ndaj Izraelit.

Si e sheh De Biazi këtë ndeshje, dhe si i sheh shanset në grup?

“E shoh mirë sepse ka përmirësim nga nndeshjet e tjera të humbura . Shumë lojtarë të rëndësishëm që ishin në Europian me ndoj se mund të jenë në fushë sot. Përsa i përket grupit në Ligën e Kombeve mendoj se është i kalueshëm. Nuk ka asgjë të lehtë apo të sigurt por Shqipëria mund të dalë e  para në grup”, shprehet De Biasi.

Pas aventurës së madhe në Shqipëri dhe dështimit në Spanjë, a ka ende dëshirë De Biasi të jetë trajner?

“Po, po. Kam dëshirë më shumë se më parë. Aq më tepër nuk bën pjesë në natyrën time të rri pushim. Shpresoj të gjej diçka sa më shpejt. Medoja se mund të shkoja te Polonia, por nuk arrita. Mendoj se Polonia është një skuadër shumë e fortë”, tha De Biasi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono