FSHF

stolat-e-thyer-ne-air-albania.jpg
Vladimir Prenga08:59 | 23/02/2020

Plot 16 000 euro dëme janë shkaktuar në “Arenën Air Albania” pas ndeshjes Kukësi-Tirana. Janë shkatërruar 164 ulëse, nga të cilat pjesa dërrmuese është dëmtuar nga tifozët kryeqytetas

Do të vinte dita që të ndodhte. Pasi u kënaqëm me lojën dhe emocionet e dhëna në fushë nga dy skuadrat, tashmë duhet të merremi me atë që ndodhi në tribuna. Plot 164 ulëse u dëmtuan mbrëmjen e së shtunës në “Air Albania Stadium”, gjatë ndeshjes së Superligës, mes Kukësit dhe Tiranës.

Burime në administratën e stadiumit bëjnë me dijë se dëmi financiar arrin në 16 000 euro. Dëmtimet më të mëdha, madje në mënyrë të ndjeshme, u shkaktuan në tribunën jugore, aty ku ndodheshin tifozët e Tiranës, një pjesë e të cilëve shkatërroi apo cenoi rëndë 145 stola.

Në tribunën përballë saj, atë të krahut verior, dëmtimi nga tifozët kuksianë ishte shumë më i vogël, me vetëm 19 ulëse. Gjithçka është filmuar dhe fotografuar, pra janë të dokumentuara momentet e vandalizmit, kur tifozët kanë shkulur stolat, janë hedhur sipër tyre, dhe copat plastike i kanë hedhur në fushë, duke rrezikuar tifozë të tjerë, lojtarë si dhe zyrtarë të ndeshjes.

Kjo ishte hera e parë që Arena e përuruar në 17 nëntor në ndeshjen me Francën, pësoi dëmtime të tilla, por nuk besohet të jetë e fundit. Federata Shqiptare e Futbollit e dënoi dhunën dhe kërkoi nga Policia që të merrte masa për të ndaluar personat përgjegjës, e po ashtu të kryhet gjykimi i dënimi i fajtorëve sipas ligjeve të ashpërsuar muaj më parë.

Gjithsesi, edhe pse dhuna e tifozëve është problem rendi, ajo ka rrënjë më të thella. Sidomos në një vend si Shqipëria, ku pabarazia është rritur, punësimi është vështirësuar sidomos në biznesin e vogël, dhe cilësia e arsimit është cenuar për 30 vjet, dhuna e tifozëve është më së pari një problem shoqëror. Ndërkaq, dëmi financiar në “Air Albania Stadium” do të shlyhet nga të dy klubet, sidomos nga Tirana. /abcnews.al

stolat-e-thyer-ne-air-albania.jpg
Vladimir Prenga13:55 | 22/02/2020

Kukësi-Tirana nuk kishte vetëm spektakël. Tifozët gjatë ndeshjes kanë dëmtuar 164 stola dhe kjo nuk është pritur mirë nga FSHF, që ka dalë me një deklaratë ku kërkon nga Policia e Shtetit të ndalojë personat që kanë shkaktuar këto akte vandale. Ndër të tjera thuhet se janë identifikuar të gjithë ata që kanë dëmtuar stolat dhe se fotografitë e tyre do të publikohen në stadium.

REAGIMI I FSHF – “Federata Shqiptare e Futbollit dënon ashpër sjelljet e papranueshme dhe vandale të disa grupeve të tifozëve në ambientet e “Air Albania Stadium” gjatë ndeshjes Kukësi – Tirana, sjellje këto që nuk kanë asnjë lidhje me synimin tonë për t’i kthyer ndeshjet e kampionateve tona në festa futbolli. Këto akte vandale përbëjnë shkelje ligji dhe ne kërkojmë që personat përgjegjës të përballen me ligjin.

Pas verifikimeve të kryera nga administrata e “Air Albania Stadium”, rezulton se janë dëmtuar 164 ulëse, nga të cilat 145 nga ana e tifozëve të Tiranës dhe 19 nga ana e tifozëve të Kukësit. FSHF ka tashmë të dokumentuara me video dhe foto personat konkretë që thyejnë ulëset dhe i flakin ato në fushë, duke dëmtuar sportdashësit e tjerë si dhe duke rrezikuar edhe jetën e zyrtarëve të ndeshjes si dhe futbollistëve.

FSHF, nëpërmjet një kërkese zyrtare, i ka kërkuar policisë së Tiranës ndalimin dhe arrestimit e këtyre personave dhe tashmë ka nisur procedura nga ana e forcave të rendit. Federata e Futbollit, bazuar te ligji, do të publikojë në stadium fotot dhe videot e personave që ushtrojnë dhunë në mjediset sportive.

FSHF u bën thirrje klubeve dhe grupeve të tifozerive të marrin masa dhe të respektojnë rregullin dhe ligjin në cilëndo hapësirë sportive të vendit. Komisionet në FSHF do të veprojnë në bazë të rregulloreve të brendshme, duke marrë masa kundër këtyre shkelësve. Kërkojmë nga Policia e Shtetit që t’i shoqërojë personat përgjegjës në bazë të ligjit në fuqi, në mënyrë që ata të dalin para drejtësisë. Kërkojmë mirëkuptimin e tifozerive dhe u bëjmë thirrje që së bashku t’i kthejmë stadiumet tona në mjedise familjare, ku mbizotëron festa sportive dhe jo dhuna dhe aktet vandale”, shkruhet në reagimin e FSHF. /abcnews.al

Demi i shkaktuar në "Air Albania Stadium" gjatë ndeshjes Kukësi-Tirana

Gepostet von Superliga & Kategoria e Pare am Samstag, 22. Februar 2020

stadiumi-i-kukesit.jpg
Vladimir Prenga09:34 | 20/02/2020

Shpenzimet në stadiumin e Kukësit kanë arritur në gati 3.8 miliardë lekë të vjetër dhe në Federatën Shqiptare të Futbollit ka shqetësim për rentabilitetin e impiantit. Investimi madhor besohet se është kryer me ndikim politik

Besohet të jetë gati në nisje të sezonit të ardhshëm. Stadiumi i Kukësit është një kantier i madh ndërtimi, ndër më të rëndësishmit në Shqipëri, por burime në Federatën Shqiptare të Futbollit shprehen se investimi përbën edhe një shqetësim.

Deri tani, Federata ka shpenzuar rreth 3.2 milionë euro, apo rreth 3.8 miliardë lekë të vjetër, të paktën sipas këtyre burimeve, që do të thotë diçka më pak sesa buxheti vjetor i këtij institucioni, që arrin afërsisht 8 milionë euro.

Po nga këto burime, mësohet se investimi në stadiumin e Kukësit u kërkua nga qeveria shqiptare, me gjasë për ta pasur si ndihmë në zgjedhjet lokale që u zhvilluan vitin e kaluar. Besohet se pritej garë e fortë për Bashkinë e Kukësit, e cila vazhdimisht është fituar nga demokratët, pavarësisht se në përfundim zgjedhjet nuk patën konkurrim.

Ndërkaq, burime në ish-stafin teknik të skuadrës së Kukësit pohuan për ABC News se vetë presidenti Duka u shpreh privatisht i pakënaqur për shpenzimin e madh në një stadium, që nuk pritet të ketë mundësi të nxjerrë fitime të rëndësishme.

Presidenti, sipas këtij pjesëtari të ish-stafit teknik kuksian, u shpreh se me 2 miliardë lekë të vjetër, sa ishin harxhuar deri në atë kohë, mund të ndërtoheshin shumë fusha futbolli në të gjithë Shqipërinë.

Në përfundim, stadiumi padyshim që do të ketë kushte shumë të mira për të luajtur futboll, madje edhe ndeshje ndërkombëtare, por nuk pritet që të nxjerrë të ardhura, për vetë gjendjen ekonomike të krahinës së Kukësit, dhe e vetmja shpresë, siç është diskutuar në Federatë, është që ta përdorë skuadra e Prizrenit për ndeshjet e saj në Kosovë. /abcnews.al

fshf-liga.jpg
Vladimir Prenga08:37 | 20/02/2020

Liga Profesioniste nuk gjen qetësi. Ditën e djeshme është zhvilluar takimi i radhës, ndërkohë që një pjesë e presidentëve vijojnë t’i bojkotojnë mbledhjet e saj. Vetëm gjashtë klube kishin përfaqësues këtë herë: Kukësi, Tirana, Skënderbeu, Laçi, Luftëtari dhe Teuta.

Dështim i Ligës Profesioniste ende pa nisur funksionimi normal i saj. Mbledhja e djeshme ka pasur edhe zhvillime të reja, pasi sipas asaj që raporton “Panorama Sport”, presidenti i Laçit, Pashk Laska, ka debatuar me presidentin e Ligës, Edmond Libohova.

Kreu i klubit kurbinas ka qenë i ashpër, duke akuzuar se Libohova nuk po i mbron interesat e klubeve dhe se nuk po i përfaqëson ata si duhet kundrejt Federatës Shqiptare të Futbollit. Laska ka lënë mbledhjen, ndërkohë që Libohova është shprehur më pas se nuk mund të vazhdojë në këto dhe mund të largohet nga pozicioni që ka.

 

Takimi i Ligës Profesioniste (24 janar 2020)

LASKA I MËRZITUR NGA MBLEDHJA E JANARIT – Presidenti i Laçit ka shprehur më parë rezerva edhe për homologët e tij. Para pak kohësh ishte menduar edhe një bojkot i Superiores, pasi qeveria nuk po e mban premtimin për hartimin e Paketës së re fiskale për Sportin.

Mbledhja mes presidentëve, ku do diskutohej për bojkotin, mund të konsiderohet e dështuar (u mbajt më 24 janar), pasi ishin vetëm përfaqësuesit e pesë klubeve. Në fund të mbledhjes Laska foli për mediat, ndërkohë që presidentët e tjerë u larguan.

Kjo e mërziti presidentin e Laçit, i cili prej gati 15 vitesh investon në klubin e vogël verior. Kjo heshtje e klubeve atij nuk i ka pëlqyer, ndërkohë që dje nuk ka duruar dhe i është kundërvënë Libohovës, i cili është edhe zëvendëspresident i Federatës Shqiptare të Futbollit. /abcnews.al

sindikata.jpg
Vladimir Prenga15:29 | 19/02/2020

Sindikata e Futbollistëve Profesionistë Shqiptarë ka dalë me një njoftim të rëndësishëm për ata lojtarë që kanë fituar gjyqet në FIFA apo FSHF për pagat e padhëna. Synimi është të përfitohet nga fondi që FIFPro do të ketë për lojtarët me probleme në klubet e mëparshme.

“Të nderuar kolegë futbollistë. Siç jeni në dijeni, Sindikata Botërore e Futbollistëve Profesionistë, FIFPro, ka arritur një marrëveshje me FIFA-n për të lëvruar një fond me anë të cilit do të perballohen një pjesë e pagave të padhëna të Futbollistëve.

Me qëllim që edhe futbollistët shqiptar të mund të përfitojnë nga ky fond, kërkojmë nga ana juaj që të na vini në dispozicion vendimet me anë të cilave keni fituar gjygjet në FSHF ose FIFA për pagat e padhena, bashkë me një kërkesë të bërë nga ana juaj, ku të përcaktoni vlerën e detyrimit që klubet e futbollit kanë ndaj jush.

Këto dokumenta do të dërgohen nga ana jonë në departamentin përkatës të FIFPro, i cili më pas në bashkepunim me FIFA-n do të përcaktojnë edhe fondet që mund të vihen në dispozicion të Shqiperisë për të shlyer pagat e padhena të futbollisteve.

Duke ju falënderuar të gjithëve paraprakisht për bashkëpunimin, ju uroj suksese, mbarësi në familjet tuaja. Me respekt Andi Lila”, shkruhet në njoftimin e bërë nga Sindikata e Futbollistëve Profesionistë Shqiptarë. / abcnews.al

mustedanagic-1280x866.jpg
Vladimir Prenga09:32 | 16/02/2020

Federata Shqiptare e Futbollit është e pakënaqur me ecurinë e ekipeve kombëtare të moshave. Komiteti Ekzekutiv ka vendosur të largojë nga detyra drejtorin teknik të tyre, boshnjakun Dzemal Mustendanagic.

Rezultatet nuk kanë qenë ata që priteshin. Pavarësisht optimizmit në Federatën Shqiptare të Futbollit për ekipet kombëtare të moshave, viti 2019 përfundoi keq, dhe për këtë arsye u vendos që të ndryshohej.

Pritet të shkarkohet Dzemal Mustendanagic, Drejtori teknik i Departamentit të futbollit, më praktikisht, drejtor teknik i ekipeve kombëtare të moshave. Kjo gjë u diskutua në mbledhjen e fundit të Komitetit Ekzekutiv, mbajtur para pak ditëve.

Burime nga ky komitet bënë me dijë për ABC News se pati kritika për punën e specialistit boshnjak. Po këto burime pohuan se Mustendanagic, të njohur shkurt në Shqipëri si Xhema, do t’i propozohet pozicioni i gjurmuesit të talenteve shqiptarë nëpër Europë, pra roli i një skauti.

Federata ka bindje se ai mund të japë më shumë në këtë pozicion, pasi edhe tek Dinamo e Zagrebit ka punuar në këtë detyrë, duke bërë zbulime të rëndësishme, mes të cilëve edhe yllin e sotëm të Realit, Luka Modric.

Pikëpyetja e vetme është nëse Mustendanagiç do ta pranojë rolin, ndërsa në Komitetin Ekzekutiv u diskutua se mund t’i bëhet edhe rritje e rrogës. Gjithsesi, për momentin nuk pritet të ketë ndryshime në stafin teknik të ekipeve kombëtarë të moshave. / abcnews.al

Air-Albania.jpg
Vladimir Prenga10:54 | 12/02/2020

Klubet do të duhet të paguajnë miliona lekë që të luajnë ndeshjet në “Arenën Air Albania”. Ky është vendimi i marrë nga Federata Shqiptare e Futbollit, pas analizës së kostove.

Dëshironi të luani në këtë luks? Atëherë, nëse ju pëlqen dhe nëse kërkoni të fitoni edhe para, duhet të paguani më shumë se deri tani. Ky ishte vendimi i marrë nga Komiteti Ekzekutiv i Federatës Shqiptare të Futbollit për “Air Albania Stadium” dhe tarifa për çdo ndeshje do të jetë 8 deri në 10 milionë lekë të vjetër.

Burime në Komitetin Ekzekutiv treguan për ABC News se në mbledhje u llogaritën kostot e mirëmbajtjes dhe u vendos për këtë pagesë, me diferencën vetëm nëse do të luhet me ndriçim apo jo. Nga Federata informohemi se Partizani fitoi 110 milion lekë të vjetër neto, pra duke hequr të gjitha shpenzimet, nga derbi i luajtur në “Air Albania” me Tiranën.

Po ashtu, Kukësi fitoi 15 milion lekë, gjithashtu të vjetër nga ndeshja me Partizanin. Hera e parë që klubi verior del me fitim në një sfidë e kampionatit. Llogaritet që deri në fund të sezonit, në “Air Albania” të luhen 12 deri 13 ndeshje, nga të cilat ndeshjet derbi e kryeqytetit, apo sfidat e Tiranës e Partizanit me Kukësin, pse jo edhe ndonjë tjetër.

Deri tani, marrëveshja mes drejtorisë së stadiumit dhe klubeve ka qenë me përqindje dhe ndoshta ky negocim do të bëhet sërish për duelet mes Tiranës e Partizanit, duke pasur parasysh të ardhurat e mëdha që sjell kjo ndeshje. /abcnews.al

fshf-1280x728.jpg
Vladimir Prenga09:34 | 12/02/2020

Federata Shqiptare e Futbollit do të ndërtojë 3 shtëpi të reja në fshatin Bubq, të goditur nga tërmeti i 26 nëntorit. Deri tani janë dhuruar 80 000 euro, ndërsa fondet e tjera pritet të plotësohen nga Federata.

Ndihma nga futbolli pritet të jetë kjo. Tri shtëpi të reja do të ndërtohen nga Federata Shqiptare e këtij sporti, në përgjigje të shkatërrimeve nga tërmeti i 26 nëntorit. Kjo u vendos zyrtarisht në mbledhjen e Komitetit Ekzekutiv. Kantieret do të hapen në fshatin Bubq të Rrethit të Krujës.

Besohet se fondet e mbledhura deri tani do të mjaftojnë për diçka të tillë, ndonëse saktësisht në mbledhje u fol për 2 deri në 3 banesa. Si parim, shtëpitë do t’u ndërtohen atyre familjeve të goditura më rëndë nga fatkeqësia natyrore dhe që janë më keq nga gjendja ekonomike.

Burimet në Federatë bëjnë me dijë se nga dhurimet e marra deri tani janë mbledhur 80 000 euro, ndërsa shtojnë se vetë FSHF-ja do të kontribuojë për pjesën tjetër në mënyrë që të jenë financat e duhura për të ndërtuar tri shtëpitë e premtuara.

Dhuratat janë bërë nga Federata e Futbollit e Kosovës, nga partner ndërkombëtarë, si dhe janë mbledhur nga veprimtari të ndryshme bamirësie. Tërmeti i 26 nëntorit shkaktoi 51 viktima, ndërsa sipas llogarive të qeverisë shqiptare, dëmi ekonomik arrin në mbi 1 miliard euro. /abcnews.al

Arbitrat-e1581433112935.jpg
Igli Nikolli15:55 | 11/02/2020

FSHF ka zhvilluar mbledhjen e zakonshme mujore me arbitrat shqiptarë. Takimi është kryer në ambientet e “Air Albania”. Gabimet e tyre, sidomos ato të javëve të fundit, kanë qenë tema kryesore e bisedimeve. Shefi i Sektorit të Arbitrimit, Sokol Jareci ka shpjeguar më me detaje atë që u diskutua dhe direktivat që u dhanë.

Sot jemi mbledhur me arbitrat e Superiores dhe Kategorisë së Parë. Për seminarin periodik ne mblidhemi çdo muaj me arbitrat, por ky seminar përkon me një situatë jo të zakonshme në lidhje me performancat e tyre. Gjatë katër javëve të para të sezonit të ri, arbitrat kanë gabuar në disa ndeshje. Ne jemi këtu për të dhënë argumentet e këtyre gabimeve, por dhe rrugët për të dalë nga gjendja në të cilën jemi, pra një situatë jo normale.

Jemi mbledhur për pjesën teorike dhe atë praktike, për të parë argumente dhe gabime, për të dëgjuar arbitrat se pse kanë gabuar në situata të ndryshme. Më pas është pjesa jonë, pjesa e instruktorëve, për të dhënë rrugët e daljes, për të dhënë instrumentet të cilët arbitrat duhet të kenë tash e tutje, duke filluar nga dita e nesërme në ndeshjet e Kupës, për të pasur një rikthim në performancat normale“, përfundon Jareci. /abcnews.al

1-7.jpg
Veronik Istrefaj17:56 | 10/02/2020

FSHF ka organizuar një mbledhje sot, ku janë diskutuar disa tema interesante. Qeveria e Futbollit Shqiptar do iu propozojë klubeve shqiptare krijimin e dy kampionateve të reja kombëtare, me grup-mosha U-13 dhe U-21. Gjithashtu, u publikua dhe data e Asamblesë së Zakonshme, që do të mbahet me datë 9 prill. Premio prej 15 mijë eurosh është shpërndarë për Shqipërinë Futsallë, që u kualifikua në Ellite Round.

Njoftimi i FSHF-së:

“Sot, më datën 10 shkurt, është mbajtur në ambjentet e Federatës së Futbollit mbledhja e zakonshme e Komitetit Ekzekutiv nën drejtimin e Presidentit Armand Duka. Në këtë mbledhje u vendos zhvillimi i Asamblesë së zakonshme të FSHF dhe rendi i ditës, që do të mbahen më datën 9 Prill në Tiranë.
Ndër të tjera, Komiteti Ekzekutiv i Federatës së Futbollit, vendosi që të ndajë një premio prej 15 mijë Euro për Ekipin Kombëtar të Futsalit, si një vlerësim i merituar pas suksesit të tyre në kalimin e turit në Elite Round.

Komiteti vendosi të diskutojë në mbledhjen e radhës dy propozime të rëndësishme për organizimin e Kampionatit Kombëtar U-13 dhe U-21, pasi këto propozime të diskutohen nga ana e Federatës së Futbollit edhe me klubet. Në këtë mbledhje, Komiteti u informua lidhur me ecurinë e menaxhimit të Air Albania Stadium, si dhe me ecurine e punimeve tek Shtëpia e Futbollit.”/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono