FSHF

armand-duka.jpg
G. P.20:31 | 19/08/2019

Kreu i Federatës Shqiptare të Futbollit, Armand Duka shprehet optimist për një sezon me shumë rivalitet. Ndërkaq, mbetet në pritje të kryeministrit Rama për premtimin e dhënë në fund të korrikut.

Finalja e Superkupës, e ka ngrohur jo pak presidenti e FSHF-së, për pritshmëritë e sezonit që sapo ka nisur. Adrenalina dhe golat e finales së Superkupës i kanë shtuar një besim shumë të madh për një kampionat shumë kompetitiv, jo vetëm me Partizanin e Kukësin, por edhe me 8 të tjerat. Për mikrofonin e RTSH, Presidenti Duka shpreh pritshmëri të larta sezonale.

E ndërkaq, mbetet në pritje të premtimit publik të Kryeministrit Rama në lidhje me kalimin në parlament të paketës së Ligjeve për sportin, përfshirë Ligjin e Sponsorizimit.

Shtatori thuajse erdhi dhe Duka së bashku me komunitetin sportive presin fjalën e Ramës të miratojë ligjet. Dhe në aspektin institucional, për efekt të vetë Dukës në mes, por edhe aspektit sensitiv për sportin, këto ligje mund të jenë të vetmet të cilat Presidenti i Republikës mund ti dekretojë menjëherë pa i kthyer sërish në Parlament./ABC News Albania 24/7

fshf-1280x720.jpg
Sej rie17:00 | 03/08/2019

Federata Shqiptare e Futbollit do të përcaktojë javën e ardhshme se çfarë do të bëjë me Superligën dhe me klubet që duhet të marrin licencimin. Me shumë gjasa, kampionati do të shtyhet

Një vendim pritet për pak ditë.

Komiteti Ekzekutiv i Federatës Shqiptare të Futbollit, sipas të gjitha gjasave, do të mblidhet javën e ardhshme për të shqyrtuar fatin e disa klubeve dhe të Superligës.

Gjithsesi, përpara mbledhjes së Komitetit, do të jetë një tjetër mbledhje e rëndësishme, ajo e Komisionit të Licencimit, që pritet të mbahet në 7 Gusht.

Atë ditë do të diskutohen dokumentet e klubeve për licencimin, dhe bëhet fjalë për 4 emra të njohur si Tirana, Vllaznia, Flamurtari e Luftëtari, që dorëzuan dokumentacionin deri në 31 Korrik.

Burime në Federatë deklaruan se klubet kanë probleme, dhe nuk dihet nëse do t’u jepet licencimi, por nuk treguan me hollësi gjendjen e secilit klub.

Besohet se më keq është Flamurtari që nuk ka bërë lëvizje, ndërsa Tirana mund të ketë pengesë të madhe detyrimin nga ish-presidentit Metush Seferi.

Po ashtu, pritet që Komiteti Ekzekutiv të merret me rastin e Skënderbeut, i cili ka marrë edhe një paralajmërim nga FIFA për të paguar gjobën prej 1 milionë eurosh, sipas dënimit të konfirmuar në KAS.

Klubi korçar deklaron se e ka dërguar çështjen në Gjykatën Federale të Zvicrës, por afati i lënë nga FIFA mësohet se përfundon përpara nisjes së sezonit, ndryshe do të ketë dënim me heqjen e 6 pikëve në renditje.

Do të mbetet apo jo Skënderbeu në Superligë?

Kjo nuk mund të thuhet me siguri, edhe pse gjasat janë që edhe mund të qendrojë.

Kjo mund të anulonte planin për kthimin e Dinamos në Kategorinë Superiore.

Burime pranë klubit kryeqytetas bëjnë me dijë se ky ishte plani B, pra në rast se Skënderbeu rrëzohej, dhe parashikonte që të vinin lojtarë nga Korça tek Dinamo, të cilët do të vazhdonte t’i paguante presidenti Takaj, ndërsa lojtarët dinamovitë do t’i paguante familja Nuri.

Me shumë mundësi, Komiteti Ekzekutiv i Federatës do të shtyjë kampionatin, pasi kanë mbetur më pak se 20 ditë deri në nisje të tij, problemet janë të shumta, dhe ende nuk është hedhur as shorti./ABC News Albania 24/7

FSHF-BASHKITE-FUSHAT-E-FUTBOLLIT.mpg_snapshot_00.09-1280x720.jpg
ent ela15:50 | 27/07/2019

Fedetrata Shqiptare e Futbollit ka në plan të ndërtojë 30 fusha në kryeqytet. Projekti I është dërguar Bashkisë, ndërsa pritet një përgjigje edhe nga kryeministri Rama.

Në rrethina luhet, por me humbje të madhe kohe. Vetë Tirana, kryeqyteti i Shqipërisë, ka gjithnjë e më pak fusha, dhe Federata Shqiptare e Futbollit ka menduar për një investim që ta ndryshojë gjendjen.

Burime në institucion bëjnë me dijë se projekti parashikon ndërtimin e 30 fushave në të qytetin më të madh të vendit, me një kosto të përgjithshme prej 6 milionë eurosh.

Mes terreneve që janë projektuar të bëhen funksionalë, janë fusha në Qytetin Studenti, Aneksi I ish-stadiumit “Qemal Stafa”, Aneksi i stadiumit “Selman Stërmasi”, fusha tek “Ali Demi”, së cilës për momentin i është ndryshuar destinacioni, si dhe terrene në Laprakë, Kombinat apo lagje të tjera.

Federata e ka dërguar në Bashki projektin e saj, me kërkesën që organi i qeverisjes vendore të gjejë hapësira për disa nga fushat që duhen ndërtuar.

Deri tani, sipas burimeve në “qeverinë e futbollit”, nuk ka një përgjigje pozitive, ndërsa institucioni I kryesuar nga presidenti Duka ka edhe një shpresë të fundit.

Pritet që të ketë “dritë jeshile” nga kryeministri Rama, ndonëse ky i fundit ende nuk ka mbajtur fjalën e dhënë në Tryezën për reformën në sport, zhvilluar në muajin mars të këtij viti.

Përveç Tiranës, Federata Shqiptare e Futbollit ka në plan t’u propozojë të gjitha bashkive në vend që të krijojnë projekte të përbashkëta për infrastrukturën, me qëllim shtimin dhe përmirësimin e terreneve në Shqipëri. /ABC  News Albania 24/7

edvin-libohova.jpg
G. P.20:01 | 26/07/2019

Kampionati shqiptar i futbollit mund te shtyhet sipas zv/presidentit të Federatës Shqiptare të Futbollit, Edvin Libohova. Klubet shqiptare janë në kolaps financiar dhe nuk mund të përmbushin kërkesat e vendosura nga qeveria e futbollit në vend.

Kampionati vijon të mbetet ende i pakonturuar në një kohë që lëvizjet më të fundit tregojnë se këtë radhë nuk ka më shpatulla, miq, apo amnisti. Disa nga klubet e elitës, janë në një kolaps financiar dhe kjo ka bërë që situatat të përshpejtohen. Edhe pse me fare pak përfaqësues në një mbledhje të sotme të Ligës Profesioniste ende nën çatinë e FSHF-së, sërish nuk ka një zgjidhje konkrete.

Tashmë topi kalohet në oborrin e kabinetit qeveritar për të pritur zgjidhje rreth paketës ligjore të propozuar tre muaj më parë dhe që ende nuk po merr jetë zbatimi, por edhe bazë ligjore të miratuar nga institucionet. Shtyrja e kampionatit është një opsion, por gjithsesi, sipas Edvin Libohovës pritet drafti i qeverisë, gjatë këtyre ditëve, që më pas të dilet me një vendim të vetë FSHF-së me ligën brenda saj.

Në mbledhjen e sotme ishin të pranishëm fare pak drejtues klubesh. Dhe më konkretisht  presidentët e Teutës, Laçit, Tiranës, Bylisit dhe juristi i Partizanit, ndërkohë që të tjerët mungonin. Është kohë vape, por edhe nxehtësi e theksuar e reflektuar në lëvizjen e klubeve për të formalizuar anët e tyre, si parakushte për nisjen e sezonit të ri.

FSHF kanë vënë afat dhe java e ardhshme do të vendosë, edhe pse sot vëmendja është spostuar edhe në lëvizjet e institucioneve të shtetit, për paketën e propozuar nga futbolli dhe që do të ishte një korsi e re për klubet në ristrukturimin e plotë financiar e fiskal të tyre./ABC News Albania 24/7

FSHF-KLUBET-RREZIKU.mpg_snapshot_00.01-1280x720.jpg
ent ela15:30 | 25/07/2019

Federata Shqiptare e Futbollit pritet të veprojë seriozisht me klubet që nuk do të shlyejnë borxhet. Burime brenda saj pohojnë se ka rrezik për Flamurtarin, ndërsa Tirana e Vllaznia kanë nisur pagesat.

Premtohet se ky vit do të jetë ndryshe. Federata Shqiptare e Futbollit mesa duket ka ndërmend ta cilësojë 2019-ën si vitin Zero për zbatimin e rregullave financiare, dhe burime brenda saj pohojnë se klubet që nuk do të jenë në rregull në 31 korrik, nuk do të pranohen në kampionat.

Pavarësisht skenarëve që publikohen ditë pas dite, pritet që edhe emrat më të njohur t’i nënshtrohen kontrollit, ndonëse të paktën dy prej tyre kanë nisur të veprojnë.

Tirana ka bërë pagesa në organet tatimore prej mbi 200 milionë lekësh të vjetër, si dhe ka nisur shlyerjen mujore prej mbi 20 milionësh.

Gjithsesi, muajt e fundit, klubi bardheblu nuk ka paguar në tatime, duke pritur edhe një falje të mundshme nga ana e qeverisë, sipas premtimit të kryeministrit Rama në tryezën me sportin.

Nga rreth 1 miliardë lekë të vjetër që tiranasit i detyrohen shtetit, vetëm 400 milionë janë detyrimi principal, ndërsa pjesa tjetër janë gjoba dhe kamatëvonesa.

Vllaznia po ashtu ka nisur shlyerjet e detyrimeve.

Sipas burimeve në Federatë, rreziku më i madh i kanoset Flamurtarit, I cili nuk ka bërë ende asnjë veprim, të paktën sipas këtyre burimeve.

E vështirë edhe gjendja e Luftëtarit, presidenti i të cilit Tavo dha dorëheqjen pak ditë më parë.

Në Federatë pohojnë se gjendja u bë edhe më e vështirë, pasi kryeministri Rama nuk mbajti premtimin për të miratuar ndryshimet ligjore për sportin në muajin qershor, gjë që ndodhi pas acarimit të situatës politike.

Përsa i përket Skënderbeut, nuk dihet nëse do të ketë ndonjë vendim të Komisionit të Etikës, pas konfirmimit nga KAS të dënimit të UEFA-s, ndonëse korçarët kanë bërë me dije se do ta ndjekin çështjen në Gjykatën Federale në Zvicër.

Burime pranë klubit pohojnë se presidenti Takaj mund të presë të paktën edhe një vit, deri në shqyrtimin e çështjes, ndërsa mund ta mbajë pa problem ekipin në Superligë me 350 milionë lekë të vjetër të dhënë nga Bashkia, dhe me një buxhet të vetin, kuptohet shumë më të vogël se vitet e tjera. / ABC News Albania 24/7

 

TAGANI.png
Sej rie17:40 | 08/07/2019

Federata Shqiptare e Futbollit do të tolerojë përsëri e do të lejojë që klubet me borxhe të marrin pjesë në Superligë. Ish-administratori i Tiranës, Salih Tagani, flet pas vendimit të Komitetit Ekzekutiv.

Vendimi ishte vërtet i rëndë.

Federata Shqiptare e Futbollit, nëpërmjet Komitetit Ekzekutiv, u vuri klubeve kufirin tek thana për borxhet, duke u lënë afat deri në 31 Korrik, ndryshe i pret përjashtimi.

Tirana, Vllaznia, Flamurtari e Luftëtari janë të rrezikuarit, dhe ish-administratori I Tiranës, Salih Tagani, tregon se çfarë duhet të bëjnë klubet.

Tagani: “Këto janë masa shtërnguese pak a shumë për klubet, por nëse këto do të fillojnë të zbatohen me kalimin e viteve do të jenë lehtësuese për klubet sepse do t’i vënë klubet në shina. Afati është shumë i ngushtë dhe nuk mundet që borxhe të krijuara prej vitesh të likujdohen për periudhë muajsh. Për ekipet që janë SHA e vetmja pjesë është shitja e një pjese të aksioneve. Nëpërmjet kësaj mund të likujdojnë detyrimet që mund të kenë ndaj palëve të treta. Për ekipet që janë me Bashkitë duhet parë mënyra e privatizimit dhe duhet parë përpara se të kthehen në SHA këto ekipe, likujdimi i këtyre borxheve të merret përsipër nga bashkitë”.

Sa seriozisht e ka këtë herë Federata, që ka toleruar më parë?

Tagani: “FSHF ka pasur përherë një farë tolerimi karshi gjithë klubeve dhe është munduar t’i ndihmojë. Federata pavarësisht se kontrollohet nga UEFA dhe normalisht që ata duhet të jenë korrekt me pjesën e UEFA-s, gjithsesi do të bëjë një farë tolerimi për t’i mundësuar që të marrin pjesë në disa aktivitete kombëtare. Për sa i takon tatimeve nëse shteti merr ndonjë vendim për faljen e detyrimeve dhe kjo do të ishte më e mira pasi sporti këtu tek ne dihet se nuk ka ndonjë fitim”.

Përse janë krijuar kaq shumë borxhe nga disa klube?

Tagani: “Çështja e borxheve është thjesht keqadministrim. Sepse një klub kur bën parashikimin për vitin që do të vijë, fondet që ka në dispozicion, lojtarët që duhet të blejë, kontratat , vlera e kontratave nuk mund të shkojë përtej limiteve të veta. Nëse një klub do t’i respektonte kontratat atëherë nuk kishte pse të rriteshin borxhet”.

Gjithsesi, ekziston rreziku për kalimin në administrim, pra për falimentim.

Tagani: “Çështje të klubeve që vijnë direkt nga UEFA dhe UEFA investigon për mënyrën se si kanë shkuar këto proçese, atëherë nuk mbetet gjë tjetër veçse të zbresin në kategori. Po zbrite në katagori hum interesi dhe humbet vlera si ekip. Praktikisht fillon dhe shkon drejt dështimit, shpresoj që të mos ndodhi”.

Problem i madh ligji i sponsorizimeve, ku Shqipëria fal 4 për qind, e Kosova 30 për qind.

Tagani: “Nuk kam çfarë flas, flasin shqifrat. Një shtet që nuk i kushton rëndësi sportit ka humbur një vlerë të madhe”./ABC News Albania 

arben-dervishaj.jpg
G. P.22:59 | 25/06/2019

Anëtari i Komitetit Ekzekutiv në FSHF, Arben Dervishaj i ftuar në emisionin “Pressing” premtoi se “Arena Kombëtare” do të jetë gati për ndeshjen Shqipëri-Islandë. Sa i përket stadiumit të skuadrës së Kukësit, Dervishaj zbuloi se projekti është gati dhe pritet të arrihet marrëveshja me bashkinë.

Impianti i ri që po ndërtohet “Arena Kombëtare” pritet të jetë gati për ndeshjen Shqipëri-Islandë, të paktën kështu thekson anëtari i Komitetit Ekzekutiv në FSHF-së, Arben Dervishaj. Në studionin e emisionit “Pressing”, Dervishaj zbulon edhe koston totale të projektit më të rëndësishëm futbollistik në Shqipëri.

Një tjetër impiant pritet të ndërtohet në Kukës aty ku skuadra verilindore do të luajë ndeshjet e saj. Sipas Dervishajt, projekti është gati dhe pritet të nisë punimet në momentin që do të gjendet gjuha e përbashkët me bashkinë e këtij qyteti.

Punimet po vijojnë me ritme të larta edhe në selinë e re të FSHF-së, kostoja e së cilës arin shifrën e 10 milionë eurove. Ndër të tjera, anëtari i Komitet Ekzekutiv në FSHF, Arben Dervishaj, premton se Federata Shqiptare e Futbollit ka në projekt ndërtimin e 30 fushave të tjera sportive./ABC News Albania 24/7

gjini.jpg
G. P.16:30 | 03/06/2019

Federata Shqiptare e Futbollit njofton zyrtarisht klubet e Superligës që nuk morën licencimin për në Europë. Gjysma e skuadrave u vlerësuan negativisht, përfshi edhe emra të njohur si Flamurtari apo Tirana.

Ishte një sekret që dihej nga të gjithë. Federata Shqiptare e Futbollit I dha më në fund zyrtarizimin, asaj që ishte mësuar prej kohësh, pra që vetëm 5 klube të Superligës morën licencimin për pjesëmarrje në kupat e Europës.

Eduard Gjini, shef i licencimit në Federatë, dha të dhënat, duke theksuar se klubet duhej të përmbushnin kriterin sportiv, kriterin e infrastrukturës, kriterin e administratës së personelit, kriterin ligjor, dhe kriterin financiar.

“Pesë skuadra e morën licencën për të luajtur në UEFA Competition, Partizani, Kukësi, Teut, Skënderbeu dhe Laçi. U refuzuan pesë skuadra të tjera, të cilët ishin, Tirana, Flamurtari, Luftëtari, Kastrioti dhe Kamza. Tre skuadra nuk janë licencuar për shkak të financave, Flamurtari, Luftëtari dhe Tirana. Kastrioti nuk e ka marrë licencën se nuk kishte stadium ku të luante”, tha Gjini.

Federata pretendoi se nuk foli zyrtarisht më parë për të mos prishur garën, por duket se vetë klubet u kujdesën për këtë.

“Kur të mbarojmë kemi në dosje të gjithë dokumentacionin, i cili është firmosur nga të gjithë ekspertët. Ne prandaj nuk folëm. Nëse klubet e deklaruan vetë, është çështje e tyre. Flamurtari ka mundur Kukësin gjatë kohës që e dinte që nuk ishte licencuar. E rrafi Laçin në Vlorë. Mundi Kukësin në Elbasan Arena. Nuk u la gara”, tha Gjini.

Federata nuk sqaroi se cilët klube do të marrin pjesë në Ligën e Europës, por vetëm deklaroi se I kishte dërguar UEFA-s renditjen përfundimtare, ndërsa I takon pikërisht UEFA-s për të vendosur.

Gjithsesi, Partizani do të jetë në Champions, Kukësi e Teuta në Ligën e Europës, të cilëve mund t’u shtohet Laçi, nëse Skënderbeu nuk merr vendim pozitiv nga KAS-i përpara datës së hedhjes së shortit. Gjini sqaroi se Federata ka rritur kërkesat për klubet e Superligës për sezonin e ardhshëm.

“Në rregulloren e re që kemi miratuar, çdo tre muaj klubet janë të detyruara të bëjnë paraqitje të bilanceve dhe ecurisë financiare duke u kontrolluar nga eksperti. Eksperti mundet të propozojë dhe mosdhënien e licencës”, tha Gjini.

Sipas rregullores, klubet duhet të bëjnë paraqitje të bilanceve, dhe ecurisë financiare çdo 3 muaj, edhe kështu mund t’u hiqet licenca Një kërkesë shtesë edhe për infrastrukturën.

“Në rregulloren e sivjetshme është kërkuar klubeve të Superiores, i ëhstë kërkuar edhe një stadium alternativ në rast se ka fatkeqësi natyrore, të kenë një stadium fiks alternativ”, tha Gjini.

Për sezonin e ri, klubeve në Superligë u është kërkuar një stadium alternativ fiks. Federata mbetet në në monitorim 3-vjeçar nga UEFA pas asaj që ndodhi 2 vjet më parë me Tiranën, kur FSHF e dha licencimin, por UEFA zbuloi parregullsi./ABC News Albania 24/7

fshf-1280x728.jpg
Sej rie14:00 | 29/05/2019

Do të mësohet në 31 maj se cilët klube të Superligës shqiptare e kanë marrë ose jo licencimin për sezonin e ardhshëm. Federata Shqiptare e Futbollit informon se të premten do të mbahet një konferencë për shtyp, në selinë e saj, nga Komisioni i Licencimit, që do të japë rezultatet zyrtare të këtij procesi. Në këtë konferencë pritet të dalë shefi i sektorit të licencimit, Eduard Gjini, dhe të sqarojë se cilët klube do të mund të marrin pjesë në kupat e Europës sezonin e ardhshëm. Nga burime jozyrtare në Federatë mësohet se katër klube nuk e kanë marrë licencimin, pikërisht Tirana, Flamurtari, Luftëtari dhe Kastrioti. Konferenca për shtyp në Federatë do të jetë pas përfundimit të ndeshjeve të javës së 36-të të Superligës, pra kur të jetë përcaktuar renditja. Nga informacioni që do të japë Federata, pritet të ketë ndryshime në mundësinë për kualifikim në Europë, pavarësisht sesi do të jetë klasifikimi./ABC News Albania 24/7

jareci.jpg
G. P.18:30 | 28/05/2019

Dizenjatori i arbitrave në FSHF, Sokol Jareci zbuloi se sistemi VAR do të instalohet shumë shpejt edhe në Shqipëri. Sipas Jarecit, teknologjia do të jetë gati për sezonin 2021-2022.

I ftuar në emisionin “Pressing” në ABC News, dizenjatori i arbitrave në Fshf, Sokol Jareci bëri një deklarate të bujshme rreth instalimit të sistemit VAR në kampionatin shqiptar.

Jareci shpjegon se të martën do të bëhet hapi i parë, duke aplikuar në FIFA ndërkohë që do të kontaktohet nëpërmjet një videocall me zyrtarët e IFABIT të cilët pak ditë më parë sollën një email rreth kërkesave që duhet të bëjmë për sistemin VAR.

Sipas dizenjatorit të arbitrave në FSHF, procedurat kërkojnë rreth një vit e gjysmë kohë dhe sistemi VAR do të jetë gati në Shqipëri për sezonin 2021-2022. Jareci shpjegon si do të aplikohet fillimisht sistemi VAR në kategorinë superiorë./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono