franca

parlamenti-europian.jpg
G. P.15:54 | 16/07/2019

Sot në orën 18:30 do të zhvillohet votimi për kandidaten për presidente të Komisionit Europian. Për t’u konfirmuar në krye të këtij Komisioni, kandidatja Ursula von der Leyen duhet të marrë shumicën e votave të Parlamentit Europian. Në debatin që është zhvilluar eurodeputetët duken të ndarë në qëndrimin e tyre.

Parlamenti Europian është treguar tërësisht i përçarë para kandidates të përzgjedhur nga liderët europianë për presidente të Komisionit Europian, Ursula von der Leyen. Fjalimi në seancë plenare i Von der Leyen ishte më i mirë se javën e shkuar, por jo mjaftueshëm bindës për përballjen e sfidave që Bashkimi Europian ka përpara për 5 vitet e ardhshme. Masat e propozuara nga Von der Leyen për ndryshimet klimaterike janë thjesht objektiva, por jo aksione, ndërkohë që për Europën sociale dhe një ekonomi të qëndrueshme  ajo është treguar e vagët. E ndërgjegjshme, se rrezikon të mos marrë votën e shumicës së eurodeputetëve, Von der Leyen është munduar të nxjerrë në pah aspektin human.

Ursula von der Leyen, kandidate për presidente të Komisionit Europian: Ne duhet të përpiqemi më shumë për ndryshimet klimaterike. Një qasje me dy etapa nevojitet për reduktimit me 50% në mos 55% të ndotjeve të dioksidit të karbonit në vitin 2030. Ne jemi krenarë për ekonomikë tonë, duam ta forcojmë atë, por ka gjithashtu një logjikë të thjeshtë në këtë. Nuk janë qytetarët që i shërbejnë ekonomisë tonë, por ekonomia që i shërben qytetarëve tanë. Për modelin tonë të ekonomisë sociale, ne duhet të gërshetojmë aspektin e tregut me aspektin social. Jam në favor të një rroge minimale në Europë dhe për një taksim të drejtë. Do të propozoj një pakt të ri për migracionin dhe azilin, duke përfshirë edhe rilançimin e reformës së Dublinit. Kjo do të na mundësojë rikthimin në një zonë Shengen tërësisht funksionale të lëvizjes së lirë që përbën çelësin për prosperitetin, sigurinë dhe lirinë tonë. 4 vjet më parë unë prita një refugjat nga Siria në shtëpinë time. Ai nuk fliste gjermanisht dhe ishte tërësisht i brengosur nga situata e luftës civile në Siri. Sot, 4 vjet më pas, ai flet shumë mirë gjermanisht. Është një lider i komunitetit të tij për arsimin gjatë ditës  dhe një student i shkollës së lartë në mbrëmje.

Edhe pse Urusla von der Leyen intrigon si një kandidature femër për herë të parë në krye të Komisionit Europian, nuk bind ende të zgjedhurit e popullit. Ata i kanë rezervuar asaj një breshëri kritikash. Përveç grupimit të Partive Popullore Europiane dhe të pesë yjeve, grupimet e tjera jo vetëm që kanë vendosur pikëpyetjen për votën pro, por disa prej tyre kanë shprehur hapur votën e tyre kundër. Grupimi i gjelbër, i të majtës radikale kanë deklaruar se nuk do të votojnë Ursula von der Leyen, ndërkohë që socialdemokratët janë në mëdyshje.

Manfred Weber, kryetar i PPE-së: Liderët europianë kanë dëmtuar procesin demokratik të përzgjedhjes së kandidatëve ditët e fundit, por nuk besoj, se mund t’i rregullojmë gjërat, duke shkaktuar një dëm edhe më të madh. Europa duhet të jetë e zonja të veprojë tani. Europa duhet të jetë stabile. Ndaj, siç grupimi im mbështeti presidentin e ri të Parlamentit Europian, David Sassoli, ashtu pres nga grupimet e tjera, që të mbështesin si ne Ursula Von der Leyen në krye të Komisionit Europian.

Iratxe García Pérez, kryetare e S&D: Ne jemi këtu për t’ju dëgjuar dhe nuk synojmë ta çojmë Europën drejt një krize institucionale aq më pak kur Europa ka nevojë për ndryshime të mëdha. Por ne duam të sigurohemi, se Europa do të jetë e zonja që të ndërmarrë masat që nevojiten të merren. Ndaj, grupimi ynë do të marrë një vendim këtë pasdite duke menduar se cila është zgjidhja më e mirë për Europën.

Dacian Ciolos, kryetar i Reniew (liberalët): Nëse ju do konfirmoheni në krye të Komisionit Europian dhe shpresoj që kjo të ndodhë, ju shpesh do dëgjoni, që shumë ndryshime nuk mund të bëhen. Por ne kemi nevojë për këto ndryshime, për një Europë më të drejtë, më të qëndrueshme dhe në respekt të klimës.

Philipe Lamberts, kryetar i Greens: Ju folët për paktin për emigracionin. Ky pakt ekziston dhe është votuar nga shumica e Parlamentit Europian. Mos të bëjmë sikur po shpikim gjëra të reja. Merr propozimin tonë dhe lufto për të në Këshillin e Ministrave. Për shtetin ligjor, gjuha juaj është e fortë, por propozimet mbeten shumë të vagëta. Ne duhet të respektojmë shtetin ligjor kudo dhe jo të tolerojmë dhunimin e lirive europiane dhe të ndarjes së pushteteve në disa shtete anëtare siç është rasti i Hungarisë dhe Polonisë. Ne na duhet një ndryshim total për klimën, Europën sociale dhe ambientin, ndërkohë që ajo që propozoni juaj është një ndryshim në sipërfaqe me ide të vagëta. Ju e kuptoni që grupimi i gjelbër tani nuk mund t’ju mbështesë.

Jörg Meuthen: Kam respekt për ju si person, por ne e kemi shqyrtuar me kujdes letrën tuaj dhe konsiderojmë, se ju nuk përmbushni kriteret për këtë post. Së pari, ne gjermanët, kemi parë eksperiencën tuaj si ministre e Punës për Çështjet Sociale, apo ministre e Mbrojtjes. Në asnjë prej këtyre posteve nuk i keni shërbyer interesit të qytetarëve gjermanë dhe as keni qenë në lartësinë e punës. Nuk dua të bëj një listë të të gjitha dështimeve tuaja, por ju jeni një politikane tipike që bën premtime boshe me qëllimin e vetëm për të arritur shumicën e votave në Parlamentin Europian. Ne nuk shohim asnjë tregues që ju mund ta bëni më mirë detyrën e presidentes së Komisionit Europian, se detyrat tuaja të mëparshme. Ndaj vota jonë është kundër.

Rafaelle Fitto, bashkëkryetar i grupimit ECR: Ka sërish disa çështje, ku ne presim të kemi përgjigje të qarta nga ju. Kjo do të na ndihmonte që të marrim një vendim në fund të pasdites.

Martin Schirdewan (GUE): Mendoj, se vizioni ynë për Bashkimin Europian, si një Europë sociale, e bazuar në drejtësi, paqe dhe respekt për klimën nuk përputhet me vizionin që parashtruat para nesh. Ndaj, fatkeqësisht, vota jonë do jetë kundër.

Nigel Farage: Ajo që keni parë sot është një tentativë për Bashkimin Europian për të kontrolluar çdo aspekt të jetës tonë. Von der Leyen do që të ndërtojë një Bashkim Europian të centralizuar, jodemokratike, të vjetërsuar të komunizmit. Me këta njerëz, brenda 5 vjetësh, Europa e mbrojtjes do të plotësohet. Do të shërbejë për mbrojtje, por edhe mund të përdoret për sulm. Dhe ju nuk do të mund ta kontrolloni këtë si Parlament Europian. Votoni kundër kësaj kandidature.

Votimi për kandidaten për presidente të Komisionit Europian do të kryhet në orën 18:00 dhe pritet të bëhet publik në 19:30. Për t’u konfirmuar në krye të Komisionit Europian, Ursula von der Leyen duhet të marrë shumicën e votave të Parlamentit Europian. Në rast të kundërt, vendimi kthehet mbrapsht në tryezën e liderëvë europianë për një tjetër kandidaturë./ABC News Albania 24/7

franca.jpg
G. P.12:55 | 15/07/2019

Kryeqyteti serb është bllokuar dhe njëkohësisht zbukuruar me flamuj serbë dhe francez në pritje të presidentit Macron. Kreu i shtetit francez do të qëndrojë në Beograd në kuadër të vizitës dy ditore.

Serbia është gati për të pritur presidentin francez, Emmanuel Macron. Një nga stolisjet e rralla të qytetit më flamujt trengjyrësh, serb dhe francez. Policia u ka kërkuar falje qytetarëve pasi do të ketë siguri maksimale për arritjen e mikut nga Parisi.

Këtë pritje Serbia ia dedikon miqësisë me Francën, por edhe pritjeve politike që i ka pasi do të flitet për Kosovën. Mijëra policë do të kujdesën për sigurinë e tij, kurse Macron pritet të arrijë në Beograd nga Rusia pasdite. Beogradi shpreson mbështetje për në BE dhe rifillimin e dialogut me Prishtinën.

Marko Savkoviç, është analist i një instituti politik. Porositë nuk do të jenë konkrete, por vizita është e rëndësishme.

Marko Savkoviç, fondi beogradas për politika të veçanta: Franca duket se i është përgjigjur thirrjes së Gjermanisë për një angazhim më të madh sa i përket Kosovës. Por, ka qenë kundërshtare e zgjerimit si të tillë. Natyrisht që do të ketë përpjekje për dialogun, por Franca e konsideron vetën superfuqi globale dhe besoj se do të ketë qëndrim autonom pavarësisht qëndrimeve të disa vendeve Perëndimore.

Presidenti Francës në kryeqendrën serbe do të ketë një agjendë të ngjeshur. Në Pallatin e Serbisë për disa orë e më pas edhe vizita në përmendoret dhe vendet që shënojnë historinë e përbashkët francezo-serbe.

Ditën e ditë ai pritet të jetë bashkë me disa student dhe aktivist të një qendre rajonale. Kjo vizitë konsiderohet e rëndësishme për shkak të përfshirjes së Macron në proceset e Ballkanit, por edhe pasi është vizita e parë e një presidenti pas dy dekadash./ABC News Albania 24/7

bastille.jpg
G. P.18:22 | 14/07/2019

Në Francë është përkujtuar të dielën Dita e Bastijës, një nga momentet kulmore të revolucionit francez. Këtë vit në paradën ushtarake kanë marrë pjesë edhe trupa të huaja për të treguar unitetin e bllokut europian. Në fjalimin e mbajtur, presidenti Macron tha se synimi i tij është ndërtimi i një Europe të sigurtë.

Liderët europianë, përfshirë kancelaren gjermane Angela Merkel u bashkuan të dielën me presidentin francez Emmanuel Macron për paradën e Ditës së Bastijës, që këtë vit nderoi bashkëpunimin ushtarak europian.

Pasi përshkoi bulevardin ikonë Champs-Elisee në bordin e një automjeti ushtarak të shoqëruar nga motoçikletat dhe trupat ushtarake, Macron u bashkua me liderët e huaj, me të cilët ndoqi paradën tradicionale, që këtë vit nisi me prezantimin e mjeteve teknologjike.

Mes objekteve të prezantuara kishte dronë, automjete autonome në miniaturë, ushtarë të armatosur me armë anti-dronë dhe një ushtar fluturues, siç ishte rasti i një efektivi që u ngjit në ajër me një mjet të vendosur tek këmbët.

Rreth 4 mijë e 300 ushtarë, rreth 200 automjete dhe mbi 100 mjete ajrore morën pjesë në paradën që këtë vit u hap nga trupat spanjolle. Në fjalën e tij drejtuar popullit francez, Macron e vuri theksin tek zotimi i parevokueshëm i Francës për të konsoliduar sigurinë franceze dhe atë europiane.

“Europa sot është më e nevojshme se kurrë më parë. Ndërtimi i një Europe të mbrojtur me Aleancën e Atlantikut të Veriut është prioritet i Francës dhe tema e kësaj parade”, deklaroi Macron.

14 Korriku përkujton bastisjen e burgut të Bastijës në vitin 1789, që është dhe një nga momentet kyçe të Revolucionit Francez, e kthyer në ditë pushimi kombëtar në Francë./ABC News Albania 24/7

facebook.jpg
G. P.18:35 | 11/07/2019

Qeveria franceze ka vendosur të taksojë gjigandët amerikanë të teknologjisë si Google dhe Facebook, duke shpërfillur kërcënimet e Shteteve të Bashkuara për rritjen e tarifave në shenjë hakmarrjeje.

Franca ka aprovuar vendosjen e taksës për shërbimet dixhitale pavarësisht kërcënimeve për hakmarrje të bëra nga Shtetet e Bashkuara, që e cilësojnë taksimin të padrejtë. Taksa prej 3 për qind do të vendoset për shitjet që gjenerohen në Francë nga kompani shumëkombëshe si Google dhe Facebook.

Qeveria franceze ka argumentuar se firma të tilla me seli jashtë vendit paguajnë pak ose aspak taksa. Nga ana e tyre, Shtetet e Bashkuara kanë urdhëruar nisjen e një hetimi ndaj kësaj lëvizjeje, që mund të çojë në rritjen e tarifave.

Taksa e re u aprovua nga senati francez ditën e enjte, një javë pasi ishte miratuar nga Asambleja Kombëtare. Sipas rregullores së re, çdo kompani dixhitale me të ardhura që arrijnë mbi 750 milionë euro, 25 milionë prej të cilave gjenerohen në Francë, do të jenë subjekt i taksimit.

Aplikimi i saj do të përfshijë edhe muajt e parë të 2019-s dhe pritet që deri në fund të vitit të arrijë në 400 milionë euro. Aktualisht, kompanitë paguajnë fare pak ose aspak taksa në vendet ku nuk kanë një prani të gjerë fizike dhe përfitimet e tyre i deklarojnë në vendet ku kanë selitë.

Komisioni Europian vlerëson se ndërsa bizneset tradicionale duhet të paguajnë mesatarisht 23 për qind të përfitimeve të tyre si taksa, kompanitë e internetit paguajnë vetëm 8 ose 9 për qind./ABC News Albania 24/7

raketa.jpg
G. P.23:35 | 10/07/2019

Qeveria franceze është gjendur në një pozitë të vështirë kur raketa të ushtrisë së saj janë gjetur në një bazë rebelësh në Libi. Duke reaguar, Parisi zyrtar është justifikuar duke thënë se raketat nuk ishin të destinuara për grupet rebele që po përpiqen të rrëzojnë qeverinë legjitime të Libisë.

Qeveria franceze ka mohuar zërat se ka shkelur embargon e OKB-së për armët pasi katër raketa anti-tank të prodhimit francez u gjetën në një bazë që i përket një gjenerali libian.

Ministria franceze e Mbrojtjes deklaroi se raketat ishin të papërdorshme dhe nuk do të binin në duart e asnjë grupi rebel që kundërshton regjimin libian të njohur nga Perëndimi. Sidoqoftë, baza ku u gjetën raketat ndodhet në jug të Tripolit dhe përdoret nga forcat besnike të gjeneralit Khalifa Haftar, të cilat aktualisht po luftojnë për marrjen e kryeqytetit.

Beteja për Tripolin nisi kur trupat e gjeneralit Haftar i dhanë jetë një ofensive në muajin prill, duke bërë që prej atëherë të vriten disa qindra persona. Katër raketat u zbuluan në qershor, kur njësitë ushtarake të qeverisë së mbështetur nga OKB kontrolluan kampin.

Përmes një deklarate të bërë të mërkurën, Parisi zyrtar pranoi se raketat, që mund të përdoren kundër tankeve dhe mjeteve të tjera, i përkasin ushtrisë franceze. Por shtoi se ato ishin për të mbrojtur njësitë që ndërmarrin misione të fshehta dhe anti-terrori.

Në komunikatën e qeverisë vijohet më tej se, raketat ishin të dëmtuara, të papërdorueshme dhe ndodheshin në prag të procesit të shkatërrimit. Libia është përfshirë nga dhuna dhe përçarjet që prej vitit 2011, kur lideri historik i saj, Muamar Gadafi mbeti i vrarë nga kryengritësit./ABC News Albania 24/7

emigrante.jpg
G. P.13:07 | 02/07/2019

Franca vijon kritikat ndaj Italisë për sa i përket çështjes së emigrantëve, duke e cilësuar qëndrimin e ministrit të brendshëm Salvini, si të papranueshëm. Ndërsa ky i fundit ka reaguar duke i kërkuar Francës që të mos ofendojë, më por të hapë portet e saj për emigrantët.

Italia nuk është një vend i padenjë, por sjellja e zv/kryeministrit Salvini për sa i përket emigrantëve nuk është e pranueshme. Deklarata u bë nga zëdhënësja e qeverisë franceze. Por reagimi i ministrit të Brendshëm italian ka qenë i menjëhershëm: “Qeveria franceze duhet të ndalojë ofendimet dhe të hapë portet e saj, italianët kanë pranuar më shumë se c’duhet. Anijet e reja me emgrantë do të drejtohen për në Marsejë.”

Zëdhënësja e qeverisë franceze shpjegoi se qeveria italiane nuk ishte në lartësinë e duhur për sa i përket temës së emigrantëve. Edhe pse ajo shton se Italia është një vend i madh në Europë me një histori të përbashkët me Francën. Por Salvini, sipas saj, po fryn një temë të dhimbshme dhe komplekse për të cilën BE dhe Franca kanë treguar solidaritet ndaj Italisë.

Për sa i përket arrestimit të kapitenes së anijes “Sea Uatch 3”, Karola Raket, qeveria franceze shprehet se duhet respektuar drejtësia e një vendi sovran dhe Franca nuk ka ndërmend të kërkojë lirimin e saj./ABC News Albania 24/7

CI0D-LBWEAAwdU4.png
nev ila23:55 | 24/06/2019

Franca pritet të përfshihet në ditët e ardhshme nga një i nxehtë agresiv, me temperaturat që do të kalojnë 40 gradë Celsius. Shërbimi meteorologjik vendas e krahason qershorin me gushtin e vitit 2003, kur thuajse 15 mijë persona humbën jetën për shkak të motit të nxehtë.

Franca po bëhet gati të mbërthehet nga një mot i nxehtë me temperaturat që pritet të shkojnë mbi 40 gradë Celsius më vonë gjatë javës dhe të thyejnë rekordin për muajin qershor.

Temperaturat arritën mbi 35 gradë këtë të hënë dhe pritet që të arrijnë pikun të enjten dhe të premten. Veriu i vendit, përfshirë Parisin, do të jetë zona më e prekur nga vala e të nxehtit. Depozita me ujë do të vendosen në mbarë vendin, ndërsa pishinat publike do të qëndrojnë të hapura deri vonë në kuadër të një plani për t’i bërë ballë motit të nxehtë.

Gjithashtu, në rrugë do të ketë skuadra që do të shpërndajnë shishe uji dhe do të kujdesen për personat e cënueshëm, kryesisht ata të moshës së thyer, pasi temperaturat në Paris mund të arrijnë deri në 47 gradë.

Ndërkohë, edhe Gjermania, Zvicra dhe Belgjika mund të përjetojnë një valë të ngjashme në ditët e ardhshme, por Franca mbetet më e rrezikuara.

Situata po krahasohet me atë të gushtit të vitit 2003, kur thuajse 15 mijë persona humbën jetën. Asokohe, në hapësirën e një muaji temperaturat arritën dhe tejkaluan 44 gradë Celsius më 12 gusht.

Shërbimi meteorologjik francez ka paralajmëruar ndërkohë se temperaturat mund të mos bien deri në fundjavën pasardhëse, me të nxehtin që do të jetë i pranishëm edhe në orët e natës, kur temperatura më e ulët pritet të jetë 20 gradë./ABC News Albania 24/7

analisti.jpg
G. P.15:25 | 04/06/2019

Pas rekomandimit të fundit për fillimin e negociatave me BE-në, pyetja e radhës  është se sa do të jetë e gatshme BE-ja për zgjerimin. Deklarata është bërë nga ambasadori i Francës në Shkup Kristian Timonie. Ndërkaq, në një debat për eurointegrimin, profesorë universitarë nga Shkupi propozuan që Maqedonia e Veriut të ndahet nga pakoja me Shqipërinë në BE.

Profesorë universitarë në Shkup janë të mendimit se Maqedonia e Veriut duhet të ndahet nga paketa me Shqipërinë për fillimin e negociatave për anëtarësim në BE, pasi sipas tyre Shkupi  ka bërë më shumë përpjekje dhe ka më shumë mundësi që të fitojë datë më së voni në fillim të vitit të ardhshëm.

Marjan Gjurovski, profesor universitar: Republika e Maqedonisë së Veriut të ndahet nga pakoja me Shqipërinë, sepse mundësitë për gjendjen e vendit tonë janë më pozitive. Pavarësisht se data do të jetë në qershor ose në fund të këtij viti, fillimi i bisedimeve me BE-në nuk varet nga vendi ynë, duke pasur parasysh atë se ne në këtë moment detyrat tona i kemi plotësuar.

Ambasadori i Francës në Shkup Kristian Timonie, i pyetur rreth datës së negociatave tha se për të do të vendosin vendet anëtare të BE-së.

Kristian Timonie, ambasador i Francës: Sa i përket Francës, presidenti Macron para pak kohësh e prezantoi strategjinë franceze për Ballkanin Perëndimor. Një pjesë të asaj strategjie e kemi vendosur për të ju ndihmuar në përgatitjet e bisedimeve qasëse. Këtu do të mbahet edhe punëtoria e katërt, në kuadër të aktiviteteve që i organizojmë në kornizë të Sekretariatit për Çështje Evropiane, me këtë ndihmojnë që të përgatitet ky institucion për hapjen e bisedimeve.

Këto komente u bënë në debatin akademik “Ndikimi i zgjedhjeve të Bashkimit Evropian ndaj procesit të integrimeve të Ballkanit Perëndimor me vëmendje të veçantë të Republikës së Maqedonisë së Veriut”, në  organizim të Shoqatës Maqedonase të Shkencave Politike dhe rektoratit të Universitetit të Shkupit./ABC News Albania 24/7

13A367DD-D175-4D1B-B13C-47B819770053_cx0_cy7_cw0_w1023_r1_s.jpg
G. P.11:50 | 03/06/2019

Pas takimit me delegacionin franko-gjerman, Presidenti i Kosovës Hashim Thaçi u shpreh se dialogu me Serbinë duhet të vazhdojë pa kushte dhe se taksa ndaj produkteve serbe nuk do të hiqet.

Kreu i shtetit të Kosovës ka kërkuar sërish liberalizimin e vizave duke kërkuar që qytetarët të mos mbahen të izoluar. Ai theksoi se Kosova nuk do të pranojë kushte tjera për liberalizimin e vizave, sidomos jo në shkëmbim të kërkesave për tarifat apo për krijimin e asociacionit e komunave serbe në veri të vendit.

Pas takimit me Thaçin, delegacioni ndodhet në takim me kryeministrin e Kosovës Ramush Haradinaj. Gjatë ditës është parashikuar edhe takimi me kryeparlamentarin Kadri Veseli./ABC News Albania 24/7

franca-1280x720.jpg
Sej rie20:45 | 23/05/2019

Franca mbështet hapjen e negociatave të anëtarësimit me Maqedoninë e Veriut. Ambasadori francez në Shkup ka deklaruar se vendi ka bërë progres dhe se presidenti Emanuel Makron ka folur qartë sa i takon së ardhmes europiane të Ballkanit.

Vetëm disa ditë para publikimit të raportit të vendimeve të mëdha me ritme të shpejta e përgatisim administratën, sepse ajo duhet të jetë pasqyrë e administratës evropiane, deklaroi sot zëvëndëskryeministri për çështje evropiane Bujar Osmani. Osmani theksoi se jokonsolidimi i institucioneve ka qenë kryesisht për shkak të paparashikueshmërisë së vendit, tani Maqedonia ka të ardhme të parashikueshme, nuk është pyetja a do të ndodhë, por kur do të jetë Republika e Maqedonisë së Veriut pjesë e familjes evropiane.

 Për ambasadorin francez Kristijan Timonie është e rëndësishme të bashkohen të gjitha palët e ndryshme politike në ndërtimin e të ardhmes së përbashkët evropiane, edhe Bashkimi Evropian ballafaqohet me vështirësi, por ne jemi gjithmonë në anën tuaj.

Kristijan Timonie, ambasador i Francës: “Franca angazhohet me të vërtetë dhe e publikoi strategjinë e saj për vendet e Ballkanit perëndimor, ku Maqedonia e Veriut e ka vendin e vet. Maqedonia zë vend të rëndësishëm të asaj strategjie, konkretisht do të fillojmë më mbështetje, së shpejti Agjencia Franceze për zhvillim do të fillojë të veprojë këtu përmes organizimit të trajnimeve të ndryshme në fushën e arsimit, gjithashtu edhe për përgatitjen e vendit të cilin e presim te ne”.

Ambasadori I Francës i pyetur rreth deklaratës së djeshme të ish ministres për çështje evropiane në qeverinë e Emanuel Makron dhe tani kryesuese e listës për çështje evropiane të “Republikës në lëvizje”, Natali Loazo, e cila në mënyrë kategorike tha “JO” për fillimin e negociatave për hyrje të Maqedonisë së Veriut dhe të Shqipërisë në BE, Timonie u shpreh se ai është përfaqësues i presidentit të Republikës së Francës.

Kristijan Timonie, ambasador i Francës:Unë jam përfaqësues i Republikës Franceze dhe vetëm do ti përsëris fjalët e presidentit francez se perspektiva evropiane e vendeve të Ballkanit perëndimor është shumë e qartë dhe unë punoj në atë drejtim së bashku me mikun tim, nënkryetarin e qeverisë, për realizimin e atij qëllimi”.

Seminari ndërkombëtar “Sekretariati për çështje evropiane, qendra për trajnim dhe dimensioni i burimeve njerëzore” ka për qëllim të bëjë trajnim të të punësuarve në më shumë institucione në vend, ndërsa vendin qendror e ka Sekretariati për çështje evropiane, i cili ka rol kyç në procesin e integrimeve. Ky projekt mbështetet nga Agjencia franceze për zhvillim./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono