FMN

SEJKO-ME-FMN-MBULIM.mpg_snapshot_00.18-1280x720.jpg
in a15:09 | 13/11/2019

Ndonëse me një ritëm më të ngadaltë rritja ekonomike në vend ka vijuar trendin rritës. Guvernatori i Bankës së Shqipërisë Gent Sejko e bëri këtë konstatim në një takim me misionin e Fondit Monetar Ndërkombëtar. Kreu i Bankës Qendrore gjatë njoftimit për shtyp ndau me misionin e FMN mendimin se ritmi i rritjes ekonomike do të vijë në përmirësim gjatë dy viteve të ardhshme, ndërsa inflacioni do të kthehet në objektiv.

Ndërkohë Guvernatori vuri në dukje se ambienti i brendshëm financiar shfaqet stimulues dhe kursi i këmbimit shfaqet relativisht i stabilizuar.

Sa i përket sektorit bankar Sejko theksoi se ai paraqitet i qëndrueshëm ndërsa kredia për sektorin privat shënoi një rritje mesatare prej 7.5% në tremujorin e tretë 2019.

Pas takimit me kreun e Bankës Qendrore misioni i FMN-së do të zhvillojë takime me drejtues të lartë pranë Bankës së Shqipërisë dhe Ministrisë së Financave dhe Ekonomisë./abcnews.al

shqiptaret-1280x716.jpg
ent ela11:01 | 11/11/2019

Shqipëria renditet në vendin e 102-të në botë dhe ndër të fundit në rajon sa i përket të ardhurave për frymë. Sipas Fondit Monetar Ndërkombëtar të ardhurat e pritshme për frymë të shqiptarëve për këtë vit janë 5.37 dollarë.

Shqiptarët vijojnë të jenë ndër më të varfërit e Europës. Të dhënat janë konfirmuar nga raporti i Fondit Monetar Ndërkombëtar që na rendit në vend të 102 nga 192 shtete për të ardhurat për frymë.

Pasqyra ekonomike globale, tetor 2019, tregon se të ardhurat e pritshme për frymë të shqiptarëve për këtë vit janë 5.37 dollarë.

Nivel i ngjashëm ky me Irakun, Libanin, Libinë etj.

Sa i përket të ardhurave më të ulëta ndër shtetet europiane na e kalon Kosova me 4.44 dollarë për frymë dhe Moldavia me 128 dollarë për frymë.

Më të pasurit në rajon janë fqinjët e Malit të Zi. Të ardhurat e tyre për frymë janë 62% më të larta se të shqitparëve, 8.703 dollarë.

Pas tyre renditen serbët me 7.39 dollarë për frymë dhe Maqedonia e Veriut me 6.096 dollarë për frymë.

Të njëjtin pozicion ka mbajtur Shqipëria sipas të dhënave të FMN, vendin e 102, edhe afro një dekadë më parë.

Tregues që rritja ekonomike në vendin tonë nuk ka arritur të jetë më e lartë se fqinjët apo nuk ka prodhuar mirëqënie për qytetarët.

Të ardhurat mesatare për frymë në vendet e Bashkimit Europian në vit sipas të dhënave të Fondit Monetar Ndërkombëtar janë 35.8 mijë dollarë, gati 7 herë më të larta se në Shqipëri. /abcnews.al

 

 

MISIONI-I-FMN-DEKLARATA-1280x720.jpg
ad min23:45 | 06/06/2019

Fondi Monetar Ndërkombëtar ka paralajmëruar se lufta tregtare mes Shteteve të Bashkuara dhe Kinës po vë në rrezik ekonominë globale. FMN ka akuzuar entet amerikane për shpërfillje të risqeve që i kanosen sistemit financiar global.

Fondi Monetar Ndërkombëtar ka deklaruar të enjten se tensionet tregtare globale të shkaktuara nga rritja e tarifave nga Shtetet e Bashkuara do të dëmtojnë ekonominë globale. Sipas FMN, është jashtëzakonisht e rëndësishme që Shtetet e Bashkuara të zgjidhin kontestin e tyre me Kinën, pasi përdorimi i tarifave për t’i bërë presion gjigandit aziatik po minon sistemin global të tregtisë. FMN ngriti gjithashtu shqetësimin se sistemi financiar amerikan po bëhet i cënueshëm në kushtet aktuale të tregut, duke nënvizuar se të ardhurat mesatare të korporatave kanë qenë historikisht të larta, ndërsa standardet e shërbimeve po vijnë drejt dobësimit. Fondi paralajmëroi se një ndryshim i papritur i këtij ambjenti komod për korporatat amerikane mund të përmbysë situatën dhe të krijojë një tkurrje të aktiviteteve, investimeve dhe krijimit të vendeve të punës. “Sistemi financiar duket i shëndetshëm por rreziqet afatmesme ndaj stabilitetit financiar po rriten”, deklaroi FMN. Fondi kritikoi entet rregullatore të Shteteve të Bashkuara se ofrojnë reagime të vakëta për t’i bërë kontrast këtyre rreziqeve dhe gatishmëri për të lehtësuar masat shtrënguese./ABC News Albania 24/7

ekonomia.jpg
ad min21:13 | 08/05/2019

Që prej fillimit të krizës politike në vend, Banka e Shqipërisë ka shprehur shqetësimin se mund të ndikojë edhe në ekonomi. Arben Malaj, anëtar i Këshillit Mbikëqyrës të Bankës së Shqipërisë, deklaroi këtë të mërkurë në Abc News se çdo acarim i situatës politike ka ndikime negative në ekonomi. Në emisionin “Byro Politike” nga Juli Xhokaxhi, Malaj nënvizoi se Banka e Shqipërisë nuk do të interferojë në ballafaqimin e brendshëm politik.

“E kemi ngritur këtë shqetësim që ka aktualisht vendi ynë. Ne nuk duam të interferojmë në ballafaqimin politik mazhorancë-opozitë, por nuk mund të ngurojmë që të japim mesazhin publik që çdo acarim i situatës politike dhe çdo zvarritja e zgjidhjes ka ndikime negative në ekonomi. Pastaj sa do jenë këto ato do jenë për t’u matur. Ne jemi në detyrimin emergjent të ndryshojmë mënyrën e qeverisjes së vendit nga qeverisja me statistika, nga qeverisja me emocion, nga qeverisje me telefon, në një qeverisje që duhet të bazohet në kërkimin shkencor sipas ministrive përkatëse. Është e detyrueshme dhe imediate që çdo dikaster të ketë departament të kërkimit shkencor, ku mund të gjesh shumë mirë të rinj të talentuar shqiptarë”, tha Malaj.

Eksperti i ekonomisë Vjold Danaj nga ana tjetër tregoi se si ndikon kriza politike në ekonomi. Ai u shpreh se situata aktuale mund të çojë në frenimin e investimeve, frenimin e konsumeve dhe largimin e shqiptarëve nga vendi.

“Ndikimet janë qoftë në frenimin e investimeve të bizneseve qoftë edhe shqiptare vendase duke e parë situatën jo të qartë dhe ecurinë e saj, asnjë biznes nuk e merr guximin të bëjë investime madhore në vend. Gjëja tjetër është frenimi i investimeve të huaja. Asnjë i huaj nuk mund të vijë në një vend që nuk ka stabilitet ekonomik. Problemi i pronës në Shqipëri është një problem madhor që ul ose kufizon investimet e huaja. Kjo situatë politike krijon këtë zymtësinë e situatë ekonomike e cila çon në frenimin e investimeve, frenimin e konsumeve dhe largimin e mëtejshëm të shqiptarëve. Aq më keq që ne kemi një mungesë të madhe edhe në pjesën e investimit në infrastrukturën e arsimit”, tha Danaj./abcnews.al

Tabaku-1-1280x696.jpg
ad min14:40 | 07/05/2019

Ish-nënkryetarja demokrate e Komisionit të Ekonomisë ka akuzuar qeverinë se po shkatërron ekonominë e veendit. Në një deklaratë nga selia blu, duke iu referuar konluzioneve të një dite më parë të FMN, Jordia Tabaku tha se borxhi i lartë i vendit vjen për shkak politikave të gabuara të qeverisë, të cilat i ka denoncuar që herët Partia Demokratike.

Në deklaratën e thirrur për media, ish-nënkryetarja e Komisionit të Ekonomisë Jorida Tabaku, gjetjet e Fondit Monetar Ndërkombëtar i sheh si shqetësime të artikuluara prej kohësh nga forca politike ku bën pjesë.

“Rritja e borxhit publik, ulja selektive e taksave për bizneset e disa oligarkëve dhe PPP-të korruptive kanë dobësuar ekonominë, duke ndikuar për keq në çdo familje që nuk është në biznes me qeverinë”.

Shqetësimet për rritjen ekonomike, borxhin publik dhe detyrimet e prapambetura, janë vetëm një pjesë e gjendjes kritike sipas demokratëve.

“Këtë konfirmoi edhe FMN-ja, e cila parashikon këtë vit rënie të ekonomisë për shkak të thatësirës. Borxhi i lartë publik është një faktor në dobësimin e ekonomisë dhe po ndiqet me shqetësim si nga Fondi, ashtu edhe nga opozita. Me një borxh ekonomik në kufijtë e 70% të PBB-së, FMN i tërheq vëmendjen qeverisë se ka shteruar pothuajse çdo mundësi tjetër për të marrë borxh. Pavarësisht se qeveria ka gënjyer, e ka fshehur dhe nuk e ka raportuar këtë të dhënë, FMN e tha qartë se detyrimi prej 300 milionë euro është pjesë e borxhit të rritur publik”. 

Rimbursimi i TVSH-së, politikat fiskale favorizuese ndaj një grupi njerëzish dhe koncesionet dhe PP-të kanë krijuar një rrezik të vazhdueshëm në buxhetin e shtetit, thekson Tabaku.

“Investimet në infrastrukturë, që hapin vende pune dhe nxisin ekonominë, vazhdojnë të pakësohen çdo vit, sepse qeveria paguan 1.7 miliard euro ose 13% të Prodhimit të Brendshëm Bruto për faturat e PP-vë që kanë shkuar tek një grusht oligarkësh të lidhur me qeverinë e Edi Ramës”. 

Klientelist e quan Tabaku edhe ligjin e ri për Koorporatën e Investimeve, i cili e kthen kryeministrin në pronar de facto të pasurive publike.

“Diagnoza që FMN ka për ekonominë shqiptare është se ajo vuan nga sëmundja e rrezikshme: është një ekonomi që pasuron një grusht njerëzish pranë pushtetit, që punon për pakicën dhe jo për shumicën”.

Zgjidhja për këtë vjen përmes alternativës së partisë demokratike – deklaron Tabaku – që promovon konkurencën e lirë, mundësitë e barabarta për të gjithë dhe taksa të ulëta./ABC News Albania 24/7

fmn-1280x686.jpg
nev ila16:00 | 06/05/2019

Misioni i Fondit Monetar Ndërkombëtar që mbylli misionin në Tiranë thotë se e ardhmja e ekonomisë shqiptare është e favorshme, por i bëjnë apel qeverisë të tregohet e kujdesshme gjatë këtij viti. Me shqetësim sheh nivelin e borxhit publik dhe dobësimin e financave në buxhet.

Fondi Monetar Ndërkombëtar në mbyllje të vizitës dy javore në Tiranë konstaton se perspektiva ekonomike e Shqipërisë është e favorshme, por në 2019 parashikon ngadalësim të rritjes ekomomike, ndryshe nga pritshmëritë.

“Këtë vit rritja parashikohet të ngadalësohet në 3.5%, për shkak të efektit bazë të prodhimit rekord të energjisë elektrike në vitin 2018 dhe ngadaklësimit të saj në vendet partnere” , tha shefi FMN.

Për periudhën afatmesme rritja ekonomike pritet të jetë afër nivelit 4%, por për ruajtjen e këtij ritmi, Fondi i sugjeron qeverisë shqiptare ndërmarrjen e disa reformave.

Rrisqet kryesore, vijnë nga borxhi i lartë publik dhe dobësitë në financat publike. Ndaj FMN rekomandon, konsolidim të mëtejshëm fiskal. Por kjo nuk do të thotë aspak rritje taksash.

Ne rekomandojmë të bëhet një rikorigjim që duhet të arrihet përmes rritjes së të ardhurave fiskale sepse nevojat e mëdha që ka Shqipëria për infrastrukturë dhe zhvillim njerëzor, nuk lejojnë shkurtime të mëtejshme të shpenzimeve”, ka theksuar shefi i FMN.

Kjo nuk përkthehet në mënyrë automatike në rritje të bazës. Por duhet një miradministrim më i mirë i institucioneve tona për të ulur informalitetin”, deklaroi ministrja e financave Anila Denaj.

Por sa mund të ndikojë klima politike në përkeqësimin e treguesve ekonomikë për 2019?

Në veçanti përkeqësim i ndjeshëm i ambientit të huaj dhe tensioni i rritur në vend mund të sjellë pasoja negative për ekonominë”, tha Guvernatori i Bankës Shqiptare Genc Sejko.

“Në parashikimet tona nuk i kemi përfshirë efekte të tilla por e vërteta është që mund të ketë një rrezik të tillë”, deklaroi më tej shefi i FMN.

FMN i ka ripërsëritur qeverisë shqiptare kërkesën për të ndalur propozimet e pa kërkuara për dhënien e kontratave të partneritetit publik privat për shkak të riskut të lartë që kanë për buxhetin dhe ekonominë, si dhe rishikim të nismës për korporatën e investimeve shqiptare./ABC News Albania 24/7

greqia.jpg
ad min15:05 | 03/05/2019

Greqia mund të paguajë para kohe një pjesë të kredisë së marrë nga Fondi Monetar Ndërkombëtar. Kërkesa e Athinës zyrtare u miratua nga ministrat e Financave të zonës Euro.

Më në fund, lajme të mira për financat e Greqisë. Ministrat e Financave të eurozonës kanë miratuar vendimin e Greqisë që të paguajë para kohe një pjesë të kredisë që kishte marrë nga fondi monetar ndërkombëtar.

Bëhet fjalë për një pagesë me vlerë 3.7 miliardë euro, që u përket kredive që skadojnë këtë vit dhe vitin e ardhshëm. Nga kjo lëvizje financat publike greke do të kursejnë 150 milionë Euro. Por ky nuk është i vetmi lajm i mirë.

Ka hyrë tashmë në fuqi vendimi i Mekanizmit Europian të Stabilitetit Financiar (EFSF), për lehtësimin e borxhit publik grek, me një vlerë përfitimi më shumë se 970 milionë euro.

Një pjesë e kësaj shume do të dalë nga reduktimi i interesave të kreditimit për periudhën nga Janari i vitit të kaluar deri në Qershor 2019, me ç’rast Greqia do të fitojë 329 milionë euro.

Pjesa tjetër përfaqëson një divident prej më shumë se 644 milionë euro prej fitimit të bankave të eurosistemit që kishin blerë obligacione greke.

Kreu i EFSF, Klaus Regling, deklaroi me këtë rast se “vendimi për të reduktuar interesat e kreditimit të Greqisë tregon se qeveria greke po i mban angazhimet e veta për reformat. Dhe kjo ka rëndësi të madhe për ne, pasi kemi livruar më shumë se 200 miliardë euro kredi për Greqinë”./ABC News Albania 24/7

SEJKO-FMN-MBULIM_ABC-M2-T1.mpg_snapshot_00.02-1280x720.jpg
ent ela15:52 | 25/04/2019

Guvernatori i Bankës së Shqipërisë, Gent Sejko, zhvilloi një takim me misionin e Fondit Monetar Ndërkombëtar (FMN), të kryesuar nga z. Jan Kees Martijn, Shefi i Misionit për Shqipërinë. Çështjet e diskutuara gjatë këtij takimi mësohet se lidhen me zhvillimet makroekonomike, pritshmëritë për vitin 2019 dhe periudhën afatmesme, faktorët e rritjes ekonomike; inflacioni dhe parashikimet për kthimin e inflacionit në objektiv. Gjithashtu sipas një njoftimi të bërë publik nga Banka e Shqipërisë mësohet se me misionin e FMN-së është diskutuar edhe mbi kursin e këmbimit dhe ecurinë e tij; tregjet financiare; sistemin bankar, konsolidimin i tij dhe shumë çështje të tjera të ndjeshme në fushën ekonomike. Në ditët në vijim, misioni i FMN-së do të zhvillojë takime me drejtues të lartë pranë Bankës së Shqipërisë dhe Ministrisë së Financave dhe Ekonomisë me qëllim diskutimin më në detaje të çështjeve të ndryshme lidhur me ecurinë e ekonomisë së vendit. /abcnews.al

fmn.jpg
ad min11:52 | 15/04/2019

“Banka e Shqipërisë duhet të vazhdojë masat për të reduktuar kreditë me probleme, nxitjen e kreditimit dhe stimulimin e përdorimit të monedhës kombëtare”.

Janë këto kërkesat e Fondit Monetar Ndërkombëtar dhe Bankës Botërore që iu adresuan Guvernatorit Gent Sejko në mbledhjet që u zhvilluan në Uashington.

“Shqipëria duhet të vazhdojë reformat strukturore dhe të përmirësojë klimën e biznesit”, nënvizuan përfaqësuesit e institucioneve më të larta financiare, sipas të cilëve është shumë i rëndësishëm edhe bashkërendimi në vazhdimësi i politikës monetare me atë fiskale.

Në këtë mënyrë ndihmohet forcimi i stabilitetit makroekonomik të vendit dhe sigurohet rritje ekonomike afatgjatë./abcnews.al

fmn-kine-1280x676.jpg
ent ela15:21 | 12/04/2019

Drejtoresha e Fondit monetar Ndërkombëtar, Kristin Lagard u shpreh se marrëveshjet e arritura mes Kinës dhe Bashkimit Europian, kohët e fundit, janë një hap shumë pozitiv dhe i rëndësishëm.

Liderët kinezë ditët e fundit janë takuar me kolegët e tyre në Kroaci. Një vizitë kjo, pjesë e një përpjekjeje për të përforcuar marrëdhëniet tregtare mes Bashkimit Europian dhe Kinës. Në këtë kuadër mori pjesë dhe Fondi Monetar Ndërkombëtar për ti kërkuar të gjitha vendeve që të përforcojnë lidhjet ekonomike dhe të braktisin barrierat doganore, që pengojnë rritjen globale.

Kristin Lagard, drejtoresha e FMN-së, u shpreh se ishte optimiste. Sipas saj rinovimi i energjisë së përbashkët është një shpresë për të tejkaluar rreziqet. Rreziqe që sipas saj vijnë nga politikat e brendshme dhe problemet në bashkëpunimet ndërkombëtare.

Bashkëpunimi ndërkombëtar është pikërisht ai që liderët e bashkimit europian dhe Kinës po kërkojnë në takimet e tyre të fundit. Të dyja palët theksuan rëndësinë e tij por pranuan njëkohësisht se ekzistojnë ende cështje të ndryshe ku nuk është arritur ende një dakordësi. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono