florida

TRUMP-FLORIDA.mpg_snapshot_00.00.jpg
G. P.22:45 | 12/11/2018

Vendimi i komisionerëve zgjedhorë në Florida për të rinumëruar votat e zgjedhjeve të mes mandatit duket se ka acaruar presidentin Trump, i cili të hënën bëri thirrje për ndaljen e procesit dhe shpalljen fitues të kandidatëve republikanë për senator dhe guvernator të shtetit.

Presidenti Donald Trump u bëri thirrje të hënën komisionerëve zgjedhorë në Florida që të ndërpresin planet për rinumërimin e votave të 6 nëntorit dhe të shpallin kandidatët e tij republikanë fitues. Vendimi për rinumërimin e votave për senatorin dhe guvernatorin e Floridës u mor fundjavën e kaluar, për shkak të diferencave të ngushta mes kandidatëve republikanë dhe atyre demokratë. Thirrja e Trump erdhi pavarësisht se ligjet e shtetit të Floridës u lejojnë komisionerërve të presin 10 ditë për votimet e panumëruara të votuesve që jetojnë jashtë Shteteve të Bashkuara, përfshirë ato të ushtarakëve në detyrë.

Në Florida beteja ndahet mes republikanit Rik Skot dhe demokratit Bill Nelson për postin e senatorit dhe mes Ron De Stantis dhe Endriu Gillum për atë të guvernatorit. Ky i fundit ishte i pari që reagoi ndaj apelit të Trump. “Dukeni nervoz, zoti president. Të numërohet çdo votë”, tha Gillum në Twitter. Republikanët janë të etur të çimentojnë fitoret në një nga shtetet kryesore të Amerikës për të ruajtur kontrollin e zgjeruar në Senat. Ndërsa demokratët kërkojnë një tjetër shtet për të qeverisur. Të dyja partitë kanë akuzuar njëra-tjetrën për shkelje të parimeve të demokracisë. Rezultatet e rinumërimit pritet të dalin ditën e enjte, por nisur nga fakti se procesi mund të shoqërohet nga nisma ligjore të kandidatëve, ai mund të zgjasë disa javë./abcnews.al

zgjedhje.png
G. P.23:06 | 10/11/2018

Në disa shtete të Amerikës, mes të cilave ai i Floridës, do të ketë rinumërim të votave të hedhura në zgjedhjet e mesmandatit. Kjo, pasi demokratët kontestojnë fitoren e ngushtë të republikanëve për Senatin dhe postin e guvernatorit.

Rezultatet e ngushta dhe të kontestuara në zgjedhjet për Senatin dhe zyrën e guvernatorit të Floridës kanë detyruar komisionerët zgjedhorë të vendosin për rinumërimin e votave. Sipas mediave amerikane, rinumërimi do të bëhet në mënyrë elektronike dhe ka shanse që rezultatet të dalin të enjten e ardhshme. Në zgjedhjet e mesmandatit, kandidati republikan për senator të Floridës, Rik Skot fitoi ngushtë ndaj rivalit demokrat Bill Nelson, me 0.15 për qind të votave.

Ndërsa në garën për guvernator, republikani Ron De Santis fitoi ndaj demokratit Endriu Gillum, me 0.41 për qind. Ndërkohë, rinumërim të votave do të ketë edhe në Xhorxhia dhe Arizona, ku përkatësisht kontestohet rezultati për guvernator dhe senator. Duke reaguar në profilin e tij në Tëitter nga Franca, presidenti Donald Trump akuzoi komisionerët demokratë në Florida për korrupsion, edhe pse nuk paraqiti asnjë provë.

“Po përpiqen të na vjedhin dy fitore të rëndësishme në Florida. Por ne po i ndjekim me vëmendje”, tha Trump.

Në edicionet e tyre online, mediat amerikane shkruajnë se proceset e rinumërimit mund të shoqërohen me sfida ligjore dhe rrjedhimisht përcaktimi i fituesve mund të kërkojë disa javë kohë. Në zgjedhjet e së martës, demokratët fituan shumicën në Dhomën e Përfaqësuesve pas 8 vitesh në opozitë, ndërsa republikanët zgjeruan dominimin në Senat.

FLORIDA-POLITIKANI-1280x720.jpg
ent ela19:21 | 16/10/2018

Një incident i ri me protagonist një politikan, ka rindezur debatet mbi lirinë e armëve në Shtetet e Bashkuara. Në mediat lokale është publikuar një video, ku politikani nxjerr pistoletën dhe qëllon një hajdut, edhe pse ky i fundit ishte tërhequr dhe po tentonte arratinë.

Policia në Florida ka publikuar një video ku një politikan vendas qëllon dhe vret një hajdut në një distancë të afërt. Majkëll Dan, zyrtar i pushtetit vendor, shfaqet teksa përleshet me hajdutin 50-vjeçar në ambjentet e një dyqani. Pamjet tregojnë se pas përleshjes hajduti është përpjekur të largohet, por Dan me njërën dorë e mban atë nga krahu dhe me tjetrën nxjerr pistoletën dhe e qëllon. Hajduti, Kristobal Lopez, shihet teksa bie në tokë dhe askush nuk i shkon në ndihmë. Ngjarja e ndodhur më 3 tetor ka ndezur debate dhe polemika. Nga ana e tij politikani ka akuzuar hajdutin se është përpjekur të vjedhë një sëpatë dhe avokati i tij e ka quajtur të justifikuar përdorimin e armës. Sidoqoftë, departamenti i policisë në Lejklend dhe prokurorët po vijojnë hetimet. Në Florida, një personi i lejohet me ligj të përdorë armën nëse ka dyshime të arsyeshme se dikush përbën kërcënim ndaj jetës së tij. Por mediat lokale shkruajnë se kjo është hera e dytë që Majkëll Dan qëllon një person, edhe pse është hera e parë me pasoja fatale. Kur ishte 19 vjeç ai qëlloi një burrë dhe asokohe deklaroi se e kishte bërë pa dashje. /abcnews.al

uragani-majkell.png
G. P.13:00 | 13/10/2018

Të paktën 18 viktima, me qindra persona të zhdukur dhe dëme materiale prej miliarda dollarësh, është ky bilanci tragjik por ende i përkohshëm i pasojave të uraganit “Majkëll” në Florida dhe Xhorxhia të Shteteve te Bashkuara të Amerikës.

Rëndohet bilanci i viktimave pas kalimit të uraganit “Majkëll” në Shtetet e Bashkuara të Amerikës. Sipas CNN, viktimat janë të paktën 18, tetë prej tyre në Florida dhe pesë në Virxhinia. Por bilanci tragjik mund të rëndohet në orët në vijim sipas autoriteteve.

Më shumë se një million persona janë ende pa energji elektrike dhe ndërhyrja e shpejtë nuk ka mundur të shkojë në disa qytete të shteteve të prekura. Në Florida lagje të tëra janë përmbytur, ndërsa banorët kanë nisur të kërkojnë vetë të afërmit që rezultojnë të zhdukur.

Skuadrat e shpëtimit që pengohen nga ndërprerjet e energjisë elektrike por dhe mungesa e sinjalit telefonik, po përdorin qenë dhe dronë në kërkim të qindra personave që rezultojnë të zhdukur. Në plazhin e “Meksiko Beach” në Florida askush nuk mund të japë numrin e saktë të personave që janë larguar.

Sipas autoriteteve amerikane uragani Majkëll është më i ashpri i 25 viteve të fundit. Në Panama Siti janë evakuar dy spitale, ndërkohë që guvernatori i Floridas u shpreh se shtëpi, biznese dhe rrugë të tëra janë shkatërruar. Presidenti amerikan Donald Tramp ka miratuar fondin e emergjencës për zonat e prekura./abcnews.al

Michael_Florida-1280x854.jpg
G. P.19:15 | 12/10/2018

Të paktën 6 persona kanë humbur jetën në Shtetet e Bashkuara për shkak të Uraganit “Majkëll”. Stuhia e kategorisë katër, solli shkatërrim në brigjet e Floridës, por edhe të shumë shteteve të tjera amerikane.

Ai shkatërroi qytete të tëra përgjatë brigjeve të Floridës, Uragani Michael, një nga stuhitë më të fuqishme që kanë goditur ndonjëherë Shtetet e Bashkuara, dhe zbriti në tokë në kategorinë katër, me erëra në 250 kilometra në orë. Sipas Reuters, të paktën gjashtë persona kanë humbur jetën, por autoritetet besojnë se bilanci është i destinuar të përkeqësohet.

Mes viktimave është edhe një vajzë 11 vjeç, e cila humbi jetën pasi çatia e shtëpia u shemb në Xhorxha. Imazhet televizive dhe ato të publikuara në rrjetet sociale tregojnë shtëpi të shkatërruara, varka të dëmtuara, pemë të rrëzuara dhe kavo të energjisë elektrike të këputura. Mbi 1 milionë banorë kanë mbetur pa energji elektrike në Florida, Xhorxha, Virxhinia dhe në Karolinën e Jugut e të Veriut.

Ndërkohë, dëmet materiale janë të pallogaritshme. Kreu i Agjencisë Federale të Menaxhimit të Emergjencave, e krahasoi qytetin “Mexico Beach” ku fillimisht uragani preku tokën, me “ground zero” për shkak të shkatërrimit.

“Është njësoj sikur një bombë atomike të ketë goditur qytetin tonë”, thotë një banor.

“Uragani ishte një përbindësh i vërtetë, ka prishur jetët e shumë personave”, është shprehur guvernatori i Floridës, Rick Scott.

“Qytetarë të shumtë kanë humbur shtëpitë, bizneset. Rrugët janë shkatërruar”, shtoi më tej ai.

Ndërkohë, presidenti Donald Trump ka aprovuar fondet e emergjencës për t’iu ardhur në ndihmë të prekurve nga Uragani./abcnews.al

floridaaa.png
G. P.11:34 | 11/10/2018

Situata në Florida të shteteve të bashkuara të amerikës ëshët ende alarmante në një kohë që uragani “Majkëll” ka shkaktuar një viktimë dhe qindra mijëra banorë kanë mbetur pa energji elektrike. Guvernatori Skot ka paralajmëruar baorët se tashmë është shumë vonë për evakuim.

Të paktën një viktimë dhe 380 mijë banorë pa energji elektrike. Është ky bilanci i parë i uraganit “Majkëll” në Florida. Ndërkohë autoritetet i frikësohen një shkatërrimi total në disa zona të shtetit amerikan.

Guvernatori Rik Skot flet për një fenomen të frikshëm dhe paralajmëroi banorët se tashmë stuhia ka mbërritur dhe koha për evakuim ka përfunduar. Sipas tij, askush nuk mund të largohet më nga vendi.

Uragani është përforcuar në kategorinë pesë në shkallën e rrezikshmërisë.

Erërat kanë kaluar shpejtësinë e 160 kilometrave në orë dhe duhet të mbërrijnë dhe në Xhorxhia, Karolinën e Veriut dhe të Jugut para se të kthehen në det të hapur mbrëmjen e së enjtes.

Presidenti amerikan, Donald Trump, u shpreh se ndoshta do të shkonte në zonat e goditura nga uragani të dielën ose të hënën. Ai shpjegoi se po ndiqte ngjarjet duke biseduar shpesh me guvernatorin Skot.

Por kreu i Shtëpisë së Bardhë është kritikuar pasi nuk anuloi takimin elektoral në Pensilvani ndërsa uragani godiste Florida-n. Por Trump u mbrojt duke thënë se nëse do e kishte anuluar do kishte zhgënjyer me mijësa persona. Vetë presidenti amerikan në vitin 2012 kishte kritikuar paraardhësin e tij Obama se nuk ishte anuluar një takim elektoral gjatë uraganit “Sendi”./abcnews.al

d2506666-29c0-42a6-aebb-81c83b3a3280_800_420.png
ent ela21:57 | 10/10/2018

Uragani “Majkëll”, me shira dhe erëra që fryjnë deri në 250 kilometra në orë, është përplasur në veri-perëndim të Floridës. Sipas Qendrës Kombëtare për Uraganët, stuhija e kategorisë 4 preku tokën në rajonin Penhendëll. Rreth 370 mijë banorëve u ishte bërë thirrje të largoheshin, por pjesa dërrmuese e tyre nuk kanë lëvizur nga shtëpitë. Guvernatori i Floridës, Rik Skot ka paralajmëruar për “dëme të paimagjinueshme”, duke deklaruar se “Majkëll” mund të jetë stuhija më e keqe në 100 vjet.

Uragani pritet të lëvizë me shpejtësi përgjatë Bregut Lindor të Shteteve të Bashkuara, duke prekur edhe zona që nuk janë rekuperuar ende nga uragani i mëparshëm “Florens”. Në komunikimin e saj të fundit, Qendra Kombëtare për Uraganët paralajmëroi qytetarët që të mos i zënë besë motit të kthjellët që mund të shohin në pamje të parë, pasi gjithçka mund të ndryshojë në moment. Ndërkohë, në Amerikën Qendrore të paktën 13 persona kanë humbur jetën gjatë fundjavës si pasojë e reshjeve të dendura dhe përmbytjeve. /abcnews.al

URAGANI-MICHAEL-1280x644.jpg
G. P.17:11 | 10/10/2018

Uragani “Majkëll” pritet të prekë shtetin amerikan të Floridas gjatë ditës së sotme. Guvernatori Rik Skot paralajmëroi se ka rrezik për një shkatërrim total dhe pse premtoi se janë marrë të gjitha masat për të shmangur tragjeditë.

Florida është në gjendje alarmi në pritje të uraganit “Majkëll” që mund të shkaktojë një shkatërrim total në disa zona të shtetit amerikan. Deklarata u bë nga guvernatori Rik Skot, i cili foli për një stuhi të frikshme dhe paralajmëroi se parashikimet metereologjike po bëhen gjithnjë e më shqetësuese.

Pasi ka arritur kategorinë 3, uragani “Majkëll” po zhvendoset nga Gjiri i Meksikës dhe duhet të mbërrijë në Shtetet e Bashkuara të Amerikës gjatë ditës së sotme.

Stuhia përbën një kërcënim me vdekje, sipas guvernatorit Skot, por gjithsesi ai premtoi se janë marrë të gjitha masat për të shmangur ndonjë tragjedi të mundshme.

Erërat arrijnë një shpejtësi prej 160 kilometrash në orë dhe mund të përfshijnë më pas dhe Xhorxhian, Karolinën e Jugut dhe të Veriut para se të kthehen në det të hapur mbrëmjen e së enjtes. Të hënën Florida shpalli gjendjen e jashtëzakonshme si masë paraprake për 34 rajone./abcnews.al

URAGANI-VIKTIMAT-ABCM3T1.mpg_snapshot_01.15-1280x645.jpg
G. P.22:58 | 08/10/2018

Uragani i radhës, i quajtur “Majkëll” ka goditur Kubën me reshje dhe erëra të forta. Stuhia pritet të zhvendoset në Florida dhe zona të tjera të Shteteve të Bashkuara, disa prej të cilave nuk janë rimëkëmbur ende nga uragani i “Florens” i muajit te kaluar.

Autoritetet në Shtetet e Bashkuara kanë paralajmëruar banorët e gjirit të Floridës që të përgatiten për stuhinë “Majkëll”, që rrezikon të marrë jetë njerëzish. Uragani mund të arrijë në kategorinë e tretë përpara se të mbërrijë në Florida, ditën e mërkurë, për t’u përhapur më pas në të gjithë bregun lindor të Amerikës. Kështu, në Karolinën e Veriut mund të bien nga 2 deri në 7 centimetër shi, nivel ky që mund të shkaktojë përmbytje të reja, në një kohë kur zona nuk është rimëkëmbur nga uragani “Florens” që e goditi muajin e kaluar. “Majkëll”, që është stuhia e 13-të e stinës, ka mbërritur tashmë në Kubë me shira të dendura dhe erëra të forta që arrijnë deri në 120 kilometra në orë.

Ekspertët e qendrës meteorologjike të Majemit kanë paralajmëruar se stuhia do të vijojë të lëvizë në ujërat e ngrohta, duke rrezikuar të bëjë më agresive erërat. Gjithashtu, zona të Floridës mund të përjetojnë deri në 25 cm shira. Guvernatori Rik Skot, që ndërpreu fushatën elektorale për në Senatin amerikan, ka shpallur gjendjen e jashtëzakonshme në 26 lokalitete të Floridës. “Kjo stuhi rrezikon jetën e njerëzve dhe është jashtëzakonisht e rrezikshme”, ka thënë Skot. Ndërkohë, shira të dendura kanë përfshirë prej tre ditësh Amerikën Qendrore, kryesisht Nikaraguan, Hondurasin dhe El Salvadorin, duke shkaktuar vdekjen e 7 personave dhe dëme të rënda në infrastrukturë e të mbjella./abcnews.al

KRONIKE-SULMI-NE-FLORIDA.mpg_snapshot_00.07-1280x720.jpg
ent ela11:48 | 27/08/2018

Një pjesëmarrës në një turne të video lojërave në Jacksonville të Floridas, ka vrarë me armë dy persona para se të kryente vetëvrasje, thotë policia amerikane. Ata e identifikuan autorin si David Katz, 24 vjeç, nga Baltimore dhe thanë se përdori një pistoletë gjysëmautomatike. Autoritetet njoftuan se nuk janë në kërkim të ndonjë bashkëpunëtori apo personi tjetër. Njëmbëdhjetë njerëz të tjerë u plagosën të dielën në Jacksonville Landing, një kompleks i madh tregtar dhe argëtimi. Mes tyre ishte edhe shqiptari 19-vjeçar, Drini Gjoka, i cili ishte pjesëmarrës në turne. Ai e përshkruan ngjarjen me disa mesazhe në tuiter dhe e cilëson si ditën më të keqe të jetës së tij. “Jam shumë me fat, plumbi më qëlloi në gisht”, shkruan ai.

Disa njoftime të pakonfirmuara thonë se Katz u zemërua pasi humbi në turneun e video lojrave të futbollit amerikan. Vitin e kaluar ai kishte arritur të fitonte këtë kampionat. Ndërkohë, e gjithë ngjarja ka ndodhur ndërsa turneu ishte në zhvillim e sipër dhe për këtë po transmetohej drejtëpërdrejtë në një platform online.

Flordia është përballur me disa ngjarje me të shtëna në masë vitet e fundit, përfshirë sulmin në Orlando në 2016, ku 49 persona humbën jetën dhe në shkurt të këtij viti në shkollën e mesme në Parkland ku u vranë 17 persona. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono