florence

FLORENCE-23-1280x720.jpg
ent ela22:59 | 17/09/2018

Vazhdon të rritet bilanci i viktimave të uraganit “Florens”, që vazhdon të godasë pjesën lindore të Shteteve të Bashkuara që prej javës së kaluar. Deri tani llogariten të paktën 23 viktima, ndërkohë që ekipet e emergjencës kanë shpëtuar nga ujërat 400 vetë në qytetin Uilmington.

Ndërsa shirat dhe ujërat vazhdojnë të përmbysin Bregun Lindor të Shteteve të Bashkuara, numri i viktimave nga uragani “Florens” është rritur në 23, 17 prej të cilëve në Karolinën e Veriut. Guvernatori i këtij shteti, Roj Kuper ka deklaruar të hënën se “stuhia epike” përbën ende rrezik dhe ka saktësuar se lumenjtë kanë arritur nivelin më të madh të fryrjes. “Shumë zona të Karolinës së Veriut nuk i kanë përjetuar ende përmbytjet më të mëdha, ndaj dhe rreziku është ende i pranishëm. Për shtetin tonë kjo është një katastrofë epokale”, ka thënë guvernatori. Lokaliteti i Uilmingtonit është kthyer në ishull për shkak të përmbytjeve të furrishme dhe autoritetet kanë paralajmëruar banorët e evakuuar që të mos kthehen. Në qytetin me 120 mijë banorë, ekipet e emergjencës u kanë ardhur në ndihmë 400 personave që rrezikonin të humbnin jetën nga vërshimi i ujërave. Mbi 20 kamionë me ndihma kanë arritur të hyjnë të hënën në qytet, por zyrtarët lokalë dyshojnë se e vetmja rrugë që mund të përdoret nuk do të jetë e lirë për shumë kohë. Ndërkohë, Shërbimi Kombëtar Meteorologjik ka paralajmëruar se reshjet dhe përmbytjet do të vazhdojnë edhe për të paktën dy ditë, derisa kushtet e motit të përmirësohen. /abcnews.al

hurricane-florence-boardwalk-gty-jt-180913_hpMain_2_12x5_992.jpg
ad min12:20 | 17/09/2018

Vijon të rritet bilanci i viktimave nga uragani Florence që ka goditur rëndë bregun juglindor të Shteteve të Bashkuara. Aktualisht numërohen 18 të vdekur nga uragani që tashmë konsiderohet stuhi tropikale. Autoritetet janë të shqetësuar lidhur me gjendjen e digave në zonat e prekura.

Ka shkuar në 18 të vdekur, bilanci i viktimave nga “Florence”, uragani i deklaruar si stuhi tropikale që ka goditur Shtetet e Bashkuara të Amerikës. Një foshnje 3 muajsh ndërroi jetë pasi një pemë e madhe e rrëzuar nga stuhia goditi shtëpinë në të cilën banonte familja duke e ndarë atë në dysh. Mes viktimave është edhe një 30-vjeçare nga Karolina e Jugut, e cila humbi jetën pasi automjeti me të cilin po udhëtonte u përplas me një pemë të rrëzuar në rrugë.

Përmbytjet e shkaktuar nga kalimi i “Florence” kanë ngritur shqetësime të mëdha lidhur me gjendjen në diga në juglindje të Shteteve të Bashkuara, duke zgjeruar shkatërrimin dhe duke çuar në izolimin e plotë të shumë qyteteve, veçanërisht në Karolinën e Veriut.
Sipas dëshmitarëve, qyteti bregdetar i Wilmington, ku jetojnë 120,000 njerëz, është shndërruar në “një ishull të rrethuar nga uji”. Rreth 400 banorë janë shpëtuar dhe pjesa më e madhe e zonës mbetet pa energji elektrike. Sipas shërbimit kombëtar të motit, parashikohen edhe dy ditë shiu. Grifton, një qytet në Karolinën e Veriut, është kërcënuar nga nivelet në rritje të ujit në lumin Neuse.
Ndërkohë, presidenti Donald Trump vijon të monitorojë situatën nga Shtëpia e Bardhë. Nga mesi i javës pritet që ai të vizitojë zonat e prekura./abcnews.al

URAGANI-VIKTIMAT-ABCM3T1.mpg_snapshot_01.15-1280x645.jpg
ad min11:47 | 15/09/2018

Uragani Florens që ka goditur Karolinën e Veriut dhe atë të Jugut në Shtetet e Bashkuara të Amerikës dhe ka shaktuar pesë viktima deri tani. Por ekspertët paralajmërojnë se pasojat e tij do të jenë vërtet katastrofike, për faktin se uragani do të qëndrojë disa orë në këtë zonë.

Shtetet e Bashkuara të Amerikës po përballen me uraganin Florens që deri tani ka shkaktuar pesë viktima. E para ka qenë një grua me fëmijën e saj, të cilët humbën jetën pasi një pemë ra mbi shtëpinë e tyre. Një tjetër grua ndërroi jetë si pasojë e një infarkti pasi mjekët nuk arritën në kohë në shtëpinë e saj, meqënëse rruga ishte bllokuar nga pemët e rëna. Ndërsa dy viktimat e tjera janë dy meshkuj, të cilët po përpiqeshin të ndiznin gjeneratorin pas shkëputjes së energjisë elektrike.

Deri tani janë anuluar më shumë se 2100 fluturime ndërsa qendra e emergjencës në Karolinën e veriut bën të ditur se janë 640 mijë banorët pa energji elektrike. Qendra e uraganit ka prekur tokën amerikane në Karolinën e veriut duke goditur fort brigjet amerikane, i shoqëruar nga një seri stuhish. Por pavarësisht se Florens tashmë është në kategorinë e një stuhie tropikale, gjendja e alarmit qëndron pasi sipas ekspertëve kohëzgjatja e qëndrimit në Karolinën e Veriut dhe në atë të Jugut do të provokojë reshje të dendura dhe përmbytje. Janë 10 milionë banorë që preken nga kjo situatë, ndërkohë që 2 milionë prej tyre janë evakuuar.

Florens po avancon me erëra që kapin një shpejtësi prej 150 kilometrash në orë, ndërsa mijëra persona janë detyruar të qëndrojnë në vendstrehime. Niveli i detit në Karolinën e Veriut është ngritur tre metra mbi normalen, por ajo që shqetëson është dhe fakti se në trajektoren e kalimit të uraganit janë dhe 6 centralë bërthamorë. Metereologët paralajmërojnë për reshje të dendura dhe përmbytje.
Ndërkohë dhe në Filipine gjendja është alarmante pas goditjes nga tajfuni Mangkhut. Kreu i Agjencisë Federale për Mbrojtjen Civile u ka bërë apel banorëve se pavarësisht se shpejtësia e erërave është zvogëluar, mund të ketë dallgë që arrijnë deri në 3.5 metra./abcnews.al

h.jpg
ad min08:35 | 12/09/2018

Më shumë se një milion njerëz janë urdhëruar të evakuohen nga disa pjesë të bregdetit juglindor amerikan, ndërkohë që një stuhi e fuqishme në Oqeanin Atlantik vazhdon të lëvizë drejt tokës.

Urdhrat e evakuimit të detyrueshëm u janë dhënë banorëve në disa pjesë të Karolinës së Jugut, Karolinës së Veriut dhe Virxhinias. Zyrtarët po u bëjnë thirrje njerëzve të përgatiten për erëra dhe shira shkatërrimtare që parashikohet të sjellë Uragani Florence.​

 

Qendra Kombëtare e Uraganeve tha se pret që stuhia të prekë tokë të enjten mbrëma ose të premten në mëngjes, duke e përshkruar atë si “një stuhi jashtëzakonisht e rrezikshme”.

Florence është një stuhi e kategorisë 4, me erëra maksimale të qëndrueshme prej 215 kilometrash në orë. Parashikuesit mendojnë se uragani do të forcohet akoma më shumë këto ditë. Kjo është stuhia më e fuqishme që kërcënon rajonin në gati tre dekada.

Një stuhi e kategorisë 4 zakonisht sjell erëra të tilla që shkatërrojnë çati dhe çrrënjosin pemë, duke sjellë ndërprerje të mëdha të energjisë dhe duke bërë të pabanueshme zona të tëra për javë ose muaj.

Përveç kësaj, parashikuesit e motit presin që uragani Florence të sjellë 38 deri në 50 centimetra shi në zonat ku do të kalojë.

Guvernatori i Karolinës së Jugut Henry McMaster parashikon se rreth një milion njerëz do të largohen nga shtëpitë e tyre.

Presidenti Donald Trump nënshkroi të martën deklarata të emergjencës për Karolinën e Veriut dhe të Jugut, për të krijuar mundësinë që të vihen në dispozicion fonde dhe burime të tjera federale.

Ai u tha gazetarëve në Pensilvani: “ne jemi absolutisht të përgatitur” për uraganin Florence. Presidenti pohoi se stuhia mund të shkaktojë dëme të rënda.

Jeff Byard i Agjencisë për Menaxhimin e Emergjencave Federale tha se stuhia nuk do të jetë “një goditje kalimthi”, por një grusht i drejtpërdrejtë mbi brigjet lindore”. Kjo, tha ai, “nuk do të jetë një stuhi nga e cila njerëzit mund ta marrin veten brenda pak ditësh”./Zëri i Amerikës

F4588815-D78D-407D-9998-4ECEC53C1BD6_w1023_r1_s-1.jpg
ent ela09:10 | 11/09/2018

Qendra Kombëtare e Uraganeve në Shtetet e Bashkuara bëri të ditur se një uragan i kategorisë 4 në Atlantik po mbledh fuqi dhe tha se pritet të godasë Bregun Lindor të SHBA-së të enjten.

Parashikuesit e motit thanë se uragani Florence aktualisht ka erëra prej 220 kilometrash në orë dhe se pritet të forcohet në ditët e ardhshme.

Stuhia pritet të zbarkojë në mes të Karolinës së Jugut dhe Virxhinias, duke sjellë erëra të forta dhe shira të rrëmbyeshëm.

Guvernatorët e disa shteteve kanë shpallur tashmë gjendje të jashtëzakonshme.

Zyrtarët thanë se mbi një milion njerëz janë urdhëruar të evakuohen.

Presidenti i Shteteve të Bashkuara, Donald Trump, lëshoi po ashtu disa paralajmërime për uraganin Florence.

“Një nga stuhitë më të këqija në shumë vite do të godasë Bregun Lindor”, tha Trump në njërin nga postimet e tij në Twitter. /REL


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono