fitore

PORTUGALIA-RONALDO-LIGA-E-KOMBEVE.mpg_snapshot_00.14-1280x720.jpg
ent ela14:00 | 10/06/2019

Portugalia dhe Kristiano Ronaldo janë tashmë fitues serialë. Suksesi në Euro 2016 u pasua me triumfin në Ligën e Kombeve, ndërsa e ardhmja parashikohet edhe më e mirë

Tashmë u bënë dy. Portugalia konfirmoi veten si një kombëtare fituese, duke bërë të vetën Ligën e Kombeve, vetëm tri vjet pasi triumfroi në Euro 2016.

Kapiteni Kristiano Ronaldo udhëhoqi skuadrën në këtë arritje të madhe, ashtu siç bëri në Francë, dhe ndoshta do t’i bindë të gjithë se meriton të cilësohet si lojtari më I mirë portugez I të gjitha kohëve, edhe mbi legjendën Euzebio.

Ylli i Juventusit nuk ishte I mrekullueshëm si në fitoren ndaj Zvicrës, ku shënoi 3 gola, por sërish ishte faktor vendimtar në fushë, përballë një Holande të mbushur me talent dhe lojë spektakolare.

Vetëm një karakter i fortë dhe ambicia e tij e pakufishme mund të bënte Portugalinë fituese, edhe pse “luzitanët” ishin shumë më tepër sesa Kristiano.

Lojtarë si Rui Patrisio, Semedo, Fonte, Fernandez, Danilo, Karvaljo apo Bernardo Silva janë padyshim një grup me klas.

Ashtu si sulmuesi Gedes, autori i golit të fitores kur sapo ishte mbushur një orë lojë.

Ronaldo nuk deshi të provonte një zhgënjim si ai Europianit 2004 humbur në shtëpi ndaj Gerqisë, ndaj vrapoi pas golit, deri tek zona e rreptësisë e ekipit të tij, duke nxitur shokët që të mos dorëzoheshin.

Në të vërtetë, nuk u zgjodh ai lojtari I ndeshjes, por Bernardo Silva.

“Jam shumë i lumtur, – u shpreh CR7-ta, – Ishte një fitore shumë e rëndësishme për të gjithë Portugalinë dhe për kombëtaren. Që nga viti 2016, ne e kemi ndryshuar historinë tonë, dhe ja ku fituam një tjetër trofe”.

Gazetari e pyeti nëse kjo fitore e afroi me Topin e Artë, dhe Ronaldo u përgjigj.

“Synimi im për ndeshjen ishte që të fitonim dhe të luaja mirë, jo Topi I Artë”, – tha ai.

Trajneri Fernando Santos gjithashtu fitoi trofeun e dytë në stol, duke e konfirmuar veten si një teknik tepër i zoti me ekipet përfaqësuese.

“Ne kemi lënë një shenjë të madhe për Portugalinë duke luajtur në këto finale, – tha ai, – Botërori nuk shkoi siç shpresuam, por ne menduam për të ardhmen, fituam, dhe mendoj se vitet e tjerë do të jenë edhe më të shkëlqyer. Portugalia ka shumë lojtarë të talentuar. Ky ishte edicioni i parë i Ligës së Kombeve, pra fitorja jonë ishte historike”.

Përse Holanda nuk ia doli?

Besohet se e deshi fitoren më pak sesa portugezët, që luanin para tifozëve të tyre.

Po ashtu, pati një minus të madh, pasi sulmuesit nuk ishin në nivelin e mbrojtësve dhe mesfushorëve.

Holandezët bënë gjithçka pas pushimit, dhe fare mirë mund të kishin barazuar, apo edhe fituar, por nuk ia dolën.

Tifozët portugezë, ndërkaq, u ndjenë të lumtur pas ndeshjes.

Kombëtarja e tyre më në fund është pjesë e përfaqësueseve të mëdha, që kanë fituar trofe në historinë e tyre.

Ata theksuan se Portugalia mund të imitojë Spanjën, Francën, Gjermaninë apo Italinë, për të qenë një Superfuqi e futbollit europian. /ABC News Albania 24/7

 

atalanta.jpg
G. P.22:55 | 15/05/2019

Lazio arriti të fitonte kupën e Italisë pasi mundi Atalantën me rezultatin 2-0. Golat për bardhekaltrit u shënuan nga serbi Milinkoviç-Saviç dhe nga Correa. Kjo është hera e shtatët që LAzio fiton këtë trofe.

Kjo ndeshje ishte edhe një duel edhe mes dy lojtarëve shqiptarëve, Berat Gjimshiti dhe Thomas Strakosha. Të dy ata luajtën për 90 minuta, ku gardiani shqiptar nuk lejoi për asnjë moment që topi të kalonte katërkëndëshin e mbrojtur nga ai.

Ndërkohë portieri tjetër shqiptar, Etrit Berisha e ndoqi finalen nga porta. Atalanta kaloi në finale pasi mposhti Fiorentinën, ndërsa skuadra e kryeqytetit skualifikoi Milanin.

Me fitoren e kupës së Italisë, ata siguruan kualifikimin direkt për në Europa League. Nga ana tjetër edhe pse u mposht, Atalanta është duke kaluar një prej sezoneve më të mira. Përveçse nënkampionë të kupës së Italisë, ata janë në garë për kualifikim në Champions League./abcnews.al

de-beek.jpg
G. P.12:16 | 01/05/2019

Jehonë e madhe në Europë pas fitores së Ajaksit në fushën e Totenhemit në Champions. Trajneri i holandezëve lavdëroi skuadrën e tij, por trajneri i Totenhemit ka ende besim për kualifikimin në finale.

Kanë kaluar 23 vjet që kur ia dolën për herë të fundit, dhe tani janë fare pranë. Yjet e rinj të Ajaksit e mahnitën sërish Europën duke fituar në fushën e Totenhemit, në gjysmëfinalen e parë të Championsit, ndonëse e kanë të qartë se ende nuk janë në finale.

Është e qartë tani se përse u dorëzuan Reali i Madridit dhe Ajaksi, ashtu siç kishte theksuar trajneri i Bajernit, Kovaç, pas dy barazimeve në grup me holandezët. Gazetat dhe Angli dhe Holandë kuptuan gjithçka.

“Daily Mail”: Spërsat mbeten me gisht në gojë! Djemtë e Poçetinos marrin një leksion futbolli nga Ajaksi plot klas!

“Daily Express”: Spërsat me hundë të thyer! Dëmtohet Vertongeni, ndërsa holandezët hedhin valle në Londër!

“Times” i Londrës: Spërsat me shpatulla pas murit! Ajaksi merr kontrollin ndërsa Vertongeni pëson dëmtim serioz në kokë!

“De Telegraf” nga Holanda: Hap i madh drejt finales për Ajaksin! Gjysmëfinalja e parë e Championsit fitohet 1-0 në fushën e Totenhemit!

“Algemeene Dagblad”, po nga Holanda, i bën jehonë mediave europiane që shkruajnë se skuadra sensacionale e Ajaksit mund ta vazhdojë ëndrrën!

Ajaksi u tregua i zoti jo vetëm në lojën ofensive, por edhe në mbrojtje, kur u detyrua të kthehej prapa në pjesën e dytë.

Këtë herë nuk shkëlqyen vetëm kapiteni De Ligt, organizatori De Jong apo serbi Tadiç, por më shumë sesa ata shënuesi i golit, Doni De Beek.

“Ne luftuam si luanë, – tha me krenari trajneri Ten Hag, – një arritje fantastike. Kemi bërë gjysmën e rrugës, por kemi besim sepse jemi në formë të mirë. Jam shumë I lumtur për vullnetin e treguar nga lojtarët e mi. E veçanta e këtij Ajaksi është se ne mund të luajmë stile të ndryshëm futbolli, mund të sulmojmë, por edhe mund të mbrohemi si ekip, kur jemi të detyruar. Nuk jemi ende të kualifikuar”.

Vetë De Beek foli i kënaqur, por edhe i kujdesshëm.

“Jam i lumtur për golin dhe për fitoren, – tha De Beek, pas ndeshjes, – nuk ishte aspak e lehtë, edhe pse në pjesën e parë luajtëm shumë mirë. Tani duhet të përfundojmë punën dhe të kualifikohemi në fushën tonë”.

Totenhemi ndjeu mungesën e lojtarëve kryesorë të sulmit si Harri Kejn dhe Son. Trajneri Poçetino, po ashtu, theksoi se ekipi I tij ishte i lodhur në pjesën e dytë, edhe për shkak të ngarkesës më të madhe në Premier Ligë.

“Mendoj se gjithçka është ende e hapur, – deklaroi ende me besim Poçetino, – natyrisht, do ta kemi shumë të vështirë pasi e humbëm ndeshjen e parë, madje në shtëpi. Problemi është që nuk patëm shumë energji, Ajaksi ishte më i freskët se ne. Tani, le të përgatitemi për ndeshjen e dytë dhe shpresojmë që ta fitojmë. Kemi nevojë vetëm për një rezultat, fitoren, dhe duam që të jemi në finale”.

Ndeshja e kthimit Ajaks-Totenhem do të luhet të martën e 7 Majit në Amsterdam./ABC News Albania 24/7

golden-state-1280x720.jpg
G. P.15:08 | 29/04/2019

Golden State fitoi duelin e parë të plej ofit ndaj Houston-it në basketbollin amerikan. Një duel i madh u zhvillua mes yjeve Kevin Durant dhe James Harden.

Një përballje e denjë për finalen e madhe. Për fat të keq, Golden State-Houston duhet të luhet në raundin e dytë të plej ofit në NBA, një gjysmëfinale e Konferencës Perëndimore.

Dueli i parë shkoi në favor të vendasve, kampionë në fuqi dhe që do të kenë favorin e faktorit fushë në ndeshjen e shtatë, nëse do të jetë e nevojshme.

Shifrat ishin 104-100.

Në një përballje të nivelit më të lartë të mundshëm që ofron basketbolli amerikan, pati aksione dhe kosha të mrekullueshëm, si dhe një duel të dy yjeve kryesorë, Kevin Durantit të Golden State dhe James Hardenit të Houstonit.

Dy kampionët ishin barabar me pikë, duke shënuar secili nga 35, ndonëse Duranti ishte më shumë minuta në parket. Kontributi i tyre ishte thuajse i barabartë edhe në elementët e tjerë të basketbollit.

Duranti kapi 5 topa në tabela, shërbeu 3 asistë, vodhi një top e bllokoi një gjuajtje. Harden u përgjigj me 4 topa në tabela, 6 pasime për kosh dhe 3 vjedhje.

Golden State pati ndihmë të madhe nga lojtarët e tjerë të formacionit, si Stephen Curry, Clay Tompson, Dreymond Green e Andre Iguodala. Houstoni ndërkaq mundi t’i përgjigjej vetëm me Kris Polin dhe Erik Gordonin.

Gjithsesi, miqtë nga Teksasi u ankuan për gjykimin duke akuzuar arbitrat se nuk ndëshkuan lojën e rëndë të lojtarëve nga Kalifornia. Ndeshja e dytë do të luhet po në fushën e Golden State, duke u gdhirë e mërkura me orën e Shqipërisë./abcnews.al

shkurtaj.jpg
G. P.18:44 | 24/04/2019

Skuadra e Kukësit fitoi ndeshjen e parë të gjysmëfinales së Kupës së Shqipërisë ndaj Skëndërbeut me shifrat 2-1. Rexhinaldo dhe Shkurtaj ishin autorët e golave për verilindoret, ndërkohë që për korçarët shënoi Dejvi Bregu. Takimi i kthimit do të zhvillohet në datën 8 Maj në Korçë.

Kukësi nuk kursen Skënderbeun. Skuadra e teknikut Ernest Gjoka fitoi me rezultatin 2-1 duelin e parë të Kupës së Shqipërisë, e cila u zhvillua në Kamëz. Kupa e Shqipërise është objektiv kryesor për të dyja skuadrat, e cila shikohet si mundësia e vetme për të shpëtuar sezonin.

Kukësi e kërkoi me ngulm këtë fitore dhe ia doli të kalojë në avantazh në minutën e 20 me Rexhinaldon. Sulmuesi merr një asist perfekt nga Rroca dhe nuk tregohet i saktë përballë Dajsinanit.

Në fundin e pjesës së parë, Kukësi ka një tjetër mundësi kësaj radhe provon Limaj, por goditja ndalet në duart e gardianit të juglindoreve. Pjesa e parë mbyllet me avantazhin minimal të Kukësit.

Fillimi i fraksionit të dyte të lojës nisi në mënyrën më të mirë për Kukësin që dyfishoi shifrat me Vasil Shkurtajn. Sulmuesi vlonjat përfitoi nga një vendosje e gabuar e prapavijës mike dhe shënon lehtësisht përballë Dajsinanit.

Gjithsesi Skënderbeu ngushton diferencën me Dejvi Bregun, i cili përfiton nga një gabim i portierit Frashëri. Në minutat e mbetura nuk ka ndryshim rezultati dhe skuadra e Kukësit mori një fitore me mjaft vlera në takimin e parë. Sfida e kthimit do të luhet në Korçë në datën 8 Maj./abcnews.al

bakajj.jpg
G. P.17:45 | 16/04/2019

Elis Bakaj vazhdon të shkëlqejë në Bjellorusi. Futbollisti shqiptar shënon sërish dhe skuadra e tij ngjitet në krye të renditjes.

Nuk dëshiron të dorëzohet dhe pse po mbush 32 vjeç.

Elis Bakaj mbetet në formë dhe i rëndësishëm për ekipin e tij, Shakhtyor Soligorsk në Bjellorusi, siç e tregoi në ndeshjen e fundit të kampionatit. Shakhtyori fitoi 1-0 në shtëpi ndaj Slutsk-ut dhe u ngjit në vendin e parë të Superligës bjelloruse.

Natyrisht, është vetëm fillimi i sezonit, pasi janë luajtur thjesht tri ndeshje, veçse forma e skuadrës nga Soligorsku është tepër e mirë, me tri fitore radhazi. Bakaj, ndërkaq, vazhdoi formën e mirë që tregoi në dy javët e para.

Kulmin e pati në ndeshjen e javës së kaluar në fushën e Nemanit, që përfundoi me fitoren 3-0 të ekipit të qytetit të minatorëve. Sulmuesi shqiptar shënoi njërin nga golat, si dhe shërbeu pasimet për dy rrjetat e tjera. Ky është sezoni i dytë i 31-vjeçarit në Bjellorusi.

Vitin e kaluar ai shënoi 7 gola në kampionat dhe 3 në Ligën e Europës për Shakhtyor Soligorsk, duke qenë lojtari më i rëndësishëm i skuadrës. Pasi u shpallën nënkampionë në 2018, pas BATE-s së Borisovit, Bakaj dhe Shakhtyor ndoshta duan të fitojnë titullin këtë vit./abcnews.al

liverpul-1280x691.jpg
ent ela12:51 | 09/04/2019

Liverpuli është favorit ndaj Portos, në duelin e parë çerekfinale të Championsit, që do të luhet sonte në orën 21:00. Trajneri Jurgen Klop vlerëson se skuadra e tij është në formë shumë të mirë

Vjet nuk pati histori.

Madje, nuk qe nevoja që të synohej fitorja në “Anfild”, pasi Liverpuli e siguroi kualifikimin që në fushën e Portos me fitoren 5-0.

Përballja e sotme, në orën 21:00, është sërish në Champions, veçse një shkallë më lart në çerekfinale, dhe anglezët cilësohen sërish favoritë për të kaluar.

Skuadra e trajnerit Jurgen Klop është madje në formë edhe më të mirë sesa edicionin e kaluar, pasi pretendon për titullin në Angli, gjë që vjet as nuk mund ta mendonte.

Trajneri gjerman, për fat, ka një skuadër thuajse të plotë, ndonëse ka edhe mungesa.

Mbrojtësi Gomez nuk është ende i gatshëm, në dyshim edhe Lalana, ndërsa mbrojtësi i krahut Robertson është i pezulluar.

Vajnaldum, Matip e Van Dajk kanë shqetësime të vogla, por pritet të luajnë.

“Ne jemi në një moment shumë të mirë, – pohoi Klopi, – kjo shihet që nga mënyra sesi lojtarët e mi stërviten. Edhe koha duket shumë e bukur, çdo mëngjes zgjohemi me kohë të mirë, gjë që nuk ndodh shpesh. Ne jemi në garë për dy trofe të mëdhenj dhe duan të shkruajmë disa gjëra në librin tonë të historisë. Natyrisht, nuk ka asgjë të sigurt, ndaj Portos, por do të bëjmë gjithçka për të fituar”.

Po Porto a ka sado pak shpresë?

Portugezët janë në formë të mirë në kampionatin e tyre, me pikë të barabarta me Benfikën, në krye, dhe me shpresë për titullin.

Gjithsesi, mungesat në “Anfild” janë të rëndësishme, pasi nuk do të luajnë dy nga futbollistët me më shumë përvojë, Pepe dhe Hektor Herrera, ndërsa Aleks Tejes është në dyshim.

“Ne nuk do të luajmë për hakmarrje, – siguron trajneri I portugezëve, Serzhio Konseisao, – është një ndeshje futbolli, dhe secila ndeshje ka historinë e saj. Ajo që ndodhi, ndodhi, por nuk do të thotë se do të përsëritet. Liverpuli, natyrisht, është shumë I fortë, ka potencial më shumë se ne, por do të provojmë shanset tona dhe them se mund t’ia dalim”.

Pavarësisht se Liverpuli është favorit absolut për të fituar sonte dhe për t’u kualifikuar, sërish Porto mbetet e rrezikshme, siç e tregoi turin e kaluar kur eliminoi Romën./abcnews.al

fitorja.jpg
G. P.14:07 | 07/04/2019

Barcelona është më pranë titullit në Spanjë, pas fitores me Atletikon e Madridit. Skuadra katalanase tani do të përqendrohet tek sfidat e Ligës së Kampionëve.

Nuk mund të thuhet se ishte një “poezi” Barcelona që pati përballë Atletikon e Madridit në “Kamp Nou”. Emrat, padyshim, ishin të gjithë aty, që nga Ter Stegen e deri tek Messi, por jo loja e dikurshme.

Gjithsesi, kjo skuadër ka edhe një cilësi negative, që nuk të kënaq gjithnjë, edhe një shumë të dobishme, që fiton dhe kur nuk bind. Atletiko, së cilës i bënte punë vetëm fitorja, ishte më kërkuese kur dy ekipet ishin me forca të barabarta në fushë.

U dëmtua shumë kur sulmuesi kryesor Diego Costa mori karton të kuq direkt për ofendim të gjyqtarit, por ia doli edhe në inferioritet. Falë portierit më të mirë të Spanjës, Oblak (8 pritje në këtë sfidë), dhe falë karakterit e unitetit, Atleti ishte shumë lart në krahasim me versionin e shëmtuar të humbjes 0-3 në fushën e Juventusit në Champions.

Pati edhe raste për të shënuar e fituar, me Rodrin e Griezmanin, ndonëse shumë pak në krahasim me katalanasit. Barcelona, për fatin e saj të mirë dhe fatin e keq të kundërshtarëve, ka në fushë pikërisht ata emrat që bëjnë diferencën.

Luis Suarez, një nga personalitetet më të rëndësishëm të ekipit, shënoi golin e parë duke mposhtu më në fund Oblakun në 85’. Një minutë më vonë, Lionel Messi “bëri qejf” me mbrojtjen mike për të shënuar golin e dytë.

“Fitorja ndaj Atletikos ishte një hap i madh përpara për fitoren e titullit, – pohoi Suarezi, – nuk ishte e lehtë, dhe ndeshja mund të kishte përfunduar edhe 0-0, por ia dolëm. Natyrisht, ende nuk kemi fituar, ndërsa tani duhet të mendojmë për Championsin”.

“Ishin tri pikë shumë të rëndësishme, – gjykoi trajneri Valverde, – jemi më pranë titullit, por puna duhet të përfundohet. Jemi shumë të lumtur sepse Atletiko është shumë e fortë, jo më kot në vend të dytë. Nuk kam dyshuar kurrë tek Suarezi, ai ka qenë gjithnjë vendimtar”.

Skuadra e trajnerit Valverde ka tani 73 pikë në 31 ndeshje, duke qenë 11 pikë mbi Atletikon, kur ka edhe 7 sfida për t’u luajtur. Messi ka 33 gola në La Liga e Suarez 20, duke qenë dy golashënuesit më të mirë. Tashmë vëmendja zhvendoset tek dueli në Champions me Manchester United në “Old Traford”. Gazetat vazhduan refrenin.

“Marca”: Tjetër Ligë në kasafortë! Suarez dhe Messi rrëzojnë murin e një Oblaku të jashtëzakonshëm!

“El Mundo Deportivo”: Kampion (edhe pse mungon konfirmimi)! Golat e Suarezit dhe Messit në minutat finale, përcaktojnë titullin përballë një Atletikoje me 10 lojtarë!

“Sport”: Një tjetër Ligë! Dhe tani për Championsin! Barça certifikon titullin e 8-të në 11 vitet e fundit, pasi rrëzoi Atletikon me golat e Suarezit dhe Mesit!/abcnews.al

luftetariiii.jpg
ent ela18:40 | 30/03/2019

Luftëtari arriti një fitore të rëndësishme në Superligë ndaj Skënderbeut, duke iu larguar edhe më shumë rrezikut të rënies nga kategoria. Skuadra korçare pati epërsi, por ishte e pafat.

Me atë që u pa në fushë, fati nuk ishte me humbësin.

Skënderbeu pati epërsi të ndjeshme brenda në Gjirokastër ndaj Luftëtarit, dhe jo vetëm që nuk arriti fitoren, por doli nga fusha i mundur.

Skuadra që vazhdon të luajë futbollin më të bukur në Shqipëri nuk është më, ajo që dominon edhe tabelën, dhe kampionët u shtangën dy minuta para fundit.

Sulmuesi Dunga shënoi golin e vetëm të përpalljes së javës së 26-të të Superligës, një sukses që e ngjiti Luftëtarin në kuotën e 31 pikëve, duke mbajtur në distancë Kastriotin e vendit të parafundit.

Gjithsesi, me përjashtim të faktit që fitoi dhe që pati ndonjë rast, pak mund të flasësh për ekipin vendas.

Historia e ndeshjes I takon thuajse plotësisht formacionit të trajnerit Orges Shehi, që goditi traun, rrahu edhe shtyllën, si dhe pati epërsi në lojë.

Në minutën e 65-të, Shehi hodhi në fushë edhe Devi Bregun, vlonjatin që luajti më parë për Luftëtarin, dhe që u prit me brohoritje nga publiku gjirokastrit.

As Bregu nuk mjaftoi, pasi edhe ai ishte pa fat, ose fare pak I pasaktë.

Humbja bën që Skënderbeu ta ketë më të vështirë tani të mbajë një nga vendet e para, dhe të pretendojë Europën nga kampionati, gjithnjë nëse e fiton gjyqin në KAS-in e Lozanës./abcnews.al

0_Euro-2020-Qualifier-Group-D-Switzerland-v-Denmark.jpg
ent ela16:28 | 27/03/2019

Granit Xhaka nuk mjaftoi për fitoren e Zvicrës në eliminatoret e Evropianit, ndaj Danimarkës. Italia dhe Spanja arritën suksese të lehta. Mund të shënosh edhe bukur, mundet dhe të kryesosh dy apo tre me zero, por sërish të mos fitosh.

Kjo i ndodhi Zvicrës, së cilës nuk i mjaftoi goli për kopertinë nga kapiteni Granit Xhaka për të mundur Danimarkën, në eliminatoret e Evropianit. Edhe pse u luajt në shtëpi, në stadiumin “Sankt Jakob-Park” të Bazelit, zviceranët nuk ia dolën.

Habia e madhe ishte se kryesuan 3-0 deri në minutën e 84-ët, por danezëve u mjaftuan vetëm 9 minuta për të barazuar. Remo Frojler shënoi së pari për Zvicrën, pastaj Xhaka në pjesën e dytë, e më tej, Brel Embolo.

Mrekullia e Danimarkës, siç mund të quhet me plot gojën, nisi me rrjetën e realizuar nga Matias Jorgensen në të 84-ën. Kjo i dha zemër ekipit të drejtuar nga trajneri norvegjez Hareide, shënuan golin e dytë me autor Kristian Gytkjer, ndërsa barazimi erdhi në sekondat e fundit.

Ai u arrit nga Henrik Dalsgard, dhe ishte shpërblimi i merituar për Danimarkën që luftoi për shumë se vendasit, e gjuajti më shumë herë drejt portës e më shumë në kuadrat.

Nëse Zvicra gaboi, nuk mund të thuhet kjo për dy emra të mëdhenj. Spanja, ish-kampione e dyfishtë e Evropës, triumfoi 2-0 në fushën e Maltës, në një ndeshje jo shumë të vështirë.

Pozitive për trajnerin Luis Enrike, që nuk ishte në stol këtë herë për shkaqe familjare, ishte shënimi i të dy golave nga sulmuesi i Atletikos së Madridit, Alvaro Morata, pasi ky kishte nevojë për besim. Italia triumfoi më thellë, 6-0, ndaj Lihtenshtajnit, në një sfidë edhe më të lehtë.

Të besuarit e trajnerit Roberto Mançini e konkretizuan që në pjesën e parë epërsinë që patën në stadiumin “Enio Tardini” të Parmës. Katër herë shënuan para pushimit, me autorë Sensin, Verratin e dy herë Kualjarelën, që u bë shënuesi me moshën më të vjetër në kombëtaren italiane. Pas pushimit, realizuan të rinjtë Moize Kin dhe Leonardo Pavoleti./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono