fitore

albin-kurti-2.jpg
ad min19:25 | 20/10/2019

Albin Kurti me Lëvizjen Vetëvendosje fitoi zgjedhjet në Kosovë. Përveç festës në Prishtinë, ai ndodhet në Tiranë për të festuar me aktivistët dhe vullnetarët që gjenden në Shqipëri. LVV ka qendrën e saj në kryeqytetin shqiptar. Kurti tha se dy vendet, Shqipëria dhe Kosova duhet të bashkëpunojnë më shumë me njëra-tjetrën dhe duhet të bëjnë kujdes nga Serbia.

“Dua ti falënderoj të gjitha aktivistët që nga Tiranë erdhën dhe na e mundësuan fitoren e përbashkët në Kosovë. Tash duhet të kremtojmë dy herë, në Prishtinë dhe Tiranë, duke qenë se të dyja kontribuojnë dhe të dyja përfitojnë nga firoja e Lëvizjes sonë. Me siguri që Kosova dhe Shqipëria duhet të bashkëpunojnë më shumë. Çështja në Ballkan mes vendeve të paintegruara në BE është se Kosova nuk ka liberalizim të vizave. Vendet e tjera e kanë. Unë mendoj që është bërë padrejtësi që Shqipëria dhe RMV nuk po fillojnë negociatat. Ju takon dhe e kanë merituar një gjë të tillë. Mendo se duhet të kemi kujdes sa i takojmë raporteve me Serbinë duke qenë se dihet se çfarë u ka bërë shqiptarëve në njërën anë dhe dihet që para 3 viteve tentoi një puç në Maqedoninë e Veriut. I dështoi. Është në interesin e Serbisë të duket sa më normale duke qenë se nuk është”, tha Kurti.

Kreu i LVV-së tha se është në të drejtën e qendrës së Vetëvendosjes në Tiranë për të vendosur për të hyrë në zgjedhje ose jo. Gjithashtu ai paralajmëroi një takim me kryeministrin Rama së shpejti.

“Unë jam këtu me ftesë të LVV në Republikën e Shqipërisë dhe këta e kanë autonominë e qëndrimeve dhe veprimeve. Nuk është se unë ose LVV në Kosovë e dikton një gjë të tillë. Do kthehem sonte në Kosovë por sigurisht që do ta takoj së shpejti kryeministrin e Shqipërisë. Është çështje ditësh dhe jo javësh”, tha Albin Kurti./abcnews.al

tirana-ndeshja-e-jetes.jpg
nev ila19:41 | 14/09/2019

Tirana mund Skënderbeun në minutat e fundit dhe mban kreun e renditjes së Superligës. Skuadra kryeqytetase e meritoi suksesin në stadiumin “Selman Stërmasi”

E ka talentin dhe fanelën, ndërsa mbetet të tregojë vazhdimësinë.

Tirana hodhi një tjetër hap drejt konfirmimit si pretendente e fortë për titullin në Superligë, me fitoren 3-1 ndaj Skënderbeut, një sukses që ishte më i vështirë sesa e tregon rezultati.

Skuadra e trajnerit Ardian Mema e dominoi lojën në “Selman Stërmasi”, por tri pikët u siguruan vetëm në 5 minutat e fundit.

Aksionet e shumta dhe rastet ishte vështirë të ktheheshin në gol, ndërsa Skënderbeu i trajnerit Ilir Daja pati edhe fatin e keq që iu dëmtua një nga lojtarët e paktë me përvojë, kapiteni Gjergji Muzaka, që doli nga fusha që në pjesën e parë.

Tiranasit, 24 herë kampionë të Shqipërisë, e gjetën vonë avantazhin 1-0, me anë të Ngosë në sekondat e fundit të pjesës së parë, dhe po ashtu edhe suksesin final.

Korçarët, që kanë ende një lloj hijeje të rëndë nga e kaluara, barazuan papritur me anë të Pollozhanit, dhe u duk se mund ta merrnin barazimin, për të mos u shkëputur shumë nga kreu i tabelës.

Nuk ia dolën dhe kjo erdhi logjikshëm, pasi Tirana pati më shumë cilësi, po ashtu një stol me më shumë alternativa.

Goli më të rëndësishëm, atë të avantazhit 2-1, e shënoi djali i presidentit, Grent Halili, që minutat në fushë i ka për meritë të tij, dhe jo të babit.

Kaq u desh, dhe bardheblutë mbyllën gjithçka më pas, me golin e tretë të shënuar nga Hoxhallari.

Tirana ka 10 pikë pas 4 ndeshjeve, një seri rezultatesh që nuk ishte parë prej kohësh dhe tifozët mund të mendojnë seriozisht për titullin, që nuk fitohet që nga viti 2009./ABC News Albania 24/7

islande.jpg
ad min12:54 | 10/09/2019

Shqipëria do të luajë sonte në mbrëmje ndaj Islandës në duelin e vlefshëm për kualifikueset e Euro 2020. Trajneri Edi Reja do të bëjë disa ndryshime nga ndeshja e fundit me Francën.

Kombëtarja shqiptare sfidon Islandën në ndeshjen e radhës kualifikuese për Euro 2020. Kuqezinjtë nuk janë në momentin më të mirë për t’u përballur me islandezët, të cilët kanë grumbulluar 12 pikë po aq sa Franca dhe Turqia.

Fitorja do të rikthente qetësinë tek kuqezinjtë, të cilët janë kritikuar jo pak pas humbjes me Francën edhe pse ishte një disfatë e justifikueshme përballë kampionëve të botës.

Trajneri italian Edy Reja ka paralajmëruar disa ndryshime në organike për sfidën ndaj Islandës ndërkohë që skema taktike do të jetë 3-5-2. Në portë do të startojë Strakosha ndërkohë që në mbrojtje do të ulet në stol Mavraj dhe do të startojë nga minuta e parë Dermakun.

Në linjat anësore do të vendosen Hysaj dhe Lenjani, i cili do të zëvendësoje Roshin. Në mesin e fushës konfirmohet Keidi Bare, i cili do të luajë përkrah Gjasulës ndërkohë që ka balotazh mes Memushaj dhe Xhakës.

Sa i përket fazës sulmuese konfirmohet Sokol Cikalleshi, i cili do të luajë përkrah njërit mes Uzunit dhe Manaj. Tekniku italian është optimist për këtë duel madje zbuloi në konferencën për shtyp se do të kërkojë nga lojtarët një lojë sulmuese pasi skuadra nuk ka asgjë për të humbur.

Ndaj islandezëve nuk do të jetë aspak e lehtë pasi këta të fundit janë në garë për kualifikim dhe ndaj Shqipërisë do të luajnë vetëm për fitore. Shqipëria do të shfrytëzojë faktorin fushë dhe mbështetjen e tifozerisë që nuk ka munguar si brenda ashtu edhe në transfertë. Kuqezinjtë renditen në vendin e katërt në grupin H ne kuotën e 6 pikëve./ABC News Albania 24/7

khabib.jpg
ad min17:59 | 08/09/2019

Rusi Habib Nur Magomedov arriti një tjetër fitore të madhe në karrierë. Kampioni i arteve të përziera marciale mund amerikanin Puarje, në ndeshjen e luajtur në Abu Dabi.

E quajti veten “mbreti i xhunglës” pas fitores ndaj Konor Mekgregorit, dhe e mbrojti këtë epitet edhe në rikthimin që bëri pas dënimit. Habib Nurmagomedov, një dagestanas i Rusisë, triumfoi ndaj rivalit të radhës, Dastin Puarie, në një spektakël që u zhvillua në një Arenë të Abu Dabit.

Kampioni i peshave të lehta tashmë ka 28 fitore dhe asnjë humbje, në karrierën e tij në oktagon. Në moshën 31-vjeçare është emri më i madh i Botërorit të UFC-së, ndonëse mendon se nuk po merr vlerësimin e merituar, ndonëse ka humbur vetëm një raund në gjithë jetën si luftëtar i arteve të përziera marciale.

“Ka diçka shumë interesante në këtë sport, – deklaroi ai pas fitores, – mund të kesh bilancin 28-0, mund të fitosh ndaj çdo kundërshtari, dhe sërish njerëzit thonë se “duhet të ndeshesh me këtë apo me atë”. Ju lutem, kërkoj prej jush vetëm respekt. Unë duhet të jem luftëtari numër 1 për të gjitha peshat, sepse unë i dominoj kundërshtarët, unë jam i pathyer. Meritoj respekt”.

Amerikani Puarie e përballoi ndeshjen deri në 3 raundin e tretë, duke arritur ta godiste disa herë rusin me grushtet e tij, por nuk mundi të përballonte specialitetin e kundërshtarit në mundje.

Plot 16.500 spektatorë në sallën e ishullit të Abu Dabit ishin me Nurmagomedovin, që është mysliman, dhe ka statusin e heroit në Lindjen e Mesme. Prej tij, shumë të rinj mbajnë në kokë një kokore të quajtur Papaha (Papakha), dhe sporti i tij është bërë popullor në vendet arabe.

Pas suksesit, Nurmagomedov pati vlerësim nga shumë kampionë, ndërsa irlandezi Konor Mekgregor e ftoi për një ndeshje të dytë, që duhet të luhet në Moskë. Pak muaj më parë, Nurmagomedovi u shpall kampion i botës në UFC pas fitores pikërisht ndaj Mekgregorit./ABC News Albania 24/7

kosova.jpg
ad min17:48 | 07/09/2019

Kosova arriti një fitore të madhe në Prishtinë ndaj Republikës Çeke, duke hedhur një hap drejt kualifikimit për në Euro 2020. Skuadra e trajnerit Shaland ia doli me përmbysje në stadiumin “Fadil Vokrri”.

E kishte treguar edhe më parë, por po bind gjithnjë e më shumë. Kosova është një fuqi e re e futbollit kontinental,  duke iu afruar mjaft kualifikimit për në finalet e Europianit.

Skuadra tjetër shqiptare, më e reja në botë, nuk tregoi asnjë lloj kompleksi as ndaj Republikës Çeke me shumë traditë, duke e përmbysur në stadiumin “Fadil Vokrri” të Prishtinës, e duke u ngjitur në krye të grupit A.

Të besuarit e trajnerit Shaland nuk u tronditën as nga goli i shpejtë shënuar nga çekët, madje u përgjigjën menjëherë. Vedat Muriqi, sulmues i Fenerbahçes, ishte autori i rrjetës së barazimit, që i hapi rrugën më pas fitores.

Duhet thënë se gjithçka ishte e merituar, dhe jo vetëm nga fakti që Vojvoda realizoi në mënyrë vendimtare në minutën e 66-të. Kosova ishte superiore dhe tregoi më shumë klas në fushën e lojës.

Jo më kot, në ekipin e saj përfaqësues ka lojtarë të kalibrit si portieri Muriqi, mbrojtësit Rrahmani e Vojvoda, mesfushorët Zhegrova, Muslija, Berisha e Celina, apo sulmuesi Muriqi.

Kosova diti edhe që të vuajë për të përballuar përvojën më të madhe të kundërshtarit, duke sulmuar e duke u mbrojtur në bllok. Tashmë, ajo ka 8 pikë pas 4 ndeshjeve, me 7 gola të shënuar e vetëm 1 të pësuar, e duke mos provuar shijen e humbjes në një grup me Anglinë, Çekinë, Bullgarinë apo Malin e Zi./ABC News Albania 24/7

leclerc.jpg
ad min21:26 | 01/09/2019

Sharl Lëklerk i Ferrarit fitoi garën e Belgjikës në Formula 1, duke arritur triumfin e parë në karrierë. Piloti 21-vjeçar ia dedikoi suksesin francezit Hyber, që humbi jetën një ditë më parë.

Nuk ishte e lehtë që të garoje pas asaj që ndodhi. E shtuna ishte një ditë e tmerrshme në pistën e Spa-Frankorshampit në Belgjikë, dhe e diela spektakolare nuk mund t’i shuante imazhet e tmerrit.

Këto janë garat e shpejtësisë, që i morën jetën një tjetër njeriu, një biri nëne të quajtur Antuan Hyber, dhe pavarësisht lirisë së njeriut për të bërë atë që i pëlqen, le të shpresojmë që një ditë t’i thuhet stop gjithçkaje që rrezikon ekzistencën e tij, me përjashtim të rasteve kur të jetë e domosdoshme.

Tragjedia e francezit Hyber ndodhi në Formula 2, dhe ishte e para në garat me makina që nga shuarja e francezit tjetër, Zhyl Blanshi, në Japoni pesë vjet më parë. Pilotëve të elitës, atyre të Formula 1, nuk u mbeti veçse të nderonin shokun e kolegun e tyre në garën e së dielës.

Çmimi i Madh i Belgjikës ishte vërtet I bukur, një bukuri që siç thotë Ljuis Hamiltoni, i bën njerëzit të harrojnë rreziqet, ndërsa pati një fitues të ri. Sharl Lëklerk i Ferrarit arriti triumfin e tij të parë në karrierë në Botërorin e Formula 1, duke i dhënë kënaqësi vetes, por edhe skuadrës italiane që nuk ishte lumturuar shumë së fundmi.

Piloti 21-vjeçar nga Montekarlo bëhet kështu një nga më të rinjtë që ngjitet në kulmin e podiumit dhe bashkë me Maks Verstapenin quhen me të drejtë e ardhmja e sportit.

Lëklerk i ka marrë tashmë flamurin pilotit tjetër të Ferrarit, Sebastian Fetel, dhe duket se do të jetë ai numri 1 në vazhdim. Rrezikun e vetëm për fitoren, ai e pati nga Ljuis Hamilton, kampioni i botës që siç e ka traditë nuk dorëzohet deri në fund.

Në një pistë të shpejtë, të favorshme për Ferrarin, ai pilotoi shkëlqyeshëm me Mercedes duke kërkuar fitoren deri në kthesën ë fundit. Fitoi Lëklerk, por gara shkoi më shumë në favor të anglezin 34-vjeçar që thelloi epërsinë në krye të renditjes ndaj shokut të skuadrës, Botasit, në 65 pikë, me 268 ndaj 203.

Lëklerku ia dedikoi fitoren fatkeqit Hyber, ndërsa ia vlen të kujtohen fjalët e Ernest Heminguejt se “vetëm lufta me dema, garat e shpejtësisë dhe alpinizmi janë sporte, të tjerët janë thjesht lojëra”./ABC News Albania 24/7

pqqqduhsrugirc6igqr6.jpg
ad min11:10 | 22/07/2019

Fitorja e radhës ajo e së dielës për presidentin e Ukrainës Volodymyr Zelensky. Partia e këtij të fundit fitoi me një rezultat historik në zgjedhjet e përgjithshme në vend. Por pavarësisht kësaj, Zelenski ka nevojë për një aleat pasi nuk ka mazhorancën e plotë në parlament.

Ukrainasit i kanë dhënë Presidentit të tyre filo – perëndimor, Zelensky, një mandat për të rinisur politikën e vendit. Sipas rezultateve ish aktori komik ka marrë 43.9 për qind të votave. Partia “Shërbëtor i Popullit”, regjistron në këtë mënyrë një rezultat rekord në zgjedhjet parlamentare të së dielës, që nga moment kur Ukraina ka marrë pavarësinë pas shpërbërjes së Bashkimit Sovjetik.

Me 11.5 për qind të votave ka ndaluar partia e manjatit Viktor Medvedchuk, i konsideruar një njeri shumë i afërt me presidentin rus Putin dhe mbështetës i autonomisë për zonat e kontrolluara nga rebelët filo rusë në Ukrainën lindore. Për Zelensky kjo është një fitore e dytë pas asaj të muajit prill kur mundi presidentin e atëhershëm Petro Poroshenko. Partia e këtij të fundit, Solidariteti Evropian, nuk mori as 10 për qind të votave.

Në reagimin e tij të parë pas publikimit të rezultateve, presidenti ukrainas Zelensky u shpreh se ky ishte një rezultat që tregonte besimin e madh që populli ukrainas kishte në partinë e tij. Më pas ai shtoi se ndër prioritetet e tij renditeshin ndalimi i luftës, lirimi i të burgosurve dhe lufta ndaj korrupsionit.

Por dhe pse një rezultat i jashtëzakonshëm ky mund të mos mjaftojë për një mazhorancë të fortë, duke detyruar Zelensky që të zgjedhë një aleat. Nga 424 vende në parlament, 225 do të zgjidhen në mënyrë proporcionale me pragun e 5%, pra duke u mbështetur në rezultatet e çdo partie./ABC News Albania 24/7

lefter-maliqi.jpg
ad min18:30 | 08/07/2019

Deputeti i opozitës, Lefter Maliqi foli me tone të ashpra në fjalën e tij të mbajtur në seancën e posaçme parlamentare këtë të hënë. Ai deklaroi se deputetët e opozitës edhe pse thanë që do e abstenojnë rezolutën për shkarkimin e Presidentit të Republikës votuan pasi folën me drejtues të mazhorancës.

Në lidhje me zgjedhjet e 30 Qershorit, Maliqi tha se qeveria nuk e kupton gabimin dhe se humbjen e quan fitore. Ai i bëri thirrje opozitës që të ngrihen në revoltë demokratike që ta rrëzojnë qeverinë e lidhur me krimin sipas tij.

“Unë i bëj thirrje këtyre deputetëve të opozitës së re, meqenëse këta që thonë që nuk janë pjesë e PS-së, oksigjen i PS-së, të shikojmë sot si do votojnë prapë se i pashë dhe një ditë që të gjithë në një kohë thanë do abstenojmë dhe pas 40 minutash Taulanti me të tjerë i kapi grupe-grupe dhe votuan rezolutën për shkarkimin Presidentit të Republikës. Ky është një turp.

Unë i bëj thirrje të gjithë shqiptarëve edhe opozitës jo të ngrihen me protesta një orë dhe dy orë, por me revoltë demokratike popullore deri në rrëzimin përfundimtar të kësaj qeverie të lidhur me krimin. Koha është sot, nesër është vonë. Këta nuk e kuptojnë gabimin, këta humbjen e quajnë fitore, dështimin e quajnë triumf. Është turp kush na drejton, është turp kush udhëheq këtë popull me krim, banda, korrupsion dhe me radhë”, tha Maliqi.

Kuvendi është mbledhur këtë të hënë në një seancë të posaçme parlamentare ku pritet të votojë për ngritjen e një komisioni hetimor që do të hetojë shkeljet e pretenduara të Kushtetutës nga ana e Presidentit Meta./abcnews.al

edi-rama-3.jpg
ad min18:20 | 08/07/2019

Gjatë fjalës së tij në Kuvend këtë të hënë, Kryeministri Rama komentoi edhe deklaratat e opozitës në lidhje me pjesëmarrjen në zgjedhjet e 30 Qershorit. Kreu I qeverisë deklaroi se e ka ditur që opozita do të përdorte emigrantët, shqiptarët në shtëpi dhe ata në plazh si mbështetës të revolucionit imagjinar sipas tij.

Sipas Ramës, pjesëmarrja e 30 Qershorit ka tejkaluar çdo pritshmëri të mazhorancës. Leximi gabim i këtyre zgjedhjeve nga opozita sipas Ramës e tregon qartë që ajo nuk ka asnjë shans të fitojë në zgjedhjet e përgjithshme që do të zhvillohen në vitin 2021.

“I kam ndjekur ndërkohë me një ndjenjë mëshire budallallëqet e fallxhores Monikë dhe akrobacitë e artistit Lul që sëbashku me mufkat e Haxhiut Sali që me shfajësimet e hatashme për disfatën e tyre deri tek fajësimet e dëshpëruara në adresën tonë lidhur me pjesëmarrjen e ulët në zgjedhje me raportin paraprak të misionit të ODIHR.

Fatmirësisht e kam thënë disa herë gjatë fushatës se lufta e tyre për të prishur zgjedhjet me dhunë do të rezultonte një vrimë me ujë, por kjo nuk do i pengonte ata të shpallnin fitoren e radhës. E kam ditur se do t’i përdornin si mbështetës të revolucionit imagjinar shqiptarët jashtë shtetit, shqiptarët në shtëpi, shqiptarët në palzh. E vetmja gjë që s’kam menduar është që do mendon gabim estradë hesapi 7 herë 7 = 42. S’ka më keq se humbësit se sa të sillen si fitimtarë dhe s’ka më mirë se fituesit se sa humbësit që s’duan ta kuptojnë pse kanë humbur.

85% popullit refuzoi Ramën thonë të shkretët. Janë këta që thonë që të tërë shqiptarët kanë ikur nga Shqipëri, por kjo s’i pengon që t’i llogarisin të tërë si prezentë në Shqipëri 30 Qershorin e fundit. Janë po këta që e kundërshtojnë dem baba dem përfshirjen e votës së emigrantëve në Kodin Zgjedhor, por me këtë rast ritheksoj bindjen tonë se emigrantët duhet ta kenë të drejtën e votë, duke filluar nga zgjedhjet e ardhshme dhe  duan apo nuk duan udhëheqësit e opozitës rrugore ne do ta përfshijmë votën e emigrantëve në Kodin Zgjedhor. Uroj edhe me dakordësinë e opozitës parlamentare.

Pjesëmarrja e 30 Qershorit ka tejkaluar çdo pritshmëri tonën. E kemi marrë një përqindje me të lartë votash seç kishte koalicioni fitues që qeverisi Shqipërinë në vitin 2015. Kemi marrë një numër më të madh votash për kandidatët se sa pritshmëria jonë më optimiste nga një garë kur gjysma e tyre nuk kishin kundërshtarë. Krahasuar me kaur vjet më parë, kur ishim me kandidatë  të përbashkët me LSI-në, ku numër është 4% më pak. Po të kishte qenë një garë normale dhe pa presionin e lartë dhe kriminal me muaj të tërë dhe deri natën e fundit me zgjedhjet padyshim që kjo përqindje do të ishte më e lartë se viti 2015. Ta lexosh si refuzim popullor ndaj meje, ndaj nesh përqindjen krejt normale të pjesëmarrjes në këto zgjedhje të bombarduara me kërcënime dhe ta shohësh rezultatin tonë si tkurrje elektorale e shumicës qeverisëse do të thotë jo thjeshtë se s’di ça flet, por të mos kuptosh se çfarë vjen më mbrapa. Në fakt qoftë zhvillimi i zgjedhjeve, qoftë rezultati ynë, po qoftë dhe analfabetizmi politik dhe verbëria kronike e udhëheqjes opozitare e tregojnë qysh sot se pse ajo opozitë s’ka asnjë shans të rikthimit te fitorja, zero në zgjedhjet e vitit 2021”, tha Rama.

Rama komentoi edhe raportin e OSBE/ODIHR mbi zgjedhjet ku tha se ka pasqyruar me korrektësi një proces anormal. Ai theksoi se mazhoranca do ta depolitizojë administratën zgjedhore, ndërkohë që mbrojti edhe Komisionin Qendror të Zgjedhjeve. Sipas Ramës KQZ-së nuk i mbeti rrugë tjetër përveçse të rezistojë duke mbrojtur frymën e Kodit Zgjedhor./abcnews.al

brasil-1.jpg
ad min15:25 | 23/06/2019

Brazili më në fund i bindi tifozët me lojën e tij në Kupën e Amerikës. Skuadra vendase fitoi 5-0 ndaj Perusë duke u kualifikuar për në çerekfinale

Në stadiume e kishin vërshëllyer shumë, por gjithsesi dashuria nuk ishte zhdukur. Brazilianët e quajnë të shtrenjtë kombëtaren e futbollit dhe e treguan kur e pritën me shumë ngrohtësi në Sao Paulo, ku shkoi për ndeshjen ndaj Perusë në Kupën e Amerikës.

Tifozët nxitën idhujt e tyre që të bënin më shumë sesa thjesht të fitonin. Diçka të tillë duket se ua kërkoi edhe ylli i dëmtuar, Neymar, që nuk ngurroi të vizitonte shokët e skuadrës, për t’i dhënë zemër, dhe për t’u thënë se ndodhej gjithnjë pranë tyre.

E gjitha kjo duket se ndikoi për mirë tek lojtarët e përzgjedhur nga trajneri Tite, që bënë pikërisht atë që pritej në Arenën Korinthians. Në prani të mbi 42 000 spektatorëve, pesë herë kampionët e botës shënuan pikërisht pesë gola, duke fituar 5-0, e duke u kualifikuar në vendin e parë në grup.

Lojtari i Realit, Casemiro, hapi rezultatin që në minutën e 11-të, Firmino i Liverpool-it shënoi golin e dytë dhe Everton thelloi epërsinë brenda pjesës së parë. Pas pushimit, Dani Alves dhe Ëillian vulosën shifrat.

“O Globo”: Brazili bombardon Perunë dhe del i pari në grup! Për t’u mbajtur mend, Firmino e Dani Alves festojnë në fushë, që të dy shënuan në fitoren në Arenën Korinthians!

“Estado de Minas”: Më në fund! Brazili luan mirë dhe kualifikohet me goleadë!

“O Dia”: Ishte siç duhet! Me një lojë shumë të mirë, Brazili shemb me gola Perunë dhe kalon si i pari në grupin A!

Brazili cilësohet si favorit për fitoren finale në Kupën e Amerikës, ndonëse kundërshtarët si Kili apo Uruguai do të përpiqen të shkaktojnë të papriturën./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono