finale

nadal123.jpg
ad min11:47 | 09/09/2019

Rafael Nadal është tani vetëm 1 Grand Slem larg rekordit të Rozher Federerit. Tenisti spanjoll triumfoi në Nju Jork, pas një finaleje të jashtëzakonshme ndaj rusit Medvedev.

E meriton vlerësimin si finale epikë. E tillë ishte ajo e US Openit, në Arenën e shkëlqyer “Arthër Ejsh” në Nju Jork, ku Rafael Nadali triumfoi pas një drame ndaj Danil Medvedevit.

Mendohej, ndoshta, një duel më normal, por spanjolli dhe rusi dyluftuan në fushë për gati 5 orë, duke mos dashur të pranonin humbjen. Nadali fitoi dy setet e parë, 7-5 e 6-3, dhe u mendua se do të dominonte siç ka bërë shpesh.

E kundërta ndodhi, pasi Medvedevi reagoi dhe mori dy setet e radhës, 7-5 e 6-4. Në setin përfundimtar, tenisti rus i mori shërbimin spanjollit, por 33-vjeçari u përgjigj menjëherë.

Gjithsesi, ekuilibri u ruajt gati deri në fund, me Nadalin që shënoi pikët vendimtare. Ky ishte Grand Slemi i 19-të i tij në karrierë, vetëm 1 larg rekordit të Rozher Federerit.

“Për një moment e mendova humbjen, – pohoi Nadali, – kur humb shërbimin në setin e pestë, pasi ke humbur dy sete radhazi, padyshim që je në telashe. Gjithsesi, unë gjithnjë i largoj mendime të tilla, gjithnjë besoj se kam shanse për të fituar. Megjithatë, unë isha gjatë gjithë kohës në avantazh, unë e kam shumë të vështirë të mendoj se do të humbas. Unë luaj tenis sepse e dashuroj këtë sport, jo për rekordin e Grand Slemeve”.

Tenisti rus ishte gjithashtu një fitues në finale, pasi nga armiku numër 1 i publikut amerikan, ai mori brohoritjet dhe thirrjet e 24 000 tifozëve në Arenën “Arthër Ejsh”.

“Ishte një ndeshje mahnitëse, – u shpreh Medvedevi, – një histori e shkëlqyer. Në setin e tretë po mendoja se çfarë fjalimi duhet të mbaja pas humbjes, por pastaj u përqëndrova tek çdo pikë. Natyrisht, isha afër fitores, ndonëse nuk e arrita. Jam i zhgënjyer me rezultatin, por jo me paraqitjen time në US Open. Kam bërë edhe gabime, por unë jam njeri, ndërsa çdo sukses e kam arritur prej tifozëve”.

Nadal do të ketë shansin për të barazuar rekordin e Federerit, në janar 2020, në Grand Slemin e radhës në Australian Open./ABC News Albania 24/7

xherdanshaqqqq1-702x459.jpg
ad min12:30 | 05/08/2019

Skuadra e Manchester City fitoi në finalen e Communty Shield përballe Liverpool. Koha e rregullt u mbyll në barazim 1-1 ndërkohe që City u tregua më i saktë në serinë e 11 metërshave.

Skuadra e Manchester City e nis mbarë sezonin e ri. Të besuarit e teknikut Pep Guardiola fituan në finalen e Communty Shield përballe Liverpool. Koha e rregullt u mbyll ne barazim 1-1 ndërkohe që kampionët e Anglisë u treguan më të saktë nga goditjet e penalltive.

Skuadrat luajtën hapur dhe krijuan raste të shumta shënimi. Rahem Sterling kaloi në avantazh Manchesterin në minutën e 12. David Silva asistoi saktë për ish sulmuesin e Liverpool, i  cili u tregua i saktë përballë portierit Alison. Tek “the reds” autori i golit mban firmën e mbrojtësit shtatlarte Matip i cili e dërgoi ndeshjen në shtesë. Në serine e 11 metërshave u treguan më të sakte futbollistët e Manchester City të cilët fituan me rezultatin 5-4. Xherdan Shaqiri mori i pari iniciativën dhe u tregua i saktë. Në radhët e Liverpool i vetmi që gaboi ishte Vinaldum pasi goditja e tij u prit nga portieri Klaudio Bravo.

Liverpool vijon të mos fitojë ende një trofe në futbollin anglez ndërkohë që City vijon dominimin nen drejtimin e Pep Guardioles./ABC News Albania 24/7

england-1280x960.jpg
ad min14:30 | 03/07/2019

Kombëtarja amerikane u kualifikua mes polemikave për në finalen e Botërorit të femrave. Suksesi ndaj Anglisë u shoqërua me kritika për festimin e njërit prej golave.

Fitore e vogël për një sukses të madh. Kombëtarja e futbollit të femrave të Shteteve të Bashkuara të Amerikës u kualifikua edhe një herë tjetër për në ndeshjen fundore të një botërori, për në finale, dhe do të synojë një tjetër titull.

Superfuqia e topkëmbës së vajzave arriti të kalonte, edhe pse me shumë vështirësi, “hirushen” e turneut francez, Anglinë, me shifrat 2-1, duke iu falur edhe portieres Alisa Neher, që priti në fund një penallti.

Në mungesë të njërës prej kapiteneve, rebeles Megan Rapinou, SHBA e nisi ndeshjen me “blickrig”, duke shënuar që në minutën e 9-të, me anë të asaj që zëvendësoi Rapinoun, Kristen Pres.

Amerikanet, me futbollin e tyre agresiv tip-Barcelona apo tip-Liverpuli, kishin shënuar brenda 12 minutave të para në çdo ndeshje të këtij Botërori, dhe e bënë përsëri, këtë herë në stadiumin e Lionit.

Gjithsesi, Anglia nuk u dorëzua, edhe pse në mungesë të portieres Karen Bardslej. Golashënuesja e dalluar Elen Uajt barazoi shifrat duke dhënë shpresë, por Aleks Morgan realizoi golin e fitores për SHBA-në.

Pas kësaj rrjete pati një reagim të ashpër në rrjetet sociale, për shkak të festimit të amerikanes sikur pinte një gotë çaj, një lloj talljeje me traditën e njohur angleze.

Komentet, qoftë të anlistëve nëpër studiot televizive, qoftë edhe të tifozëve në rrjetet sociale, ishin të gjitha kundër Morganit, duke e quajtur mungesë respekti, dhe pa shije, veprimin e saj.

Uajt shënoi një tjetër gol për Anglinë, por që u anulua me VAR, ndërsa 7 minuta para fundit, kombëtarja britanike u godit nga mallkimi i penalltive. Kapitenia Stef Hauton gaboi, ashtu siç kishte bërë dy herë gjatë Kupës së Botës edhe Nikita Parris, dhe ashtu siç kishte vuajtur kombëtarja e djemve që nga viti 1990.

“Kjo ishte fitorja jonë më e vështirë për të arritur një finale, – pohoi trajnerja amerikane, Xhill Elis, – Anglia ishte e fortë, ashtu siç e prisnim, por ia dolëm dhe mendoj se e merituam. Shpresoj ta përfundojmë punën dhe të fitojmë kupën”.

“Nuk dua lot, por buzëqeshje nga lojtaret e mia, – tha trajneri anglez, Fil Nevil, – dhamë shpirtin në fushën e lojës, bëmë maksimumin, dhe mund të kishim fituar. Ne bëmë krenar kombin tonë dhe unë nuk mund të kërkoja më shumë. Le të fitojmë medaljen e bronzit, dhe të ecim përpara”.

Skuadra amerikane nuk pati yllin kryesor, sulmuesen Megan Rapinou, e cila ishte e dëmtuar.

Rapinou, një personalitet që ka krijuar polemika për shijet e saj seksuale dhe për kritikat ndaj presidentit amerikan Trump, deklaroi se do të bënte çmos për të qenë gati për finalen, pavarësisht dëmtimit në këmbë. SHBA do të kërkojë tani titullin e 4-ët botëror, për të thelluar rekordin e vet./ABC News Albania 24/7

toronto-1.jpg
ad min14:16 | 08/06/2019

Toronto është në prag të titullit kampion në basketbollin amerikan. Skuadra kanadeze triumfoi sërish në fushën e kampionës në fuqi, Golden Stejtit, dhe kryeson 3-1.

Në prag është diçka krejtësisht e re. Një skuadër jo amerikane është vetëm një hap larg fitores së titullit në atë që quhet liga amerikane e basketbollit, pra në NBA.

Toronto Raptors arriti një tjetër fitore të madhe, sërish në fushën e kampionëve të Golden Stejtit duke marrë epërsinë 3-1 me ndeshje, ndërsa trofeu mund të shkojë për herë të parë në Veri, në Kanada.

Dueli i radhës luhet pikërisht në Toronto, pra gjasat janë të gjitha që mrekullia të realizohet. Fitorja e miqve ishte bindëse 105-92, madje me përmbysje, gjë që flet shumë për karakterin dhe talentin e mëtuesve të rinj.

Koui Leonard po bën realitet atë që nuk mundi ta arrinte tek San Antonio e famshme e Greg Popoviçit, dhe ishte sërish një udhëheqës. Ai shënoi 36 pikë dhe kapi 12 topa në tabela, duke shtuar vetëm 2 pasime për kosh, por 4 vjedhje topi dhe një bllokim gjuajtjeje.

Për fat, ai u mbështet fort nga Paskal Siakam, Kajl Louri e Serg Ibaka, ndërsa kontribut të rëndësishëm dha qendra spanjolle Mark Gasol, si dhe Fred Vanvlit.

Ç’po ndodh me kampionët?

Golden Stejti e pati në parket kapitenin Klej Tompson, të kthyer nga dëmtimi, dhe ai luajti shumë mirë duke shënuar 28 pikë, me 6 gjuajtje tripikëshe. Stefën Kërri nuk ishte keq, dhe pati 27 pikë, por gaboi shumë në gjuajtje, ndërsa vetëm Drejmond Grin ishte në lartësinë e detyrës, nga pjesa tjetër e skuadrës.

Ai ishte pranë një tripëll dabëlli, me 10 pikë, 9 tabela e 12 asistë. Vendasit ishin deri në 12 epërsi në pjesën e parë, por fitorja u shpëtoi nga duart. Shpresa e vetme ndoshta është kthimi më në fund i Kevin Durantit, për ta ndihmuar ekipin në momentin më të vështirë.

Siç theksuan pas ndeshjes Kërri e Grin, Golden Stejti ka qenë në fitore 3-1 në të kaluarën dhe ka humbur titullin, pra këtë herë mund të ndodhë e kundërta. Veçse, ai që ua mori atë titull quhej Lebron Xhejms, pra kampionët duhet të imitojnë Lebronin që t’ia dalin. Ndeshja e pestë luhet në Toronto mëngjesin e së martës./ABC News Albania 24/7

golden-state-1280x720.jpg
ad min11:44 | 03/06/2019

Golden State barazoi rezultatin në finalen e madhe të basketbollit amerikan. Fitorja në fushën e Torontos ishte e vështirë, ndërsa u dëmtua edhe kapiteni Thompson.

Nuk dorëzohen kurrë, por edhe hallet nuk u mbarojnë asnjëherë. Kampionët e NBA-së, basketbollistët e Golden State, barazuan rezultatin në finalen e madhe ndaj Torontos, duke fituar ndeshjen e dytë në Kanada, por edhe duke pësuar dëmtimin e kapitenit Clay Thompson.

Nuk dihet ende sesa i rëndë është lëndimi i tij, por mungesa e një lojtari të tillë, padyshim ia rrezikon mbrojtjen e titullit. Thompson shënoi 25 pikë në 32 minuta lojë, në fitoren 109-104, ndërsa Stephen Curry shtoi 23 pikë të tjera.

Draymond Green ishte në nivelin që kërkohej me 17 pikë, 10 topa në tabela, 9 asistë, 2 vjedhje topi e 1 bllokim gjuajtjeje, por një rikthim i rëndësishëm ishte ai i qendrës Demarcus Couzins, që pati 11 pikë, 10 topa në tabela e 6 asistë në 27 minuta në parket.

Gjithsesi, Kevin Durant nuk luajti, nuk dihet nëse do të luajë në ndeshjen e tretë, ashtu siç është në dyshim edhe kapiteni Thompson. Toronto luftoi fort dhe ishte në epërsi deri në 12 pikë gjatë gjysmës së parë të ndeshjes.

Në periodën e tretë, siç edhe mendohej, Uorriorsët reaguan dhe patën një rezultat të pjesshëm 18-0, duke kaluar në avantazh, e duke mos u arritur më. Koui Leonard ishte më i miri në fushë, duke realizuar 34 pikë për Toronton, plus edhe 14 topa në tabela, por mori më pak ndihmë nga shokët se zakonisht.

Ndeshja e tretë luhet në fushën e Golden State-t, në Arenën e Oakland-it, mëngjesin e 6 qershorit./ABC News Albania 24/7

xhaka.jpg
ad min19:01 | 30/05/2019

Arsenali humbi të mërkurën finalen e Europa League ndaj Chelsea-t. Përveç kupës, fitorja do t’u sillte edhe një kualifikim në Champions League lojtarëve të Unai Emery, por në fund mbeti vetëm zhgënjimi.

Kështu ndihej edhe lotari me origjinë shqiptare i Arsenalit, Granit Xhaka. Ai ka zbuluar për mediat britanike se çfarë ndodhi në dhomat e zhveshjes pas përfundimit të ndeshjes.

“Trajneri, lojtarët, askush nuk fliste në dhomat e zhveshjes”, tha Xhaka.

Futbollisti iu përgjigj edhe pyetjes nëse e dinte arsyen se pse Emery nuk foli asgjë.

“Nuk e di. Ishte i zhgënjyer me siguri. Mendoj se e dimë si luajtëm. E dimë që humbëm ndeshjen. Nuk ka të bëjë me të bërtiturat sa herë që humbasim. Mund të thoni gjithçka tani, por nuk është koha për të shpjeguar pse dhe çfarë ndodhi në fushën e lojës. Mendoj se ishte një mundësi e madhe për ne, të cilën nuk e kapëm dot”, përfundoi sulmuesi i Zvicrës.

Chelsea arriti të fitonte 4-1 ndeshjen që u luajt në Baku të Azerbajxhanit. Për “Blutë” shënuan Pedro, Giroud dhe dy herë Hazard. Ndërsa golin e nderit për “Topçinjtë” e shënoi Iwobi./abcnews.al

golden-state.jpg
ad min11:39 | 21/05/2019

Golden State do të luftojë sërish për titullin në basketbollin amerikan. Kampionia në fuqi eleminoi Portlandin, edhe pse i mungoi sërish Kevin Duranti.

Pesë finale të mëdha radhazi. Vetëm Boston Celtics ka arritur më shumë, ndaj Golden Sate Warriors duhet të jetë shumë krenare. Kampionia në fuqi e NBA-së do të luajë sërish për titull, pasi fitoi Konferencën Perëndimore.

U fitua edhe ndeshja e katërt, luajtur sërish në Portland, dhe u arrit ajo që në zhargonin amerikan quhet “fshesa”, apo “fshirja”, pra fitorja 4-0.

Golden State fitoi sërish respektin maksimal të basketbollit amerikan, të publikut dhe të analistëve, pasi nuk deshi të dinte nga mungesa e atij që mund të quhet ylli kryesor, Kevin Durant, të dëmtuar.

Suksesi ishte si në kohët e vjetra, mbështetur tek treshja Stephen Curry-Clay Thompson-Draymond Green, si dhe nga loja thellësisht kolektive. Fitorja e ndeshjes së katërt ishte 119-117, falë një tripëll dabëlli nga Stef Curry, me 37 pikë, 13 topa në tabela e 11 pasime për kosh.

Kapiteni Thompson pati 17 pikë, 6 topa në tabela, asiste e 2 vjedhje topi.

“Ne kemi qenë edhe më përpara në një pozitë të tillë, – u shpreh Curry, – kemi pasur 3 lojtarë kryesorë të dëmtuar, por secili prej nesh luajti edhe më fort deri në fund. Ne fare mirë mund të kishim pritur për ndeshjen e pestë, por nuk deshëm të prisnim kaq gjatë, ndaj vendosëm ta provonim”.

Curry vlerësoi lart lidhjen me Drejmond Green-in, duke theksuar besimin e ndërsjelltë që ata kanë tek njëri-tjetri. Green ishte gjithashtu vendimtar, duke realizuar edhe ai një tripëll dabëll, me 18 pikë, 14 topa në tabela e 11 pasime për kosh.

Jo vetëm kaq, por ai pati 3 vjedhje topi dhe dy bllokime gjuajtjesh, ndërsa është transformuar në mungesë të Durantit. Gjatë sezonit, Grin dhe Durant patën përplasje, dhe kjo mund të jetë një nga arsyet që ky i fundit thuhet se dëshiron të largohet nga Golden State, ndoshta tek Nju Jorku. Tashmë, kampionët presin finalistin nga Lindja, që do të përcaktohet nga dueli Toronto-Miluoki./ABC News Albania 24/7

Madona.jpg
nev ila11:14 | 17/05/2019

Është fakt tashmë se Madonna ka mbërritur në Tel Aviv dhe po përgatitet për paraqitjen e saj në Eurovision 2019.

Në një njoftim zyrtar të medias së Eurovizionit, u njoftua zyrtarisht se në finalen e madhe të së shtunës do të performojë superylli botëror Madonna.

O zot i madh Madonna, superstari botëror, do të performojë në natën finale të Eurovisionit”, është njoftuar nga mediat zyrtare të Eurovision në Twitter.

Në këngën e Eurovisionit këtë vit merr pjesë edhe këngëtarja shqiptare Jonida Maliqi, me këngën “Ktheju tokës”. Jonida Maliqi ka elektrizuar skenën e “Eurovizion 2019” në Tel Aviv të Izraelit.

Këngëtarja shqiptare me “Ktheju tokës”, ka mundur që të kualifikohet duke çuar Shqipërinë në finalen e Eurovison.

Kënga e përfaqësueses së Shqipërisë është një himn dhe thirrje drejtuar emigrantëve për të dashur vendet e tyre.

Bashkë me Shqipërinë u kualifikuan edhe  Maqedonia e Veriut, Holanda, Suedia, Rusia, Azerbajxhani, Danimarka, Norvegjia, Zvicra, si edhe Malta.

Faqja zyrtare e Eurosong e cilësoi zërin e Jonida  Maliqit mahnitës dhe interpretimin e saj te shkëlqyer./abcnews.al

Finale-angleze-1280x750.jpg
ad min11:59 | 10/05/2019

Finalja e Ligës së Europës do të luhet mes Arsenalit dhe Çelsit. Suksesi I tyre do të thotë se të katër finalistët në kupat e Europës do të jenë nga Anglia.

Historia shkruhet kështu.

Për herë të parë në historinë e kupave të Europës, të gjithë finalistët do të jenë nga një vend i vetëm, Anglia.

Arsenali e Çelsi u kualifikuan për në ndeshjen fundore të Ligës së Europës, ashtu si Liverpuli e Totenhemi në atë të Championsit.

Dy skuadrat londineze kanë mundësi të fitojnë një trofe këtë sezon, ndërsa suksesin e arritën në mënyrë të ndryshme.

Të mbiquajturit “topçinjtë”, pra Arsenali, dominoi dhe fitoi me meritë edhe në stadiumin e Valencias, me trajnerin Unai Emeri që u ndodh përballë ish-ekipit të tij.

Anglezët triumfuan 4-2, edhe pse spanjollët kaluan të parët në avantazh me Kevin Gameiron.

Sulmuesi Pjer Emerik Obamejang ishte heroi i miqve, duke shënuar plot 3 gola, ndërsa një tjetër u realizua nga sulmuesi tjetër, Aleksandre Lakazetë.

Bashkë me fitoren e parë arritur në Londër, Arsenali e mundi kundërshtarin me shifrat 7-2, por gjithsesi do të duhet ta fitojë finalen, jo vetëm për një titull, por edhe për t’u kualifikuar për në Champions, sezonin tjetër.

“Arritëm një sukses të madh, por fakti është se nuk kemi fituar ende asgjë, – theksoi Emeri, – duhet të luajmë finalen. Gjithsesi, jam krenar për lojtarët e mi. Nuk ishte e lehtë të mundeshin Napoli dhe Valencia. Jam i lumtur për sulmuesit e mi, që na ndihmuan me golat, por edhe me lojën në mbrojtje”.

Çelsi e pati shumë më të vështirë ndaj Frankfurtit.

Ndonëse luajti në stadiumin e tij, “Stemford Brixh”, ndonëse kishte barazuar 1-1 në Gjermani, sërish iu deshën 120 minuta, madje edhe penalltitë.

Loftus-Çik kaloi vendasit në epërsi, por me të filluar pjesa e dytë i zakonshmi Luka Joviç barazoi për Ajntrahtin.

Londinezët fituan penalltitë 4-3, dhe u kualifikuan për në finale.

“Mendoj se e merituam finalen, edhe pse ishte shumë e vështirë, – tha Sarri, – Frankfurti është një skuadër e nivelit shumë të lartë. Nuk është e lehtë për ekipet angleze të arrijnë në finalet europiane, pasi këtu luhet më shumë se në vendet e tjera. Ka diferencë të madhe, dhe ritmi është më i lartë. Premier Liga është kampionati më i mirë në botë”.

Penalltia vendimtare u shënua nga ylli belg, Eden Hazar, i cili u pyet nëse finalja do të jetë ndeshja e tij e fundit me fanelën e Çelsit.

“Nuk e di se çfarë do të ndodhë, – u përgjigj belgu, – nëse do të jetë e fundit, do të bëj ç’mos që ta fitojmë, nëse jo, të shohim. E vërteta është se unë nuk po mendoj aspak për këtë gjë”.

Finalja e Ligës së Europës, Arsenal-Çelsi do të luhet në Baku të Azerbajxhanit, në 29 Maj./ABC News Albania 24/7

tott.jpg
ad min23:18 | 08/05/2019

Gjysmëfinalet e këtij sezoni të Champions League kanë qenë padyshim shumë emocionuese. Pas përmbysjes që bëri Liverpool ndaj Barcelonës një natë më parë, tashmë ishte radha e Tottenham-it që ta përsëriste.

Spurs-at arritën të përmbysnin rezultatin ndaj Ajax-it dhe duke u kualifikuar në këtë mënyrë në finalen e madhe.

Anglezët arritën të rikuperonin dy golat e De Ligt dhe Ziyech vetëm me anë të Lucas Moura-s. Braziliani shënoi tripletë dhe njëkohësisht dërgoi tifozët në qiellin e shtatë.

Rezultati i përgjithshëm shkoi në barazim 3-3, por rregulli i golave në fushë kundërshtare kualifikoi direkt anglezët.

Një zhgënjim për “Hirushen” e këtij sezoni, Ajax-in. Holandezët rrëmbyen zemrat e tifozëve pasi mposhtën dy nga pretendentët kryesorë të Ligës së Kampioneve, Real Madridin dhe Juventusin.

Tashmë finalja do të jetë tërësisht britanike, me Liverpool dhe Tottenham që do të luajnë me 1 Qershor në “Wanda Metropolitano” të Madridit për të vendosur se kush do të marrë trofeun e Champions League./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono